འཁོར་འདས་གཉིས་ཀའི་གཞི་གང་ཡིན་སོགས་ལ་དཔྱད་པའི་སྒོ།
འཁོར་འདས་གཉིས་ཀའི་གཞི་གང་ཡིན་སོགས་ལ་དཔྱད་པའི་སྒོ་ནི།
དབྱིངས་ཉིད་ཀུན་གཞི་ཡེ་ཤེས་སུ་སྐྱེས་བུ་དམ་
པ་རྣམས་ཀྱི་དགོངས 
་སོ། །ཞེས་སོགས་གསུངས་པ་ལ།དབྱིངས་ཉིད་ཀུན་གཞི་ཡིན་པར་ཐལ། འདོད་པའི་ཕྱིར། འདོད་ན། དབྱིངས་ཆོས་ཅན།འཁོར་འདས་གཉིས་ཀའི་གཞི་ཡིན་པར་ཐལ། ཀུན་གཞི་ཡིན་པའི་ཕྱིར། རྟགས་ཁས།འདོད་ན། དབྱིངས་ཆོས་ཅན། གཉེན་པོ་ཟག་མེད་དང༌། སྤང་བྱ་གཉིས་ཀའི་གཞི་ཡིན་པར་ཐལ། འཁོར་འདས་གཉིས་ཀའི་གཞི་ཡིན་པར་འདོད་པའི་ཕྱིར། འདོད་ན། དབྱིངས་ཆོས་ཅན། འགལ་བའི་ཆོས་གཉིས་ཀྱི་གཞི་ཡིན་པར་ཐལ། འདོད་པའི་ཕྱིར། འདོད་ན། དབྱིངས་ཆོས་ཅན། འགལ་བའི་ཆོས་གཉིས་ཀའི་གཞི་མ་ཡིན་པར་ཐལ། འགལ་བའི་ཆོས་གཉིས་ཀའི་རྟེན་གཅིག་པ་མི་སྲིད་པའི་ཕྱིར། མ་གྲུབ་ན། དེ་ལྟར་མི་སྲིད་པར་ཐལ། དེ་མི་སྲིད་པ་རྟོན་པ་བཞི་ལྡན་ཀུན་མཁྱེན་ཤེས་རབ་རྒྱལ་མཚན་གྱི་ དགོངས་པ ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་ཕར་ཕྱིན་མདོ་ལུགས་མ་ལས། འགལ་བ་དག་རྟེན་གཅིག་པར་མི་འཐད་པའི་ཕྱིར་ཏེ། གྲང་བ་དང་དྲོ་བའི་རེག་པ་རྟེན་གཅིག་པར་མི་འཐད་པ་བཞིན་ནོ། །ཞེས་གསུངས་པའི་ཕྱིར། འདོད་ན། དབྱིངས་ཆོས་ཅན། སྤང་གཉེན་གཉིས་ཀའི་རྟེན་མ་ཡིན་པར་ཐལ། འདོད་པའི་ཕྱིར། འདོད་ན། དབྱིངས་ཆོས་ཅན། འཁོར་འདས་གཉིས་ཀའི་རྟེན་མ་ཡིན་པར་ཐལ། འདོད་པའི་ཕྱིར། འདོད་ན། དབྱིངས་ཆོས་ཅན།འཁོར་འདས་གཉིས་ཀའི་རྟེན་ཡིན་པར་ཐལ། དེ་ལྟར་ཡིན་པ་ཐམས་ཅད་མཁྱེན་པ་ཏཱ་ར་ནཱ་ཐའི་ དགོངས་པ ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། རྗེ་དེ་ཉིད་ཀྱིས་མཛད་པའི་ཐེག་མཆོག་དབུ་མ་རྣམ་པར་ངེས་པ་ལས། འཁོར་འདས་ཀུན་གྱི་གཞི་ཡིན་དོན་དམ་ཕྱིར། །ཞེས་གསུངས་པའི་ཕྱིར། འདོད་ན། དབྱིངས་ཆོས་ཅན། འཁོར་འདས་གཉིས་ཀའི་གཞི་ཡིན་པར་ཐལ། འདོད་པའི་ཕྱིར། འདོད་ན། དབྱིངས་ཆོས་ཅན། གཉེན་པོ་ཟག་མེད་དང༌། སྤང་བྱ་གཉིས་ཀའི་གཞི་ཡིན་པར་ཐལ། འཁོར་འདས་གཉིས་ཀའི་གཞི་ཡིན་པར་འདོད་པའི་ཕྱིར། འདོད་ན། དེ་གཉིས་ཀའི་གཞི་རྟེན་གཅིག་མ་ཡིན་པར་ཐལ། སྣང་མུན་གྱི་རྟེན་གཅིག་མི་རུང་བ་བཞིན་སྤང་གཉེན་གཉིས་ཀྱི་རྟེན་སོ་སོ་ནས་བཞག་དགོས་པའི་ཕྱིར། མ་གྲུབ་ན། དེ་ལྟར་ཡིན་པར་ཐལ། དེ་ཡིན་པ་གངས་ཅན་ཤིང་རྟའི་སྲོལ་འབྱེད་ཀུན་མཁྱེན་ཤེས་རབ་རྒྱལ་མཚན་གྱི་ དགོངས་པ ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་ཕར་ཕྱིན་མདོ་ལུགས་མ་ལས། སྣང་བ་དང་མུན་པའི་རྟེན་གཅིག་ཏུ་མི་རུང་བ་བཞིན་དུ་སྤང་བྱ་དང་གཉེན་པོའི་ཆོས་དག་འཇུག་པའི་རྟེན་ཀུན་གཞི་གཉིས་ཡོད་པའི་ཕྱིར། ཞེས་གསུངས་པའི་ཕྱིར། འདོད་ན། ཀུན་གཞི་རྣམ་ཤེས་ཆོས་ཅན། འཁོར་བ་ལས་རྣམ་བྱང་ཟག་མེད་ཀྱི་ས་བོན་གྱི་རྟེན་མ་ཡིན་པར་ཐལ། འདོད་པའི་ཕྱིར། འདོད་ན། ཀུན་གཞི་རྣམ་ཤེས་དེ་ཟག་མེད་ཀྱི་ས་བོན་གྱི་རྟེན་ཡིན་པར་ཐལ། དེ་ལྟར་ཡིན་པ་ཐམས་ཅད་མཁྱེན་པ་ཏཱ་ར་ནཱ་ཐའི་ དགོངས་པ ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། རྗེ་དེ་ཉིད་ཀྱིས་མཛད་པའི་ཐེག་མཆོག་དབུ་མ་རྣམ་པར་ངེས་པ་ལས། འཁོར་དང་ལམ་གྱི་གཞི་གྱུར་ཀུན་གཞི་སྟེ། །ཞེས་དང༌། དེའི་ཟིན་བྲིས་ལས། ཟག་པ་མེད་པའི་ས་བོན་ནི། ཀུན་གཞི་རྣམ་ཤེས་ཀྱི་སྟེང་དུ་བཞག་པ་ཡིན་ལ། ཞེས་གསུངས་པའི་ཕྱིར། འདོད་ན། ཀུན་གཞི་རྣམ་ཤེས་ཟག་མེད་ཀྱི་ས་བོན་གྱི་རྟེན་ཡིན་པར་ཐལ། འདོད་པའི་ཕྱིར། འདོད་ན། ཀུན་གཞི་རྣམ་ཤེས་ཟག་མེད་ཀྱི་ས་བོན་གྱི་རྟེན་མ་ཡིན་པར་ཐལ། ཟག་མེད་ཀྱི་ས་བོན་དེ་དེའི་གཉེན་པོའི་ས་བོན་ཡིན་པའི་ཕྱིར། མ་ཁྱབ་ན། དེ་ལ་ཁྱབ་པ་ཡོད་པར་ཐལ། དེ་ལྟར་ཁྱབ་པ་འཕགས་པ་ཐོགས་མེད་ཀྱི་ དགོངས་པ ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱིས་མཛད་པའི་ཐེག་བསྡུས་ལས། དེ་ནི་ཀུན་གཞི་རྣམ་པར་ཤེས་པ་ལ་མ་ཡིན་ཏེ། དེའི་གཉེན་པོའི་ས་བོན་ཉིད་ཡིན་པའི་ཕྱིར། ཞེས་གསུངས་པའི་ཕྱིར། རིགས་པའི་སྒོ་བརྒྱ་འབྱེད་པའི་ས་བོན་ཡིན་ནོ།།
༈ ཤེར་ཕྱིན་བྱམས་ཞུས་ལེའུ་བཀའ་བར་ཐ་གང་ཡིན་སོགས་ལ་དཔྱད་པའི་སྒོ་ནི།བཀའ་བསྡུ་བཞི་བ་ལས། སྙིང་པོའི་མདོ་ལྔ་མདོ་བཅུ་ལ་སོགས་སུ། །ཞེས་སོགས་ཀྱི་སྐབས་སུ་ཤེར་ཕྱིན་བྱམས་ཞུས་ཀྱི་ལེའུ་ཆོས་ཅན། ངེས་དོན་གྱི་མདོ་ཡིན་པར་ཐལ། ངེས་དོན་མདོ་བཅུའི་གཉིས་པ་ཡིན་པའི་ཕྱིར། འདོད་ན། ཤེར་ཕྱིན་བྱམས་ཞུས་ཀྱི་ལེའུ་ཆོས་ཅན། ངེས་དོན་གྱི་མདོ་མ་ཡིན་པར་ཐལ། དྲང་དོན་གྱི་མདོ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། འཁོར་ལོ་བར་བ་ཡིན་པའི་ཕྱིར། མ་ཁྱབ་ན། ཁྱབ་པར་ཐལ། དེ་ལྟར་ཁྱབ་པ་བདག་ཅག་གི་སྟོན་པ་མཉམ་མེད་ཐུབ་པའི་དབང་པོའི་ དགོངས་པ ་ཡིན་པའི་ཕྱིར། མ་གྲུབ་ན།དེ་ཡིན་པར་ཐལ། དེ་ཉིད་ཀྱིས་མཛད་པའི་མདོ་སྡེ་ དགོངས་འགྲེལ་ལས། ཆོས་ཀྱི་འཁོར་ལོ་གཉིས་པ ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས་ཀྱི། ཞེས་གསུངས་པའི་ཕྱིར། འདོད་ན། ཤེར་ཕྱིན་བྱམས་ཞུས་ཀྱི་ལེའུ་ཆོས་ཅན། ངེས་དོན་གྱི་མདོ་མ་ཡིན་པར་ཐལ། འདོད་པའི་ཕྱིར། འདོད་ན། ཤེར་ཕྱིན་བྱམས་ཞུས་ཀྱི་ལེའུ་ཆོས་ཅན།ངེས་དོན་གྱི་མདོ་ཡིན་པར་ཐལ། ངེས་དོན་མདོ་བཅུའི་གཉིས་པ་དེ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ལྟར་ཡིན་པ་ཀུན་མཁྱེན་དོལ་བོ་བ་ཤེས་རབ་རྒྱལ་མཚན་གྱི་ དགོངས་པ ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། དེ་ཉིད་ཀྱི་གསུང་རབ་ལས། བྱང་ཆུབ་སེམས་དཔའི་བསླབ་པ་རབ་ཏུ་དབྱེ་བའི་ལེའུ་ཆ་བཅུ་གཉིས་བྱམས་ཞུས་སུ་གྲགས་པ་གཉིས་གཅིག་ཏུ་བསྡུས་པ། ཞེས་གསུངས་པའི་ཕྱིར། འདོད་ན། གཞན་ཡང་གཞན་སྟོང་དབུ་མའི་རྒྱན་ལས། བར་བར་དོན་དམ་དབྱིངས་སོགས་འགོག་ན་ནི། །བྱམས་ཞུས་སོགས་དང་ནང་འགལ་ཡོད་པར་འགྱུར། །ཞེས་དང༌། ཤེར་སྙིང་ཚིག་འགྲེལ་ལས། དང་པོ་དང་བར་བ་ནས་ཀྱང་སྒྲས་ཟིན་ལ་གསལ་བར་སྟོན་པའི་ཚིག་ཅི་རིགས་པ་ནི་ཡོད་དོ། །ཞེས་དང༌།ཡང་ཀུན་མཁྱེན་གྱི་གསུང་ལས། ངེས་དོན་མདོ་ལྔ་ནི། ཤེར་ཕྱིན་ལྔ་བརྒྱ་བ་དང༌། ཞེས་དང༌།ཆོས་འབྱུང་རིན་པོ་ཆེའི་གཏེར་ལས། དུས་དང་པོར་གསུངས་པ་བདེན་བཞིའི་ཆོས་འཁོར།བར་དུ་གསུངས་པ་མཚན་ཉིད་མེད་པའི་ཆོས་འཁོར་ཐ་མར་གསུངས་ པ་དོན་རྣམ་པར་ངེས་པའི་ཆོས་འཁོར། དེ་གསུམ་དུ་དགོངས ་འགྲེལ་དུ་བཤད་དོ། །ཞེས་སོ། །ས་བཟང་གི་རྒྱུད་བླའི་འགྲེལ་བ་ལས། བཀའ་དང་པོ་བདེན་བཞིའི་ཆོས་ཀྱི་འཁོར་ལོ་ལོ་བདུན། ཞེས་དང༌།བཀའ་བར་བ་མཚན་ཉིད་མེད་པའི་ཆོས་ཀྱི་འཁོར་ལོ་ལོ་བཅུ། ཞེས་དང༌། བཀའ་ཐ་མ་དོན་དམ་རྣམ་པར་ངེས་པའི་ཆོས་ཀྱི་འཁོར་ལོ་ལོ་སུམ་ཅུའི་བར་དུ་བསྐོར་བས། ཞེས་གསུངས་སོ། །ཚུལ་གཉིས་རྣམ་འབྱེད་ལས། འཁོར་ལོ་རིམ་པ་གསུམ་པོ་འདི་ཡང་དུས་ཐོག་མཐའ་ནི་མ་ཡིན་ཏེ། ཞེས་གསུངས་པ་སོགས་ལ་དཔྱད་པར་བྱའོ། །སྨྲས་པ། དཔྱད་གསུམ་དག་པའི་ལུང་གི་རྒྱབ་རྟེན་བཅས། །ཚུལ་གསུམ་རྟགས་ཀྱིས་དཔྱད་པའི་ཆོས་ཚུལ་ལ། །ལེགས་བཤད་སྦྱང་བའི་སྐལ་བ་ཐོབ་སླད་དུ། །བློ་གསར་སྐལ་བ་ཙམ་དུ་འདི་སྐད་སྨྲས། །འདིར་འབད་རྣམ་དཀར་དགེ་རྩ་ཅི་མཆིས་པས། །ལུང་རིགས་བྲལ་བའི་རྫུན་ལས་ངེས་གྲོལ་ནས། །ཟབ་མོའི་གནས་རྣམས་ཇི་བཞིན་རབ་རྟོགས་ཏེ། །རྣམ་པ་ཐམས་ཅད་མཁྱེན་པའི་སར་གནས་ཤོག །ཅེས་ངེས་གསང་མཐའ་བྲལ་དབུ་མ་གཞན་སྟོང་གི་དོགས་གཅོད་ལུང་རིགས་རྡོ་རྗེའི་གཟེགས་མ་ཞེས་བྱ་བ་འདི་ནི་རྒྱ་ནག་སྤོས་ངད་ལྡན་པའི་གྲོང་ཁྱེར་དུ་ཀཿ་ཐོག་དགོན་ཆེན་གྱི་མཁན་གྲྭ་དུ་མ་ལ་དཔེ་ཁྲིད་ཀྱི་ཞོར་ལ་སྤྲང་འཁྱམས་པ་ངག་དབང་དངོས་གྲུབ་དཔལ་གྱིས་སྔར་ལས་དང་བོ་བ་འགའ་ཞིག་ལ་ཕན་ཕྱིར་དུ་རྟགས་གསལ་བསྒྲིགས་པ་འགའ་ཞིག་ཕྱོགས་གཅིག་ཏུ་བསྡུས་ནས་སྦྱར་བའོ། །འདིས་ཀྱང་ལུང་རིགས་དང་ལྡན་པའི་བློ་གྲོས་ཟབ་གསལ་དང་ལྡན་པ་ཐོབ་པར་གྱུར་ཅིག ། །། སརྦ་མངྒ་ལཾ།