༡༽ པཎ་ཆེན་བཱི་མ་ལས་བྱུང་བའི་མན་ངག་བཱི་མ་སྙིང་ཐིག་གི་བརྒྱུད་ཚུལ།
གསུམ་པ་མཆོག་ཏུ་ཟབ་པ་མན་ངག་སྡེ་འོད་གསལ་གསང་བ་སྙིང་ཐིག་གི་བརྒྱུད་སྲོལ་འཆད་པ་ལ། པཎ་ཆེན་བཱི་མ་ལས་བྱུང་བའི་མན་ངག་བཱི་མ་སྙིང་ཐིག་གི་བརྒྱུད་ཚུལ་དང་། སློབ་དཔོན་པདྨ་འབྱུང་གནས་ལས་བྱོན་པའི་པདྨ་སྙིང་ཐིག་གི་བཀའ་སྲོལ། རྒྱལ་བའི་དབང་པོ་ཀློང་ཆེན་རབ་འབྱམས་ལ་བཀའ་བབ་པའི་ཆུ་བོ་གཅིག་འདྲེས་ཀྱི་བརྒྱུད་སྲོལ་བཤད་པ། གྲུབ་དབང་རྫོགས་ཆེན་པའི་གསང་བ་སྙིང་ཐིག་གི་བརྒྱུད་སྲོལ་ཐུན་མིན་བྱེ་བྲག་ཏུ་བཤད་པ་དང་བཞི་ལས།
[༡] པཎ་ཆེན་བཱི་མ་མི་ཏྲ།
དང་པོ་བཱི་མ་ལའི་བཀའ་སྲོལ་བཤད་པ་ལ། སློབ་དཔོན་བཱི་མའི་རྣམ་ཐར་གོང་དུ་མདོ་ཙམ་སོང་ལ་འདིར་བོད་ཡུལ་དུ་འགྲོ་དོན་མཛད་ཚུལ་ཅུང་ཟད་གླེང་བ་ནི། དེ་ཡང་རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཆུང་བ་ཞེས་བྱ་བ་ཞིག་བཞུགས་ལ། དེ་ཉིད་ལ་མཆོད་གནས་ལོ་དྲུག་ཅུའི་བར་མཛད་པ་པཎྜི་ཏ་ལྔ་བརྒྱའི་ཁྱུ་མཆོག་བཱི་མ་ལ་མི་ཏྲ་འཇའ་ལུས་འཕོ་ཆེན་གྱི་སྐུར་བཞེངས་པ་དགུང་ལོ་ཉིས་བརྒྱར་ཉེ་བ་ཞིག་བཞུགས་སོ། །དེའི་ཚེ་བོད་དུ་བྱང་ཆུབ་སེམས་དཔའ་འཇམ་དཔལ་གྱི་སྤྲུལ་པ་ཁྲི་སྲོང་ལྡེའུ་བཙན་གྱིས་དཔལ་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་བཞེངས་ཤིང་དམ་པའི་ཆོས་དར་ཞིང་རྒྱས་པར་མཛད་པའི་སྐབས་སུ་གྱུར་ཅིང་། འདི་ལ་མཆོད་གནས་ཉང་ཏིང་འཛིན་བཟང་པོ་ཞེས་བྱ་བ་ཞི་གནས་ཀྱི་ཏིང་ངེ་འཛིན་ཐུན་གཅིག་གིས་ལོ་བདུན་དང་ཟླ་བ་བདུན་གྱི་བར་ལ་གནས་པ། ཤའི་སྤྱན་རྣམ་པར་དག་པས་གླིང་བཞི་དུས་གཅིག་ལ་གཟིགས་པ་ཞིག་བཞུགས་པ་དེ་ཉིད་ཀྱིས། ཀྱེ་རྒྱལ་པོ་ལགས། རྒྱ་གར་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་ལ་པཎྜི་ཏ་ལྔ་བརྒྱ་མཆོད་གནས་སུ་བཞུགས་པར་གདའ་བས། དེ་དག་གི་ནང་ནས་འབྲས་བུ་གསང་སྔགས་ལ་མཁས་པ་གཅིག་སྤྱན་དྲངས་ན་བོད་ཀྱི་རྒྱལ་ཁམས་སུ་གསང་སྔགས་ཀྱི་བསྟན་པ་དར་ཞིང་རྒྱས་པར་འགྱུར་ཞེས་ལུང་བསྟན། རྒྱལ་པོ་ཡང་རབ་ཏུ་མཉེས་ནས་དེ་ལྟར་བགྱི་བར་ཞལ་གྱིས་བཞེས། དུས་དེར་བོད་ཀྱི་རྒྱལ་ཁམས་ན་བློ་རྣོ་བ་དབུ་རུ་འཕན་ཡུལ་དུ་ཀ་བ་བློ་བརྟན་དང་འབྲོ་བཟའ་རྡོ་རྗེ་ལྕམ་གཉིས་ཀྱི་བུ་སྐ་བ་དཔལ་བརྩེགས་དང་། རུ་ལག་ཤངས་ཀྱི་དར་སྒང་ན་ལྕོག་རོ་རྒྱལ་འབྱུང་དང་འབྲོ་བཟའ་མཛེས་མ་གཉིས་ཀྱི་བུ་ལྕོག་རོ་ཀླུའི་རྒྱལ་མཚན་ཞེས་བྱ་བ་གཉིས་ཡོད་པ་བོས་ཏེ། ཀྱེ་རིགས་ཀྱི་བུ་རྫུ་འཕྲུལ་ལྕེ་ལ་དབང་ཐོབ་པ་གཉིས་འོ་སྐོལ་བོད་ཀྱི་རྒྱལ་ཁམས་སུ་འབྲས་བུ་གསང་སྔགས་རབ་ཏུ་ཟབ་པའི་བསྟན་པ་དར་བར་བྱ་བའི་ཕྱིར། རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་མཆོད་གནས་པཎྜི་ཏ་ལྔ་བརྒྱ་བཞུགས་པ་དེའི་སྤྱན་སྔར་སོང་ལ་གསེར་གྱི་པ་ཏྲ་བདུན་པོ་འདི་དང་། གསེར་ཕྱེ་བྲེ་དགུ་པོ་འདི་ཕུལ་ལ། འདི་བོད་ཀྱི་རྒྱལ་པོས་སྐྱེས་སུ་བསྐུར་བས་སྐྱེས་ལན་དུ་པཎྜི་ཏ་འབྲས་བུ་གསང་སྔགས་ཀྱི་ཆོས་ལ་མཁས་པ་གཅིག་བརྫང་བར་ཞུ་ཞེས་བརྗོད་ལ་སོང་ཞིག་ཅེས་བཀའ་བསྒོས། ལོ་ཙཱ་གཉིས་པོ་རྒྱལ་པོའི་བཀའ་བཞིན་རྒྱ་གར་ཡུལ་དུ་ཕྱིན་ཏེ་རྒྱལ་པོ་ཨིནྡྲ་བྷུ་ཏི་ལ་ཕྱག་མཛད་ནས། གསེར་གྱི་པ་ཏྲ་དང་གསེར་ཕྱེ་རྣམས་ཕུལ་ཏེ་འཕྲིན་གསོལ་བས། རྒྱལ་པོ་རབ་ཏུ་དགྱེས་ནས་བོད་ཀྱི་བྱང་ཆུབ་སེམས་དཔའ་གཉིས་བསིལ་ཁང་དུ་རེ་ཞིག་བཞུགས་ཤིག་ཟེར་ནས། རྒྱལ་པོ་ཉིད་པཎྜི་ཏ་རྣམས་དྲོ་ལ་བྱོན་པའི་དུས་སུ་དྲོ་གསོལ་བའི་གྲལ་ལ་བྱོན་ཏེ། ཀྱེ་མཁས་པ་ཆེན་པོ་རྣམས་བདག་ལ་བོད་ཀྱི་རྒྱལ་པོས་སྐྱེས་ཤིན་ཏུ་བཟང་བ་ཞིག་བསྐུར་བྱུང་བས། དེའི་སྐྱེས་ལན་དུ་པཎྜི་ཏ་འབྲས་བུ་གསང་སྔགས་ཀྱི་ཆོས་ལ་མཁས་པ་གཅིག་ཐོངས་ཟེར་བ་སུ་ཞིག་ཕེབས་པར་འཚལ་ཞེས་བཀའ་བསྩལ། སློབ་དཔོན་བུདྡྷ་གུ་ཧྱའི་ཞལ་ནས་སྐྱེས་སྐྱེལ་བ་དེ་གཉིས་འདིར་ཁྲིད་ལ་ཤོག་གསུངས། རྒྱལ་པོས་ཁྲིད་ནས་འོངས་པ་ན། ལོ་ཙཱ་བ་གཉིས་ཀྱིས་བཱི་མ་ལའི་སྐུའི་མཚན་རྟགས་རྣམས་མཐོང་བས་མོས་པ་རབ་ཏུ་སྐྱེས། བཱི་མ་ལས་ཀྱང་གདུལ་བྱ་དུས་སུ་བབ་པ་མཁྱེན་ཏེ་གྲལ་ལས་བཞེངས་ནས། མ་ནུ་དུ་རུ་ཀྲོ་ཧེ་ཞེས་པའི་སྒྲ་བརྗོད་པས། ལོ་ཙཱ་བ་གཉིས་ལ་ཚིག་དེ་གོ་ལུགས་གཉིས་བྱུང་སྟེ། ལྕོག་རོས། གཞུ་མོ་དག་ལ་བརྟེན་པའི་མདའ། །སྐྱེས་བུའི་མཐེབ་མོས་རྩོལ་ཕོད་ན། །མདའ་ཡིས་ཕ་རོལ་སྐྱེལ་བར་འགྱུར། །ཞེས་དང་། སྐ་བ་དཔལ་བརྩེགས་ཀྱིས། གྲུ་བོ་དག་ལ་བརྟེན་པའི་མིས། །མཉན་པའི་སྐྱ་བས་རྩོལ་ཕོད་ན། །མི་ཡིས་རྒྱ་མཚོའི་ཕ་རོལ་སྒྲོལ། །ཞེས་ཚིག་ཐ་དད་ལ་དོན་གཅིག་ཏུ་གོ། བཱི་མ་ལས་རྒྱལ་པོ་ཁྱོད་ཀྱིས་གཏོང་ཕོད་ན་ངས་བོད་ལ་ཕན་ཐོགས་པར་འདུག་པས་འགྲོ་ཞེས་ཞལ་གྱིས་བཞེས། རྒྱལ་པོས་ཀྱང་གནང་སྟེ་རབ་ཏུ་ཟབ་པ་གསང་བ་སྙིང་ཐིག་གི་དཔེ་ཚར་གཅིག་བསྣམས་ཏེ་ཨ་ཙཪྱ་སའི་སྙིང་པོ་བྱ་བ་གཡོག་པོར་ཁྲིད་ནས་བོད་དུ་བྱོན། དེའི་ཚེ་ཡུལ་ཁམས་དེའི་མི་ཐམས་ཅད་མཚན་མོ་རྨི་ལམ་ཀྱང་འཁྲུགས་ཏེ། རྒྱ་གར་ཡུལ་གྱི་ཤིང་དང་མེ་ཏོག་འབྲས་བུ་ཉི་ཟླ་དང་བཅས་པ་བོད་དུ་སོང་བ་རྨིས་པ་དང་། དུར་ཁྲོད་བསིལ་བ་ཚལ་གྱི་མཁའ་འགྲོ་མ་རྣམས་ཆོ་ངེ་འདེབས་པར་འདུག་པ་དང་། རྒྱལ་པོའི་ཆུ་ཚོད་དང་དབྱུག་གུའི་རྩིས་ཐམས་ཅད་འཁྲུགས་པར་གྱུར་ཏོ། །ནངས་པར་གྱི་དུས་སུ་རྒྱལ་པོའི་ཕོ་བྲང་གི་སྒོ་མདུན་དུ་རྒྱ་གར་གྱི་མི་ཐམས་ཅད་འདུས་ནས་རྨི་ལམ་བསྡུར་བས་ཐམས་ཅད་མཐུན་ཏེ་འདི་ཅི་ཡིས་ལན་ཞེས་གླེང་། བུད་མེད་གཅིག་ན་རེ། རྒྱལ་པོའི་མཆོད་གནས་བོད་ལ་མ་ཤོར་རམ། པཎྜི་ཏ་མཁས་པ་གཅིག་གིས་འབྲས་བུ་གསང་སྔགས་ཀྱི་ཆོས་ཐམས་ཅད་དཔེ་ཙམ་མེད་པར་ཁྱེར་བ་མ་ཡིན་ནམ་ཟེར། རྒྱལ་པོས་ཁ་སེང་བཱི་མ་ལ་བོད་དུ་ཤོར་ཟེར་བས། རྒྱ་གར་གྱི་མི་རྣམས་ཀྱིས་རྐང་མགྱོགས་བརྫངས་ཏེ་བོད་ཀྱི་བནྡེ་གཉིས་ཀྱིས་མཐའི་མོན་བུ་ཕྲ་མེན་གྱི་ངན་སྔགས་ཁྱེར་ནས་སོང་བས་བོད་ཀྱི་རྒྱལ་ཁམས་རྣམས་ཕུང་ངོ་ཞེས་པའི་མདོ་བྱང་མང་པོ་བོད་ཀྱི་ལུང་མདོ་དང་སྲང་མདོ་ཐམས་ཅད་དུ་བཏགས་སོ། །ལོ་ཙཱ་བ་གཉིས་ཀྱིས་བཱི་མ་ལ་མི་ཏྲ་སྤྱན་དྲངས་ནས་དཔལ་བསམ་ཡས་སུ་བྱོན་པ་ན། རྒྱལ་པོའི་དྲུང་ཏུ་ཕྱིན་ཏེ་པཎྜི་ཏ་ནི་གྲུབ་པ་ཐོབ་ཅིང་འཇའ་ལུས་འཕོ་ཆེན་གྱི་སྐུར་བཞེངས་པ། སྤྱིར་སྡེ་སྣོད་མ་ལུས་པ་མཁྱེན་ཅིང་འབྲས་བུ་གསང་སྔགས་ལ་ཐུགས་ཀྱི་དགོངས་པ་འབྱོངས་པ། རྒྱ་གར་དུ་དཔེ་ཙམ་ཡང་མ་བཞག་པར་བོད་དུ་བསྣམས་ནས་བྱོན་ཏེ་མཆིས་སོ་ཞེས་གསོལ་བས། རྒྱལ་པོའི་ཞལ་ནས་དོ་ནུབ་དབུ་ཚལ་གསེར་ཁང་དུ་བཞུགས་དང་ནངས་པར་ཞལ་མཇལ་བྱེད་དོ་གསུངས་པ་བཞིན་དབུ་ཚལ་དུ་བཞུགས་སོ། །དུས་དེར་བོད་ཀྱི་བློན་པོ་གདུག་པ་ཅན་རྣམས་ཀྱིས་མདོ་བྱང་བཀླགས་པ་དང་བསམ་ཡས་སུ་པཎྜི་ཏ་བྱོན་ནོ་ཞེས་ཐོས་པས་ཐམས་ཅད་རྒྱལ་པོའི་སྤྱན་སྔར་འདུས་ཏེ། འོ་སྐོལ་གྱི་འདི་ན་མཐའི་མོན་བུ་ཕྲ་མེན་གྱི་ངན་སྔགས་སྣ་ཚོགས་པ་ཁྱེར་བ་ཞིག་ཡོད་གདའ་བས་འདིར་བཞག་པར་མི་རུང་ཞེས་ཞུ་བ་ཕུལ། ནང་པར་ལོ་ཙཱ་བ་གཉིས་རྒྱལ་པོའི་མདུན་དུ་ཕྱིན་པའི་ཚེ། རྒྱལ་པོའི་ཞལ་ནས་ཁྱེད་གཉིས་ཀྱི་དེ་ཕྲ་མེན་གྱི་ངན་ཐབས་སྣ་ཚོགས་ཁྱེར་བ་ཡིན་པར་འདུག་པས་ཞག་འགའ་ལ་མཚན་མ་བརྟག་གོ་གསུངས་ནས་མ་གནང་ངོ་། །དེ་ནས་ལོ་ཙཱ་གཉིས་རབ་ཏུ་སྡུག་བསྔལ་ཞིང་ཞག་གསུམ་ལ་དབུ་ཚལ་དུ་ཉལ་བའི་ནངས་མ་གཅིག་བཱི་མ་ལ་བཞེངས་ནས། རྣམ་པར་སྣང་མཛད་གཟུགས་ཀྱི་ལྷ། གཟུགས་ཀྱི་ལྷ་ལ་ཡེ་ཤེས་ལྷ་ཡིས་ཕྱག་བགྱིའོ། །ཞེས་ཕྱག་མཛད་པས། དེར་ལྡེར་བཟོའི་སྐུ་རྣམས་ཐལ་ཕུང་གིས་སོང་བས་ལོ་ཙཱ་གཉིས་ངོ་མཚར་སྐྱེས་ནས་རྒྱལ་པོ་ལ་བསྙད་པས། འོ་དེ་ཀུན་ཕྲ་མེན་གྱི་ངན་ཐབས་ཡིན་གསུངས། ཡང་ལོ་ཙཱ་གཉིས་སེམས་རབ་ཏུ་མ་བདེ་སྟེ། བདག་ཅག་གཉིས་ཀྱིས་རྒྱ་གར་ནས་དཀའ་བ་སྤྱད་དེ་མཁས་པ་ངོ་མཚར་བ་འདི་ལྟ་བུ་སྤྱན་དྲངས་པ་ལ་རྒྱལ་པོས་འདི་འདྲ་བ་ཅི་ལ་འོས་ཟེར་ནས་ཐུགས་མུག་གོ། དེ་ནས་ཡང་ཞག་གསུམ་གྱི་ནངས་པར་བཞེངས་ནས། རྣམ་པར་སྣང་མཛད་གཟུགས་ཀྱི་ལྷ། གཟུགས་ཀྱི་ལྷ་ལ་ཡེ་ཤེས་ལྷ་ཡིས་དབང་བསྐུར་རོ། །གསུངས་ཏེ་ས་ཕུང་ལ་དབུ་ཞྭ་ཕུད་ནས་བསྐོན་པས། སྐུ་གཟུགས་སྔོན་མ་བས་རབ་ཏུ་ལེགས་པ་རྒྱ་གར་གྱི་ལུགས་སུ་བྱུང་སྟེ་གཟི་མདངས་དང་ལྡན་པར་གྱུར་བས་ཡང་ལོ་ཙཱ་གཉིས་ཀྱིས་རྒྱལ་པོ་ལ་བསྙད་པས། དེ་ནས་རྒྱལ་པོ་ཐུགས་ཡིད་ཆེས་ཏེ་འོ་ན་བོད་ཀྱི་རྒྱལ་ཁམས་སུ་རྐང་མགྱོགས་བརྫངས་ནས་ཟླ་བ་གཅིག་གི་ཚེས་གསུམ་གྱི་ཉིན་པར་འདུས་ཤིག་ཅེས་བཀའ་བཏང་། དེ་ནས་ཟླ་བ་གཅིག་གི་ནངས་པར་དབུ་རྩེ་རིགས་གསུམ་གྱི་སྒོ་མདུན་དུ་གཡས་སུ་རྒྱལ་པོ་ལ་གཡུ་ཁྲི་རབ་ཏུ་འཕང་མཐོ་བ་བརྩིགས། གཡོན་དུ་གསེར་སྦྲམ་གྱི་ཁྲི་རབ་ཏུ་འཕང་མཐོ་བར་བརྩིགས། མཐའ་འཁོར་དུ་བོད་ཀུན་འདུས་པའི་དབུས་སུ་རྒྱལ་པོས་པཎྜི་ཏ་ལ་ཕྱག་མཛད་པས། རྒྱལ་པོའི་ཐུགས་ཀར་དར་མེན་གྱི་དཀྱིལ་ན་རིགས་གསུམ་མགོན་པོའི་ལྷ་བཀྲ་ཡལ་ལེ་འདུག་པ་ཀུན་ཀྱིས་མཐོང་། བཱི་མ་ལས་རྒྱལ་པོའི་དབུ་རྒྱན་ལ་ཨོཾ་ཨཱཿཧཱུྃ་ཞེས་སེ་གོལ་བརྡབས་པས་རིགས་ལྔའི་སངས་རྒྱས་སུ་ཀུན་ཀྱིས་བཀྲ་ཡལ་ལེ་མཐོང་བས་བོད་ཀྱི་རྒྱལ་ཁམས་ཀྱི་མི་ཀུན་ཀྱིས་བསྟོད་ཅིང་མཆོད་གནས་སུ་བཟུང་། དེ་ནས་བཱི་མ་ལས་ཕ་རོལ་ཏུ་ཕྱིན་པ་དང་དབུ་མའི་ཆོས་གསུངས་ཤིང་ཉིན་གཅིག་དྲོ་ལ་བཞུད་པའི་བར་དུ། སྡུད་པ་གསུངས་པའི་ཁྲིའི་རྩར་སྤྲང་པོ་གཅིག་བྱུང་ནས། ཉན་ཐོས་བྱིས་པའི་ཆོས་ཀྱིས་འཚང་མི་རྒྱ། །ཕོ་རོག་རྡོ་རྗེའི་འགྲོས་ཀྱིས་ས་མི་ཆོད། །ཅེས་པའི་ཡི་གེ་ཞིག་བྲིས་ཏེ་སོང་། ཕྱི་དྲོ་བཱི་མ་ལ་ཁྲི་ཁར་བྱོན་ཚེ་ཡི་གེ་གཟིགས་པས་འདིར་སུ་འོངས་གསུངས། ཆོས་ཉན་པ་དག་གིས་སུ་ཡང་མ་བྱུང་ཟེར་རོ། །ཁྱེའུ་གཅིག་ན་རེ། ད་ཅི་སྤྲང་པོ་རྒད་པོ་ཞིག་འདུག་པ་ཡིན་ནམ་ཟེར་བས། བཱི་མས་སྤྲང་པོ་དེ་ཚོལ་དང་གསུངས་པས་འཁོར་རྣམས་ཀྱིས་བཙལ་བས་གླིང་གསེབ་ཀྱི་ཆང་མ་ཞིག་གི་ཁྱིམ་ན་འདུག་པ་ཁྲིད་ནས་བྱུང་། བཱི་མ་ལས་ཁྱེད་སུ་ཡིན་ཞེས་དྲིས་པས། བདག་ནི་བ་གོར་བཻ་རོ་ཙ་ནའི་སློབ་མ་གཡུ་སྒྲ་སྙིང་པོ་བྱ་བ་ལགས་སོ་ཟེར་ནས་སེམས་སྨད་ལྔ་ལ་མཁས་པ་གཅིག་འདུག་གོ། དེའི་ཚེ་བཱི་མ་ལས་ཁོང་ལ་དྲན་པ་སེམས་སྡེ་བཅུ་གསུམ་བསྟན་པས་ལྟ་སྒོམ་སྤྱོད་གསུམ་གང་ནས་ཀྱང་དཔོན་སློབ་གཉིས་མཉམ་པ་ཞིག་བྱུང་ངོ་། །དེ་ཙམ་ན་རྗེ་བློན་ཀུན་ཀྱིས་རྟ་སྔོན་པོ་གཡུ་བྱ་གསེར་སྒ་དང་བཅས་ཕུལ་ཏེ་མདོ་སྔགས་ཀྱི་ཆོས་བསྒྱུར་བར་ཞུ་ཞེས་གསོལ་བས། བཱི་མ་ལའི་ཞལ་ནས་རྟ་དང་གསེར་གྱིས་དགོས་པ་མེད། ཆོས་ནི་སེམས་ཅན་གྱི་དོན་དུ་བསྒྱུར་ན་བདག་གིས་ཅི་རིགས་པར་བསྒྱུར་བར་བྱའོ་གསུངས་ནས། དབུ་རྩེ་རིགས་གསུམ་གྱི་ལྷོ་ནུབ་མཚམས་སྒྲ་བསྒྱུར་རྒྱ་གར་གླིང་དུ་བྱོན་ཏེ། ཕ་རོལ་ཕྱིན་པ་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། དཔལ་ཡང་དག་དང་ཕུར་པ། མ་མོ་དང་། གཤིན་རྗེ་རྣམས་གཉགས་ཛྙཱ་ན་ཀུ་མ་ར་དང་མཉམ་དུ་བསྒྱུར། གཡུ་སྒྲས་ལོ་ཙཱ་བྱས་ཏེ་སེམས་སྡེ་ཕྱི་འགྱུར་བཅུ་གསུམ་བསྒྱུར། སྐོར་གསུམ་གྱི་རྩ་བའི་རྒྱུད་ལྔ་ཡང་གཉགས་ཀྱིས་བསྒྱུར་རོ། །ཤིན་ཏུ་ཟབ་པའི་མན་ངག་སྙིང་ཐིག་ནི་བཙན་པོ་དང་ཉང་བན་ཏིང་འཛིན་བཟང་པོ་གཉིས་ལ་ལྐོག་ཆོས་སུ་གསུངས་པ་ལས་གཞན་སྣོད་དུ་རུང་བ་མ་གཟིགས་ནས་དཔེ་རྣམས་བོད་ཡིག་མཛད་དེ་མཆིམས་ཕུའི་དགེ་གོང་དུ་སྦས། བཱི་མ་ཉིད་བོད་དུ་ལོ་བཅུ་གསུམ་ལ་བཞུགས་ནས་རྒྱ་ནག་རི་བོ་རྩེ་ལྔར་གཤེགས། པཎ་གྲུབ་ཆེན་པོ་དེ་ནི་འཇའ་ལུས་འཕོ་བ་ཆེན་པོའི་སྐུར་བཞེངས་པས་ཐུབ་པའི་བསྟན་པ་ཇི་སྲིད་གནས་ཀྱི་བར་སྐུ་ལུས་དེ་ཉིད་ཀྱིས་བཞུགས་ཤིང་། ལོ་བརྒྱ་བརྒྱ་ན་བོད་ཀྱི་ལྗོངས་འདིར་སྤྲུལ་པ་རེ་བྱོན་ནས་སྙིང་ཐིག་གི་བསྟན་པ་གསལ་བར་མཛད་པར་ཞལ་གྱིས་བཞེས་པར་གྲགས་སོ། །
[༢] ཉང་བན་ཏིང་འཛིན་བཟང་པོ།
དེའི་སློབ་མ་ཉང་བན་ཏིང་འཛིན་བཟང་པོ་ནི། དེ་ཡང་གོང་དུ་བཤད་པ་ལྟར་གསང་བ་མཆོག་གི་རྒྱུད་ལུང་མན་ངག་ཐམས་ཅད་སློབ་དཔོན་བཱི་མ་ལ་ལས་རྫོགས་པར་ཐོབ་ནས། བཱི་མ་ལ་རྒྱ་ནག་ཏུ་བཞུད་དེ་ལོ་ལྔ་བཅུ་རྩ་ལྔ་ནས་ཉང་ཏིང་འཛིན་བཟང་པོ་རང་རྒྱུད་རྣམ་པར་དག་ནས་ཟག་པ་ཟད་པའི་ཕུང་པོར་གྱུར། དམ་ཅན་རྡོ་རྗེ་ལེགས་པས་ཁམས་སུ་སེར་བ་ཕབ་པས་འབྲུ་ནས་རྔ་མོའི་ཁལ་ལྔ་བརྒྱ་བྱུང་བ་ལ། ཉང་གིས་གསེར་གྱི་རྡོ་རྗེ་རྩེ་དགུ་པ་ཞིག་བར་སྣང་ལ་འཕངས་ཏེ་སྔོན་གྱི་དམ་ཚིག་གིས་རྗེས་སུ་བསྐུལ་བས་ནས་རྣམས་ཉང་ལ་ཕུལ། དེའི་རྫས་ཀྱིས་དབུ་རུ་ཞྭའི་ལྷ་ཁང་བཞེངས་སུ་གསོལ་བ་ཆོས་སྐྱོང་ལ་གཉེར་དུ་གཏད་དེ་ཡོངས་སུ་གྲུབ། བཤད་བརྒྱུད་སྙིང་ཐིག་གི་བཀའ་བརྒྱུད་དག་ཀེའུ་ཚང་རིམ་གསུམ་དུ་སྦས་ཤིང་། སྙན་བརྒྱུད་ཡི་གེའི་རིགས་ཀྱི་དཔེ་ཤོག་དྲིལ་རྫ་མ་གང་སྒོ་ཁང་གི་སྟེང་དུ་སྦས། གསང་བ་བླ་ན་མེད་པའི་གསེར་གྱི་སྙིང་པོ་ཉི་མ་རབ་ཏུ་སྣང་བར་བྱེད་པ་ཀ་བའི་སམ་ལེ་གསུམ་གྱི་ཁོང་སེང་ལ་སྦས་ཏེ་ཕྱི་རབས་སྐལ་ལྡན་གྱི་དོན་དུ་རྒྱས་བཏབ་ནས་བར་དེར་མི་སྣང་བར་མཛད་དོ། །སྙན་བརྒྱུད་ཚིག་གི་རིམ་པ་མཆན་དུ་བཏབ་ནས་སྦས་བློ་གྲོས་དབང་ཕྱུག་ལ་གཏད་དེ་བརྒྱུད་པའི་བཀའ་སྲོལ་མི་ཉམས་པར་མཛད། སློབ་དཔོན་ཉིད་ལྷ་སའི་བྲག་ལྷ་ཀླུ་ཡི་ཕུག་གི་ནམ་མཁའ་ལ་ལྷག་མ་མེད་པར་འོད་ཕུང་དུ་ཡལ་ལོ། །
[༣] སྦས་བློ་གྲོས་དབང་ཕྱུག
སྦས་བློ་གྲོས་དབང་ཕྱུག་ནི། ཡུལ་དབུས་འཕན་ཡུལ་དུ་སྦས་ཀྱི་རིགས་སུ་སྐུ་འཁྲུངས། ཉང་ཏིང་འཛིན་བཟང་པོས་རྗེས་སུ་བཟུང་ནས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་སྙན་བརྒྱུད་ཀྱི་མན་ངག་ཐམས་ཅད་ལྷག་མེད་བུམ་པ་གང་བྱོའི་ཚུལ་དུ་བསྩལ། གཡོ་རུ་གཟོང་གི་ཕུག་པ་དང་། གཙང་རྟ་ནག་སོགས་ཡུལ་དབུས་ཀྱི་སྒྲུབ་གནས་རྣམས་སུ་སྙིང་པོ་དོན་གྱི་སྒྲུབ་པ་ལ་གཞོལ། གྲུབ་པའི་ས་མཐོར་གཤེགས་ཏེ་ལྷག་མེད་འཇའ་ལུས་རྡོ་རྗེའི་སྐུ་བརྙེས་པའི་མཐར། གདམས་པ་རྣམས་འབྲོམ་རིན་ཆེན་འབར་ལ་གཏད་དེ་ནམ་མཁར་འོད་ཀྱི་ཕུང་པོར་གཤེགས་སོ། །དེ་སྐད་དུ། ཀུན་མཁྱེན་ཆེན་པོས། གཡོ་རུ་གཟོང་གི་ཕུག་པ་ན། །སྦས་སྟོན་བློ་གྲོས་དབང་ཕྱུག་ལ་གསོལ་བ་འདེབས། །ཞེས་གསུངས་པ་ཉིད་ལགས་ཀྱང་རྣམ་ཐར་རྒྱས་པ་མི་བཞུགས་པར་སྙམ།
[༤] འབྲོམ་རིན་ཆེན་འབར།
དེའི་སློབ་མ་འབྲོམ་རིན་ཆེན་འབར་ནི། སློབ་དཔོན་འདི་ཡུལ་དབུས་སུ་འབྲོམ་གྱི་རིགས་སུ་སྐུ་བལྟམས། སྦས་སྟོན་བློ་གྲོས་དབང་ཕྱུག་ལས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་སྙན་བརྒྱུད་ཀྱི་གདམས་པ་རྣམས་ལྷག་མེད་བུམ་པ་གང་བྱོའི་ཚུལ་དུ་རྫོགས་པར་གསན། སྒྲུབ་གནས་བྲག་དཀར་རྟ་སོ་སོགས་དང་སྟོད་ཕྱོགས་ཀྱི་རི་མཚོ་གངས་བྲག་རྣམས་སུ་སྙིང་པོ་དོན་གྱི་སྒྲུབ་པ་ལ་གཞོལ། རང་བཞིན་རྫོགས་པ་ཆེན་པོའི་གསང་ལམ་ནས་མཆོག་གི་དངོས་གྲུབ་བརྙེས་ཤིང་གྲུབ་པའི་ས་མཐོར་གཤེགས། གདམས་པ་རྣམས་ལྡང་མ་ལྷུན་གྲུབ་རྒྱལ་མཚན་ལ་ཆིག་བརྒྱུད་དུ་གདམས་ཏེ་རེ་ཞིག་དགོངས་པ་གདོད་མའི་ནང་དབྱིངས་སུ་བསྡུས་སོ། །དེ་སྐད་དུ། ཀུན་མཁྱེན་ཆེན་པོས། བྲག་དཀར་རྟ་སོའི་དགོན་པ་ན། །འབྲོམ་སྟོན་རིན་ཆེན་འབར་ལ་གསོལ་བ་འདེབས། །ཞེས་པ་དེ་ཉིད་ཡིན་ནོ། །
[༥] གནས་བརྟན་ལྡང་མ་ལྷུན་གྲུབ་རྒྱལ་མཚན།
དེའི་སློབ་མ་གནས་བརྟན་ལྡང་མ་ལྷུན་གྲུབ་རྒྱལ་མཚན་ནི། ཉང་བན་ཆེན་པོ་འོད་དུ་དེངས་ནས་ལོ་བརྒྱ་སོང་པ་ན། ཉང་མི་དར་མ་དང་དུས་མཚུངས་པར་དབུ་རུ་གཞོལ་མ་དགེ་མཆོག་གི་བུ་རུ་སྐུ་བལྟམས། ངོ་བོ་བཱི་མ་ལའི་སྤྲུལ་པར་གྲགས་ཀྱང་མཐུན་སྣང་ལ་གནས་བརྟན་དཀྱུས་མའི་ངང་ཚུལ་དུ་བཞུགས། རྡོ་རྗེ་ལེགས་པས་ལུང་བསྟན་ནས་སྔར་སྦས་པའི་གཏེར་དཔེ་རྣམས་གཏེར་གནས་ནས་སྤྱན་དྲངས། དབས་བློ་གྲོས་དང་འབྲོམ་རིན་ཆེན་འབར་བ་ལས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་མན་ངག་ཟམ་མ་ཆད་པའི་ཚིག་བརྒྱུད་ཀྱང་གསན་ནས་ཆོས་ཉིད་ཡིད་དཔྱོད་དུ་མ་ལུས་པར་ཉམས་སུ་བླངས། གཏེར་དཔེ་རྙེད་ནས་ལོ་བཅོ་ལྔ་པ་ལ་བཤད་རྒྱུད་གསུང་བའི་སྣོད་ཚོལ་དུ་བྱོན་པ་ན་རི་གཟར་རྒོད་པོ་ལུང་དུ་མཇལ། སྣོད་ལྡན་དུ་གཟིགས་ནས་ཁ་རག་ཏུ་གདམས་པ་གསུངས་པའི་དུས་བྱས། མན་ངག་རྙེད་ནས་ཁ་རག་སྒོམ་ཆུང་ལ་ཁྲིད་བཏབ་སྟེ་བཤད་རྒྱུད་བཞག་པའི་གདམས་པ་རིམ་པ་བདུན་དུ་བཏབ། ཕྱིས་ཞིག་ལྕེ་བཙུན་གྱིས་འབུལ་བ་ཤིན་ཏུ་མང་པོ་དང་བཅས་བྱོན་པས་སྙེ་ཐང་དུ་ཉང་བཀའ་གདམས་པ་བྱ་བ་དང་འཕྲད། དེས་ལྡང་མ་ལྷུན་རྒྱལ་སྐུ་གཤེགས་པའི་གཏམ་བཤད་པས། འབུལ་བ་རྣམས་དེ་དང་ཉེ་བར་དགོན་གནས་གཅིག་འདུག་པའི་དགེ་འདུན་རྣམས་ལ་ཕུལ། ཉང་བཀའ་གདམས་པ་ན་རེ། ལྡང་མ་དེ་གནས་བརྟན་ཡིན་པ་ཙམ་ལས་གང་ཟག་བཟང་པོར་སྔར་སུས་ཀྱང་མ་ཤེས། སྐུ་གཤེགས་པའི་དུས་ནམ་མཁའ་འཇས་ཁེངས་ཤིང་གདུང་དང་རིང་བསྲེལ་དཔག་ཏུ་མེད་པ་བྱོན་པས་ཐམས་ཅད་ངོ་མཚར་ཞིང་འགྱོད་པ་སྐྱེས་ནས་གདའ། ཁྱེད་ཀྱང་འབུལ་བ་འདི་ཙམ་འཁྱེར་ལུགས་ཀྱིས་གདམས་ངག་ཁྱད་པར་ཅན་ཞིག་ཡོད་མཆི་བས་བདག་ལ་སྩོལ་ཅིག་ཞུས། དེ་ཉིད་མན་ངག་གི་སྣོད་དུ་གཟིགས་ནས་གདམས་པ་བྱིན། དེས་གཞོའི་ཏི་སྒྲོ་བྲག་ལ་ལོ་གཉིས་བསྒོམས་པས་ཕུང་པོ་ལྷག་མེད་དུ་སོང་ངོ་། །
[༦] ལྕེ་བཙུན་སེང་གེ་དབང་ཕྱུག
དེའི་སློབ་མ་ལྕེ་བཙུན་སེང་གེ་དབང་ཕྱུག་ནི། ཡུལ་ཉང་རོ་གཉན་ཚོའི་ལྕེ་ཐུབ་པའི་དབང་པོ་ཞེས་བྱ་བའི་བུ་གཞོན་ནུ་ནས་ཆོས་མང་པོ་ལ་ཐོས་པའི་ཕ་རོལ་ཏུ་སོན་པ་ཞིག་སྟེ། གནས་བརྟན་ལྡང་མ་བ་དང་རི་གཟར་རྒོད་པོ་ལུང་དུ་མཇལ་ཏེ་གདམས་པ་རྣམས་རྫོགས་པར་ཐོབ། སློབ་དཔོན་གཤེགས་ནས་གཏེར་དཔེ་རྙིང་པ་རྣམས་ལང་གྲོ་འཆད་པ་སྟག་འདྲའི་ཆུ་མིག་གི་རྩ་བ་དང་། འུ་ཡུག་དང་། ཇལ་གྱི་ཕུ་སྟེ་གཏེར་གནས་གསུམ་དུ་སྦས། འུ་ཡུག་ནས་ཤངས་མན་ཆོད་ཀྱི་རི་རྒྱུད་རྣམས་ལ་འཕོ་ཞིང་བསྒོམས་པའི་ཚེ། རྨི་ལམ་ན་ཨ་ཙ་ར་གཅིག་བྱུང་ནས། བདག་ནི་བཱི་མ་མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་དོན་འདོད་ན། །མཆིམས་ཕུ་བྲག་དམར་དགེ་གོང་ཡར་འདབས་ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལ་འོ་ཡུག་ཕྱི་གོང་དུ། །སུས་ཀྱང་མཐོང་བ་མེད་པར་ལོ་བདུན་སྒོམས། །ཟག་བཅས་ཕུང་པོ་སྣང་བ་མ་ཡིན་ནོ། །ཞེས་གསུངས་པ་ཐོས་ནས་མཆིམས་ཕུར་བྱོན། དེར་བུད་མེད་དུང་སོ་འཁོར་མ་གཡུའི་སྨིན་མ་ཅན་ཞིག་གིས་དཔེ་རྣམས་བྱིན། སླར་འོ་ཡུག་ཕྱི་གོང་རྫའི་ར་བར་བཞུགས་པས་བཱི་མ་ལ་དངོས་སུ་བྱོན་ནས་ཟླ་བ་ཕྱེད་དུ་དབང་ཁྲིད་གདམས་པ་དང་བཅས་པ་ཐམས་ཅད་རྫོགས་པར་གནང་སྟེ་རྒྱ་ནག་ཏུ་གཤེགས་སོ། །དེ་ནས་ལྕེ་བཙུན་གྱིས་ལོ་བདུན་བསྒོམས་པས་ཕུང་པོ་ལྷག་མེད་གྲུབ། སྤྲུལ་པའི་སྐུ་རྒྱལ་བ་ཞང་སྟོན་དང་མཇལ་བས་གདམས་པའི་སྣོད་དུ་མཁྱེན་ཏེ་མན་ངག་རྫོགས་པར་བྱིན། ལོ་བརྒྱ་དང་ཉི་ཤུ་རྩ་ལྔ་ན་ནམ་མཁའ་ལ་འཇའ་འོད་ཀྱི་ཕུང་པོ་གཅིག་ཏུ་གཤེགས་སོ། །གཏེར་སྦས་པའི་ལོ་སུམ་ཅུ་ན་རོང་སྣང་མདའ་ནས་ལྕེ་སྒོམ་ནག་པོས་ཁ་ཤས་བཏོན་ནས་ཉམས་སུ་བླངས་ཤིང་གཞན་མང་པོ་ལའང་བཤད། དེ་བཞིན་དུ་ལང་གྲོ་འཆད་པ་སྟག་འདྲ་ནས་ཤངས་པ་རས་པ་ཞེས་བྱ་བས་ཀྱང་གཏེར་ནས་བཏོན་ཏེ་དར་རྒྱས་བྱུང་ཞེས་གྲགས་སོ། །
[༧] སྤྲུལ་སྐུ་རྒྱལ་བ་ཞང་སྟོན་པ།
དེའི་སློབ་མ་སྤྲུལ་སྐུ་རྒྱལ་བ་ཞང་སྟོན་པ་ནི། ཡུལ་ཡར་འབྲོག་དོ་ནང་དུ་ཡབ་ཞང་སྟོན་དངོས་གྲུབ་དང་ཡུམ་ཞུ་མོ་ཉ་རེ་ལྕམ་གཉིས་ཀྱི་སྲས་སུ་མེ་མོ་གླང་ལ་སྐུ་འཁྲུངས། བཀྲ་ཤིས་རྡོ་རྗེ་ཞེས་བྱ་བར་མཚན་གསོལ་ཏེ། དགུང་ལོ་བཅུ་གཅིག་ན་གཙང་རོང་གི་བླ་མ་ལྕེ་སྒོམ་ནག་པོ་དང་མཇལ་ཏེ་རྗེས་སུ་བཟུང་ཞིང་ལོ་གཅིག་གི་བར་དུ་གདམས་པ་མ་ལུས་པ་གསན། དེ་ནས་ཉི་ཤུ་རྩ་གཅིག་གི་བར་མཁས་གྲུབ་ཀྱི་བླ་མ་མང་དུ་བསྟེན་ནས་སྡེ་སྣོད་གསུམ་དང་། རྒྱུད་སྡེ་གསར་རྙིང་གི་ཕྱོགས་ཐམས་ཅད་ལ་སྦྱངས་པས་མཁྱེན་རབ་ཀྱི་པདྨོ་རྒྱས། ཉང་སྟོད་སྣང་ཁུའི་ཡུལ་ན་བཞུགས་པའི་ཐོ་རེངས་ཁར་ནམ་མཁའ་འོད་ཕུང་འཁྲུགས་པའི་དཀྱིལ་ན་སྔོན་གྱི་བླ་མ་རྣམས་དང་། དཔའ་བོ་དང་དཔའ་མོ། ཐུགས་རྗེ་ཆེན་པོ་དང་སྒྲོལ་མ་བཞུགས་པས་ལུང་བསྟན་པ། ཀྱེ་ཀྱེ། ཨེ་མ་ཚེ་གཅིག་གིས་སངས་རྒྱས་པའི་མན་ངག་རྫོགས་པ་ཆེན་པོ་གསང་བ་བླ་ན་མེད་པའི་སྐོར་བྲག་སེང་གེ་དང་འདྲ་བ་ལ་ཡོད་ཀྱི་གཏེར་ནས་ཐོན་ལ་སེམས་ཅན་དཔག་ཏུ་མེད་པའི་དོན་གྱིས་ཤིག །ཅེས་གསུངས་ནས་མི་སྣང་བར་གྱུར་ཏོ། །ཡང་རེ་ཞིག་ན་རྡོ་རྗེ་ལེགས་པ་མི་དཀར་ཞཱ་དཀར་ཅན་དུ་བྱས་པས་དངོས་གྲུབ་སྦྱིན་གྱིས་འདོང་ཟེར་ནས་ཁྲིད། ཉང་སྨད་པ་ཚབ་ཏུ་སླེབས་ཚེ་དེར་ལྷ་གསོལ་བ་མང་པོས་བཟའ་བཏུང་བྱིན་པ་དངོས་གྲུབ་དེ་ལ་ཟེར་རམ་སྙམ་ནས་གཟིམས་པའི་ཐོ་རངས། མི་དཀར་དེ་བྱུང་ནས་དངོས་གྲུབ་གཞན་དུ་ཡོད་ཀྱི་འདོང་ཟེར་ནས་འོད་ཀྱིས་ལམ་སྣ་བྱས་པ་ལྟར་བྱོན། ནུབ་མོ་ཁང་སྟོང་ཞིག་ཏུ་ཉལ་བས་ཁོ་ན་རེ་འདིར་མ་སྡོད་ད་ལྟ་འདོང་ཟེར་ཙ་ན་སྒོར་ཐོན་མ་ཐག་ཁང་སྟོང་དེ་འགྱེལ་ལོ། །དེ་ནུབ་ཆར་ཆེན་པོ་བྱུང་ནས་བྲག་ཁུང་ཞིག་ཏུ་བསྡད་པས་དམ་ཅན་གྱི་སྤྲུལ་པས་བཟའ་བཏུང་མང་པོ་ཁྱེར་བྱུང་། ནངས་པར་རྭ་ལག་ཚུགས་བརྒལ་ནས་འོ་ཡུག་མདའ་ན་མར་ཕྱིན་པས་འཁྲུགས་པ་ཡོད་ཀྱང་རྡོ་རྗེ་ལེགས་པས་བསྒྲིབས་ནས་དམག་གིས་མ་མཐོང་། དེ་ནས་བྲག་སེང་གེ་འདྲ་བའི་རྩེར་སླེབས་པ་ན་ཁོ་གར་སོང་ཆ་མེད་དུ་མི་སྣང་བར་གྱུར། ཕྱིར་ལོག་གོ་སྙམ་ན་ཡང་མ་ཐར། ཆ་མ་ཕྱེད་པའི་ངང་ལས་བལྟས་ཙ་ན་བྲག་ཕུག་ཁ་བྱང་བསྟན་གྱི་སྒོ་རྩྭས་འགགས་པ་ཞིག་མཐོང་། དེ་བྲུས་པས་བྲག་ཕུག་གི་ནང་ན་དཀྱིལ་འཁོར་ཞིག་འདུག་པ་བསྔོགས་པས། སྦྲུལ་དང་སྦལ་པ་མང་པོ་ཤིག་གེ་བྱུང་བས་བསལ་ཏེ་བལྟས་པས་གཏེར་གྱི་ཁ་བྱང་བརྒྱ་རྩ་རྙེད་ནས་གཟིགས་དུས་ས་རུབ་པས་མི་དཀར་པོ་དེས་མར་མེ་དང་བཟའ་བཏུང་ཁྱེར་ནས་བྱུང་། དར་ཅིག་ན་གདངས་དང་སྐད་ཤིན་ཏུ་མི་སྲུན་པ་ཞིག་བྱུང་། ཁོས་བརྡའ་སྦྱར་བས། ངས་ཨ་ཅེས་འབོད་ཀྱི་ཟེར་བའི་མོད། ཨེ་ཀ་ཛ་ཊི་སྤྱན་གཅིག་ཁྲག་ཏུ་ཁོལ་བ། མཆེ་བ་གཙིགས་ཤིང་བལྟར་མི་བཟོད་པ་ཙམ་དུ་བྱུང་། དེ་ན་རེ། ང་ནི་ཨེ་ཀ་ཙ་ཊི་ཡིན། །ཚོགས་འཁོར་བརྒྱ་དང་རྩ་བརྒྱད་ཐོང་། །ལོ་གསུམ་སུ་ལ་མ་བཤད་སྡོམས། །གསུངས་ནས་བཞུད་དོ། །བྲག་ཕུག་གི་སྒོ་འགྲམ་ནས་གཡུ་གཉིས་རྙེད་པ་ལས་གཅིག་གིས་ཤ་བུབས་གཅིག་ཉོས། གཅིག་གིས་ནས་ཁལ་གསུམ་ཉོས་ནས་ཚོགས་བརྒྱ་རྩ་བརྒྱད་བྱས། གཏེར་རྣམས་རིམ་པར་བཏོན་ཏེ་ཉང་སྟག་རྫོང་དུ་ཤག་མོ་དཀར་མཚོས་སྦྱིན་བདག་བྱས་ནས་དཔེ་རྣམས་ཚང་བར་བྲིས་ནས་ལོ་གསུམ་གསང་མ་ཐུབ་གསུངས་སོ། །དགུང་ལོ་ཉི་ཤུ་རྩ་ལྔ་པར་དབུས་སུ་བྱོན་པས་མཆིམས་ཕུ་ནས་བཱི་མ་ལའི་ཆོས་གཏེར་ཡང་སྤྱན་དྲངས། དེ་དུས་བཱི་མ་དངོས་དང་ཞལ་མཇལ་ནས་རྗེས་གནང་ཀྱང་ཐོབ་བོ། །སླར་ཤངས་རྟ་ནག་ཏུ་བྱོན་པའི་ཟམ་ཁར་ལྕེ་བཙུན་ཆེན་པོ་དང་མཇལ་ཏེ་གསང་བ་སྙིང་ཐིག་གི་གདམས་པ་རྫོགས་པར་གནང་ནས་གཞན་དོན་གྱིས་ཤིག་པའི་རྗེས་གནང་བྱིན་ནས་མི་སྣང་བར་གཤེགས། དེ་ནས་དགུང་ལོ་དྲུག་ཅུ་རྩ་གཅིག་བཞེས་དུས་རྒྱལ་མོ་གཡང་ཁབ་ཏུ་བཞེས་ནས་འགྲོ་དོན་མཛད་པ་ལས་རྒྱུད་འཛིན་གྱི་སླད་དུ་སྲས་ཉི་མ་འབུམ་འཁྲུངས། ངས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་གསུངས། ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ལ་དབང་ཐོབ་པས་རེས་འགའ་རྒྱལ་བ་རིགས་ལྔར་གསལ་བ་དང་གྲིབ་མའང་གཏན་ནས་མི་མངའ། རྫོགས་པ་ཆེན་པོའི་ཆོས་གསུངས་དུས་འཇའ་གུར་འཁྱིལ་བ་སོགས་ངོ་མཚར་གྱི་ལྟས་མང་། དགུང་ལོ་བདུན་ཅུ་དོན་གཅིག་པ་མེ་མོ་ཕག་གི་ལོ་ས་ག་ཟླ་བའི་ཉེར་གཉིས་ལ་ཤར་ཕྱོགས་ཀྱི་ནམ་མཁའ་ལས་སྒྲ་ཆེན་པོ་ལན་བདུན་གྲགས་ཤིང་། ས་ལན་གསུམ་གཡོས། འཇའ་དང་། འོད་དང་། སིལ་སྙན་གྱི་སྒྲ་དང་། དྲི་ཞིམ་གྱི་ངད་ལ་སོགས་པ་གདོད་མའི་ས་ལ་མངོན་པར་བྱང་ཆུབ་པའི་རྟགས་མ་ལུས་པ་བསྟན་ཏེ་གཤེགས། དེའི་ཕྱི་ནུབ་པུར་སྦྱངས་པས་གདུང་ཆེན་ལྔ་དང་རིང་བསྲེལ་ཁ་དོག་ལྔ་པ་སྐུ་ལྔའི་རྒྱལ་ཚབ་ཏུ་བཞག མེ་ཏོག་གི་ཆར་དང་འཇའི་གུར་ལ་སོགས་པས་འགྲོ་བ་མང་པོ་དད་པའི་གནས་ལ་སྦྱར་ཞིང་རང་བཞིན་གྱིས་བསམ་གཏན་ལ་གནས་པ་བྱུང་ངོ་། །
[༨] མཁས་པ་གུ་རུ་ཉི་འབུམ།
དེའི་སློབ་མ་མཁས་པ་གུ་རུ་ཉི་འབུམ་ནི། ཡབ་རྒྱལ་བ་ཞང་སྟོན་ཆེན་པོ་དང་ཡུམ་རྒྱལ་མོ་གཡང་གཉིས་ཀྱི་སྲས་སུ་སྐུ་འཁྲུངས་ཤིང་། ལྷུམས་སུ་ཞུགས་དུས་ཡུམ་གྱི་རྨི་ལམ་དུ་ཉི་མ་མང་པོ་དུས་གཅིག་ལ་ཤར་བ་རྨིས་པ་ཡབ་ལ་ཞུས་པས། ཡབ་ཀྱི་ཞལ་ནས། གསང་བ་བླ་ན་མེད་པའི་དོན་བྱེད་ཅིང་སེམས་ཅན་དཔག་ཏུ་མེད་པའི་མ་རིག་པའི་མུན་པ་སེལ་བའི་རྟགས་ཡིན་གསུངས་ཏེ་ཉི་མ་འབུམ་ཞེས་བྱ་བར་མཚན་གསོལ། དེ་ནས་དགུང་ལོ་ལྔ་ནས་རིམ་པར་ཡབ་ལས་གསང་བ་སྙིང་ཏིག་གི་དབང་ཁྲིད་གདམས་པ་དང་བཅས་ལྷག་མེད་བུམ་པ་གང་བྱོའི་ཚུལ་དུ་རྫོགས་པར་མཛད། དགུང་ལོ་བཅུ་པར་རྒྱུད་བཅུ་བདུན་ལ་བཤད་པ་མཛད་པས་བུ་སློབ་ཀུན་ངོ་མཚར་སྐྱེ་བ་བྱུང་། ལོ་ཉི་ཤུའི་བར་དུ་སྒྲུབ་པ་ཁོ་ན་ལ་ནན་ཏན་མཛད། དེ་ནས་རྗེས་ཐོབ་སྒྱུ་མ་ལྟ་བུའི་ཏིང་འཛིན་དང་འགྲོགས་ནས་རྔོག་རྒྱལ་རྩེའི་སར་གསར་མའི་རྒྱུད་མན་ངག་དང་བཅས་པ་ལ་གསན་པ་མཛད། ཉི་ཤུ་རྩ་གཉིས་པ་ལ་ཇོ་མོ་རྒྱ་གར་དངོས་གྲུབ་ཀྱི་རྟེན་དུ་བཟུང་། ཉི་ཤུ་རྩ་བདུན་པ་ལ་ས་སྐྱའི་འཁོན་གྲགས་པ་རྒྱལ་མཚན་དང་། བླ་མ་སྟག་སོ་བ་བསྟེན་ནས་རྒྱུད་གསུམ་གདམས་ངག་དང་བཅས་པ་དང་། བདེ་མཆོག་མལ་གྱོའི་ལུགས་མཁྱེན་པར་མཛད། སུམ་ཅུ་ལ་ཁ་རག་གི་འབྲུག་སྟོན་གྲགས་པ་ལས་བདེ་མཆོག་དང་། རྗེ་བཙུན་མ་རྭ་ལུགས། ཡེ་ཤེས་མགོན་པོ་སོགས་ཚལ་པའི་ཆོས་སྐོར་ཞུས་ཤིང་། ཞང་གཡུ་བྲག་པ་དང་། གཞུང་གི་རྔོག་རྡོ་རྗེ་སེང་གེ་ལ་སོགས་ཏེ་མཁས་གྲུབ་ཀྱི་བླ་མ་མང་པོ་བསྟེན་ནས་མདོ་རྒྱུད་དུ་མ་ལ་ཐོས་བསམ་ཕྱོགས་མེད་དུ་མཛད། ཚིག་དོན་ཆེན་མོ་ཞེས་བྱ་བའི་བསྟན་བཅོས་ཀྱང་མཛད། དགུང་ལོ་ལྔ་བཅུ་རྩ་དྲུག་གི་ཆོ་འཕྲུལ་ཟླ་བའི་ཚེས་བརྒྱད་ཀྱི་ཉིན་ཉི་མ་རྩེ་ཤར་ལ་སྐུ་གཤེགས་ནས་པུར་སྦྱངས་པས་གདུང་རིགས་ལྔ་བྱོན། འཇའ་ཚོན་གྱི་གུར་ཕུབ། ཆོ་འཕྲུལ་ཟླ་བ་ལ་ཨུག་ཆོས་མེ་ཏོག་སྐྱེས་པ་སོགས་བྱུང་ངོ་། །སློབ་དཔོན་འདི་སྒྲ་ཐལ་འགྱུར་ནས་ཕྱག་རྡོར་གྱི་སྤྲུལ་པ་བཛྲ་པ་ལར་ལུང་བསྟན་པ་ལ་ངོས་འཛིན་པར་གྲགས་སོ། །
[༩] ཆོས་བདག་གུ་རུ་ཇོ་འབེར།
དེའི་སློབ་མ་ཆོས་བདག་གུ་རུ་ཇོ་འབེར་ནི། ཡབ་མཁས་པ་ཉི་འབུམ་གྱི་གཅུང་པོ་ཟླ་བ་འབུམ་དང་། ཡུམ་རྒྱ་མོ་ཨུ་ལུ་གཉིས་ཀྱི་སྲས་སུ་འཁྲུངས་ཏེ། ལོ་བདུན་མན་ཆོད་ལྐུགས་པ་འདྲ་བར་ཡོད་པ་ལ་བརྒྱད་ནས་ཤེས་རབ་མེ་ལྟར་འབར། བཅོ་བརྒྱད་ཀྱི་བར་དུ་ཁུ་བོ་མཁས་གྲུབ་ཆེན་པོ་གུ་རུ་ཉི་འབུམ་ལས་གསང་བ་བླ་མེད་ཀྱི་དབང་ཁྲིད་གདམས་པ་དང་བཅས་རྫོགས་པར་མཛད་ཅིང་། རྒྱུད་ཀྱི་བཤད་པ་ལ་ཐོས་པས་སྒྲོ་འདོགས་བཅད་པ་དང་། མན་ངག་གི་དོན་ལ་སྒོམ་པས་ཉམས་སུ་བླངས། བཅུ་དགུ་ནས་ཉི་ཤུའི་བར་ས་སྐྱ་ལོ་ཙྭ་བ་ལས་རྒྱུད་གསུམ་མན་ངག་དང་བཅས་པ་དང་། བདེ་མཆོག་མལ་གྱོ་ལུགས་གསན་ཅིང་མཁྱེན་པར་མཛད་ནས། དབུ་ཚད་ལ་སོགས་པའི་རིགས་པའང་ཁོང་དུ་ཆུད་པར་བྱས། ཉེར་གཉིས་ལ་ཁྲོ་ཕུ་ལོ་ཙཱ་བ་ལས་མི་ཏྲ་ཛོ་ཀིའི་གདམས་པ་དང་། ཆུ་མིག་པ་ལས་ཚད་མ་བསྡུས་པ། བལ་པོ་གྲགས་འབུམ་ལས་དོ་ཧ་དང་ཕྱག་ཆེན་ཁ་འཐོར་སོགས་མཁས་གྲུབ་དུ་མ་ལས་སྡེ་སྣོད་གསུམ་དང་རྒྱུད་ལུང་མང་པོ་ལོ་སུམ་ཅུ་རྩ་དྲུག་ཚུན་ཉན་པས་མཁྱེན་པ་ཆེ་ཞིང་ཐོས་པ་ཤིན་ཏུ་མང་བར་གྲགས། སྒྲུབ་པ་མཛད་ཚེ་ཡི་དམ་གྱི་ལྷ་མང་པོས་ཞལ་མཐོང་ཡང་ཐུགས་སྒམ་པས་མི་གསུངས། ལྷ་སར་ཇོ་བོ་ལ་མཆོད་པ་ཕུལ་སྐབས་འོད་ཀྱི་ཐིག་ལེའི་ཁོང་ནས་འཕགས་པ་ལག་ན་པདྨ་དང་རྡོ་རྗེ་འཛིན་པས་ཞལ་གཟིགས། ཐོ་རངས་ཞིག་ལ་ཚེ་དཔག་མེད་ཀྱི་ཞལ་མཐོང་བས་ངེད་ཅག་ལ་ཚེ་རིང་བའི་རིགས་མེད་ཀྱང་ཁོ་བོ་རིང་དུ་འཚོ་བ་དེའི་བྱིན་རླབས་ཡིན་གསུངས། དེ་ལྟར་ཚད་མེད་པའི་མཁྱེན་རབ་དང་ཐུགས་རྗེའི་མངའ་བདག་འགྲོ་བ་འདྲེན་པའི་དེད་དཔོན་དུ་གྱུར་ནས་དྲུག་ཅུ་པ་ཡོས་ལོ་སྟོན་ཟླ་ར་བའི་ཉ་ལ་སྐུ་གཤེགས། ཞག་བདུན་དུ་འཇའ་ཚོན་གྱི་དྲྭ་བས་འབྲེལ་ཞིང་སྐུ་གདུང་ལ་ཨོཾ་ཨཱཿཧཱུྃ་གི་ཡིག་འབྲུ་དང་རིང་བསྲེལ་མང་པོ་བྱོན་ཏོ། །
[༡༠] འཁྲུལ་ཞིག་སེང་གེ་རྒྱབ་པ།
དེའི་སློབ་མ་འཁྲུལ་ཞིག་སེང་གེ་རྒྱབ་པ་ནི། གཡོ་རུ་གྲའི་ཕུ་སོ་གད་ཕྲེང་གི་གྲོང་དུ་ཡབ་བཀྲ་ཤིས་དངོས་གྲུབ་དང་། ཡུམ་དཔལ་ལེགས་གཉིས་ཀྱི་སྲས་སུ་ཉི་མ་རྩེ་ཤར་ལ་འཇའི་གུར་ཕུབ་ཅིང་འཁྲུངས། ལོ་དགུ་ནས་རིགས་སད་དེ་དག་སྣང་དང་མོས་གུས་དཔག་མེད་ཤར། བཅུ་པའི་ཚེ་སྣང་བ་འདི་རྨི་ལམ་ལྟ་བུ་ལ་སྲ་ཞིང་འཐས་འཐས་འདྲ་བ་མི་བདེན་སྙམ་པ་དང་། བཅུ་གཉིས་པ་ལ་འཁོར་བ་ལ་སྐྱོ་བ་ཚད་མེད་པ་སྐྱེས་ཏེ་ཆོས་འབའ་ཞིག་ལས་གང་ལ་ཡང་སྙིང་པོ་མེད་པའི་ངེས་ཤེས་རྙེད། བཅུ་གསུམ་གྱི་ཐོ་རངས་ཉི་ཟླ་དུས་གཅིག་ལ་ཤར་བའི་རྨི་ལམ་སད་དུས་འཕགས་པ་ཐུགས་རྗེ་ཆེན་པོའི་ཞལ་མཐོང་སྟེ་ཚེ་གཅིག་གིས་གྲོལ་བ་སྙིང་ཏིག་གི་དོན་སྒོམས་ཤིག་གསུངས། དེ་ནས་བཟུང་སྙིང་རྗེ་ཕྱོགས་མེད་དུ་རྒྱས། འགྲོ་བ་ཀུན་ལ་མ་གཅིག་པའི་བུའི་འདུ་ཤེས་ཤར། རྐྱེན་དེ་ལ་བརྟེན་ནས་གཞན་ལ་མཐོ་འགྲོགས་དང་ཁྱད་གསོད་མི་བྱེད་པའི་དམ་བཅའ་བྱས། ལུས་ཀྱི་སྲིན་བུ་རྣམས་ཀྱང་སྙིང་རྗེ་ཆེན་པོས་མི་འདོར་ཞིང་ལོང་སྤྲང་དང་དམན་པ་ཁོ་ན་ལ་བྱམས་པ་སོགས་ཐེག་པ་ཆེན་པོའི་རིགས་སད་པའི་རྟགས་ཁྱད་པར་ཅན་མངའ། བཅོ་བརྒྱད་ལ་སྣང་བ་བདེན་མེད་དུ་རྟོགས་པས་སྨྱོན་པ་ཁྲོག་ལངས་པ་ལྟ་བུར་སོང་སྟེ། ཕ་མེས་ནས་ལྷ་གསོལ་བའི་ཡོ་བྱད་བསགས་པ་གཏོར་ཞིང་། ཕོ་གདོན་རྒྱལ་པོ་མཆོད། མོ་གདོན་སྲིན་མོ་མཆོད། ཅེས་བྱས་པས། ཁྱོད་འདྲ་བའི་བུ་སྐྱེ་བ་ཟེར་ནས་འཐབས། ཉི་ཤུ་ལ་མཁན་པོ་ལྡེའུ་སྒང་པ་དང་། སློབ་དཔོན་བཀྲ་ཤིས་སྒང་པ་ལས་རབ་ཏུ་བྱུང་སྟེ་འདུལ་བ་ལ་ཐོས་བསམ་མཛད། ཉི་ཤུ་རྩ་ལྔ་ལོན་ཚེ་སྲིན་ཞལ་གྱི་སེང་གེ་རྒྱབ་ཏུ་བྱོན། སེང་གེ་རྒྱབ་པ་བར་པ་ལས་ཚལ་པའི་ཆོས་སྐོར་གསན། བླ་མ་ཙ་རི་བ་ལས་སེང་གེ་མཇིང་བསྣོལ། དེ་བཞིན་རས་པ་དྲི་མེད་འོད། ལྷ་རི་དཔལ། གཞོན་ནུ་འབུམ། སྟོན་འཆར་བྱང་ཡོན། ཇོ་སྲས་སུ་གྲགས་པ་རྣམས་ལས་གསང་སྔགས་གསར་རྙིང་། ཞི་བྱེད་གཅོད་ཡུལ་ཕྱག་ཆེན་བཅས་དམ་ཆོས་མང་དུ་ཉན། ཁྱད་པར་ཐུགས་རྗེ་ཆེན་པོས་ལུང་བསྟན་པ་བཞིན་ཆོས་བདག་གུ་རུ་ཇོ་འབེར་ལས་རྫོགས་པ་ཆེན་པོ་གསན་པས་རྟོགས་པ་ཐོད་རྒལ་དུ་སྐྱེས། གྲོ་བོ་ལུང་ལ་སོགས་པའི་རི་ཁྲོད་དང་ལུང་སྟོང་རྣམས་སུ་ལོ་མང་པོའི་བར་དུ་སྒྲུབ་པ་ཁོ་ན་ལ་གཞོལ་བས་དགོངས་པ་ཀ་དག་གི་སར་གཤེགས། སྐལ་ལྡན་མང་པོ་སྨིན་གྲོལ་ལ་བཀོད་ནས་དྲུག་ཅུ་རྩ་བཞི་པ་ལ་ཐེག་པ་མཆོག་གི་འབྲས་བུ་ཐོབ་པའི་རྟགས་ཁྱད་པར་བ་རྣམས་མངོན་དུ་བསྟན་ནས་གཤེགས་སོ། །
[༡༡] གྲུབ་ཆེན་མེ་ལོང་རྡོ་རྗེ།
དེའི་སློབ་མ་གྲུབ་ཆེན་མེ་ལོང་རྡོ་རྗེ་ནི། སྒྲགས་ཀྱི་ཕུར་ཡབ་བསམ་ཡས་རྣལ་འབྱོར་པ་དང་ཡུམ་འབར་མ་གཉིས་ཀྱི་སྲས་སུ་སྐུ་འཁྲུངས། དགུང་གྲངས་དགུ་ན་གྲུབ་ཐོབ་ཟ་ལུང་པ་དང་མཁན་པོ་སེ་ལུང་པ་ལས་རབ་ཏུ་བྱུང་། དེའི་དུས་གཤིན་པོའི་དགེ་རྩར་ཡུམ་རྒྱས་འབྲིང་བསྡུས་གསུམ་ཁོ་ན་སྒྲོགས་པས་ལོ་བཅུ་དྲུག་གི་དུས་སྒྲགས་ཀྱི་ཕུའི་ཞོགས་སྟེང་བྱ་བར་བརྒྱད་སྟོང་བརྒྱ་རྩ་མཛད་པས་གནས་ལུགས་ཀྱི་དོན་རྟོགས། ཟངས་མཚོར་སྒོམ་པ་ཡུན་རིང་མཛད་པས་ཉམས་རྟོགས་འབར་ཞིང་མངོན་ཤེས་ཕྲ་མོའང་ཤར། དེ་ནས་ཕྱོགས་མེད་རྒྱལ་ཁམས་འགྲིམས་ཏེ་མཚུར་ཕུའི་དོ་བོ་རས་པ་སོགས་བླ་མ་མང་པོ་བསྟེན། ཤ་འུག་སྟག་སྒོ་དང་མཁར་ཆུ་ལ་སོགས་པའི་གནས་ཆེན་མང་པོར་བྱོན། ནས་བྲེ་གང་གིས་ཟླ་བ་གཅིག་དང་ཞག་ཉི་ཤུའི་འཚོ་བ་བྱས་པ་སོགས་དཀའ་བ་སྤྱད་པའང་བསམ་གྱིས་མི་ཁྱབ། བཅོ་བརྒྱད་པའི་ཚེ་སེང་གེ་རྒྱབ་པ་སངས་རྒྱས་དབོན་པོ་མཇལ་ནས་མན་ངག་སྙིང་ཏིག་ཐོབ། ད་མན་ངག་གིས་འཚེངས་བསམས་པའི་སྤོབས་པ་སྐྱེས་ཏེ་བསྒོམས་པས་སྔོན་འགྲོའི་དུས་རང་ནས་ཞག་དྲུག་ཏུ་རྡོ་རྗེ་སེམས་དཔའི་ཞལ་ཉིན་མཚན་མེད་པར་མཇལ། དངོས་གཞིའི་དུས་བརྒྱུད་པའི་བླ་མ་རྣམས་རྨི་ལམ་དུ་མཇལ་ནས་བྱིན་གྱིས་བརླབས། ཉི་ཤུ་རྩ་གསུམ་པར་སངས་རྒྱས་རས་པ་ལས་རྡོ་རྗེ་ཕག་མོ་ལ་སོགས་པའི་གཏེར་ཆོས་དུ་མ་གསན་ནས་བསྒྲུབས་པས་རྡོ་རྗེ་ཕག་མོ་མངོན་སུམ་དུ་མཇལ། བྲག་ལ་གསང་རྡོར་བསྣུན་པས་ཐིམ་གྱིས་སོང་། རྟ་མགྲིན། སྒྲོལ་མ། སྤྱན་རས་གཟིགས། སློབ་དཔོན་ཆེན་པོ། ཀུན་ཏུ་བཟང་པོ། རྡོ་རྗེ་སེམས་དཔའ། བཱི་མ་ལ། ཟ་ལུང་པ། སངས་རྒྱས་རས་པ། འགྲོ་མགོན་ཕག་གྲུ་རྣམས་ཀྱིས་ཞལ་གཟིགས། དུང་ལུང་དུ་མཁའ་འགྲོའི་སྒྲ་ཤིན་ཏུ་སྙན་པས་སྐྱེ་རྒྱུན་ཆོད་པའི་ལུང་བསྟན་ཐོབ། ཀ་བ་ཅན་དུ་ཕག་མོ་དམར་མོ་དང་གྲུབ་ཐོབ་ཟ་ལུང་པ་ནམ་མཁའི་ཀློང་ནས་མཇལ། ངར་ཆུང་ན་བཞུགས་པའི་ཚེ་རྨི་ལམ་དུ་ཕག་མོ་གཙོ་འཁོར་ལྔ་མཐོང་དེར་མནལ་སད་ཙ་ན་འོད་ཀྱི་ཕག་མོ་དངོས་སུ་གཟིགས། སྐྱབས་གནས་རྫོང་དུ་རྡོ་རྗེ་སེམས་དཔས་རྨི་ལམ་དུ་རྫོགས་པ་ཆེན་པོའི་དབང་བསྐུར། སྤྱིར་བླ་མ་མང་པོ་བསྟེན་ཅིང་ཁྱད་འཕགས་ཀྱི་བླ་མ་བཅུ་གསུམ་བཞུགས། བཀའ་དྲིན་འགྲན་ཟླ་བྲལ་བ་གྲུབ་ཐོབ་ཟ་ལུང་པ། མཚུར་ཕུའི་དོ་བོ་རས་པ། འཁྲུལ་ཞིག་སེང་གེ་རྒྱབ་པ་གསུམ་ལས་སྙིང་པོའི་དོན་རྙེད། འདི་བརྟུལ་ཞུགས་ཞིག་པོའི་སྤྱོད་པ་བླང་དོར་མེད་པས་གསང་བ་སྔགས་ཀྱི་དམ་ཚིག་ལ་སྒྲ་ཇི་བཞིན་པར་སྤྱོད་ནུས། རྒོད་ཕྲུག་ནམ་མཁའ་ལ་ལྡིང་བ་མཐོང་བས་རིག་པ་བརྟུལ་ཞུགས་ཀྱི་ངར་ཐོགས་ནས་ནམ་མཁའི་ལམ་ལ་འགྲོ་བ་དང་། བྲག་ལ་འདམ་ལྟར་བྱེད་པ་བྱུང་། ལྷོ་མཁན་པ་ལྗོངས་དང་། མཁན་པ་གླིང་དང་། སེང་གེ་རྫོང་དང་། མཁར་ཆུ་རྣམས་སུ་སྒྲུབ་པའི་རྒྱལ་མཚན་བཙུགས་ཤིང་སྐལ་ལྡན་དུ་མ་སྨིན་གྲོལ་ལ་བཀོད་དོ། །ཚེ་ཚད་སུམ་ཅུ་རྩ་བདུན་ཡིན་པ་ལ། སློབ་དཔོན་ཀུན་དགའ་ཞེས་པའི་སྐལ་ལྡན་ཞིག་གིས་གསོལ་བ་ཐེབས་པས་དགུང་ལོ་དྲུག་ཅུ་རྩ་གཅིག་བར་བཞུགས། དེ་ནས་དུར་ཁྲོད་ལ་བར་དུ་སྐུ་གཤེགས་པའི་ཚེ་འོད་ཆེན་པོ་སྒྲ་དང་བཅས་པ་ནུབ་ཕྱོགས་སུ་ཡལ་བ་ཀུན་ཀྱིས་མཐོང་། པུར་སྦྱང་དུས་ནམ་མཁའི་ལམ་ནས་པུར་ཁང་ལ་འོད་ལྔའི་སྣམ་བུ་བརྐྱངས་པ་སོགས་ངོ་མཚར་བའི་ལྟས་དཔག་ཏུ་མེད་པ་བྱུང་ཞིང་། སྐུ་ལྔ་ཐོབ་པའི་རྟགས་སུ་གདུང་ཡང་ཤ་རི་རཱཾ་སོགས་རྒྱུད་ལས་ཇི་སྐད་བཤད་པ་བཞིན་བྱོན་ཏོ། །སློབ་དཔོན་འདི་ལ་ཟབ་ཆོས་མེ་ལོང་སྙིང་ཐིག་ཏུ་གྲགས་པ་གཏེར་ཁ་ངོ་མཚར་ཅན་བབ་པ་དེང་སང་འབྲུག་ཏུ་དཔེ་རྒྱུན་ཙམ་ཡོད་པར་གྲགས་སོ། །
[༡༢] རིག་འཛིན་ཀུ་མཱ་རཱ་ཛ།
དེའི་སློབ་མ་རིག་འཛིན་ཀུ་མཱ་རཱ་ཛ་ནི། གཡོ་རུ་འོན་བར་གསར་རྫིང་ཁ་ཞེས་བྱ་བའི་གྲོང་རྡལ་དུ་ཡབ་ཇོ་སྲས་བསོད་ནམས་དཔལ་དང་། ཡུམ་ཁྱེར་ཚ་འབུམ་མེ་བྱ་བའི་སྲས་སུ་མེ་ཕོ་སྟག་ལ་སྐུ་འཁྲུངས། སྐྱ་མིང་ཐར་པ་རྒྱན་དུ་བཏགས། ཆུང་ངུ་ནས་དད་པ་དང་སྙིང་རྗེ་ཤེས་རབ་ལ་སོགས་ཏེ་འཕགས་པའི་ནོར་གྱི་ཁྱད་ཆོས་མང་པོ་མངའ་བས་ཀློག་ཡིག་མ་བསླབས་པར་མཁྱེན། ལོ་བདུན་པ་ལ་ཀོང་པོ་འོར་ཤོད་མཐོ་སྟེངས་དགོན་པའི་བླ་མ་དགྱེས་རྡོར་པ་ལས་ཀྱེ་རྡོ་རྗེ་དང་བདེ་མཆོག་གི་དབང་ཞུས། ལོ་དགུ་པའི་ཚེ་མཁན་པོ་གཙང་པ་ལས་ཡོངས་རྫོགས་ཀྱི་དགེ་བསྙེན་བླངས། སྤྱན་རས་གཟིགས་འཁོར་བ་དོང་སྤྲུགས་ཀྱི་ཆོས་སྐོར་ལ་སྦྱངས། བཅུ་གཉིས་པ་ལ་ཕག་མོ་གྲུའི་མཁན་པོ་ཡེར་བ་པ་དང་སློབ་དཔོན་མངའ་རིས་པ་ལས་རབ་ཏུ་བྱུང་། མཚན་གཞོན་ནུ་རྒྱལ་པོར་བཏགས་ཤིང་འདུལ་བའི་བསླབ་པ་ལ་ཕྱག་ལེན་ཞིབ། རིན་པོ་ཆེ་གྲགས་ཡེ་ལས་ལོ་ལྔའི་བར་དུ་ནཱ་རོ་ཆོས་དྲུག་ལ་སོགས་པ་དང་། མཚར་སྟེངས་པ་ལས་བརྟག་གཉིས་གསན། དབོན་སངས་ཤེ་ལས་བཟོའི་རིག་པ་བསླབ། ཡི་གེ་དྲུག་པ་བཟླས་པས་ཤེལ་གྱི་ཁང་བུ་གཅིག་ན་ཐུགས་རྗེ་ཆེན་པོ་ཞལ་འཛུམ་པ་མཐོང་། ཁྱུང་ནག་ཤག་དར་ལས་རྙིང་མའི་རྒྱུད་ལུང་མན་ངག་མང་དུ་ཞུས། ངར་ཕུག་ཏུ་མེ་ལོང་རྡོ་རྗེ་དང་མཇལ་ཏེ་ཕྱག་རྒྱ་ཆེན་པོའི་ཁྲིད་ཞུས་པས་སེམས་ངོ་ཅེར་མཐོང་དུ་ངོ་འཕྲོད། དེ་ནས་གྲུབ་ཆེན་མོན་གྱི་མཁའ་འགྲོའི་གླིང་ལ་གཤེགས་པའི་སར་ཕྱག་ཕྱིར་བྱོན། རྡོ་རྗེ་ཕག་མོའི་ཆོས་སྐོར་སོགས་ཞུས་ནས་བསྙེན་པ་མཛད་པས་ཚེས་བཅུའི་ནུབ་གཅིག་ཨོ་རྒྱན་པདྨ་དང་མཇལ། ཨེ་མ་རིགས་ཀྱི་བུ། རྟག་ཏུ་ཆོས་གྱིས་ཤིག་གསུངས། མཚུར་ཕུར་བྱོན་ནས་གཉན་རས་དང་དར་མ་མགོན་པོ་ལས་ཀརྨ་པའི་ཆོས་སྐོར་ཞུས། ལ་སྟོད་དིང་རི་དང་སྤུ་རང་དུ་བྱོན་པས། གྲུབ་ཆེན་ཨོ་རྒྱན་པ་དང་། རྗེ་ཀརྨ་པ་རང་བྱུང་རྡོ་རྗེ་དགུང་ལོ་བདུན་པ་རབ་ཏུ་བྱུང་མ་ཐག་པ་དང་མཇལ། ཨོ་རྒྱན་པ་ལས་གདམས་པ་མང་དུ་མནོས། རྒྱ་སྨན་པ་ནམ་མཁའ་རྡོ་རྗེ་ལས་གསང་སྐོར་གནད་ཀྱི་ངོ་སྤྲོད་དང་། སྐལ་ལྡན་པ་ཆོས་ཀྱི་སེདྒེ་ལས་གསང་བ་གནད་ཀྱི་མེ་ལོང་སོགས་རྫོགས་ཆེན་གསང་བའི་སྐོར་ཞུས། སླར་མཁར་ཆུར་གྲུབ་ཆེན་མེ་ལོང་རྡོ་རྗེ་ལས་གསང་བ་སྙིང་ཏིག་དབང་ཁྲིད་གདམས་པ་དང་བཅས་པ་ལེགས་པར་ཐོབ། འབུལ་རྒྱུ་གཞན་མེད་པས་ལུས་ངག་གི་ཞབས་ཏོག་དང་། དབྱར་རིལ་པོ་གཉིས་སུ་རི་མོ་མཛད་ནས་ཁལ་བཞི་བཞི་གནང་བའི་གཉིས་གཉིས་ཀྱིས་ཤོག་བུ་ཉོས། མཚན་མོ་དཔེ་རྣམས་བྲིས། ཕྱེད་པོས་མར་མེ་དང་གསོལ་བ་མཛད་པའི་དཀའ་ཐུབ་ཀྱི་མཐུས་ཤིག་ནད་དྲག་པོ་ཞིག་བྱུང་། ཐུགས་དམ་ཡང་ཁྱད་པར་ཅན་འཁྲུངས། བླ་མ་མཉེས་ནས་འགྲོ་དོན་གྱིས་ཤིག་པའི་རྗེས་སུ་གནང་བ་ཐོབ། དབང་གྲལ་དུ་བླ་མའི་དབུའི་བར་སྣང་ལ་མགོན་པོ་ཕྱག་བཞི་པ་དང་། སྒོའི་ཐད་ན་ཨེ་ཀ་ཛ་ཊི་མཐིང་ནག་ཞིང་དབྱུག་དང་སྤྱང་མོ་བསྣམས་པ་ལུས་བོངས་ཉིས་ཐོག་ཙམ་པ། ཕྱི་ངོས་ན་ལས་ཀྱི་མ་མོ་ཁྲག་རལ་ཅན་ལག་པས་ཁྲག་བཅུས་ནས་འཐུང་བ་རྣམས་གཟིགས། ལོ་བརྒྱད་ཀྱི་བར་བླ་མ་འབྲལ་མེད་དུ་བསྟེན། ཨོ་རྒྱན་གྱི་སྒྲུབ་གནས་སྙུགས་ཚལ་སྦུག་ཏུ་དགུན་ཐོག་གཅིག་བཞུགས་པས་རྡོ་རྗེ་ཕག་མོས་ཞལ་གཟིགས། དེ་ནས་ཤེས་རབ་ཕྱོགས་མེད་དུ་རྒྱས། རེ་ཞིག་ཡར་ཀླུངས་མཚར་སྟེང་དུ་རི་ཁྲོད་བཏབ་ནས་བཞུགས། ཇི་ཞིག་ན་བླ་མ་འདའ་བར་མཁྱེན་ནས་མཁར་ཆུར་བྱོན་ཙ་ན་བླ་མའི་སྲས་གཉིས་ས་སྐྱགས་སུ་འཛོམས། སླར་ལོག་སྟེ་ཉི་ཤུ་ལྔའི་དུས་མཆོད་བཙུགས། ཙཱ་རི་ལ་བྱོན་པས་ཀྲིག་མོ་ལྷའི་ནེའུ་སིང་གི་རྡོ་སྐུ་ལ་འཇའ་ཚོན་སྣ་ལྔ་ཟུག་པ་སོགས་བྱུང་། དེ་ནས་མཚུར་ཕུར་ཆོས་རྗེ་རང་བྱུང་རྡོ་རྗེས་གདན་དྲངས་ཏེ་སྙིང་ཏིག་གི་གདམས་པ་རྣམས་ཕུལ་ཞིང་དེ་ལས་བརྒྱུད་པར་ཀརྨ་སྙིང་ཐིག་གྲགས་པ་བྱུང་། ཤངས་སུ་བྱོན་ནས་ལྕེ་སྒོམ་ནག་པོའི་བརྒྱུད་པ་སློབ་དཔོན་སྒོམ་པ་ལ་གསང་སྐོར་སྙན་བརྒྱུད་རྣམས་དང་། བསམ་གཏན་མིག་གི་སྒྲོན་མེ་ཞུས། དིང་རི་སྣ་དམར་དུ་དབོན་པོ་བྱང་སྒྲུབ་ལས་ཀྱང་དགོན་པ་བའི་རི་ཆོས་རྣམས་གསན། ཨོ་རྒྱན་པ་རིན་ཆེན་དཔལ་དང་ཡང་མཇལ། མར་ལམ་བླ་མ་བཀྲ་ལུང་པ་ལས་གཤིན་རྗེ་དགྲ་ནག་ལ་སོགས་པ་ཞུས། སློབ་དཔོན་ཡེ་དགོན་ལ་སོགས་པ་བཤེས་གཉེན་མང་དག་ལས་གསང་སྐོར་དང་། རྒོད་ཚང་པའི་ཁྲིད་ཀྱི་སྐོར། ཨ་རོའི་ཁྲིད་མོ་ཆེ་ལ་སོགས་པ་བོད་ན་གྲགས་པ་ཆེ་བའི་རྫོགས་རིམ་ཕལ་མོ་ཆེ་ཁོང་དུ་ཆུད། ཆོས་ཕྱིར་དཀའ་སྤྱད་བཟོད་པས་ཙཱ་རི་གསར་མར་བགྲོད་ནས་རྙིང་མའི་གཡུ་མཚོ་འགྲམ་དུ་གཅིག་པུར་ཟླ་བ་བརྒྱད་ལ་བཞུགས། ཆོ་འཕྲུལ་ཆེན་པོ་བྱུང་བ་གཤིས་ཐོག་ཏུ་རོ་སྙོམས་པས་གཞི་བདག་དབང་དུ་འདུས་ནས་ཁང་པར་གདན་དྲངས་ཏེ་བསྙེན་བཀུར་བྱས། ཛམ་བྷ་ལྷས་ནོར་བུ་ཕུལ། མཚོ་ནང་དུ་འོད་ལྔའི་ལྦུ་བ་མཐེ་བོང་ཙམ་ཞིག་ཐིམ་འགྲོ་བ་གཟིགས། ངེས་འབྱུང་དང་སྐྱོ་ཤས་ཀྱིས་ཐུགས་རྒྱུད་བརླན་པས་དུས་རྟག་ཏུ་ཤམ་པོ་ལ་སོགས་གངས་ཁྲོད་དང་ལུང་སྟོང་འབའ་ཞིག་ཏུ་ལྷགས་སྐྱོབ་ཙམ་ལ་བརྟེན་ནས་བཞུགས་པས་སློབ་མའི་ཚོགས་མང་པོ་འཁོར་བ་མཐའ་ཅན་དུ་མཛད། སྤྲུལ་པའི་སྐུར་གདོན་མི་ཟ་བ་ཀརྨ་པ་རང་བྱུང་རྡོ་རྗེ་དང་། རྒྱལ་བ་ཀློང་ཆེན་པ་གཉིས་རྫོགས་པ་ཆེན་པོའི་སློབ་མའི་གཙོ་བོར་གྱུར་པས་རྫོགས་པ་ཆེན་པོའི་བསྟན་པ་སྤེལ་བའི་ཕྲིན་ལས་ལ་མུ་མཐའ་དང་བྲལ། དེ་སྐད་དུ་འབྲི་གུང་པ་ཆོས་རྒྱལ་རིན་ཆེན་ཕུན་ཚོགས་ཀྱིས། ཆོས་འདིའི་བསྟན་པའི་བདག་པོ་ཀུན་མཁྱེན་ཀློང་ཆེན་པ་ཡིན། རྒྱལ་བ་རང་བྱུང་རྡོ་རྗེའི་དུས་ཕྲིན་ལས་རྒྱ་ཆེ། ཞེས་གསུངས་པས་མཚོན་ནོ། །བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་གོམས་པས་སྙིང་རྗེ་ཆེན་པོའི་དབང་གིས་གྲོང་དང་ཡུལ་འཁོར་མང་པོ་དག་ལ་ཐབས་ལ་མཁས་པས་ཐར་པའི་ས་བོན་འདེབས་པ་ཁོ་ན་ལྷུར་མཛད་ཅིང་། ཀོང་པོ་ནས་ཨེ་ལ་ཐུག་གི་བར་འཇིགས་པས་ཉེན་པའི་ལམ་འཕྲང་ལ་འགྲོ་བ་དག་གི་དབུགས་འབྱིན་པ་དང་། རི་དྭགས་དང་ཉ་ལ་སོགས་པའི་སེམས་ཅན་ཉམ་ཆུང་བ་དེ་དག་ལ་ཐུགས་ཤིན་ཏུ་བརྩེ་ཞིང་བདོག་པ་ལ་འཕངས་སེམས་མེད་པས་རི་རྒྱ་དང་། ལམ་རྒྱ་དང་། ཆུ་རྒྱ་ལ་སོགས་པ་མཛད་ནས་བདེ་འཇམ་ལ་བཀོད། གང་དུ་བཞུགས་པའི་ལུང་པ་དང་། ཡུལ་གྲོང་ཐམས་ཅད་ཀྱི་སད་སེར་ཡམས་ནད་ལ་སོགས་པ་ཞི་བར་མཛད་ཅིང་ཕན་པ་འབའ་ཞིག་ལྷུར་ལེན། སྙིང་ཏིག་གི་གདམས་པ་རྫོགས་རིམ་གཞན་དང་མ་འདྲེས་པར་རང་སྐད་ཀྱི་གྲུབ་མཐའ་བསླངས་ཏེ་འཆད་ནུས་པ་དང་། ཤངས་ལ་སྨེ་བ་ཨའི་རི་མོ་ཅན་མངའ་བ། སྔགས་བདག་གཟའ་དང་དམ་ཅན་རྣམས་ཀྱིས་བཀའ་ལ་ཉན་ཅིང་མི་དང་མི་ལབ་པ་བཞིན་དུ་ཡོད་པ་དང་། མངོན་པར་ཤེས་པས་གདུལ་བྱའི་བསམ་པ་མཁྱེན་ནས་འདུལ་ལུགས་མཁས་ཤིང་གཞན་རྒྱུད་བྱིན་གྱིས་རློབས་ནུས་པ་དང་། རྗེས་སུ་བཟུང་བའི་སྐལ་ལྡན་ཀུན་འདས་ཁར་རྟགས་ཁྱད་པར་ཅན་འབྱུང་བ་སོགས་སློབ་དཔོན་བཱི་མ་ལའི་སྐུའི་བཀོད་པར་གྲགས་ཤིང་ཐལ་འགྱུར་ལས་དགེ་སློང་དཔལ་ལྡན་ཞེས་ལུང་གིས་ཟིན་ཏོ། །དེ་ལྟར་འགྲོ་དོན་བསམ་གྱིས་མི་ཁྱབ་པའི་ངང་ནས་བདུན་ཅུ་རྩ་བརྒྱད་པ་ཆུ་མོ་ལུག་གི་ལོའི་སྟོན་ཟླ་འབྲིང་པོའི་ཉི་ཤུ་ལྔ་ལ་སྒྲ་དང་འོད་ཀྱི་གུར་ཁྱིམ་ལ་སོགས་པའི་རྟགས་ངོ་མཚར་བ་དང་བཅས་སྐུ་གཤེགས་པས། ཉེ་གནས་སྒོམ་དར་ལ་སོགས་པ་དྲུང་ན་ཡོད་པ་རྣམས་ཀྱིས་མོས་གུས་ཆེན་པོས་གདུང་བ་བསྐྱེད་པས་སླར་བཞེངས་ཏེ་སྐྱིལ་མོ་ཀྲུང་བཅས། ཞལ་འཛུམ་པའི་ངང་ནས་ཁྱེད་རྣམས་མྱ་ངན་མ་བྱེད། ང་ཤི་བ་མིན་གསུངས་ནས་གདམས་ངག་ཞལ་ཏ་ཅི་རིགས་པ་བྱོན་ཏེ་ཞག་བཅུ་གསུམ་ལ་སྐུ་ཚེ་སླར་བསྲིངས། ཚེས་བདུན་གྱི་ཉིན་ཉེ་གནས་རྣམས་ཀྱིས་གཤེགས་པའི་ཕྱི་ན་ཇི་ལྟར་བགྱི། བླ་མ་ཀུན་མཁྱེན་པ་གདན་འདྲེན་ནམ་ཞུས་པས། ཁོང་འོ་བརྒྱལ་དུ་མ་འཇུག ད་ཕྱིན་ཆོས་ཀྱི་ཞུན་ཐར་མ་ཆོད་པ་ཡོད་ན་དེར་སོང་། ཁ་ཏ་མང་པོ་སྔར་ནས་བྱས་ཟིན། ཅལ་ཅོལ་མ་སྨྲ་གསུངས། དྲང་སྲོང་ཙོག་པུའི་འདུག་སྟངས་དང་། ཆོས་སྐུའི་གཟིགས་སྟངས་ཀྱི་ངང་ནས་ཞལ་འཛུམ་པར་མཛད་དེ། ཚེས་བརྒྱད་ཀྱི་ཐོ་རངས་ཁ་ན་གདོད་མའི་གྲོང་ཁྱེར་ག་ལ་བ་དེར་གཤེགས་སོ། །ཉི་ཤུ་ལྔ་ལ་པུར་བཞུས་པས་དབུ་ཐོད་རིལ་པོར་བྱོན་པའི་ནང་ནས་རིགས་ལྔའི་ཚོམ་དཀྱིལ་དང་། སྙན་གོང་གཡས་ན་རྗེ་བཙུན་མ་མཐིང་ག་ཚོན་གང་བ། གདུང་རིགས་ལྔ་དང་། རིང་བསྲེལ་ལ་སོགས་པ་བྱོན་ཅིང་འཇའི་གུར་གྱིས་ཁོ་ར་ཁོར་ཡུག་ཏུ་དཀྲིགས་སོ། །དེ་ལྟ་བུའི་རིག་འཛིན་བླ་མ་དམ་པ་དེ་ཉིད་ལས་ཀུན་མཁྱེན་ངག་གི་དབང་པོས་བཱི་མ་སྙིང་ཐིག་གི་སྨིན་དབང་གྲོལ་ཁྲིད་མན་ངག་རྒྱབ་རྟེན་དང་བཅས་པ་ལྷག་མེད་བུམ་པ་གང་བྱོའི་ཚུལ་དུ་གསན་པ་སྟེ་རྣམ་ཐར་རྒྱས་པ་འོག་ཏུ་འབྱུང་མ་རགས་པ་ལ། སྐབས་འདིར་གུ་རུ་ནས་བརྒྱུད་པའི་པདྨ་སྙིང་ཐིག་གམ་མཁའ་འགྲོ་སྙིང་ཐིག་གི་དབང་ཁྲིད་གཏད་རྒྱ་དང་བཅས་པའང་ཀུན་མཁྱེན་ཆེན་པོ་ལ་ཉེ་བརྒྱུད་དུ་བཀའ་བབ་པས་ཐོག་མར་མཁའ་འགྲོ་སྙིང་ཐིག་གི་བརྒྱུད་པའི་ཆོས་ཁུངས་མདོ་ཙམ་འཆད་པར་འདོད་དེ།