དམ་པའི་ཆོས་སྡུག་བསྔལ་ཞི་བྱེད་ཇི་ལྟར་བྱུང་བའི་ལོ་རྒྱུས།
༈ དམ་པའི་ཆོས་སྡུག་བསྔལ་ཞི་བྱེད་ཇི་ལྟར་བྱུང་བའི་ལོ་རྒྱུས་ནི། དེའང་ཕ་རོལ་ཏུ་ཕྱིན་པ་བདུད་ཀྱི་གཅོད་ཡུལ་ཞེས་བྱ་བ་གཅོད་ཀྱི་བསམ་གཏན་ནི། སྡུད་པ་ལས། རྒྱུ་རྣམས་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པ་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་གསུངས་པའི་དོན་ཉམས་སུ་ལེན་པ་སྟེ། སྟོང་པར་གནས་པའི་ལྟ་བ། སེམས་ཅན་ཡོངས་སུ་མི་གཏོང་བའི་སྙིང་རྗེ། ཇི་སྐད་སྨྲས་བཞིན་བྱེད་པའི་བྱང་སེམས་ཀྱི་ཚུལ་ཁྲིམས། བདེ་བར་གཤེགས་པས་བྱིན་གྱིས་བརླབས་པ་སྟེ། དེ་ཉམས་སུ་ལེན་པ་ལ་གཅོད་ཡུལ་ཞེས་བྱ་སྟེ། དེ་ཡང་གང་ལ་གཅོད་ཅེ་ན། མཛོད་ལས། ཕྲ་རྒྱས་སྤངས་པ་མ་ཡིན་དང་། །ཡུལ་ནི་ཉེ་བར་གནས་པ་དང་། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་སྐྱེ་སྟེ། ཞེས་བཤད་པས་གཅད་བྱ་ནི་ཉོན་མོངས་པ་ཡིན་ལ། ཉོན་མོངས་པ་དེ་དག་ཕྲ་རྒྱས་དང་། ཡུལ་དང་། ཚུལ་བཞིན་མ་ཡིན་པའི་ཡིད་ལ་བྱེད་པ་ལས་སྐྱེ་བས་ན། རྣལ་འབྱོར་པས་ཡུལ་དེ་ཉེ་བར་བཅུག་ནས་བག་ཆགས་བླངས་ཏེ། ཚུལ་བཞིན་མ་ཡིན་པའི་ཡིད་ལ་བྱེད་པ་སྔོན་དུ་འགྲོ་བའི་སྒོ་ནས་ཉོན་མོངས་པ་རྣམས་ཡུལ་གྱི་ཐོག་དེ་ཉིད་དུ་གཅོད་པར་བྱེད་པས་གཅོད་ཡུལ་ཞེས་བྱའོ། །དེའི་གདམས་ངག་ཀྱང་དམ་པ་ནས་བརྒྱུད་པ་ལ་ཕོ་གཅོད་དང་། མ་ཅིག་ནས་བརྒྱུད་པ་ལ་མོ་གཅོད་ཅེས་བྱ། དེ་སྤྱིར་བོད་དུ་བྱོན་པའི་གདམས་པ་ཁྲིད་ལུགས་ཕལ་ཆེ་བ་ནི་སློབ་མ་མི་དགེ་བ་ལས་བཟློག་ཏུ་བཅུག་ནས་དེའི་སེམས་རྒྱུད་ཀྱི་ཉོན་མོངས་པ་སྦྱོང་བར་བྱེད་པ་གཙོ་ཆེ་བ་ཡིན་མོད། ཞི་བྱེད་ཀྱི་ཆོས་འདི་ནི་ཚེ་རབས་སྔ་མའི་ལས་དབང་གིས་ཚེ་འདིར་ལུས་དམན་པར་གྱུར་པ་དང་། ནད་བུ་ཅན་དང་། དབུལ་ཕོངས་ཅན་དང་། མི་མ་ཡིན་པས་གཙེས་པ་དག་གི་སྡུག་བསྔལ་རྣམས་འཕྲལ་འཕྲལ་དུ་ཞི་བར་བྱས་ནས་རྣལ་འབྱོར་ལ་སྦྱོར་བས་ན་སྡུག་བསྔལ་ཞི་བྱེད་ཅེས་བྱ་སྟེ། རྒྱལ་བའི་ཡུམ་ལས་ཀྱང་། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། ཞེས་གསུངས་སོ། །