བཞི་བ་མཐར་ཐུག་གི་ཡན་ལག

བཞི་བ་མཐར་ཐུག་གི་ཡན་ལག་ནི།

དང་པོའི་གནས་ནས་འཕོས་པ་དེ་ཡིན་ཏེ། ཕྱུང་ནའོ། །དང་པོ་ལའོ། །ཞེས་གསུངས་སོ། །རྨི་ལམ་དུ་ཁུ་བ་འབྱིན་པ་ལ་སོགས་པ་རྨིས་ན།ཊཱི་ཀ་ལས། རྨི་ལམ་ནི་རྫས་སུ་ཡོད་མོད་ཀྱི་མེད་པ་དང་འདྲ་སྟེ་འཇིག་རྟེན་གྱི་ཐ་སྙད་ལས་འདས་པའི་ཕྱིར་རོ། །ཞེས་སོ། །འདིར་རྨི་ལམ་ནི་གཉིད་ལོག་པ་ན་ལུས་ངག་ཏུ་མ་གྲུབ་པ་ནང་གི་བསམ་པའི་ཆོས་ཡིན་ནོ། །རྨི་ལམ་དེས་སྐྱོད་པའི་འབྲས་བུ་ནི། ལུས་ངག་གི་རྣམ་འགྱུར་བྱུང་བ་དག་སྟེ། དེ་ནི་ལྟུང་བ་བསྐྱེད་པའི་བདག་ཉིད་དུ་མ་བྱས་པ་ཉིད་དོ། ། ལུང་རྣམ་འབྱེད་ལས། རྨི་ལམ་གྱི་མ་གཏོགས་སོ་ཞེས་འབྱིན་པའི་སྐབས་འདིར་གསུངས་ཀྱང་མཚོན་པ་སྟེ། འོད་ལྡན་རྩ་འགྲེལ་ལས། མི་ཤི་རྨི་ལམ་མ་གཏོགས་དེ་བརླག་འགྱུར། །ཞེས་སོགས་གསུངས་ལ། ཞུ་འགྲེལ་ལས་ཀྱང༌། ཁུ་བ་འབྱིན་པ་ལ་རྨི་ལམ་གྱི་མ་གཏོགས་ཏེ། ཞེས་སྨོས་པ་ནི་དཔེ་སྟེ། མི་ཚངས་པར་སྤྱོད་པ་ལ་སོགས་པ་ཁ་ན་མ་ཐོ་བ་གཞན་དག་ལའང་ཚུལ་འདི་རུང་བའི་ཕྱིར་ཏེ། བྱུང་བའི་དབང་གིས་འདིར་བྱུང་བར་ཟད་པ་ཡིན་པའི་ཕྱིར་རོ། །ཊཱི་ཀ་ལས། འདི་ལྟར་བཤད་དེ་ཁུ་བ་ནི་མང་དུ་ཡོད་དེ། དང་པོའི་གནས་ནས་ཕྱུང་བ་དང༌། རྩའི་སྦུབས་སུ་འོངས་པ་ལས་ཕྱིར་ཕྱུང་བ་དང༌། དབང་པོའི་མཐའ་ནས་ཕྱིར་ཕྱུང་བའོ། །ཞེས་གསུངས་ལ། གསུམ་པོ་དེ་དག་གང་ལ་དགེ་འདུན་ལྷག་མར་འགྱུར་ཞེ་ན། དང་པོ་ལས་དགེ་འདུན་ལྷག་མ་འབྱུང་བ་ཡིན་ཏེ། དང་པོ་ལའོ་ཞེས་པའི་ཊཱི་ཀ་ལས་འདི་ལྟར་བཤད་དེ་དང་པོའི་གནས་ནི། ཁུ་བ་དེ་མཁྲིས་པ་བཞིན་དུ་ལུས་ཀྱི་ཕྱོགས་གཅིག་ན་ཚོགས་ནས་གནས་པ་མ་ཡིན་གྱི་འབྲུ་ལས་འབྲུ་མར་བཞིན་དུ་ལུས་ལ་ཁྱབ་པར་གནས་པར་གསུངས་སོ། །འོ་ན་དང་པོའི་གནས་ནས་ཕྱུང་བར་ཅིས་ཤེས་ཤེ་ན། ཊཱི་ཀ་ལས། དེ་མྱོང་བའི་གནས་སྐབས་དེ་ན་འདོད་ཆགས་ཤས་ཆེར་རབ་ཏུ་འགྱུར་བ་དང༌། བདེ་བ་ཉམས་མྱོང་ཆེན་པོ་སྐྱེ་བ་དང༌། སྙིང་འདར་བ་ལ་སོགས་པ་ལུས་འགྱུར་བ་འབྱུང་བ་ཡིན་ནོ། །ཞེས་སོ། །ཆགས་པའི་སེམས་ནི་དབྱུང་བའི་སེམས་ཡིན་ཏེ། རྣམ་འབྱེད་འགྲེལ་བ་ལས། ཁུ་བ་འབྱིན་པའི་འདོད་ཆགས་ཀྱིས། ཞེས་སོ། །བུད་མེད་ཀྱི་གཟུགས་སྒྲ་དྲི་རོ་རེག་བྱ་སྟེ་ཡུལ་ལྔ་ལས་རེག་བྱ་མ་ཡིན་པ་གཟུགས་སྒྲ་དྲི་རོ་ཉམས་སུ་མྱོང་བ་ལས་བབ་ཅོལ་དུ་ཁུ་བ་ཕྱུང་བ་ལ་ལྟུང་བ་མེད་དོ། །རེག་བྱ་ལོགས་སུ་དགར་བ་ནི་རེག་བྱ་དེ་ཆགས་པའི་ཡུལ་གྱི་གཙོ་བོ་ཡིན་པས་རེག་ན་བསླབ་བྱའི་ཉེས་བྱས་སུ་འགྱུར་བའོ། །ཆགས་སེམས་མེད་ཀྱང་བུད་མེད་ལ་རེག་པ་བཀག་ཅིང་ཆགས་སེམས་མེད་པར་ཅུང་ཟད་བལྟ་བ་ལ་ཉེས་པ་མེད་དོ། །ཡང་འབྱིན་པའི་ལྷག་མ་འདི་ལ་ཡན་ལག་བཅུ་ཡོད་དེ། ཊཱི་ཀ་ལས། ཁུ་བ་འབྱིན་པའི་སྐབས་འདི་ལ་ཡན་ལག་བཅུ་སྟེ། ཕྱུང་བ་དང༌། དེར་འདུན་པ་དང༌། རང་གི་ཁུ་བ་དང༌། དང་པོ་དང༌། རེག་པ་དང༌། བརྩལ་བ་དང༌། ཡན་ལག་གི་རྣམ་པ་དང༌། ཕྱི་རོལ་དང༌། སེམས་ཅན་དུ་བགྲང་བ་དང༌། དེའི་རྣམ་པར་གནས་པ་སྟེ། ཞེས་གསུངས་པས་སོ། །དེ་བཅུ་ལས་གཅིག་མ་ཚང་ན་སྦོམ་པོ་ཡིན་ཏེ། ཊཱི་ཀ་ལས། ཡན་ལག་བཅུ་པོ་དེ་དག་ལས་གང་ཡང་རུང་བ་མ་ཚང་ན་ནི་ཉེས་པ་སྦོམ་པོའོ། །ཞེས་གསུངས་པའི་ཕྱིར་རོ། །འབྱིན་པའི་དགེ་འདུན་ལྷག་མ་རྫོགས་སོ།། །།

གཉིས་པ་རེག་པའི་དགེ་འདུན་ལྷག་མ་འཆད་པའི་སྐབས་འདིའི་མདོ་རྩའི་དོན་ལ།བུད་མེད་བྱེད་པ་པོ་རྣམས་ཀྱི་ཐུན་མོང་བསྟན་པ་དང༌། རེག་པའི་སྐབས་བྱེ་བྲག་ཏུ་བསྟན་པ་དང་གཉིས། དང་པོ་ནི། རྩ་བར། བྱེད་པ་པོ་ཉིད་བུད་མེད་དེ། དབེན་པ་ན་འདུག་པ་དང༌། འགྲེང་བ་གཉིས་ཀྱིའོ། །ཞེས་པ་ནས། བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་ཏུ་འདོད་ཆགས་དང་ལྡན་པས་ཀྱང་ངོ། །ཞེས་པའི་བར་མདོ་ཉི་ཤུས་བསྟན་ཏོ། །མདོ་དེ་དག་གི་དོན་ལ་གསུམ་ལས།དང་པོ་དགོས་པའི་དོན་ནི། ཚིག་ཚོགས་ཆུང་ཞིང་རྟོགས་པར་སླ་བ་ཡིན་ཏེ། ལུང་རྣམ་འབྱེད་ལས།ལྟུང་བ་མང་པོ་ལ་དོན་གོ་དང་བསྟེན་རུང་རེ་རེ་ལ་རེ་རེ་གསུངས་ཀྱང་མདོ་རྩ་བར་ཚིག་གཅིག་ཏུ་བསྡུས་པ་ལྟ་བུའོ། །གཉིས་པ་ཡན་ལག་རྣམ་པར་བཞག་པ་ལ་ལྔ་ལས། དང་པོ་བུད་མེད་ཀྱི་མཚན་དོན་ཡོད་པའི་ཡན་ལག་ནི། བུད་མེད་ཉིད་དམ་མཚན་གཉིས་པ་བུད་མེད་ཀྱི་མཚན་ཤས་ཆེ་བ་དང་ལྡན་པའོ། །དེ་ལྟུང་བ་གང་གི་ཡན་ལག་ཡིན་ན། རེག་པ་ནས་ཆོས་སྟོན་པའི་བར་བཅུའོ། །སྒྲུབ་བྱེད་ནི་འདི་ལ་བྱེད་པ་པོ་ཉིད། ཅེས་པ་ལ་སོགས་པ་མདོ་བདུན་ནོ། །འདིར་སེལ་བ་ནི་སྐྱེས་པ་ཉིད་དང་མ་ནིང་ཉིད་དང་མཚན་གཉིས་པ་བུད་མེད་ཀྱི་མཚན་དོན་མེད་པ་ཅན་རྣམས་སོ། །ཅིར་འགྱུར་ནི་སྐྱེས་པ་ལ་དགེ་སློང་གིས་དབེན་པ་འདུག་འགྲེང་གཉིས་དང་གནས་གཅིག་ཏུ་ལྷན་ཅིག་ཉལ་བ་དང༌། ལམ་དུ་འགྲོ་བ་དང་ཆོས་སྟོན་པ་ལྔ་པོ་བྱས་པ་ལ་ལྟུང་བ་མེད་དེ། དགག་བྱ་མེད་པའི་ཕྱིར་རོ། །སྐྱེས་པ་ལ་དགེ་སློང་གིས་རེག་པ་འཁྲིག་ཚིག་བསྙེན་བཀུར་བསྔགས་པ་དང་གསུམ་པོ་བྱས་པ་དང་སྐྱེས་པ་ནང་ཉལ་པོ་བྱེད་པར་ཤོམ་པའི་ཁྱིམ་དུ་དགེ་སློང་གིས་འདུག་འགྲེང་གཉིས་བྱས་ན་རང་རང་གི་ལྟུང་བ་ན་སྨད་པ་སྟེ། གསུམ་པོ་འདི་ལ་སྐྱེས་པའོ་ཞེས་པ་དང༌། བམ་པོ་ལྔ་བཅུ་པ་ལས་ཉལ་ཤོམ་འདུག་འགྲེང་གཉིས་ཀྱི་སྐབས་སུ། གཉིས་ཀ་སྐྱེས་པ་ཡིན་ན་ཉེས་བྱས་སོ། །ཞེས་གསུངས་སོ། །རིགས་པས་ཡང་དགག་བྱ་མ་རྫོགས་པའི་ཕྱིར་རོ། །མ་ནིང་ཉིད་དང་མཚན་གཉིས་པ་བུད་མེད་ཀྱི་མཚན་དོན་མེད་པ་ཅན་ལ་རེག་པ་ལ་སོགས་པ་བཅུ་པོ་བྱས་ན་རང་རང་གི་ན་སྨད་པའོ། །