ནུབ་སྒོར་གཤིན་རྗེ་མཐར་བྱེད་ཞལ་གསུམ་ཕྱག་དྲུག་རྩ་ཞལ་དང་སྐུ་མདོག་སེར་པོ།
ནུབ་སྒོར་གཤིན་རྗེ་མཐར་བྱེད་ཞལ་གསུམ་ཕྱག་དྲུག་རྩ་ཞལ་དང་སྐུ་མདོག་སེར་པོ།
གཡས་ཞལ་དཀར༌། གཡོན་ནག ཕྱག་གཡས་པ་གསུམ། འཁོར་ལོ། དབྱུག་པ། ཁྲོ་བོའི་རྡོ་རྗེ། གཡོན་གསུམ། དུང༌། ལྕགས་སྒྲོག དྲིལ་བུ་འཛིན་པ་ལ། ཤིན་ཏུ་བརྩོན་འགྲུས་མ་ཞལ་གསུམ་ཕྱག་དྲུག རྩ་ཞལ་དང་སྐུ་མདོག་ནག་མོ། གཡས་ཞལ་དམར། གཡོན་དཀར། ཕྱག་གཡས་པ་གསུམ། རལ་གྲི། གྲི་གུག རྩེ་གསུམ། གཡོན་པ་གསུམ། ཕུབ། ཐོད་པ། ཁ་ཊཱཾ་ག་འཛིན་པས་འཁྱུད་པ་སྟེ། ཁྲོ་བོ་ཁྲོ་མོ་བརྒྱད་པོ་དེ་རྣམས་ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང་དབུ་སྐྲ་དམར་སེར་གྱེན་དུ་བརྫེས་པ། རབ་ཏུ་ཁྲོས་ཤིང༌། འཇིགས་སུ་རུང་བ། ཀླུའི་དབང་པོ་དང༌། ཕྱག་རྒྱ་ལྔས་བརྒྱན་པ། སྟག་ཤམ་དང༌། ཁྲོ་བོ་རྣམས་གཡས་བརྐྱང་དང༌། ཁྲོ་མོ་རྣམས་གཡོན་བརྐྱང་གིས་གནས་ཤིང་ཐབས་གཙོ་བོར་གྱུར་བའོ། །སྟེང་འོག་གི་བུམ་པ་བྲི་ཆ་ལ་སྟེང་འོག་༼ཤར་ནུབ་ཀྱི༽གི་ཁྲོ་བོའི་རྒྱབ་ཏུ་བྱེད་པའོ། །བདེ་ཆེན་འཁོར་ལོའི་གཤེགས་པ་བརྒྱད་དང༌། ཐུགས་དཀྱིལ་གྱི་ལྷ་སྣམ་ཀྱི་སེམས་དཔའ་བཅུ་གཉིས་ཏེ་ཉི་ཤུ་ནི་དར་གོས་ཡོད་ལ། གཤེགས་མ་བརྒྱད་དང༌། སེམས་མ་བཅུ་གཉིས་ཏེ་ཉི་ཤུ་ལ་དར་གོས་མི་དགོས་ཏེ། དངོས་གྲུབ་ཉེར་འཚོ་ལས། དར་སྲབ་མོའི་ན་བཟའ་ཅུང་ཟད་དང༌། ཞེས་དང༌། དུས་འཁོར་བསྐྱེད་རིམ་བདུད་རྩིའི་བུམ་བཟང་༩༩ལས། བདེ་ཆེན་འཁོར་ལོའི་གཤེགས་པ་ཡབ་ཡུམ་དང༌། གཤེགས་མ་ཡབ་ཡུམ་དང༌། ཐུགས་ཀྱི་སེམས་དཔའ་ཡབ་ཡུམ་དང༌། སེམས་མ་ཡབ་ཡུམ་སྟེ། ལྷ་ཉི་ཤུ་ནི་དར་སྲབ་མོའི་སྨད་གཡོགས་དང་སྟོད་གཡོགས་ཅུང་ཟད་ཙམ་དང༌། ཞེས་གསུངས་སོ། །གཤེགས་མ་བརྒྱད་དང༌། སེམས་མ་བཅུ་གཉིས་དར་གོས་ཅན་དུ་བྱེད་པ་ནི་རང་ལུགས་མ་ཡིན་ནོ། །