གཉིས་པ་རང་ལུགས་བཞག་པ།

གཉིས་པ་རང་ལུགས་བཞག་པ་ནི།

མ་བྱིན་ལེན་པའི་མཐར་ཐུག་ནི་གང་མ་བྱིན་པར་བླངས་པ་དེ་ཐོབ་པའི་བློ་སྐྱེས་པ་སྟེ། ཐུབ་པ་དགོངས་རྒྱན་ལས། བརྐུས་ནས་ཐོབ་བོ་སྙམ་སྟེ་རྣམ་པར་དབུགས་ཕྱུང་ནས་གནས་ནའོ། །ཞེས་དང༌། ཊཱི་ཀ་ལས། རྐང་པའི་དྲུང་དུ་འོངས་ཀྱང་ཅི་སྲིད་དུ་སྣང་བར་མ་གྱུར་ན་དེའང་བརྐུས་པར་མི་འགྱུར་ཏེ། གྲུབ་པའི་བློ་མེད་པའི་ཕྱིར་རོ། །ཞེས་དང༌། ཞུ་འགྲེལ་ལས་ཀྱང༌། འོག་ཏུ་མ་ལྟུང་ན་ཡལ་ག་ལས་བྲལ་བ་ཙམ་གྱིས་ནི་མ་ཡིན་ཏེ་གྲུབ་པའི་བློ་མེད་པའི་ཕྱིར་རོ། །ཞེས་གསུངས་པས་སོ། །རྐུན་པོ་རྣམས་ལ་དེའི་ཆེད་དུ་ལམ་རྒྱུས་གོ་བར་བྱེད་པ་ལ་ནི་ཤས་ཐོབ་ནའོ་ཞེས་པ་དང༌། འདི་ལ་བློ་གྲོས་དུ་མ་ཉིད་ན་ཐོབ་ན་བརྐུས་པ་ཡིན་ནོ་ཞེས་བཤད་དེ། ཐོབ་ན་ཞེས་གསུངས་པས་ཀྱང་ཐོབ་བློ་ཡིན་པར་ཤུགས་ཀྱིས་གྲུབ་བོ། །གསུམ་པ་རྩོད་པ་སྤང་བ་ནི། འོ་ན་རྣམ་པར་གཏན་ལ་དབབ་པ་བསྡུ་བ་ལས། མ་བྱིན་པར་ལེན་པའི་གཞི་ནི་གཞན་གྱིས་ཡོངས་སུ་བཟུང་བའོ། །མཐར་ཐུག་གནས་ནས་སྤགས་པའོ། །ཞེས་དང༌། འོད་ལྡན་ལས། གནས་ནས་སྤགས་པ་ཁོ་ན་ནི་བརྐུས་པ་ཡིན་ནོ། །ཞེས་གསུངས་པ་དང་འགལ་ལོ་ཞེ་ན། དེའི་ཚེ་ཐོབ་བློ་སྐྱེ་བའི་ཕྱིར་ཞེས་དགོངས་པ་ཡིན་པས་མི་འགལ་ལོ། །གལ་ཏེ་མཐར་ཐུག་གནས་སྤགས་ཡིན་ན་ནི་གང་ཟག་གཅིག་གིས་ཕམ་པ་བཞིའི་མཐར་ཐུག་དུས་གཅིག་ཏུ་གྲུབ་པ་འདི་རུང་ཡང༌། མཐར་ཐུག་ཐོབ་བློ་ཡིན་པ་ལྟར་ན་འདི་མི་རུང༌། ལྟུང་བ་བསྐྱེད་པའི་རྟེན་དགེ་སློང་གཅིག་གིས་ཕམ་པ་བཞི་ཀའི་མཐར་ཐུག་དུས་གཅིག་ཏུ་གྲུབ་པ་མི་སྲིད་པར་ཐལ། དགེ་སློང་གཅིག་ཉིད་ལ་བདེ་བ་ཉམས་མྱོང་བདག་གིར་བྱེད་པའི་རྟོག་པ་དང་མ་བྱིན་ལེན་གྱི་མཐར་ཐུག་ཐོབ་བློའི་རྟོག་པ་གཉིས་ཅིག་ཅར་འཇུག་པ་མེད་པའི་ཕྱིར་རོ། །དེའང་རྣམ་འགྲེལ་ལས། རྟོག་གཉིས་ཅིག་ཅར་འཇུག་པ་མེད། །འདི་ལྟར་རྣམ་པར་རྟོག་པ་རྣམས། །རིམ་གྱིས་འབྱུང་བར་ཡང་དག་རྟོགས། །ཞེས་གསུངས་པས་གྲུབ་བོ། །ཁྱབ་པ་མེད་ན་མ་བྱིན་ལེན་གྱི་མཐར་ཐུག་ཐོབ་བློ་ཡིན་པ་ཉམས་སོ། །འདོད་ན། འོད་ལྡན་ལས། གཅིག་ལ་མཐར་ཐུག་འགྱུར་བ་བཞི་ཡང་འབྱུང་ཞེས་གསུངས་པ་དེ་ནི་ལས་ཀྱི་ལམ་རྣམས་ཅིག་ཅར་རྫོགས་པ་ལ་དགོངས་པ་ཡིན། ཞེས་གསུངས་སོ་ཞེ་ན། དེ་ནི་འོད་ལྡན་དུ་སྔ་རབས་པའི་འདོད་པ་བརྗོད་པ་ཡིན་གྱིས། བྱེ་བྲག་སྨྲ་བ་ལྟར་ན་མཐར་ཐུག་རིམ་གྱིས་གྲུབ་པའོ། །ཞེས་མཚོ་ཊཱིཀ་ལས་གསུངས་མོད་ཞུ་བ་ལས། གཅིག་ལ་མཐར་གྱུར་པ་བཞི་ཡང་འབྱུང༌། ཞེས་གསུངས་པ་དང༌། སྒོ་མང་ཡིག་ཆར་མཐར་ཐུག་ཅིག་ཆར་འབྱུང་བ་ཡོད་པ་རང་ལུགས་སུ་བྱས་ནས་གསུངས་སོ། །མཐར་ཐུག་གནས་སྤགས་ཡིན་པར་གསུངས་པ་དང་མི་འགལ་བའི་རྣམ་གྲངས་གཞན་ཡང་འོད་ལྡན་དུ། གནས་སྤགས་ཀྱི་བྱེ་བྲག་མང་དུ་ཡོད་པར་བསྟན་པའི་སྐབས་ལས་ཁ་ཅིག་ནི་བསམ་པས་བཏང་བའོ། ། ཁ་ཅིག་ཏུ་ནི་ཕམ་པའོ། །ཁ་ཅིག་ཏུ་ནི་མི་སྣང་བའོ། །ཁ་ཅིག་ཏུ་ནི་སྣང་བའོ། །ཁ་ཅིག་ཏུ་ནི་རེ་བ་ཆད་པ་ཞེས་བྱ་བ་ལ་སོགས་པ་མཚན་ཉིད་ཇི་ལྟ་བ་བཞིན་དུ་དཔྱད་ནས་བརྗོད་པར་བྱའོ། །ཞེས་གསུངས་སོ། །མི་རྐུ་བ་ལ་གཉིས་ལས། རང་ལ་མི་མོས་པའི་མི་རྐུ་བ་ནི་མཐུས་འཛིན་པའོ། །རང་ལ་མོས་པའི་མི་རྐུ་བ་ལ་གལ་ཏེ་བརྡས་རྐུ་བ་ན་ནི་བརྡ་དེ་གྲུབ་ན་བརྐུས་པའི་ཕམ་པ་བསྐྱེད་པའོ། །ནམ་མཁའ་མཚམས་གཞན་གྱི་བར་དུ་ཆོད་པའི་ཕྱིར། ཊཱི་ཀ་ལས། འདིར་བྱ་སྨས་པ་ནི་དཔེ་ཙམ་སྟེ། རྫས་ཐམས་ཅད་ནི་ནམ་མཁའི་མཚམས་གཞན་དུ་སོང་ན་བརྐུས་པ་ཡིན་ནོ། །ཞེས་སོ། ། དུད་འགྲོ་གློ་བུར་བའི་དབང་དུ་བྱས་པ་ནི་དུད་འགྲོ་རི་དྭགས་ལ་སོགས་པ་རྒྱའམ་རྙི་ལ་བཏགས་པ་ནི་བཀྲོལ་བ་ནའོ། །དུད་འགྲོ་གཉུག་མ་བའི་དབང་དུ་བྱས་པ་ནི། ར་ལུག་ལ་སོགས་པའི་ཁྱུ་འགྲོ་བཞིན་པའི་ནང་ནས་ཕུར་བ་ལ་བརྟོད་ཅིང་བཞག་པས་བརྐུ་བར་བྱེད་པ་དང་ཁྱུ་ལས་བཀར་བ་གཉིས་ནི། ཞེས་སོ། ། རྣམ་འབྱེད་ལས། གཤོང་ལས་ཐང་ལ་བྱུང་བ་དང་ཐང་ལས་གཤོང་དུ་འབབ་པ་དང་མངོན་པར་སྐབས་ཡོད་པ་ནས་ནགས་ཐིབས་པོར་འཇུག་པ་ལ་སོགས་པ་གསུངས་ཏེ། ཊཱི་ཀ་ལས། དེ་དག་ཐམས་ཅད་ནི་འབྱམ་པའི་སྒྲས་བསྡུས་པ་ཡིན་ནོ། །ཞེས་སོ། །ཡང་འོད་ལྡན་ལས། འདིར་རྐུ་བ་ནི་ལོ་ཐོག་ལེགས་པ་ལ་བརྟེན་པ་ཡིན་གྱི་ཆུ་ལ་ནི་མ་ཡིན་ནོ། །ཞེས་དང༌། ཟླ་ཟེར་ལས། གཞ༷ན་གྱི༷་ཞི༷ང་ལ༷ས་ཀྱི༷་མཐ༷འ་ད༷ག་ལ༷་ཆར་ཆེས་པའི་ཚེ་རང་གི་ཞིང་གི་ཆུ་བྱོ་སྟེ་གཞན་གྱི་ལ་ཆུ༷་གཏོ༷ང་བ༷འ༷མ་ཐན་པ་བྱུང་བའི་ཚེ་གཞན་གྱི་ཞིང་གི་ཆུ་འགོ༷ག་རང་གི་ཞིང་ལ་བསྒྱུར་པ༷་ལ༷་ནི༷་ར༷ང་གི༷་ཞིང་ལ༷ས་ཀྱི༷་མཐ༷འ་གྲུ༷བ་སྟེ་ལོ་ལེགས་པ༷་ན་བརྐུས་པ་ཡིན་ནོ། །ཐམས་ཅད་དུའམ་ཞེ་ན་ཞིང་གི་ཡོན་ཏན་ལ་སོགས་པའི་སྐྱེ༷ད་ཀྱི་ལོ་ལེགས་པ་མ༷་གཏོ༷གས་པ༷་བསམ་པ་གང་གི་ཞེ་ན་རང་གི་ལོ་ལེགས་དེ༷འི་ཆེ༷ད་དུ༷་གཞན་གྱི་ལོ་ཉེས་པ་དེ༷ར་འདུ༷ན་པ༷ས་གཞན་གྱི་ལས་ཀྱི་མཐའ་གྲུབ་པ་ལས་གཞ༷ན་ཕུངས་པ་ཉིད་དུ༷་གྱུ༷ར་ན༷་བརྐུས་པའི་ཕམ་པ་སྐྱེད་པའོ༷། །ཞེས་རྩ་བའི་ཚིག་དོན་དེ་ལྟར་གསུངས་པ་ལ། དེ་འདྲའི་ཕམ་པ་འབྱུང་བའི་གཞིའི་རིན་ཐང་ཚང་བའི་དངོས་པོ་ལ་གང་འཇོག་དཔྱད་པར་བྱའོ། །རྩ་བར། ཤགས་ཀྱིས་བླ་གྲྭར་རྒྱལ་ནའོ། །ཞེས་བླའི་གྲྭར་ཤ༷གས་བཀྱེ་ནས་ཞལ་ཆེ་རྒྱལ་ན་ཕམ་པ་བསྐྱེད་པ་སྟེ། འགྲེལ་ཆུང་ལས། དགེ་སློང་མི་དབང་བ་ལས་རྒྱལ་པོས་དགེ་སློང་དབང་ངོ་ཞེས་བཅད་ན་ཕམ་པའོ། །འོག་གཟུར་ཤགས་བཀྱེ་ན་ཕ་རོལ་པོའི་ཤགས་ཀྱི་སྦྱོར་བ་ཉིད་བཏང་སྟེ་སྤྲོ་བ་ལུས་བཏང་ན་ཕམ་པ་བསྐྱེད་པའོ། །རྣམ་འབྱེད་འགྲེལ་བ་ལས། བླའི་གྲྭ་ཞེས་བྱ་བ་ནི་རྒྱལ་པོས་བསྐོས་པའི་མིའོ། །འོག་གཟུར་ཞེས་བྱ་བ་ནི་ཡུལ་མིའི་ཚོགས་སོ། །ཞེས་གསུངས་སོ། །བླའི་གྲྭ་དང་འོག་གཟུར་གཉིས་ཚིག་བཙན་མི་བཙན་གྱིས་ཁྱད་པར་ཡོད་པས་ཐོབ་བློ་སྐྱེད་དཀའ་སླ་ཡོད་པའོ། །རྒྱན་ལ་གཡོ་བྱེད་ན་རྒྱན་རྒྱལ་ཙམ་ན་ཕམ་པ་བསྐྱེད་ལ་གྲངས་ལ་གཡོ་བྱེད་ན་ནོར་རྫས་ལ་ཐོབ་བློ་སྐྱེས་པ་ལ་ལྟོས་དགོས་པ་ནི། རྒྱན་དང་རྩིས་གཉིས་ཡུལ་ཆོས་ཀྱིས་གཉན་མི་གཉན་ཡོད་པའི་ཕྱིར་དང་རྫས་མངོན་སུམ་ན་སྣང་མི་སྣང་གི་ཁྱད་པར་གྱིས་ཐོབ་བློ་སྐྱེ་བ་དཀའ་སླ་ཡོད་པའོ། །རྩིས་ལ་དོར་བྱེད་པ་ན། བཅུ་ཁྲམ་དང་བརྒྱ་ཁྲམ་ལ་སོགས་པའི་མཚན་མ་ཕྱིས་པ་སྟེ་མེད་པར་བྱས་པ་དང༌། མཚན་མ་བསྣན་པ་སྟེ་ལྷག་པར་བསྣན་པ་གཉིས་དང༌། བཅུ་ཁྲམ་དང་བརྒྱ་ཁྲམ་ལ་སོགས་པའི་མཚན་མ་གནས་གཞན་དུ་ལྟག་འོག་བསྣོར་ཅིང་བཞག་པ་ཡང༌། དོར་བྱེད་པ་དེ་ཉིད་ཡིན་ཏེ། སྦྱོར་བའི་སྦྱོར་བ་ཉིད་དེ་ཉེས་བྱས་བསྐྱེད་དོ། །མདོ་འདི་ནི་རང་གི་རྣམ་བཤད་དང་ཊཱི་ཀ་ལས། རྩིས་ལ་དོར་བྱེད་པ་གཅིག་པུར་མ་ཟད་ཀྱི། དེ་དང་མཚུངས་པའི་གནས་སྐབས་ཐམས་ཅད་ཀྱི་དབང་དུ་བྱས་པ་ཡིན་པར་གསུངས་སོ། ། དྲུག་པ་ཤོ་གམ་དང་འབྲེལ་བའི་དོན་ལ་བརྒྱད་ལས། དང་པོ་གང་དུ་གཞལ་བའི་གནས་ནི་ས་ཡིན་སྲུང་བ་ཡིན། གཅོད་པ་ཡིན་པ་སྟེ། གཞན་དུ་ན་རྒྱལ་པོ་ས་ལ་དབང་གི་ནམ་མཁའ་ལ་མི་དབང་བའི་ཕྱིར་དང༌། བསྲུངས་པའི་གླ་རྔན་མི་དབང་བའི་ཕྱིར་དང༌། ཤོ་གམ་སྦྱིན་མི་དགོས་པའི་ཕྱིར་རོ། ། གཉིས་པ་གང་ལ་གཞལ་བའི་བདག་པོ་ནི། རྒྱལ་པོ་ཆོས་བཞི་ལྡན་ཏེ། བྱེ་བྲག་ཏུ་བཤད་པ་ལས། གང་ཞིག་ཆོས་བཞིན་དུ་བསྲུང་བ་དང༌། སྐྱོབ་པ་དང་སྦེད་པ་དང༌། ཀུན་འགྱེད་པར་བྱེད་པ་དེས་ཤོ་གམ་དབང་བ་ཡིན་ནོ། །ཞེས་གསུངས་ཏེ། རྒྱལ་པོ་གཞན་གྱི་དམག་ལས་བསྲུང་བ་དང༌། རྒྱལ་པོ་རང་གི་ཡུལ་མིས་འཇོམས་པ་ལས་སྐྱོབ་པ་དང༌། ཚོང་པ་ནང་གི་འཇིགས་པ་ལས་སྦེད་པ་དང༌། ཡུལ་ཆོས་ཀྱི་རིགས་ཚོད་དུ་ལེན་པ་སྟེ། འོད་ལྡན་ལས། སྐྱེ་དགུ་ཉོན་མོངས་བསྲུང་བའི་ཕྱིར། རྒྱལ་པོ་ལ་ནི་ཤོ་གམ་གཞལ། །གལ་ཏེ་དེ་ཡང་བསྲུང་བ་ཡིས། །ཉོ་ན་གླ་ནི་བུ་ལོན་མིན། །ཞེས་གསུངས་སོ། །གསུམ་པ་གང་ལས་གཞལ་བའི་རྫས་ནི། ཉོ་ཚོང་དུ་བྱེད་པའི་ཟོང་ལས་ཏེ། འོད་ལྡན་ལས། འཇིག་རྟེན་པའི་ལུགས་ཀྱི་ཟོང་ཁོ་ན་ལ་ཤོ་གམ་བཅད་པར་རིགས་སོ་ཞེས་འཇོག་སྟེ། ཞེས་སོ། །ཟོང་མ་ཡིན་པ་ལ་ཡང་ཤོ་གམ་འཇལ་མི་དགོས་ཏེ། སྨན་གྱི་གཞི་ལས། ཤུལ་གྱི་སྙུན་རྒྱགས་ཀྱི་ཆེད་དུ་ཀར་ཤ་པ་ན་ཞེས་པར་གསོལ་བཀའ་སྩལ་བ་བླངས་པར་བྱའོ། །ཞེས་དང༌། །བྱེ་བྲག་ཏུ་བཤད་པ་ལས། དཀོན་མཆོག་དང་མཁན་པོ་དང་སློབ་དཔོན་དང་ཕ་མ་དང་སྐྱེས་ཀྱི་ཕྱིར་ཁྱེར་བ་དེ་ལས་ཤོ་གམ་སྦྱིན་པར་མི་བྱ་སྟེ། ཉོ་ཚོང་བྱ་བའི་རྒྱུར་མི་ཁྱེར་བས་སོ། །ཟོང་དེ་ལ་ཟོང་དང་འདྲ་བར་བླང་བར་མི་བྱའོ། །ཞེས་གསུངས་སོ། །དེ་དང་མཐུན་པར་རྒྱལ་པོའི་བསྟན་ངག་ལས། བག་མ་བླང་བ་དང༌། བཏང་བ་དང༌། མཆོད་སྦྱིན་བྱ་བ་དང༌། ལྷ་ལ་མཆོད་པ་དང༌། རབ་ཏུ་བྱུང་བ་ལ་སོགས་པའི་ཁྱད་པར་རྣམས་ཀྱིས་རྫས་ནི་ཤོ་གམ་མི་བྱ་བ་ཡིན་ནོ་ཞེས་བྱུང་ངོ༌། །ཞེས་འོད་ལྡན་དུ་དྲངས་སོ། ། འོད་ལྡན་ལས། ཁ་ཚར་བཅད་པ་དང་ཆུར་སྨྱུག་པ་ལ་སོགས་པ་བྱས་པ་ལ་ཤོ་གམ་མི་གཅོད་པའི་ཡུལ་ཆོས་ཀྱི་དབང་དུ་བྱས་པ་ཡིན་ནོ། །ཞེས་གསུངས་སོ། །བཞི་པ་ཇི་ཙམ་གཞལ་བའི་ཚད་ནི། ཡུལ་ཆོས་ཀྱིས་འཇོག་པས་འདུལ་བ་ལུང་ལས་ཚད་གསུངས་པ་མེད་དོ། །འོད་ལྡན་ལས། ཟོང་ལ་ནི་ཉི་ཤུ་ཆ་ཤོ་གམ་ཡིན་ལ། རྩྭ་ཤིང་ལ་ནི་དྲུག་ཅུ་ཆ་ཡིན་ནོ། །ལྔ་པ་མ་གཞལ་བའི་ལྟུང་བ་ནི་རྐུ་སེམས་དང་རིན་ཐང་ལ་སོགས་པའི་ཡན་ལག་ཚང་ན་ཕམ་པར་འགྱུར་རོ། །དྲུག་པ་ལྡོག་མཚམས་ལྟུང་མེད་ནི། རྐུ་སེམས་མེད་ན་ཤོ་གམ་མ་གཞལ་ཡང་མ་བྱིན་ལེན་གྱི་ལྟུང་བ་རྣམ་གཞག་མི་འབྱུང་སྟེ། རྩ་བར། རྐུ་སེམས་མེད་པ་ལ་ཤོ་གམ་དུ་གཏོགས་པའི་ཉེས་པ་འབྱུང་བར་དོགས་པར་མི་བྱའོ། །ཞེས་སོ། །རྐུ་སེམས་མེད་ཀྱང་བསླབ་བྱའི་ཉེས་བྱས་ནི་འབྱུང་བ་ཡིན་ཏེ། ཤོ་གམ་གཞལ་དགོས་པ་དང་བཅས་པ་འགྲོ་བར་མི་བྱའོ། །ཞེས་སོ། །གནང་བ་ལ་གཞན་གྱིས་བཟླས་ན་གཞན་དུ་མ་བརྐུས་པ་མ་ཡིན་ཏེ། སྦོམ་པོར་འགྱུར་བ་ཡིན་ནོ། །འདི་ནི་འགྲེལ་ཆུང་ལས། ནོར་བདག་ལ་སྦྱིན་པའི་ཕྱིར་ཤོ་གམ་མ་བྱིན་ན་སྦོམ་པོའོ། །དགེ་སློང་བདག་ཉིད་བཀུར་བའི་ཕྱིར་ཤོ་གམ་མ་བྱིན་ན་ཕམ་པའོ། །ཞེས་གསུངས་སོ། །མ་གནང་བས་གཞན་གྱིས་བཟླ་བར་མི་བྱ་བ་ལས་བཟླས་ན་འགྲེལ་ཆུང་ལས་རིན་ཐང་ཚང་ན་ཕམ་པར་འགྱུར་ཞེས་བཤད་ཅིང༌། ཊཱི་ཀ་ལས། འདི་ལ་མ་བྱིན་ལེན་གྱི་ཉེས་པ་མེད་ཀྱང་ཚུལ་མ་ཡིན་པའི་ཕྱིར་བཀག་སྟེ། འཇིག་རྟེན་ན་ཁ་ཟེར་བར་འགྱུར་བའི་ཕྱིར། བསླབ་བྱའི་ཉེས་བྱས་སོ། །ཞེས་གསུངས་ཏེ། རྐུ་སེམས་ཡོད་པ་དང་མེད་པའི་དབང་དུ་བྱས་པ་སྟེ། འགྲེལ་པ་གཉིས་ཀ་ལྟར་འཐད་དོ། བདུན་པ་རྒྱུར་འགྲོ་བསླབ་བྱ་ནི། ཤོ་གམ་གཞལ་དགོས་པ་དང་བཅས་པ་འགྲོ་བར་མི་བྱའོ། །ཞེས་སོ། །བརྒྱད་པ་ཤོ་གམ་གྱིས་མཚོན་པའི་དོན་ནི། གྲུ་བཙས་ཀྱང་མཚོན་པ་སྟེ། འོད་ལྡན་ལས། ཤོ་གམ་གྱིས་ནི་གྲུ་བཙས་ཀྱང་རྣམ་པར་བཤད་པ་ཡིན་ཏེ། ཞེས་སོ། །ཡུལ་ཆོས་ཀྱིས་གྲུ་བཙས་མི་ལེན་ན་ནི་མ་གཞལ་ཡང་ཉེས་པ་མེད་དེ། འོད་ལྡན་ལས། སྦྲུམ་མ་ཟླ་བ་གཉིས་ལ་སོགས། །རབ་ཏུ་བྱུང་དང་ཐུབ་པ་དང༌། །བྲམ་ཟེ་དང་ནི་རྟགས་ཅན་ལ། །གྲུ་བཙས་བླང་བར་མི་བྱའོ། །ཞེས་འཇིག་རྟེན་པའི་གཞུང་ལུགས་ཁུངས་སུ་དྲངས་སོ། །ཊཱི་ཀ་ལས། བདག་པོ་གང་ཡིན་པ་མི་ཤེས་ན་དེ་དགེ་བསྐོས་ལ་གཏད་པ་ཉིད་དུ་བྱ། ཞེས་དང༌། ལུང་ལས། བདག་པོ་གང་ཡིན་ཤེས་ཀྱང་དེ་དགེ་བསྐོས་ལ་གཏད་པར་གསུངས་པ་དང་འགལ་སྙམ་ན། སྤྱིར་བཏང་ལ་ཊཱི་ཀ་ལྟར་ཡིན་ལ་དམིགས་བསལ་ནི་བདག་པོ་དེ་ཏིང་ངེ་འཛིན་ལ་ཞུགས་པའམ་རང་དང་ཞེ་འདྲེས་པ་ཡིན་ན། ལུང་ལས་གསུངས་པ་བཞིན་དུ་བྱ་བར་གསལ་ལོ། །