གཉིས་པ་སྐྱེས་པ་མེད་པའི་ཡན་ལག

གཉིས་པ་སྐྱེས་པ་མེད་པའི་ཡན་ལག་ནི།

ལྟུང་བ་སྐྱེད་པའི་ཡུལ་རྟེན་གཉིས་ལས་གཞན་པ་ཁྲིམས་གྲོགས་སྐྱེས་པ་མེད་པའོ། །དེ་ལྟུང་བ་གང་གི་ཡན་ལག་ཡིན་ན་ལམ་དུ་འགྲོ་བ་དང་ཆོས་སྟོན་པ་གཉིས་ཀྱིའོ། །སྒྲུབ་བྱེད་ནི། རྩ་བར། རིག་པའི་སྐྱེས་པ་མེད་པའི་བུད་མེད་དང་ལྷན་ཅིག་ལམ་དུ་འགྲོ་བའོ། །ཞེས་དང༌། སྐྱེས་པ་མེད་པར་རོ། །རིག་པའོ། །ཞེས་སོ། །སེལ་བ་ནི་ཁྲིམས་གྲོགས་རིག་པའི་སྐྱེས་པ་དང་ལྡན་པའི་དགེ་སློང་གིས་ཁྱིམ་པ་མོ་ལ་ཆོས་སྟོན་པ་དང་བུད་མེད་དང་ལམ་དུ་འགྲོ་བ་ལ་ལྟུང་བ་མེད་དེ། ལུང་རྣམ་འབྱེད་ལས། རིག་པའི་སྐྱེས་པ་ཉེ་བར་བཞག་སྟེ་ཅི་འདོད་པར་ཆོས་བསྟན་པར་བྱ་བའོ། །ཞེས་གསུངས་སོ། །རིགས་པས་ཀྱང་དགག་བྱ་མེད་པའི་ཕྱིར་རོ། །གསུམ་པ་དོན་གོ་བའི་ཡན་ལག་ནི། བུད་མེད་དེས་ལེགས་སྨྲས་ཉེས་སྨྲས་ཀྱི་དོན་གོ་བར་ནུས་པའོ། །དེ་ལྟུང་བ་གང་གི་ཡན་ལག་ཡིན་ན། འཁྲིག་ཚིག་བསྙེན་བཀུར་ཆོས་སྟོན་པ་དང་གསུམ་གྱིའོ། །སྒྲུབ་བྱེད་ནི་འོག་མ་གསུམ་ལ་ལེགས་པར་སྨྲས་པ་དང༌། ཞེས་སོ། །སེལ་བ་ནི་བུད་མེད་དོན་མི་གོ་ལ་འཁྲིག་ཚིག་ལ་སོགས་པ་གསུམ་པོ་དེ་རྣམས་བྱས་ན་རང་རང་གི་ན་སྨད་པ་སྟེ། གཞན་དུ་ན་འོག་མའི་འོ། །ཞེས་གསུངས་སོ། ། བཞི་པ་བསྟེན་རུང་གི་ཡན་ལག་ནི། ཡུལ་འཁྲིག་པ་བསྟེན་རུང་བ་སྟེ། ལམ་ཆེ་ཆུང་སྤྲད་པར་བཟོད་པའོ། །དེ་ལྟུང་བ་གང་གི་ཡན་ལག་ཡིན་ན། རེག་པ་ལ་སོགས་པ་བདུན་གྱིའོ། །སྒྲུབ་བྱེད་ནི། རྩ་བར། གཞན་ལ་འཁྲིག་པ་བསྟེན་པར་བྱ་བའི་མཐུ་ཡོད་པ་ཡིན་ན་དངོས་གཞིའོ། །ཞེས་སོ། །སེལ་བ་ནི་བུ་མོ་ཆུང་ངུ་ལྟ་བུ་འཁྲིག་པ་བསྟེན་དུ་མི་རུང་བ་ལ་རེག་པ་ལ་སོགས་པ་བདུན་པོ་དེ་རྣམས་བྱས་ན། རང་རང་གི་ན་སྨད་པ་ཡིན་ཏེ། རྩ་བར། གཞན་དུ་ན་འོག་མའིའོ། །ཞེས་གསུངས་སོ། །