རིན་ཆེན་འབྱུང་གནས་ལས་ཉི་མ་སྦས་པའི་ལུགས་སྒྲོལ་མ་ཉི་ཤུ་རྩ་གཅིག་གི་སྒྲུབ་ཐབས་བཤད་པའི་སྐབས་ཏེ་བཅུ་བདུན་པ།
འཇམ་དཔལ་གྱི་ཐབས།
རྒྱལ་ཀུན་སྲས་ཀྱི་ཐུ་བོ་ནི། །ཀུན་གྱི་མཆོག་གྱུར་འཇམ་དཔལ་ལ། །གུས་པས་བཏུད་ནས་སྒྲུབ་པའི་ཐབས། །ངོ་མཚར་ཆེན་པོ་འབྲི་བར་བྱ། འགྲུབ་ན་མཎྜལ་མཆོད་པ་སྔོན་དུ་བཏང༌། གང་ལྟར་ཡང་སྨོན་པ་བྱང་སེམས་དང་སྟོང་པ་ཉིད་བསྒོམ། ཤཱུ་ནྱ་ཏཱའི་སྔགས་བརྗོད། རང་གི་སྙིང་གར་པད་ཟླ་ལ་དྷཱིཿཡིག་འོད་ཀྱི་འཕྲོ་འདུ་ལས། རང་ཉིད་
འཕགས་པ་འཇམ་དཔལ་གུར་གུམ་གཞོན་ནུའི་མདོག་ཅན། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་ཅིང༌། ཕྱག་གཡོན་པོ་ཏིས་མཚན་པའི་ཨུཏྤ་ལའི་སྡོང་བུ་འཛིན་པ། རོལ་པའི་སྟབས་ཀྱིས་བཞུགས་ཤིང༌། མི་བསྐྱོད་པས་དབུ་ལ་སྤྲས་པ། ཟུར་ཕུད་ལྔ་པའམ་རལ་པའི་ཐོར་ཚུགས་ཅན། དར་དང་རིན་པོ་ཆེས་བརྒྱན་པ། ཞབས་ཀྱི་དྲུང་དུ་ཁྲོ་བོ་གཤིན་རྗེ་གཤེད་པོ་མཐིང་ནག་ཐོད་པའི་འཕྲེང་བ་ཅན། གཡས་འཇམ་དཔལ་གྱི་ཞབས་ལ་བརྟེན་པའམ་ཕྱག་འཚལ་བ། གཡོན་ཐོ་བ་རྭ་ཉི་ཤུ་པ་འཛིན་ཞིང་ཁྲོ་བོའི་ཆ་བྱད་རྫོགས་པའོ། །ཡེ་ཤེས་སྤྱན་འདྲེན་གནས་གསུམ་བྱིན་རླབས་བྱ། ན་མཿས་མནྟ་བུདྡྷཱ་ནཱཾ། ཨོཾ་ར་ར་སྨ་ར་ཨ་པྲ་ཏི་ཧ་ཏ་ཤཱ་ས་ནཾ། ཀུ་མཱ་ར་རཱུ་པ་དྷ་རི་ཧཱུཾ་ཕཊ་སྭཱཧཱ། ཐུན་མཚམས་སུ་འཇམ་དཔལ་གནས་པ་ཞེས་བྱ་བའི་མདོ་ཀློག་པ་དང༌། འཇམ་དཔལ་གྱི་མཚན་བརྒྱ་རྩ་བརྒྱད་པ་འདོན་པ་སོགས་ཆོས་སྤྱོད་ཅི་ནུས་སུ་བྱའོ། །བློ་ལྡན་ཀུན༵་ནས་དག༵འ་བ་ཡི། །སྒྲུབ་ཐབས་སྙིང༵་པོ༵་འདི་ཙམ་ཡིན། །མི་སྒོམ་ན་ནི་རྒྱས་པས་ཅི། །སྒོམ་ན་བསྡུས་ཀྱང་དོན་མཆོག་འགྲུབ། །ཉེ་བའི་སྲས་བརྒྱད་ལས་འཇམ་དཔལ་གྱི་སྒྲུབ་ཐབས་སོ།། །།
རྒྱལ་སྲས་ཀུན་གྱི་ཐུ་བོ་སྤྱན་རས་གཟིགས་ཀྱི་སྒྲུབ་ཐབས།
དམིགས་མེད་ཐུགས་རྗེ་མཁའ་ལྟར་ཁྱབ། །རྒྱལ་སྲས་ཀུན་གྱི་ཐུ་བོ་ནི། །སྤྱན་རས་གཟིགས་དབང་ལ་བཏུད་དེ། །སྒྲུབ་ཐབས་མདོ་ཙམ་འབྲི་བར་བྱ། །ཐུགས་རྗེ་ཆེན་པོའི་དབང་ཕྱུག་མཚན་ཐོས་པ་དང་བཟུང་བ་ཙམ་གྱིས་མི་ལྡོག་པའི་ས་ཐོབ་པར་འགྱུར་བའི་འཕགས་མཆོག་དེ་ལ་བ་སྤུ་ལྡང་ཞིང་མཆི་མ་
འཁྲུག་པའི་མོས་གུས་ཀྱི་སྒོ་ནས། ཕྱག་དང་མཆོད་པ་དང་བསྟོད་པ་དང་བསྐོར་བ་བྱས་ལ། བྱང་ཆུབ་ཀྱི་སེམས་སྒོམས། ཤཱུ་ནྱ་ཏཱའི་སྔགས་དོན་བསམ། རང་གི་སྙིང་གར་ཧྲཱིཿཡིག་འོད་ཀྱི་འཕྲོ་འདུ་ལས། འཇིག་རྟེན་མགོན་པོ་སྟོན་ཀའི་ཟླ་བ་ལྟར་དཀར་བའི་སྐུ་ལུས་རལ་པའི་ཐོར་ཚུགས་ཀྱི་ངོས་ལ་བཅོམ་ལྡན་འདས་འོད་དཔག་ཏུ་མེད་པ་བཞུགས་པ། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱའམ། གཡས་མཆོག་སྦྱིན་དང་གཡོན་གདན་ལ་བརྟེན་པས་པདྨ་དཀར་པོའི་སྡོང་བུ་འཛིན་པ། རི་དྭགས་ཀྱི་པགས་པ་ཕྲག་པ་གཡོན་པ་ལ་གནས་པ། དར་དང་རིན་པོ་ཆེའི་རྒྱན་ཅན། གཡས་བརྐྱང་བའི་རོལ་པའི་སྟབས་ཀྱིས་བཞུགས་པ། དེའི་དྲུང་དུ་ཁྲོ་རྒྱལ་རྟ་མགྲིན་དམར་པོ་བསྐལ་པའི་མེ་ལྟར་གཟི་བརྗིད་འབར་བ། དབུའི་སྟེང་ན་རྟ་མགོ་ལྗང་ཁུ་རྟ་སྐད་འཚེར་བ། ཕྱག་གཡས་ཕྱག་འཚལ་བ་དང་གཡོན་པས་བེ་ཅོན་དཀར་པོ་འཛིན་པའོ། །ཡེ་ཤེས་པ་སྤྱན་དྲངས། མཆོད་པས་མཆོད། རང་ལ་གཞུགཨོཾ་ཨཱཿཧཱུཾ་གིས་གནས་གསུམ་བྱིན་གྱིས་བརླབས། ན་མོ་ཨཱཪྱ་ཨ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མཧཱ་སཏྭཱ་ཡ། མཧཱ་ཀཱ་རུ་ནི་ཀཱ་ཡ། ཀཱ་རུ་ཎེ་ཀཱ་རུ་ནེ། མཧཱ་ཀཱ་རུ་ཎ། པྲ་ཏིཥྛེ་ཏི་ཀཱ་རུ་ཎཱ་ཡ་སྭཱཧཱ། ཞེས་ཅི་ནུས་སུ་བཟླས། ལྷ་སྐུ་འོད་གསལ་ཏུ་བསྡུས་ཏེ་དགེ་བ་བསྔོ། ཐུན་མཚམས་སུ་སྤྱན་རས་གཟིགས་ཀྱིས་ཞུས་པ་ཞེས་བྱ་བའི་མདོ་དང༌། ཟ་མ་ཏོག་བཀོད་པ་དང༌། འཕགས་མཆོག་འདི་ཉིད་ཀྱིས་མཚན་བརྒྱ་སོགས་
འདོན་ནོ། །ཀུན༵་ལས་དག༵འ་བའི་སྒྲུབ་ཐབས་འདི། །སྙིང༵་ནས་ཉམས་ལེན་བྱས་གྱུར་ན། །འཇིག་རྟེན་དབང་པོ་ཉིད་མཚུངས་པའི། །གོ་འཕང་ཐོབ་འགྱུར་ཨ་ལ་ལ། །འཕགས་པ་སྤྱན་རས་གཟིགས་ཀྱི་སྒྲུབ་ཐབས་སོ།། །།
མཐུ་སྟོབས་དབང་ཕྱུག་གི་སྒྲུབ་ཐབས།
ན་མོ་གུ་རུ། སངས་རྒྱས་ཀུན་གྱི་གསང་གསུམ་ལ། །རང་བྱན་ཆུད་པ་མཐུ་སྟོབས་དབང༌། །རྡོ་རྗེ་འཆང་བ་ལ་འདུད་དོ། །བདག་ཀྱང་ཁྱེད་དང་མཚུངས་པར་ཤོག །སྔགས་དང་རྒྱུད་ལ་མངོན་པར་དགའ་བ་རྣམས་འཕགས་པ་ཕྱག་ན་རྡོ་རྗེ་ལ་བློ་བརྟད་འཆའ་དགོས་ཏེ། སྔགས་རྒྱུད་ཐམས་ཅད་ཀྱི་
བདག་པོ་ཡིན་པའི་ཕྱིར་རོ། །སྐྱབས་སེམས་ཚད་མེད་སྟོང་ཉིད་སྒོམ་པ 
་སྔོན་དུ་འགྲོ་བས། སྭ་བྷཱ་ཝས་སྔགས་བརྗོད། ཧཱུཾ་ལས་བྱུང་བའི་སྲུང་འཁོར་གྱི་དབུས་སུ་ཉི་མ་ལ་ཧཱུཾ། དེ་ལས་འོད་འཕྲོས་དོན་གཉིས་བྱས་འདུས་པ་ལས་འཕགས་མཆོག་ཕྱག་ན་རྡོ་རྗེ་ཞི་བ་ལྗང་ཁུ། རིན་པོ་ཆེའི་དཔྲོག་ཞུ་ཅན། མི་བསྐྱོད་པ་གཙོ་བོར་གྱུར་པའི་རིགས་ལྔས་དབུ་ལ་བརྒྱན་པ། ཕྱག་གཡས་ཐུགས་ཀར་འབར་བའི་རྡོ་རྗེ་གསོར་བའི་ཚུལ་དང༌། གཡོན་གདན་ལ་བརྟེན་པ། ན་བཟའ་མཆོག་དང་རྒྱན་ཐམས་ཅད་ཀྱིས་བརྒྱན་པ། རབ་ཏུ་བཞད་ཅིང་རོལ་བའི་སྟབས་ཀྱིས་བཞུགས་པ། ཟླ་བའི་འོད་ཀྱི་རྒྱབ་ཡོལ་ཅན་ནོ། །ཡང་ན་སྐུ་མདོག་སྔོན་པོར་བྱས་ཀྱང་རུང༌། དེའི་དྲུང་དུ་བདུད་རྩི་འཁྱིལ་བ་ཁྲོ་བོའི་ཆ་བྱད་རྫོགས་ཤིང༌། ལྗང་ཁུའམ་སྔོ་སངས་དགྲ་སྟ་འཛིན་པའོ།
དེ་ནས་ཡེ་ཤེས་དགུག་གཞུག་དང༌། སྒོ་གསུམ་བྱིན་རླབས་བྱ། ན་མོ་བཛྲ་པཱ་ཎ་ཡེ། མཧཱ་བཛྲ། པྲ་ཏིཥྛི་ཏཱ་ཡ། སརྦ་ཏ་ཐཱ་ག་ཏ་ཤ་རཱི་རཱནྟ་རྒ་ཏཱ་ཡ། བཛྲ་ཤཱ་རཱི་རཾ། མེ་ཀུ་རུ་བཛྲ་ཨ་དྷིཥྛ་ན་སྭཱཧཱ། སྙིང་པོའོ། །དེ་བཞིན་གཤེགས་པའི་སྐུ་གསུང་ཐུགས་ཀྱི་གསང་བའི་མདོ་དང༌། གསང་བདག་ཉིད་ཀྱི་མཚན་བརྒྱ་རྩ་བརྒྱད་པ་ཀློགམཆོད་པ་དང་གཏོར་མ་ལ་ཡང་བརྩོན་པར་བྱའོ། །བདེ་གཤེགས་ཀུན༵་གྱི་འཕྲིན་ལས་ནི། །རབ་དག༵ས་སྒྲུབ་མཛད་སེམས་དཔའ་ཆེ། །དེ་ཡི་མངོན་རྟོགས་སྙིང༵་པོ༵་ཙམ། །ཨུ་དུམ་བ་རའི་མེ་ཏོག་འདྲ། །ཉེ་བའི་སྲས་བརྒྱད་ལས་ཕྱག་ན་རྡོ་རྗེའི་སྒྲུབ་ཐབས་སོ། །ཞུས་དག །མངྒ་ལཾ།། །།
སྒྲོལ་མ་ཉེར་གཅིག་གི་སྒྲུབ་ཐབས་ཉི་མ་སྦས་པའི་ལུགས་དང་རྗེས་སུ་འབྲེལ་བ་འདུས་གསལ་གོ་བདེ།
སྒྲོལ་མ་ཉེར་གཅིག་གི་སྒྲུབ་ཐབས་ཉི་མ་སྦས་པའི་ལུགས་དང་རྗེས་སུ་འབྲེལ་བ་འདུས་གསལ་གོ་བདེ་བ་བཞུགས། ༈ ན་མོ་གུ་རུ་ཨཱཪྱ་ཏཱ་རཱ་ཡཻ། མཐའ་དག་རྒྱལ་བ་བསྐྱེད་པའི་ཡུམ། །ལྷ་མོ་དེ་ལ་གུས་བཏུད་ནས། །སྒྲུབ་པའི་ཐབས་ཀྱི་རིམ་པ་རྣམས། །མ་འདྲེས་མཆོག་ཏུ་གསལ་བར་བཤད། །འདིར་ཕྱག་འཚལ་ཉི་ཤུ་རྩ་གཅིག་གི་སྒྲུབ་ཐབས་ཉམས་སུ་ལེན་པ་ལ། ཐོག་མར་སྤྱི་སྒྲུབ་ཉམས་སུ་བླང་དགོས་པས། དེའི་ཚུལ་ནི། སྤྲོ་ན་སྐྱབས་འགྲོ་སེམས་བསྐྱེད་སྔོན་དུ་བཏང༌། རང་གི་སྙིང་གར་ཟླ་བ་ལ་གནས་པའི་ཏཱཾ་ཡིག་ལས་འོད་ཟེར་འཕྲོས། བླ་མ་རིགས་ཀྱི་བདག་པོའི་རྣམ་པ་ཅན་གྱིས་དབུ་བརྒྱན་པའི་འཕགས་མ་སྒྲོལ་མ་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ། བཛྲ་ས་མཱ་ཡ
་ཛཿ ཨོཾ་ཨཱརྻཱ་ཏཱ་ར་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་ནས། ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སོགས་ཡན་ལག་བདུན་པ་བྱ། བཛྲ་མུཿ གཤེགས་སུ་གསོལ། ཚད་མེད་བཞི་སྤྱི་དང་མཐུན་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས་པདྨ་དང་ཟླ་བའི་གདན་ལ། ཏཱཾ་ཡིག་ལྗང་ཁུ་ཡོངས་སུ་གྱུར་པ་ལས་རྗེ་བཙུན་མ་འཕགས་མ་སྒྲོལ་མ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་མ། གཡས་སྐྱབས་སྦྱིན་དང་གཡོན་མཐེབ་སྲིན་གྱིས་ཨུཏྤ་ལའི་སྡོང་བུ་ཐུགས་ཀར་འཛིན་པ། ཞབས་གཡས་བརྐྱང་པའི་སྐྱིལ་ཀྲུང་ཕྱེད་པའི་རོལ་པས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཟླ་བའི་འོད་ཀྱི་རྒྱབ་ཡོལ་ཅན། མིག་གཉིས་ལ་ཨོཾ་ཏཱ་རེ་སྭཱཧཱ། རྣ་བ་གཉིས་ལ་ཨོཾ་ཏུཏྟཱ་རེ་སྭཱཧཱ། མགྲིན་པ་ཨོཾ་ཏུ་སྭཱཧཱ། སྙིང་གར་ཨོཾ་རེ་སྭཱཧཱ། སྤྱི་བོར་ཨོཾ་ཏཱ་རེ་ཎི་སྭཱཧཱ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀ་ནས་འོད་ཟེར་འཕྲོས། སངས་རྒྱས་ཐམས་ཅད་འཕགས་མ་སྒྲོལ་མའི་རྣམ་པར་སྤྱན་དྲངས། ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དབང་གི་ལྷ་རིགས་ལྔ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ པུཥྤེ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་
གསོལ་བ་བཏབ་པས། ཇི་ལྟར་བལྟམས་པ་སོགས་ཀྱིས་དབང་བསྐུར། སྐུ་གང་དྲི་མ་དགཆུ་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུ་བརྒྱན། ཐུགས་ཀར་ཟླ་བའི་སྟེང་དུ་ཏཱཾ་གི་མཐར་སྔགས་ཀྱིས་བསྐོར་བར་བསམ་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་ཅི་ནུས་སུ་བཟླའོ། །གཏོར་ཆོག་ནི་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཧཱུཾ་ཞུ་བ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ རང་གི་སྙིང་ག་ནས་འོད་ཟེར་འཕྲོས། འཕགས་མ་སྒྲོལ་མའི་ལྷ་ཚོགས་ཐམས་ཅད་བཛྲ་ས་མཱ་ཛཿ པདྨ་ཀ་མ་ལ་ཡེ་སྟྭཾ། ཡི་གེ་བཅུ་པའི་མཐར་ཨ་ཀཱ་རོ་བཏགས་པ་ལན་བདུན་གྱིས་འབུལ། ཨརྒྷཾ་ནས་ཤཔྟའི་བར་གྱིས་མཆོད། ཕྱི་མཆོད། འབྲུ་གསུམ་གྱིས་ནང་མཆོད། ལྷ་དང་ལྷ་མིན་ཅོད་པན་གྱིས་སོགས་བསྟོད། མཆོད་སྦྱིན་གཏོར་མ་འདི་བཞེས་ལ་སོགས་འདོད་དོན་གསོལ་བ་བཏབ། ཡི་གེ་བརྒྱ་པའི་མཐར། མ་འབྱོར་པ་དང་སོགས་བཟོད་གསོལ་དང༌། བཛྲ་མུཿ གཤེགས་སུ་གསོལ། ཚུལ་འདིས་བསྙེན་པ་ལེགས་པར་སོང་ནས། ལས་ཚོགས་ཀྱི་ལྷ་ཉི་ཤུ་རྩ་གཅིག་པོ་རྣམས་འོག་ནས་འབྱུང་བ་ལྟར། སོ་སོའི་སྒྲུབ་ཐབས་བསྒོམ་བཞིན་པས། རབ་ཏུ་བཟླས་པ་ཁྲི་ཕྲག་བཞི་བཞིའམ། འབྲིང་དུ་ཁྲི་ཕྲག་རེ་རེ། ཐ་མ་ཡང་སྟོང་ཕྲག་བཞི་བཞི་བྱས་
པས། གཞུང་ལས་ཇི་སྐད་བཤད་པའི་ལས་ཚོགས་མཐའ་དག་སྒྲུབ་པ་ལ་དབང་བ་ཡིན་ཞིང༌། སྒྲོལ་མ་བླ་མེད་ལྷ་བཅུ་བདུན་གྱི་དཀྱིལ་འཁོར་དུ་དབང་བསྐུར་བའི་རྒྱུན་ཐོབ་ན། བསྙེན་པ་འདི་ཁོ་ནས་དེའི་དབང་བསྐུར་དུ་རུང་སྟེ། དེའི་དབང་བསྐུར་བའི་ཆོ་ག་ཡང་ཕྱག་འཚལ་ཉེར་གཅིག་གི་སྒྲུབ་ཐབས་འདི་ཉིད་ཀྱི་ལས་ཚོགས་སུ་སྣང་བས་སོ། ཁྱད་པར་སྤྱི་སྒྲུབ་འདི་དང་ལས་ཚོགས་ཀྱི་ལྷ་ཉི་ཤུ་རྩ་གཅིག་པོ་རྣམས་ཀྱི་རྗེས་གནང་གི་བཀའ་ངེས་པར་བསྒྲུབ་པར་བྱ་བ་ཡིན་ལ། སྒྲོལ་མ་ལུས་དཀྱིལ་དུ་གྲགས་པ་ཡང་འདི་ཉིད་ཀྱི་བྱིན་རླབས་ཁོ་ནར་འགྱུར་ཞིང༌། སྔོན་དུས་སྒྲོལ་མ་ཉེར་གཅིག་དཀྱིལ་འཁོར་གཅིག་ཏུ་བསྡུས་པའི་དབང་བཀའ་ཞིག་ཀྱང་བྱུང་བར་མངོན་ལ། བར་སྐབས་སུ་དེ་ལ་བརྟེན་ཏེ་གཙོ་བོ་གོ་འཕོ་རང་བཟོར་སྦྱར་ནས་དཀྱིལ་འཁོར་ཉི་ཤུ་རྩ་གཅིག་གི་དབང་བསྐུར་བྱེད་པ་བྱུང་སྣང་བ་ནི། གྲངས་མང་བ་ལ་དགའ་བ་ཙམ་སྟེ། ཚེགས་ཆེན་ལ་དོན་མེད་པའོ། །ཉི་མ་སྦས་པའི་ལུགས་སྒྲོལ་མ་ཉེར་གཅིག་གི་ཆོས་སྐོར་འདི་རྣམས་བླ་མེད་དུ་བཀྲལ་བ་ཤིན་ཏུ་ཟབ་ཅིང་བྱིན་རླབས་ཆེ་བ་ཡིན། སྔོན་དུས་བོད་དུ་འདི་དར་རྒྱས་ཆེ་ཞིང༌། ས་སྐྱ་བའི་རྗེས་བཙུན་དཀར་པོ་རྣམ་གསུམ་གྱི་རིང་ལ་ཆོས་སྐོར་འདིའི་ཕྱག་ལེན་ཤིན་ཏུ་དར། ལས་ཚོགས་རྣམས་མན་ངག་ཁྱད་པར་ཅན་དུ་ཐུགས་ཡིད་ཆེས་ཀྱང༌། གཞུང་གི་རྩོམ་རྒྱ་གར་མ་ཡིན་མིན་ཅུང་ཟད་དཔྱད་གཞི་ཡོད་པའི་སྐབས། རྗེ་བཙུན་ཆེན་པོའི་ཆོས་གྲྭར་ཁ་ཆེའི་དགེ་ཚུལ་ཞིག་བྱུང་བའི་ལག་ནས་འདིའི་རྒྱ་དཔེ་བྱུང༌། ཕྱིས་ཡུལ་ཐ་དད་ཀྱི་རྒྱ་དཔེ་
གཉིས་གསུམ་འཛོམས་པས། རྒྱ་གཞུ་རྩོད་མེད་དུ་གྱུར་ཏེ། སྐྱེས་མཆོག་དམ་པ་རྣམས་ཤིན་ཏུ་ཐུགས་ཡིད་ཆེས་པར་མཛད་དོ། །ད་ནི་སོ་སོའི་སྒྲུབ་ཐབས་བསྟེན་པར་བྱ་སྟེ། དེ་ཡང་འདི་རྣམས་ལ་སྐྱབས་སེམས་ཚད་མེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པ་ཉིད་དུ་སྦྱོང་བ་ནས་བརྩམས་ཏེ། བཟླས་པའི་བར་དུ་སྒྲུབ་ཐབས་སྤྱིའི་བྱ་བ་གོང་དང་མཚུངས་པ་ལས། མིག་བྱིན་རླབས་སོགས་མི་དགོས། ས་བོན་དང་སྐུའི་རྣམ་པ་དང་རིགས་བདག་རྣམས་རིམ་པས་འགྱུར་བའི་ཁྱད་པར་ཙམ་ཡིན་པར་ཤེས་པར་བྱས་ཏེ། ལྷག་མ་རྣམས་མཐུན་པར་ཉམས་སུ་བླང་ངོ༌། །དེ་ལ་དང་པོ་རབ་ཏུ་དཔའ་བའི་སྒྲོལ་མ་ནི། ཆོས་འབྱུང་གི་དབུས་སུ་པདྨ་སེར་པོ་དང་ཟླ་བའི་གདན་ལ་ཨོཾ་ལས་སྒྲོལ་མ་རབ་ཏུ་དཔའ་མོ་སྐུ་མདོག་དམར་མོ་མེ་དཔུང་འཕྲོ་བ། ཞལ་གཅིག་ཕྱག་བརྒྱད་ཀྱི་དང་པོ་གཉིས་སྤྱི་བོར་བསྣོལ་བའི་རྡོ་རྗེ་དང་དྲིལ་བུ་འཛིན་པ། གཉིས་པ་གཉིས་མདའ་དང་གཞུ། གསུམ་པ་གཉིས་འཁོར་ལོ་དང་དུང༌། བཞི་པ་གཉིས་རལ་གྲི་དང་ཞགས་པ་བསྣམས་པ། ཞི་བའི་སྐུ་ཅན་རིགས་བདག་རྣམ་སྣང་ངོ༌། །གཉིས་པ་དཀར་མོ་ཟླ་མདངས་ཀྱི་སྒྲོལ་མ་ནི། པད་ཟླ་ལ་ཏཱ་ཡིག་ལས་སྒྲོལ་མ་དཀར་མོ་དཀར་སྔོ་སེར་བའི་ཞལ་གསུམ་ཕྱག་བཅུ་གཉིས་ཀྱི་དང་པོ་གཉིས་མཉམ་བཞག གཡས་ལྷག་མས་ཁ་ཊྭཱཾ་ག འཁོར་ལོ་ནོར་བུ་རྡོ་རྗེ་མེ་ཏོག་གི་འཕྲེང་བ་འཛིན་པ། གཡོན་
རྣམས་ཀྱིས་སྤྱི་བླུགས་ཨུཏྤལ་དྲིལ་བུ། བུམ་པ་པོ་ཏི་འཛིན་པ། རིགས་ བདག་ནི་འོད་དཔག་མེད་དོ། །གསུམ་པ ་གསེར་མདོག་ཅན་གྱི་སྒྲོལ་མ་ནི། པདྨ་ཉི་གདན་ལ་རེ་ཡིག་ལ་སྒྲོལ་མ་སེར་མོ་ཞལ་གཅིག་ཕྱག་བཅུ་མ་གཡས་རྣམས་ཀྱིས་འཕྲེང་བ། རལ་གྲི། མདའ། རྡོ་རྗེ། དབྱུག་གུ། གཡོན་རྣམས་ཀྱིས་དར་དཔྱངས། ཞགས་པ། པདྨ། དྲིལ་བུ། གཞུ་བསྣམས་པའོ། །རིགས་བདག་ནི་རིན་འབྱུང་ངོ༌། །བཞི་པ་གཙུག་ཏོར་རྣམ་པར་རྒྱལ་མའི་སྒྲོལ་མ་ནི། པདྨ་སེར་པོ་དང་ཟླ་བ་ལ་ཏུ་ཏ་ཡིག་ལས་སྒྲོལ་མ་སེར་མོ་གཅིག་ཕྱག་བཞི། གཡས་མཆོག་སྦྱིན་དང་འཕྲེང་བ། གཡོན་སྤྱི་བླུགས་དང་དབྱུག་པ་འཛིན་པ། སེམས་དཔའི་སྐྱིལ་ཀྲུང་ཅན་ནོ། །རིགས་བདག་ནི་དོན་གྲུབ་བོ། །ལྔ་པ་ཧཱུཾ་སྒྲ་སྒྲོག་པའི་སྒྲོལ་མ་ནི། ཟླ་བ་ལ་ཏཱ་ཡིག་ལས་སྒྲོལ་མ་སེར་མོ་ཞལ་གཅིག་ཕྱག་གཉིས། གཡས་སྐྱབས་སྦྱིན། གཡོན་པདྨ་སེར་པོ་བསྣམས་པ། རིགས་ བདག་ནི་འོད་དཔག་མེད་དོ། །དྲུག་པ ་འཇིག་རྟེན་གསུམ་ལས་རྣམ་པར་རྒྱལ་བའི་སྒྲོལ་མ་ནི། པདྨ་དམར་པོ་དང་ཉི་མའི་གདན་ལ་རེ་ཡིག་ལས་སྒྲོལ་མ་དམར་མོ་ཞལ་གཅིག་ཕྱག་བཞི་མ། གཡས་དང་པོ་རྡོ་རྗེ། གཉིས་པས་རལ་གྲི། གཡོན་དང་པོ་སྡིགས་མཛུབ། གཉིས་པས་ཞགས་པ་བསྣམས་པ། སེམས་
དཔའི་སྐྱིལ་ཀྲུང་གིས་བཞུགས་པའོ། །རིགས་ བདག་ནི་འོད་དཔག་མེད་དོ། །བདུན་པ ་རྒོལ་བ་འཇོམས་པའི་སྒྲོལ་མ་ནི། པདྨ་སེར་པོ་དང་ཉི་མ་ལ་ཏུ་ཡིག་ལས་སྒྲོལ་མ་སྐུ་མདོག་ནག་མོ་ན་བཟའ་སེར་པོ་བསྣམས་པ། དྲག་མོ་དབུ་སྐྲ་གྱེན་དུ་བརྫེས་པ། ཞལ་གཅིག་ཕྱག་བཞི། གཡས་ཀྱི་ཐོག་མ་འཁོར་ལོ་ཕྱི་མ་རལ་གྲི། གཡོན་གྱི་ཐོག་མ་པདྨ་ལ་གནས་པའི་རྡོ་རྗེ་ཕྱི་མའི་སྡིགས་མཛུབ་མཛད་པ། ཞབས་གཡོན་བརྐྱང་གི་སྟབས་ཅན་ནོ། །རིགས་བདག་ནི་རིན་འབྱུང་ངོ༌། །བརྒྱད་པ་དབང་མཆོག་སྟེར་བའི་སྒྲོལ་མ་ནི། པདྨ་དམར་པོ་དང་ཟླ་བ་དང་ཆུ་སྲིན་རྣམས་བརྩེགས་པའི་གདན་ལ། དེ་ལས་སྒྲོལ་མ་སེར་མོ་ཞལ་གཅིག་ཕྱག་བཞི་མ། ཕྱག་དང་པོ་གཉིས་མྱ་ངན་མེད་པའི་ཤིང་གི་ཡལ་ག་དང་པདྨ། འོག་མ་གཉིས་ནོར་བུ་དང་བཅས་པའི་མཆོག་སྦྱིན་དང་བུམ་པ་བསྣམས་པ། ཞབས་སྐྱིལ་ཀྲུང་ཕྱེད་པའི་རོལ་སྟབས་ཀྱིས་བཞུགས་པའོ། །རིགས་བདག་ནི་དོན་གྲུབ་བོ། །དགུ་པ་ནི། བསྟོད་པ་རྣམ་དག་གཙུག་གི་ནོར་བུ་ལས། སེང་ལྡེང་ནགས་ཀྱི་སྒྲོལ་མ་མཛད་དེ། དེ་ཡི་ལྟར་ན་གོང་གི་སྒྲོལ་མ་སྤྱི་སྒྲུབ་ལྟར་ལས། ཕྱག་གཡས་མཆོག་སྦྱིན་མཛད་པ་ཙམ་ཡིན་ལ། སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས་ལོགས་སུ་ཡོད་པ་ལྟར་ན། གཙོ་མོ་དེ་ཉིད་དང་འདྲ་བ་ལས། གཡས་སུ་མཾ་ལས་
འོད་ཟེར་ཅན་མ་སེར་མོ་རྡོ་རྗེ་དང་མྱ་ངན་མེད་པའི་ཤིང་གི་ཡལ་ག་འཛིན་པ། ཞི་བའི་ཆ་ལུགས་ཅན། གཡོན་དུ་ཧཱུཾ་ལས་རལ་གཅིག་མ་ནག་མོ་གྲི་གུག་དང་ཐོད་ཁྲག་འཛིན་པ། སྤྱན་གསུམ་སྟག་ལྤགས་དང༌། གླང་ལྤགས་ཀྱི་ན་བཟའ་ཅན། དྲག་མོའི་ཆ་ལུགས་རྫོགས་པ་གཉིས་ཀའང་རོལ་པའི་སྟབས་ཀྱིས་བཞུགས་པའོ། །འདིའི་རྗེས་གནང་གི་རྒྱུན་ནི་ལོགས་སུ་ཡོད་པ་ལྟར་འཕྲོས་དོན་དུ་བཀོད་པ་ཡིན་གྱི། དཀྱུས་ནི་སྒྲོལ་མ་ཉེར་གཅིག་གི་སྒྲུབ་ཐབས་ལྟར་ཡིན་པས། མཆོད་སྩོལ་བའི་སྒྲོལ་མ་ནི། པདྨ་དམར་པོ་དང་ཟླ་བ་ལ་སྭཱ་ཡིག་ལས་སྒྲོལ་མ་དམར་མོ་ཕྱག་བཞི་དང་པོ་གཉིས། རྡོ་རྗེ་དང་དྲིལ་བུ་འཛིན་པས་དགའ་བའི་ཕྱག་རྒྱ་སྤྱི་བོར་འཆིང་བ། གཡས་པ་གར་གྱི་ཚུལ་གྱིས་སེ་གོལ་གཏོགས་པ་དང༌། གཡོན་གཉིས་པས་ཨ་ཤྭ་ཀའི་ཡལ་ག་འཛིན་པས་འགྲོ་བ་རྣམས་ལ་རིན་པོ་ཆེའི་ཆར་འབེབས་པའོ། །དབུ་རྒྱན་ནི་དོན་གྲུབ་བོ། །བཅུ་པ་མྱ་ངན་སེལ་བའི་སྒྲོལ་མ་ནི། པདྨ་དམར་པོ་དང་ཟླ་བ་ལ་ས་ཡིག་ལས་སྒྲོལ་མ་དམར་མོ། ཕྱག་བཞིའི་དང་པོ་གཉིས་སྤྱི་བོར་ཐལ་མོ་སྦྱར་བ། འོག་མ་གཉིས་ཀྱིས་རལ་གྲི་དང་མྱ་ངན་མེད་པའི་ཡལ་ག་མེ་ཏོག་དམར་པོ་ཅན་འཛིན་པའོ། །རིགས་བདག་ནི་དོན་གྲུབ་བོ། །བཅུ་གཅིག་པ་འགྲོ་བ་འགུགས་པའམ། འཕོངས་པ་སེལ་བའི་སྒྲོལ་
མ་ནི། པདྨ་དང་ཉི་མའི་གདན་ལ་ཧཱ་ཡིག་ལས་སྒྲོལ་མ་ནག་མོ་དྲག་མོའི་སྐུ་ཅན། གཡས་གཟའ་བརྒྱད་འགུགས་པའི་ལྕགས་ཀྱུ་དང༌། གཡོན་འཕོངས་པ་སེལ་བའི་ལྕགས་ཀྱུ་ཞགས་པ་དང་བཅས་པ་བསྣམས་པ། གཡས་བརྐྱང་གི་སྟབས་ཀྱིས་བཞུགས་པའོ། །རིགས་བདག་ནི་རིན་འབྱུང་ངོ༌། །བཅུ་གཉིས་པ་བཀྲ་ཤིས་སྣང་བའི་སྒྲོལ་མ་ནི། སྣ་ཚོགས་པདྨ་དང་ཟླ་བའི་སྟེང་དུ་ཨ་ཡིག་ལས་སྒྲོལ་མ་སེར་མོ་ཞལ་གཅིག་ཕྱག་བརྒྱད་ཀྱི་གཡས་རྣམས་རྩེ་གསུམ། ལྕགས་ཀྱུ་རྡོ་རྗེ་རལ་གྲི། གཡོན་རྣམས་ཐུགས་ཀར་གཏོད་པའི་རིན་པོ་ཆེ་ལྕགས་ཀྱུ། དབྱུག་གུ་བུམ་པའོ། །རིགས་བདག་ནི་རྣམ་སྣང་ངོ༌། །བཅུ་གསུམ་པ་ཡོངས་སུ་སྨིན་པར་མཛད་པའི་སྒྲོལ་མ་ནི། པདྨ་དམར་པོ་དང་ཉི་མ་ལ་བྷྲཱུཾ་ཡིག་ལས་སྒྲོལ་མ་དམར་མོ་དྲག་མོའི་སྐུ་ཅན། ཕྱག་གཡས་ཀྱི་དང་པོས་རལ་གྲི། གཉིས་པས་མདའ། གཡོན་གྱི་དང་པོས་འཁོར་ལོ། གཉིས་པས་གཞུ་འཛིན་པ། གཡས་བརྐྱང་གི་སྟབས་ཀྱིས་བཞུགས་པའོ། །རིགས་ བདག་ནི་འོད་དཔག་མེད་དོ། །བཅུ་བཞི་པ ་ཁྲོ་གཉེར་གཡོ་བའི་སྒྲོལ་མ་ནི། པདྨ་དམར་སེར་ཉི་མ་ལ་མི་རོའི་གདན་གྱི་སྟེང་དུ། ཨ་ཏ་ཡིག་ལས་སྒྲོལ་མ་མཐིང་ག་ནག་དཀར་དམར་བའི་ཞལ་གསུམ་ཁྲོ་གཉེར་བསྡུས་ཤིང༌། མིའི་རྒྱུ་མ་ཞལ་དུ་གསོལ་བ། ཕྱག་
དྲུག་གི་གཡས་པ་རྣམས་ཀྱིས་རལ་གྲི། ལྕགས་ཀྱུ། དབྱུག་པ། གཡོན་པ་རྣམས་ཀྱིས་ཐོད་པ་ཞགས་པ་ཚངས་མགོ་འཛིན་པ། མི་མགོའི་དབུ་རྒྱན་དང་དོ་ཤལ་ཅན། སྟག་ལྤགས་དང་སྦྲུལ་གྱིས་བརྒྱན་པ་ཕྱི་རོལ་ཕྱོགས་མཚམས་བརྒྱད་དུ་རིན་པོ་ཆེའི་ཤིང་གི་མྱུ་གུ་སྐྱེས་པའོ། །རིགས་བདག་ནི་དོན་གྲུབ་བོ། །བཅོ་ལྔ་པ་ཞི་བ་ཆེན་མོའམ་དགེ་ལེགས་སྟེར་བའི་སྒྲོལ་མ་ནི། པདྨ་དཀར་པོ་ལ་ཎི་ཡིག་ལས། སྒྲོལ་མ་དཀར་མོ་ཕྱག་གཡས་གསུམ་ན། འཕྲེང་བ་མཆོག་སྦྱིན་དབྱུག་པ། གཡོན་གསུམ་ན་པདྨ་རིལ་པ་པོ་ཏི་འཛིན་པའོ། །བསྟོད་པ་ལས་ནི་ཨུཏྤལ་ལ་གནས་པའི་པོ་ཏི་ཡིན་པར་བཤད་དོ། །རིགས་ བདག་ནི་འོད་དཔག་མེད་དོ། །བཅུ་དྲུག་པ ་ཆགས་པ་འཇོམས་པའི་སྒྲོལ་མ་ནི། པདྨ་དམར་སེར་དང་ཉི་མ་ལ་ཨེ་ལས་སྒྲོལ་མ་དམར་མོ། ཕྱག་གཡས་ཐུགས་ཀར་རྩེ་གསུམ་དང༌། གཡོན་སྡིགས་མཛུབ་འཕྱར་བས་སྙིང་པོ་དང་འབྲས་བུར་བཅས་པའི་ཤིང་འཛིན་པ། སེམས་དཔའི་སྐྱིལ་ཀྲུང་གིས་བཞུགས་པའོ། །རིགས་བདག་ནི་མི་བསྐྱོད་པའོ། །འདི་ལ་རིག་པ་ཧཱུཾ་ལས་སྒྲོལ་མ་ཉིད་མ་ཞེས་གསུངས་པའི་ཕྱིར། ཧཱུཾ་ལས་བསྐྱེད་ན་ལེགས་པར་མངོན་ནོ། །བཅུ་བདུན་པ་བདེ་བ་སྒྲུབ་པའི་སྒྲོལ་མ་ནི། པདྨ་དཀར་པོ་དང་ཉི་མ་ལ་ཤ་ཡིག་ལས་སྒྲོལ་མ་དམར་སེར་ཕྱག་གཉིས་ཀྱིས་
ཐུགས་ཀར་ཟླ་བའི་དཀྱིལ་འཁོར་བསྣམས་པ། སེམས་དཔའི་སྐྱིལ་ཀྲུང་གིས་བཞུགས་པའོ། །རིགས་བདག་ནི་དོན་ཡོད་གྲུབ་པའོ། །འདི་ཡང་ཧཱུཾ་ལས་བསྐྱེད་ན་ལེགས་པ་འདྲའོ། །བཅོ་བརྒྱད་པ་རབ་ཏུ་རྒྱས་པའི་སྒྲོལ་མ་ནི། པདྨ་དཀར་པོ་ཟླ་བ་དང་ངང་པའི་གདན་ལ་ཀི་ཡིག་ལས་སྒྲོལ་མ་དཀར་མོ་ཕྱག་བཞི་པ། དང་པོ་གཉིས་སྤྱི་བོར་བསྣོལ་བས་ལྕགས་ཀྱུ་འཛིན་པ། ལྷག་མ་གཉིས་མཆོག་སྦྱིན་དང་གླེགས་བམ་གྱིས་མཚན་པའི་ཨུཏྤལ་བསྣམས་པ། སེམས་དཔའི་སྐྱིལ་ཀྲུང་ཅན། རིགས་བདག་ནི་སྣང་བ་མཐའ་ཡས་སོ། །བཅུ་དགུ་པ་སྡུག་བསྔལ་སྲེག་པའི་སྒྲོལ་མ་ནི། པད་དཀར་དང་ཉི་མ་ལ་ཛ་ཡིག་ལས་སྒྲོལ་མ་དཀར་མོ་ཕྱག་གཉིས་ཀྱིས་ཐུགས་ཀར་མེ་ཐབ་བསྣམས་པ། ཅུང་ཟད་གཡས་བརྐྱང་བའི་སེམས་དཔའི་སྐྱིལ་ཀྲུང་ཅན་ནོ། །རིགས་བདག་ནི་རྣམ་སྣང་ངོ༌། །ཉི་ཤུ་པ་དངོས་གྲུབ་འབྱུང་བའི་སྒྲོལ་མ་ནི། པདྨ་དམར་པོ་དང་ཟླ་བ་ལ་ཙེ་ཡིག་ལས་སྒྲོལ་མ་དམར་སེར་ཕྱག་གཉིས་ཀྱིས་ཐུགས་ཀར་གསེར་གྱི་བུམ་པ་བསྣམས་པ། སེམས་དཔའི་སྐྱིལ་ཀྲུང་གིས་བཞུགས་པའོ། །རིགས་བདག་ནི་དོན་ཡོད་གྲུབ་པའོ། །ཉེར་གཅིག་པ་ཡོངས་རྫོགས་བྱེད་པའི་སྒྲོལ་མ་ནི། ཧ་ཡིག་ལས་བྱུང་བའི་ཁྱུ་མཆོག་གླང་དཀར་པོའི་སྟེང་ན་པདྨ་དང་ཟླ་བའི་སྟེང་དུ་ཕེ་ཡིག་ལས་སྒྲོལ་མ་དཀར་མོ་ཅུང་ཟད་ཁྲོ་ཞིང་སྤྱན་གསུམ་མ།
ཕྱག་གཡས་མདུང་རྩེ་གསུམ་དང༌། གཡོན་མུ་ཏིག་གི་འཕྲེང་བ་འཛིན་པ། སྐྱིལ་ཀྲུང་ཕྱེད་པས་བཞུགས་ཤིང་སྟག་ལྤགས་ཀྱི་ཤམ་ཐབས་ཅན་ནོ། །རིགས་བདག་ནི་རིན་ཆེན་འབྱུང་ལྡན་ནོ། །དེ་དག་རྣམས་ཀྱི་ས་བོན་ནི་ཐམས་ཅད་ཏཱཾ་ཡིག་འབའ་ཞིག་གིས་རུང་ལ། ཞབས་སྟབས་མི་གསལ་བ་རྣམས་རྡོ་རྗེའི་སྐྱིལ་ཀྲུང་ངོ༌། །དེ་ལྟར་ན་ཉི་ཤུ་རྩ་གཅིག་པོ་རྣམས་ཀྱི་ཡང་བསྙེན་པའི་དུས་དང་རྗེས་གནང་ངམ། བཟླས་ལུང་གི་གནས་སྐབས་སུ་ཡི་གེ་བཅུ་པ་ཉིད་བཟླ་ཞིང་སྦྱིན་པར་བྱ་བ་ཡིན་ལ། སོ་སོའི་ལས་ཚོགས་སྒྲུབ་པའི་སྔགས་ནི་རྒྱ་གཞུང་ན་གསལ་ལོ། །འདིའི་རྗེས་གནང་བྱེད་ཐབས་ནི། དང་པོར་སྤྱི་སྒྲུབ་ཀྱི་རྗེས་སུ་གནང་བ་སྦྱིན་དགོས་པས་མདུན་དུ་ཚོམ་བུ། མཆོད་གཏོར་དང་བཅས་པར་སྤྱི་དང་མཐུན་པར་བཤམ། རྡོར་དྲིལ་ནང་མཆོད། འཐོར་ནས་སོགས་ཡོ་བྱད་རྣམས་འཇོམས་པར་བྱས་ལ། མདུན་བསྐྱེད་བསངས་སྦྱངས། སྟོང་པའི་ངང་ལས་ཞེས་པ་ནས། དབུ་བརྒྱན་ཞེས་པའི་བར་བདག་བསྐྱེད་དང་འདྲ་བ་ལས། རང་གི་ཟེར་བ་སོགས་དོར། དེ་ནས་མཆོད་བསྟོད་བྱས་ལ་སྙིང་པོ་ཅི་རིགས་པར་བཟླས། གོང་བཞིན་གཏོར་མ་ཕུལ། ཆོས་སྐྱོང་སོ་སོ་དང༌། མཁའ་འགྲོ་སྤྱི་གཏོར། གཞི་བདག་གཏོར་མ་སོགས་ཀྱང་སྤྲོ་ན་བྱ། དེ་ནས་བུམ་པ་ཞིག་བཅས་ལ། བུམ་པ་བསྐྱེད་ཆོག་སྤྱི་དང་མཐུན། བུམ་པའི་ནང་དུ་མདུན་བསྐྱེད་ལྟར་སྒྲོལ་མ་བསྐྱེད་ལ་བཟླས་པ་ཅུང་ཟད་བྱའོ། །མཆོད་བསྟོད་མཆོད་ཡོན་ཕུལ་བས་ལྷ་བདུད་རྩིར་ཞུ། སློབ་མའི་བྱ་བ་ནི། རྗེས་གནང་སྤྱིའི་གོ་བ་
ཆགས་པ་ཞིག་གིས་བྱ་སྟེ། འདིར་གོ་རིམ་ནི་ཕྱག་འཚལ་སེམས་བསྐྱེད་གསལ་བཏབ་ཆོས་བཤད་མཎྜལ་ཕུལ། དུས་གསུམ་སངས་རྒྱས་ཐམས་ཅད་དང་སོགས་ཀྱིས་གསོལ་བ་བཏབ། གུར་ནས་འབྱུང་བ་ལྟར་གྱི་རྒྱུན་བཤགས་རྣམས་བྱ་སྟེ་སྔོན་འགྲོའོ། །བླ་མ་དང་མདུན་བསྐྱེད་ཀྱི་ཐུགས་ཀའི་འོད་ཀྱིས་སློབ་མ་སྦྱངས་ལ། ཤཱུ་ནྱ་ཏཱའི་སྔགས་ནས་དབུ་བརྒྱན་ཞེས་པའི་བར་བདག་བསྐྱེད་ཀྱི་དམིགས་པ་ལྟར་སློབ་མ་ལ་འབོགས་པ་ནི་སྐུའི་རྗེས་གནང་ཡིན་ལ། ཡེ་ཤེས་པ་བསྟིམ་པའི་སྐབས་དྲིལ་སིལ་དང༌། དབང་བསྐུར་བའི་སྐབས་བུམ་ཆུ་སྦྱིན། གསུང་གི་རྗེས་གནང་ལ། རྗེས་སུ་བཟླས་པའི་ལུང་དང༌། དམ་བཅའ་བའི་ལུང་དང༌། བྱིན་གྱིས་བརླབས་པའི་ལུང་རྣམས་སྤྱི་དང་མཐུན། ཐུགས་ཀྱི་རྗེས་གནང་ཕྱག་མཚན་ཨུཏྤལ་བསྟིམ་པ་ཡིན། སློབ་མའི་རྗེས་ཀྱི་བྱ་བ། ཁས་བླང་མཎྜལ་འབུལ་བ་བྲན་དུ་བཟུང་བ་དགེ་བ་བསྔོ་བ་སོགས་བྱའོ། །དེ་ནས་མཆོད་པ་ཁ་གསོས་ནས་མདུན་བསྐྱེད་ལ་མཆོད་བསྟོད་དངོས་གྲུབ་བླང༌། ཡིག་བརྒྱ་བཟླ་བཟོད་གསོལ་གཤེགས་གསོལ་སྨོན་ལམ་བཀྲ་ཤིས་སོགས་སྤྱི་དང་མཐུན་ནོ། །ཉི་ཤུ་རྩ་གཅིག་པོ་སོ་སོའི་རྗེས་གནང་ལ། བུམ་པ་བཅའ་བ་མི་དགོས་ཤིང་སྐུའི་རྗེས་གནང་གི་སྐབས་རྣམ་སྣང་གི་དབུ་བརྒྱན་ཅན་ཞེས་སོགས་དབུ་བརྒྱན་རང་ཆས་སུ་བསྐྱེད་པ་ཙམ་ལས་དབང་བསྐུར་བ་མི་མཛད་དོ། །གལ་ཏེ་ཐུན་རེ་ལ་རྗེས་གནང་མང་དུ་བྱེད་པ་དང་མྱུར་བར་འདོད་ན། ཉི་མ་གཅིག་ལ་ཇི་ཙམ་བྱེད་པའི་ཚོམ་བུ་རྣམས་ཕྱོགས་གཅིག་ཏུ་བཤམས་ཏེ། གཏོར་མའང་དེ་ཉིད་ཀྱི་གྲངས་བཤམས།
དང་པོར་བདག་བསྐྱེད་རྣམས་ཀྱང་སྦྲེལ་ཏེ་བསྒོམ། མདུན་བསྐྱེད་དངོས་གཞི་ཡང་གོ་རིམ་བཞིན་ཏུ་སྦྲེལ། མཆོད་བསྟོད་གཏོར་མ་བྱིན་རླབས་རྣམས་ཕྱོགས་གཅིག་ཏུ་བྱས་ཏེ། སོ་སོ་ལ་དམིགས་ནས་གཏོར་མ་གོ་རིམ་བཞིན་དུ་འབུལ། ཡང་མཆོད་བསྟོད་སོགས་ཆབས་གཅིག་ཏུ་བྱ། རྗེས་གནང་གི་སྔོན་འགྲོ་རྣམས་གཅིག་གིས་ཆོག་པ་བྱ་ཞིང༌། རྗེས་ཀྱི་བྱ་བའང་གཅིག་གིས་རུང་ངོ༌། །འདི་ནི་ལག་ལེན་ཅུང་ཟད་བསྡུས་པ་ཡིན་ལ། ཅུང་ཟད་རྒྱས་པར་སྤྲོ་ན་རྗེས་གནང་དང་པོ་དེ་ཉིད་ལེགས་པར་བསྒྲུབས་ནས། སློབ་མ་ལའང་རྗེས་གནང་དང་པོའི་ཐུགས་ཀྱི་རྗེས་གནང་ཡན་ཆད་དངོས་གཞི་རྣམས་གྲུབ་པ་ན། དེའི་མཆོད་པ་ཁ་གསོས་རྗེས་ཆོག་བྱས་ལ། སླར་ཡང་ཚོམ་བུ་གསར་པ་བཀོད། མཆོད་པ་དང་གཏོར་མ་གསར་དུ་བཤམ་ཐུབ་ན་ལེགས་ཤིང༌། དེ་བཞིན་མིན་ན་ཁ་གསོས་ལ། རྗེས་གནང་གཉིས་པ་བསྒྲུབས། དེ་དག་གི་བར་དུ་སློབ་མ་རྣམས་ཕྱག་འཚལ་ཉེར་གཅིག་དང་ཡན་ལག་བདུན་པ་སོགས་འདོན། སྒྲུབ་ཐབས་ཟིན་མཚམས་སུ་རྗེས་གནང་གཉིས་པ་དེ་ཉིད་ཀྱི་དངོས་གཞི་སྐུ་གསུང་ཐུགས་ཀྱི་རྗེས་གནང་རྣམས་བྱ། ཡང་སྔར་བཞིན་སྒྲུབ་པ་སོགས་ཉི་མ་དེ་ཉིད་ལ་ཅི་འགྲུབ་བྱེད་པ་ཡིན་ཞིང༌། ཅི་ཙམ་བྱེད་པ་རྣམས་རྫོགས་པ་ན། རྗེས་གནང་རྗེས་མ་དེའི་ཐུགས་ཀྱི་རྗེས་གནང་སོང་མཚམས་སུ་གཙོ་བོས་ཇི་ལྟར་སོགས་སློབ་མས་རྗེས་ཀྱི་བྱ་བ་རྣམས་བྱས་ཏེ། དེའི་རྗེས་སུ་མདུན་བསྐྱེད་དེའི་རྗེས་ཆོག་བྱའོ། །སྤྱིར་ལག་ལེན་རྒྱས་བསྡུས་ཀྱི་རིམ་པ་འདི་དག་གསུང་རྒྱུན་དང་
མཐོང་བ་བརྒྱུད་པ་ལས་རྟོགས་པ་གལ་ཆེའོ། །ལམ་འདི་ཉིད་ལས་མཆོག་བརྙེས་པ། །གྲུབ་ཆེན་ཉི་མ་སྦས་པའི་བཞེད། །སྒྲོལ་མ་ཉེར་གཅིག་སྒྲུབས་པའི་ཐབས། །སློབ་མ་རྗེས་འཛིན་དང་བཅས་པ། །ལག་ལེན་རྒྱུན་ནི་མ་ཆད་ཀྱང༌། །ཉེར་མཁོ་གོ་བདེའི་ཡི་གེ་ནི། །སྔོན་ཆད་གསལ་པོ་མ་མཐོང་ཞིང༌། །བློ་ལྡན་གཞན་གྱིའང་བསྐུལ་བའི་ཕྱིར། །ཏཱ་ར་ནཱ་ཐས་སྦྱར་བ་ཡིན། །ཞེས་པ་སྒྲོལ་མ་ཉེར་གཅིག་ཉི་མ་སྦས་པའི་ལུགས་ཀྱི་སྒྲུབ་པའི་ཐབས་མདོ་ཙམ་ཤིན་ཏུ་གསལ་བ་འདི་ནི། རིགས་དང་ཚུལ་ཁྲིམས་དང་ཐོས་པ་ལ་སོགས་པ་ལུགས་གཉིས་ཀྱི་ཡོན་ཏན་དུ་མས་མངོན་པར་མཐོ་བའི་དགེ་བའི་བཤེས་གཉེན་ཆོས་ཀྱི་རྗེ་མི་ཕམ་རྡོ་རྗེ་བདུད་འཇོམས་ཞེས་བྱ་བའི་གསུང་གིས་བསྐུལ་བའི་ངོར། ཚུལ་འདི་དག་གི་ཆོས་སྐོར་ལ་ཡང་ཅུང་ཟད་སྦྱངས་པ། རྒྱལ་ཁམས་པ་ཏཱ་ར་ནཱ་ཐ་ཞེས་བྱ་བས། རང་ལོ་སུམ་ཅུ་རྩ་གཅིག་པ་ལ་སྦྱར་བའོ། །ཀུན༵་ནས་དག༵འ་བར་གྲགས་པའི་ཆོས། །གཞུང་དང་ཡིག་སྣ་ལ་སོགས་པ། །རྒྱ་བོད་གསུང་རབ་མཐའ་ཡས་ལས། །ཡང་སྙིང༵་འདྲིལ་པོ༵ར་བྱས་འདི་མཚར། །སྒྲུབ་ཐབས་རིན་ཆེན་འབྱུང་གནས་ལས། །ཉི་མ་སྦས་པའི་ལུགས་སྒྲོལ་མ་ཉི་ཤུ་རྩ་གཅིག་གི་སྒྲུབ་ཐབས་བཤད་པའི་སྐབས་ཏེ་བཅུ་བདུན་པའོ།། །།ཞུས་དག །མངྒ་ལཾ། །