བུམ་པ་ལྷག་པར་གནས་པའི་ཆོ་ག
དེ་ནས་རིན་པོ་ཆེའི་བུམ་པ་ཚད་དང་དབྱིབས་ཀྱིས་མཛེས་པ་དྲུག་གམ། །བཅུ་གཉིས་ལ་སོགས་པ་ལ་དཀར་པོར་བསྒྱུར་ཞིང༌། སྣ་ཚོགས་པདྨའི་སྟེང་དུ་རིགས་སོ་སོའི་ཕྱག་རྒྱ་བྲིས་ཏེ། ལས་ཐམས་ཅད་པ་ལ་རྡོ་རྗེ་རྒྱ་གྲམ་བྲིའོ། །སྙིང་པོའི་འབྲུ་ལྔ་དང༌། རིན་པོ་ཆེ་དང༌། སྨན་དང༌། དྲི་དང༌། སྙིང་པོ་རྣམས་ཀྱིས་དགང་བར་བྱ་ཞིང༌། སྤོས་རྣམས་དང་བཅས་པས་བཀང་ལ་མགུལ་ཆིངས་དང༌། མེ་ཏོག་གི་ཕྲེང་བ་དང༌། ཁ་རྒྱན་དང༌། གཟུངས་ཐག་རྡོ་རྗེ་ལ་བཏགས་པ་དང་བཅས་པ། ཡོལ་བ་བྱས་ལ། དེ་དག་མི་དམིགས་པ་ལས། རིན་པོ་ཆེ་ལས་གྲུབ་པའི་གཞལ་ཡས་ཁང་བའི་ནང་དུ། པདྨའི་སྡོང་པོའི་སྟེང་དུ་ཉི་ཟླའོ། །དེའི་སྟེང་དུ་ཆོ་ག་གསུམ་ལས་གཙོ་བོའི་སྐུ་བསྐྱེད་ལ། ཡེ་ཤེས་སེམས་དཔའ་བསྒྲུབས་ཏེ། མཆོད་ཅིང་བསྟོད་ནས། བཟླས་པ་བྱ་སྟེ། བརྒྱ་རྩ་བརྒྱད་ལ་སོགས་པ་ཅི་རིགས་པར་བཟླས་པའི་རྗེས་ལ། མཆོད་ཡོན་ལ་ཡི་གེ་བརྒྱ་པ་ཅི་རིགས་པ་བཟླས་པའི་ཆུས་རེག་པའི་ཚེ་ན་ཞུ་བའི་ཐིག་ལེའི་རང་བཞིན་དུ་བལྟའོ། །བུམ་པ་ཀུན་ལའང་དེ་བཞིན་དུ་སྦྱར་ཞིང༌། ལས་ཐམས་ཅད་པ་ནི་པདྨའི་སྟེང་དུ་བསྐྱེད་པར་བྱའོ། །བུམ་པ་ལྷག་པར་གནས་པའི་ཆོ་གའོ། །