བཞི་བ་མཐར་ཐུག་གི་ཡན་ལག།

བཞི་བ་མཐར་ཐུག་གི་ཡན་ལག་ནི།

ལུས་ཀྱིས་རེག་པ་ཉམས་སུ་མྱོང་བའོ། །འོ་ན་བུད་མེད་ཀྱི་རོ་ལ་རེག་ན་ཅིར་འགྱུར་ཞེ་ན། ཁ་ཅིག་ན་རེ་ལྷག་མར་འགྱུར་ཞེས་ཟེར་རོ། །འདི་ལ་གཞུང་ལྔ་སྣང་སྟེ། གཞུང་བླ་མ་ལས། བཙུན་པ་དགེ་སློང་གིས་བུད་མེད་ཀྱི་རོ་དང་ལྷན་ཅིག་ཏུ་རེག་ན་ཅིར་འགྱུར། དགེ་འདུན་ལྷག་མར་འགྱུར་རོ། །ཞེས་དང༌། ཞུ་འགྲེལ་ལས། བུད་མེད་ཀྱི་རོ་ལ་རེག་ན་དགེ་འདུན་ལྷག་མར་གསུངས་པ་ནི་ལུས་ཚང་མ་ལ་རེག་པའི་བདེ་བ་ཉམས་སུ་མྱོང་བ་ཡོད་པའི་ཕྱིར། ཞེས་དང༌། རང་གི་རྣམ་བཤད་དང་ཊཱི་ཀ་དང་བམ་པོ་ལྔ་བཅུ་པ་དང་གསུམ་ལས། འདིར་རོ་ཉིད་ལ་ན་སྨད་པ་མེད་པའི་ཕྱིར་རོ། །ཞེས་གསུངས་སོ། །འོན་ཀྱང་ལུང་ཞུ་བ་ཆེ་ཤོས་ལས། བཙུན་པ་དགེ་སློང་གིས་བུད་མེད་ཀྱི་རོ་དང་ལྷན་ཅིག་ཏུ་རེག་ན་ཅིར་འགྱུར། སྦོམ་པོར་འགྱུར། ཞེས་གསུངས་པ་དང་འགལ་ཞིང༌། རེག་པ་ནི་ཐ་སྙད་དང་འདྲའོ། །ཞེས་རེག་པའི་ཡུལ་དེ་མི་ཡིན་པ་དང་སྨྱོ་བ་མ་ཡིན་པ་ཡན་ལག་ཏུ་དགོས་པར་བཤད་པ་དང་འགལ་ལ། སྨྱོན་མ་ལ་རེག་ན་སྦོམ་པོ་ལས་མི་བསྐྱེད་པར་རོ་ལ་རེག་ན་ལྷག་མ་བསྐྱེད་པ་འགལ་བའི་ཕྱིར་རོ། །དེས་ན་བུད་མེད་ཀྱི་རོ་ལ་རེག་ན་སྦོམ་པོར་གསུངས་པའི་ལུང་དེ་གཙོ་བོར་གཟུང་ངོ། །ལྷག་མར་གསུངས་པའི་ལུང་དེ་དག་ནི་གསོ་བའི་ལྷག་ཡོད་པ་ཙམ་ལ་དགོངས་སོ་ཞེས་རིགས་སོ། །འགྲེལ་པ་གསུམ་ལས་འདིར་རོ་ཉིད་ལ་ནི་ན་སྨད་པ་མེད་པའི་ཕྱིར་ཞེས་པ་དེ་ནི། འདིར་རོ་ཉིད་ལ་ནི་སྦོམ་པོ་ལྕི་བ་ལས་ན་སྨད་པ་མེད་པའི་ཕྱིར་ཞེས་དགོངས་སོ་ཞེས་མཚོ་ཊཱིཀ་ལས་གསུངས་སོ། །མཚོ་ཊཱིཀ་ལས། རེག་པའི་ལྷག་མའི་སྐབས་འདིར་བུད་མེད་ཀྱི་ལན་བུ་སྐྲ་བསྡུས་པ་ནི་ལུས་དེ་དང་ལྡན་པ་ཉིད་དེ། དེ་ལ་རེག་ན་དངོས་གཞིའོ། །ཊཱི་ཀ་ལས་སྐྲ་ལ་འདོད་ཆགས་ལྷག་པ་སྐྱེ་བའི་ཕྱིར་རོ་ཞེས་བཤད་དོ། །འདི་ལ་ལུང་གི་འགྲེལ་པ་གཉིས་ཀྱིས་དགག་པར་བྱ་སྟེ། རྣམ་འབྱེད་འགྲེལ་ལས། ལན་བུ་ནས་བཟུང་བ་ལ་དངོས་གཞིར་སྨྲ་བ་དེ་དག་ནི་ལྟུང་བ་བསྟན་པ་ལས་ལན་བུ་མ་སྨོས་པ་དང་ཡང་འགལ་ལ། ཞུ་བ་ལས་ཀྱང༌། སྤུ་ལ་རེག་པ་ལ་སྦོམ་པོར་གསུངས་པས་དངོས་གཞིར་མི་རུང་ངོ། །ཞེས་གསུངས་སོ། །ཞུ་འགྲེལ་ལས་ཀྱང་དགག་པ་འདི་ལྟར་དུ། ལུང་ཞུ་བ་ལས་ནི་སྤུ་ལ་རེག་ན་སྦོམ་པོར་འགྱུར་རོ་ཞེས་གསུངས་ལ་ལན་བུའང་སྤུའི་བྱེ་བྲག་ཡིན་པའི་ཕྱིར་དང༌། ལན་བུ་ལ་རེག་པ་ལ་ནི་རེག་པའི་ལྷག་མ་མི་བསྐྱེད་དེ། ལུས་དངོས་ལ་རེག་པ་མེད་པའི་ཕྱིར་ཏེ། དཔེར་ན་སེན་མོ་དང་སོ་ལ་རེག་པ་བཞིན་ནོ། །སྐྲ་ལ་འདོད་ཆགས་ལྷག་པར་སྐྱེ་བའི་ཞེས་པ་དེའང་སྒྲུབ་བྱེད་དུ་མི་འཐད་དེ། རེག་ཅིང་རྩོལ་བ་མེད་པར་ཚུལ་བཞིན་མ་ཡིན་པ་ཡིད་ལ་བྱེད་པས་ཁུ་བ་འབྱུང་བ་ལས་ཀྱང་འབྱིན་པའི་ལྷག་མ་བསྐྱེད་པར་ཐལ། འདོད་ཆགས་ལྷག་པར་སྐྱེ་བའི་ཕྱིར་རོ་ཞེས་མཚུངས་ཞེས་གསུངས་སོ། །གཞན་ཡང་བུད་མེད་ཆུས་ཁྱེར་བ་དེ་དགེ་སློང་གིས་འཛིན་པ་ན་སྐྲ་དག་ལས་འཛིན་པར་གསུངས་ཏེ་གང་འདོད་ཆགས་ལྷག་པར་སྐྱེ་བ་དེ་ནས་བཟུང་དགོས་པར་ཐལ་བར་འགྱུར་རོ་ཞེས་ཀྱང་གསུང་ངོ༌། །འོ་ན་སོ་སོ་ཐར་པ་ལས། ལག་པ་ནས་བཟུང་ངམ་དཔུང་པ་ནས་བཟུང་ངམ། ལན་བུ་ནས་བཟུང་ངམ། ཡན་ལག་དང་ཉིང་ལག་གང་ཡང་རུང་བ་ལ་ནོམ་པ་དང་ཉུག་པ་བདག་གིར་བྱེད་ན་དགེ་འདུན་ལྷག་མའོ། །ཞེས་གསུངས་སོ་ཞེ་ན། ཞུ་འགྲེལ་ལས། ལན་བུ་ནི་བྱུང་བའི་དབང་གིས་གསུངས་ཀྱི་དེ་ཡན་ལག་ནི་མ་ཡིན་ནོ། །ཞེས་གསུངས་སོ། །དེ་ཡང་ཁ་ཅིག་ལན་བུ་རྐྱང་བ་ལ་རེག་པ་ལ་སྦོམ་པོ་བསྐྱེད་པ་འཐད་ཅིང༌། སློབ་དཔོན་ཡོན་ཏན་འོད་ཀྱིས་སྐབས་འདིར་ལྷག་མ་བསྐྱེད་པར་གསུངས་པ་ནི་ལན་བུ་ཤ་དང་བཅས་པ་ལ་རེག་པ་ལ་དགོངས་པ་ཡིན་པར་འདོད་ལ། ལན་བུ་དེ་དང་འབྲེལ་བའི་གོས་ལ་ཡང་ངོ་ཞེས་པའང་ཤ་དང་བཅས་པ་ལ་རེག་ན་དངོས་གཞིའོ་ཞེས་དགོངས་སོ། །ཞེས་གསུངས་སོ། །འོན་ཀྱང་ལུགས་དེ་གཉིས་ལས་གང་འཐད་བརྟག་པར་བྱ་ལ། ཟླ་ཟེར་ལས་ཀྱང༌། རེག་པའི་ལྷག་མའི་སྐབས་འདིར་བུད་མེད་ཀྱི་སྐྲ་བསྡུས་པའི་ལན་བུ་ནི་ལུས་དེ་དང་ལྡན་པའམ་ལུས་དེ་དང་འདྲ་བ་ཉིད་དོ། །ལན་བུ་རེག་ན་དངོས་གཞིའོ། །ཞེས་དང༌། འདུལ་བ་བདུད་རྩིའི་ཉིང་ཁུ་ལས། དངོས་གཞི་ནི། ཡུལ་བུད་མེད་ལུས་རྟེན་རུང་མ་ཉམས་པ། ཐ་མལ་དུ་གནས་པའི་ལུས་དངོས་སམ། སྐྲ་འམ་དེ་དང་འབྲེལ་བའི་སྐྲ་མཐུད་ལྟ་བུ་ལ་དགེ་སློང་རང་གི་ལུས་དངོས་མ་ཉམས་པས། འདུ་ཤེས་མ་འཁྲུལ་ཞིང་ཆགས་སེམས་ཀྱིས་བདེ་བ་ཉམས་སུ་མྱོང་འདོད་ཀྱིས་རེག་པའམ། ཡུལ་གྱིས་ཚུར་རེག་པ་དང་དུ་ལེན་འདོད་ཀྱིས་མཐར་ཐུག་རེག་པ་ཉམས་སུ་མྱོང་པ་རྫོགས་པའོ། །ཞེས་གསུངས་སོ། །གོས་ཀྱིས་བར་དུ་ཆོད་པ་ལ་ནི་འོག་མར་རོ་ཞེས་གསུངས་ན་ཤིན་ཏུ་སྲབ་པའི་གོས་ཀྱིས་བར་དུ་ཆོད་པ་ལུས་ཀྱི་དྲོད་ཀྱི་རེག་པ་ཚོར་བ་ལ་ཅིར་འགྱུར་ཞེ་ན། འགྲེལ་ཆུང་ལས། དར་ལྟ་བུ་སྲབ་མོས་གཡོགས་པ་ལ་བཟུང་ན་ལྷག་མར་འགྱུར་ཞེས་བཤད་ཀྱང་མི་རིགས་ཏེ། ལུས་ལ་རྣམ་པ་ཐམས་ཅད་དུ་རེག་པ་མེད་པར་རེག་པའི་ལྷག་མ་བསྐྱེད་པ་འགལ་བའི་ཕྱིར་དང༌། ཊཱི་ཀ་ལས། ལུས་ཀྱི་རེག་པ་ཚོར་བ་ལའང་ལྟུང་བ་ལ་བྱེ་བྲག་མེད་དེ། ཐམས་ཅད་དུ་ལུས་ཀྱི་རེག་པ་མེད་པའི་ཕྱིར་རོ། །ཞེས་གསུངས་སོ། །ཞུ་བའི་སྐབས་སུ། མ་དང་བུ་མོ་དང་སྲིང་མོ་དག་ལ། ཞེས་སོ། །འདིར་ཁ་ཅིག་ན་རེ་རེག་པའི་ལྷག་མ་བསྐྱེད་པ་ལ་ཡུལ་བུད་མེད་ཉེ་དུ་མ་ཡིན་པ་ཡན་ལག་ཏུ་དགོས་ཏེ། རང་གི་མ་སྲིང་དང་བུ་མོ་ལ་དེ་དག་ཏུ་འདུ་ཤེས་པས་རེག་པ་ལ་ལྟུང་མེད་དུ་གསུངས་པ་འདིས་ཤེས་སོ་ཞེས་ཟེར་རོ། །དེ་ནི་མ་ཡིན་ཏེ། ཡིད་ཀུན་ཏུ་འདོད་ཆགས་དང་ལྡན་པའི་བསམ་པ་དེ་སྐྱེས་ན་ནི་བུད་མེད་ཉེ་དུ་མ་ཡིན་པ་ལ་དམིགས་ནས་བསམ་པ་དེ་སྐྱེས་པ་དང་མ་སྲིང་ལ་དམིགས་ནས་བསམ་པ་དེ་སྐྱེས་པ་གཉིས་དགག་བྱའི་ངོ་བོ་ལ་ཁྱད་པར་མེད་པའི་ཕྱིར་ཏེ། དཔེར་ན་མི་ཚངས་པར་སྤྱད་ན་བུད་མེད་གཞན་དང་མ་སྲིང་ཡང་དགག་བྱ་ལ་ཁྱད་པར་མེད་པ་བཞིན་ནོ། །སྤྱིར་ན་ཆགས་པའི་རྒྱུར་འགྱུར་དགག་བྱ་ཡིན་པ་དང༌། ཆགས་པ་དངོས་དགག་བྱ་ཡིན་པ་སྟེ་གཉིས་ལས་རེག་པའི་ལྷག་མ་ནི་ཆགས་པ་དངོས་དགག་བྱ་ཡིན་ཏེ། ཡིད་ཀུན་ཏུ་འདོད་ཆགས་དང་ལྡན་པ་ཡན་ལག་ཏུ་དགོས་པའི་ཕྱིར་རོ། །དེས་ན་ཆགས་སེམས་ཀྱིས་རེག་པའི་ལྷག་མ་བསྐྱེད་པ་ལ་ནི་ཡུལ་ཉེ་དུ་མིན་པ་ཡན་ལག་ཏུ་མི་དགོས་ཏེ། ནང་སེམས་ཅན་ལ་ཆགས་པ་དངོས་དགག་བྱར་གྱུར་པ་ཡིན་པའི་ཕྱིར་རོ། །དཔེར་ན་མི་ཚངས་པར་སྤྱོད་པ་བཞིན་ནོ། །མ་དང་བུ་མོ་དང་སྲིང་མོ་དག་ལ་དེ་དག་ཏུ་འདུ་ཤེས་པའོ་ཞེས་པ་ནི་སྒྲུབ་བྱེད་དུ་འགྱུར་ན། སྔོན་སྤྱད་པ་ཉིད་ལ་ཀུན་དགའ་བའོ་ཞེས་གསུངས་པས་རེག་པའི་ལྷག་མ་བསྐྱེད་པ་ལ་སྔོན་སྤྱད་པའི་བུད་མེད་མ་ཡིན་པ་ཡན་ལག་ཏུ་དགོས་པར་ཐལ་བར་འགྱུར་ཞེས་མཚུངས་སོ། ། རང་ལུགས་ནི་ཆགས་སེམས་གཏན་ནས་མེད་ཀྱང་བུད་མེད་གཞན་ལ་རེག་ན་བསླབ་བྱའི་ཉེས་བྱས་བསྐྱེད་ལ་ཆགས་སེམས་མེད་པར་རང་གི་མ་དང་བུ་མོ་དང་སྲིང་མོ་དག་ལ་དེ་དག་ཏུ་འདུ་ཤེས་པས་རེག་པ་ལ་ནི་བསླབ་བྱའི་ཉེས་བྱས་མི་བསྐྱེད་པའོ། །འདི་ལ་རེག་པའི་ལྟུང་བ་རྣམ་གཞག་གང་ཡང་མི་བསྐྱེད་དེ། ཆགས་སེམས་མེད་པའི་ཕྱིར་རོ། །གལ་ཏེ་མ་སྲིང་ལའང་ཆགས་སེམས་སྐྱེས་ཏེ་རེག་ན་ནི་ལྷག་མར་འགྱུར་རོ། །སྔོན་སྤྱད་པ་ཉིད་ལ་ཆགས་སེམས་མེད་པར་ཀུན་དགའ་བར་བྱ་བའི་ཕྱིར་རེག་པ་ལ་བསླབ་བྱའི་ཉེས་བྱས་དང་རེག་པའི་ལྟུང་བ་གང་ཡང་མི་བསྐྱེད་པའོ། །སྔོན་སྤྱད་པ་ཉིད་ལ་ཆགས་སེམས་སྐྱེས་ཏེ་རེག་ན་ནི་ལྷག་མར་འགྱུར་རོ། །