གདན་གྱི་ངེས་པ།
གདན་གྱི་ངེས་པ་ནི།
ཐབས་གཙོ་བོར་གྱུར་པ་རྣམས་ཆུ་སྐྱེས་དཀར་པོའི་ལྟེ་བར་ཉི་མའི་དཀྱིལ་འཁོར་ལ་སྟེ། ཉིན་མོ་བཅོམ་ལྡན་རྡོ་རྗེ་ཅན། ཞེས་དང༌། ཤེས་རབ་གཙོ་བོར་གྱུར་པ་རྣམས་འདམ་སྐྱེས་དམར་པོའི་ལྟེ་བར་ཟླ་བའི་དཀྱིལ་འཁོར་ལ་སྟེ། མཚན་མོ་ཤེས་རབ་རབ་ཏུ་གྲགས། ཞེས་པའི་དབང་དུ་བྱས་པའོ། །ཞེས་གསུངས་སོ། །ཐུགས་སྒོའི་ཁྲོ་བོ་ཡབ་ཡུམ་དེ་དག་སྒྲུབ་ཐབས་དཔག་བསམ་ལྗོན་ཤིང་ལས། ཐབས་གཙོ་བོར་གྱུར་བ་ཞེས་གསུངས་པ་ལྟར་ཐབས་གཙོ་བོར་གྱུར་ན་པད་མ་དཀར་པོའི་ལྟེ་བར་ཉི་མའི་དཀྱིལ་འཁོར་བྱེད་དགོས་པ་ལྟ་བུར་ཡོད་ཀྱང་སྔ་མ་ལྟར་རིགས་སོ། །ཤར་སྒོར་བགེགས་མཐར་བྱེད་ཞལ་གསུམ་ཕྱག་དྲུག་རྩ་ཞལ་དང་སྐུ་མདོག་ནག་པོ། གཡས་ཞལ་དམར། གཡོན་ཞལ་དཀར། ཕྱག་གཡས་པ་གསུམ། རལ་གྲི། གྲི་གུག རྩེ་གསུམ། གཡོན་གསུམ། ཕུབ། ཐོད་པ། ཁ་ཊཱཾ་ག་དཀར་པོ་འཛིན་པ་ལ། རེངས་བྱེད་མ་ཞལ་གསུམ་ཕྱག་དྲུག རྩ་ཞལ་དང་སྐུ་མདོག་སེར་མོ། གཡས་ཞལ་དཀར། གཡོན་ཞལ་ནག ཕྱག་གཡས་པ་གསུམ། འཁོར་ལོ། དབྱུག་པ། ཁྲོ་བོའི་རྡོ་རྗེ། གཡོན་གསུམ། དུང༌། ལྕགས་སྒྲོག དྲིལ་བུ་འཛིན་པས་ཡབ་ལ་འཁྱུད་པའོ།།