ལྔ་བ་མ་བྱིན་ལེན་གྱི་མཐར་ཐུག་བཤད་པ།
ལྔ་བ་མ་བྱིན་ལེན་གྱི་མཐར་ཐུག་བཤད་པ་ནི།
རྩ་བར། དེ་བྱས་ནས་རྐུ་བ་ལ་ནི་ཁུར་བརྐུས་པ་ནའོ། །ཞེས་པ་ལ་སོགས་པའི་དོན་མ་བྱིན་ལེན་གྱི་མཐར་ཐུག་གཏན་ལ་དབབ་པ་ལ་གསུམ་ལས། དང་པོ་གཞན་ལུགས་དགག་པ་ནི། ཁ་ཅིག་ན་རེ་མ་བྱིན་པར་ལེན་པའི་མཐར་ཐུག་ནི། གནས་ནས་སྤགས་པ་སྟེ། རྣམ་འབྱེད་ལས། གནས་ནས་གནས་སུ་སྤོད་པར་བྱེད་པ་ན་བརྐུས་པར་བརྗོད་པར་བྱའོ། །ཇི་ལྟར་གནས་ནས་གནས་སུ་སྤོད་ཅེ་ན། གང་དུ་བཞག་པར་གྱུར་པའི་གནས་དེ་ནས་སྤགས་ཤིང་གཞན་དུ་འཇོག་པར་བྱེད་པ་སྟེ། ཞེས་དང༌། ཊཱི་ཀ་ལས། གང་ཁྲི་ལས་ལྡང་བ་ལ་སོགས་པའི་ཚེ་ན་ཉེས་བྱས་སོ། །ནོམ་པ་ན་ཉེས་པ་སྦོམ་པོའོ། །གནས་ནས་སྤགས་པ་ན་ཕམ་པར་བསྟན་ཞེས་པ་ལ་སོགས་པ་མཐར་ཐུག་གནས་སྤགས་ཡིན་པའི་གཞུང་མང་དུ་བྱུང་བས་གྲུབ་བོ་ཞེས་ཟེར་རོ། །འོ་ན་བློ་གྲོས་དུ་མས་རྐུ་བ་ཆོས་ཅན། མ་བྱིན་ལེན་གྱི་མཐར་ཐུག་གནས་སྤགས་མ་ཡིན་པ་མི་འཐད་པར་ཐལ། མ་བྱིན་ལེན་གྱི་མཐར་ཐུག་གནས་སྤགས་ཡིན་པའི་ཕྱིར་རོ། །འདོད་ན། ཊཱི་ཀ་ལས། རྐུན་པོ་རྣམས་བློ་གྲོས་མི་མཐུན་པ་བློ་གྲོས་དུ་མ་ཉིད་ཡིན་ན་བགོ་སྐལ་ཐོབ་ན་བརྐུས་པ་ཡིན་གྱི་གནས་སྤགས་པ་ན་བརྐུས་པ་ནི་མ་ཡིན་ནོ། །ཞེས་གསུངས་སོ །གལ་ཏེ་རྫས་འདུག་པ་གནས་ནས་སྤགས་པ་དེ་འདིའི་མཐར་ཐུག་གི་ཡན་ལག་ཡིན་པར་འདོད་ན་ནི། བརྟན་པར་གནས་པའི་བྱེ་བྲག་ཞིང་དང་ཁང་ཁྱིམ་རྐུ་བ་ཆོས་ཅན། མ་བྱིན་ལེན་གྱི་མཐར་ཐུག་གྲུབ་པ་མི་སྲིད་པར་ཐལ། རྫས་འདུག་པ་གནས་ནས་སྤགས་པ་མི་སྲིད་པའི་ཕྱིར་རོ། །འདོད་ན། ས་གཞི་དང་ཁང་ཁྱིམ་དག་རྐུ་ན་ཕམ་པ་བསྐྱེད་པར་གསུངས་པ་དང་འགལ་ལོ། །ཁྱེད་ཀྱིས་སྒྲུབ་བྱེད་དུ་བཀོད་པ་མཐར་ཐུག་གནས་སྤགས་ཡིན་པར་བཤད་པའི་གཞུང་ཐམས་ཅད་དེའི་ཚེ་ན་ཐོབ་བློ་སྐྱེ་བའི་ཕྱིར་ཞེས་དགོངས་པ་ཡིན་ནོ་ཞེས་གསུངས་ཏེ། དེའང་འདིའི་མཐར་ཐུག་ཐོབ་བློ་ཡིན་པར་གསུངས་པའི་གཞུང་མང་དུ་ཡོད་པ་འདི་རྣམས་གཙོ་བོར་བྱས་པའོ། །