གཉིས་པ་དགེ་འདུན་ལྷག་མའི་སྡེ་འཆད་པ།

གཉིས་པ་དགེ་འདུན་ལྷག་མའི་སྡེ་འཆད་པ་ལ།

སོ་སོར་ཐར་བའི་སྡོམ་ལས། ཁུ་བ་འཛིན་དང་འཁྲིག་ཚིག་བསྙེན་བཀུར་སྨྱན། །ཁང་བ་ཁང་ཆེན་དང་ནི་གཞི་མེད་དང༌། །བག་ཙམ་དགེ་འདུན་དབྱེན་དང་དེར་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་གསུངས་པ་ལྟར་ལྷག་མ་བཅུ་གསུམ་ལས། དང་པོ་དགུ་སོ་སོར་བཤད་པ་དང༌། ཕྱི་མ་བཞི་འཆད་པ་དང་གཉིས་ལས། དང་པོ་ལ་དགུ་ལས། དང་པོ་ཁུ་བ་འབྱིན་པའི་དགེ་འདུན་ལྷག་མ་ལ། རྩ་བར། དེར་འདུན་པས་སོ། །རང་གི་ཁུ་བའོ། །དང་པོ་ལའོ། །ཞེས་གསུངས་སོ།དེའི་དོན་ལ་བཞི་ལས། དང་པོ་གླེང་གཞི་ནི། ཡུལ་མཉན་ཡོད་དུ་གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས་ཀུན་ནས་བསླངས་ཏེ། ཉེས་པ་རང་གི་ཁུ་བ་ཕྱུང་བ་ལ་བརྟེན་ནས་དགེ་འདུན་ལྷག་མར་བཅས་པའོ། །དགེ་སློང་མང་པོས་རྨི་ལམ་དུ་དེ་བྱུང་བ་ཞུས་པས་ལྟུང་མེད་དུ་གསུངས་ཏེ། རྩ་བར། རྨི་ལམ་ནི་མེད་པ་དང་འདྲའོ། །ཞེས་དང༌། བམ་ལྔ་ལས། འབྱིན་པའི་དགེ་འདུན་ལྷག་མའི་གླེང་གཞི་ནི་བཅས་པ་དང་གནང་བའི་དབང་གིས་གཉིས་ཏེ། ཞེས་གསུངས་སོ། །གཉིས་པ་དགག་བྱ་ནི་ས་བོན་གྱིས་བསྐྱེད་པའི་འདོད་ཆགས་འཕེལ་བའོ། །གསུམ་པ་ངོ་བོ་ནི། རང་གི་ཡན་ལག་ལ་དབྱུང་སེམས་ཀྱིས་རྨ་སྒོ་གསུམ་ལས་གཞན་པའི་ཕམ་པ་བསྐྱེད་ནུས་ཀྱི་འབྱིན་བྱེད་མཚན་ཉིད་དང་ལྡན་པས་རེག་ཅིང་བརྩལ་བས་ཁུ་བ་དང་པོའི་གནས་ནས་འཕོས་པའི་ལྟུང་བ་དངོས་གཞི་དེ་ཡིན་ཏེ། ས་ག་ལྷས། རྨ་སྒོ་གསུམ་ནི་མ་གཏོགས་པར། །ཤེས་ལུས་རང་གི་ཡན་ལག་གིས། །བསམ་བཞིན་ཁུ་བ་འབྱིན་པ་ནི། །དགེ་འདུན་གྱི་ནི་ལྷག་མར་གསུངས། །ཞེས་སོ། །བཞི་བ་ཡན་ལག་ལ་བཞི་ལས། གཞིའི་ཡན་ལག་ལ་གསུམ་སྟེ། གང་དབྱུང་བའི་དངོས་པོ་དང༌། གང་ལས་དབྱུང་བའི་གཞི་དང༌། གང་གིས་འབྱིན་པའི་རྫས་སོ། །དང་པོ་ནི་རང་གི་ཁུ་བ་ཡིན་པ་དང༌། དང་པོའི་གནས་ནས་མ་འཕོས་པ་དགོས་ཏེ། རྩ་བར། རང་གི་ཁུ་བའོ། །དང་པོ་ལའོ། །ཞེས་སོ། །སེལ་བ་ནི་དགེ་སློང་གིས་མི་གཞན་གྱི་ཁུ་བ་ཕྱུང་ན་སྦོམ་པོར་འགྱུར་ལ་རང་གི་ཁུ་བ་དེ་དང་པོའི་གནས་ནས་འཕོས་ཟིན་པ་དབང་པོའི་སྒོར་ཕྱུང་ནའང་སྦོམ་པོར་འགྱུར་ཏེ། རྩ་བར། སྦུགས་སུ་འོང་བའོ། །ཞེས་གསུངས་སོ། །གང་ལས་འབྱུང་བའི་གཞི་ནི་ཡན་ལག་གི་རྣམ་པ་ཡིན་པ་དང༌། རང་གི་ཡིན་པ་དགོས་ཏེ། རྩ་བར། ཡན་ལག་གི་རྣམ་པ་ལའོ། །ཞེས་སོ། །སེལ་བ་ནི། ཕོའི་དབང་པོ་ལས་ཕྱོགས་གཞན་བརླའི་ཕྱོགས་དག་ཏུ་རེག་ཅིང་མཉེད་པས་ཕྱུང་ན་སྦོམ་པོ་སྟེ། རྩ་བར། ཕྱོགས་གཞན་དུ་རེག་པའོ། །ཞེས་དང༌། གཞན་གྱི་ལས་ཀྱང་ངོ། །ཞེས་པའི་ཤུགས་ཀྱིས་གྲུབ་བོ། །གང་གིས་འབྱིན་པའི་རྫས་ནི། སྔོན་རྣམ་ཤེས་ལེན་མྱོང་ཡན་ཆད་ཡིན་པ་དང༌། བསྟེན་རུང་ལ་ལྟོས་པའི་ལུས་མ་ཉམས་པ་ཡན་ཆད་ཡིན་ལ། ཕམ་པ་བསྐྱེད་ནུས་ཀྱི་རྨའི་སྒོ་གསུམ་ལས་གཞན་ཡིན་པ་སྟེ། སེམས་ཅན་དུ་བགྲང་བས་སོ། ། དེའི་རྣམ་པར་གནས་པས་སོ། །ཕྱུང་བ་ཐམས་ཅད་ལ་མཐའ་ཉིད་ཅེས་གསུངས་པ་དང་གོ་རིམ་བཞིན་ནོ། ། སེལ་བ་ནི་ལྭ་བ་དང་ཕྱིང་པ་ལ་སོགས་པས་འབྱིན་པ་དང་ཤའི་དུམ་བུས་འབྱིན་ན་སྦོམ་པོར་གསུངས་སོ། །སེམས་ཅན་དུ་བགྲང་བ་དེའི་རྣམ་པར་གནས་པའི་ཚད་ནི་འགྲེལ་ཆུང་ལས། སེམས་ཅན་གྱི་གཟུགས་ཡིན་པར་ཤེས་པ་ལ་བྱ་སྟེ། ལུས་དང་ཡན་ལག་གང་གི་ཤ་དང༌། རུས་པར་ཤེས་པའོ། །ཞེས་གསུངས་སོ། །འོན་ཀྱང་བྱི་བའམ་གྲོག་སྦུར་ལྟ་བུའི་ཤ་རུས་གང་ཡིན་ངོ་ཤེས་པས་ཕྱུང་ཡང་ལྷག་མར་མི་འགྱུར་བས། བསྟེན་རུང་གི་ཚད་དུ་ལོངས་པའི་ལུས་ལས་མ་ཉམས་པར་གནས་པས་ཕྱུང་ན་ལྷག་མ་ཡིན་ཏེ། ཊཱི་ཀ་ལས། དེའི་རྣམ་པར་གནས་པས་སོ་ཞེས་བྱ་བ་སྨྲས་ཏེ་ཡན་ལག་གང་ཡང་རུང་བ་རང་གི་རྣམ་པ་ལས་མ་ཉམས་པར་རེག་པས་ཕྱུང་ན་དགེ་འདུན་ལྷག་མར་འགྱུར་གྱིས་ལུས་ཀྱི་རྣམ་པ་ལས་ཉམས་པས་ཕྱུང་ན་སྦོམ་པོ་ཡིན་ཏེ། ཤའི་དུམ་བུས་ནི་སྦོམ་པོའོ། །ཞེས་གསུངས་པའི་ཕྱིར་ཞེས་བཤད་ཅིང་རང་འགྲེལ་ལས་ཀྱང་དོན་དེ་ལྟར་བཤད་དོ། །གཉིས་པ་བསམ་པའི་ཡན་ལག་ལས་འདི་དངོས་པོ་གཙོ་བས་འདུ་ཤེས་ཀྱི་ཡན་ལག་བརྩི་མི་དགོས་ལ་ཀུན་སློང་ནི། འབྱིན་པར་འདོད་པ་རྒྱུན་མ་ཆད་པ་སྟེ། རྩ་བར། དེར་འདུན་པས་སོ། །ཞེས་སཽ། །གསུམ་པ་སྦྱོར་བའི་ཡན་ལག་ནི་རེག་ཅིང་རྩོལ་བར་བྱེད་པ་ཡིན་ཏེ། རྩ་བར། བརྩལ་བས་སོ། །ཞེས་སོ། །