རྡོ་རྗེ་འཇིགས་བྱེད་ཀྱི་ཚོགས་ཀྱི་འཁོར་ལོ་ཞེས་བྱ་བ།
རཏྣ་ཨཱ་ཀ་ར་ཤཱནྟི།
རྒྱ་གར་སྐད་དུ། །བཛྲ་བྷཻ་ར་བ་བ། ཎ་ཙ་ཀྲ་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཀྱི་ཚོགས་ཀྱི་འཁོར་ལོ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དངོས་དང་དངོས་མེད་བདག་ཉིད་གཙོ། །དང་པོར་རྡོ་རྗེ་སེམས་ལ་ཕྱག་འཚལ་ནས། །འདོད་པ་ཐམས་ཅད་རབ་སྩོལ་བ། །ཚོགས་ཀྱི་འཁོར་ལོ་བདག་གིས་བཤད། །སྔགས་པ་མཆོག་ཏུ་རྟོག་མེད་པས། །དུས་ཀུན་དུ་ནི་མཉམ་པར་གཞག །རྒྱུད་ཀུན་གྱི་ནི་རྗེས་འབྲང་ཤེས། །དེ་ཉིད་བཅུ་ནི་མཆོག་ཏུ་རིག །ཟབ་ཅིང་རྒྱ་ཆེ་ཆོས་རྣམས་ལ། །ཡིད་ནི་དལ་བར་གྱུར་བ་དང༌། །ང་རྒྱལ་མེད་པའི་སློབ་མ་རྣམས། །ལེགས་པར་ཐོས་འདོད་དང་རྣམས་ལ། །ཚོགས་ཀྱི་ལྷ་ནི་ཡོངས་རྫོགས་པས། །འདོད་ཡོན་ལྔ་ཡི་འབྲས་བུ་སྟེར། །དབེན་ཞིང་ཉམས་དགའི་ཁང་པ་རུ། །དེར་ནི་རང་གིས་མཆོད་པ་བརྩམ། །རྣལ་འབྱོར་རྒན་པའི་རིམ་པ་ཡིས། །ཕྱག་དང་མཆོད་པ་བྱ་བར་གྲགས། །ཡང་ན་ཡོན་ཏན་ཆེ་
བའམ། །མགྲོན་པོ་ཡིན་ཕྱིར་གུས་པ་དང༌། །ཁྲུས་དང་དྲི་ཞིམ་གོས་དང་ནི། །མེ་ཏོག་ཕྲེང་བས་བརྒྱན་པ་དང༌། །མཆོད་ཡོན་བདུག་པ་ཅི་ནུས་པས། །ཚོགས་ཀྱི་འཁོར་ལོ་བརྩམ་པར་བྱ། །ལས་ཀྱི་རྡོ་རྗེ་མཉམ་བཞག་པས། །འདི་དག་ལ་ནི་བསང་གཏོར་བྱ། །མཛོད་སྤུ་སྤྱི་བོར་ཐལ་སྦྱར་ནས། །ཡན་ལག་བརྒྱད་ཀྱིས་ཕྱག་བྱའོ། །རིན་ཆེན་སྣོད་སོགས་གཏོར་མ་གཞག །རྒྱལ་བ་འཇིག་རྟེན་འདས་ལ་དབུལ། །འཇིག་རྟེན་པ་དང་སྔགས་ལྷ་ལ། །དེ་ཉིད་རིག་པས་མཆོད་པ་བརྩམ། །རྒྱུད་ཀྱི་དགོངས་པའི་སྦྱོར་བ་ཡིས། །པདྨའི་སྣོད་དུ་བདུད་རྩི་ཆེ། །ལྕགས་ཀྱུ་བཅུ་ནི་ཡང་དག་བཟླས། །དེ་དག་ཐམས་ཅད་ཚིམ་པར་བྱ། །ཐུན་མོང་ཀུན་གྱི་མཆོད་པ་དང༌། །ཀུན་ལ་གསང་བ་མཆོག་གི་མཆོད། །བདེ་བ་ཆེན་པོའི་གོ་འཕང་གནས། །ཚོགས་ཀྱི་གཙོ་བོ་འཇུག་པར་བྱ། །བུ་མོ་དལ་བ་ཚང་ཞིང་ཞལ་གྱི་པདྨའི་མགོ་བོ་སྨད། །ཡོན་ཏན་ཆེན་པོ་ཤིན་ཏུ་རྒྱས་ཤིང་དེ་ཉིད་ཡང་དག་རིག་པར་རུང་བ་ཉིད། །སེམས་ཀྱི་རྣམ་རྟོག་བྲལ་ཞིང་རྒྱན་རྣམས་ཀུན་དང་ལྡན། །ནུ་མ་གཉིས་ནི་མཆོག་ཏུ་རྒྱས་པས་བདུད་རྩིའི་སྣོད་ནི་དེ་ཡིས་འབུལ། །རང་བྱུང་ཡེ་ཤེས་མེ་འབར་བས། །འོད་འཕྲོ་གདན་གྱི་ལུས་འབུད་ཅིང༌། །ཁར་ནི་དེ་ཉིད་སྦྱིན་སྲེག་ཕྱིར། །རོ་ལ་སོགས་པ་དབབ་པར་བྱ། །དེ་ནས་སྙིང་གའི་ཟླ་དཀྱིལ་སར། །ཐིག་ལེའི་ལྷ་ནི་མངའ་བདག་ཆེ། །ཡང་ན་རང་གི་འདོད་སོགས་ལྷ། །འཁོར་ལོ་རྒྱན་གྱིས་བརྒྱན་པའོ། །མིང་མེད་ཐིག་ལེས་ཐིག་ལེ་སྟེ། །དེ་ཉིད་བསྲུང་བསྲུབས་འོད་ཟེར་ཅན། །ལྕེ་ཡི་རྩེ་ལ་ཉུང་ཟད་དགོད། །བདུད་རྩིའི་རྒྱུན་གྱིས་ཚིམ་བྱའོ། །ལྟེ་བའི་འཁོར་ལོ་ནཱ་ད་ལས། །བྱུང་བས་དེ་ཡི་རོ་བཀུག་ནས། །ལན་གསུམ་དུ་ནི་འཐུངས་ནས་སུ། །རྣལ་འབྱོར་པ་དེ་བདེ་བར་གནས། །བི་མུ་མ་ར་ཤུ་ད་ཧ་ན་གོ་ཀུ་པཉྩ་ཀཾ །རྒྱུད་དང་རྒྱུད་གཞན་བརྗོད་པ་ཡི། །གཞན་ཡང་བདུད་རྩི་ཆེན་པོ་རྣམས། །བར་སྣང་དུ་ནི་གནས་པ་ལ། །ཀུན་ལ་མཛུབ་གཏོར་བྱིན་པར་བྱ། །དཔའ་བོས་དཔའ་བོའི་ལྷ་དང་ནི། །ལྷ་མོ་ཀུན་གྱི་ཚོགས་ལ་གསལ། །ལྕགས་ཀྱུ་བཅུ་ཡི་དེ་ཉིད་ནི། །ཐོགས་ནས་སྦྱིན་བདག་སེམས་དག་ཕྱིར། །ཇི་ལྟར་རིགས་པར་རྟོགས་ནས་ནི། །ཕྱི་རོལ་ལྷ་ལ་དབུལ་
བར་བྱ། །སེམས་ཅན་རྣམས་ལ་སངས་རྒྱས་ཉིད། །ཀུན་གྱི་སྙིང་རྗེའི་སྟོབས་ཀྱིས་བསྒྲུབ། །རྡོ་རྗེ་དྲིལ་བུ་ལྡན་པས་བསྟོད། །འཁོར་ལོས་སྒྱུར་ལ་བསྟོད་པར་བྱ། །སྒེག་པའི་ཚུལ་གྱིས་སྟེར་བ་དང༌། །མཆོད་རྫས་ཀྱི་ནི་སྣོད་དག་རྣམས། །སོ་སོའམ་ཀུན་ལ་གཅིག་ཏུའོ། །དག་དང་མ་དག་སྤྱད་མི་བྱ། །ཇི་ལྟར་འདོད་པའི་བཟའ་དང་བཏུང་བ་རྣམས། །མཆོད་པ་སྣ་ཚོགས་མང་པོ་ཡིས། །རྡོ་རྗེ་ཅན་གྱིས་མཆོད་པ་ཡིན། །ཅི་བདེ་ཇི་ལྟར་འདོད་པར་གསོལ། །དེ་ལྟར་སེང་གེ་བཞིན་དུ་དོགས་མེད་རྟོགས་བྲལ་བས། །སྲིད་ཞིའི་གོ་འཕང་དེ་ཉིད་གནས་པས་བདེ་བར་ལྡན། །རང་གི་ཡིད་འོང་ཀེ་ཤི་ཀ་ལ་སོགས་པའི་གླུ། །རྒྱལ་བ་མ་ལུས་ཚོགས་ལ་གར་གྱིས་ཀྱང་ནི་མཆོད་པར་བྱ། །སྣོད་ནི་གང་གིས་ལག་པར་གཞག །གར་གྱི་ལག་པས་གཟུང་བར་བྱ། །མི་ཤེས་པའམ་རྨོངས་པ་ཡིས། །སྨོད་པར་གྱུར་ན་ཆད་པ་ཐོབ། །ལུས་ངག་ཡིད་ཀྱི་ལས་ཀྱིས་ནི། །ལ་ལ་དུལ་བར་མ་གྱུར་ན། །ཆད་པས་དེ་ནི་ཞི་བའི་ཕྱིར། །དེ་ཡིས་ཇི་ལྟར་རིགས་པར་བརྟག །ལག་པ་གཉིས་ཀྱི་ཕྱག་རྒྱ་ཡིས། །དེ་ཉིད་གཙོ་བོའི་ཆོ་ག་བཞིན། །ཕན་ཚུན་དུ་ནི་ཚིམ་པར་བྱ། །སྒེག་དང་རྩེ་བའི་རོ་ཡིས་བདེ། །ཟབ་དང་རྒྱ་ཆེའི་གཏམ་བརྗོད་ཅིང༌། །དེ་ཉིད་བརྩོན་པས་མཆོད་པར་བྱ། །གླུ་དང་རྔ་སོགས་གར་གྱིས་ནི། །ཐབས་དང་ཤེས་རབ་བདེ་བའི་མཆོག །ཕན་ཚུན་དུ་ནི་མཉམ་པར་གུས། །དམ་ཚིག་ཉན་པར་ཤིན་ཏུ་འདོད། །ཕ་རོལ་ཕྱིན་བཅུ་སྦྱོར་བ་ཡིས། །བརྟུལ་ཞུགས་ཅན་གྱིས་མཆོད་སྦྱིན་བྱ། །འགྲོ་བར་འདོད་པས་ཐལ་སྦྱར་ནས། །སྔོན་དུ་བཟོད་གསོལ་འགྲོ་བར་བྱ། །བྱ་བ་བྱས་ནས་བློ་ལྡན་གྱིས། །དེ་ནས་ཕྱག་བྱས་འཇུག་པར་བྱ། །རྟག་ཏུ་རྣལ་འབྱོར་བདག་ཉིད་དང༌། །རྟག་ཏུ་དེ་ཉིད་ལམ་ལ་ཞུགས། །རྟག་ཏུ་འདུལ་བར་ལྡན་པ་ཡིན། །ཚོགས་ཀྱི་འཁོར་ལོ་རྟག་ཏུ་བྱ། །སྦྱིན་པའི་ཟས་སྦྱིན་པ་རྣམས་ལ། །ཕྱག་རྒྱ་ཐུན་མོང་དུ་ནི་བརྗོད། །དེ་ཕྱིར་གྲོལ་བར་འདོད་པ་ཡིས། །བདག་དང་གཞན་ལ་མཆོད་པར་བྱ། །ཇི་སྲིད་རང་གི་བདེ་འདོད་པས། །འདི་ཉིད་རོལ་དང་སྒེག་པ་ཡིས། །དེ་སྲིད་ཕྱག་རྒྱན་ལྷན་ཅིག་ཏུ། །གཉུག་མ་འདི་ཡིས་མཆོད་པར་བྱ། །མིག་ལ་སོགས་པའི་ཐབས་ཆེན་གྱིས། །
གཟུགས་སོགས་རྡོ་རྗེ་མ་ཡི་ཚོགས། །རྣམ་ཤེས་རྣམས་ཀྱི་བདེ་ཆེན་པོ། །ཕྱི་རོལ་གྱི་ནི་རྟག་ཏུ་འཇུག །རྡོ་རྗེ་པདྨའི་འོད་ཟེར་གྱིས། །ཟླ་བའི་འོད་ཟེར་དཀར་པོ་འདྲ། །རྒྱལ་བའི་ཚོགས་ཀྱི་འོད་ཟེར་འབྱུང་བས་རང་བཞིན་མེད་པར་རང་བཞིན་ཅན། །ཤིན་ཏུ་བདེ་བ་མཆོག་ཏུ་འཕགས་པས་ཡིད་དུ་འོང་བའི་ཤེས་རབ་བཀའ་ཉན་ལས། །དག་པའི་ལྕེ་ཡིས་ལེན་བྱེད་སེམས་ཅན་དེ་ནི་རྡོ་རྗེ་སེམས། །དེ་ནས་གཤེགས་གསོལ་ཐོབ་པ་ན། །བཀྲ་ཤིས་ཀླུ་དང་ལྷ་ཀུན་ལ། །ཚོགས་ཀྱི་འཁོར་ལོ་མངོན་བྱས་ནས། །ཡོན་བདག་མགོ་ལ་མེ་ཏོག་གཞག །བཀྲ་ཤིས་བརྗོད་ལ་སྡོམ་པ་སྦྱར། །འབྱུང་པོ་ཐམས་ཅད་སངས་རྒྱས་སུ། །བླ་ན་མེད་པར་སྨོན་ལམ་གདབ། །ལྷག་མའི་གཏོར་མས་ཚིམ་པར་བྱ། །གཏོར་མ་ཆེན་པོ་ཡང་དག་བསྡུས། །ཆོས་བདག་ཡེ་ཤེས་གྱུར་ནས་ནི། །བློ་དང་ལྡན་པས་དགེ་ལ་སྦྱར། །མཐོ་གང་ཙམ་གྱི་མཐོ་བ་རུ། །རྒྱལ་བ་ཆོས་ཀྱི་གཞི་བསམ་བྱ། །དེ་ལས་བདུད་རྩི་རྒྱུན་འཛག་པ། །རང་ཉིད་ལ་ནི་བསམ་པར་བྱ། །ཡུངས་ཀར་ཙམ་གྱི་ཕྲ་བ་ནི། །རྡོ་རྗེ་ཅན་གྱི་མཚན་མ་སྟེ། །རྡོ་རྗེ་རྩེའམ་སྣ་རྩེར་བསམ། །བརྟན་པར་གྱུར་ནས་སྤྲོ་བར་བྱ། །སྙིང་གའི་དཀྱིལ་ནི་ནམ་མཁའ་ལ། །ཟླ་བའི་དཀྱིལ་འཁོར་རྫོགས་པ་སྟེ། །དེར་ནི་ཆོས་ཀྱི་འབྱུང་གནས་གནས། །ཕྲ་མོའི་རྡོ་རྗེ་རྟག་ཏུ་དྲན། །རྡོ་རྗེ་ལ་སོགས་རོ་དང་ལྡན། །ཡིད་ཀྱི་རང་བཞིན་རྣམ་ཐར་གསུམ། །རྣམ་པ་ཀུན་གྱི་དོན་དག་ལ། །འགྱུར་བ་མེད་པའི་བདེ་བ་ཆེ། །ཐབས་དང་ཤེས་རབ་རྣལ་འབྱོར་དག །ལས་ཀུན་ལ་ནི་ཐམས་ཅད་དུ། །ཡང་དག་བྱང་ཆུབ་ལེགས་སེམས་གཟུགས། །དེ་ཉིད་བརྩོན་པས་བསམ་པར་བྱ། །སྔགས་ནི་སྲོག་གི་ཡི་གེ་བཟླས། །ཐིག་ལེའི་རང་བཞིན་འོད་གསལ་བ། །ཆོས་དང་ཆོས་མིན་ལས་གྲོལ་བ། །རྟག་ཏུ་ཡོངས་སུ་བསྒོམ་པར་བྱ། །དེ་ཡིས་དུས་སམ་ཐམས་ཅད་དུ། །གྲོལ་བའི་ལམ་ལ་བརྩོན་པ་ཡིས། །རྟག་པའི་དུས་སུ་བསྒོམ་བྱས་ན། །དེ་ཡིས་གྲོལ་ཐོབ་ཕུན་སུམ་ཚོགས། །འགྲོ་བ་རྣམས་ཀྱི་བསམ་པ་སྦྱིན་པ་ལ་སོགས་ཀུན་གྱིས་མྱུར་དུ་ཡོངས་རྫོགས་ནས། །བདག་མེད་རྡོ་རྗེ་ལ་སོགས་
ཀྱིས་ནི་རྣམ་རྟོག་རྨོངས་པའི་གྲོང་ཁྱེར་ཐམས་ཅད་བརྟག་བྱས་ནས། །རྒྱལ་བའི་འཁོར་ལོ་གང་ཞིག་བསྐོར་བས་བླ་མའི་ཡེ་ཤེས་འཆར་ཞིང་ཐར་པ་སྟེར་བྱེད་པ། །འཕགས་པ་དེ་ཡི་ཐུགས་རྗེ་ཆེན་པོས་ནད་རྣམས་རྟག་པར་ཤིན་ཏུ་གྲོལ་བར་བྱེད། །ཟབ་པའི་ཚོགས་ཀྱིས་ཡོན་ཏན་གཏེར་ལྡན་པས། །རྣམ་པར་རྟོག་པའི་རྟོག་པ་ལས་རྒྱལ་ཉོན་མོངས་སྤངས་པ་ཡི། །བག་ཆགས་བཅས་པའི་གནས་ལས་གྲོལ་ཞིང་རྣམ་གྲོལ་བའི། །དངོས་དང་དངོས་མེད་རྣམ་གྲོལ་རྣལ་འབྱོར་པ་ལ་ཕྱག་འཚལ་ལོ། །ཡན་ལག་རྒྱན་རྣམས་ཀྱིས་ནི་རྣམ་པར་བརྒྱན་པ་ཡི། །ནམ་མཁའ་ཟླ་བའི་འོད་ཟེར་ཆ་ནི་རྣམ་པ་སྣ་ཚོགས་བྱེད་པ་གང༌། །ཤེས་རབ་ཚོགས་ཀྱི་བདག་ཉིད་ལ་ནི་ཕྱག་འཚལ་འདུད། །འཇིག་རྟེན་འཇིག་རྟེན་འདས་བཅས་བླ་མའི་འཁོར་ལོ་ཅན། །བསྒོམ་བྱ་རྣམ་པར་བསྒོམས་པས་འགྲོ་བ་གྲོལ་བའི་ཕྱིར། །གང་ཞིག་ཕན་པའི་བསམ་པས་འདིར་ནི་དཀྱིལ་འཁོར་བྱེད་པ་ཡི། །ཚོགས་ཀྱི་འཁོར་ལོ་བྱེད་པ་དེ་ལ་ཕྱག་འཚལ་འདུད། །སེམས་ཅན་ཐམས་ཅད་ལ་གནས་དྲི་མེད་དངོས་པོ་ཡི། །བསྒོམས་པས་གསལ་བར་གྱུར་པའི་བདེ་ཆེན་བསྡུས་པ་ལ། །ཕྱག་རྒྱ་དང་བཅས་བྱེད་པ་དེ་ལ་ཕྱག་འཚལ་ལོ། །དཔལ་ལྡན་རྡོ་རྗེ་འཇིགས་བྱེད་ཀྱི་ཚོགས་ཀྱི་འཁོར་ལོ། སློབ་དཔོན་རཏྣ་ཨཱ་ཀ་ར་ཤཱནྟིས་མཛད་པ་རྫོགས་སོ།། །།རྒྱ་གར་གྱི་མཁན་པོ་འདི་པཾ་ཀ་ར་རཀྵི་ཏ་དང༌། ལོ་ཙཱ་བ་དགེ་སློང་རྡོ་རྗེ་གྲགས་ཀྱིས་བསྒྱུར་བའོ།།