བདུན་པ། ཡི་གེ་ཆའི་སྦྱོར་བ་ཐིག་ལེར་བསྒོམ་པའི་ཆོ་ག
དེ་ནས་བདག་མེད་མའི་རྣལ་
འབྱོར་པས་སྔར་བཞིན་པའི་སྤྲུལ་པའི་འཁོར་ལོ་ལ་བདག་མེད་མར་ཡིད་ཀྱིས་བསྐྱེད་ལ། དེ་ཡང་སྤྲུལ་པའི་འཁོར་ལོར་པདྨ་འདབ་མ་ནང་དུ་བཞི་ཕྱིར་བཅུ་བསྒོམ་མོ། །དེ་ནས་དེའི་ཟེ་འབྲུལ་རྣམ་པར་ཤེས་པ་ཡིད་ཞེ་སྡང་སངས་རྒྱས་ཀྱི་ས་ཤིན་ཏུ་རྣམ་པར་དག་པའི་ཡེ་ཤེས་ཀྱི་བདག་ཉིད་ཅན་བདག་མེད་མའི་ངོ་བོ་དབྱངས་ཡིག་དང་པོ་ཐིག་ལེ་དང་བཅས་པ་རྣམ་པར་བསྒོམས་པ་འདབ་མ་དག་ལ་དེ་ལས་སྤྲོས་པ་ནི་རྣལ་འབྱོར་མ་བཅུ་བཞིའི་རང་བཞིན་ཅན་དབྱངས་ཡིག་བཅུ་བཞི་བསྒོམ་པར་བྱའོ། །དེ་ལ་ནང་གི་ཤར་ཕྱོགས་ཀྱི་འདབ་མ་ལ་གཟུགས་མིག་གཏི་མུག་སངས་རྒྱས་ཀྱིས་མེ་ལོང་ལྟ་བུའི་བདག་ཉིད་རྡོ་རྗེ་མའི་རང་བཞིན་དབྱངས་ཡིག་གཉིས་པའོ། །ལྷོ་རུ་ཚོར་བ་སྣ་ང་རྒྱལ་སངས་རྒྱས་ཀྱིས་མཉམ་པ་ཉིད་ཀྱི་བདག་ཉིད་དཀར་མོའི་དབྱངས་ཡིག་གསུམ་པའོ། །ནུབ་ཏུ་འདུ་ཤེས་ལྕེ་འདོད་ཆགས་སངས་རྒྱས་ཀྱི་སོ་སོར་རྟོག་པའི་བདག་ཉིད་ཆུའི་རྣལ་འབྱོར་མ་ངོ་བོ་དབྱངས་ཡིག་བཞི་པའོ། །བྱང་དུ་འདུ་བྱེད་ལུས་ཕྲག་དོག་སངས་རྒྱས་ཀྱི་བྱ་བ་གྲུབ་པའི་བདག་ཉིད་ཅན་རྡོ་རྗེ་མཁའ་འགྲོ་མའི་ངོ་བོ་དབྱངས་ཡིག་ལྔ་པའོ། །ཕྱི་རོལ་གྱི་དབང་ལྡན་དུ་དགའ་བ་ལ་སོགས་པས་གསུམ་གྱི་བདག་ཉིད་ཅན་སྤོས་མོའི་རྣག་བཞིན་ཅན་དབྱངས་ཡིག་དྲུག་པའོ། །མེའི་མཚམས་སུ་འོད་འཕྲོ་བ་ལ་སོགས་པས་གསུམ་གྱི་བདག་ཉིད་ཅན་རི་ཁྲོད་མའི་རང་བཞིན་དབྱང་ཡིག་བདུན་པའོ། །བདེན་བྲལ་དུ་རིང་དུ་སོང་བ་དང་མིག་གཡོ་བའི་རང་བཞིན་ཅན་གཏུམ་མོའི་ངོ་བོ་དབྱངས་ཡིག་བརྒྱད་པའོ། །རླུང་ལེགས་པའི་བློ་གྲོས་དང་ཆོས་ཀྱི་སྤྲིན་གྱི་བདག་ཉིད་ཅན་གཡུང་མོའི་ངོ་བོ་དབྱངས་ཡིག་དགུ་པའོ། །ཤར་ལ་སོགས་པའི་འདབ་མ་ལ་དད་པ་ལ་སོགས་པ་དབང་པོ་བཞིའི་བདག་ཉིད་ཅན་སྒོ་སྐྱོང་གི་ངོ་བོ་དབྱངས་ཡིག་བཅུ་པ་བཅུ་གཅིག་པ་བཅུ་གཉིས་པ་བཅུ་གསུམ་པའོ། །ནུབ་དང་བདེན་བྲལ་གྱི་མཚམས་སུ་རེག་པ་དང་ཤེས་རབ་དང་དབང་པའི་བདག་ཉིད་ཅན་ས་སྤྱོད་མའི་རང་བཞིན་དབྱངས་ཡིག་བཅུ་བཞི་པའོ། །དབང་ལྡན་དང་ཤར་གྱི་མཚམས་སུ་ཆོས་དང་དད་པ་ལ་སོགས་པ་སྟོབས་ལྔའི་བདག་ཉིད་ཅན་མཁའ་སྤྱོད་མའི་ངོ་བོ་དབྱངས་ཡིག་བཅོ་ལྔ་པའོ། །དབྱངས་ཡིག་དེ་དག་ཀྱང་འོད་གསལ་བ་བདུད་རྩིའི་ཆར་བབ་པར་བསམ་པར་བྱའོ། །དེ་ནས་དབྱངས་ཡིག་དང་
པོ་འོད་ཟེར་གྱི་ཕྲེང་བས་ཁྱབ་སྟེ་ལྷག་པའི་འོད་ཟེར་སྐར་མདའི་རྣམ་པས་རྙེད་པར་རབ་ཏུ་བལྟའོ། །དེ་ནས་ཉི་མའི་འོད་དམར་པོ་སྤྲོས་པས་མཐོང་བས་གསལ་ཏེ་ཐོ་རངས་ཀྱི་སྐར་མ་ལྟར་ཐིམ་པར་དབྱངས་ཡིག་བཅུ་བཞི་པོ་དེ་དག་རྣམ་པར་བསྒོམ་མོ། །དང་པོ་དབྱངས་ཡིག་ཀྱང་ཉིན་མོས་འཇིགས་པ་ལྟར་ཐིག་ལེ་ཕུག་ཏུ་ཞུགས་པར་བསམ་མོ། །དེ་ཡང་ཐིག་ལེ་ཕུག་གི་བུར་པར་ཞུགས་པ་དང་ཉི་མའི་འོད་ཀྱིས་གདུངས་པས་བསྲེག་པར་བྱ་སྟེ། ནཱ་ད་རིང་པོ་ལེགས་པའི་དབྱངས་ཡིག་རྣམ་པར་བསམ་པར་བྱའོ། །དེ་ནས་དེའི་ནཱ་དས་བསྐུལ་བས་སྔགས་དང་ཁྱུ་མཆོག་གི་རྭ་ཡིས་བརྡུངས་པས་ཞུ་བ་ཐག་པ་འཕྱང་བ་ལྟར་ངང་པ་སྐྱུགས་པ་སྟེ། ལྷན་ཅིག་སྐྱེས་པའི་རླུང་གིས་བསྐྱོད་པ་ཚ་བས་གདུངས་པ་ཞི་བ་ལྟར་དོན་དམ་པར་མཆོག་གི་གཟུགས་ལས་རྣམ་པར་འཕྲོས་ཏེ། བདེ་བ་ཆེན་པོའི་རྒྱུན་གྱིས་སྲིད་པ་མ་ལུས་པ་ལ་ཁྱབ་པ་དེར་སོང་བའི་ཡིད་ཅན་གྱི་སྔགས་པས་ཇི་ཙམ་ནུས་པའི་བར་དུ་བསྒོམ་པར་བྱའོ། །དེ་དག་ནི་བདག་མེད་མའི་མན་ངག་ལས་ཡི་གེ་ཆའི་སྦྱོར་བ་ཐིག་ལེར་བསྒོམ་པའི་ཆོ་ག་སྟེ་བདུན་པའོ།། །།