དབུས་པ་ཞིག་པོ།
༈ དབུས་པ་ཞིག་པོ་ནི། མི་ཆོས་ཡར་ཀླུང་བྱ་ས་བ་ཡིན། སྒྲོ་ཕུག་པའི་གྲྭ་སར་ཡིག་མཁན་ཆོས་ལ་ཚུད་པ་ཞིག་སྟེ། ལྷ་རྗེ་རྒྱ་ནག་པའི་དྲུང་དུ་བསྐྱེད་རྫོགས་གསུམ་ལ་མཁས་པར་མཛད། སྙན་བརྒྱུད་རྡོ་རྗེ་ཟམ་པའི་མན་ངག་གནང་སྟེ་སྒོམ་པས་ཞག་བདུན་ལ་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་འཁྲུངས། ཐེག་པ་ཐམས་ཅད་ཀྱི་ཆོས་ཀྱི་ཚིག་མ་ལུས་པར་ཐུགས་ལ་ལམ་ལམ་ཤར་བ་བྱུང་། སྒོམ་སྒྲུབ་ལ་བཞུགས་ནས་མཚམས་འོག་ནས་གྲྭ་ས་སྐྱོང་བ་ལོ་བཅོ་བརྒྱད་མཛད་ནས་དགུང་ལོ་བདུན་ཅུ་པ་ཤིང་ཡོས་ལ་གཤེགས་སོ། །བདག་ཉིད་ཆེན་པོ་དེའི་སློབ་མར་གྱུར་པ་ཞིག་པོ་བདུད་རྩི་དང་། སྟོན་པ་བླ་སྐྱབས་དང་། དབུས་པ་ཇོ་བསོད་དང་། སྙེ་སྟོན་ཉི་མ་རྡོ་རྗེ་ལ་སོགས་པ་གཞུང་ལུགས་སྨྲ་བའི་མཁས་པ་མང་དུ་བྱོན་ནོ། །