གསུམ་པ་འཁྲིག་ཚིག་སྨྲ་བའི་ལྷག་མ།

གསུམ་པ་འཁྲིག་ཚིག་སྨྲ་བའི་ལྷག་མ་ལ།

རྩ་བར། འཁྲིག་པ་སྨྲས་ནའོ། །རྒྱ་ལ་སོགས་པའི་དོན་གྱིས་སོ། །གང་ལ་གོ་བར་བྱ་བ་ཉིད་དེ་བརྡའ་སྤྲོད་པ་ན་མཐའོ། །ཞེས་བྱུང༌།འདིའི་དོན་ལ་བཞི་ལས། དང་པོ་གླེང་གཞི་ནི། ཡུལ་མཉན་ཡོད་དུ་གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས་ཉེས་པ་བུད་མེད་ལ་འཁྲིག་ཚིག་སྨྲས་པ་ལས་དགེ་འདུན་ལྷག་མར་བཅས་སོ། །གཉིས་པ་དགག་བྱ་ནི། འཁྲིག་པའི་འདོད་ཆགས་འཕེལ་བ་དང༌། ཕམ་པ་དང་པོའི་རྒྱུར་འགྱུར་བའོ། །གསུམ་པ་ངོ་བོ་ནི། བཅས་ལྡན་དགེ་སློང་གིས་ཆགས་སེམས་ཀྱིས་བུད་མེད་ལ་འཁྲིག་པ་གསལ་བར་སྨྲས་ཏེ། དོན་གོ་བ་ལས་གྱུར་པའི་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ། གང་ལ་སྨྲ་བའི་ཡུལ་དང༌། གང་བརྗོད་པའི་དོན་དང་གཉིས། །དང་པོ་ལ་ལྔ་སྟེ། བུད་མེད་ཀྱི་མཚན་དོན་ཡོད་པ་དང༌། མཚན་བསྟེན་དུ་རུང་བ་དང༌།ཐ་སྙད་བཞི་དང་ལྡན་པ་དང༌། ལུས་ཐ་མལ་པར་གནས་པ་དང༌། རྫུ་འཕྲུལ་གྱི་ཆོས་ཅན་མ་ཡིན་པའོ། །དང་པོ་གཉིས་དང་བཞི་པ་ནི་རེག་པའི་སྐབས་སུ་བཤད་པ་དང་འདྲའོ། །ཐ་སྙད་བཞི་དང་ལྡན་པ་ནི་ཐ་སྙད་ལྔ་ལས་མ་ནིང་དང༌། མཚན་གཉིས་པ་མ་ཡིན་ཞེས་པ་དེ་མ་གཏོགས་པ་བཞིའོ། ། ལྔ་པ་ནི། རྩ་བར། རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པ་མ་ཡིན་པའི་ཡན་ལག་ཡིན་ནོ། །ཞེས་སོ། །