གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས།
སློབ་དཔོན་བྷ་བ།
རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏི་ནཱི་ལཱམྦ་ར་དྷ་ར་བཛྲ་པཱ་ཎི་སཱ་དྷ་ནཾ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས། །དཀོན་མཆོག་གསུམ་ལ་ཕྱག་འཚལ་ལོ། །དང་པོར་རེ་ཞིག་རང་གི་སྙིང་གར་ཟླ་བའི་དབུས་སུ་ཡི་གེ་ཧཱུཾ་བསམས་ཏེ། དེའི་འོད་ཟེར་གྱིས་བླ་མ་དང་སངས་རྒྱས་ལ་སོགས་སྣང་བྱ་སྟེ། མཆོད་པ་བྱ་བ་ནི་དཀོན་མཆོག་གསུམ་ཞེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་ནས། །བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བསྒོམ་མོ། །དེ་ནས་རང་གི་སེམས་རིག་པར་བྱ་སྟེ། ཆོས་ཐམས་ཅད་གདོད་མ་ནས་མ་སྐྱེས་པ་སྟེ། རང་བཞིན་གྱིས་འོད་གསལ་བས་བདག་མེད་པ་སེམས་ཀྱི་སྤྲུལ་པ་ཙམ་སྟེ། འདི་ལྟར་བསམས་ནས་དེ་ཉིད་ཀྱི་སྔགས་བརྗོད་པར་བྱའོ། །དེ་ནས་རྣམ་པ་ལྔ་མངོན་པར་བྱང་ཆུབ་པའི་རིམ་པས། བཅོམ་ལྡན་འདས་དཔལ་ཕྱག་ན་རྡོ་རྗེ་བསྒོམ་པར་བྱ་སྟེ། སྐུ་མདོག་ནག་པོ་ཡི་གེ་ཧཱུཾ་ལས་བྱུང་བ། ཞལ་གཅིག་ཕྱག་གཉིས་རྡོ་རྗེ་དྲིལ་བུ་བསྣམས་པ། སྤྱན་གསུམ་པ་སྤྲུལ་གྱིས་བརྒྱན་པ། གོས་སྔོན་བསྣམས་པ་མཆེ་བ་གཙིགས་པ། འདོད་དགུར་བསྒྱུར་བའི་གཟུགས་ཅན། གསང་སྔགས་ལས་ཇི་སྐད་བརྗོད་པའི་ཚུལ་འཛིན་པར་བསྒོམས་ནས། ཡེ་ཤེས་སེམས་དཔའ་སྤྱན་དྲངས་ཏེ་ཡང་དག་པར་མཆོད་ནས། དགུག་པ་དང༌། གཞུག་པ་དང༌། བཅིང་བ་དང༌། རྗེས་སུ་མཉེས་པར་བྱས་ལ། ལུས་ངག་ཡིད་གསུམ་བྱིན་གྱིས་བརླབ་པ་དང༌། ཕུང་པོ་དང་སྐྱེ་མཆེད་ལྷའི་ང་རྒྱལ་བྱས་ཏེ་དབང་བསྐུར་ནས། ཡང་མཆོད་པ་དང་བསྟོད་པ་དང༌། བདུད་རྩི་མྱང་བ་ལ་ཐུག་པ་བྱས་ནས། ཨོཾ་ནཱི་ལཱཾ་བ་ར་དྷ་ར་ཡ། ཞེས་བྱ་བ་ལ་སོགས་པའི་སྔགས་བཟླས་པར་བྱའོ། །བཟླས་པས་སྐྱོན་ཅུང་ཟད་བསྒོམ་པར་བྱའོ། །དེ་ནས་ལྡང་བར་འདོད་ན་གཏོར་མ་བྱིན་གྱིས་བརླབས་ཏེ་བསྔོས་ལ། དེ་ནས་ཡེ་ཤེས་ཀྱི་ལྷ་གཤེགས་སུ་གསོལ་ཏེ། བདག་ཉིད་དཔལ་ཕྱག་ན་རྡོ་རྗེའི་ང་རྒྱལ་དང་ལྡན་པས་སྤྱོད་ལམ་བྱའོ། །དེ་ལ་རྣམ་པ་ལྔས་མངོན་པར་བྱང་ཆུབ་པ་བསྐྱེད་པ་ནི་ཆོས་ཐམས་ཅད་གདོད་མ་ནས་མ་སྐྱེས་པར་བསམས་ཤིང་
བརྗོད་པས། སེམས་ཙམ་གྱི་རྣམ་པར་དམིགས་ཏེ། སེམས་ཀྱི་བདག་ཉིད་ཟླ་བའི་དཀྱིལ་འཁོར་ཨ་ཡིག་གི་རྣམ་པ་ཅན་བསྒོམས་ལ། ཨོཾ་པྲ་ཏི་བེ་དྷཾ་ཀ་རོ་མི་ཞེས་བརྗོད་པ་ནས། ཡང་ཟླ་བའི་དཀྱིལ་འཁོར་བསྒོམས་ནས། ཨོཾ་བོ་དྷི་ཙིཏྟ་ཨུཏྦཱ་དཱ་ཡཱ་མི་ཞེས་བརྗོད་པས། ཀ་ཡིག་གེ་རྣམ་པ་ཅན་གྱི་ཟླ་བ་བསྒོམ་མོ། །དེའི་སྟེང་དུ་ཡི་གེ་ཧཱུཾ་ལས་བྱུང་བའི་རྡོ་རྗེ་འབར་བ་བུམ་པ་ཧཱུཾ་གིས་མཚན་པ་བསྒོམས་ཏེ། ཨོཾ་ཏིཥྛ་བཛྲ་ཞེས་བརྗོད་པར་བྱའོ། །གསང་སྔགས་ཀྱི་བྱིན་གྱི་རླབས་ཀྱིས་བདག་ཉིད་རྡོ་རྗེར་གྱུར་ནས། ཨོཾ་བཛྲ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །སངས་རྒྱས་ཐམས་ཅད་ཀྱི་རྣམ་པའི་འོད་ཟེར་བསྡུས་པའི་སྦྱོར་བ་བྱས་པས། ཇི་སྐད་དུ་བརྗོད་པའི་དཔལ་ཕྱག་ན་རྡོ་རྗེར་གྱུར་པར་བྱས་ལ། ཡ་ཐཱ་བཛྲ་དྷ་ར་ཤཱ་ཨ་ཧཾ་ཞེས་བརྗོད་པར་བྱའོ། །སྔོན་དུ་གནས་བསྐྱེད་པར་འདོད་པ་རྣམས་ཀྱིས་སྟོང་པ་ཉིད་ལས་བཀའི་འཁོར་ལོ་རྩིབས་བཅུ་པ་རབ་ཏུ་འབར་བ་བསམས་ཏེ། དབུས་སུ་ཁྲོ་བོ་གནོད་མཛེས་རྒྱལ་པོ། །རྩིབས་རྣམས་ལ་ཁྲོ་བོ་བཅུ་རིམ་བཞིན་བསམས་ཏེ། ཧཱུཾ་བཞིའི་སྔགས་བརྗོད་པས་ཁྲོ་བོ་བཅུའི་འོད་ཟེར་གྱིས་གདུག་པ་ཅན་ཐམས་ཅད་བཀུག་སྟེ་སྐུ་གསུང་ཐུགས་ཀྱི་ཕུར་པ་བཏབ་པས་ཁྲོ་བོ་བཅུའི་འོད་ཟེར་གྱིས་ཐམས་ཅད་བཏུལ་ཞིང་སྦྱངས་ཏེ་ནམ་མཁའི་ངོ་བོ་ཉིད་དུ་གྱུར་པར་བྱའོ། །དེ་ནས་ཡང་ནམ་མཁའ་ལ་རཾ་ཉི་མ་ལ་གནས་པའི་ཧཱུཾ་ལས་བྱུང་བའི་རྡོ་རྗེའི་འོད་ཟེར་གྱིས་རྡོ་རྗེ་རབ་དང་ས་གཞི་དང་དྲ་བས་བསྐོར་བའི་དཀྱིལ་དུ་ཁང་པ་བརྩེགས་པ་བསྒོམ་པར་བྱའོ། །དེ་ཡང་ཁ་ཅིག་ནི་རླུང་གི་དཀྱིལ་འཁོར་ནི་རི་རབ་ལ་ཐུག་གི་བར་དུ་རིམ་པ་བཞིན་བསྐྱེད་ནས་དེ་ཡོངས་སུ་གྱུར་པ་ལས་ཁང་པ་བརྩེགས་པ་བྱ་ཞེས་འདོད་དོ། །ཁ་ཅིག་ནི་རི་རབ་ཀྱི་སྟེང་ན་ཁང་པ་བརྩེགས་པ་ཞེས་འདོད་དོ། །ཁ་ཅིག་ནི་ཆོས་ཀྱི་འབྱུང་གནས་ཀྱི་དཀྱིལ་དུ་བསྐྱེད་པར་འདོད་དོ། །འདིར་ཇི་ལྟར་འདོད་པ་བཞིན་བསྐྱེད་པར་བྱའོ། །དེ་ཡང༌། གྲུ་བཞི་པ་ལ་སྒོ་བཞི་པ། །ཏྭ་ར་ན་བཞིས་མཛེས་པར་བྱས། །དྲ་བ་དང་དྲ་བ་ཕྱེད་པ་ལ་སོགས་པས་བརྒྱན་པའི་དབུས་སུ་སྣ་ཚོགས་པདྨ་ལ་ཉི་མའི་དཀྱིལ་འཁོར་གྱི་སྟེང་དུ་རྣམ་
པ་ལྔས་མངོན་པར་བྱང་ཆུབ་པའི་རིམ་པས་སྐུ་བསྐྱེད་པར་བྱའོ། །ཡེ་ཤེས་སེམས་དཔའ་སྤྱན་དྲང་བའི་སྔགས་ནི་ཛཿཧཱུཾ་བཾ་ཧོཿ་ཞེས་བྱ་བས་དགུག་པ་ལ་སོགས་པ་མཉེས་པ་ལ་ཐུག་པར་བྱའོ། །དེ་ལ་བྱིན་གྱིས་བརླབ་པ་ཁམས་དང་སྐྱེ་མཆེད་དག་པར་བྱ་བ་ནི་རིགས་གསུམ་དང་རིགས་ལྔའི་རང་བཞིན་དུའོ། །དབང་བསྐུར་བ་ནི་མེ་བསྐྱོད་པས་དབུ་བརྒྱན་པའོ། །མཆོད་པ་རྣམས་ནི་ཕྱི་རོལ་དག་གིས་ཏེ་ཕྱི་རོལ་གྱི་མཆོད་པ་རྣམས་ནི་ཨརྒྷ་དང་མེ་ཏོག་ལ་སོགས་རང་གི་མིང་གི་དང་པོ་དང༌། ཐ་མའི་ཕྱག་དང་བཅས་པས་དབུལ་བར་བྱའོ། །བསྟོད་པ་ནི་མིང་ལྔའི་ཤློ་ཀ་གཅིག་གམ། མང་བཅུ་པའམ་མིང་བརྒྱ་རྩ་བརྒྱད་པ་ལ་སོགས་པས་བསྟོད་པ་བྱའོ། །བཟླས་པའི་དུས་སྐུ་གསུང་ཐུགས་ཀྱི་ལྷ་དང་ཡེ་ཤེས་སེམས་དཔའི་ཐུགས་ཀར་གདན་དང་མཚན་མ་ཇི་ལྟ་བ་བཞིན་བསམས་ཏེ། རང་གི་ས་བོན་གྱིས་མཚན་པར་བྱས་ལ། བརྟན་ནས་གསང་སྔགས་ཀྱི་ཕྲེང་བ་རབ་ཏུ་འོད་འབར་བ་དང་བཅས་པ་སྤྲོ་བ་དང་བསྡུ་བར་བྱའོ། །ཡེ་ཤེས་སེམས་དཔའི་ཐུགས་ཀར་ཟླ་བའི་དཀྱིལ་འཁོར་ཧཱུཾ་གིས་མཚན་པ་སྔགས་ཀྱི་ཕྲེང་བ་ཅན་ནོ། །སླར་གཤེགས་སུ་གསོལ་བ་ནི་ས་བོན་སྙིང་པོའམ་དེ་ཉིད་གསུམ་གྱི་སྔགས་མུཿ་ཞེས་བྱ་བ་དང་ལྡན་པའོ། །ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས་སློབ་དཔོན་བྷ་བས་མཛད་པའི་མན་ངག་རྫོགས་སོ།།