གཉིས་པ་རེག་པའི་སྐབས་བྱེ་བྲག་ཏུ་བསྟན་པ།
གཉིས་པ་རེག་པའི་སྐབས་བྱེ་བྲག་ཏུ་བསྟན་པ་ནི།
རྩ་བར། ལུས་ཀྱི་རེག་པ་བདག་གིར་བྱེད་ནའོ། །འདིར་ལན་བུ་ནི་དེ་དང་ལྡན་པ་ཉིད་དོ། །དེ་དང་འབྲེལ་བའི་གོས་ལ་ཡང་ངོ། །ཞེས་བྱུང་ངོ། །འདིའི་དོན་བཤད་པ་ལ་བཞི་ལས། དང་པོ་གླེང་གཞི་ནི། ཡུལ་མཉན་ཡོད་དུ་གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས་ཀུན་ནས་བསླངས་ཏེ། ཉེས་པ་བུད་མེད་ཀྱི་ལུས་ལ་རེག་པ་དང་ནོམ་པ་བདག་གིར་བྱས་པ་ལ་བརྟེན་ནས་རེག་པའི་དགེ་འདུན་གྱི་ལྷག་མ་འདི་བཅས་སོ། ། གཉིས་པ་དགག་བྱ་ནི། འཁྲིག་པའི་འདོད་ཆགས་འཕེལ་བ་སྟེ། ཀུན་ཏུ་འདོད་ཆགས་དང་ལྡན་པ་ཡན་ལག་ཏུ་གསུངས་པས་སོ། །གསུམ་པ་ངོ་བོ་ནི། བཅས་ལྡན་དགེ་སློང་གིས་ཆགས་སེམས་ཀྱིས་བུད་མེད་ལ་རེག་ཅིང་རེག་པ་བདག་གིར་བྱས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་བཤད་པ་ལ་བཞི་ལས། དང་པོ་གཞིའི་ཡན་ལག་ལ་གཉིས་ཏེ། གང་ལ་རེག་པའི་ཡུལ་དང༌། གང་གིས་རེག་པའི་རྟེན་ནོ། །དང་པོ་ལ་བདུན་ཏེ། བུད་མེད་ཀྱི་མཚན་དོན་ཡོད་པ་དང༌། མཚན་བསྟེན་དུ་རུང་བ་དང༌། ཐ་སྙད་ཕྱེད་དང་གཉིས་དང་ལྡན་པ་དང༌། ལུས་ཐ་མལ་པར་གནས་པ་དང༌། ལུས་དངོས་ཡིན་པ་དང༌། མ་ཉམས་པ་ཡིན་པ་དང༌། ཕམ་པ་དངོས་སུ་བསྐྱེད་པའི་རྨའི་སྒོ་གསུམ་ལས་གཞན་ཡིན་པའོ། །དང་པོ་ནི་འདི་ལ་བྱེད་པ་པོ་ཉིད་ནི་བུད་མེད་དོ་ཞེས་པས་གྲུབ་བོ། །གཉིས་པ་ནི་གཞན་ལ་འཁྲིག་པ་བསྟེན་པར་བྱ་བའི་མཐུ་ཡོད་པ་ཉིད་ཡིན་ན་ཞེས་པས་སོ། །གསུམ་པ་ནི་མི་ཡིན་པ་དང་ཤེས་པ་རང་བཞིན་དུ་གནས་པའི་ཕྱེད་དེ། རེག་པ་ནི་ཐ་སྙད་དང་འདྲ་ཞེས་པའོ། །ཕྱེད་དུ་འཇོག་པའི་རྒྱུ་མཚན་ནི། རེག་པའི་ཡུལ་བུད་མེད་དེ་༡སྨྱོ་བ་༢སེམས་འཁྲུགས་༣ཚོར་བས་གཟིར་བ་དང༌། ༤འགྲོ་བ་གཞན་གྱི་རྣམ་པ་བསྟེན་པ་ན་ཤེས་པ་གཏང་ཐུབ་ལས་ཉམས་པ་དང༌། བཞི་པོ་མ་ཡིན་པ་ནི་ཡན་ལག་ཏུ་དགོས་སོ། །བཞི་པ་ནི་སྤྲུལ་པ་མོ་ལ་ཡང་དེ་བཞིན་ནོ། །ཞེས་པས་སོ། །ལྔ་པ་ནི་ཞུ་བ་ལས། སེན་མོ་ལ་རེག་ན་སྦོམ་པོར་འགྱུར་རོ། །སོ་ལ་རེག་ན་སྦོམ་པོར་འགྱུར་རོ། །སྤུ་ལ་རེག་ན་སྦོམ་པོར་འགྱུར། ཞེས་གསུངས་པའི་ཤུགས་ཀྱིས་གྲུབ་བོ། །དྲུག་པ་ནི་རེག་པར་བྱ་བ་ཉིད་ནི་མ་ཉམས་པའོ། །ཞེས་དང༌། ཞུ་བ་ལས། བུད་མེད་ཀྱི་ལུས་ཀྱི་དབང་པོ་ཉམས་པ་ལ་རེག་ན་ཅིར་འགྱུར། སྦོམ་པོར་འགྱུར་རོ། ཞེས་གསུངས་སོ། །བདུན་པ་ནི། སྤྱིར་བསྟན་རྩ་བར། བྱུང་བ་ཐམས་ཅད་ལ་མཐའ་ཉིད་མ་གཏོགས་པ་ནི་དགེ་འདུན་གྱི་ལྷག་མའོ། །ཞེས་གསུངས་པས། རེག་པ་ཐམས་ཅད་ལ་མཐའ་ཉིད་མ་གཏོགས་ཞེས་གནད་ཀྱིས་སྦྱར་ཏེ་རྒྱུ་མཚན་མཚུངས་པའི་ཕྱིར་རོ། །གཉིས་པ་གང་གིས་རེག་པའི་རྟེན་ནི་གསུམ་ལས། ལུས་དངོས་ཡིན་པ་ནི། ཞུ་བ་ལས། སེན་མོས་རེག་ན་སྦོམ་པོར་འགྱུར་རོ། །སོས་རེག་ན་སྦོམ་པོར་འགྱུར་རོ། །སྤུས་རེག་ན་སྦོམ་པོར་འགྱུར་རོ། །ཞེས་གསུངས་པའི་ཤུགས་ཀྱིས་གྲུབ་བོ། །མ་ཉམས་པ་ཡིན་པ་ནི་ཞུ་བ་ལས། དགེ་སློང་གི་ལུས་ཀྱི་དབང་པོ་ཉམས་པས་བུད་མེད་ལ་རེག་ན་ཅིར་འགྱུར། སྦོམ་པོར་འགྱུར་རོ་ཞེས་གསུངས་སོ། །ཕམ་པ་དངོས་སུ་བསྐྱེད་པའི་ཡན་ལག་ལས་གཞན་ཡིན་པའོ། །གཉིས་པ་བསམ་པའི་ཡན་ལག་ལ་གཉིས་ལས། ༡ འདུ་ཤེས་ནི་གཞིའི་ཡན་ལག་དེ་དག་གི་གཞིའི་རྣམ་པ་མ་དོར་བར་འཛིན་པའི་ཡིད་གཉིས་ཀྱང་རུང་ངོ༌། །༢ ཀུན་སློང་ནི་རེག་པའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་ཏུ་འདོད་ཆགས་དང་ལྡན་པས་བུད་མེད་ལ་རེག་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བའི་ཡན་ལག་ནི། གང་ལ་བསམས་པའི་བུད་མེད་དེ་ཉིད་ལ་རེག་པར་ཞུགས་པའོ། །