གཉིས་པ་དགག་བྱ་ནི་རང་ཆོམ་རྐུན་པའི་གྲངས་སུ་ཆུད་པ།

གཉིས་པ་དགག་བྱ་ནི་རང་ཆོམ་རྐུན་པའི་གྲངས་སུ་ཆུད་པ་དང༌།

གཞན་བསླུས་པའི་སྒོ་ནས་གནོད་པ་ཡིན་ཏེ། རྣམ་འབྱེད་ལས། འདི་ན་གང་ཞིག་དགྲ་བཅོམ་མ་གྱུར་པར། །བདག་ཉིད་དགྲ་བཅོམ་ཡིན་ཞེས་བརྗོད་བྱེད་པ། །དེ་ནི་ཚངས་བཅས་འཇིག་རྟེན་རྐུན་པོ་སྟེ། །ཚུལ་ཁྲིམས་འཆལ་བ་ཡིན་ཞེས་བརྗོད་པར་བྱ། །ཞེས་དང༌། བདེན་སྨྲ་ལ་ལྟུང་བྱེད་དུ་གསུངས་ཤིང་ཕམ་པ་འདི་ལ། རྫུན་དུ་སྨྲས་པ་ཡན་ལག་ཏུ་དགོས་པས་སོ། ། གསུམ་པ་ངོ་བོ་ནི་བཅས་ལྡན་དགེ་སློང་གིས་རང་ལ་མིའི་ཆོས་བླ་མའི་ཡོན་ཏན་མི་ལྡན་པ་ལས་འདུ་ཤེས་བསྒྱུར་ཏེ་རང་ལ་ཡོན་ཏན་དེ་དང་ལྡན་པར་སྨྲས་ཤིང་དོན་གོ་བ་ལས་གྱུར་པའི་ལྟུང་བ་དངོས་གཞི་རྫོགས་པའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ་གང་ལ་སྨྲ་བའི་ཡུལ་དང༌། གང་བརྗོད་པའི་དོན་ཏོ། །དང་པོ་ལ་གསུམ་སྟེ། ཐ་སྙད་ལྔ་དང་ལྡན་པ་དང༌། ལུས་ཐ་མལ་པར་གནས་པ་དང༌། བདག་ལས་ཐ་དད་པའོ། །དང་པོ་ནི་མི་ཡིན་པ་དང༌། སྨྲ་ཤེས་པ་དང༌། དོན་གོ་བ་དང༌། ཤེས་པ་རང་བཞིན་དུ་གནས་པ་དང༌། མ་ནིང་དང་མཚན་གཉིས་པ་མ་ཡིན་པ་སྟེ་ལྔའོ། །དེའང་སྤྱིར་བསྟན་ལས། མིའི་འགྲོ་བ་པ་ནི་ཐ་སྙད་དུ་བྱ་བ་ཉིད་ཡིན་ནོ། །སྨྲ་བ་པོ་ཉིད་ལ་ཡོད་པ་སྟེ། རྣམ་པར་རིག་བྱེད་ལ་ནི་དོན་གོ་བའོ། །རང་བཞིན་ཉམས་པ་ནི་མ་ཡིན་ནོ། །མ་ནིང་དང་མཚན་གཉིས་པ་དག་ནི་དེ་དང་ལྡན་པ་ཉིད་དོ། །ཞེས་གསུངས་པ་དང་གོ་རིམ་བཞིན་དུ་སྦྱོར་བར་བྱའོ། ། སེལ་བ་ནི་མི་མ་ཡིན་ལ་སྨྲ་ན་སྦོམ་པོ་དང་དུད་འགྲོ་ལ་སྨྲ་ན་ཉེས་བྱས་སུ་འགྱུར་ཏེ། འོག་མ་དག་ལ་ནི་གཞན་ལ་ན་སྨད་ཅེས་བཤད་པ་དང༌། མི་ལ་དུད་འགྲོ་ཡང་ངོ་ཞེས་པས་སོ། །སྨྲ་མི་ཤེས་པ་དང་དོན་མི་གོ་བ་ལ་སྨྲས་ནའང་སྦོམ་པོར་འགྱུར་ཏེ། འོག་མ་དག་ལ་ནི་གཞན་ལ་ན་སྨད་ཅེས་བཤད་དོ། །སྨྱོ་བ་དང་མ་ནིང་དང་མཚན་གཉིས་པ་ལ་སྨྲས་ན་སྦོམ་པོར་འགྱུར་ཞེས་ལུང་ཞུ་བ་ལས་གསུངས་སོ། །གཉིས་པ་ལུས་ཐ་མལ་པར་གནས་པ་ནི་རྫུན་ཚིག་ཉན་པ་པོ་དེ། གཟུགས་གཞན་དུ་མ་སྤྲུལ་ཞིང་ལུས་མི་སྣང་བར་བྱས་པ་མ་ཡིན་པའོ། །དེ་ཡན་ལག་ཏུ་དགོས་པའི་སྒྲུབ་བྱེད་ནི། ཊཱི་ཀ་ལས། རེག་ལ་སོགས་པ་ནི་ཐ་སྙད་ཀྱི་ཕྱིར་རྣམ་པར་བཞག ཅེས་དང༌། སྤྲུལ་པ་མོ་ལ་ཡང་དེ་བཞིན་ནོ་ཞེས་པའི་གནད་ཀྱིས་སྦྱར་ཞིང༌། ཞུ་བ་ལས་སྤྲུལ་པ་མོ་ལ་འཁྲིག་ཚིག་སྨྲ་བ་ལ་སོགས་པ་ལ་ན་སྨད་དུ་གསུངས་པའི་གནད་ཀྱིས་སྦྱར་རོ། །གསུམ་པ་བདག་ལས་ཐ་དད་པ་ནི་ཊཱི་ཀ་ལས། མནའ་འདོར་བ་ལ་བཤད་པའི་གནད་ཀྱིས་སྦྱར་ཞིང༌། ཞུ་བ་ལས། དབེན་པ་ལ་དབེན་པར་འདུ་ཤེས་ཏེ་སྨྲས་ན་སྦོམ་པོར་འགྱུར་རོ། །ཞེས་གསུངས་པས་ཀྱང་ངོ༌། །དེ་ནི་སྦོམ་པོ་བཏགས་པ་བ་ཡིན་ནོ། །