ཆེ་བ་བརྗོད་པ།
སྤྱི་སྡོམ་གསུམ་པ་ཐ་མར་དགེ་བའི་དོན་ཁྲིད་ལ། ཡོན་ཏན་བསྟན་པ། བཀའ་རྒྱས་བཏབ་པ། སྨོན་ལམ་གྱིས་མཇུག་བསྡུ་བ་སྟེ་གསུམ། དང་པོ་ཟབ་གསང་རྫོགས་པ་ཆེན་པོའི་མྱུར་ལམ་བླ་ན་མེད་པ་འདི་ལ་ཞུགས་པའི་ཡོན་ཏན་བསྟན་པ་ལ། ཆེ་བ་བརྗོད་པ། འཕགས་ཆོས་བརྗོད་པ། ཁྱད་འཕགས་བརྗོད་པ། འབྲེལ་ཚད་དོན་ལྡན་དུ་བརྗོད་པའོ། །དང་པོ་མྱུར་ལམ་འདི་ཉིད་ཀྱི་ཆེ་བ་བརྗོད་པ་ནི། བསྐྱེད་རྫོགས་ཐབས་ལམ་མང་པོ་གང་ལས་གང་ཟབ་བརྟགས་ཏེ་དཀའ་བ་མང་པོས་རྩོལ་སྒྲུབ་བླང་དོར་བྱས་པའི་བསམ་བསྒོམ་ལ་མི་ལྟོས་པར། རིག་གདངས་འོད་གསལ་མངོན་སུམ་དུ་སྣང་བ་ལ་མ་ཡེངས་མི་བསྒོམ་པར་བལྟས་པ་ཁོ་ནས་ཆོག་ངེས་པ། ལུས་རྟེན་འདི་ཉིད་ནས་ལྷག་མེད་མངོན་སངས་རྒྱས་པའི་མྱུར་ལམ་ཟབ་མོ་གསང་བ་ལས་ཀྱང་ཆེས་གསང་མཆོག་བླ་ན་མེད་པ། ཐེག་མཆོག་རྫོགས་པ་ཆེན་པོ་མན་ངག་སྡེ་པའི་ཁྱད་ནོར། སྐུ་གསུམ་གྱི་དགོངས་མཛོད་བསམ་གྱིས་མི་ཁྱབ་པའི་སྙིང་པོའི་ཡང་བཅུད་འདི་ལ་ཐེག་པ་ཐམས་ཅད་ཀྱི་དོན་འདུས་ཤིང་འདི་བས་ལྷག་པའམ་འདི་དང་མཚུངས་པ་གཞན་མེད་ཅིང་མི་དགོས་ཏེ། ཀུན་བཟང་དགོངས་ཉམས་ལས། ང་ཡི་རང་བཞིན་རྫོགས་པ་ཆེན་པོ་ལ། །འཁོར་འདས་ཆོས་རྣམས་སྤང་ཐོབ་བྲལ་པར་རྫོགས། །མན་ངག་གནད་རྣམས་རང་གྲོལ་ཆེན་པོར་རྫོགས། །ལྟ་བའི་གནད་རྣམས་རྟག་ཆད་མེད་པར་རྫོགས། །སྒོམ་པའི་ལམ་རྣམས་འབད་རྩོལ་མེད་པར་རྫོགས། །སྤྱོད་པའི་ཆོས་རྣམས་གནང་བཀག་མེད་པར་རྫོགས། །འབྲས་བུའི་ངོ་བོ་ཡིད་སྨོན་བྲལ་བར་རྫོགས། །རྫོགས་ཤེས་བྱ་བའང་བློ་བཏགས་ཙམ་དུ་ཟད། །ཅེས་དང་། རིག་པ་ངོ་སྤྲོད་གཅེར་མཐོང་རང་གྲོལ་ལས། དུས་གསུམ་རྒྱལ་བའི་ཆོས་སྒོ་བརྒྱད་ཁྲི་དང་༔ བཞི་སྟོང་ལ་སོགས་བསམ་གྱིས་མི་ཁྱབ་པ༔ གསུངས་པ་ཐམས་ཅད་འདི་ཉིད་རྟོགས་ཕྱིར་ལས༔ གཞན་དུ་ཅི་ཡང་རྒྱལ་བས་གསུངས་པ་མེད༔ གསུང་རབ་ནམ་མཁའི་མཐའ་མཉམ་དཔག་མེད་ཀྱང་༔ དོན་ལ་རིག་པ་ངོ་སྤྲོད་ཚིག་གསུམ་པོ༔ རྒྱལ་བའི་དགོངས་པ་མངོན་སུམ་ངོ་སྤྲོད་འདི༔ སྦ་ཕྲི་མེད་པར་མཛུབ་བཙུག་འདི་ཀ་ཡིན༔ ཞེས་དང་། དུས་བརྟགས་པ་ལས། ཨེ་མ་གསང་སྔགས་སྙིང་པོ་མཐར་ཐུག་ཆོས། །ཐེག་པ་རིམ་དགུའི་ཉམས་ལེན་དོན་རྫོགས་འདི། །ཀུན་ལས་ཁྱད་འཕགས་ཨེ་མ་ངོ་མཚར་ཆེ། །བོད་ཡུལ་ཀུན་ཏུ་གཏེར་ཕྲན་བྱེ་བ་སྦས། །གཏེར་ཆེན་བརྒྱ་དང་ཉེར་བརྒྱད་སར་སྦས་ཀྱང་། །གདམས་པའི་མཐར་ཐུག་འདི་ལྷག་སྦས་རེ་ཀན། །ཞེས་གསུངས་པ་ལྟར་རོ།།