དྲི་བཅས་ཀྱི་ཆོས་ཉིད་ཡོད་མེད་དཔྱད་སྒོ།
དྲི་བཅས་ཀྱི་ཆོས་ཉིད་ཡོད་མེད་དཔྱད་སྒོ་ནི།
ཐེག་མཆོག་དབུ་མའི་ཟིན་བྲིས་ལས།ཆོས་ཉིད་དེ་ལ་གློ་བུར་གྱི་དྲི་མས་ནམ་ཡང་གོས་མ་མྱོང་བའི་ཕྱིར་ཆོས་ཉིད་རང་བཞིན་གྱིས་རྣམ་པར་དག་པ་ཡིན་ཏེ། ཞེས་སོགས་ཀྱི་དོན་ལ་དཔྱད་པ་ལ། འོ་ན་ཆོས་ཉིད་ཡིན་ན་དྲི་མེད་ཀྱི་ཆོས་ཉིད་ཡིན་པས་ཁྱབ་པར་ཐལ། ལུང་དེའི་ཕྱིར། འདོད་ན། དྲི་བཅས་ཀྱི་ཆོས་ཉིད་མེད་པར་ཐལ། འདོད་པའི་ཕྱིར། འདོད་ན། དྲི་བཅས་ཀྱི་ཆོས་ཉིད་ཆོས་ཅན། ཡོད་པར་ཐལ། ཁྱོད་ལ་ལྟོས་ནས་སེམས་ཅན་རྣམས་དེ་བཞིན་གཤེགས་པའི་སྙིང་པོ་ཅན་དུ་བཞག་པ་ཡིན་པའི་ཕྱིར། རྟགས་མ་གྲུབ་ན། དེ་ལྟར་ཡིན་པར་ཐལ། དེ་ཡིན་པ་ས་གསུམ་བརྙེས་པ་འཕགས་པ་ཐོགས་མེད་ཀྱི་དགོངས་པ་ཡིན་པའི་ཕྱིར། རྟགས་མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་རྒྱུད་བླ་ཐོགས་འགྲེལ་ལས། དྲི་མ་དང་བཅས་པའི་དེ་བཞིན་ཉིད་ཀྱི་དབང་དུ་མཛད་ནས་སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཞེས་གསུངས་པའི་ཕྱིར། འདོད་ན། དྲི་བཅས་ཀྱི་དེ་བཞིན་ཉིད་ཆོས་ཅན། ཡོད་པར་ཐལ། འདོད་པའི་ཕྱིར། འདོད་ན། དྲི་བཅས་ཀྱི་དེ་བཞིན་ཉིད་མེད་པར་ཐལ། ཆོས་ཉིད་ཡིན་ན་དྲི་མེད་ཀྱི་དེ་བཞིན་ཉིད་ཡིན་པས་ཁྱབ་པའི་ཕྱིར། རྟགས་མ་གྲུབ་ན། དེ་ལྟར་ཁྱབ་པར་ཐལ། དེ་ཁྱབ་པ་རྗེ་ཏཱ་ར་ནཱ་ཐའི་དགོངས་པ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་བསྟན་བཅོས་སྙིང་པོ་ལས། དེ་བཞིན་ཉིད་ལ་དྲི་བཅས་ནམ་ཡང་མེད། །ཅེས་གསུངས་པའི་ཕྱིར། འདོད་ན། འོ་ན་དྲི་བཅས་ཀྱི་དེ་བཞིན་ཉིད་མེད་པར་ཐལ། འདོད་པའི་ཕྱིར། འདོད་ན། དྲི་བཅས་ཆོས་ཅན། ཁྱོད་ཀྱི་ཆོས་ཉིད་ཡོད་པར་ཐལ། ཁྱོད་གཞི་གྲུབ་པའི་ཕྱིར། མ་ཁྱབ་ན། འོ་ན་སེམས་ཅན་ཆོས་ཅན། ཁྱོད་ཀྱི་ཆོས་ཉིད་མེད་པར་ཐལ། ཅིའི་ཕྱིར་ཞེ་ན། འོ་ན་སེམས་ཅན་ཆོས་ཅན། ཁྱོད་ཀྱི་ཆོས་ཉིད་ཡོད་དེ། རྟགས་ཁོད། གཞི་གྲུབ་པའི་ཕྱིར་ཟེར་ན། འོ་ན་དྲི་བཅས་ཆོས་ཅན། ཁྱོད་ཀྱི་ཆོས་ཉིད་ཡོད་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་ན། དྲི་བཅས་ཀྱི་ཆོས་ཉིད་ཡོད་པར་ཐལ། འདོད་པའི་ཕྱིར། འདོད་ན། ཞེས་དེ་ལྟར་རིགས་འཕྲུལ་སྤྲོ་བར་བྱའོ། །