ལྔ་པ་ཀུན་སློང་གི་ཡན་ལག

ལྔ་པ་ཀུན་སློང་གི་ཡན་ལག་ནི།

རེག་པ་འཁྲིག་ཚིག་བསྙེན་བཀུར་བསྔགས་པ་དང་གསུམ་པོ་དེ་དག་གི་བདེ་བ་ཉམས་སུ་མྱོང་བར་བྱ་བའི་འདུན་པ་ཡིད་ཀུན་ཏུ་འདོད་ཆགས་དང་ལྡན་པའོ། །སེལ་བ་ནི་གསུམ་ཡོད་དེ། རེག་པ་ལ་སོགས་པའི་བདེ་བ་ཉམས་སུ་མྱོང་འདོད་ཡོད་ཀྱང་ཡིད་ཀུན་ཏུ་འདོད་ཆགས་མེད་པ་དང༌། ཡིད་ཀུན་ཏུ་འདོད་ཆགས་ཡོད་ཀྱང་བདེ་བ་ཉམས་སུ་མྱོང་འདོད་མེད་པ་དང༌། དེ་གཉིས་ཀ་མེད་པས་རེག་པ་ལ་སོགས་པ་བྱེད་པའོ། །དང་པོ་ལ་ནི་རང་རང་གི་ན་སྨད་པ་ཡིན་ཏེ། རྩ་བར། འཇམ་པ་དང༌། དྲོ་བ་དང་སྙི་བའི་བསམ་པ་ཉིད་ན་སྦོམ་པོའོ། །ཞེས་གསུངས་སོ། །གཉིས་པ་ལ་ནི་ཆགས་སེམས་ཙམ་པོ་དེ་དག་གཉེན་པོས་བཟློག་ན་ནི་ལྟུང་བ་མེད་དེ། གཞན་དུ་ན་སོ་སོའི་སྐྱེ་བོ་རྣམས་ཀྱིས་བསྒྲུབ་པར་མི་ནུས་པར་འགྱུར་བའི་ཕྱིར་རོ། །གཉེན་པོས་མ་བཟློག་ན་ནི་མི་ཚངས་སྤྱོད་ཀྱི་རྒྱུར་འགྲོ་བས་བསླབ་བྱའི་ཉེས་བྱས་སུ་འགྱུར་ཏེ། ཆགས་སེམས་ཙམ་པོ་དེ་ནི་གཞི་ལ་སོགས་པས་ཁྱད་པར་དུ་མ་བྱས་པའི་ཆགས་སེམས་མངོན་གྱུར་ཡིན་ལ། མི་ཚངས་པར་སྤྱོད་པ་ནི་ཆགས་པ་ཐམས་ཅད་ཀྱི་ལུས་ལྟ་བུ་ཡིན་པའི་ཕྱིར་རོ། །ཞེས་གསུངས་སོ། །གསུམ་པ་ལ་ནི་བདེ་བ་ཉམས་སུ་མྱོང་འདོད་དང་ཡིད་ཀུན་ཏུ་འདོད་ཆགས་པ་གཉིས་ཀ་མེད་པས་རེག་པ་འཁྲིག་ཚིག་བསྙེན་བཀུར་བསྔགས་ན། རེག་པ་ལ་ནི་བསླབ་བྱའི་ཉེས་བྱས་སུ་འགྱུར་རོ། །འཁྲིག་ཚིག་དང་བསྙེན་བཀུར་བསྔགས་ན་ནི་ངག་ཀྱལ་སྨྲ་བའི་ཉེས་བྱས་སུ་འགྱུར་རོ། །གསུམ་པ་བུད་མེད་ཀྱིས་བསྐྱེད་པའི་ལྟུང་བ་མང་དུ་ཡོད་པ་ལས་ལྟུང་བ་བཅུ་པོ་འདི་ཁོ་ན་སྐབས་འདིར་བསྡུ་བའི་འཐད་པ་ནི། སྤྱིར་བུད་མེད་ཡུལ་དུ་བྱས་དགོས་པའི་ལྟུང་བ་མཚོ་ཊཱིཀ་ལྟར་ན་ཉེར་གསུམ་དང་རིན་འཕྲེང་ལྟར་ན་ཉེར་བཞི་ལས་སྐབས་འདིར་བསྟན་པའི་བུད་མེད་ལ་བསྟེན་པའི་ལྟུང་བ་བཅུ་ཡོད་དོ། །སྡོམ་ནི། སྐབས་འདིར་རེག་དང་ཉལ་ཤོམ་འདུག་འགྲེང་དང༌། །དབེན་པར་འདུག་འགྲེང་ལྷན་ཅིག་ཉལ་བ་དང༌། །ལམ་འགྲོ་འཁྲིག་ཚིག་བསྙེན་བཀུར་ཆོས་སྟོན་བཅུ། །ཞེས་སོ། །དེ་ལས་ཉལ་ཤོམ་འདུག་འགྲེང་གཉིས་ནི་བུད་མེད་བྱེད་པ་པོའི་སྐབས་འདིར་བསྡུས་ལ། སྨྱན་བྱེད་པ་ནི་སྐབས་འདིར་མ་བསྡུས་པའི་རྒྱུ་མཚན་ཅི། དགེ་སློང་མ་ལས་གྱུར་པའི་ལྟུང་བ་མང་དུ་ཡོད་པ་ལས། དགེ་སློང་མ་དང་འགྲེང་བ་ནི་བུད་མེད་བྱེད་པ་པོའི་སྐབས་འདིར་བསྡུས་ལ། འཁྲུར་འཇུག་མ་བསྐོས་ཉི་ནུབ་ལ་སོགས་པ་དགེ་སློང་མ་ལས་གྱུར་པ་གཞན་རྣམས་སྐབས་འདིར་མ་བསྡུས་པའི་རྒྱུ་མཚན་ཅི། ཕོ་མོ་གཉིས་ཚོགས་ལས་བསྐྱེད་པའི་ཉལ་ཤོམ་འདུག་འགྲེང་བསྡུས་ལ་སྨྱན་བྱེད་པའི་ལྷག་མ་མ་བསྡུས་པའི་རྒྱུ་མཚན་ཅི། སྐབས་འདིའི་ཊཱི་ཀ་ལས། ད་ནི་གང་དང་གང་ལ་བྱེད་པ་པོ་བུད་མེད་ཡིན་པ་དེ་ཐམས་ཅད་བསྟན་པའི་ཕྱིར། ཞེས་ཐམས་ཅད་བསྟན་པར་གསུངས་པ་དང༌། སྨྱན་དང་ཟས་ཅུང་ཟད་ཕྱིར་སྟོན་དང་དགེ་སློང་མ་ལས་གྱུར་པ་འཁྲུར་འཇུག་དང་མ་བསྐོས་ཉི་ནུབ་ལ་སོགས་པ་གནས་སྐབས་འདིར་མ་བསྟན་པ་འགལ་ལོ་ཞེ་ན་དཔྱད་པར་བྱ་ལ། སྐབས་འདིར་ལྟུང་བ་བཅུ་པོ་འདི་བསྡུ་ལ། གཞན་མི་བསྡུ་བའི་རྒྱུ་མཚན་ནི། བུད་མེད་བྱེད་པ་པོའི་སྐབས་འདིར་བསྟན་པའི་ཡན་ལག་གི་གཙོ་བོ་ནི། བུད་མེད་ཀྱི་མཚན་བསྟེན་དུ་རུང་བ་དང༌། དོན་གོ་ནུས་པ་གཉིས་ཡིན་པ་ལ། ལུང་རྣམ་འབྱེད་ལས། བདུན་ལ་བསྟེན་རུང་དང་གསུམ་ལ་དོན་རྣམས་གོ་བ་ཡན་ལག་ཏུ་གསུངས་པས། བཅུ་པོ་འདི་ནི་ལུང་རྣམ་འབྱེད་ཀྱི་ཐད་ཀའི་དོན་བསྡུས་པའི་ཕྱིར་རོ། །དཔེར་ན་ལུང་གཞི་ལས་སྲ་བརྐྱང་གི་ཕན་ཡོན་བཅུ་གསུངས་ཀྱང༌། ལུང་རྣམ་འབྱེད་ལས། འཆང་འབྲལ་འཇོག་པ་གསུམ་མི་འབྱུང་བར་གསུངས་པའི་དོན་བསྡུས་ཏེ། འདི་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་གསུངས་པ་བཞིན་ནོ་ཞེས་གསུངས་པ་ཡོད་དོ། །འོ་ན་དབེན་པ་ན་འགྲེང་བ་དང་ཉལ་ཤོམ་འདུག་འགྲེང་གཉིས་ཏེ་ལྟུང་བ་ལ་གསུམ་ལ་བརྟེན་རུང་དགོས་པ་འདི་ལུང་རྣམ་འབྱེད་ན་མི་སྣང་བ་དང་འགལ་ལོ་ཞེ་ན། ལུང་རྣམ་འབྱེད་ཡི་གེ་ཆད་པར་གསལ་ཏེ། ལྟུང་བ་གསུམ་པོ་དེ་ལ་ཡང་བསྟེན་རུང་དགོས་པར་མདོ་རྩ་བར་ནི་བསྡུས་ལ། འགྲེལ་པས་རྩོད་སྤོང་མ་བྱས་པའི་ཕྱིར་ཞེས་མཚོ་ཊཱིཀ་ལས་གསུངས་སཽ། །ལུང་རྣམ་འབྱེད་དུ་དེ་བཅུ་ཙམ་ལས་མ་བསྟན་པའི་རྒྱུ་མཚན་ནི་དོན་གོ་བསྟེན་རུང་གང་རུང་ཡན་ལག་ཚང་དགོས་པའི་དབང་དུ་བྱས་པ་ཡིན་ཟེར་ན། སོར་བཤགས་དང་པོ་གཉིས་པོ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་གཉིས་རེ་རེ་ནས་ལྡན་པའི་ཕྱིར། རྟགས་འོག་ཏུ་བཤད་པས་གྲུབ་པའི་ཕྱིར་ཟེར་ན་དཔྱད་པར་བྱའོ། །རེག་པའི་ལྷག་མ་ལ་དོན་གོ་བསྟེན་རུང་གཉིས་ཀ་མི་དགོས་སོ། །དགེ་སློང་མ་དང་དབེན་པ་ན་འགྲེང་བ་མ་གཏོགས་པ་དགེ་སློང་མ་ལས་གྱུར་པ་རྣམས་སྐབས་འདིར་མ་བསྟན་ཡང༌། སྐབས་འདིའི་ཊཱི་ཀ་ལས། གང་དང་གང་ལ་བྱེད་པ་པོ་བུད་མེད་ཡིན་པ་དེ་ཐམས་ཅད་བསྟན་པའི་ཕྱིར་ཞེས་གསུངས་པ་དེ་མི་རིགས་སོ་སྙམ་ན། དེ་ནི་བུད་མེད་ལས་གྱུར་པ་བསྟེན་རུང་དང་དོན་གོ་གཉིས་ཡན་ལག་ཏུ་དགོས་པར་ལུང་རྣམ་འབྱེད་ལས་དངོས་སུ་གསུངས་པ་དེ་ཐམས་ཅད་བསྟན་པའི་ཕྱིར་ཞེས་དགོངས་པའོ། །ཞེས་གསུངས་སོ། །སྐབས་འདིར་རྩ་བར། རེག་པའི་ལྷག་མ་འདི་ལ་ཡུལ་དུ་གྱུར་པའི་བྱེད་པ་པོ་ཉིད་ནི་ཡུལ་བུད་མེད་ཀྱི་མཚན་དོན་ཡོད་པ་ཉིད་དོ། །ཞེས་འདིར་བྱེད་པ་པོ་ནི་མེད་ན་མི་འབྱུང་བའི་རྒྱུ་སྟེ། ཊཱི་ཀ་ལས། བྱེད་པ་པོ་ཉིད་ནི་བུད་མེད་དེ། བུད་མེད་དེ་མེད་ན་ལྟུང་བ་འདི་འབྱུང་བར་མི་འགྱུར་རོ། །ཞེས་བྱ་བའི་ཐ་ཚིག་གོ །བུད་མེད་ཀྱི་མཚན་དོན་ཡོད་པ་ནི། བུད་མེད་ཉིད་དང་མཚན་གཉིས་པ་བུད་མེད་ཀྱི་མཚན་གྱི་ཆ་ནས་བྱ་བ་བྱེད་ནུས་པ་སྟེ། དེ་ལྟ་བུའི་མཚན་གཉིས་པ་ལ་རེག་ན་ཡང་ལྷག་མར་འགྱུར་རོ། །བུད་མེད་དང་ལམ་དུ་འགྲོ་བའི་སྐབས་འདིར། རིག་པའི་ཞེས་ལུང་ལས་དངོས་སུ་མ་གསུངས་ཀྱང་ཁྱིམ་པ་མོ་ལ་ཆོས་སྟོན་པ་ལ་གསུངས་པའི་རྗེས་སུ་འབྲངས་ཏེ་རིག་པ་ཞེས་འདིར་ཡང་སྨོས་སོ། །འོག་མ་གཉིས་ལའོ། །ཞེས་པ་འདི་གོང་དུ་མི་སྟོན་པར་འོག་འདིར་སྟོན་པའི་རྒྱུ་མཚན་ནི། དོན་གོ་དགོས་པ་གསུམ་ལྷན་ཅིག་ཏུ་བཀོད་ཅིང་བསྟེན་རུང་དགོས་པ་བདུན་ལྷན་ཅིག་ཏུ་བཀོད་པ་ལ་བརྟེན་ནས་འོག་མ་གསུམ་ལ་ཞེས་པ་དང་གཞན་ཡང་ཞེས་ཁྱབ་པ་འཛིན་སླ་བའི་ཕྱིར་རོ། །རིག་པའི་སྐྱེས་པ་ཡོད་ཀྱང་བུད་མེད་མི་རུང་བ་ལ་ཆོས་སྟོན་པ་དེ་ནི་ཉེས་བྱས་ཡིན་ནོ། །འོ་ན་ཊཱི་ཀ་ལས། ཁྱིམ་པ་མོ་མི་རུང་བ་དེ་ལ་ཆོས་སྟོན་པ་ནི་རིག་པའི་སྐྱེས་པ་ཡོད་དུ་ཟིན་ཀྱང་ལྟུང་བྱེད་དུ་འགྱུར་ཞེས་གསུངས་པ་དང་འགལ་ལོ་སྙམ་ན། དེ་ནི་ངན་སོང་དུ་ལྟུང་བར་བྱེད་པ་ཙམ་ལ་དགོངས་སོ། །གླིང་གཞན་ལས་སྐྱེས་པ་དང་ཞེས་པའི་སྐབས་འདིར་ཁྲིམས་གྲོགས་ཀྱི་དོན་ནི། དགེ་སློང་ཕ་ལ་ཁྲིམས་གྲོགས་དགོས་པའི་སྐབས་བདུན་ཡོད་པ་ལས་ཁྲིམས་གྲོགས་ཙམ་གྱིས་ཆོག་པ་ལྔ་ནི་དབེན་པ་འདུག་འགྲེང་གཉིས་ལ་ཁྲིམས་གྲོགས་བུད་མེད་ཀྱིས་ཀྱང་གོ་ཆོད་དོ། །ཉལ་ཤོམ་འདུག་འགྲེང་གཉིས་ལ་དེའི་གེགས་བྱེད་ནུས་པ་ཙམ་གྱིས་སོ། །བུད་མེད་དང་ལྷན་ཅིག་ཉལ་བ་ལ་དེ་དང་མི་ཚངས་པར་སྤྱོད་པ་བསྲུང་ནུས་པ་ཙམ་གྱིས་སོ། །ཁྲིམས་གྲོགས་མཚན་ཉིད་དང་ལྡན་པ་དགོས་པ་གཉིས་ནི། ཁྱིམ་པ་མོ་ལ་ཆོས་སྟོན་པ་དང་བུད་མེད་དང་ལམ་དུ་འགྲོ་བའོ། །དེའང་ཁྲིམས་གྲོགས་ཀྱི་མཚན་ཉིད་ནི། ཆོས་དགུ་ལྡན་གྱི་སྐྱེས་བུ་དེ་ཡིན་ཏེ། མི་ཡིན་སྨྲ་ཤེས་དོན་གོ་ཤེས་པ་རང་བཞིན་དུ་གནས། སྐྱེས་པའི་མཚན་རྐྱང་པ་དང་ལྡན། ལོང་བ་མ་ཡིན་པ་སྟེ། ལུང་ཞུ་བ་ལས། ཁྱིམ་པ་མོ་ལ་ཆོས་སྟོན་པའི་ཁྲིམས་གྲོགས་ཀྱི་སྐབས་སུ་ཚིག་ལྷུག་པར་གསུངས་པ་བསྡུ་བའི་ཚིགས་སུ་བཅད་པ་ནི། མི་ལས་འགྲོ་བ་གཞན་དང་ལྐུག་པ་དང༌། །གླེན་འོན་ལ་སོགས་དོན་མི་གོ་བ་དང༌། །སྨྱོ་དང་མཚན་གཉིས་པ་དང་དམུས་ལོང་སྟེ། །སྐབས་འདིར་ལྟུང་མེད་བྱེད་པའི་ཁྲིམས་གྲོགས་མིན། །ཞེས་གསུངས་སོ། །དེ་རྣམས་ཀྱིས་ཁྲིམས་གྲོགས་བྱས་ཤིང་བུད་མེད་ལ་ཚིགས་དྲུག་ལས་ལྷག་པར་ཆོས་བཤད་ན་ཉེས་བྱས་བསྐྱེད་པར་ལུང་ལས་གསུངས་སོ། །བུད་མེད་དང་ལམ་དུ་འགྲོ་བའི་ཁྲིམས་གྲོགས་ལ་ཡང་ལུང་ཞུ་བ་ལས་གཞན་རྣམས་སྔ་མ་བཞིན་དངོས་སུ་གསུངས་ལ། ལོང་བ་མ་ཡིན་པ་ཡན་ལག་ཏུ་དགོས་པ་ནི་དངོས་སུ་མ་གསུངས་ཀྱང་མདོར་བསྡུས་སྦྱར་བར་བྱའོ། །མཚན་དང་སྤྱོད་པའི་སྒོ་ནས་འགྱུར་བ་མི་བསྟེན་པ་སྟེ། རྩ་བར། གླིང་གཞན་ནས་སྐྱེས་པ་དང་འགྱུར་བ་བསྟེན་པ་གཉིས་ནི་མ་ཆོག་པ་ཉིད་དོ། ཞེས་གསུངས་པས་སོ། །ལུས་ཐ་མལ་པར་གནས་པ་དང༌། ཐོས་པའི་ཉེ་འཁོར་ན་གནས་པ་ཡིན་ཏེ། ཁྲིམས་གྲོགས་དེ་ལས་གཞན་དུ་ན་ཁྲིམས་གྲོགས་ཀྱི་དགོས་པ་རྫོགས་པར་མི་འགྲུབ་པའི་ཕྱིར་དང༌། ཁྲིམས་གྲོགས་ཀྱི་དགོས་པ་མི་འགྲུབ་པའི་ཕྱིར་གོ་རིམ་བཞིན་ནོ། །མཚན་གཉིས་པ་བུད་མེད་ཀྱི་མཚན་ཤས་ཆེ་བའི་རྣམ་པ་དེ་ལྟ་བུ་ཉིད་ལ་ནི་སྐྱེས་པའི་མཚན་ཅིག་ཤོས་དོན་མེད་པ་སྟེ་བུད་མེད་ཀྱི་མཚན་དོན་ཡོད་པ་ཉིད་དོ། །དེའང་སྐྱེས་པའི་མཚན་དེས་བུད་མེད་ཀྱི་མཚན་དོན་ཡོད་པ་ལ་གནོད་པ་ཅུང་ཟད་ཀྱང་མི་བྱེད་པའི་ཕྱིར་རོ། །མཚན་གཉིས་པ་སྐྱེས་པའི་མཚན་ཤས་ཆེ་བ་ལ་ཡང་མཚན་ཅིག་ཤོས་དོན་མེད་དོ། །དེ་ཡང་ཊཱི་ཀ་ལས། མཚན་གཉིས་པ་བུད་མེད་ཀྱི་དབང་དུ་གྱུར་པ་ནི་དེའི་ཚེ་དགེ་སློང་ལ་བུད་མེད་ཀྱི་སྐབས་ཀྱི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །མཚན་གཉིས་པ་སྐྱེས་པའི་དབང་དུ་གྱུར་ན་ནི་དེའི་ཚེ་དགེ་སློང་མ་ལ་སྐྱེས་པའི་སྐབས་ཀྱི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །ཞེས་སོ། །འོ་ན་སྤྱིར་བསྟན་ལས། མ་ནིང་དང་མཚན་གཉིས་པ་དག་ནི་དེ་དང་ལྡན་པ་ཉིད་དོ། །ཞེས་མཚན་གཉིས་པ་ན་སྨད་ཀྱི་ཡུལ་དུ་གསུངས་པ་དང་འགལ་ལོ་ཞེ་ན། ཁ་ཅིག་ན་རེ་སྤྱིར་བཏང་དམིགས་བསལ་གྱི་སྒོ་ནས་འགལ་བ་མེད་དེ། སྤྱིར་བཏང་ལ་མཚན་གཉིས་པ་ན་སྨད་ཀྱི་ཡུལ་ཡིན་ལ། དམིགས་བསལ་རེག་པ་ནི་མཚན་གཉིས་པ་ལས་ཀྱང་དངོས་གཞི་རྫོགས་པའོ་ཞེས་ཟེར་རོ། །དེ་ནི་མི་རིགས་ཏེ། རེག་པ་ཁོ་ནའི་དངོས་གཞི་རྫོགས་པ་ཡིན་ན་ཊཱི་ཀ་ལས། བུད་མེད་ཀྱི་སྐབས་ཀྱི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །ཞེས་སྤྱིར་གསུངས་པ་དང་འགལ་ཞིང༌། ཐུན་མོང་བ་སྟོན་པའི་སྐབས་སུ་རེག་པ་ཁོ་ནའི་དངོས་གཞི་བསྟན་ན་སྐབས་འཆོལ་བར་ཐལ་བར་འགྱུར་རོ། །འོ་ན་གང་ཞེ་ན། མཚན་གཉིས་པ་ན་སྨད་ཀྱི་ཡུལ་དུ་གསུངས་པ་ནི་སྲོག་གཅོད་པ་མ་གཏོགས་པ་གནོད་པ་ལས་གྱུར་པ་བརྡེག་གཟས་ལ་སོགས་པ་རྣམས་དང་མ་བྱིན་ལེན་མ་གཏོགས་པ་ཕྱི་ལོངས་སྤྱོད་ལ་ཆགས་པ་ལས་གྱུར་པ་གོས་སློང་བ་ལ་སོགས་པ་རྣམས་མཚན་གཉིས་པ་ཡུལ་དུ་བྱས་པ་ལས་ལྟུང་བ་མི་རྫོགས་ལ། ནང་སེམས་ཅན་ལ་ཆགས་པ་ལས་གྱུར་པ་རྣམས་ནི་མཚན་གཉིས་པ་ཡུལ་དུ་བྱས་པ་ལས་ཀྱང་ལྟུང་བ་རྫོགས་པ་སྟེ། ནང་སེམས་ཅན་ལ་ཆགས་པ་འབྱུང་ཉེ་ཞིང་སྤང་དཀའ་བས་དོག་ཏུ་བཀག་པའོ། །དམིགས་བསལ་ནི་འཁྲུར་འཇུག་པ་ལ་སོགས་པ་དགེ་སློང་མ་ཡན་ལག་ཏུ་དགོས་པའི་ལྟུང་བ་རྣམས་ནི་མཚན་གཉིས་པ་ཡུལ་དུ་བྱས་པ་ལས་ལྟུང་བ་མི་རྫོགས་ཏེ། དགེ་སློང་མའི་སྡོམ་ལྡན་ཡིན་པ་མི་ཚང་བའི་ཕྱིར་རོ། །འོ་ན་ཡུལ་མཚན་གཉིས་པ་ལས་རེག་པ་ལ་སོགས་པའི་ལྟུང་བ་རྫོགས་ན། ལུང་རྣམ་འབྱེད་ལས། རེག་པ་འཁྲིག་ཚིག་བསྙེན་བཀུར་བསྔགས་པ་གསུམ་གའི་སྐབས་སུ། སྐྱེས་པ་དང་ཟ་མ་དང་མ་ནིང་དང་མཚན་གཉིས་པ་ལ་ཉེས་པ་སྦོམ་པོའོ་ཞེས་གསུངས་པ་དང་འགལ་ལོ་ཞེ་ན། མཚན་གཉིས་པ་སྐྱེས་པའི་མཚན་ཤས་ཆེ་བ་ལ་དགོངས་པ་སྟེ། ཊཱི་ཀས་ཁུངས་སུ་དྲངས་པའི་ལུང་ལས། མཚན་གཉིས་པ་དེ་སྐྱེས་པའི་དབང་དུ་གྱུར་པ་ཡིན་ན་ནི་རེག་པ་དེ་ལྟ་ན་ཉེས་པ་སྦོམ་པོར་འགྱུར་རོ་ཞེས་གསུངས་པས་ཤེས་སོ། །འདིར་ཕྱེད་ཉིད་བྱེད་པ་ཡིན་ཞེས་པ་ནི་ལུང་ཞུ་བ་ལས། དགེ་སློང་གི་གཡོག་མ་ནིང་དང་གཡོག་མཚན་གཉིས་པ་དང་ལྷན་ཅིག་ཏུ་བུད་མེད་ལ་ཆོས་བཤད་ན་ཅིར་འགྱུར། ཉེས་བྱས་སུ་གསུངས་སོ། །འོག་མ་གསུམ་ལ་ཞེས་པ་ནི་བུད་མེད་བྱེད་པ་པོའི་ཐུན་མོང་གི་མདོ་བདུན་གྱིས་བརྗོད་པའི་ལྟུང་བ་བཅུ་པོའི་ནང་ནས་འོག་མ་གསུམ་སྟེ་འཁྲིག་ཚིག་བསྙེན་བཀུར་ཆོས་སྟོན་པ་དང་གསུམ་ལའོ། །ལེགས་སྨྲས་དང་ཉེས་སྨྲས་ནི་ཆོས་དང་མཐུན་པའི་ཚིག་དང་གནས་ངན་ལེན་གྱི་ཚིག་སྨྲས་པ་ལྟ་བུའོ། །གཞན་ལ་ཞེས་པ་ནི་འོག་མ་གསུམ་ལས་གཞན་གོང་མ་བདུན་ལ་སྟེ་རེག་པ་ལ་སོགས་པ་བདུན་ལའོ། །འདིར་ཡན་ལག་འཁྲུལ་མོར་སྦྱར་ཏེ། བདུན་ལ་བསྟེན་རུང་དངོས་སུ་བཤད་པས་འོག་མ་གསུམ་ལ་ཡང་བསྟེན་རུང་ཡན་ལག་ཏུ་སྦྱར་རོ། །གསུམ་ལ་དོན་གོ་དངོས་སུ་བཤད་པས་རེག་པ་མ་གཏོགས་པ་དྲུག་ལ་ཡང་དོན་གོ་བ་ཡན་ལག་ཏུ་སྦྱར་རོ། །རེག་པ་ལ་ནི་དོན་གོ་བ་ཡན་ལག་ཏུ་མི་དགོས་ཏེ། དོན་མི་གོ་བ་སྙོམས་པར་ཞུགས་པ་མོ་དང༌། བུད་མེད་གཉིད་ལོག་པ་ལ་རེག་ན་ཡང་དགེ་འདུན་ལྷག་མར་འགྱུར་བར་ལུང་ཞུ་བ་ཆེ་ཤོས་ལས། དགེ་སློང་གིས་སྙོམས་པར་ཞུགས་པ་མོ་ལ་རེག་ན་ཅིར་འགྱུར། དགེ་འདུན་ལྷག་མར་འགྱུར་རོ་ཞེས་གསུངས་ཤིང༌། ལུང་ཞུ་བ་ཆུང་ཤོས་ལས།དགེ་སློང་གིས་བུད་མེད་གཉིད་ལོག་པ་ལ་རེག་ན་ཅིར་འགྱུར། དགེ་འདུན་ལྷག་མར་འགྱུར་རོ། །ཞེས་གསུངས་སོ། །