གཉིས་པ་སྒྲུབ་བྱེད་གཞིག་པ།

གཉིས་པ་སྒྲུབ་བྱེད་གཞིག་པ་ནི།

གནས་སྐབས་གཞན་ཐོབ་པ་ཞེས་པ་དེ་རྐུ་བ་ལས་གཞན་པ་སྲོག་གཅོད་པ་ལ་སོགས་པ་རྣམས་ཀྱི་དབང་དུ་བྱས་པ་སྟེ། ལུང་ཞུ་བ་ལས། དགྲ་བཅོམ་པ་བསད་ན་ཕམ་པར་འགྱུར་རོ། །ཞེས་གསུངས་པའི་དོན་མདོ་རྩར་བསྡུས་པ་ཡིན་ནོ། །གཉིས་པ་རང་ལུགས་བཞག་པ་ནི། མྱ་ངན་ལས་འདས་པ་ནི་ཞེས་པ་འདིས་ལྷག་བཅས་ཀྱི་མྱང་འདས་དང༌། ལྷག་མེད་ཀྱི་མྱང་འདས་གཉིས་ཀ་བསྟན་ཏེ། ཊཱི་ཀ་ལས། བཅོམ་ལྡན་འདས་མྱ་ངན་ལས་འདས་པའི་དཀོར་ཡང་མིའི་རྒྱུད་དུ་གཏོགས་པ་ཡིན་པའི་ཕྱིར་ཞེས་པ་ལ་སོགས་པས་ལྷག་བཅས་བསྟན་པར་གྲུབ་བོ། །ལྷག་མེད་ཀྱི་མྱང་འདས་ཀྱང་བསྟན་པ་ཡིན་ཏེ། ཊཱི་ཀ་ལས། ཕུང་པོ་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདས་པ་ནི་རྣམ་པར་དག་པའི་ལྷ་ཉིད་དུ་བཞེད་དོ་ཞེས་པས་གྲུབ་བོ། །དེ་ལྟར་ལྷག་བཅས་དང་ལྷག་མེད་ཀྱི་མྱ་ངན་ལས་འདས་པའི་དཀོར་བརྐུས་པ་ནི་ཆོས་ཅན། བརྐུས་པའི་ཕམ་པ་མི་བསྐྱེད་དེ། རྫས་བདག་ཏུ་བཟུང་བའི་ཡན་ལག་མ་ཚང་བའི་ཕྱིར་རོ། །རྣམ་པར་དག་པའི་ལྷ་ཉིད་ཡིན་པས་དེ་ལ་བརྐུས་ན་སྦོམ་པོ་བསྐྱེད་དོ། །སྤྱིར་ན་འཇིག་རྟེན་གྱི་ལྷ་དང༌། སྐྱེ་བོའི་ལྷ་དང༌། རྣམ་པར་དག་པའི་ལྷ་དང་གསུམ་ལས་འདི་ནི་ཕྱི་མའོ། །ཞེས་མཚོ་ཊཱིཀ་ལས་གསུངས་སོ། །དེ་ཡང་བརྐུས་པའི་ཕམ་པ་མི་བསྐྱེད་དེ། རྫས་བདག་ཏུ་བཟུང་བའི་ཡན་ལག་མ་ཚང་བའི་ཕྱིར་ཞེས་ཟེར་བ་ལ་མཁས་པ་འགའ་ཞིག་གིས་ཁྱབ་བ་མེད་དེ། བདག་འཛིན་བྱེ་སྨྲའི་ལུགས་ལ་རྒྱུན་ཞུགས་ཀྱིས་སྤངས་ཟིན་པ་ཡིན་པས་ན་མདོ་རྩ་འགྲེལ་ན་མྱ་ངན་ལས་འདས་པ་ལ་སྦྱར་བའི་རྒྱུ་མཚན་མེད་པར་འགྱུར་རོ་ཞེས་བཤད་དོ། །རྩ་བར། མིའི་རྒྱུད་ཀྱི་ཡོངས་སུ་བཟུང་བའོ། །ཞེས་པའི་འཛིན་བྱེད་ཀྱི་བློ་ལ་བདག་འཛིན་དགོས་པར་ཐལ། བདག་འཛིན་སྤང་བའི་དགྲ་བཅོམ་པའི་རྫས་བརྐུས་ན་ཕམ་པ་མི་བསྐྱེད་པའི་རྒྱུ་མཚན་ཡོད་པ་གང་ཞིག དགྲ་བཅོམ་དེ་དག་ལ་ངའི་ཆོས་གོས་སྙམ་པའི་བློ་སྐྱེ་བ་ཡོད་པའི་ཕྱིར་ཟེར༌། འདོད་མི་ནུས་ཏེ། བྱང་སྒྲ་མི་སྙན་ན་བདག་འཛིན་ཡོད་པ་གང་ཞིག སྐབས་འདིའི་ཡོངས་སུ་འཛིན་པ་མེད་པའི་ཕྱིར། རྟགས་དང་པོ་སླ། རྟགས་ཕྱི་མ་གྲུབ་སྟེ། རྩ་བར། བྱང་གི་སྒྲ་མི་སྙན་ན་ནི་ཡོངས་སུ་འཛིན་པ་མེད་པ་ཉིད་དོ། །ཞེས་གསུངས་པའི་ཕྱིར་ཟེར་ན་དཔྱད་པར་ཞུའོ། །རྒྱལ་ཚབ་རྗེའི་ཐར་ལམ་གསལ་བྱེད་ལས། དགྲ་བཅོམ་པའི་ཆོས་གོས་དང་ལྷུང་བཟེད་རྐུས་པས་ཕམ་པ་འབྱུང་བ་མི་སྲིད་པར་འགྱུར་རོ། །ཞེས་དགྲ་བཅོམ་པ་ལ་རྐུས་ན་ཕམ་པ་འབྱུང་བར་གསུངས་ལ། ཀུན་མཁྱེན་འཇམ་བཞད་ཀྱི་འདུལ་བའི་མཐའ་དཔྱོད་ལས། ཕ་རོལ་པོས་བདག་ཏུ་བཟུང་བ་ཅིག་དགོས་ཏེ། དགྲ་བཅོམ་པ་དང་སྒྲ་མི་སྙན་པ་ལྟ་བུའི་རྫས་བརྐུས་ན་སྦོམ་པོ་ལས་མི་སྐྱེད་པའི་ཕྱིར། ཞེས་གསུངས་སོ། ། ཡང་བདག་གི་ཡིན་ནོ་སྙམ་པའི་རྟོག་པའམ།བདག་པོ་མེད་དོ་སྙམ་པའི་རྟོག་པའམ། བདག་ལ་སྦྱིན་ནོ་སྙམ་པའི་རྟོག་པས་ཀྱང་གཞན་གྱིས་ཡོངས་སུ་གཟུང་བའི་ནོར་རྫས་ཁྱེར་ན་དངོས་གཞིའི་རྣམ་པའི་སྦོམ་པོའོ་ཞེས་སོ། །དགེ་སློང་མགྲོན་དུ་མ་བོས་པར་སྦྱིན་བདག་གི་ཟས་ཟ་ན་ཉེས་བྱས་སོ། །འདི་ནི་ཊཱི་ཀ་ལྟར་ན་སྦྱིན་བདག་གིས་ཤེས་རུང་མ་ཤེས་རུང་ཐོབ་རུང་མ་ཐོབ་རུང་སྟེ་ཡ་རབས་ཀྱི་ཚུལ་མ་ཡིན་པའི་ཕྱིར་བསླབ་བྱའི་ཉེས་བྱས་སོ།། མགྲོན་དུ་མ་བོས་པར་ཟ་བ་འདི་ནི་ཊཱི་ཀ་ལས། མ་བྱིན་པ་མ་ཡིན་པའི་ཕྱིར་དང་རྐུ་སེམས་མེད་པའི་ཕྱིར་ཕམ་པར་ཡང་མི་འགྱུར་ལ་སྦོམ་པོར་ཡང་མི་འགྱུར་རོ། །ཞེས་གསུངས་སོ། །ཕམ་པ་བཞི་ལས་མ་བྱིན་ལེན་གྱི་ཕམ་པ་བཤད་ཟིན་ཏོ། ། གསུམ་པ་སྲོག་གཅོད་ཀྱི་ཕམ་པ་བཤད་པ་ལ། རྩ་བར། སྲོག་གཅོད་ནའོ། །དེ་ལྟར་བསམ་པས་སོ། །མིར་གྱུར་བའོ། །དེ་ལྟར་འདུ་ཤེས་པས་སོ། །གང་ཡང་རུང་པས་སོ། །ཞེས་བྱུང༌། དེའི་དོན་ལ། གླེང་གཞི་དང༌། དགག་བྱ་དང༌། ངོ་བོ་དང༌། ཡན་ལག་གི་བརྩི་བ་དང༌།བསླབ་བྱ་དང་ལྔ་ལས། གླེང་གཞི་ནི། སྟོན་པ་ཡུལ་སྤོང་བྱེད་དུ་ཆུ་ཀླུང་ཡིད་འོང་ལྡན་གྱི་འགྲམ་ཚལ་གསེབ་ན་བཞུགས་པས། དགེ་སློང་རྣམས་ལ་ནི་མི་སྡུག་པ་བསྒོམ་པར་བསྔགས་པས་དགེ་སློང་ལུས་ལ་དམུས་བྱུང་ཞིང་སྨོད་ལ་མཚོན་ཀྱང་འབྱིན་འདུག་པ། ཐག་པས་འཆིང༌། གཡང་སར་མཆོང་བར་བྱེད། དགེ་སློང་ལ་རྩོལ་བར་བྱེད་པ་སོགས་དགེ་སློང་གིས་དགེ་སློང་གསོད་པར་བྱེད་པ་ལ་བརྟེན་ནས་སྐབས་སུ་བཅོམ་ལྡན་འདས་ལ་གསོལ་པས་དགེ་འདུན་བསྡུས་ཏེ་ཕན་ཡོན་བཅུ་གཟིགས་ནས་ཡང་དགེ་སློང་གང་དགེ་སློང་གིས་མིའམ་མིར་ཆགས་པ་ལ་རང་གི་ལག་དར་ཏེ་སྲོག་གཅོད་དམ། མཚོན་འབྱིན་ནམ། དེ་འཆི་བར་བཅུག་གམ། དེ་ལ་འཆི་བས་བསྔགས་པ་བརྗོད་པས་ཡང་དེས་དུས་བྱས་ན་དགེ་སློང་དེ་ཡང་ཕམ་པ་ཡིན་གྱི་གནས་པར་མི་བྱ་ཞེས་ཕམ་པའི་བཅས་པ་དང་པོ་མཛད་དོ། །མེ་ཏོག་ཕྲེང་རྒྱུད་དང་སོ་སོ་ཐར་པའི་འགྲེལ་པ་ལུང་གི་རྣམ་བཤད་དང་གངས་ཅན་འདི་ན་དེང་སང་འདུལ་བ་འཛིན་པ་ཕལ་ཆེར་རྣམས་ན་རེ། སྲོག་གཅོད་པའི་ཕམ་པ་འདི་ནི་རི་དྭགས་བཟློག་དགེ་སྦྱོང་སྦེད་ལ་བཅས་སོ་ཞེས་འཆད་དོ། །དེ་ནི་མ་ཡིན་ཏེ། ལུང་རྣམ་འབྱེད་ཀྱི་འགྲེལ་པ་ལས། རི་དྭགས་བཟློག་དགེ་སྦྱོང་སྦེད་ཅེས་བྱ་བ་ནི་ཀུན་ཏུ་རྒྱུ་ཞིག་གི་མིང་སྟེ་ཞེས་གསུངས་ཏེ་མུ་སྟེགས་ཀུན་ཏུ་རྒྱུ་ལ་བསླབ་པ་མི་འཆའ་བས། ལུང་ལས་རི་དྭགས་བཟློག་དགེ་སྦྱོང་སྦེད་ཀྱི་གཏམ་རྒྱུད་གསུངས་པ་ནི་ཞར་ལ་བྱུང་བ་ཙམ་མོ། །འདིའི་སྐབས་དོན་ནི་ལུང་རྣམ་འབྱེད་ལས། དགེ་སྦྱོང་གིས་དགེ་སློང་ལ་རྩོལ་བར་བྱེད། ཅེས་གསུངས་པ་སྟེ། དགེ་སློང་གིས་དགེ་སློང་གསོད་པར་བྱེད་པ་ལ་བརྟེན་ནས་ཕམ་པར་བཅས་སོ། །དེ་དག་དང་མཐུན་པར་སོ་སོར་ཐར་བའི་འགྲེལ་བ་དང་གཞུང་འགྲེལ་དང་བམ་པོ་ལྔ་བཅུ་པ་ལས་ཀྱང༌། དགེ་སློང་རབ་ཏུ་མང་པོ་ལ་བརྟེན་ནས་བཅས་ཞེས་གསུངས་པ་དེ་ལེགས་བཤད་ཡིན་ནོ། །