ལེའུ་བདུན་པ། ཆོས་སྤྱོད་ཀྱི་སྐོར།

མར་མེ།

༡ མར་མེ་འབུལ་བའི་ཁུངས་ནི། འཕགས་པ་གྲོང་ཁྱེར་འཚོ་བའི་མདོ་ལས། རྒྱལ་བོ་གསལ་རྒྱལ་གྱིས་དེ་བཞིན་གཤེགས་པ་མཆོད་ཕྱིར་སྟོན་ཐ་ཆུང་ཉ་བའི་ཚེས་བཅོ་ལྔ་ལ། འབྲུ་མར་ཟངས་བོ་ཆེ་སྟོང་བཀང་སྟེ་དངར་ནས་མར་མེ་སྦར་བའི་འོད་ཀྱིས་ཁོ་ར་ཁོར་ཡུག་ཏུ་དཔག་ཚད་བཞིར་སྣང་བས་ཁྱབ་པར་བྱས་སོ། །ཞེས་དང་། སྤྱན་རས་གཟིགས་ཀྱི་མདོ་ལས། སངས་རྒྱས་མཆོད་རྟེན་མར་མེ་གཅིག་ཕུལ་ན། །འདི་ནས་བཟུང་སྟེ་སྲིད་པའི་རྩེ་མོའི་བར། །སངས་རྒྱས་ཞིང་ནི་འཛམ་གླིང་གསེར་གྱིས་བཀང་། །དེ་འདྲའི་དཔལ་དེ་ཟད་པར་བྱ་མི་ནུས། །བཅོམ་ལྡན་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ནི་མདོག་ངན་ཡོང་མི་འགྱུར། །ཞེས་དང་། དཀོན་མཆོག་ཏ་ལ་ལ་ལས། མིག་རྣམས་སྦྱོང་བའི་འོད་ཟེར་རབ་གཏོང་ཞིང་། །དེ་ཚེ་ལོང་བས་སྣ་ཚོགས་གཟུགས་རྣམས་མཐོང་། །རྒྱལ་བ་དག་དང་རྒྱལ་བའི་མཆོད་རྟེན་ལ། །མར་མེ་ཕུལ་བས་མིག་སྦྱོང་འོད་ཟེར་འཐོབ། །ཅེས་དང་། འབྲུ་མར་མར་མེ་མར་གྱི་མར་མེ་དང་། །རྩྭ་ཤིང་འདམ་བུ་འོད་མའི་སྒྲོན་མ་དང་། །སྤོས་དང་བཅུད་ལེན་རིན་ཆེན་སྒྲོན་མ་དང་། །རྒྱལ་བ་རྣམས་ལ་ཕུལ་བའི་འོད་ཟེར་འཐོབ། །སྒྲོན་ཞེས་བྱ་བའི་འོད་ཟེར་རབ་གཏོང་ཞིང་། །སེམས་ཅན་གང་དག་འོད་དེས་བསྐུལ་བྱས་པ། །དེ་དག་སྲེད་སྤངས་སྲིད་པའི་རྒྱ་མཚོ་ལས། །སེམས་ཅན་བསྒྲལ་བའི་དོན་དུ་གོ་ཆ་གྱོན། །ཞེས་དང་། གཞན་ཡང་ལས་རྣམ་འབྱེད་ཀྱི་མདོ་སོགས་ལས་མང་དུ་གསུངས་པ་དེའོ། །

༢ མར་མེའི་སྣོད་ནི། ལེགས་གྲུབ་ལས། གསེར་རམ་དངུལ་ལམ་ཟངས་མ་འམ། །ལྕགས་སམ་ཡང་ན་ཁམ་པ་ལས། །མར་མེ་བླུགས་པའི་སྣོད་བྱས་ན། །གསང་སྔགས་ཡོངས་སུ་མཉེས་པར་འགྱུར། །ཞེས་དང་། རྣམ་སྣང་མངོན་བྱང་ལས། མར་མེ་སྣོད་ཀྱི་གསེར་གྱི་བཟང་། །ཡང་ན་ཁམ་པའི་སེར་བོ་འང་རུང་། །བྱེ་བྲག་ཏུ། ཞི་བར་དངུལ་སོགས་དཀར་བོ། རྒྱས་པར་གསེར་སོགས་སེར་བོ། དབང་ལ་ཟངས་མ་སོགས་དམར་བོ། དྲག་པོར་ལྕགས་སོགས་ནག་པོའི་སྣོད་དགོས་པར་ཡང་གསུངས་སོ། །

༣ མར་མེ་ལག་ལེན་བྱེད་སྟངས་ནི། མར་མེ་ནི་གཟུགས་ཀྱི་མཆོད་པ་བླ་ན་མེད་པ་ཡིན་ལ། ཚོགས་བསགས་ཀྱི་དགེ་བ་སྟོབས་ཆེན་ཞིག་ཀྱང་ཡིན། ལག་ལེན་ནི། སྡོང་བུ་ལ་གསེར་དངུལ་ལས་བྱེད་པའམ། ཤེས་རབ་རྣོན་པོ་ཡོང་ཆེད་རྒྱ་ཁབ་ཀྱི་སྟེང་ལ་རས་བལ་གྱིས་དཀྲི་བ་འང་ཡོད། གཞན་དྲི་བཟང་ཅན་གྱི་རྩི་ཤིང་དང་ཤུག་པ་སོགས་སྦོམ་ཕྲ་རན་པར་བྱས་ཏེ། རྩ་བ་བརྟན་ལ་དྲང་ཞིང་རྩེ་མོ་རྣོ་བ་ལ། སྡོང་བུ་དཀྲི་བྱེད་དུ། མངོན་བྱང་ལས། ཤིང་བལ་དང་ནི་རས་གསར་དང་། །དུ་གུ་ལ་དང་གསོ་རས་དང་། །དེ་ལ་སོགས་པའི་སྙིང་བོ་བྱ། །ཞེས་དང་། དེ་ཡང་ལས་ཀྱི་བྱེ་བྲག་གིས། ཞི་བར་དཀར་བོ། རྒྱས་པར་སེར་བོ། དབང་ལ་དམར་བོ། དྲག་པོར་སྔོན་པོ་འམ་ནག་པོ་དཀྲི་བར་བཤད་ལ། དེ་ལྟར་རས་བལ་སོགས་ཀྱིས་ལན་གསུམ་དཀྲིས། རིང་ཐུང་རྐོང་བུའི་ཚད་ལ་དཔག་པར་བྱ། དེ་ནས་རྐོང་བུ་བྱི་བདར་ལེགས་པར་བགྱིས་ཏེ་སྡོང་བུ་བཙུགས་ནས། མར་གཙང་མ་བཙགས་ཐག་ཆོད་པར་བྱས་ཏེ། ཚགས་ཀྱི་ནང་ལྡུགས་བཞིན་ངག་ཏུ། ཨོཾ་ཨཱཿཧཱུཾ ཞེས་འདོན་བཞིན་བླུགས་ན་བགེགས་མི་ཞུགས་པར་གསུངས།

ཡང་། རྣམ་གྲོལ་ལག་བཅངས་ལས། མར་མེ་འོད་ཕུལ་བ་ཡིན་གྱི། མར་ཁུ་ཕུལ་བ་མིན་པས་ཅུང་ཟད་ཁ་ཚ་ཙམ་ཡོད་ཀྱང་ཆོག་པར་ཡང་གསུངས། བྱེ་བྲག་ཏུ། ལས་བཞི་འགྲུབ་པ་ལ་མར་ཁུའི་ཁྱད་པར་ཡང་བསྟན་དུ་ཡོད་དེ། ལེགས་གྲུབ་ལས། ཞི་བ་ལ་སོགས་བྱེ་བྲག་གིས། །དེ་ཡི་མར་ནི་དྲི་ཞིམ་པ། །འབྲུ་མར་བསུང་ཅན་ཡིད་འོང་བའམ། །ཡང་ན་དྲི་ཞིམ་མར་གྱིས་བྱ། །དྲི་ཞིམ་ཤིང་ལས་བྱུང་བའི་མར། །ཞི་བའི་ལས་ལ་ཤིས་པར་བྱ། །ཏིལ་མར་གྱིས་ནི་རྒྱས་པ་ལ། །དྲག་པོ་ལ་ནི་ཡུངས་མར་ཤིས། །རིགས་སྔགས་ཀུན་ལ་ཟར་མའི་མར། །འབྲས་བུ་ལས་བྱུང་གསང་སྔགས་ལ། །ཞེས་དང་། སྨན་རྣམས་ལས་ནི་བྱུང་བའི་མར། །དེ་ཀུན་རྒྱས་པའི་ལས་ལ་གསུངས། །དྲི་ཞིམ་ཐམས་ཅད་ཞི་བ་ལ། །དྲག་སྤྱོད་ལ་ནི་དྲི་ངད་རྣམས། །ཞེས་དང་། གཞན་ཡང་ལེགས་གྲུབ་ལས། ལས་རྣམས་དག་ནི་ཐམས་ཅད་ལ། །དམར་སེར་བ་མར་མཆོག་ཏུ་གསུངས། །ཞེས་དང་། ཁ་བའི་ཤིང་ལས་བྱུང་བའི་མར། །ཕལ་བ་རྣམས་ལ་ཡོངས་སུ་བསྒྲགས། །ཤ་ཟ་རྣམས་ལ་ཉ་ཡི་མར། །གནོད་སྦྱིན་རྣམས་ལ་ཚིལ་བུར་བཤད། །ཤིན་ཏུ་དམན་པ་གཞན་རྣམས་ལ། །བྷ་ལ་ཏ་ཀ་ལ་སོགས་མར། །དུར་ཁྲོད་པ་ནི་ཐམས་ཅད་དང་། །རོ་ལངས་ལ་སོགས་དངོས་གྲུབ་ལ། །ཁྱད་པར་དུ་ནི་ཚིལ་ཆེན་གྱི། །སྣུམ་ནི་རྗེས་སུ་མཐུན་པ་ཡིན། །ཞེས་གསུངས་པ་ལྟར། མགོན་པོའི་ཆོ་ག་ལས། གདུག་པའི་དགྲ་བགེགས་རྣམས་ཀྱི་ཞུན་ཆེན་པོ། །སྐྲ་ཡི་རས་ཀྱི་སྡོང་བུར་བཅས་པ་ལ། །ཡི་དྭགས་མེ་ཡིས་སྦར་བའི་སྒྲོན་མེ་འདིས། །མྱུར་མཛད་ཡེ་ཤེས་མགོན་པོའི་ཐུགས་དམ་བསྐང་། །ཞེས་སོགས་གསུངས་པ་ནི། སྔགས་བླ་མེད་ཀྱི་རྟོགས་པ་ཡ་ཚད་པ་ཞིག་ལ་གསུངས་ཀྱི། རང་ག་བས་མ་ཡིན་ནོ། །

༤ མར་མེ་སྦར་ཚུལ་དང་འདོན་ཆོག མེ་མ་ཤི་ཙམ་པའི་འོད་ཀྱིས་རྒྱུན་རིང་བོར་བྱེད་པས། ཚེ་རིང་བའི་རྟེན་འབྲེལ་ཡོད་པ་དང་། སྡོང་བུ་ཧ་ཅང་སྦོམ་པའི་མྱུར་དུ་སྦར་བར་མི་བྱེད་པར་འོད་གསལ་བའི་སྟེང་ནས། དལ་འབར་བྱས་ན་ལེགས་པར་བསྟན་རིམ་ལས་གསུངས་སོ། །

མར་མེ་སྒྲོན་ཚེ་ངག་ཏུ། མར་ཁུ་རྒྱ་མཚོ་ཡོངས་སུ་འཁྱིལ་བའི་རྐོང་། །ཕུན་ཚོགས་འོད་སྟོང་འབར་བའི་སྒྲོན་མེ་འདིས། །མུན་པའི་བསྐལ་བ་ཡོངས་སུ་སངས་བྱས་ནས། །འགྲོ་རྣམས་སངས་རྒྱས་མངོན་སུམ་མཐོང་བར་ཤོག། ཅེས་དང་། ཡང་ན། ཇོ་བོ་རྗེ་དབུས་གཙང་གི་གཙུག་ལག་ཁང་ཁག་གི་མཆོད་མཇལ་སྐབས། དཔོན་སློབ་བཅོ་བརྒྱད་ཀྱིས་མགྲིན་གཅིག་ཏུ་གསུངས་པའི་མར་མེའི་འདོན་ཆོག་ནི། འདི་ལྟར། ཨོཾ་ཨཱཿཧཱུཾ ། མར་མེའི་སྣོད་ནི་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཀྱི་ཁོར་ཡུག་དང་མཉམ་པར་གྱུར་ཅིག མར་མེའི་སྡོང་བུ་ནི་རི་ཡི་རྒྱལ་བོ་རི་རབ་ཙམ་དུ་གྱུར་ཅིག མར་ཁུ་ནི་མཐའི་རྒྱ་མཚོ་ཙམ་དུ་གྱུར་ཅིག གྲངས་ནི་སངས་རྒྱས་རེ་རེའི་མདུན་དུ་དུང་ཕྱུར་རེ་རེ་གསལ་བར་གྱུར་ཅིག འོད་ཀྱིས་སྲིད་པ་རྩེ་མོའི་མན་ཆད་དང་མནར་མེད་པའི་དམྱལ་ཁམས་ཡན་ཆད་ཀྱི་སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ་ནས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཞིང་མངོན་སུམ་དུ་མཐོང་ཞིང་གསལ་བར་གྱུར་ཅིག ཨོཾ་བཛྲ་དྷ་རྨ་ཨཱ་ལོ་ཀེ་ཨཱཿཧཱུཾ། ཨེ་མ་ཧོ། ངོ་མཚར་རྨད་བྱུང་སྣང་གསལ་སྒྲོན་མེ་འདི། །བསྐལ་བཟང་སངས་རྒྱས་སྟོང་རྩ་ལ་སོགས་པའི། །རབ་འབྱམས་ཕྱོགས་བཅུའི་ཞིང་ཁམས་མ་ལུས་པའི། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །དཀྱིལ་འཁོར་ལྷ་ཚོགས་རྣམས་ལ་འབུལ་བར་བགྱི། །ཕ་མའི་གཙོ་བྱས་སེམས་ཅན་ཐམས་ཅད་ཀྱི། །ཚེ་རབས་འདི་དང་སྐྱེ་གནས་ཐམས་ཅད་དུ། །རྫོགས་སངས་རྒྱས་པའི་ཞིང་ཁམས་མངོན་མཐོང་ནས། །འོད་དཔག་མེད་མགོན་ཉིད་དང་དབྱེར་མེད་ཤོག །དཀོན་མཆོག་གསུམ་དང་རྩ་གསུམ་ལྷ་ཚོགས་ཀྱིས། །བདེན་པའི་མཐུ་ཡིས་སྨོན་ལམ་ཅི་བཏབ་པ། །མྱུར་ཏུ་འགྲུབ་པར་བྱིན་གྱིས་བརླབ་ཏུ་གསོལ། །ཏ་དྱཐཱ། པཙྙ་ནྡྲྀ་ཡ་ཨཱ་བ་བོ་དྷཱ་ན་ཡེ་སྭཱ་ཧཱ། ཞེས་སོ། །

གཞན་ཡང་། མཆོད་མེ་སྦར་སྐབས་མཆོད་པའི་འགྱུར་སྔགས་དང་། མར་མེ་འདི་ཡིས་བསོད་ནམས་ཀྱིས། །མ་རིག་མུན་པ་སེལ་བར་ཤོག །ཡེ་ཤེས་སྤྱན་དང་ལྡན་པར་ཤོག །ཤེས་རབ་རྩ་ཁ་དབྱེ་བར་ཤོག །སོགས་སྐབས་བབ་མར་མེ་དང་འབྲེལ་བའི་སྨོན་ལམ་སྣ་ཚོགས་བཏོན་ན་ཕན་ཡོན་ཆེའོ། །གཞན་ཡང་། ཅོ་ནེ་གྲགས་པ་བཤད་སྒྲུབ་ཀྱི་མར་མེ་འབུལ་ཚུལ་སྨོན་ལམ་དང་བཅས་པ་ཞེས་པར་ཡང་གསལ་ལོ། །

༥ མར་མེའི་མཚོན་དོན་ནི། སྡོང་ཤིང་གི་རྩེ་མོ་རྣོ་བའི་ཤེས་རབ་རྣོ་བ། སྡོང་བུའི་རྩ་བ་བརྟན་པས་བསམ་གཏན་གྱི་རྩ་བ་བརྟན་པ། སྡོང་བལ་རིམ་པ་གསུམ་དུ་དཀྲིས་བས་ཚུལ་ཁྲིམས་དང་། བཟོད་པ། བརྩོན་འགྲུས་གསུམ། མར་ཁུ་མེར་གྱིས་བཀང་བས་སྦྱིན་པ་སྟེ་ཕར་ཕྱིན་དྲུག་མཚོན། ཡང་འཇུ་མི་ཕམ་གྱིས། སྣོད་ཀོང་བུ། བཅུད་མར་ཁུ། རྒྱུད་རྣམ་ཤེས་མར་མེ། སྟོང་བ་སྣོད། གསལ་བ་མར་ཁུ། ཟུང་འཇུག་མར་མེ། ལུས་རྩ་ཡི་རྐོང་བུ། དྭངས་མ་ལྔ་མར་ཁུ། མི་ཤིགས་ཏིལ་ཀ་མར་མེ་སོགས་གཞི་ལམ་འབྲས་བུའི་མཚོན་དོན་ཁྱད་པར་ཅན་ཡོད་པར་གསུངས་སོ། །

༥ ཕན་ཡོན་ནི། མདོ་སྡེ﹝ཚ﹞དུམ་པ་ལས། འཕགས་པ་མར་མེ་འབུལ་བ་ཞེས་བྱ་བའི་ཐེག་པ་ཆེན་པོའི་མདོ་ལས། སྦྱོར་བ་ཕུན་སུམ་ཚོགས་པས་ཐ་ན་མར་མེ་སྙིང་བོ་ཆུང་ངུ་འམ་ངན་པ་ཞིག་འབྲུ་མར་གྱིས་བསྐུས་སམ། མར་གྱིས་བསྐུས་ཏེ་འབུལ་ལམ། ངེས་པར་འབུལ་ལམ། འཇོག་པར་བྱེད་པ་དང་། དགེ་བ་དོན་དུ་གཉེར་བས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཕྱི་མའི་མཐའི་སྐྱེ་བའི་འཁོར་བ་སྤངས་པ། དེ་ལྟར་བྱུང་ན། ཚུལ་ཁྲིམས་དང་། ཏིང་འཛིན་དང་། ཤེས་རབ་དང་། རྣམ་པར་གྲོལ་བ་སོགས་རྒྱ་ཆེར་གསུངས་སོ། །གཞན་ཡང་སེམས་ཀྱི་ངེས་པར་སེམས་པ་གསུམ། འཆི་བའི་དུས་ཀྱི་སྣང་བ་གསུམ་མམ་བཞི། ཟང་ཟིང་མེད་པའི་དགའ་བ་བཞི། འདུན་པ་བཞི། ཡོངས་སུ་དག་པ་བཞི། ཆོས་ཀྱི་མཆོག་བརྒྱད། སོ་སོ་ཡང་དག་བཞི་སོགས་འཐོབ་པར་གསུངས་སོ། །མར་མེ་ཕུལ་བས་མངོན་ཤེས་འགྲུབ་པ་དང་། ཆོས་ཀྱི་མིག་རྣམ་པར་དག་པ་འཐོབ་པ། ཁྱད་པར་དུ་མ་རྒྱུད་ཀྱི་གཏུམ་མོའི་རྣལ་འབྱོར་ལ་བརྟེན་ནས། བདེ་ཆེན་འོད་གསལ་གྱི་ཡེ་ཤེས་འདྲེན་པ། གཟུགས་མཛེས་པར་འོང་བ། ལུས་ལ་འོད་སྣང་རྒྱས་པ། ཞེས་དང་། རིན་ཆེན་ཕྲེང་བར། མཆོད་རྟེན་མར་མེ་ཕྲེང་བ་དང་། །མུན་ཁུང་དག་ཏུ་སྒྲོན་མེ་དང་། །མར་མེ་འབྲུ་མར་བྱིན་པ་ཡིས། །ལྷ་ཡི་མིག་ནི་འཐོབ་པར་འགྱུར། །ཞེས་དང་། གཞན་ཡང་། ལས་རྣམ་འབྱེད་ཀྱི་མདོ་ལས། དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བའི་ཕན་ཡོན་བཅུ་གསུངས་སོ། །

མདོ་ལས། མར་མེ་ཅུང་ཟད་ཞིག་ཕུལ་བ་དེའི་བསོད་ནམས་སངས་རྒྱས་བཅོམ་ལྡན་འདས་ཁོ་ན་མ་གཏོགས། འཇིག་རྟེན་ན་སུས་ཀྱང་བསྟན་མི་ནུས་པར་གསུངས་པ་བཞིན། འདིར་མར་མེ་ཕན་ཡོན་ལ་མཁོ་བའི་སྔོན་གྱི་བྱུང་བ་ཞིག་བཀོད་ན། སངས་རྒྱས་མཉན་ཡོད་དུ་བཞུགས་པའི་ཚེ། དགེ་སློང་གི་དགེ་འདུན་རྣམས་ལ་མཆོད་པ་རྣམ་པ་སྣ་ཚོགས་ཀྱིས་རབ་ཏུ་མཆོད་དོ། །དེའི་ཚེ་ཡུལ་དེ་ན། དབུལ་མོ་བསྙེན་དགའ་མོ་བྱ་བའི་བུད་མེད་ཅི་ཡང་མི་བདོག་པ་ཞིག་མཆིས་པ་ལས། རྒྱལ་བོ་དང་བློན་པོ་སོགས་ཀྱིས། བཅོམ་ལྡན་འདས་དང་དགེ་སློང་གི་དགེ་འདུན་རྣམས་ལ། མཆོད་པ་རྣམ་པ་སྣ་ཚོགས་ཀྱིས་མཆོད་པར་མཐོང་ནས་འདི་སྙམ་དུ། ཀྱེ་མ་ངས་མི་དགེ་བའི་ལས་ཅི་ཞིག་བྱས་པས་འདི་ལྟར་དབུལ་ཞིང་རིགས་ངན་དུ་སྐྱེས་པར་གྱུར། ད་བསོད་ནམས་ཀྱི་ཞིང་ཕུན་སུམ་ཚོགས་པ་དང་འཕྲད་ཀྱང་། བདག་ལ་ནི་བསོད་ནམས་གསོག་པའི་དངོས་བོ་ཅི་ཡང་མེད་དོ་སྙམ་ནས། ཤིན་ཏུ་ཡི་མུག་ཅིང་། ཉི་མ་གཅིག་གི་རིང་སློང་མོ་བྱས་ཀྱང་དོང་ཙེ་གཅིག་ལས་མ་རྙེད་དོ། །དེ་ནས་བསྙེན་དགའ་མོ་མར་འཚོང་ཁང་ཞིག་གི་ཁྱིམ་དུ་སོང་སྟེ། དོང་ཙེ་གཅིག་པུས་མར་ཉོས་པས། མར་འཚོང་བའི་ཁྱིམ་བདག་གིས་སྨྲས་པ། དོང་ཙེ་གཅིག་གིས་མར་ཉོ་བ་ནི་ཧ་ཅང་ཉུངས་ཆེས་པས། ཁྱོད་ལ་འདི་ལྟ་བུའི་མར་ཉུང་ངུ་ཞིག་གིས་ཅི་ཞིག་བྱ། བསྙེན་དགའ་མོས་སྨྲས་པ། རྒྱལ་བོ་དང་བློན་པོ། ཁྱིམ་བདག་དད་པ་ཅན་རྣམས་ཀྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་མཆོད་པ་རྣམ་པ་སྣ་ཚོགས་ཀྱིས་མཆོད་ཅིང་ཚོགས་རྒྱ་ཆེན་པོ་གསོག་པར་བྱེད་དོ། །ཁོ་མོ་ནི་འདི་ལྟར་དབུལ་ཞིང་ཕོངས་ཆེ་བས། བསོད་ནམས་བྱ་བའི་དངོས་བོ་གཞན་ཅི་ཡང་མེད་པས། ཉི་མ་གཅིག་ལ་སློང་མོ་བྱས་པ་ལས་ཐོབ་པའི་དོང་ཙེ་གཅིག་པོ་འདིས། སངས་རྒྱས་དང་དགེ་འདུན་ལ་མཆོད་པའི་ཕྱིར་མར་ཉོ་བ་ཡིན་ནོ། །ཞེས་སྨྲས་པ་དང་། ཁྱིམ་བདག་གིས་ཀྱང་སྙིང་རྗེ་ནས་མར་ལྷག་པར་བྱིན་ནོ། །དེ་ནས་བསྙེན་དགའ་མོས་མར་དེ་ཐོབ་པར་རབ་ཏུ་དགའ་ནས་གཙུག་ལག་ཁང་དུ་སོང་སྟེ། བཅོམ་ལྡན་འདས་ཀྱི་སྤྱན་སྔར་མར་མེ་ཆུང་ངུ་ཞིག་བཙུགས་ནས། བདག་ད་ལྟ་དབུལ་ཞིང་ཕོངས་པས། མར་མེ་ཆུང་ངུ་འདིས་སངས་རྒྱས་ལ་མཆོད་དོ། །བསོད་ནམས་འདིས་མ་འོངས་པའི་དུས་ན་བདག་ཤེས་རབ་གྱི་མར་མེ་དང་ལྡན་ནས། སེམས་ཅན་ཐམས་ཅད་ཀྱི་མུན་པའི་དྲི་མ་བསལ་བར་ཤོག་ཅིག ཅེས་སྨོན་ལམ་བཏབ་ནས་རང་གི་གནས་སུ་སོང་ངོ་། །དེའི་ཚེ་འཕགས་པ་མོའུ་འགལ་གྱི་བུ་ཆེན་པོ་དུས་འཛིན་པའི་རེས་ལ་བབ་པས། ནངས་སྔ་མོར་གཟིམ་ལས་ལྡང་བ་ན། མར་མེ་གཞན་རྣམས་ནི་ཤི་ཟིན་ཀྱང་། བསྙེན་དགའ་མོའི་མར་མེ་གཅིག་པུ་ནི་ལྷག་པར་གསལ་ཞིང་། མར་དང་སྙིང་བོ་ཡང་མ་ཉམས་པར་གསར་དུ་བཙུགས་མ་ཐག་པ་ཞིག་དང་འདྲ་བས། ད་ནི་ནམ་ལངས་ཟིན་པའི་ཉིན་པར་མར་མེ་བཙུགས་ཀྱང་ཕན་པ་མེད་དོ་སྙམ་ནས་གསད་པར་གཟས་བས་མ་སོད་དོ། །དེ་ནས་ལག་པས་གསད་པར་གཟས་ནའང་མ་སོད་དོ། །དེ་ནས་གོས་ཀྱིས་གསད་པར་གཟས་ནའང་མ་སོད་པ་བཅོམ་ལྡན་འདས་ཀྱིས་གཟིགས་ནས། བཀའ་བསྩལ་བ། ཁྱོད་ཀྱིས་མར་མེ་འདི་གསོད་པར་གཟས་ཀྱང་མར་མེ་འདི་ནི་ཁྱོད་ཀྱིས་མི་སོད་དོ། །ཁྱོད་ཉན་ཐོས་རྣམས་ཀྱིས་བསྒུལ་ཞིང་བསྐྱོད་པར་ནུས་པའང་མ་ཡིན་ནོ། །གལ་ཏེ་ཁྱོད་ཀྱིས་རྒྱ་མཚོ་ཆེན་པོ་བཞིའི་ཆུ་ཕབ་བམ་རྫི་རླུང་གཡུག་པས་ཀྱང་སོད་པར་མི་འགྱུར་རོ། །མར་མེ་འདི་ལྷག་པའི་བསམ་པ་རྒྱ་ཆེན་པོ་བསྐྱེད་ནས་ཕུལ་བ་ཡིན་པས། མར་མེ་འདི་ལ་བསོད་ནམས་དཔག་ཏུ་མེད་པ་འབྱུང་བར་འགྱུར་རོ། །ཞེས་བཅོམ་ལྡན་འདས་ཀྱིས་མར་མེ་ཆུང་ངུ་དེའི་བསྔགས་པ་བརྗོད་པ་བསྙེན་དགའ་མོས་ཐོས་ནས། བཅོམ་ལྡན་འདས་ཀྱི་དྲུང་དུ་འོང་སྟེ། ཞབས་ལ་སྤྱི་བོས་ཕྱག་འཚལ་བ་དང་། བཅོམ་ལྡན་འདས་ཀྱིས་ཁྱོད་མ་འོངས་པའི་དུས་བསྐལ་བ་གྲངས་མེད་པ་གཉིས་འདས་ནས་མངོན་པར་རྫོགས་པའི་སངས་རྒྱས་ཏེ། མཚན་ཡང་མར་མེ་འོད་ཅེས་བྱ་བར་འགྱུར་རོ། །ཞེས་ལུང་བསྟན་ཏོ། །དེ་ལྟར་དབུལ་མོ་བསྙེན་དགའ་མོས་མར་མེ་གཅིག་ཕུལ་བའི་སངས་རྒྱས་སུ་ལུང་བསྟན་ཏོ་ཞེས་ཀུན་ལ་གྲགས་པས། ཡུལ་མི་ཀུན་གྱིས་མཆོད་མེ་ཕུལ་ཏེ་རྒྱལ་བུ་རྒྱལ་བྱེད་ཀྱི་ཚལ་ཡོངས་སུ་གང་བར་གྱུར་ཏེ། མཚན་མོ་ཡང་ཉིན་མོ་ལྟར་གྱུར་ནས་ཞག་བདུན་ལ་ཕུལ་ཏོ། །དེ་ནས་ཀུན་དགའ་བོས་བཅོམ་ལྡན་འདས་ཀྱིས་སྔོན་ལས་ཅི་ཞིག་བགྱིས་ནས་འདི་ལྟ་བུའི་མར་མེ་ཕུལ་བ་དང་ལྡན་པར་གྱུར་ཞེས་གསོལ་བ་དང། བཅོམ་ལྡན་འདས་ཀྱིས་བཀའ་བསྩལ་བ། སྔོན་དེ་བཞིན་གཤེགས་པ་རིན་ཆེན་གཙུག་ཕུད་ཅན་ཞེས་བྱ་བ་འཇིག་རྟེན་དུ་འཚོ་ཞིང་བཞེས་པའི་ཚེ། དགེ་སློང་འཕགས་པའི་གཉེན་ཞེས་བྱ་བ་ཞིག་གིས་ཟླ་བ་གསུམ་ལ་མར་མེ་ཕུལ་བའི་ཡོན་བདག་ཏུ་ཁས་བླངས་ནས། ཚོང་དཔོན་དང་། ཁྱིམ་བདག་དང་། མི་མང་བོ་ལས་མར་དང་། འབྲུ་མར་དང་། མར་མེའི་སྙིང་བོ་བསླངས་སོ། །དེའི་ཚེ་རྒྱལ་བོའི་བུ་མོ་ཐུབ་པ་ཞེས་བྱ་བས། དགེ་སློང་དེ་ཉི་མ་རེ་རེ་བཞིན་གྲོང་དུ་རྒྱུ་ཞིང་དཀའ་ལས་མང་བོ་བྱེད་པ་མཐོང་ནས། བཙུན་པ་ཁྱེད་ཀྱིས་ཅི་ཞིག་སྒྲུབ་ན། རྟག་པར་འདི་ལྟ་བུའི་བྲེལ་བ་ཆེ་བར་འགྱུར་ཞེས་དྲིས་པས། འཕགས་པའི་གཉེན་གྱིས་ཇི་ལྟར་གྱུར་བའི་གཏམ་རྒྱས་པར་བཤད་དོ། །བུ་མོས་སྨྲས་པ། དེང་ཕྱིན་ཆད་ཁྱོད་ཀྱིས་དེ་ལྟར་འབད་པས་འཚོལ་མི་དགོས་ཀྱི། ཅི་འདོད་པའི་ཡོ་བྱད་ཁོ་མོས་སྦྱོར་རོ་ཞེས་ཞུས་སོ། །དེ་ནས་ཟླ་བ་དྲུག་ཚང་བར་གྱུར་བའི་ཚེ་བཅོམ་ལྡན་འདས་ཀྱིས་དགེ་སློང་འཕགས་པའི་གཉེན་བསྐལ་བ་གྲངས་མེད་པ་གཅིག་འདས་ནས་མར་མེ་མཛད་ཅེས་བྱ་བར་སངས་རྒྱས་པར་ལུང་བསྟན་པས། རྒྱལ་བོའི་བུ་མོའི་བསམ་པར། དགེ་སློང་འདི་ནི་མ་འོངས་པར་སངས་རྒྱས་མར་མེ་མཛད་དུ་ལུང་དུ་བསྟན་ན། ཡོ་བྱད་ཁོ་མོས་སྦྱར་ཡང་ང་ནི་ལུང་མ་བསྟན་ཏོ་སྙམ་མོ། །བཅོམ་ལྡན་འདས་ཀྱིས་བུ་མོ་དེའི་བསམ་པ་མཁྱེན་ནས། བུ་མོ་ཁྱོད་མ་འོངས་པའི་དུས་བསྐལ་བ་གྲངས་མེད་པ་དགུ་བཅུ་རྩ་གཅིག་འདས་པ་ན། མངོན་པར་རྫོགས་པར་འཚང་རྒྱ་སྟེ། མཚན་ཡང་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་སོགས་ཕན་ཡོན་བསམ་གྱིས་མི་ཁྱབ་བོ། །

༦ ལག་ལེན་མ་དག་པའི་ཉེས་པ་ནི། སྣོད་གཙང་མར་མ་ཕྱིས་པས་ཕྱི་མར་གཟུགས་མི་སྡུག་པར་སྐྱེས། སེར་སྣ་ཤོར་བས་ཡི་དྭགས་སུ་སྐྱེས། མར་ཁུ་རུལ་སྙིགས་དང་ས་རྡུལ་གྱིས་སྦགས་པས་དུད་འགྲོར་སྐྱེས་པ་སོགས་སོ། །

གཞན་ཡང་། མར་མེ་ལ་འོད་ཁང་ལྕགས་དྲས་གཡོགས་པ་སོགས་ཐབས་ཤེས་མ་བསྟེན་པར། ཕྱེ་ལེབ་སོགས་སེམས་ཅན་མང་བོ་འཚེད་པ་ནི་ཕན་ཡོན་ལས་ཉེས་དམིགས་ཆེ་བས། དཀོན་མཆོག་མཉེས་པ་ལས་ལྡོག་པ་སྟེ། མཁས་དབང་ངག་དབང་བློ་བཟང་མཁས་གྲུབ་ཀྱི་མཆོད་གཏོར་བཤམས་ཚུལ་བསོད་ནམས་སྒོ་འབྱེད་ལས། དེང་སང་ཕལ་མོ་ཆེས་དབྱར་དུས་སུ་རྟེན་གྱི་དྲུང་དུ་མར་མེ་ཆེ་ཆུང་རྣམས་འོད་ཁང་མེད་པར་བཞག་པ་དེའི་ནང་དུ་ཕྱེ་ལེབ་སོགས་སྲོག་ཆགས་ཕྲ་མོ་བརྒྱ་སྟོང་དུ་མ་པད་མོའི་མཚོ་ལ་ངང་བའི་ཁྱུ་བཞིན་འཁོར་ཞིང་འོང་ནས་ལྷུང་ཞིང་འཚེད་པ་ནི། ཇི་ལྟར་དམྱལ་བའི་ཟངས་ཞུན་བསྐོལ་བར་དེའི་སེམས་ཅན་ཆར་བཞིན་དུ་བབས་ཤིང་འཇུག་པའི་ངང་ཚུལ་ལྟར་གྱུར་བས་ན། རྟེན་གྱི་དྲུང་དུ་སེམས་ཅན་མང་བོ་གསོད་པའི་སྟ་གོན་ཤེས་བཞིན་དུ་བཤམས་ནས། ཤི་རོ་དུ་མས་མཆོད་མེ་རྨེ་བར་བྱེད་པ་སོགས་ལ་ཅི་ཡང་མི་སེམས་པར། ད་དུང་སྲོག་ཆགས་དེ་རྣམས་ལ་ཚིག་པ་ཟོས་ནས་སེམས་ཅན་ལས་ཀྱིས་ཤི་བ་ཐབས་ཅི་ཡོད་སྙམ་དུ་སེམས་ཤིང་སྨྲ་བར་བྱེད་པ་དག་གིས། ཕྱུགས་བསད་མཆོད་སྦྱིན་གྱི་གཟུགས་བརྙན་ལྟ་བུའི་མཆོད་མེ་སྦར་བ་ལས་ཕན་ཡོན་ཆེན་པོ་མི་འཐོབ་ཀྱི། སེམས་ཅན་གྱི་སྲོག་ཡལ་བར་དོར་བའི་བསམ་པ་དང་། སངས་རྒྱས་ཀྱི་བཅས་པ་འོད་ཁང་མེད་པར་མར་མེ་བཞག་མི་རུང་བར་གསུངས་པའི་བཀའ་ལ་བསམ་བཞིན་ཁྱད་དུ་བསད་པའི་མི་དགེ་བ་ཆེན་པོ་གསོག་པར་འགྱུར་རོ། །མདོར་ན། ཕྱི་ནང་གི་གཙང་སྦྲ་གང་ཐོན་གྱི་ངོས་ནས་མཆོད་གཏོར་རྣམས་ཚུལ་བཞིན་དུ་བཤམས་འཕྲལ། ཆབ་ཀྱིས་བྲན་ལ་བསངས་ཀྱིས་བདུག གྲིབ་སྲུང་གི་རྫས་ཀུ་ཤ་དང་རྨ་བྱའི་སྒྲོ་སོགས་ཉེ་འཁོར་དུ་བཞག བགེགས་མི་འཇུག་པའི་ཆེད་དུ་མདོ་སྔགས་གང་རིགས་ཀྱིས་བྱིན་རླབས་བྱ། ཞེས་གསུངས་སོ། །

༧ གློག་མཆོད་དང་འོད་སྣང་འབུལ་ཚུལ། ལམ་རིམ་ཆེན་མོ་ལས། མར་མེ་ནི་སྤོས་མར་ལ་སོགས་པའི་དྲི་ཞིམ་ཞིང་འོད་གསལ་བ་དང་། རིན་ཆེ་བའི་ནོར་བུའི་འོད་གསལ་བའོ། །ཞེས་ཡང་སྙིང་སྨྲས་ན་འོད་འབུལ་བ་ལགས་པས། ཉི་ཟླ་སྐར་གསུམ་དང་། ནོར་བུ་འོད་ཅན། གློག་སྒྲོན་སྣ་ཚོགས་སྟེ། མདོར་ན། འོད་ཅན་གྱི་རྫས་ཇི་སྙེད་མཆིས་པ་ཀུན། སྣང་གསལ་གྱི་མཆོད་པར་འགྲོ་བས། དཀོན་མཆོག་གི་ཞིང་དུ་ཕུལ་ན། ཕན་ཡོན་ཆེན་པོ་འབྱུང་ངོ་། །གློག་འོད་འབུལ་དུས། གུང་ཐང་བསྟན་པའི་དབང་ཕྱུག་གིས། ཉི་ཟླའི་འོད་ལྟར་གསལ་ལ་མུན་སེལ་ཞིང་། །ཚིག་པའི་དྲི་དང་དུ་བས་བསྣོགས་པ་མེད། །གཙང་ཞིང་ཡིད་འོང་གློག་གི་སྒྲོན་མེ་འདི། །རྒྱལ་བ་སྲས་དང་བཅས་ལ་གུས་པས་འབུལ། །སྟོང་གསལ་ཆོས་དབྱིངས་མཁའ་ལས་བྱུང་བ་ཡི། །དྭངས་གསལ་མ་འདྲེས་ཡེ་ཤེས་འོད་འབར་བ། །ཏིང་འཛིན་འཕྲུལ་གྱིས་བཀུགས་པའི་གློག་འོད་འདིས། །མ་རིག་འཁོར་བའི་རྩ་བ་གཞོམ་གྱུར་ཅིག། ཅེས་སྨོན་ཚིག་འདོན་པ་འམ། ཡང་ན། ཕྱོགས་བཅུའི་སངས་རྒྱས་ལ་མཆོད་པའི་མོས་པ་དང་བཅས། ཨོཾ་བཛྲ་དྷ་རྨ་ཨཱ་ལོ་ཀེ་ཨཱཿཧཱུཾ། བཏོན་ན་ལེགས་སོ། །

༨ མར་མེ་བརྟག་ཐབས། མར་མེ་བརྟག་ཐབས་ལ་རྒྱུད་དང་མན་ངག་གི་བརྟག་པ་རེ་ཟུང་། པ་རི་ལོ་ཙཱས་བསྒྱུར་བའི་མར་མེའི་བརྟག་པ་ཉུང་ངུའང་མཆིས་ལ། དར་མོ་སྨན་རམས་པའི་གདམས་ངག་བཀའ་རྒྱ་མ་ལས་འབྱུང་བ་འདིར་ཆ་ཚང་བཀོད་ན། ཨོཾ་ཨ་ཐཿ འགྲོ་བ་རྨོངས་པའི་མུན་སེལ་བའིཿ མར་མེ་མཛད་དཔལ་ཞབས་ལ་འདུདཿ མར་མེའི་བརྟགས་ཐབས་བསྟན་པ་ལཿ དང་པོ་གདམས་པ་ཆིག་རྒྱུད་རྒྱཿ མར་ཀོང་སྡོང་རས་གསུམ་པོ་ལཿ སྔགས་འདི་བརྒྱ་རྩ་བརྒྱད་བཏབ་སྟེཿ ཨོཾ་བྷ་ན་རི་མེ་ཐཱ་ཧཱཿ གཙང་སྦྲ་ལྡན་པ་ཕུལ་ན་ནིཿ རང་གི་འདོད་ཡོན་གང་ཡིན་གྱིཿ བཟང་ངན་རྟགས་རྣམས་སྟོན་དུ་གསོལཿ ཞེས་བརྗོདཿབཟང་བའི་རྟགས་དྲུག་ལཿ ཕྲ་ཞིང་དཀར་ལ་ལྡེམ་པ་ནིཿ མི་ནུབ་རྒྱལ་མཚན་ཐོབ་པའི་རྟགསཿ དཀར་གསལ་རྩེ་མོ་གསུམ་པ་ནིཿ མི་འགྱུར་གཡུང་དྲུང་ཐོབ་པའི་རྟགསཿ གསལ་ཞིང་ཟླུམ་པ་པདྨ་འདྲཿ ཆོས་སྐུ་མི་འགྱུར་ཐོབ་པའི་རྟགསཿ གསལ་ཞིང་རྒྱལ་མཚན་དབྱིབས་འདྲ་ནཿ དཔལ་དང་བཀྲ་ཤིས་ཐོབ་པའི་རྟགསཿ དཀར་ཞིང་ལྡེམ་པ་གསལ་བ་ནིཿ ཆོས་དབྱིངས་མི་གཡོ་ཐོབ་པའི་རྟགསཿ མར་མེ་དམར་ཞིང་པདྨ་འདྲཿ ཚེ་དང་བསོད་ནམས་འཕེལ་བའི་རྟགསཿ དེ་རྣམས་བྱུང་ན་བཟང་པོ་ཡིནཿ

ངན་པའི་རྟགས་ནི་འདི་ལྟར་རོཿ དུ་བ་ཆེ་ཞིང་མི་གསལ་ནཿ ལས་སྒྲིབ་ཆེན་པོ་ཡོད་པའི་རྟགསཿ བཤགས་པ་བྱ་ཞིང་དགེ་ལ་འབདཿ ཚག་སྒྲ་ཆེ་ཞིང་མེ་སྟག་འཕྲོཿ ཕུགས་སུ་གདོན་བགེགས་ཞུགས་པའི་རྟགསཿ བསྙེན་སྒྲུབ་བྱེད་ཅིང་བཟློག་པ་བྱཿ མེ་ལྕེ་དུམ་བུར་ཆད་པ་ནིཿ རྐྱེན་ངན་བར་ཆད་འོང་བའི་རྟགསཿ ཚེ་སྒྲུབ་ཚེ་དབང་སྤངས་དག་གཏོངཿ མེ་ལྕེ་ལྷབ་ལྷུབ་འབར་བ་ནིཿ དགྲ་རྐུན་མྱུར་དུ་འོང་བའི་རྟགསཿ བཟློག་པ་སྟོབས་པོ་ཆེ་ལ་འབདཿ འོད་མེད་སྡོང་རོ་ཆེ་བ་ནིཿ ནད་པ་འཆིའམ་རིམས་ནད་འབྱུང་ཿ འཆི་ངོས་སྲོག་བླུ་ཉེའུ་འདོན་བྱཿ མར་མེ་སྤུང་སྤུང་བསྐྱིལ་བ་ནིཿ གོད་ཁ་གཏོར་བརླག་ཡོང་བའི་རྟགསཿ མགོ་ཚིག་སྟོར་བའི་ངོ་ཡིན་པསཿ རིམ་གྲོར་བཟློག་པ་གང་མང་བྱཿ དེ་ལྟར་མར་མེ་བརྟགས་ཚུལ་ནིཿ མདོར་བསྡུས་ཙམ་བྲིས་དགེ་བ་འདིསཿ མི་ཤེས་མུན་འཐིབ་འགྲོ་བའི་བློཿ ཤེས་རབ་འོད་ཀྱིས་གསལ་བར་ཤོགཿ མཐའ་མ་དམ་ལྡན་སློབ་བུས་རྒྱཿ དར་མོ་སྨན་རམས་པའི་གདམས་ངག་བཀའ་རྒྱ་མ་ལགས་སོཿ བཀྲ་ཤིསཿ ཞེས་འབྱུང་ངོ་། །

གཞན་ཡང་མར་མེ་བརྟག་པ་བྱ་ཚུལ་གཏེར་སྟོན་སངས་རྒྱས་གླིང་བའི་གཏེར་བྱོན་མར་མེ་པྲ་བརྟག་དང་། འཇུ་མི་ཕམ་གྱི་བརྟག་པ་སྣ་ཚོགས་ཀྱི་སྐོར་ནོར་བུའི་མེ་ལོང་ལས་རི་མོ་དང་བཅས﹙ལྕགས་པར་དེབ་གྲངས་བཅུ་དགུ་ཤོག་ངོས༢༩༢ནས༣༠༠ བར﹚པ་གསལ་བར་བཀོད་ཡོད་པས། ཤེས་འདོད་པ་དག་གིས་དེ་དག་ཏུ་གཟིགས་པ་ལས། འདིར་ཡི་གེ་མང་དུ་འཇིགས་ནས་མ་བཀོད་ལ། འདིར་བསྡུས་ཙམ་ཁོལ་དུ་ཕྱུང་ནས་བཀོད་ན། འོད་གསལ་ན་ནད་མེད། མི་གསལ་ན་ནད་ངོ་དང་གྲིབ་ངོ་ཡིན། རླུང་དང་རྐྱེན་མེད་སར་མར་མེ་ཤི་ན་ངེས་པར་ཤི་ཆད་འོང་། ཆུ་སོང་བ་ལྟར་ཚག་སྒྲ་དང་བཅས་འབར་དཀའ་ན་བར་ཆད་ཆེ། ཕྱོགས་སུ་རླུང་དྲག་པོས་བཏབ་པ་ལྟར་མེ་ལྕེ་ཆད་ཅིང་བསྐྱོད་ན། འཚུབ་ཆེ་བས་རིམ་གྲོར་འབད། འུར་ཟིང་གི་ངོ་ཡང་ཆེ། རྩེ་མོ་བཅད་པ་ལྟ་བུ་མི་གསལ་ཞིང་ཐུང་ན་ཕོ་ལྷ་མནོལ། ངོ་སོ་དམའ། དབྱིབས་རྩེ་རྣོ་ཞིང་རིང་ལ་མཛེས་པ་དང་། རྒྱལ་མཚན་དང་བཀྲ་ཤིས་པའི་རྫས་འདྲ་ན་ཤིན་ཏུ་བཟང་། དཀར་བོ་སོགས་ཀྱི་མདངས་ལྡན་གསལ་ན་ཞི་སོགས་ལས་འགྲུབ། འབར་ཡུན་རིང་ན་སྲིས་སྨེ་ཞིང་བཟང་། དཀྱིལ་སྔོ་ནག་ལ་སྡོང་བུ་རྩེ་མོ་དམར་བར་ནག་ཐིང་ངེ་འདུག་ན་བློ་འགྱོད་ཆེ། མེ་སྟག་དམར་ཚིག་གེ་བ་མི་གསལ་ན་ན་ངོ་དང་གྱོད་ངོ་ཡིན། རྩེ་མོ་ཐུར་དུ་གུག་ཉམས་ལྟར་མི་གསལ་ན་མནན་པ་སོགས་གཉའ་ནོན་ཡོད། སྟབ་སྟབ་ཟེར་ཞིང་འོད་ཤིན་ཏུ་བཟང་ལ་ཡིད་དུ་འོང་བར་འབར་ན་བཀྲ་ཤིས་འཕེལ། དེ་ལ་མེ་ཏོག་ཆགས་ཤིང་འོད་གསལ་ན་དགེ་མཚན་གྱི་ངོ་ཡིན། ཞེས་གསུངས་སོ། །

མ་ཎི་འཁོར་ལོ།

༡ མ་ཎི་འཁོར་ལོའི་ཁུངས། དམ་ཆོས་པད་དཀར་ལས། གསང་སྔགས་རིག་སྔགས་གཟུངས་སྔགས་ཀུན། །བཟླས་བརྗོད་གཙོ་བོར་མ་བྱས་ཀྱང་། །འཁོར་ལོ་བསྐོར་བའི་ལས་སྦྱོར་དག། ཕུན་སུམ་ཚོགས་པས་འགྲུབ་པར་འགྱུར། །གསང་སྔགས་ཡིག་འབྲུར་བྲིས་པ་ནི། །བཏོན་པ་ལས་ཀྱང་བསྐོར་བ་མཆོག། གང་གང་བྲིས་པ་དེ་དག་ནི། །ཚེགས་མེད་ཉིད་དུ་འགྲུབ་པར་འགྱུར། །ཞེས་དང་། པད་ཕྲེང་གི་རྒྱུད་ལས། འཁོར་ལོ་འདི་ཡིས་དགོས་ཆེད་ནི། །གང་ཞིག་བརྩོན་འགྲུས་མི་ལྡན་པའི། །ཅི་བདེར་གནས་པའི་གང་ཟག་ལ། །འཁོར་ལོའི་མན་ངག་ཤིན་ཏུ་གཅེས། །གཞན་ཡང་། སངས་རྒྱས་པད་མོ་མཆོག་གིས་སྒྲིབ་པ་རྣམ་སེལ་ལ། ཕ་རོལ་ཕྱིན་པ་བཅུ་དང་ནི། །སྡེ་སྣོད་གསུམ་དང་རྒྱུད་སྡེ་བཞི། །བསྐལ་བའི་བར་དུ་འཆད་ཉན་ལས། །ཆོས་འཁོར་ལན་གཅིག་བསྐོར་བ་མཆོག །ཞེས་དང་། གཞན་རྒྱལ་བ་དགོངས་འདུས་སོགས་སུའང་གསུངས་པ་རྣམས་མ་ཎི་འཁོར་ལོའི་ཁུངས་ཡིན་ནོ། །

གཞན་ཡང་། གུང་ཐང་བསྟན་པའི་སྒྲོན་མེས། འདིའི་ཁུངས་ནི་རྒྱུད་སྡེ་བཞི་ཀ་ནས་ལྷ་རང་རང་གི་སྔགས་བགྲང་བ་དང་། སྔགས་འཁོར་ལོ་ལ་བྲིས་ཏེ་ཕྱིའི་འབྱུང་བ་དང་། རང་གི་ལག་པས་བསྐོར་བ་ལ་བརྟེན་ནས་ཞི་རྒྱས་དབང་དྲག་གི་ལས་མཐའ་ཡས་པ་འགྲུབ་པར་གསུངས་པ་ལ་བརྟེན་ནས། རྒྱ་བོད་ཀྱི་མཁས་གྲུབ་མཐའ་དག་གིས་རང་གི་ཕྱག་དང་མདུན་དུ་བཞག་པ་སོགས་ཀྱིས་བསྐོར་བ་དང་། དགོན་གྲོང་ཐམས་ཅད་དུ་མ་ཎི་བཞུགས་ཡུལ་གྱི་གཙུག་ལག་ཁང་བཞེངས་པ། མཁས་བླུན་སྐྱེ་བོ་མཐའ་དག་ལ་ཕན་པའི་ཐབས་བསམ་གྱིས་མི་ཁྱབ་པ་ཡིན་པར་གསུངས་སོ། །

༢ མ་ཎི་བོད་ཀྱི་ཆོས་སྐལ་དུ་གྱུར་ཚུལ། འཕགས་མཆོག་སྤྱན་རས་གཟིགས་དབང་གིས་སངས་རྒྱས་འོད་མཛད་ཡེ་ཤེས་ཏོག་གི་སྤྱན་སྔར་ཐུགས་བསྐྱེད། སངས་རྒྱས་འོད་དཔག་མེད་ཀྱི་སྤྱན་སྔར་དམ་བཅས་ཤིང་སྨོན་ལམ་ཆེན་པོ་གྲངས་མེད་བཏབ་པ་དང་། ཁྱད་པར་དུ་སྟོན་པ་འདིའི་སྤྱན་སྔར་འདས་པའི་སངས་རྒྱས་རྣམས་ཀྱིས་ཀྱང་མ་ཐུལ། མ་འོངས་པའི་སངས་རྒྱས་རྣམས་ཀྱིས་ཀྱང་གདུལ་བར་མི་འགྱུར་བའི་མཐའ་འཁོབ་བོད་ཁ་བ་ཅན་གྱི་སེམས་ཅན་རྣམས་འདུལ་བའི་དམ་བཅས་པར་བརྟེན། འཕགས་པ་ཐུགས་རྗེ་ཆེན་པོ་བོད་ཀྱི་ལྷ་སྐལ་དང་། མ་ཎི་ཡི་གེ་དྲུག་མ་བོད་ཀྱི་ཆོས་སྐལ་དུ་གྲགས་པའི་གནད་ཀྱང་འདི་ལ་ཐུག་ཡོད། འཕགས་མཆོག་འདིའི་སྨོན་ལམ་གྱི་དབང་གིས། རང་ཅག་ལ་ལྷ་གཞན་ལས་བྱིན་རླབས་མྱུར་བ་དང་། གཟུངས་སྔགས་གཞན་ལས་ཡི་གེ་དྲུག་མ་འདི་ཉིད་འགྲུབ་སླ་བ་ཡིན། ཚུལ་འདི་ལ་དགོངས་ནས་ཡབ་རྗེ་བླ་མས། གསུང་ཡི་གེ་དྲུག་མ་ནུས་མཐུ་ཆེ། །ངག་དལ་བ་མེད་པར་འདྲེན་པ་གཅེས། །གསུངས་ལ། གུང་ཐང་བསྟན་པའི་སྒྲོན་མེས་ཀྱང་། གཟུངས་ཡིག་དྲུག་ཚར་གཅིག་བཏོན་ན་ཡང་། །དེ་འཇིག་རྟེན་ཕྱི་མའི་ལམ་རྒྱགས་ཡིན། །ཆོས་གཅིག་ལ་བྱིན་རླབས་ཆེ་བ་དེ། །སྔགས་གཟུངས་མཆོག་ཡི་གེ་དྲུག་མ་ཡིན། །ཁོང་བྱིས་པ་ཚུན་ཆད་ཤེས་པ་དེ། །ངེད་བོད་ཀྱི་ཆོས་སྐལ་ཡིན་པའི་རྟགས། །ཞེས་དང་། འབྲི་གུང་གྲུབ་ཐོབ་གངས་རི་རྡོར་འཛིན་ཀུན་དགའ་གྲགས་པ་མ་ཕམ་གྱི་མཚོ་འགྲམ་དུ་ཕེབས་ནས་མཚོ་བདག་དམ་ལ་བཏགས་ནས། མཚོའི་ནང་ནས་རྡེའུ་ཕྱག་གང་བླངས་པའི་ནང་དུ་རྡོ་ནག་པོའི་ལྡེབས་ལ་རྡོ་དཀར་གྱི་ཡིག་དྲུག་རང་བྱོན་བཟོ་བོ་མཁས་པས་བསྐྲུན་པ་ལྟ་བུ་ཕྱག་ཏུ་བྱུང་བ་དེ་ཀླུ་རྒྱལ་མ་དྲོས་པས་ཕུལ་བར་གྲགས་པ། ད་ལྟ་ལ་དྭགས་སྒང་སྔོན་གྱི་ནང་རྟེན་དུ་བཞུགས་པ་སོགས་ཆོས་སྐལ་དུ་སྨིན་པ་མང་དུ་ཡོད། ཨོཾ་མ་ཎི་པདྨེ་ཧཱུཾ་ཞེས་པ་འདི་དོན་བསྒྱུར་བྱས་ན། ཀྱེ་ནོར་བུ་པདྨ་སྐུ་གསུང་ཐུགས་ཀྱི་དངོས་གྲུབ་སྩོལ་ཞེས་པ་སྟེ། འཕགས་པ་སྤྱན་རས་གཟིགས་ལ་ཉེ་ཚིག་གིས་བོས་ཏེ་དངོས་གྲུབ་ཞུ་བའོ། །

༣ གཟུངས་སྔགས་འདི་བརྒྱུད་ཚུལ། རིག་སྔགས་ཀྱི་རྒྱལ་པོ་འདི་སངས་རྒྱས་སྣང་བ་མཐའ་ཡས་ཀྱིས་འཕགས་པ་ཐུགས་རྗེ་ཆེན་པོ་ལ་གནང་ཞིང་། དེས་སངས་རྒྱས་པདྨའི་མཆོག་དང་། དེ་ལས་སྟོན་པ་ཐུགས་རྗེ་ཅན་ལ་བརྒྱུད་ཅིང་། སྟོན་པ་ཁོང་ཉིད་ཀྱིས་རྡོ་རྗེ་གདན་དང་། བྱ་རྒོད་ཕུང་པོའི་རི། པོ་ཏ་ལ་རྣམས་སུ་འཁོར་འདུས་པ་མང་བོར་སྤྱན་རས་གཟིགས་ཀྱི་མདོ་རྒྱུད་མན་ངག་དང་བཅས་པ་གསུངས་ཤིང་། རང་རེའི་ལྗོངས་འདིར་ཡང་ཆོས་ཀྱི་རྒྱལ་པོ་སྲོང་བཙན་སྒམ་པོས་དམ་པའི་ཆོས་ཀྱི་སྲོལ་གཏོད་དེ་མདོ་སྡེ་དཀོན་མཆོག་སྤྲིན་དང་། ཐུགས་རྗེ་ཆེན་པོའི་མདོ་རྒྱུད་ཉེར་གཅིག གཉན་པོ་གསང་བ་སོགས་བསྒྱུར་ནས་གཟུངས་འདིའི་འཕྲིན་ལས་རྒྱ་ཆེར་དར་རོ། །

དེ་ལྟར། བོད་མི་རྩམ་གཟན་ནམ་ཕྲེང་བཟུང་གི་ལུང་བ་འདིར། རྒྱལ་བློན་ལོ་པཎ་ཕལ་ཆེར་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་གྱིས་ཆོས་སྲིད་བསྐྱངས་ཤིང་། ཐ་ན་ངག་གི་རྒྱན་དང་སྐད་ཆའི་ཁུགས། སྐྱིད་པའི་གླུ་དང་སྡུག་པའི་སྨྲེང་གཏམ་ཚུན་ཆད་དུ་མ་ཎི་ཡིག་དྲུག་གི་མ་ཁྱབ་པ་མེད་པས། ཁ་དཔེར་ཡང་། ཐུགས་རྗེ་ཆེན་པོ་མ་གཏོགས་ལྷ་མེད། ཡི་གེ་དྲུག་མ་མ་གཏོགས་ཆོས་མེད། ལྷ་སྐལ་ཐུགས་རྗེ་ཆེན་པོ་ཡིན། ཆོས་སྐལ་ཡི་གེ་དྲུག་མ་ཡིན། འདུག་ས་ཁ་བ་ཅན་པ་ཡིན། འགྲོ་ས་བདེ་བ་ཅན་པ་ཡིན། ཞེས་སྣོད་བཅུད་ཀྱི་རྒྱན་དུ་གྱུར་བ་ཡིན།

གཞན་ཡང་། སློབ་དཔོན་ཀླུ་སྒྲུབ་སྙིང་བོ་ལ། །འཕགས་པ་སྤྱན་རས་གཟིགས་དབང་གིས། །འདི་ལྟར་ལུང་བསྟན་མཛད་པ་ནི། །ཀླུ་ཡི་ཡུལ་གྱི་ཕོ་བྲང་ན། །ཀླུ་རྒྱལ་བྱང་ཆུབ་སེམས་དཔའ་ལ། །ཆོས་ཀྱི་འཁོར་ལོ་མཐོང་ཐོས་དང་། །དྲན་ཅིང་རེག་པ་ཙམ་གྱིས་ཀྱང་། །ངན་སོང་གསུམ་གྱི་སྡུག་བསྔལ་ལས། །མྱུར་ཏུ་སྒྲོལ་བར་བྱེད་པ་ཡི། །ཟབ་མོའི་ཆོས་འཁོར་གཅིག་འདུག་པ། །ཁྱོད་ཀྱིས་ལོངས་དང་སེམས་ཅན་གྱི། །དོན་གྱི་རྒྱ་ཆེན་འབྱུང་བར་འགྱུར། །ཞེས་གསུངས་ནས་ལུང་བསྟན་མཛད་པ་ལྟར། །སློབ་དཔོན་ཀླུ་སྒྲུབ་ཀླུ་ཡུལ་དུ་བྱོན་ནས། ཀླུའི་རྒྱལ་བོ་བྱང་ཆུབ་སེམས་དཔའ་ལ་འདི་སྐད་ཅེས་ཞུས་སོ། །ཀླུའི་རྒྱལ་བོ་བྱང་ཆུབ་སེམས་དཔའ་གསན་དུ་གསོལ། འཕགས་པ་སྤྱན་རས་གཟིགས་དབང་གིས། །བདག་ལ་ལུང་བསྟན་མཛད་བྱུང་བ། །ཀླུ་ཡི་ཡུལ་དུ་ཁྱོད་སོང་ལ། །ཀླུ་རྒྱལ་བྱང་ཆུབ་སེམས་དཔའ་ལ། །ཆོས་འཁོར་མཐོང་ཐོས་དྲན་རེག་པས། །ངན་སོང་སྡུག་བསྔལ་ཀུན་གྲོལ་བའི། །ཟབ་མོའི་ཆོས་འཁོར་གཅིག་འདུག་པ། །བདག་ལ་ཞུས་ཤོག་གསུངས་ནས་འོང་། །ཆོས་འཁོར་ཐུགས་རྗེས་གནང་དུ་གསོལ། །ཞེས་ཞུས་པས། ཀླུའི་རྒྱལ་བོ་བྱང་ཆུབ་སེམས་དཔའི་ཞལ་ནས། ངའི་ཆོས་ཀྱི་འཁོར་ལོ་ཟབ་མོ་མཐོང་ཐོས་དྲན་པ་དང་རེག་པ་ཙམ་གྱིས། འགྲོ་བ་རིགས་དྲུག་གི་སེམས་ཅན་ཐམས་ཅད་ངན་སོང་གི་སྡུག་བསྔལ་ཆེན་པོ་ལས་མྱུར་དུ་གྲོལ་བར་བྱེད་པའི་འཁོར་ལོ་འདི་སྔོན་འདས་པའི་སངས་རྒྱས་མར་མེ་མཛད་ཀྱིས་ངེད་ཀླུ་རྣམས་ལ་གནང་ནས་ཀླུ་རྣམས་བདེ་བ་དང་ལྡན་ཞིང་སངས་རྒྱས་ཀྱི་ས་ལམ་བགྲོད་པ་ཡང་མང་བོ་བྱུང་བ་ཡིན་ནོ། །ཆོས་འཁོར་ཟབ་མོ་འདིར་འཕགས་པ་སྤྱན་རས་གཟིགས་ཀྱིས་སངས་རྒྱས་རྣམས་ལ་ཞུས་པའི་གཟུངས་སྔགས་ཀྱི་སྙིང་བོ་ཨོཾ་མ་ཎི་པདྨེ་ཧཱུཾ་ཞེས་པ་འདི་སངས་རྒྱས་ཐམས་ཅད་གཅིག་ཏུ་བསྡུས་པའི་གཟུངས་སྔགས་ཀྱི་འཁོར་ལོ་ཡིན་པས་ཁྱོད་ལ་སྟེར་རོ། །ཁྱོད་ཀྱིས་ཀྱང་འཁོར་ལོ་ཟབ་མོ་འདི་ས་ཆུ་མེ་རླུང་ལའང་ཚུགས་ལ། སངས་རྒྱས་ཀྱི་བསྟན་པ་དང་སེམས་ཅན་གྱི་དོན་གྱིས་ཤིག་གསུངས་ནས། ཕྱག་ལེན་དང་བཅས་པ་གནང་ངོ་། །དེ་ནས་འཕགས་པ་ཀླུ་སྒྲུབ་ཀྱིས་རྒྱ་གར་ཡུལ་དུ་གདན་དྲངས་ནས་མཁའ་འགྲོ་མ་སེང་གེ་གདོང་ཅན་ལ་གནང་། དེས་ཏེ་ལོ་བ། དེས་ན་རོ་བ། དེས་མར་བ་ལ་གནང་ནས་བོད་དུ་གདན་དྲངས་སོ། །དེས་མི་ལ་ལ་གནང་། དེས་དྭགས་པོ་ལྷ་རྗེ་ལ། དེས་ཁམས་པ་ཨུ་སེ་ལ་གནང་ནས་རིམ་པར་བརྒྱུད་པ་སོགས་གྲུབ་ཐོབ་ཀརྨ་དཔའ་ཤིའི་གསུང་འབུམ་གྱི་ནང་ན་འཁོར་ལོ་འདིའི་ཕན་ཡོན་དང་བཅས་པ་མང་དུ་བཞུགས་སོ། །

༤ མ་ཎི་འཁོར་ལོའི་མཚོན་དོན། ཆུ་ཀླུང་ཆེན་པོ་བསྐོར་བའི་མདོ་ལས། རྩ་བ་བྱང་ཆུབ་ཤིང་ལས་བྱས། །བྱང་ཆུབ་སེམས་ནི་ངང་གིས་བསྐྱེད། །སྲོག་ཤིང་སྲ་བའི་ལྕགས་ལས་བྱས། །རྣལ་འབྱོར་ཚེ་སྲོག་སྲ་ཤིང་བརྟན། །མ་ནི་ཧཱུཾ་གི་རྩ་བར་གཏད། །ཨོཾ་ནི་ཕྱི་ལ་དར་སྣས་དྲིལ། །བསོད་ནམས་ལོངས་སྤྱོད་དཔལ་འབྱོར་རྒྱས། །རྩེ་ལ་ཏོག་གཅིག་བསྐོར་བ་དེ། །ཆོས་སྐུ་སྣང་བ་མཐའ་ཡས་མཚོན། །ཆོས་སྐུའི་གོ་འཕང་འཐོབ་པའི་རྟགས། །བར་དུ་འཁོར་ལོ་བསྐོར་བ་ནི། །ལོངས་སྐུ་ཐུགས་རྗེ་ཆེན་པོ་མཚོན། །བདེན་གཉིས་ཟུང་དུ་ཆུད་པའི་རྟགས། །དེ་ལ་ཤམ་བུ་བསྐོར་བ་ནི། །སྤྲུལ་སྐུ་འགྲོ་དོན་བྱེད་པའི་རྟགས། །སྐོར་རྡོ་ལྟ་བུ་དུང་བཏགས་པ། །གདུལ་བྱ་འཕྲིན་ལས་རྒྱས་པའི་རྟགས། །དབུ་ལ་གདུགས་ཆེན་བསྐོར་བ་དེ། །ས་ལམ་མ་ལུས་ཡོངས་རྫོགས་ནས། །སྤངས་རྟོགས་སྟོང་ཉིད་མཐར་ཕྱིན་ཤོག །གསུངས་སོ། །

གཞན་ཡང་། ཡི་གེ་མ་ཎི་དྲུག་མ་འདི་སངས་རྒྱས་ཐམས་ཅད་ཀྱི་སྙིང་བོ་ཡིན་ཏེ། མ་ཎི་དང་པདྨ་གཉིས་ཀྱིས་ཐབས་ཤེས་སོ་སོར་བསྟན་ཅིང་། དེ་གཉིས་ཨོཾ་སོགས་ལ་སྦྱར་པས། ཐབས་ཤེས་དབྱེར་མེད་ཀྱི་སྐུ་གསུང་ཐུགས་ཡོན་ཏན་སྟོན། ཧྲཱྀ་ནི་སྤྱིར་སངས་རྒྱས་ཐམས་ཅད་ཀྱི་སྙིང་བོ་དང་། ཁྱད་པར་དུ་འཕགས་པ་སྤྱན་རས་གཟིགས་ཀྱིས་ས་བོན་ཡིན་ནོ། །

ཡང་། ཁ་ཅིག་གིས་མཚོན་དོན་ལ། ཨོཾ་ཡིག་གིས་སྦྱིན་པའི་ཕར་ཕྱིན་རྫོགས་པར་མཚོན་པ་སྟེ། གནས་སྐབས་ཀྱི་ཟས་གོས་དང་། གནས་མལ་གྱི་བདེ་བ་ཙམ་མ་ཡིན་པར་འཁོར་བ་སྤྱི་དང་བྱེ་བྲག་གི་སྡུག་བསྔལ་ཕྲ་རགས་ལས་ཐར་བའི་གཏན་གྱི་བདེ་བ་ལྷུན་གྱིས་གྲུབ་པར་སྟོན་ལ། དེ་ཡང་ཨ་ཨུ་ཨོ་གསུམ་གཅིག་ཏུ་འདུས་པའི་ཆ་ནས་སྐྱེ་འཆི་བར་དོ་བཅོམ་པའི་སྐུ་གསུམ་སོ་སོ་དངོས་ཟིན་པའང་མཚོན་པ་ཡིན། དེ་བཞིན་མ་ཡིག་གིས་བཟོད་པའི་ཕར་ཕྱིན་མཚོན་ཏེ། འཕགས་པ་སྤྱན་རས་གཟིགས་ཀྱིས་སངས་རྒྱས་འོད་དཔག་མེད་པའི་དྲུང་དུ་ཐུགས་བསྐྱེད་སྨོན་ལམ་གྱི་གཡར་དམ་མཛད་པའི་བྱུང་བ་བཞིན། གདུལ་དཀའ་སེམས་ཅན་རྣམས་བླ་ན་མེད་པའི་བྱང་ཆུབ་མ་ཐོབ་ཀྱི་བར་དུ་སྐད་ཅིག་ཙམ་ལའང་བསྲན་དཀའ་བའི་མེ་ཡི་ནང་དུ་བསྐལ་བ་རྒྱ་མཚོར་གནས་དགོས་ཀྱང་། གཞན་དོན་མི་འདོར་བའི་བཟོད་པ་བསྐྱེད་པའི་སྒོ་ནས་སྐྱེ་རྒུ་ཀུན་གྱི་མ་ལྟར་བརྩེ་བས་བསྐྱངས་པར་སྟོན་པའོ། །ཎི་ཡིས་འགྲོ་དྲུག་འདྲེན་པར་བྱེད། གསུངས་པ་བཞིན་སྙིགས་དུས་ཀྱི་འགྲོ་བ་རྣམས་ང་རྒྱལ། ཁོང་ཁྲོ། ཕྲག་དོག་བཅས་ཀྱིས་དུས་འདའ་ཞིང་། དགེ་བར་གཞོལ་བའི་སེམས་བག་ལ་ཉལ། བྱིང་རྒོད་ཀྱི་འཐོར་རླུང་གིས་གཡེང་བའི་ཤིང་བལ་བཞིན་འཕྱན་པ་རྣམས་ཐར་ལམ་དུ་འདྲེན་པར་བྱེད་པ་སྟོན་པ་དང་། གཞི་ཀུན་རྫོབ་ཙམ་དུ་རྒྱུ་འབྲས་རྟེན་འབྱུང་སོགས་བྱ་བྱེད་རྣམ་བཞག་ཡོངས་རྫོགས་ཀྱི་རང་གཤིས་གསལ་རྗེན་དུ་མཚོན་པའོ། །པད་ཅེས་པས་མི་འདོད་པའི་སྡུག་བསྔལ་ཕྲ་རགས་ཀྱི་རྩ་བ་དྲུང་ནས་འབྱིན་པར་སྟོན་པ་ཡིན་ལ། དེ་ལྟར་འབྱིན་པ་ལའང་དེ་ཁོ་ན་ཉིད་ཀྱི་ཏིང་ངེ་འཛིན་ནམ་བསམ་གཏན་གྱི་ཏིང་ངེ་འཛིན་ལ་རག་ལས་པས། བསམ་གཏན་གྱི་ཕར་ཕྱིན་མཚོན་པ་ཡིན་ནོ། །མེ་ཡིས་བུད་ཤིང་ཐམས་ཅད་སྲེག་པར་བྱེད་པ་བཞིན་རྣམ་དཀར་གྱི་དགེ་བའི་ལས་ལམ་དུ་འཇུག་པའི་བརྩོན་འགྲུས་ཀྱི་མེ་ཡིས་སྒྲིབ་གཉིས་བག་ཆགས་དང་བཅས་པའི་དྲི་མའི་བུད་ཤིང་མ་ལུས་པ་བསྲེགས་ཞིང་། གནས་སྐབས་དང་མཐར་ཐུག་གི་ཕན་བདེ་མ་ལུས་འབད་མེད་དུ་སྟེར་བས་ན། བརྩོན་འགྲུས་ཀྱི་ཕར་ཕྱིན་མཚོན་པ་ཡིན། ཧཱུཾ་ཡིག་གིས་དོན་དམ་པར་རང་བཞིན་གྱིས་གྲུབ་པར་འཛིན་པའི་བདེན་འཛིན་གྱི་དམིགས་པའི་གཏད་སོ་བྲལ་བའི་སྟོང་བ་ཉིད་དང་། རྒྱུ་འབྲས་རྟེན་འབྲེལ་སོགས་བྱ་བྱེད་ཀྱི་ཆོས་ཀུན། ཀུན་རྫོབ་ཙམ་དུ་འཐད་པའི་རྟེན་འབྱུང་གཉིས་འགལ་མེད་གྲོགས་སུ་འཁྱེར་བའི་ཤེས་རབ་ཀྱི་ཡུལ་དང་བཅས་པ་སྟོན་པར་མ་ཟད། གོང་གི་མ་ཎི་པདྨེ་ཞེས་སྤྱན་རས་གཟིགས་ཀྱི་མཚན་སྨོས་ཏེ་ཧཱུཾ་ཞེས་པས་ནི་བརྩེ་བ་སྙིང་རྗེ་ཆེན་པོའི་བདག་ཉིད་ཅན། ཁྱོད་ཀྱིས་བདག་སོགས་བྱང་ཆུབ་མ་ཐོབ་བར་དུ་རྗེས་སུ་ཟུངས་ཤིག ཐར་བ་བླ་ན་མེད་པའི་ལམ་བཟང་མྱུར་དུ་འཐོབ་པར་མཛོད་ཅིག་ཅེས་གསོལ་བ་འདེབས་པའི་ཚུལ་མཚོན་པ་བཅས་སོ། །

༥ མ་ཎི་འཁོར་ལོའི་རྣམ་གྲངས། སྤྱིར་འཁོར་ལོ་ལ། བསྒོམ་པའི་འཁོར་ལོ། བསྲུང་བཟློག་གསད་གསུམ་གྱི་འཁོར་ལོ། འཁོར་བའི་འཁོར་ལོ། གཅོད་པའི་འཁོར་ལོ། འཕྲོ་བའི་འཁོར་ལོ། བཀྲ་ཤིས་ཚེ་རིང་གི་འཁོར་ལོ། ལས་ཐམས་ཅད་ལྷུན་འགྲུབ་གྱི་འཁོར་ལོ། བསྐོར་པའི་འཁོར་ལོ་དང་བཅུ་གཅིག་ཡོད་པར་བཤད། དེའི་ནང་གསེས་སྐབས་སུ་བབ་པ་བསྐོར་པའི་འཁོར་ལོ་ལ། ཆུ་འཁོར། རླུང་འཁོར། མེ་འཁོར། ས་འཁོར། ལག་འཁོར་དང་ལྔའོ། །གཞན་ཡང་། རྣལ་འབྱོར་བས་དགྲ་བགེགས་ཚར་བཅད་པའི་ཆེད་དུ་རླུང་འཁོར། སེལ་ཕུང་། ཉེ་འབྱེད། འགོ་མཆོག་སོགས་དྲག་པོའི་ལས་ཀྱི་འཁོར་ལོའི་རིགས་བྲིས་སྒྲུབ་བགྱིས་པ་སོགས་ཐུའུ་བཀྭན་རིན་པོ་ཆེའི་རྟ་མགྲིན་ལས་ཚོགས་ན་གསལ་ལོ། །

༦ བྲི་བའི་རྫས་ནི། རབ་གསེར་དང་དངུལ་མཚལ་གསུམ། འབྲིང་གཡུ་དང་དུང་། ཐ་མ་སྣག་ཚའོ། །དེ་ཡང་སྣག་ཚའི་ཤིང་པར་དང་ལྕགས་པར་འདི་རྒྱུགས་ཆེ་ལ། དེ་ཡང་རིན་ཆེན་སྣ་ལྔ་དང་སྨན་དྲི་བཟང་སོགས་སྣག་ཚ་བསྲེས་ཏེ་བཞེངས་ལ། མཚན་ལྡན་བླ་མས་རབ་གནས་དང་བཀྲ་ཤིས་སྨོན་ལམ་གྱིས་མཚམས་སྦྱར་ཏེ། རིན་ཆེན་དང་གོས་དར་གང་འཛོམས་ཀྱིས་མཛེས་པར་སྤུད་པར་བྱའོ། །མ་ཎི་རྡོ་བརྐོས་ལྟ་བུར་མཚོན་ན། ཡིག་དྲུག་གི་མདོག་གི་ཁྱད་པར་གྱིས་ཁྱད་ནུས་མི་འདྲ་བ་ཐོན་པར་ཡང་བཤད་དེ། ཨོཾ་དཀར་བོས་ལྷའི་སྐྱེས་སྒོ་གཅོད། མ་ལྗང་ཁུས་ལྷ་མིན་གྱི་སྐྱེ་སྒོ་གཅོད། ཎི་སེར་བས་མིའི་སྐྱེ་སྒོ་གཅོད། པད་མཐིང་གས་དུད་འགྲོའི་སྐྱེ་སྒོ་གཅོད། མེ་དམར་བས་ཡི་དྭགས་ཀྱི་སྐྱེ་སྒོ་གཅོད། ཧཱུཾ་མཐིང་ནག་གིས་དམྱལ་བའི་སྐྱེ་སྒོ་གཅོད་པར་ཡང་གསུངས་སོ། །

༧ མ་ཎི་འཁོར་ལོ་ལག་ལས་བྱེད་ཚུལ། ཆོས་ཀྱི་འཁོར་ལོ་རྒྱུན་མི་ཆད་པའི་རྒྱུད་ལས། ཆོས་ཀྱི་འཁོར་ལོ་ཆེན་པོ་འདི། །ས་ཆུ་མེ་རླུང་འཁོར་ལོ་དང་། །འདུ་བྱེད་ལག་པའི་འཁོར་ལོ་སོགས། །མཐོང་བ་བརྒྱུད་པའི་ཕྱག་ལེན་ལྟར། །ས་བལྟ་གནམ་བལྟ་མ་ནོར་བར། །སྐྱོན་མེད་ཤིན་ཏུ་དག་པར་བྱ། །ཞེས་པ་ལྟར། འཁོར་ལོའི་དབུ་ཏུབ་དང་གནམ་ལ་བསྟན་པ་དང་། ཞབས་ཏུབ་ས་ལ་བསྟན་པར་བྱའོ། །འཁོར་ལོ་དེ་གཉིས་ཁ་སྦྱར་ལ། མང་དུ་བརྩེགས་པ་སོགས་ཆེ་ཆུང་གི་ཚད་དང་བསྟུན་པར་བྱ། གཟུངས་སྔགས་དཀྲི་ཚུལ་ནི། ཆོས་ཀྱི་འཁོར་ལོ་རྒྱུན་མི་ཆད་པའི་རྒྱུད་ལས། ཨོཾ་ནི་སྲོག་ཤིང་སྨྱུག་མར་འཇུས། །ཧཱུཾ་ནི་མཇུག་ནས་ཡོད་པར་བྱ། །ཞེས་པ་ལྟར་ཡི་གེ་ནང་ལ་བསྟན་ཏེ་མཇུག་ནས་སྒྲིལ་བར་བྱ་ཞིང་། དམ་ལྷོད་ཡང་རན་པར་བྱ་དགོས་ཏེ། དམ་དྲགས་ན་གཟུངས་སྔགས་བྲག་གི་བར་དུ་བཙིར་བ་ལྟ་བའི་ཉེས་པ་དང་། ལྷོད་དྲགས་ན་རྒྱུ་མ་ལུགས་པ་ལྟ་བུའི་ཉེས་པ་ཡོད་པས། དམ་ལྷོད་རན་པར་བྱའོ། །

༨ མ་ཎི་བསྐོར་དུས་ཀྱི་དམིགས་རིམ། དམིགས་རྣམ་སྐྱོང་ལུགས་ནི། གཟུངས་གཞུག་ལས་འོད་ཟེར་དཔག་མེད་འཕྲོས་ཏེ། མཆོད་པའི་སྤྲིན་གྱིས་ཞིང་ཁམས་ལས་ཐམས་ཅད་འགེངས། རྒྱལ་བ་སྲས་བཅས་ཀྱི་བྱིན་རླབས་ནུས་མཐུ་ཐམས་ཅད་བསྡུས་ནས་མ་ཎི་འཁོར་ལོ་ལ་ཐིམ། དེ་ལས་འོད་འཕྲོས་ཏེ་སེམས་ཅན་ཐམས་ཅད་ལ་ཕོག་པས། སྡིག་སྒྲིབ་བྱང་ཞིང་མཆོག་ཐུན་གྱི་དངོས་གྲུབ་ཐོབ། སླར་འོད་དང་དཀྱིལ་འཁོར་ལྷ་ཚོགས་ནམ་མཁའ་ཀུན་ཏུ་ཁྱབ་ནས། མ་གྱུར་སེམས་ཅན་ཐམས་ཅད་ཀྱི་དགེ་རྩ་དང་ལྷན་ཅིག་ཏུ་འཕྲོས་ཏེ། རིགས་དྲུག་གི་སྡུག་བསྔལ་དག་ཅིང་། སྣོད་བཅུད་རྣམ་པའི་རང་གཞན་གཟུངས་སྔགས་ཀྱི་རང་སྒྲ་སྒྲོགས་པ་དང་། སེམས་བདེ་སྟོང་དབྱེར་མེད་ཀྱི་ངང་ལ་འབྱམས་པར་བསམ་དགོས་སོ། །

གཞན་ཡང་། རྒྱལ་མཁན་ཆེན་གྲགས་པ་རྒྱལ་མཚན་གྱིས། རང་ཉིད་ཐུགས་རྗེ་ཆེན་པོ་གསལ་བ་ལས་རིགས་དྲུག་གི་འགྲོ་བའི་གྲངས་དང་མཉམ་པའི་ཐུགས་རྗེ་ཆེན་པོ་སྤྲོས་ཏེ། དེ་དག་གི་སྒྲིབ་པ་སྦྱངས། སྤྱན་རས་གཟིགས་ཀྱི་གོ་འཕང་ལ་བཀོད་པ་དང་། རང་རང་གི་ཐུགས་ཀ་ནས་ཀུན་ཏུ་བཟང་བའི་མཆོད་པའི་སྤྲིན་གྱི་ཕུང་བོ་སྤྲོས་ཏེ། ཕྱི་ནང་གསང་བའི་མཆོད་པས་མཆོད། རྒྱལ་བ་སྲས་བཅས་ཐམས་ཅད་སྤྱན་རས་གཟིགས་ཀྱི་རྣམ་པར་སྤྱན་དྲངས་པ་ནམ་མཁའི་ཁྱོན་ཐམས་ཅད་ཏིལ་གྱི་གང་བུ་ལྟར། བར་མཚམས་མེད་པར་གང་བ་ལ་དམིགས་ཏེ་མ་ཎི་བགྲང་བའི་ཚེ། རང་གིས་དུས་གསུམ་དུ་བསགས་པའི་དགེ་ཚོགས་མཐའ་དག་དང་། རྒྱལ་བ་སྲས་བཅས་ཀྱི་ཡོན་ཏན་ཐམས་ཅད་གཅིག་ཏུ་འདྲེས་ཏེ། དེ་ལས་བདུད་རྩིའི་རྒྱུན་དང་། འོད་སྣ་ལྔ་ལ་སོགས་པ་བྱུང་སྟེ་ཚ་དམྱལ་བརྒྱད་དང་། གྲང་དམྱལ་བརྒྱད་ཀྱི་སྡུག་བསྔལ་དང་། བྱིངས་དང་ཁ་འཐོར་ན་གནས་པའི་དུད་འགྲོའི་སྡུག་བསྔལ། སེར་སྐྱ་མིའི་ཡུལ་སོགས་ན་གནས་པའི་ཡི་དྭགས་བཀྲེས་སྐོམ་གྱི་སྡུག་བསྔལ། ལྷ་མ་ཡིན་གྱི་ཕྲག་དོག ལྷའི་འཆི་འཕོ་འོག་ལྟུང་། མིའི་སྐྱེ་རྒ་ན་འཆི་སོགས་སྡུག་བསྔལ་མཐའ་དག་བསལ་ཏེ། སྐད་ཅིག་མ་གཅིག་ལ་རྫོགས་སྨིན་སྦྱངས་གསུམ་མཐར་ཕྱིན་ནས། ས་བཅུ་བ་དང་རྒྱུན་མཐའ་ལྟ་བུའི་དབང་རྣོན་དུ་གྱུར་བ་དེ་ཉིད། རང་གི་བླ་མ་ལ་ཕུལ་ནས་གདུལ་བྱར་གྱུར་བར་མོས་ཏེ། འཁོར་ལོ་བསྐོར་བར་གསུངས་སོ། །

གཞན་ཡང་། ཆོས་ཀྱི་འཁོར་ལོ་ཆེན་པོ་ལས། །འོད་འཕྲོས་སེམས་ཅན་ཐམས་ཅད་ཀྱི། །ཉོན་མོངས་མ་ལུས་དུཿཁ་དང་། །རིགས་དྲུག་བག་ཆགས་ས་བོན་རྣམས། །རབ་འདུས་ཡིག་དྲུག་འཁོར་ལོར་ཐིམ། །ཉོན་མོངས་ལས་དང་ས་བོན་དང་། །རིགས་དྲུག་བག་ཆགས་ས་བོན་རྣམས། །བསྲེག་དང་བཅོམ་དང་དག་པར་བསམ། །མན་ངག་དེ་དང་ལྡན་གྱུར་ན། །འཁོར་བའི་རྒྱུ་རྐྱེན་འབྲས་བུ་དང་། །ཉོན་མོངས་ལས་དང་སྡིག་སྒྲིབ་ཀུན། །མ་ལུས་པ་ནི་གྲོལ་བར་འགྱུར། །འཁོར་བའི་རྩ་གཅོད་འཁོར་ལོ་ཡིན། །ཤིན་ཏུ་གསང་ལ་ཉམས་ལེན་གཅེས། །ལས་སྦྱོར་འཁོར་ལོ་རིན་ཆེན་གྱི། །སྔགས་ལས་འོད་ཟེར་འཕྲོས་གྱུར་བས། །འགྲོ་བ་རྣམས་ལ་ཕོག་པ་ཡིས། །བྱམས་དང་སྙིང་རྗེ་དགའ་བ་དང་། །བཏང་སྙོམས་དང་ནི་ཚད་མེད་བཞི། །རྒྱུད་ལ་ལྷུན་གྱིས་འགྲུབ་པར་འགྱུར། །སྦྱིན་པ་ཚུལ་ཁྲིམས་བཟོད་པ་དང་། བརྩོན་འགྲུས་བསམ་གཏན་ཤེས་རབ་སྟེ། །ཕ་རོལ་ཕྱིན་དྲུག་རྫོགས་པར་འགྱུར། །ཞེས་གསུངས་སོ། །

༩ མ་ཎི་སྐོར་བྱེད་ཀྱི་རྒྱུ་འབྱོར་མ་དག་པའི་ཉེས་པ། མ་ཎི་འཁོར་ལོའི་རྒྱུ་འབྱོར་ལོག་འཚོས་གོས་པ་སོགས་མ་དག་ཡིན་ན། ཕན་ཡོན་མེད་པར་མ་ཟད། ཉེས་དམིགས་ཧ་ཅང་ཆེ། ཁྱད་པར་དུ་སེམས་ཅན་མང་བོའི་སྲོག་བཅད་དེ། མ་ཎི་བསྐོར་བ་ཆོས་སུ་རློམ་པ་ནི། ཁྲག་མཚོ་དང་རྣག་མཚོའི་དཀྱིལ་ནས་ཡི་གེ་བྲིས་པ་སྟེ། གསུང་རབ་ཁྱད་དུ་གསད་པ་མ་ཡིན་ཡང་། གོ་བ་ལོག་པར་སོང་བས། སྡིག་འབྲས་ཆེས་ལྕི་བའི་ཕྱིར་རོ། །

༡༠ བསྐོར་ཚུལ་ལོག་པའི་ཉེས་དམིགས། ཇི་སྐད་དུ། ཏབ་ཏབ་ཏུ་ནི་བསྐོར་བ་ན། །དམན་པའི་ལུས་སུ་སྐྱེ་བར་འགྱུར། །འཁོར་ལོ་འཕྲེད་ལ་བསྐོར་བ་ན། །དུད་འགྲོ་སྒུར་བོའི་ལུས་སུ་སྐྱེ། །མགོ་མཇུག་ལོག་ནས་བསྐོར་བ་ན། །སེམས་ཅན་ཞ་བོའི་ལུས་སུ་སྐྱེ། །འཁོར་ལོ་གསལ་བར་མ་བཞེངས་ན། །དམུས་ལོང་ཅན་གྱིས་ལུས་སུ་སྐྱེ། །འཁོར་ལོ་སྒྲ་སྐད་ལོག་བལྟས་ན། །རྣ་བ་འོན་པའི་ལུས་སུ་སྐྱེ། །འཁོར་ལོ་སྐུར་བ་བཏབ་པ་ན། །ལྒིན་ཞིང་ལྐུགས་པའི་ལུས་སུ་སྐྱེ། །ཞེས་དང་། གཞན་ཡང་མགོ་མཇུག་ལྡོག་པ། སར་འཕངས་པ་སོགས་གསང་སྔགས་བཟླས་པའི་འཕྲུལ་འཁོར་བཤིགས་པ་ལྟར་རྣམ་སྨིན་ལྕི་བ་དང་། འགབ་ཡུག་ཤོར་བ་དང་། བརྙས་བཅོས་བྱས་ན། སྨྱོ་བ་དང་། བརྒྱལ་བ་དང་། དགྲ་རྐུན་ཇག་གསུམ་དང་། གོད་ཁ་རྒྱུན་མི་ཆད་པར་འོང་ཞིང་། དབུལ་ཕོངས་དང་ཤི་ཆད་། བཀྲ་མི་ཤིས་པ་མང་བོ་བྱུང་སྟེ། དམྱལ་བར་འགྲོ་བ་མདོ་རྒྱུད་རྣམས་སུ་གསུངས་པ་དང་། འཁོར་ལོ་བསྐོར་དུས་སུ་ཙེར་ཙེར་ཟེར་ན་སྲོག་ལ་གནོད། ཏྲག་ཏྲག་ཟེར་ན་འཁོར་ལ་གནོད་པས། སྐད་མེད་ཆུ་བོའི་རྒྱུན་བཞིན་བསྐོར་བ་གལ་ཆེའོ། །

༡༡ བསྐོར་ཚུལ་ལེགས་པའི་ཕན་ཡོན། གདུགས་ལྟར་བསྐོར་ན་གཟུགས་བཟང་ཞིང་། །སྐྱེ་མཆེད་ལེགས་ཤིང་ཚང་བར་སྐྱེ། །དེས་ན་སྐལ་ལྡན་སྐྱེས་བུ་ཡིས། །ཆོས་ཀྱི་འཁོར་ལོ་ཆེན་པོ་འདི། །ཐད་ཀར་དྲང་ཞིང་བསྐོར་བ་ན། །དབང་བོ་ཡ་རབས་སངས་རྒྱས་འཐོབ། །འགྲོ་བ་སེམས་ཅན་དོན་བྱེད་འགྱུར། །དབང་བོ་འབྲིང་རྣམས་མི་ལུས་འཐོབ། །སྡིག་སྤོང་དགེ་ལ་བརྩོན་པར་འགྱུར། །ཞེས་དང་། སངས་རྒྱས་སྣང་བ་མཐའ་ཡས་ཀྱིས། །སྙིགས་མའི་སེམས་ཅན་དོན་ཕྱིར་དུ། །ཡི་གེ་དྲུག་པའི་ཕན་ཡོན་བཤད། །ཡིག་དྲུག་འདྲེན་དང་ཆོས་འཁོར་བསྐོར། །དུས་གཅིག་ཉམས་སུ་ལེན་བྱེད་པ། །སངས་རྒྱས་སྟོང་དང་སྐལ་བ་མཉམ། །ཞེས་དང་། ཤཱཀྱའི་རྒྱལ་བོས། སྒྲིབ་པ་རྣམ་སེལ་ལེགས་པརཉོན། །སྙིང་བོ་དོན་གྱི་རྣལ་འབྱོར་མཆོག། སྒྲུབ་པ་ལོ་གཅིག་བྱས་པ་པས། །དབྱུག་རྡོ་ལན་གཅིག་བསྐོར་བ་མཆོག། སྙིང་བོ་དོན་བསྒོམ་འབྲིང་གིས་ཀྱང་། །སྒྲུབ་པ་ལོ་བདུན་བྱས་པ་ལས། །ཆོས་འཁོར་ལན་གཅིག་བསྐོར་བ་མཆོག། སྙིང་བོ་དོན་བསྒོམ་ཐ་མས་ཀྱང་། །སྒྲུབ་པ་ལོ་དགུ་བྱས་པ་བས། །ཆོས་འཁོར་ལན་གཅིག་བསྐོར་བ་མཆོག། ཐོས་བསམ་སྒོམ་གསུམ་བསྐལ་བ་བས། །ཆོས་འཁོར་ལན་གཅིག་བསྐོར་བ་མཆོག །ཅེས་གསུངས་པ་དང་། །འཇམ་དཔལ་གྱིས། རྒྱལ་ཆེན་བཞི་དང་ཕྱོགས་སྐྱོང་བཅུས། །ཕྱོགས་དང་ཕྱོགས་མཚམས་ཐམས་ཅད་ཀྱི། །བར་ཆད་ཐམས་ཅད་སྲུང་བར་བྱེད། །མཚམས་མེད་ལྔ་དང་མི་དགེ་བཅུ། །ངན་སོང་ལས་རྣམས་འདི་ཡིས་སྦྱོངས། །སངས་རྒྱས་ཞིང་ནས་ཞིང་དུ་འགྲོ། །བདེ་བ་ཅན་གྱི་ཞིང་ཁམས་སུ། །པདྨའི་སྙིང་བོ་ཟེའུ་འབྲུ་ལ། །བརྫུས་ཏེ་སྐྱེ་བ་ལེན་པར་འགྱུར། །ཕྱོགས་བཅུའི་སངས་རྒྱས་ཐམས་ཅད་ཀྱི། །འཕྲིན་ལས་ཕྱོགས་བཅུར་རྒྱས་པར་འགྱུར། །ཞེས་གསུངས་པ་དང་། མགོན་པོ་བྱམས་པའི་ཞལ་ལས། ཆོས་ཀྱི་འཁོར་ལོ་ཟབ་མོ་ལ། །ན་བཟའ་ལེགས་པར་ཕུལ་བ་ན། །སྐྱེ་བ་ལྔ་བརྒྱར་གོས་བཟང་འགྱུར། །འགྲོ་བ་ཡོངས་ཀྱི་མགོན་དུ་འགྱུར། །གྲིབ་མ་ཕོག་པའི་སེམས་ཅན་རྣམས། །ངན་སོང་གནས་ལས་ཐར་བར་འགྱུར། །གནས་སྐབས་བསྐོར་བའི་ཕན་ཡོན་ནི། །འགོ་ནད་རིམས་ནད་ཐམས་ཅད་ཐུབ། །གྲིབ་དང་མི་གཙང་ཐམས་ཅད་འཇོམས། །བདུད་དང་བགེགས་ཀྱི་དཔུང་རྣམས་འཇོམས། །ཞེས་དང་། ཕྱག་ན་རྡོ་རྗེས། ཆོས་ཀྱི་འཁོར་ལོ་ཆེན་པོ་འདིས། །སྟེང་གདོན་གཟའ་དང་འོག་གདོན་ཀླུ། །བར་གྱི་བཙན་དང་འབྱུང་བོའི་ཚོགས། །གནོད་བྱེད་ཐམས་ཅད་འདི་ཡིས་ཐུབ། །དེ་ལྟར་ཐུབ་པ་ཅིའི་ཕྱིར་ན། །རྒྱལ་བ་རིགས་ལྔ་སྟེང་ཕྱོགས་ཀྱི། །སངས་རྒྱས་མཐུ་སྟོབས་རྒྱལ་བོ་སོགས། །སྙིང་བོ་རེ་རེ་བསྡུས་པ་ཡི། །གཟུངས་སྔགས་འཁོར་ལོ་ཡིན་ཕྱིར་རོ། །ཞེས་དང་། འཕགས་པ་སྤྱན་རས་གཟིགས་ཀྱིས། གཟུངས་སྔགས་འཁོར་ལོ་ཆེན་པོ་འདི། །འཁོར་ལོ་གཞན་ལས་ཁྱད་པར་འཕགས། །སྐལ་བ་ལྡན་པའི་འགྲོ་བ་རྣམས། །ཆོས་འཁོར་འདི་ལ་བློ་གཏད་ནས། །བསྐོར་ཞིང་གསོལ་བ་བཏབ་པ་ནི། །འདི་ཕྱིའི་སྐྱབས་མགོན་མཆོག་ཡིན་ནོ། །ཞེས་གསུངས་པ་དང་། སློབ་དཔོན་པདྨས་མཛད་པའི་རླུང་འཁོར་ལས། ཙཀྲ་འདི་ཡི་དགོངས་པ་ནི། །མན་ངག་བརྩོན་འགྲུས་མི་ལྡན་པར། །ཅི་བདེར་གནས་པའི་གང་ཟག་གིས། །སི་དྷི་འཐོབ་པར་བྱ་བ་དང་། །བརྩོན་འགྲུས་ལྡན་པའི་གང་ཟག་གི ། བཟླས་བརྗོད་དག་ནི་གྲོགས་སུ་འགྱུར། །སྡིག་པ་དཔག་ཏུ་མེད་པ་ཡང་། །འབད་པ་མེད་པར་བྱང་བར་འགྱུར། །ཡི་དམ་འདོད་ལྷ་མང་བོ་ཡང་། །ཅིག་ཅར་ཉིད་དུ་འགྲུབ་པར་འགྱུར། །གང་གི་མིང་སྤེལ་བྲིས་པ་ན། །རང་ལ་འདུན་པ་མེད་པ་ཡང་། །སྐྱོན་དག་ཡོན་ཏན་རྫོགས་པར་འགྱུར། །མི་ཁོམ་བརྒྱད་ཀྱི་འགྲོ་བ་རྣམས། །ཙཀྲའི་གྲིབ་མ་ཕོག་པས་གྲོལ། །ཙཀྲ་ཕོག་པའི་འབྱུང་བ་བཞི། །ཕོག་པ་ཙམ་གྱིས་ངན་སོང་ལས། །གྲོལ་བར་འགྱུར་ཞེས་རྒྱལ་བའི་གསུངས། །མདོར་ན་ཉེས་སྐྱོན་མང་བོ་ཡང་། །འབད་པ་མེད་པར་བྱང་བར་འགྱུར། །ཙཀྲ་ལན་གཅིག་རེག་པ་ན། །རེག་པ་ཙམ་གྱིས་གྲོལ་བ་དང་། །བདེ་ལེགས་ཡོན་ཏན་མང་བོ་ཡང་། །འབད་པ་མེད་པར་འཐོབ་པར་འགྱུར། །ཞེས་དང། སློབ་དཔོན་ཀླུ་སྒྲུབ་ཀྱི་རླུང་འཁོར་ལས། འཁོར་ལོའི་རླུང་རྒྱུན་ཕོག་པའམ། །གྲིབ་མ་ཕོག་པའི་སེམས་ཅན་རྣམས། །དེ་དང་དེ་དག་གྲོལ་བར་འགྱུར། །ཞེས་དང་། ཨོཾ་མ་ཎི་པདྨེ་ཧཱུཾ་ཞེས་པའི་འཁོར་ལོ་ཆེན་པོ་འདི། སྟེང་དུ་རླུང་ལ་བཙུགས་པ་ན། །རླུང་ཟེར་ཕོག་པའི་སེམས་ཅན་དང་། །རླུང་ཕྱོགས་གནས་པའི་འགྲོ་བ་རྣམས། །ངན་སོང་སྡུག་བསྔལ་ལས་གྲོལ་ལོ། །འོག་ཏུ་མེ་ལ་བཙུགས་པ་ན། །དུ་དྲི་ཚོར་ཚད་སེམས་ཅན་དང་། །མེ་འོད་ཕོག་པའི་སེམས་ཅན་རྣམས། །ངན་སོང་སྡུག་བསྔལ་ལས་གྲོལ་ལོ། །ས་ལ་འཁོར་ལོ་བཙུགས་པ་ན། །ས་དེར་གནས་པའི་སེམས་ཅན་རྣམས། །ས་རྡུལ་ཕོག་པའི་འགྲོ་བ་རྣམས། །ངན་སོང་སྡུག་བསྔལ་ལས་གྲོལ་ལོ། །ཆུ་ལ་འཁོར་ལོ་བཙུགས་པ་ན། །ཆུ་ནང་གནས་པའི་སེམས་ཅན་རྣམས། །ཆུ་དེ་འཐུང་བའི་འགྲོ་བ་རྣམས། །ངན་སོང་སྡུག་བསྔལ་ལས་གྲོལ་ལོ། །ཨོཾ་མ་ཎི་པདྨེ་ཧཱུཾ་ཞེས་པའི་འཁོར་ལོ་འདི་ལ་གང་ལ་གང་མཁོའི་ཡོ་བྱད་སྣ་ཚོགས་དང་། མར་མེ་ཞལ་ཟས་ལ་སོགས་པའི་མཆོད་པ་ཕུལ་ན། སྟོང་འཁོར་ལོའི་སྒྱུར་བའི་རྒྱལ་བོར་འགྱུར་ཞིང་། གང་ལ་གང་འདོད་ཅི་ལ་ཅི་འདོད་པའི་ལོངས་སྤྱོད་སྣ་ཚོགས་ལ་ལོངས་སྤྱོད་ཅིང་། མཐར་འཕགས་པ་སྤྱན་རས་གཟིགས་ཀྱི་གོ་འཕང་འཐོབ་པར་འགྱུར་རོ། །སྐལ་བ་དང་ལྡན་པའི་སྐྱེས་བུ་རྣམས་ཀྱིས། ཨོཾ་མ་ཎི་པདྨེ་ཧཱུཾ་ཞེས་པའི་འཁོར་ལོ་འདི་གཞན་ལའང་སྟོན་ཅིག ཤོད་ཅིག སྒྲོགས་ཤིག འཁོར་ལོ་འདིས་བསྟན་པ་སྤེལ་ཞིག སངས་རྒྱས་ཀྱི་བསྟན་པ་སྤེལ་སྐྱོང་བྱས་པ་དང་འདྲ་བར་འགྱུར་རོ། །

མ་ཎི་འཁོར་ལོ་འདི་མེ་ལ་བསྐོར་ན། དུད་པའི་གར་ཁྱབ་ལ་ཐར་བའི་ས་བོན་ཐེབས་པར་འགྱུར་རོ། །ཆུ་དང་རླུང་ལ་བསྐོར་ན། ཆུ་དང་རླུང་གིས་གར་ཁྱབ་པའི་སེམས་ཅན་ཐམས་ཅད་བྱང་ཆུབ་འཐོབ་པར་གསུངས་ལ། ལག་པས་བསྐོར་ན། མི་དང་འཁོར་ལོ་དེ་གཉིས་མཐོང་ཐོས་དྲན་རེག་གིས། སེམས་ཅན་ཐམས་ཅད་རྣམ་དཀར་གྱི་ཆོས་ལ་འགོད་པར་གསུངས། ཟམ་པའི་སྟེང་དུ་བསྐོར་ན་མཐོང་བའི་སེམས་ཅན་ངན་སོང་ལས་ཐར། ཁྱིམ་དུ་བཙུགས་ན་ཁྱིམ་དེ་གཞལ་ཡས་ཁང་དུ་འགྱུར། ཐ་ན་མ་ཎི་འཁོར་ལོ་ལག་ཏུ་འཁྱེར་བའི་མི་དང་འཕྲད་ནའང་ཕ་མ་བསད་པའི་སྡིག་པ་ཡང་དག་སྟེ་ངན་སོང་ལས་ཐར་བར་བཤད་དོ། །

གཞན་ཡང་། ཁ་རྗེ་དབང་ཐང་། དབང་སྡུད་ནོར་སྒྲུབ། སྟོབས་དང་ཚེ་སྒྲུབ། སྲུང་འཁོར་དང་ལོངས་སྤྱོད། དཔལ་དང་གཟི་བརྗིད། ཤེས་རབ་དང་སྙིང་རྗེ་བསྐྱེད་པར་མ་ཟད། ནད་གདོན་བར་ཆད། བྱད་གཏད་མནན་གསུམ་དང་། དུག་དང་འབྱུང་གཞི། དུཿཁ་དང་མུ་གེ གོད་ཁ་དང་ནད་ཡམས། མི་དང་མི་མིན་གྱི་འཇིགས་པ་སོགས་བཟློག་པ་དང་། རྒྱལ་བའི་ཆད་པ་ལས་ཐར་བར་འགྱུར་རོ། །འཁོར་ལོ་བསྐོར་བས། ལུས་རྟེན་གཙང་མ་འཐོབ་ནས། དགེ་བའི་བཤེས་གཉེན་དང་ཞལ་མཇལ་ཏེ། ཆོས་སྤྱོད་ཀྱི་སྐལ་བ་ལྡན་ཞིང་། ཆོས་ཀྱི་མངའ་བདག་ཏུ་གྱུར་ཏེ། མི་བརྗེད་པའི་གཟུངས་འཐོབ་ནས། འཆད་རྩོད་རྩོམ་གསུམ་ལ་ཐོགས་པ་མེད་པར་འགྱུར་རོ། །འཁོར་ལོ་འདིས་ཕྱི་མ་དང་བར་དོ་ནས། མཆོད་པའི་རྫས་མང་བོས་ཕྱོགས་བཞིའི་སངས་རྒྱས་ལ་མཆོད་པར་མཛད་ཅིང་། ཆོས་ཉན་པའི་སྐལ་བ་དང་ལྡན་ལ། སེམས་ཅན་དཔག་ཏུ་མེད་པའི་དོན་བྱེད་དོ། །འཁོར་ལོ་འདིས་ངན་སོང་གི་སྐྱེ་རྒྱུན་གཅོད་ཅིང། མི་དགེ་བཅུ། མཚམས་མེད་ལྔ། སོ་བྱང་སྔགས་གསུམ་གྱི་དམ་སྡོམ་ཉམས་ཆག་དང་། ལུས་ངག་ཡིད་གསུམ་གྱི་སྡིག་པ་ཐམས་ཅད་འགྱོད་པ་དྲག་པོས་བཤགས་ན་འབྱང་བར་འགྱུར་བ། མཁའ་འགྲོ་མ་ཨ་ར་ལི་ལ་ཐུབ་པ་ཆེན་པོས་གསུངས་སོ། །སློབ་དཔོན་པད་འབྱུང་གི་མ་འོངས་ལུང་བསྟན་ལས་ཀྱང་། ལྷོ་ནུབ་ཏུ་འབྱོན་ཁར། ངས་སྲིན་པོ་ཐམས་ཅད་ཐུལ་བའི་རྟགས་ལ། ས་ཡི་མཐར་ཡི་གེ་དྲུག་མའི་འཁོར་ལོ་དར་ནས་ཡོང་སྟེ། དེ་དུས་འཁོར་ལོ་བསྐོར་བ་དང་། མཐོང་ཐོས་དྲན་རེག དེའི་རླུང་ཕོག་ཚད་ཐམས་ཅད། བཀྲ་ཤིས་དོན་འགྲུབ། སྒྲིབ་པ་དག མཐར་བྱང་ཆུབ་འཐོབ་པ་སོགས་ཕན་ཡོན་དཔག་ཏུ་མེད་པར་མ་ཟད། རྒྱ་གར་ནས་བོད་དུ་འགྱུར་ཚད་ཀྱི་ཆོས་ལུས་ངག་གི་དགེ་སྦྱོར་བྱ་ཐབས་ལ། ཡི་གེ་དྲུག་པའི་འཁོར་ལོ་འདི་བས་ཕན་པ་དང་ཡོན་ཏན་ཆེ་བ་མེད་པར་གསུངས་སོ། །དེ་ལྟར་མདོ་རྒྱུད་གཉིས་ལས་མང་དུ་གསུངས་ལ། ཡང་། འདིར་རྒྱུད་ལས་གསུངས་ཚུལ་འགའ་བཀོད་ན། ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྒྱུད་ལས། གང་ཞིག་བྱང་སེམས་ལྡན་པ་ཡིས། །སྐྱེས་བུ་བློ་གྲོས་སྟོབས་ལྡན་གྱིས། །ཡིག་དྲུག་ལྒིགས་བམ་ཆེན་པོ་བཞེངས། །བསྐྱེད་རིམ་རབ་གནས་མངའ་གསོལ་ནས། །ཆུ་འམ་རླུང་ངམ་ལག་པས་བསྐོར། །ངེས་པར་འཁོར་བ་ཕྱིར་བསྙིལ་ཞིང་། །ཕྲིན་ལས་རྣམ་བཞི་ལྷུན་གྱིས་གྲུབ། །དེ་ཡི་ཡོན་ཏན་བརྗོད་མི་ལང་། །ཞེས་དང་། ཐུགས་རྗེ་འགྲོ་དོན་བྱེད་འདོད་ན། །རིན་ཆེན་སྣ་ལྔའི་ལྒིགས་བམ་འབྲི། །རྒྱུན་འབབ་ཆུ་ལ་བསྐོར་ན་ནི། །དེ་ཡི་ལས་སྒྲིབ་མྱུར་དུ་འདག། མཐོ་རིས་ཐར་བའི་ཐེམ་སྐས་འཛུགས། །ཞེས་དང་། ཐུགས་རྗེ་ཆེན་པོའི་མུན་སེལ་སྒྲོན་མེའི་རྒྱུད་ལས། བྱང་སེམས་སྐྱེས་བུ་གང་དག་གིས། །ཡིག་བདུན་འཁོར་ལོ་མང་བཞེངས་ནས། །འབྱུང་བ་བཞི་ལ་བསྐོར་བ་ན། །ཕྲིན་ལས་གང་འདོད་མྱུར་དུ་འགྲུབ། །ཁྱད་པར་རྒྱུན་ཆད་མེད་པ་ཡི། །ལུས་ལ་བསྐོར་ན་ཡང་དག་འགྲུབ། །ཅེས་དང་། རྩ་བའི་རྒྱུད་ལས། གཞི་ལ་འགྲོ་བ་རིགས་དྲུག་གི་སྐྱེ་སྒོ་གཅོད་པ་དང་། ལམ་ལ་ཕར་ཕྱིན་དྲུག་གི་ཚོགས་རྫོགས་པ། འབྲས་བུ་ལ་རིགས་དྲུག་པ་རྒྱལ་བ་རྡོ་རྗེ་འཆང་གི་གོ་འཕང་འགྲུབ་པའི་ཕན་ཡོན་ཡོད། གུང་ཐང་བསྟན་པའི་སྒྲོན་མེས། དེ་དག་རང་རང་གི་ཀློག་པ་ལ་ཕན་ཡོན་ཇི་སྙེད་ཅིག་གསུངས་པ་ཐམས་ཅད་འབྱུང་སྟེ། སྔགས་རེ་གཉིས་ཤིང་བྱང་ལ་བྲིས་ཏེ་ཐེངས་འགའ་བསྐོར་བས། ནད་རིམས་སད་སེར་སོགས་ཞི་བ་མངོན་སུམ་དུ་གྲུབ་པ་ན། བསམ་པ་རྣམ་པར་དག་པས་གཟུངས་ཁྱད་པར་ཅན་དུ་མ་བསྐོར་བ་ལ་ཕན་ཡོན་བསམ་གྱིས་མི་ཁྱབ་སྟེ། དེ་འདྲ་ལ་རེག་པའི་རླུང་གིས་ཕོག་པ་ཙམ་གྱིས་ཀྱང་སྡིག་སྒྲིབ་ཚན་པོ་ཆེ་བྱང་ཞིང་། ཐར་བའི་ས་བོན་བསྐྲུན་པར་གསུངས་ཤིང་། མ་ཎི་བཏོན་པ་དང་བསྐོར་བའི་ཕན་ཡོན་མཉམ་པར་བཤད་དེ།

བཏོན་པའི་ཕན་ཡོན་ནི། ཟ་མ་ཏོག་བཀོད་པའི་མདོ་ལས། ཡི་གེ་དྲུག་པ་འདི་ལག་གིས་བྲག་དང་རྩིག་པ་ལ་བྲིས་ནས་ལག་པས་རེག་པ་དང་ཞེས་སོགས་ནས་མཐོང་བ་ཙམ་གྱིས་སྲིད་པ་ཐ་མའི་བྱང་ཆུབ་སེམས་དཔར་འགྱུར་རོ། །སྐྱེ་རྒ་ན་འཆི་དང་། མི་སྡུག་པ་དང་འཕྲད་པ་དང་། སྡུག་པ་དང་བྲལ་བའི་སྡུག་བསྔལ་མེད་པར་འགྱུར་རོ། །ཞེས་གསུངས་སོ། །མདོར་ན། ལྷ་ཐུགས་རྗེ་ཆེན་པོར་སྙིང་ཁུང་རུས་པའི་གཏིང་ནས་གསོལ་བ་བཏབ་ནས། འདི་ཁོ་ནར་སྒོ་གསུམ་ཆིག་དྲིལ་དུ་བརྩོན་ན། བྱས་པ་དོན་ལྡན། ངལ་བ་འབྲས་བཅས། བསམ་པ་གཅིག་ཆོག འབྲེལ་ཚད་དོན་ལྡན་དུ་གྱུར་བ་དང་། མ་ཎི་ཁོ་ན་ཡི་དམ་དུ་བྱེད་པ་འདི་ལ། ཆོས་སྒོ་ཐམས་ཅད་ཀྱི་གནད་འདུ། བྱིན་རླབས་མྱུར། ཉམས་རྟོགས་ཤུགས་ལ་སྐྱེས། བསྒྲུབ་ཐག་ཉེ། རབ་ཚེ་འདི། འབྲིང་འཆི་ཁ། ཐ་མའང་ལུས་སེམས་བྲལ་མ་ཐག་འཕགས་པ་ཐུགས་རྗེ་ཆེན་པོས་བདེ་བ་ཅན་དུ་ཁྲིད་དེ་སངས་རྒྱས་ཀྱི་གོ་འཕང་འཐོབ་པར་གདོན་མི་ཟའོ། །

མ་ཎིའི་ཕན་ཡོན་ཞིབ་ཏུ་ཛ་ཡ་བློ་བཟང་འཕྲིན་ལས་ཀྱི་མ་ཎིའི་ཕན་ཡོན་སྟོན་པའི་བྱིན་རླབས་མྱུར་འཇུག་དང་། གཙང་རྒན་བློ་བཟང་ངག་དབང་འཕྲིན་ལས་རྒྱ་མཚོའི་མ་ཎིའི་ཕན་ཡོན་ཀུན་དགའི་དཔལ་སྟེར་སོགས་སུ་གཟིགས་པར་བྱའོ། །

སྦྱིན་སྲེག

༡ སྦྱིན་སྲེག་གི་ངོ་བོ། སྦྱིན་སྲེག་གི་སྒྲ་བཤད་ལ། དུང་དཀར་ཚིག་མཛོད་ལས། སྦྱིན་ནི་དགའ་བའི་ལྷ་ལ་སྦྱིན་པ་གཏོང་བ་དང་། སྲེག་ནི་རང་ལ་གནོད་བྱེད་མཁན་གདོན་འདྲེ་མཐའ་དག་སྲེག་པའི་དོན་དུ་གསུངས། ཕྱི་བའི་ལུགས་ལ་ཕྱུགས་ཀྱི་སྦྱིན་སྲེག་དང་། རྟ་གཙང་གི་སྦྱིན་སྲེག་སོགས་ཡོད་པར་བཤད་ཀྱང་། རང་ཅག་ནང་བའི་ལུགས་ལ་སྲོག་ཆགས་མེར་བསྲེགས་པའི་ལུགས་ངན་འདི་མེད་ལ། འབྲུ་དང་སྨན་སོགས་སྦྱིན་སྲེག་བྱེད་ལ། དེ་ནི་ཐབ་ཀྱི་ནང་དུ་མེ་ལྷ་དང་། རང་གི་ཡི་དམ་དངོས་སུ་བཞུགས་པར་མོས་ནས། དེའི་ནང་མར་ཁུ་དང་འབྲུ་རིགས་སོགས་སྲེག་ཏེ་ལྷས་བཞེས་པར་མོས་པའི་སྔགས་ཆོག་ཞིག་ཏུ་འདོད་དོ། །སྦྱིན་སྲེག་གི་ཆོ་ག་ནི། གྲུབ་མཐའ་སོ་སོའི་མཁས་དབང་རྣམས་ཀྱིས་མཛད་པའི་རང་རང་གི་ལྷ་ལ་བསྟེན་པའི་ཆོ་ག་སྣ་ཚོགས་ཡོད་དོ། །

༢ སྦྱིན་སྲེག་གི་སྔོན་འགྲོ། སྦྱིན་སྲེག་གི་སྔོན་འགྲོའི་ཆོ་ག་ལ། ས་གཞི་བྱིན་གྱིས་བརླབས་པ་སྤྱི་དང་། བྱེ་བྲག་ཏུ་ཞི་བར་མེ་ཐབ་དཀར་བོ་ཟླུམ་པོ་དང་། ཡམ་ཤིང་བདུད་རྩི་ཅན་གྱི་ཤིང་གི་གཞོག་པ། རྒྱས་པར་མེ་ཐབ་སེར་བོ་གྲུ་བཞི། ཡམ་ཤིང་འབྲས་བུ་ཅན་གྱི་ཤིང་གི་གཞོག་པ། དབང་ལ་མེ་ཐབ་དམར་བོ་ཟླ་གམ་དང་། ཡམ་ཤིང་ཙན་དན་སོགས་ཀྱིས་གཞོག་པ། དྲག་པོར་མེ་ཐབ་ནག་པོ་གྲུ་གསུམ་དང་། ཡམ་ཤིང་ཚེར་མ་ཅན་གྱི་ཤིང་གིས་གཞོག་པ། ཞི་རྒྱས་དབང་དྲག་གི་སྦྱིན་སྲེག་གང་ཡིན་ཡང་། རང་རང་དང་མཐུན་པའི་སྲེག་རྫས་རྣམས་གཙང་མར་བཤམས་པ་དང་། སློབ་དཔོན་གྱིས་ལས་བཞི་གང་བྱེད་ཀྱི་རིགས་མཐུན་ཆོས་གོས་གསོལ་བའོ། །

༣ སྦྱིན་སྲེག་གི་རྫས་ཀྱི་རྣམ་གྲངས། ཡོངས་གྲགས་རྫས་ཆེན་བཅུ་གཉིས་ནི། ༡ ཡམ་ཤིང་། ༢ མར་ཁུ། ༣ ཏིལ། ༤ རམ་པ། ༥ འབྲས། ༦ ཞོ་ཟན། ﹙ཞོ་དང་མར་ཁུ་མངར་གསུམ་བསྲེས་པ﹚༧ ཀུ་ཤ ༨ ཡུངས་དཀར། ༩ སོ་བ། ༡༠ ནས། ༡༡ སྲན་མ། ༡༢ གྲོ་བཅས་སོ། །

༤ སྦྱིན་སྲེག་གི་དངོས་གཞི། དངོས་གཞི་ནི། རྡོར་དྲིལ་ཕྱག་ཏུ་བཟུང་ཞིང་། དགང་གཟར་བླུགས་དང་། རྫས་བྱིན་གྱིས་བརླབས་པ། མེ་སྦར་ཞིང་ཀུ་ཤ་བཀྲམ་པ། ལས་བཞི་གང་ཡིན་གྱི་ཕྱག་རྒྱ་དང་བཅས་པའི་འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ཀྱི་གཟུངས་སྔགས་བཟླ་བཞིན་སྲེག་རྫས་འབུལ་ཞིང་། ལས་བཞི་ལྷུན་གྱིས་གྲུབ་པ་སོགས་ཀྱི་དམིགས་པ་བཟུང་བ་དང་། འཕྲིན་བཅོལ། མཆོད་བསྟོད། བཟོད་གསོལ། གཤེགས་བསྡུ་བྱ་བ་སོགས་ཡིན་ཞིང་། རྒྱས་པར་ནི་རང་རང་གི་ཆོ་ག་རྣམས་སུ་གསལ་བས། ཞིབ་ཏུ་དེར་གཟིགས་པར་བྱའོ། །

༥ སྦྱིན་སྲེག་གི་རྗེས་ཀྱི་བྱ་བ། རྗེས་ཀྱི་བྱ་བ་ནི། སྦྱིན་སྲེག་གི་དགེ་བསྔོ་དང་། ཤིས་བརྗོད། ལས་ཀྱི་རྗེས་བསྡུ་བྱེད་པ་རྣམས་ཡིན་ཞིང་། ལས་ཀྱི་རྗེས་བསྡུ་ནི། ཞི་བའི་སྦྱིན་སྲེག་ཡིན་ན་མེ་རང་ཞི་འཇོག་པའམ། ཡང་ན་འོ་ཆབ་ཀྱིས་གཞིལ་ཞིང་། ཐབ་སོལ་ཆུ་བོའི་ནང་དུ་འདོར་བ་དང། རྒྱས་པ་ཡིན་ན་གོང་ལྟར་མེ་རང་ཞིར་འཇོག་པའམ། ཡང་ན་དྲི་བཟང་གིས་ཆུས་གཞིལ་ཞིང་ཐལ་སོལ་བང་མཛོད་དམ་རི་ལ་སྦ་བ་དང་། དབང་གི་སྦྱིན་སྲེག་ཡིན་ན་མེ་རང་ཞིར་འཇོག་པ་གོང་ལྟར་རམ། ཡང་། ཆང་གིས་གཞིལ་ཞིང་ཐབ་སོལ་རི་བོའི་རྩེ་རུ་འཕྱར་བ་དང་། དྲག་པོ་ཡིན་ན་མེ་རང་ཞིར་མི་འཇོག་པར་དམོད་མོ་དང་བཅས་ཏེ་གསོད་པའམ། ཡང་ན་དུག་ཆུས་གཞིལ་ཞིང་ཐལ་བ་རྒྱ་གྲམ་དོད་པའི་ལམ་དང་། མཆོད་རྟེན་གྱི་འོག་ཏུ་མནོན་པ་སོགས་ཡིན་ནོ། །

༦ སྦྱིན་སྲེག་གི་ཕན་ཡོན། ཕན་ཡོན་ནི། ཞི་བའི་སྦྱིན་སྲེག་གིས། དེ་ཡིས་སྐལ་བ་ངན་པ་དང་། །སྒྲིབ་པའི་བར་ཆད་ཐམས་ཅད་ཞི། །དམ་ཚིག་ཉམས་ཆག་ཉེས་ལྟུང་དང་། །ལས་ཀྱི་སྒྲིབ་པ་ཐམས་ཅད་ཟད། །སྨྱོ་འབོག་གདོན་ཆེན་ནད་ཡམས་གཅོད། །ནད་དང་འགལ་རྐྱེན་མ་ལུས་ཞི། །ཞེས་དང་། རྒྱས་པའི་སྦྱིན་སྲེག་གིས། སྨོན་པའི་ལེགས་ཚོགས་ཐམས་ཅད་ཀུན། །བསམ་པ་ཡིད་བཞིན་འགྲུབ་པར་འགྱུར། །ཞེས་དང་། དབང་གི་སྦྱིན་སྲེག་གིས། འཕྲིན་ལས་སྒྲུབ་འདོད་འདི་ལ་བརྩོན། །གང་བསམ་ཐོགས་མེད་ལྷུན་གྱིས་གྲུབ། །ཅེས་དང་། དྲག་པོའི་སྦྱིན་སྲེག་གིས། གཟུང་འཛིན་འཁྲུལ་བའི་དགྲ་གདོན་བགེགས། །ཐམས་ཅད་མ་ལུས་རབ་ཏུ་འཇོམས། །ཞེས་སོགས་དང་། གཞན་ཡང་རྡོ་རྗེ་རྣམ་འཇོམས་ལ་བརྟེན་ནས་མི་གཙང་བའི་གྲིབ་རིགས་སེལ་བ་དང་། ངན་སོང་སྦྱོང་རྒྱུད་ལ་བརྟེན་ནས་ངན་སོང་གི་སྡུག་བསྔལ་ཞི་བ་སོགས་ཕན་ཡོན་མཐའ་ཡས་པ་ཡོད་དོ། །

རབ་གནས།

༡ རབ་གནས་བྱ་དགོས་པའི་རྒྱུ་མཚན། སྤྱིར་རྟེན་གསུམ་གྲུབ་ཙམ་ནས་རབ་གནས་མ་བྱས་ཀྱང་། ཕྱག་མཆོད་ཀྱི་ཡུལ་དུ་འོས་པ་ནི། མགོན་པོ་ཀླུ་སྒྲུབ་ཀྱིས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཇི་འདྲ་འང་རུང་མཁས་པས་མཆོད། །ཅེས་གསུངས་ལ། འོ་ན། རབ་གནས་བྱ་དགོས་པ་གང་ཡིན་ཞེ་ན། རྒྱུད་སྡེ་ལས། སྦྱིན་བདག་གི་བསོད་ནམས་མཐའ་ཡས་པ་སྤེལ་བ། རྟེན་དེ་ཡུལ་གང་དུ་གནས་པ་དེར་བཀྲ་ཤིས་པ་སོགས་ཀྱི་ཆེད་དུ་རབ་གནས་གསུངས་པ་ལྟར། དགོས་པ་དེ་དག་གི་ཆེད་དུ་རབ་གནས་དགོས་ཏེ། རབ་གནས་ཀྱི་རྒྱུད་ལས། སྐྱེ་བོ་རབ་ཏུ་དང་བ་ཡིས། །བརྗོད་པའི་དགེ་བ་སྤེལ་བའི་ཕྱིར། །རབ་གནས་བསྟན་བཅོས་ལས་གསུངས་པ། །ཐ་སྙད་ཙམ་དུ་བྱས་པ་ཡིན། །ཞེས་པ་ལྟར། ཆོས་དབྱིངས་དོན་དམ་པར་བྱང་སེམས་རྣམས་ནི་གཡོ་མེད་ཀུན་ཏུ་ཁྱབ་པས་གཤེགས་བཞུགས་རབ་གནས་བགྱིར་མེད་ཀྱང་། ཀུན་རྫོབ་ཐ་སྙད་ཙམ་དུ་རབ་གནས་མ་བྱས་པར་ཡུན་རིང་ལུས་ན། བཀྲ་མི་ཤིས་པ་དང་མཆོད་པའི་འོས་སུ་མི་འགྱུར་བ་སོགས་ཏེ། རབ་གནས་ཀྱི་རྒྱུད་ལས། གང་དུ་སྐུ་གཟུགས་རྫོགས་པ་ལ། །བྱིན་མ་རླབས་པར་རིང་གནས་ན། །དེ་ལ་བཀྲ་མི་ཤིས་འབྱུང་ཞིང་། །ཇི་སྲིད་མཆོད་པ་དེར་མི་འོས། །དཔེར་ན་སྐྱེས་བུ་ལ་ལ་ཞིག། རིག་པའི་མཚན་ཉིད་སྤངས་པ་ན། །འཇིག་རྟེན་ཀུན་གྱིས་མཆོད་མི་བྱེད། །དེ་དེ་བཞིན་དུ་གཟུགས་བརྙན་དེ། །རབ་གནས་མ་བྱས་གཟུགས་བརྙན་ལ། །གང་གིས་མཆོད་ཅིང་ཕྱག་བྱེད་པ། །དམ་ཚིག་བྲལ་ཞིང་སྔགས་དམན་པས། །སྦྱིན་སྲེག་ཐལ་བ་འབྲས་མེད་མཚུངས། །ཞེས་སོ། །དེ་བས། རབ་གནས་ཀྱི་གོ་དོན་ཡང་། ཀུན་མཁྱེན་འཇམ་བཞད་ཀྱིས། དོན་དམ་པར་རབ་ཏུ་གནས་བྱ་གནས་བྱེད་སོགས་ཆོས་ཐམས་ཅད་བདེན་པར་མ་གྲུབ་པ་ནམ་མཁའ་ལྟ་བུ་ཞིག་ཡིན་ཀྱང་། ཐ་སྙད་དུ་རྫས་སྔགས་ཏིང་འཛིན་སོགས་རྟེན་ཅིང་འབྲེལ་བར་འབྱུང་བ་རྣམས་ཚོགས་པ་དང་། རྒྱལ་བ་རང་ཉིད་ཀྱི་གསུང་ལྟར་ཐུགས་དམ་བསྐུལ་བ་ལ་བརྟེན་ནས། ཡེ་ཤེས་པའི་ཚོགས་གདུལ་བྱའི་མོས་ངོ་དང་བསྟུན་པར་དམ་ཚིག་པ་ལ་རབ་ཏུ་གནས་པ་ལ་གསུངས་སོ། །ངེས་ཚིག་ནི། དངོས་བོ་ཕལ་བ་ཡེ་ཤེས་སེམས་དཔའི་དངོས་བོར་གྲུབ་སྟེ་གནས་པར་བྱེད་པ་ལ་ཟེར་རོ། །

དེ་བས། རབ་གནས་ནི་གསར་བཞེངས་ཀྱི་སྐུ་གསུང་ཐུགས་རྟེན་སོགས་ལ་ངོ་བོ་དངོས་མའི་བྱིན་རླབས་རབ་ཏུ་གནས་པར་བྱས་པ་ལ་བྱ་ཞིང་། འདི་ཡང་ཆོས་ལུགས་ཀྱི་བྱེད་སྒོ་ཆེ་གྲས་སུ་གཏོགས། དེ་ཡང་སྐུ་གསུང་ཐུགས་རྟེན་གསར་དུ་བཞེངས་གྲུབ་བྱུང་རྗེས། བགེགས་བསྐྲད་དང་རབ་གནས་མ་བྱས་ན། གནོད་བྱེད་འདྲེ་གདོན་སོགས་ཀྱིས་རྟེན་དེ་ལ་གནས་བཅས་ཏེ། བདག་ཏུ་བཟུང་ནས་གནོད་འཚེ་གཏོང་བས། དེ་ལ་བགེགས་བསྐྲད་དང་ཡེ་ཤེས་པ་བསྟིམས་དགོས་པ་ཡིན་པས། རབ་གནས་ཆེན་མོ་སོགས་རྒྱས་འབྲིང་བསྡུས་གསུམ་བྱེད་ཚུལ་ཡོད་པ་གྲུབ་མཐའ་ཁག་གི་བླ་མ་གོང་མ་རྣམས་ཀྱིས་ཆོ་ག་མང་དུ་མཛད་པ་ཡོད། །

༢ རབ་གནས་བྱེད་པའི་སློབ་དཔོན། རབ་གནས་བྱེད་པའི་སློབ་དཔོན་གྱི་མཚན་ཉིད་ལ་ཐེག་པ་རང་རང་གི་སྐབས་སུ་འབྱུང་ལ། ཐེག་པ་འོག་མ་འདུལ་བའི་སྐབས་སུ་མཁན་སོགས་གསུམ་འོས་པའི་མཚན་ཉིད་བསྡུས་ན་བརྟན་མཁས་ཀྱི་ཡོན་ཏན་གཉིས་དང་ཕྱེ་བ་ལྔ་ཕྲུགས་ཉེར་གཅིག་སོགས་དང་ལྡན་པ་དགོས། ཐེག་ཆེན་ལ་མདོ་ལུགས་ཀྱི་སྐབས་སུ་མཚན་ཉིད་ལྔ་ལྡན་སོགས་བཤད་ལ། སྔགས་ཀྱི་ཐེག་པར་ཆོ་ག་ཉི་ཤུ་སོགས་མང་བོ་ཞིག་བཤད་པ་ལས། འདིར་ནི་དུལ་སོགས་ཀྱི་མཚན་ཉིད་དང་ལྡན་ཞིང་། དེ་ཉིད་བཅུ་ཤེས་པ་ཞིག་དགོས་ཏེ། རྟེན་བརྟེན་པའི་དཀྱིལ་འཁོར་བྱེད་པ། ཏིང་འཛིན་གྱིས་ཉེས་ཚོགས་མནོན་ཅིང་ལེགས་ཚོགས་བསྐྱེད་པ། ཕྱག་རྒྱ་དང་གར་གྱི་སྟངས་སྟབས་ལ་མཁས་པ། གདན་ཁྲི་བཤམས་པ། བཟླས་བརྗོད་བྱེད་པ། སྦྱིན་སྲེག མཆོད་པ་འབུལ་བ། ལས་ཀྱི་སྦྱོར་བ་ཉེ་བར་བསྡུ་བ་རྣམས་ཀྱི་ཚུལ་ཤེས་ཤིང་། སྔགས་ཀྱི་དམ་སྡོམ་དག་པ། མཐོང་བ་བརྒྱུད་པའི་ཕྱག་བཞེས་ཀྱི་སྒོ་ནས་རབ་གནས་ཆོ་ག་ལ་མཁས་པ་ཞིག་དགོས་ཀྱི། སུ་ཐོད་ཐོད་ཀྱིས་མི་རུང་ངོ་། །དེ་ཉིད་བཅུ་ཤེས་པའི་སློབ་དཔོན་ལའང་། དམན་འབྲིང་མཆོག་གསུམ་ཡོད་པ་ནི། འགྲེལ་ཆེན་དྲི་མེད་འོད་ལས། དེ་ཉིད་བཅུ་ནི་ཡོངས་ཤེས་པ། །གསུམ་ལས་དགེ་སློང་མཆོག་ཡིན་འབྲིང་། །དགེ་ཚུལ་ཞེས་བྱ་དེ་དག་ལས། །ཁྱིམ་ན་གནས་པ་ཐ་མའོ། །ཡང་གནས་གཅིག་ཏུ་དེ་གསུམ་ཡོད་ཚེ་རབ་བྱུང་གཉིས་གང་རུང་གིས་བྱེད་དགོས་ཀྱི། ཁྱིམ་པས་བྱེད་མི་རུང་པ་ནི། དུས་འཁོར་རྩ་རྒྱུད་ལས། ལྷ་ཁང་ལ་སོགས་རབ་གནས་པོ། །རྟགས་ཅན་གྱིས་ནི་རྟག་ཏུ་བྱ། །གནས་གཅིག་དག་ཏུ་གསུམ་ཡོད་ན། །ཁྱིམ་པ་གོས་དཀར་ལྡན་པས་མིན། །

༣ རབ་གནས་ཀྱི་ཡུལ་དང་གནས། རབ་ཏུ་གནས་པའི་ཡུལ་ནི། སྐུ་གདུང་ཐུགས་རྟེན་གྱི་རིགས་བརྡུང་བ་དང་། བྲིས་པ། བླུགས་འབུར་ཅི་རིགས། གཙུག་ལག་ཁང་དང་རྡོ་དྲིལ་སོགས་གསར་བཞེངས་དང་། ཨར་ལྕོག་བྱས་ཏེ་བསྐྱར་བཞེངས་ཅི་རིགས་སོ། །ཀུན་མཁྱེན་འཇམ་བཞད་ཀྱིས། རབ་ཏུ་གནས་བྱའི་རྟེན་ནི། མཆོག་སྐུ་གསུང་ཐུགས་ཀྱི་རྟེན་དང་། དགེ་འདུན་གྱི་ཀུན་དགའ་ར་བ་རྡོ་རྗེ་དྲིལ་བུ་བགྲང་ཕྲེང་རྒྱན་དྲུག་སོགས་སོ། །ཕལ་བ་ནི་ཁང་བ་ཁང་བཟང་སྐྱེད་ཚལ་ཁྲོན་པ་ཆུ་མིག་སོགས་ཡིན་གསུངས་སོ། །

གནས་ནི། དུས་འཁོར་རྩ་རྒྱུད་ལས། གང་ན་ས་སྐྱོང་ཆོས་ལྡན་ཞིང་། །གང་ཞིག་ཁོ་ནར་སྐྱེ་དགུ་རྣམས། །བདེར་གནས་ས་འཛིན་རྩོད་མེད་པའི། །གནས་དེར་རྣལ་འབྱོར་བརྩམ་པར་བྱ། །ཞེས་དང་། སྤྱི་རྒྱུད་ལས། མཆོད་ན་ཆེན་པོ་ཉམས་དགའ་དང་། །དབེན་པ་ཡི་ནི་གནས་དག་ཏུ། །རི་ཡི་རྩེ་མོ་རྒྱ་ཆེན་དུ། །དངོས་གྲུབ་དཀྱིལ་འཁོར་བྲི་བར་བྱ། །ཞེས་དང་། གཞན་ཡང་། གནས་ནི་ཉམས་དགའ་འདུ་འཛི་མེད། །ཉེས་པ་ཐམས་ཅད་རྣམ་སྤང་ལ། །ཞེས་པ་ལྟར། ཉེས་པ་ཐམས་ཅད་ཅེས་པ་བཤན་པ་དང་སྨད་འཚོང་མ་དང་། སྦལ་སྦྲུལ་སྡོམ་སྡིག་སོགས་གནས་པའི་གཞི་དང་། གད་སྙིགས་དང་འདམ་རྫོབ་སོགས་ཀྱི་གནས་སྤང་དགོས་སོ། །

༤ རབ་གནས་བྱེད་པའི་དུས་ནི། རབ་གནས་ཀྱི་རྒྱུད་ལས། དཔྱིད་ཟླ་ར་བའམ་དཔྱིད་ཟླ་འབྲིང་། །དགུན་དང་དཔྱིད་ཀྱི་ཐ་ཆུང་ངམ། །དབྱར་ར་དེ་བཞིན་དབྱར་འབྲིང་བོ། །ཉི་མ་བྱང་དུ་གནས་པ་ཡི། །དཀར་བོའི་ཕྱོགས་ཀྱི་གཉིས་པ་འམ། །དེ་བཞིན་དེ་ལྟར་གསུམ་པ་དང་། །གང་ཚེ་གཟའ་ཚེས་དང་བསྟུན་ནས། །ནག་པོའི་ཕྱོགས་ལའང་བརྩམས་པར་བྱ། །ཞེས་སོགས་དང་། དུས་ཚེས་དེ་དག་ཏུ་རབ་གནས་བགྱིས་པའི་འབྲས་རྟགས་ཀྱང་། བདེ་མཆོག་དཀྱིལ་ཆོག་ལས། དབྱར་དུས་རབ་གནས་གྲུབ་པའོ། །སྟོན་ནི་བདེ་བ་སྟེར་བར་འགྱུར། །དགུན་སྟོད་ཡེ་ཤེས་འཕེལ་བ་སྟེ། །དགུན་སྨད་དབང་ཕྱུག་ཐམས་ཅད་འབྱུང་། །དཔྱིད་ཀ་དཔལ་ནི་རབ་ཏུ་སྦྱིན། །སོས་ཀ་རྒྱལ་དང་ཞི་བ་སྟེར། །རབ་གནས་དུས་ནི་ཐམས་ཅད་དུ། །སངས་རྒྱས་བཞུགས་སུ་འཇུག་པར་བཞེད། །ཅེས་དང་། ཐམས་ཅད་དུ་ནི་ཆུ་སྟོད་དང་། །སྣར་མ་གྲོ་བཞིན་དེ་བཞིན་དབོ། །ལག་པ་སྣུབས་དང་སྣྲོན་དང་ནི། །རྒྱལ་དང་ཆུ་སྨད་དེ་བཞིན་ནོ། །ཁྲུམས་སྨད་དག་ཀྱང་དེ་བཞིན་དུ། །རྒྱུ་སྐར་འདི་དག་ཐམས་ཅད་དུ། །རབ་ཏུ་གནས་པ་མཆོག་ཏུ་བཤད། །ཞེས་སོགས་ཟླ་བ་དྲུག་དང་། གཟའ་བཞི། སྐར་མ་བཅུ་བཞི་སོགས་ལ་རབ་གནས་བྱ་བར་གསུངས་ཏེ། ཞིབ་ཏུ་རྗེའི་རབ་གནས་རྒྱས་པའི་ཟིན་བྲིས་སོགས་ལས་ཤེས་པར་བྱ་ཞིང་། ཁྱད་པར་དུ་དགུན་ཟླ་འབྲིང་བོ་དང་། དཔྱིད་ཟླ་འབྲིང་བོ་ནི་འཁོར་ལོའི་སྒྱུར་རྒྱལ་དང་། སངས་རྒྱས་ཀྱིས་དབང་བསྐུར་བའི་དུས་ཆེན་ཡིན་པས། མཆོག་ཏུ་བཀྲ་ཤིས་པར་གསུངས། དེ་ལས་གཞན། ཚེས་གྲངས་ངན་དང་དུས་མིན་དང་། །གནས་མིན་ཆོ་ག་མི་ལྡན་པར། །མཁས་པས་དཀྱིལ་འཁོར་མི་འབྲིའོ། །བྲིས་ན་གདོན་མི་ཟ་བར་ཤི། ཞེས་གསུངས་ལ།

འོན་ཀྱང་། སློབ་དཔོན་ཏིང་འཛིན་མཆོག་དང་ལྡན་ཞིང་། མི་མཐུན་ཕྱོགས་ཟིལ་གྱིས་མནོན་པར་ནུས་ན་ནི་དུས་ཚོད་དགག་བྱ་ཅི་ཡང་མེད་པར་མ་ཟད། གྲུབ་ཆེན་འགའ་ཟུང་གིས་རབ་གནས་ཀྱི་ཆོ་ག་སོགས་ཅི་ཡང་མི་བརྟེན་པར། འཇིག་རྟེན་པར་ཞེན་ལོག་བྱུང་བ་ལྟ་བུའི་རབ་གནས་བགྱིད་པའང་རེ་གཉིས་སྲིད་དེ། དཔེར་ན། འབྲུག་པ་ཀུན་ལེགས་ཀྱི་རྣམ་ཐར་ལས། དེ་ནས་ངས་ར་ལུང་དུ་ཕྱིན་པའི་ཚེ་ལམ་བར་བ་རྣམས་ཞོལ་ནས་བརྒྱུད་ཡོང་། རྒད་གསུམ་དར་ཞེས་པ་ལོ་བརྒྱད་ཅུ་ལོན་པ་ཞིག་གིས་བཀའ་བརྒྱུད་གསེར་ཐང་གི་ཞལ་ཐང་རི་མོ་ཅན་ཤིན་ཏུ་ལེགས་པ་ལ། གསེར་བྲིས་མེད་པ་ཞིག་རྒྱབ་ཏུ་འཁུར་ཏེ་འགྲོ་བ་དང་འཕྲད་བྱུང་། རྒད་པུ་གར་འགྲོ་ཞེས་བྱས་པས་ང་ར་ལུང་དུ་ངག་དབང་ཆོས་རྒྱལ་གྱི་དྲུང་དུ་སྐུ་ཐང་རབ་གནས་ཤིག་ཞུ་བ་ལ་འགྲོ་རྒྱུ་ཡིན་ཟེར་བས། རྒད་པུ་ཁྱེད་ཀྱི་སྐུ་ཐང་དེ་ང་ལ་སྟོན་དང་བྱས་པས། ཁྱོད་ལ་མི་སྟོན་ངག་དབང་ཆོས་རྒྱལ་ལ་སྟོན་རྒྱུ་ཡིན་ཟེར། ཅིས་ཀྱང་ང་ལ་སྟོན་དང་བྱས། རྒྱ་བཤིག་ནས་བལྟས་པས་རྒད་པུས་དགའ་མོ་ཨེ་འདུག་ཟེར། ངས་ཀྱང་དགའ་མོ་རང་འདུག་སྟེ། འདི་ཞིག་དགོས་རྒྱུ་ཡིན་གསུངས་ནས་ཕྱག་མཇེ་ལ་འཇུས་ནས་ཕར་གཡུག་ཚུར་གཡུག་མཛད་ཅིང་སྐུ་ཐང་གི་སྟེང་དུ་ཆུ་ཐེ་རེ་རེ་བཏང་བས། རྒད་པུ་ནི་དབུགས་ཁ་ཤོང་ཚད་བཏོན་ཏེ། ཨ་ཧོ་ཧོ། ཨ་ཕུའུ། ཨའུ། སྨྱོན་པ་ཁོ་དེ་འདྲ་མ་བྱེད་ཟེར། རྒད་པུ་ངུ་ཞིང་འདུག ངས་ཀྱང་རྒད་པུ་མ་ངུ་ཟེར་ནས་ཞལ་ཐང་རློན་པ་དེ་བསྒྲིལ་ནས་རྒད་པུ་རང་ལ་བསྐུར། ད་རབ་གནས་ཞུ་རུ་ཕྱིན་པས་ཆོག་ཟེར་རྒད་པུ་བརྫངས་པས། རྒད་པུ་ར་ལུང་དུ་སླེབས་ངག་དབང་ཆོས་རྒྱལ་མཇལ་ཚེ། ང་ཡི་བསོད་ནམས་བསག་པའི་རྟེན་བཀའ་བརྒྱུད་གསེར་འཕྲེང་ཞིག་བཞེངས་པ་འདི་རུ་ཕྱག་ནས་ཞུ་རུ་ཡོང་བའི་ལམ་དུ་སྨྱོན་པ་ཞིག་དང་འཕྲད་བྱུང་། ངའི་སྐུ་ཐང་གི་སྟེང་དུ་ཆུ་བྱས་ནས་མེད་པ་ལགས། འདི་ལ་གཙང་བྱས་ནས་ཆོག་མི་ཆོག་ད་དུང་ཨེ་ཡོད་གཟིགས་དང་ཞུས་པས། རྒྱ་བཤིག་ནས་གཟིགས་པའི་ཆབ་གང་སླེབས་ཐམས་ཅད་གསེར་གྱི་དྲ་བ་དྲ་ཕྱེད་མུ་ཁྱུད་ཀྱི་འོད་ཟེར་ཕྲ་ཕུང་ངེ་བར་སོང་འདུག་པས། བླ་མས་ཀྱང་རབ་གནས་བྱེད་མི་དགོས་པར་འགྲུབ་འདུག་གསུངས། རྒད་པུ་བླ་ན་མེད་པའི་དད་པ་ཐོབ་སྟེ། ལེགས་སོ་བཀའ་དྲིན་ཆེ་ལགས། རྒད་པུ་ཁྱོད་ལམ་དུ་སྨྱོན་པ་གཅིག་དང་འཕྲད་པ་དེ་གྲུབ་ཐོབ་འབྲུག་སྨྱོན་ཆེན་པོ་ལགས་པས་རབ་གནས་མི་དགོས་གསུངས། རྒད་པུས་ངའི་ཐང་སྐུ་འདི་ཡང་ཀུན་ལེགས་དངོས་དང་ཁྱད་པར་མེད་པའི་བྱིན་རླབས་སྩོལ་ཅིག་ཟེར། སྐུ་ཐང་དེ་དེང་སང་ཡང་ཐིང་ཡུལ་རྡོར་རྟ་མགོའི་མཆོད་ཁང་ན་བཞུགས་ཡོད་དོ་གསུངས་པ་ལྟ་བུ་ལགས་ལ། དེ་ནི་ཆོ་ག་ལ་མ་བལྟོས་པའི་དོན་དམ་སྤྲོས་བྲལ་གྱི་རབ་གནས་ཞེས་བྱ་སྟེ། དེ་ཡང་ཆོས་ཉིད་ཟབ་མོའི་དོན་ལ་དབང་འབྱོར་བའི་སྐྱེས་བུ་ཆེན་པོ་རྣམས་ཀྱིས་ནི་དགོངས་པ་གཏད་པ་ཙམ་གྱིས་རི་བྲག་སོགས་རང་བྱུང་དང་བཅོས་པའི་རྟེན་གང་ཡིན་ཀྱང་ཡེ་ཤེས་ཆེན་པོའི་འཁོར་ལོར་བྱིན་གྱིས་རློབས་ནུས་པ་ཡིན་ནོ། །

༥ ཆོ་ག་དམན་པའམ་རབ་གནས་མ་བྱས་པའི་ཉེས་པ་ནི། རབ་གནས་ཀྱི་རྒྱུད་ལས། གང་དུ་སྐུ་གཟུགས་རྫོགས་པ་དང་། བྱིན་མ་བརླབས་པར་རིང་གནས་ན། །དེ་ལ་བཀྲ་མི་ཤིས་འབྱུང་ཞིང་། །ཇི་སྲིད་མཆོད་པ་དེ་མི་འོས། །དཔེར་ན་སྐྱེས་བུ་ལ་ལ་ཞིག །རིག་པའི་མཚན་ཉིད་སྤངས་པ་ལ། །འཇིག་རྟེན་ཀུན་གྱིས་མཆོད་མི་བྱེད། །དེ་དེ་བཞིན་དུ་གཟུགས་བརྙན་དེ། །རབ་གནས་མ་བྱས་གཟུགས་བརྙན་ལ། །གང་གིས་མཆོད་ཅིང་ཕྱག་བྱེད་པ། །དམ་ཚིག་བྲལ་ཞིང་སྔགས་དམན་པས། །སྦྱིན་སྲེག་ཐལ་བ་འབྲས་མེད་མཚུངས། །ཞེས་དང་། ཆོ་ག་དམན་པས་མི་བྱ་སྟེ། །རབ་གནས་རྟག་པར་བཀྲ་མི་ཤིས། །འཇིག་རྟེན་འདིར་ཡང་སྡུག་བསྔལ་ལ། །འཇིག་རྟེན་ཕ་རོལ་འཇིགས་པ་ཆེ། །དེ་བས་འབད་པ་ཐམས་ཅད་ཀྱིས། །དངོས་གྲུབ་འདོད་པས་ནན་ཏན་བྱ། །ཞེས་སོ། །

༦ རབ་གནས་ཀྱི་ཕན་ཡོན། རབ་གནས་ཀྱི་རྒྱུད་ལས། ཆོ་ག་འདི་ཉིད་ནུས་པ་ཡིས། །རྟོག་པ་ལས་གསུངས་ཚུལ་ལེགས་པ། །དེ་བྱས་བསོད་ནམས་ཆེ་བ་ནི། །མཐོང་དང་མ་མཐོང་འབྲས་བུ་སྐྱེ། །སྐུ་གཟུགས་ཀྱི་ནི་མཚན་ཉིད་ཀྱིས། །དེ་ལ་བྱིན་རླབས་འཇུག་པར་འགྱུར། །ཞེས་དང་། དེ་བཞིན་དུ་ཡང་སྔགས་གནས་པས། །མཆོད་ལྡན་མཆོད་པ་བྱེད་པ་དང་། །དེ་ཡི་ལས་ཀྱི་རྣམ་སྨིན་གྱིས། །སྐྱེ་བ་རུ་ནི་མཆོད་པར་འགྱུར། །ཞེས་དང་། བདེ་མཆོག་སྡོམ་འབྱུང་ལས། ཇི་ལྟར་རབ་ཏུ་གནས་བྱའི་ལྷ། །རབ་ཏུ་གནས་པར་བྱ་བར་ནུས། །སློབ་མ་དད་པའི་གསོལ་བཏབ་པའི། །བསོད་ནམས་ཕྱིར་ནི་བྱ་བ་ཡིན། །ཞེས་དང་། ཇོ་བོ་རྗེས། རབ་གནས་ཚད་ལྡན་སུས་བྱས་པ། །བསམ་པ་ཐམས་ཅད་ཡོངས་རྫོགས་ཤིང་། །འཁོར་ལོས་སྒྱུར་རྒྱལ་དབང་ཕྱུག་ནི། །འཐོབ་འགྱུར་འདི་ལ་ཐེ་ཚོམ་མེད། །ཅེས་སོ། །

རྒྱས་པར་ཀུན་མཁྱེན་འཇམ་དབྱངས་བཞད་པའི་རབ་གནས་ཀྱི་ཆོ་ག་ཀླག་པའི་དོན་གྲུབ་དགེ་ལེགས་ཀྱི་གཏེར་ཆེན་བཀྲ་ཤིས་རབ་རྒྱས་ཞེས་པར། རབ་གནས་བྱེད་དགོས་མི་དགོས་ཀྱི་ཁྱད་པར། ཆོ་ག་དག་མ་དག་གི་སྐྱོན་ཡོན། སློབ་དཔོན་གྱི་མཚན་ཉིད། གནས་དང་དུས། རྟེན་གྱི་ཁྱད་པར། དོན་དང་སྒྲ་བཤད། ལྷ་གང་གི་སྒོ་ནས་བྱེད་པ། ཆོ་གའི་ཁྱད་པར་བཅས་བཅུའི་སྒོ་ནས་གསུངས་ཡོད་པས་དེ་དག་ཏུ་གཟིགས་པར་བྱའོ། །

རྟེན་ལ་ནང་གཞུག་འབུལ་ཚུལ།

རྟེན་ལ་ནང་གཞུག་དགོས་པའི་ཁུངས་ནི། མདོ་ལས་རིང་བསྲེལ་ཡུངས་འབྲུ་ཙམ་བཞུགས་པའི་མཆོད་རྟེན་ལ། ཞེས་དང་། ཡང་། རིང་བསྲེལ་ཡུངས་འབྲུ་ཙམ་མཆོད་རྟེན་སྐྱུ་རི་རའི་འབྲུ་ཙམ་གྱི་ནང་དུ་བཅུག་སྟེ་སྲོག་ཤིང་ཤིང་ཁབ་ཙམ་གཟུག་ཅིང་གདུགས་རྒྱ་ཤུག་ལོ་མ་ཙམ་གྱིས་འགེབས་ཞེས་སོགས་ཀྱིས་འགྲུབ་ཞིང་། དེ་ཡང་སོ་སྐྱེས་ཀུན་རྫོབ་ཀྱི་སྣང་ངོར་། རྟེན་ལ་ནང་གཞུག་དགོས་ཏེ། ཀོང་སྤྲུལ་ཡོན་ཏན་རྒྱ་མཚོས། བསྟན་འགྲོའི་ཕུན་ཚོགས་རྒྱལ་བའི་རྟེན་ལས་བྱུང་། །དེ་ཡི་ནང་གཞུག་མི་ལ་སྲོག་བཞིན་གཅེས། །གསུངས་ལ། དེ་ལེགས་པར་མ་བསྒྲུབ་ན་མི་ལ་རྣམ་ཤེས་མ་ཞུགས་པ་ནང་བཞིན། གཟུགས་བེམ་དེ་ལ་གདོན་བགེགས་ཅི་རིགས་ཞུགས་ཏེ། བསྟན་འགྲོར་གནོད་ཅིང་། རྒྱུ་ནོར་ཆུད་གཟན་པ་ལས་མེད། རྐྱེན་དབང་གིས་ནང་གཞུག་སོགས་མ་གྲུབ་པ་ཡིན་ན། གནས་སྐབས་ཞལ་ཕྱེས་ནས་མི་འཇོག་པར། ལྷ་བཟོའི་ལག་ཆ་རྟེན་དང་ལྷན་དུ་འཇོག་པ་འམ། བྱིན་ཅན་གྱི་དམ་རྫས་སམ་ས་ཙྪ། ལྷ་རང་རང་གི་སྙིང་བོ་སོགས་འཇོག་དགོས། ནང་གཞུག་དང་རབ་གནས་ལེགས་པར་གྲུབ་ན། བསོད་ནམས་བསགས་པའི་ཞིང་སར་གྱུར་བར་མདོ་རྒྱུད་དུ་མར་གསུངས་སོ། །

གཟུངས་གཞུག་འབུལ་ཡུལ་ནི། སྐུ་གསུང་ཐུགས་གསུམ་ལས། གཙོ་བོ་སྐུ་གཟུགས་གཉིས་ཡིན་ལ། གསུང་རྟེན་རང་ཉིད་ཆོས་ཀྱི་རང་བསྲེལ་ལགས་པས། ནང་གཞུག་མི་དགོས་པར་གསུངས་པ་དང་། ཁ་ཅིག་ལྒིགས་བམ་གྱི་མཇུག་ཏུ་རྟེན་འབྲེལ་སྙིང་བོ་འབྲི་སྲོལ་ཡོད་ཡང་ཟེར།

འབུལ་བྱ་གཟུངས་གཞུག་གམ་རིང་བསྲེལ་ནི། བྱང་ཆུབ་སྙིང་བོ་རྒྱན་གྱི་གཟུངས་ཀྱི་ཆོ་ག་ཞིབ་མོ་ལས་གསུངས་པ་བཞིན། ནང་གཞུག་རིང་བསྲེལ་ལ་ལྔ་ལས། ༡ ས་ཙྪ་དང་མཆོད་རྟེན་སོགས་ནི་ཆོས་སྐུའི་རིང་བསྲེལ་དང་། ༢ གཟུངས་ཆེན་སྡེ་ལྔ་དང་ལྒིགས་བམ་སོགས་ཆོས་ཀྱི་རིང་བསྲེལ། ༣ སངས་རྒྱས་བྱང་སེམས་ཀྱི་གདུང་རུས་སོགས་སྐུ་གདུང་རིང་བསྲེལ། ༤ སངས་རྒྱས་བྱང་སེམས་ཀྱི་དབུ་སྐྲ་དང་སེན་མོ། ན་བཟའ་སོགས་སྐུ་བལ་གྱི་རིང་བསྲེལ། ༥ སངས་རྒྱས་དང་དམ་པའི་སྐྱེས་བུ་སོགས་ཀྱི་འཕེལ་གདུང་སྟེ་ཡུངས་འབྲུའི་རིང་བསྲེལ་ལོ། །གཟུངས་སྔགས་ཀྱི་རིགས་ནི། སྟོན་པ་ཐུགས་རྗེ་ཅན་ཁོང་རང་ཉིད་ཀྱིས་ཆེད་དུ་བསྔགས་པ་གཙུག་ཏོར་རྣམ་རྒྱལ། གཙུག་ཏོར་དྲི་མེད། གསང་བ་རང་བསྲེལ། བྱང་ཆུབ་རྒྱན་འབུམ། རྟེན་འབྲེལ་སྙིང་བོ་སྟེ་རྩ་བའི་གཟུངས་ཆེན་སྡེ་ལྔ་ཡོངས་རྫོགས་དང་། ལྷ་རང་རང་གི་སྙིང་བོ་དང་ཉེ་སྙིང་གཙོ་བོ་བྱ། ཆུང་ན་དེ་དག་གི་སྙིང་བོ་དང་མཆོད་རྟེན་ལ་ནི་དེ་དག་དང་འོད་ཟེར་དྲི་མེད་གྱི་སྙིང་བོ་ཙམ་ལས་གཞན་མ་འཛོམས་ཀྱང་ཆོག

བསྒྲིལ་ལུགས་ནི། བུ་སྟོན་སོགས་ཀྱིས་མཇུག་ནས་བསྒྲིལ་བ་དང་། ངོར་ཆེན་སོགས་ཀྱིས་དབུ་ནས་དྲིལ་བའི་ལུགས་གཉིས་ཡོད་ཀྱང་། གང་ལྟར་དམ་པོར་སྒྲིལ་དགོས།

མཆོད་རྟེན་དང་ས་ཙྪ་བྱིན་ཅན་བཞག་ན། གདོན་བགེགས་མི་འཇུག་ཅིང་། རབ་གནས་མ་གྲུབ་ཀྱང་བྱིན་བརླབས་ཆགས་པར་གསུངས་སོ། །

ཡང་བསྟན་འཛིན་གྱི་སྐྱེས་བུར་རློམ་པའི་དམ་ཚིག་ཉམས་ཆག་བྱུང་བའི་བླ་གཟུགས་ཀྱི་ཡོ་བྱད་དང་། གསུང་རྟེན་འདྲ་མིན། འཇིག་རྟེན་པའི་ལྷ་སྐུའི་རིགས་ལ་ཤིན་ཏུ་འཛེམ་དགོས། ལམ་ཞུགས་སོ་སྐྱེས་བསླབ་པ་གསུམ་ལྡན་གྱི་རུས་པ་ནང་གཞུག་ཏུ་རུང་ཡང་། དེ་དང་རྒྱུད་ཚོད་མཐོ་བས་ཕྱག་བྱས་ན་ཕྱག་ཡུལ་ལ་གནོད་པར་འགྱུར་ན། ཐ་མལ་བའི་རུས་བུ་གཏན་དུ་ནང་དུ་གཞུག་མི་རུང་བ། འོད་སྲུངས་རྫོགས་བྱེད་ཀྱི་གཏམ་རྒྱུད་ལས་ཤེས་སོ། །

འོན་ཀྱང་། སྦྱོང་རྒྱུད་ལས། དེ་ནས་རྣལ་འབྱོར་ཅན་གྱི་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བརྟག་ནས་ཀྱང་། །མཆོད་རྟེན་དབུས་སུ་བཞག་པར་བྱ། །ཞེས་གསུངས་པ་ཡང་། དཀོན་མཆོག་གསུམ་གྱི་བདེན་པ་དང་། བླ་མ་ཐུགས་རྗེ་ཅན་གྱི་བྱིན་རླབས་དང་། རིག་སྔགས་ཏིང་འཛིན་གྱི་མཐུ་སྟོབས་དང་། ཆོས་ཀྱི་དབྱིངས་རྣམ་པར་དག་པའི་བསམ་གྱིས་མི་ཁྱབ་པའི་ནུས་མཐུ་ལ་བརྟེན་ཏེ། རྟོགས་ལྡན་ཞིག་དང་དེ་འབྲེལ་སྔོན་ལས་ཀྱི་བསགས་རྒྱབ་ཅན་ཞིག་དང་འཕྲད་ན་དེ་འདྲ་སྲིད་པ་མ་གཏོགས། དེ་འདྲ་ཅི་ཡང་མེད་པར་རུས་ཆོག་བྱས་ལོ་ཙམ་གྱིས་ནང་རྟེན་ཏུ་རློམ་པ་ནི། གཤིན་པོ་ལ་གནོད་སྐྱེལ་བ་ལས་གཞན་གང་ཡང་མེད་དོ། །

ནང་གཞུག་འབུལ་བ་བོ་ནི། རབ་དགེ་སློང་རྡོ་རྗེ་འཛིན་པ། འབྲིང་དགེ་ཚུལ། ཐ་མ་དགེ་བསྙེན་ནམ་ཁྱིམ་པ་སོགས་ཀྱིས་གསོ་སྦྱོང་བླངས་ཏེ། ཤ་ཆང་སྒོག་ཙོང་སོགས་སྤངས་ནས། སྤྱོད་ལམ་ཡང་དག་དང་ཕྱག་ལེན་ཞིབ་ཚགས་ཀྱིས་དབུལ་བ་གལ་ཆེའོ། །

རྟེན་གྱི་སྲོག་ཤིང་གི་རྒྱུ། ཙན་དན་དང་ཨ་གར་ཤུག་པ་སོགས་དགོས་ལ། དེ་ཡང་གནས་གཙང་དང་ས་མིང་ཡག་ས་ནས། གནས་བདག་གི་མི་དང་། མི་མ་ཡིན་པའི་གཞི་བདག་ལ་མཆོད་གཏོར་ཕུལ་ཏེ་སློང་ཞིང་། ཡར་ངོ་གཟའ་སྐར་འཕྲོད་སྦྱོར་བཟང་བའི་ཉིན་ཞིག ཤར་ཕྱོགས་མི་ནོར་བའི་མཚན་མ་བཏབ་སྟེ། དབྱིབས་གྲུ་བཞི་རྩ་རྩེའི་རྣམ་པ་ཅན། རིང་ཐུང་དང་ཆེ་ཆུང་རྟེན་གྱི་བབ་དང་བསྟུན་ནས། ཤར་ངོས་ཀྱི་རྩེར་རྣམ་རྒྱལ་མཆོད་རྟེན། མི་ཤོང་ན་བྷྲུཾ་ཡིག་བྲིས་ཀྱང་ཆོག ཞབས་མཐིལ་གྱི་ལྟེ་བ་དང་ཕྱོགས་བཞིར་པད་འདབ་རྭ་དང་བཅས་པས་སྲོག་ཤིང་གི་ཞབས་བཏུམས་ལ། སྐུ་གཟུགས་ཀྱི་སྲོག་ཤིང་ཡིན་ན་ཤར་ངོས་སུ། སྤྱི་བོ་ཨོཾ། མགྲིན་པར་ཨཱ། ཐུགས་ཀར་ཧཱུཾ། ལྟེ་བར་ཏྲཾ། གསང་གནས་སུ་ཧྲཱྀ་ཡིག་འབྲི། སྤྱི་བོའི་ཨོཾ་གྱི་མཐའ་བསྐོར་དུ་རིག་པ་ཆེན་པོའི་གཟུངས། ཨོཾ་སརྦ་བིངྱཱ་སྭཱ་ཧཱ། ཞེས་དང་། མགྲིན་པའི་ཨཱའི་མཐའ་བསྐོར་དུ། ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷྲ་ཎ། ཏ་ཐ་ད་ངྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཞེས་དབྱངས་གསལ་དང་། ཐུགས་ཀར་ཧཱུཾ་གྱི་མཐའ་བསྐོར་དུ། ཨོཾ་བཛྲ་ཨ་ཡུ་ཥེ་སྭཱ་ཧཱ། ཞེས་དང་། ལྷ་རང་རང་གི་སྙིང་བོ། ལྟེ་བར་ཏྲཾ་གི་འོག་ནས་ཤར་ངོས་སུ་གཙུག་ཏོར་རྣམ་རྒྱལ་གྱི་གཟུངས། ཨོཾ་བྷྲཱུཾ་སྭཱ་ཧཱ། ཨོཾ་ཨ་མྲྀ་ཏ་ཨ་ཡུ་རྡ་དེ་སྭཱ་ཧཱ། ཞེས་དང་། ཏྲཾ་གི་འོག་ནས་ལྷོར་གཙུག་ཏོར་དྲི་མེད་ཀྱི་གཟུངས། ཨོཾ་ན་མ་སྟྲཻ་ཡ་དྷི་ཀ་ནྡཾ། སརྦ་ཏ་ཐ་ག་ཏ་ཧྲི་ད་ཡ་གརྦྷེ་ཛྭ་ལ་ཛྭ་ལ། དྷ་རྨྨ་དྷྱ་ཏུ་གརྦྷེ་སཾ་བྷ་ར་མ་མ། ཨ་ཡུཿསཾ་ཤོ་དྷ་ཡ་སཾ་ཤོ་དྷ་ཡ། མ་མ་སརྦ་པ་བཾ། སརྦ་ཏ་ཐ་ག་ཏ་ས་མནྟོ་ཤྟི་ཥ་བི་མ་ལེ་ཤུད་དྷི་ཧཱུཾ་ཧཱུཾ་ཧཱུཾ། ཨཾ་བཾ་སཾ་ཛ་སྭཱ་ཧཱ། ཞེས་དང་། ཏྲཾ་གི་འོག་ནས་ནུབ་ཏུ་གསང་བ་རིང་བསྲེལ་གྱི་གཟུངས། ཨོཾ་སརྦ་ཏ་ཐ་ག་ཏ་ཨུཥྞི་ཥ་དྷ་དུ་མུ་དྲཱ་ན་སྭཱ་ཧཱ། སརྦ་ཏ་ཐ་ག་ཏ་སྭཱ་དྷཱ་ཏུ་བི་བྷུ་ཥི་ཏ་ཨ་དྷི་ཥྛི་ཏེ་ཧུ་རུ་ཧུ་རུ་ཧཱུཾ་ཧཱུཾ་སྭཱ་ཧཱ། ཏྲཾ་གི་འོག་ནས་བྱང་དུ་བྱང་ཆུབ་རྒྱན་འབུམ་གྱི་གཟུངས། ཨོཾ་སརྦ་ཏ་ཐ་ག་ཏ་བྱཱ་བ་ལོ་ཀི་ཏེ། ཛ་ཡ་ཛ་ཡ་སྭཱ་ཧཱ། ཧྲི་ད་ཡཾ། ཨོཾ་ཧུ་རུ་ཧུ་རུ། ཛ་ཡ་མུ་ཥེ་སྭཱ་ཧཱ། ཨུ་བ་ཧྲི་ད་ཡཾ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཞེས་སོགས་ཀྱི་གཟུངས་འབྲི། གསང་གནས་སུ་ཧྲཱྀ་ཡིག་གི་ཐད་དུ། ཨོཾ་སུ་པྲ་ཏི་ཥྛ་བཛྲ་ཡེ་སྭཱ་ཧཱ། དེ་ནས། ཡེ་དྷ་ཪྨཱ་ཧེ་ཏུ་པྲ་བྷ་པཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བད་ཏ་ཏེ་ཥཙྙ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿཡེ་སྭཱ་ཧཱ། ཞེས་དང་། བཞི་ཀའི་གཤམ་དུ་ཤིས་བརྗོད་འདོད་གསོལ་སྨོན་ལམ་ཅི་རིགས་ཀྱིས་བརྒྱན་ཏེ། ལྷ་སོ་སོའི་མདོག་མཚུངས་ཀྱི་ན་བཟའ་འམ། ལས་བཞི་ལྷུན་གྲུབ་ཀྱི་མདོག་དར་གོས་ཀྱིས་དྲིལ་བར་བྱའོ། །

དེ་ནས་སྲོག་ཤིང་གཟུགས་ཏེ་རྟེན་གསུམ་རིམ་པ་མ་འཆོལ་བར་ཕུལ་ཏེ། བར་སྟོང་དུ་ཤུག་པ་དང་བ་ལུ་སོགས་དྲི་ལྡན་གྱི་སྨན་ཕྱེ། རིན་ཆེན་རིགས། འབྲས་བུ་གསུམ། བཟང་དྲུག རྩ་བ་ལྔ། འབྲུ་ནག་མིན་པའི་འབྲུ་སྣ། དཀར་གསུམ་མངར་གསུམ་སོགས་ལྟིར་གྱིས་གང་ནས། མཐུན་རྐྱེན་ལེགས་ཚོགས་གོང་འཕེལ་དུ་གནོད་སྦྱིན་ཕོ་མོ། གནོད་སྦྱིན་བང་མཛོད། དབུལ་བའི་བསྐལ་བ་སེལ་ཕྱིར་རིན་པོ་ཆེའི་རིགས། ནད་ཀྱི་བསྐལ་བ་སེལ་ཕྱིར་སྨན་སྣ། མཚོན་གྱི་བསྐལ་བ་སེལ་ཕྱིར་མཚོན་ཆའི་རིགས་ཕུལ་ཏེ་མཐར་རྒྱ་གྲམ་གྱིས་གཅད་པར་བྱའོ། །

བྲིས་ཐང་ཡིན་ན། རྒྱབ་ཏུ་གནས་གསུམ་དུ་ཡིག་འབྲུ་གསུམ་མམ་གནས་ལྔ་སྐྱེ་མཆེད་བྱིན་རླབས། ལྷ་སོ་སོའི་མཚན་སྔགས་དང་གཟུངས། སརྦ་བིངྱཱ། བཛྲ་ཨ་ཡུ། རྟེན་སྙིང་། གསོ་སྦྱོང་དང་བཀྲ་ཤིས་སོགས་འབྲི་ལ། ཧ་ཅང་ཆུང་ན་འབྲུ་གསུམ་གྱིས་ཀྱང་ཆོག་གོ །

ཕྭ་གཡང་།

༡ ཕྭ་གཡང་གི་གོ་དོན། སྤྱིར་གཡང་ཟེར་བ་ནི། ཚེ་དང་བསོད་ནམས། དཔལ་དང་འབྱོར་བ། སྙན་གྲགས་དང་རིགས་རྒྱུད། ཆོས་སྲིད་ཀྱི་ལེགས་པའི་ཆ་ཐམས་ཅད་ཚང་བ་ལ་གཡང་དང་། དེ་མ་ཚང་བ་མེད་པར་འགུགས་ཐབས་ཀྱི་ཆོ་ག་ལ་བརྟེན་ནས་ཚུར་སྡུད་པ་ལ་ཕྭ་གཡང་འགུགས་ཟེར།

ཡང་ཐུའུ་བཀྭན་ཆོས་ཉིས། གཡང་དང་བཅུད་དོན་གཅིག་པས། སྲིད་ཞིའི་བཅུད་འགུགས་པ་ལ་གཡང་འགུགས་པ་ཞེས་བཏགས་པ་སྟེ། གཡང་ཞེས་པའི་ཐ་སྙད་རྒྱུད་རྡོ་རྗེ་རྩེ་མོ་ལས་ཀྱང་། མཆོག་དང་ནོར་སྟེར་དཔལ་དང་གཡང་། །ཞེས་འབྱུང་བས་གཡང་འབོད་བྱེད་པ་བོད་ཀྱི་རྟོག་བཟོ་ཙམ་མ་ཡིན་ནོ། །གསུངས་སོ། །

ཡང་བོན་ཀྱི་ཡིག་རྙིང་ཁག་གཅིག་ལས། ཕྭ་ནི་འཇིག་རྟེན་སྐྲུན་མཁན་གྱི་ཡབ་མེས་ཤིག་ཏུ་འདོད་ཕྱིར། ཕྭ་གཡང་འགུགས་པ་ཞེས་པའང་འགྲོ་བ་མིའི་མེས་པོ་ཕྭ་ཞེས་པ་གདན་དྲངས་ནས་བཅུད་དང་ལེགས་ཚོགས་འགུགས་པར་འགྲེལ་ནའང་མི་ཆོག་པ་མེད་སྙམ་མོ། །

༢ ཕྭ་གཡང་གི་ཁུངས། བདག་ཅག་གི་སྟོན་པ་བཅོམ་ལྡན་འདས་ཀྱིས། ལྷ་ཀླུ་མི་གསུམ་སོགས་གདུལ་བྱ་གྲངས་ཀྱིས་མི་ཟིན་པར། བྱ་རྒོད་ཕུང་བོའི་རི་ནས་གསེར་འོད་གཡང་སྐྱབས་གསུངས་པ་ནི། ད་ལྟ་ཡང་དངོས་སུ་མཇལ་རྒྱུ་ཡོད་པ་དེའོ། །གསེར་འོད་གཡང་སྐྱབས་འདི་ལ་ཡང་། ཐུའུ་བཀྭན་ཆོས་ཉིས། གསེར་འོད་གཡང་སྐྱབས་སོགས་རྒྱ་གར་ནས་མ་ཡིན་པར་ཡུལ་གཞན་ནས་རྙེད་པ་ཡིན་འདུག་པའི་བརྡ་ཆད་སྣ་ཚོགས་སྣང་ལ། སངས་རྒྱས་ཀྱི་ཞལ་ནས་གསུངས་པའི་མདོ་ཡིན་མིན་ཐེ་ཚོམ་ཟ་ཡང་། བྱིན་གྱིས་བརླབས་པའམ་རྗེས་སུ་གནང་བའི་བཀའ་གང་རུང་ཡིན་དུ་རུང་ངམ་སྙམ་མོ་གསུངས་སོ། །

བཤད་ཚུལ་གཞན་ལ། ཕྭ་གཡང་ཞེས་པ་འདི་བོན་གྱི་ཆོས་སྐད་ཅིག་ཡིན་ལ། ད་ལྟའི་གཡང་འབོད་ཀྱི་ཆོ་ག་འདི། བོད་རྒྱལ་ཐོག་མ་གཉའ་ཁྲིའི་སྔོན་ནས། བོན་ཤེས་པ་ཅན་བཅུ་གཉིས་ཀྱི་ནང་ཚན་གཡང་ཤེས་ཕྭ་བོན་གྱིས་གཡང་སྒྲུབ་བྱེད་པའི་སྲོལ་ཡོད་པ་སྟེ། ལུག་དམར་གྱི་ལག་ཤ་དང་། ཚིགས་གསུམ་ཅན་གྱི་མདའ་ལ་དར་ཚོན་སྣ་ལྔ་དང་། གཟི། སྤོས་ཤེལ། བྱུ་རུ། གཡུ། མེ་ལོང་བཅས་ཀྱིས་བརྒྱན་པའི་མདའ་དར་རྩེ་ལྔ་སྒྲོ་དང་ལྡན་པ་ལག་ཏུ་ཐོགས་ཏེ་ཚེ་བསོད་འགུགས་པའི་ཆོ་ག་བྱེད་སྲོལ་ཡོད་ལ། ལ་ལས་ད་དུང་ཕྱེ་མར་ཆང་ཕུད་སོགས་འཁྱེར་བའི་མི་གཅིག་གིས་ཁང་ཐོག་ནས་ཕྭ་གཡང་འགུགས་ཞེས་ཕྱག་རྒྱ་དང་བཅས་སྐད་རྒྱག་སྲོལ་ཡང་ཡོད་དོ། །

པདྨ་བཀའ་ཐང་ལས། འཇིག་རྟེན་འཕྲལ་རྐྱེན་བཟློག་པ་ཙམ་གྱི་བོནཿ ཤ་བ་ཤིང་མགོ་རྭ་རྒྱས་བྱེད་པ་དངཿ གཡག་ལུག་ཟན་ལ་གཟུགས་བརྙན་བྱེད་དུ་བཅུགཿ ལྷ་གཡང་སྐོར་གསུམ་མིན་པ་ཐམས་ཅད་བསྣུབསཿ དེ་ལྟར་རྒྱལ་བོ་ཁྲི་སྲོང་ལྡེ་བཙུན་གྱིས་བོན་ཆོས་བསྣུབས་པའི་སྐབས་སུ། གཡང་ཆོག་སོགས་སྤྱི་ཚོགས་ལ་ཕན་ཐོགས་པའི་བོན་ཆོས་འགའ་མ་བསྣུབས་པར་བཞག་ལ། ཕྱིས་སུ་སངས་རྒྱས་ཆོས་ལུགས་པས་བོན་ཆོག་གི་རྣམ་པ་རང་སོར་བཞག་ནས། ནང་དོན་གྱི་ཆ་ནས་ནང་བསྟན་དང་མཐུན་པར་བཅོས་པར་གྲགས་ལ། གང་ལྟར་ཆོས་ལུགས་གཉིས་ཀ་ན་ཁུངས་གཏུགས་ས་ཡོད་དོ། །ཚུལ་འདི་ལ་དགོངས་ནས། ཐུའུ་བཀྭན་ཆོས་ཀྱི་ཉི་མས། ཆོས་དང་བོན་ཞེས་འགལ་བའི་མཚང་བྱེད་དང་། །ཆོས་ལ་བོན་འདྲེས་བོན་ལ་ཆོས་འདྲེས་པས། །ཆོས་མིག་རྡུལ་བྲལ་མི་ལྡན་བདག་ལྟ་བུས། །ཆོས་བོན་རྣམ་དབྱེ་འབྱེད་ལ་སྒྱིད་ལུག་འགྱུར། །གསུངས་པའང་འདི་ལྟ་བུ་ལ་དགོངས་པ་ཡིན་ནོ། །

༣ གཡང་སྒྲུབ་ལ་མཁོ་བའི་རྫས། གསེར་འོད་གཡང་སྐྱབས་ལས། ཤིན་ཏུ་དབེན་ཞིང་ཉམས་དགའ་བར། །གཞི་མ་དཀར་གཙང་སྟེང་དུ་ནི། །དཀོན་མཆོག་མཆོད་པ་རྒྱ་ཆེར་བཤམས། །མདའ་དར་ཕྱེ་མར་གསེར་སྐྱེམས་མཆོད། །རིན་ཆེན་བུམ་པ་མར་ཁུས་བཀང་། །སྦ་སྨྱུག་རིན་ཆེན་གསེར་གཡུ་དང་། །གཡང་གི་ར་བ་རིན་ཆེན་མར་གྱིས་བཀང་། །མར་ལུག་དུང་ཤ་ཆང་ཕུད་སོགས། །ཕྱག་རྒྱ་སྔགས་ཀྱིས་བྱིན་བརླབས་ཏེ། །ཞེས་པ་ལྟར། བཟང་དྲུག་སོགས་སྨན་སྣ་དང་འབྲུ་སོགས་བྱུར་བུར་སྤུངས་ལ། ནོར་ལྷའི་གཟུངས་སྔགས་དང་། སྤེལ་ཚིག་དག་བྲིས་ཏེ། ཤོག་དྲིལ་བྱས་པ་རིན་ཆེན་གྱི་སྦུ་གུར་བཅུག་ནས། གཡང་རྫས་ཀྱི་ནང་ལ་བཞག་སྟེ་སྒྲུབ་རྟེན་བྱ། མདུན་དུ་མཆོད་པ་ཅི་འབྱོར་བཤམས། འགུགས་བྱེད་རྟེན་འབྲེལ་མཚོན་བྱེད་ཡང་། གསེར་འོད་གཡང་སྐྱབས་ལས། བྱང་ཕྱོགས་དཔལ་གྱི་ལྷུན་པོ་ལ། །དཔལ་གྱི་སྦ་སྨྱུག་ལྡེམ་པ་སྐྱེས། །ཚིགས་བདུན་ཚིགས་དགུ་བཅུ་གསུམ་པ། །འཁོར་ལོ་བསྒྱུར་བའི་གཡང་རྟེན་ལགས། །དེ་ལྟར་ལོངས་སྤྱོད་རྒྱས་པ་ཡང་། །བཀྲ་ཤིས་སྦ་སྨྱུག་རྒྱས་པ་དེ། །འཁོར་ལོ་བསྒྱུར་བའི་གཡང་ཕུར་བྱས། །རྒྱལ་བོ་ལོངས་སྤྱོད་རྒྱས་པ་ལྟར། །དེ་རིང་སྨྱུག་རྒོད་ཚིགས་གསུམ་པ། །ཡོན་བདག་འདི་ཡི་ཕྭ་གཡང་ལགས། །ཞེས་པ་ལྟར། ཚིགས་གསུམ་ཅན་གྱི་མདའ་ལ་དར་ཚོན་སྣ་ལྔ་དང་། གཟི། སྤོས་ཤེལ། བྱུ་རུ། གཡུ། མེ་ལོང་བཅས་བཏགས་པའི་མདའ་དར་བཅས་དགོས་ལ།

ཁྱད་པར་དུ། གཡང་མདའ་འདི་ཕྭ་གཡང་གི་ཡོ་བྱད་གཙོ་བོ་བརྩི་བ་ནི་ཅི་ཡིན་ཞེ་ན། གདོད་མའི་སྤྱི་ཚོགས་ནང་ཁང་བའི་ཚད་འཇལ་ལ་ཕྱོགས་བཞི་ནས་མདའ་འཕངས﹙བསམ་ཡས་གཙུག་ལག་ཁང་གི་རྒྱ་ཁྱོན་ཀྱང་མདའ་འཕངས་ཏེ་གཞལ་བ་ལོ་རྒྱུས་དག་ན་གསལ། ﹚ཏེ་ས་ཁྱོན་འཇལ་བ་དང་། གཉེན་རྟགས་དང་གཡང་རྟེན་དུ་མཁོ་བ་དང་། རྔོན་ལས་དང་གཡུལ་འགྱེད་སྐབས་ཀྱི་མཚོན་ཆ་གཙོ་བོ་དང་། མངའ་ཐང་དབང་སྡུད་སོགས་མདའ་རྩལ་ལ་བརྟེན་དགོས་སྟབས། མདའ་མོ་ལ་མངའ་ཐང་དང་རྒྱུ་འབྱོར། །དབང་སྡུད་སོགས་བདག་གིར་བཞེས་པའི་ཁྱད་ནུས་ལྡན་ཕྱིར། གདོད་མིའི་མི་རྣམས་ཀྱིས་རེ་སྨོན་དང་སེམས་འདུན་དམིགས་ཡུལ་བཅོལ་ཡུལ་གྱི་གཡང་རྟེན་གྱི་གཙོ་བོར་བཞག་པ་རེད། དེ་བས་མི་སྲོག་མདའ་དང་མདའ་སྲོག་ལྷ་ལ་བཅོལ་བའི་ལྟ་བ་ཞིག་ཐོན་ཡོད་པ་སྟེ། ཀརྨ་ཆགས་མེད་ཀྱིས། མི་སྲོག་འདི་ནི་མདའ་ལ་བརྟེན། །མདའ་སྲོག་འདི་ནི་ལྷ་ལ་བཅོལ། །ལྷ་སྲུང་གཉན་པོས་བསྲུང་དུ་གསོལ། །ཕྭ་གཡང་ནོར་གཡང་སྲུང་དུ་གསོལ། །ཞེས་སོ། །

མདའ་སྨྱུག་དེ་སྐྱེ་ཡུལ་དང་རྣམ་པ། བྱིན་གྱིས་བརླབས་ཚུལ་ནི། པདྨ་གཡང་འབུམ་ལས། རི་རབ་རི་ཡི་ལྷོ་ཕྱོགས་ན། །དབང་བོའི་ཡུལ་གྱི་ཕ་རོལ་ན། །བཀྲ་ཤིས་ནགས་ཚལ་ཆེན་པོ་ན། །སྦ་རྒོད་སྙུག་རྒོད་ལྡེམས་སེ་ལྡེམས། །ཕྱི་ཤུན་སྔོན་པོའི་མདངས་དང་འདྲ། །འདམ་ནས་དར་བས་རབ་ཏུ་འཇམ། །རྩེ་མོ་ནམ་མཁའི་དབྱིངས་སུ་བསླེབས། །ལོ་མ་འབྲས་བུ་ཐིབས་སེ་ཐིབས། །རྒྱལ་བོ་ཆེན་པོ་སྡེ་བཞི་དང་། །ལྕགས་ཀྱི་ཟོར་བས་བྲེགས་པ་ཡིན། །སློབ་དཔོན་པདྨ་འབྱུང་གནས་ཀྱིས། །སྔགས་དང་ཕྱག་རྒྱས་བྱིན་གྱིས་བརླབས། །བཤུད་ཤད་མཚན་ལྡན་མདའ་དར་བྱས། །བྱ་རྒོད་གཤོག་པའི་སྒྲོ་ཡིས་བསྐྱོན། །དར་ཚོན་སྣ་ལྔའི་ན་བཟའ་གསོལ། །ཡ་མཚན་རྨད་དུ་བྱུང་བའི་མདའ། །དར་ཚོན་སྣ་ལྔ་ཤ་ར་ར། །ཕ་ནི་གནམ་ལ་མ་ནི་ས། །བུ་ནི་སྦ་སྙུག་ལྡེམས་སེ་ལྡེམས། །ཚིགས་གསུམ་སྐུ་གསུང་ཐུགས་སུ་བྱིན་གྱིས་བརླབས། །ཁོང་གསེང་བྱང་ཆུབ་སེམས་དཔས་བྱིན་གྱིས་བརླབས། །མེ་ཏོག་གཡུ་ལོ་རབ་ཏུ་འབར། །དེ་འདྲའི་ཡོན་ཏན་ལྡན་པའི་མདའ། །མཛེས་པའི་ཡོན་ཏན་ལྔ་ཡིས་བརྒྱན། །གཡང་ལྷ་འཁོར་དང་བཅས་ལ་འབུལ། །སྐུ་ཡི་རྟེན་དུ་མདའ་དར་འབུལ། །གསུང་གི་རྟེན་དུ་མདའ་དར་འབུལ། །ཐུགས་ཀྱི་རྟེན་དུ་མདའ་དར་འབུལ། །གཡང་ལྷ་རྣམས་ལ་མདའ་དར་འབུལ། །ཞེས་སོ། །

ཡང་། ཆོས་རྒྱལ་ཁྲི་སྲོང་ལྡེ་བཙན་གྱིས་བོད་རྣམས་ཀྱི་དབུལ་བ་སེལ་ཕྱིར། བུམ་པ་སྦྲང་ཆང་གིས་བཀང་སྟེ། སློབ་དཔོན་པད་འབྱུང་ལ་ཞུས་པའི་ཆོ་ག་པདྨ་གཡང་འབུམ་ལས། ཞལ་ཟས་བཟང་བོ་དང་། དཔག་བསམ་ལྗོན་ཤིང་དང་། མེ་ཏོག་པདྨ་དང་། བཀྲ་ཤིས་དཔལ་ཐོགས་བྲིས། སྟེང་དུ་གཡང་གི་དཔལ་བཤོས་བཤམས། མདའ་བྱ་རྒོད་ལ་རིན་ཆེན་སྣ་ལྔ་དང་རྔ་མ་དཀར་ནག་དང་། གཡང་གི་སྙིང་བོ་བྲིས་པ་བཏགས། ཚེ་རིང་བའི་རྟེན་བཤམས། སྟག་རས་གཟིག་རས་དང་། ཁྲབ་བྱང་དང་དེ་རྣམས་བཏགས་ལ་རྟེན་དུ་བཙུགས། ཤུག་པ་ལ་གཡང་གི་ཕུར་བ་སོར་བརྒྱད་གཅིག་ལ་དཔལ་བཤོས། དེ་ཡང་རིན་ཆེན་དར་དང་བ་དན་དང་རྔ་མ་དཀར་ནག་དང་། དུང་དང་། པི་ཝང་དང་། དྲིལ་བུ་དང་། སྒྲ་སྙན་པ་ཐམས་ཅད་བཞག འབྲུ་སྣ་ཚོགས་དང་ཕྱེ་དང་ཞོ་དང་ཕྱེ་མར་དང་། བུ་རམ་དང་མར་དང་ཐུད་དང་། གཡག་ལུག་གི་ཤ་དང་མར་ཁུ་དང་སྦྲང་དང་ཆང་དང་འོ་མ་དང་། འབྱོར་ཚད་སྣ་ཚོགས་བཤམས། གཏོར་མ་ཆ་གསུམ་དང་བཅས། མཆོད་པ་རྣམ་ལྔ་འབུལ། གོས་ཀྱི་དངོས་གྲུབ་འཐོབ་ཕྱིར། རས་ཕྲུག་དར་གསུམ་བཞག རི་རྩེ་ཤར་དུ་ཚངས་པའི་ནེའུ་ལེ་རྐྱལ་བ་གཅིག་ནང་དུ་རིན་ཆེན་སྣ་ཚོགས། འབྲུ་སྣ་ཚོགས། རྒྱན་སྣ་ཚོགས་ཀྱི་སྙིང་བོ་དང་། ནོར་ལྷ་མཆེད་ཀྱི་སྙིང་བོ་དང་། རྨང་དང་ཞིང་བཟང་བོ་དང་ཕྱུག་པོའི་ནོར་རྫས་སྣ་ཚོགས་ཀྱི་སྤུ་དང་། ཤོག་གུ་ལ་ནོར་ལྷའི་སྙིང་བོ་བྲིས་ལ་བཞག དེ་གཡང་ཕུར་ལ་བཏགས། དེ་ནས་བགེགས་གཏོར་བཤམས་ལ་བཙོད་ཚུར་རམ་གསུམ་ཚ་སྒོག་རྣམས་བསགས་དགོས་པར་གསུངས་ཡོད་དོ། །

༤ མདའ་དར་སོགས་ཀྱི་མཚོན་དོན། སྨྱུག་རྒོད་ལ་ཚིགས་གསུམ་ཡོད་པས་ཐེག་པ་གསུམ། དར་སྣ་ལྔས་མཁའ་འགྲོ་དང་ཡེ་ཤེས་ལྔ་དང་འཕྲིན་ལས་ལྔ། རྒོད་སྒྲོས་གནས་ལུགས་ཀྱི་ཡང་རྩེ་རྟོགས་ཤིང་ཕས་རྒོལ་གྱིས་གླགས་མི་རྙེད་པ། མེ་ལོང་གིས་སྣོད་བཅུད་ཐམས་ཅད་གསལ་ལེར་འཆར་བ། གཡུ་ནི་མི་ཡི་བླ་རྡོར་གྲགས་པས། བླ་ཚེ་འཁྱམས་པ་སྐད་ཅིག་ལ་འགུགས་ནུས་པ། རྩ་བ་མདུང་ཚུགས་སུ་གནས་པས་ཚེ་སྲོག་འགྱུར་བ་མེད་པ། སྦ་སྨྱུག་དྲང་བས་དགེ་བཅུའི་ལམ་དང་ལས་འབྲས་ལ་བློ་ཁ་དྲང་བ་སོགས་མཚོན་པར་བཤད་དོ། །གཞན་ཡང་། ཆོ་ག་དག་ལས། མདའ་ལ་ཡོན་ཏན་བསམ་མི་ཁྱབ། །མདའ་མོ་དར་གྱིས་བརྒྱན་པ་འདི། །མོ་སྲིད་ཕོ་རུ་འཕེལ་བ་ཡིན། །མདའ་ལྟོང་གནམ་ལ་བསྟན་པ་འདི། །ཁ་རྗེ་དགུང་དང་མཉམ་པ་ཡིན། །སྨྱུག་མ་ཚིགས་གསུམ་ཡོད་པ་འདི། །ལུས་ངག་ཡིད་དང་གསུམ་པོའི་དོན། །མདེའུ་ལྕགས་ལས་བྱས་པ་འདིས། །མི་ཁ་འགོང་བོ་ཐུབ་པ་ཡིན། །ཁབ་དང་སྐུད་པས་བརྒྱན་པ་འདི། །ཕར་བཏང་ཚུར་མི་ལྡོག་པའི་དོན། །ཞེས་གསུངས་སོ། །

གཞན་ཡང་། མདའ་སྒྲོའི་འགབ་ཀྱི་ཕྱོགས་བཞི་ལ་གཡང་གི་ར་བ་སྒོ་བཞི་འབྲི་བ་ཡང་རྒྱུ་མཚན་འདི་ལྟར་སྟེ། གླིང་སྒྲུང་འཁྲུངས་སྐོར་ལས། དེ་ནས་རྒྱ་བཟས（རྒྱ་བཟའ་ལྷ་དཀར་སྒྲོལ་མ）རྒོད་མ་གཅིག་དང་། མ་མོ་གཅིག འབྲི་མོ་གཅིག ར་མ་གཅིག་བཅས་བཞི་བྱིན་ཏེ་བུ་མོས（འགོག་བཟའ་ལྷ་དཀར）གཞི་ཟིན་པའི་རྟེན་འབྲེལ་དུ་གཡང་གི་ར་བ་སྒོ་བཞི་ཟེར་བའི་གཏམ་རྒྱུད་བྱུང་། ཞེས་པར་གཞིགས་ན་དེ་བཞི་ནི་སྒོ་ཟོག་གི་གཅེས་ནོར་དུ་བརྩི་བས། ཕྱིས་སུ་གཡང་མདའ་བརྒྱན་པའི་རི་མོ་དང་། ཕྱུགས་གཡང་འགུགས་པའི་མཚོན་དོན་དུ་བཞག་གོ། དེར་མ་ཟད་རྒྱལ་ལོའི་སྟ་གོན་དུ་སྣུམ་འཁུར་བཙོས་རྗེས་སུ་གཡང་གི་ར་བ་སྒོ་བཞི་བཙོས་ཏེ་ཚེས་གཅིག་ལ་མཆོད་སྟེགས་སུ་བཤམས་སྲོལ་ཡང་ཡོད།

༥ གཡང་འགུགས་ཇི་ལྟར་བྱ་ཚུལ། གཡང་འགུགས་བྱེད་པ་པོ་རབ་འབྲིང་ཐ་གསུམ་ཡོད་པ་ལས། རབ་ཆོས་ཐམས་ཅད་མཉམ་ཉིད་དུ་རྟོགས་པའི་རྣལ་འབྱོར་བ་ཞིག་དང་། འབྲིང་བསྐྱེད་རྫོགས་ཀྱི་རྟོགས་ལྡན་པ། ཐ་མ་ཡང་ཆོ་ག་ལ་བརྟེན་ཏེ་རྒྱལ་བ་སྲས་བཅས་ཀྱི་བྱིན་རླབས་དང་། སྲིད་གསུམ་གྱི་བདེ་སྐྱིད་དཔལ་འབྱོར་ཇི་སྙེད་ཅིག་མཆིས་པ་ཐམས་ཅད་ཡིད་བཞིན་དུ་འགྲུབ་པའི་དམིགས་པ་དང་བཅས། ཕྱག་ཏུ་གཡང་དར་ཐོགས། ཞལ་ལས་བཀྲ་ཤིས་གཡང་འགུགས་ཀྱི་སྤེལ་ཚིག་གསུངས་བཞིན་མདའ་དར་གྱིས་གཡབ་མོ་བྱེད་པ་ཡིན། ས་སྐྱ་བ་དང་། དགེ་ལུགས་པ་སོགས་ཀྱི་ངོས་ནས་བརྗོད་ན། རྣམ་སྲས་མགོན་དཀར། སྒྲོལ་མ་སོགས་ཀྱི་གཡང་འགུགས་རྒྱས་པར་ཡོད། གཞན་གྲུབ་མཐའ་སོ་སོའི་གཡང་འགུགས་ཀྱི་ཆོ་ག གཏོང་སྟངས་དང་གོ་རིམ། གཡང་རྫས། ཕྱག་ལེན་མི་འདྲ་བ་ཡོད་པ་ལས་གཞན། དམངས་ཁྲོད་ཀྱི་ལུགས་སྲོལ་མི་འདྲ་བ་མང་བོ་ཡོད་དོ། །དེ་ལས་གཞན་བརྡ་རགས་པའི་དབང་དུ་བཏང་ན། བྱ་བ་ལམ་འགྲོ་ཡོང་བའི་ཚིག་ཅིག་བརྗོད་པ་ལའང་ཁ་གཡང་བོས་ཟེར། ཁྱད་པར་ཡུལ་ལུང་འགའ་ཤས་ནས་བུ་མོ་གནས་ལ་འགྲོ་སྐབས། ཨ་མའི་ཕྲ་ལ་རིང་བའི་སྐད་དབྱངས་དང་བཅས། བཟང་ཡོད་ན་གནས་ལ་འཁྱེར། འཕྲོ་ཡོད་ན་ཡུལ་ལ་ཞོག ཅེས་དང་། མི་གཡང་མི་ལ་མ་འཁྱེར་ཨ་མར་ཞོག སྐྱིད་ཉི་མ་གཉིས་ཀ་ཁྱོད་ཀྱིས་འཁྱེར། ཞེས་སོགས་གཡང་འབོད་གཏོང་བ་ནི། གཉེན་ཚན་གཉིས་ཀར་མི་འགལ་བའི་གཡང་བགོ་ལུགས་ཀྱི་རྟེན་འབྲེལ་ཞིག་རེད་བསམ་མོ། །དེ་བཞིན་ཡུལ་ལུང་འགར་སྒོར་མོ་ཕར་སྟེར་དུས། དངུལ་སྒོར་ཁྱེད་ལ་བྱིན་ཆོག་ཀྱང་། དངུལ་གཡང་ང་ལ་བསྐྱུར་དགོས་ཞེས་རང་ལུས་སུ་བྱིལ་བྱིལ་འགར་བྱས་ནས་སྟེར་བ་ཡང་། བོད་མི་རྣམས་གཡང་གི་ཚོར་འདུ་ཤུགས་དྲག་ཡོད་པ་ལས་བྱུང་བ་ཡིན་ནོ། །

༦ གཡང་འགུགས་ཀྱི་འཛེམ་བྱ། གསེར་འོད་གཡང་སྐྱབས་ལས། ཕྱི་མི་སྐྱ་བོ་ནང་ལ་མ་གཏོང་ཞིག། ནང་མི་སྨུག་པོ་ཕྱི་རུ་མ་འབུད་ཅིག། ལྷ་ལུག་ཐང་ལ་མ་འབུད་ཅིག །སྲིད་ཀྱི་གླང་ཆེན་ནང་ལ་མ་གཏོང་ཞིག། ཅེས་གསུངས་པ་ལས་གཞན། གཡང་ཁ་བསྡམས་རྗེས་ཅ་ལག་ཕན་ཚུན་ལ་མི་གཏོང་བ་སོགས་བྱེད་དོ། །

རིལ་སྒྲུབ།

༡ རིལ་སྒྲུབ་ཀྱི་ཆོ་ག་དང་སྒྲུབ་ཚུལ། དགེ་ལུགས་པའི་མ་ཎི་རིལ་སྒྲུབ་གཅིག་པུར་མཚོན་ནའང་། རྒྱལ་དབང་ལྔ་བ་བློ་བཟང་རྒྱ་མཚོ། ལྕང་སྐྱ་ངག་དབང་བློ་བཟང་ཆོས་ལྡན། བཀའ་འགྱུར་བ་བློ་བཟང་ཚུལ་ཁྲིམས། ཀི་རྟི་བློ་བཟང་འཕྲིན་ལས་སོགས་ཀྱི་རིལ་སྒྲུབ་དང་། དམིགས་བརྩེ་མའི་རིལ་སྒྲུབ་ཡང་། ཅོ་ནེ་གྲགས་པ་བཤད་སྒྲུབ། ཞོགས་དོན་ཡོད་མཁས་གྲུབ། ཀུན་མཁྱེན་འཇིགས་མེད་དབང་བོ་སོགས་ཀྱི་རིལ་སྒྲུབ་དང་། དཀོན་མཆོག་རྒྱལ་མཚན་གྱི་མ་ཎི་རིལ་སྒྲུབ་དང་། རྗེ་དོན་ཡོད་མཁས་གྲུབ་ཀྱིས་གསང་བ་ཡེ་ཤེས་མཁའ་འགྲོའི་རིལ་སྒྲུབ་སོགས་བཞུགས་པ་ལྟར། གྲུབ་མཐའ་སོ་སོའི་མཁས་པས་མཛད་པའང་མང་ངོ་། །

རིལ་སྒྲུབ་ནི་བསྒྲུབ་བྱ་དང་མཐུན་པའི་རྫས་རྣམས་ཞིབ་མོར་བྱས་ཏེ་རིལ་བུར་ཕབ་ནས། ཆོ་ག་ཆད་ལྷག་མེད་པའི་སྒོ་ནས་རིལ་བུ་བྱིན་ཅན་བཟོས་པ་ལ་བྱ་ཞིང་། དབྱེ་བ་ཡང་། སྒྲུབ་ཐབས་ཀྱི་སྒོ་ནས་ཚད་བཟུང་མི་ནུས་ཀྱང་། ངོ་བོའི་སྒོ་ནས་ཞི་རྒྱས་དབང་དྲག་གི་རིལ་སྒྲུབ་བཞི་ལས་མ་འདས་ལ། མདོག་གི་དབང་དུ་བཏང་ན། ཤེས་རབ་འཕེལ་བར་སེར་བོ། ཞི་བར་དཀར་བོ། རྒྱས་པར་སེར་བོ། དབང་སྡུད་ལ་དམར་བོ། དབྱིབས་ཀྱི་དབང་དུ་བཏང་ན། ཞི་བར་ཟླུམ་ལེབ། དབང་ལ་ཟླ་གམ། རྒྱས་པར་གྲུ་བཞི་བྱ། སྒྲུབ་དུས་ནི། རྒྱུ་སྐར་རྒྱལ་དང་ཁྲུམས་སྟོད་ཁྲུམས་སྨད་ནམ་གྲུ་དང་། གཟའ་ཕུར་ལྷག་ཟླ་བ་པ་སངས་རྣམས་སུ་བསྒྲུབ་པར་བྱའོ། །

༢ རིལ་བའི་རྒྱུ། རིལ་བུའི་རྒྱུ་ལ། ཀུན་མཁྱེན་འཇིགས་མེད་དབང་པོས་མཛད་པའི་དགེ་འདུན་རིལ་སྒྲུབ་བྱ་ཚུལ་ལས། སངས་རྒྱས་ཀྱི་འཕེལ་གདུང་། མཁས་ཤིང་གྲུབ་པ་བརྙེས་པའི་དམ་པ་གོང་མ་རྣམས་ཀྱི་གདུང་རུས། བླ་མ་དང་དགེ་འདུན་གྱི་སྡེ་ཁྱད་པར་ཅན་གྱི་བསྒྲུབས་པའི་མ་ཎི་རིལ་བུ། བླ་མ་གོང་མ་རྣམས་ཀྱི་ན་བཟའ་དང་དབུ་སྐྲ་ལྟ་བུ་ནུས་ལྡན་བསྲེགས་པའི་བྱེ་མ་རྣམས་ཞིབ་མོར་བརྡུང་བ་ཞེས་སོགས་དང་། རྗེ་བཙུན་དམ་ཆོས་རྒྱ་མཚོས་མཛད་པའི་འཕགས་མ་མཚོ་ལྡན་མའི་རིལ་སྒྲུབ་བྱ་ཚུལ་ལས། ཨ་རུ་གསེར་མདོག བ་རུ། སྒྲོན་ཤིང་། གོ་སྙོད་ཀྱི་འབྲས་བུ། དུག་མོ་ཉུང་། ལུག་རུ་དཀར་སེར་དམར་གསུམ། སྤང་རྒྱན་དཀར་བོ། ཤིང་མངར་བཅས་ཆ་སྙོམས་པ་ཞིབ་ཏུ་བཏགས་ནས་ཞེས་གསུངས་པ་སོགས་སྒྲུབ་ཐབས་སོ་སོ་ལས་རིལ་བའི་རྒྱུ་མི་འདྲ་བ་མང་དུ་གསུངས་ཤིང། བསྒྲུབ་བྱ་རྩ་བ་གསུམ་མམ། ཡང་ན། ཞི་རྒྱས་དབང་དྲག་གི་ལས་གང་ཞིག་ལ། སྒྲུབ་ཐབས་གང་གིས་རིལ་སྒྲུབ་བྱས་ཀྱང་། གཞན་གྱི་ཁ་ཟས་མི་སྤྱོད་པ། འཆལ་གཏམ་མི་སྨྲ་བ། རིལ་བའི་རྒྱུར་འགོམ་ཡུག་དང་། བཙོག་གྲིབ་ཤོར་བ། དམ་ཉམས་ཀྱི་ལག་ནས་ཐོན་པ་མ་ཡིན་པར་ངོས་གཙང་དགོས་སོ། །

༣ རིལ་སྒྲུབ་བྱ་ཚུལ། རིལ་བུ་བཟོས་རྗེས་མཚལ་དང་གུར་ཀུམ་སོགས་ཀྱིས་ཁ་བསྒྱུར་ཅིང་། བུམ་པ་སོགས་སུ་བླུགས་ལ། སྒྲུབ་པ་པོས་ཤ་ཆང་སྒོག་ཙོང་སོགས་སྤངས་ཏེ། རང་ཉིད་ལྷ་དང་བླ་མ་གང་རུང་ལ་གསལ་བཏབ་ནས། ཐུགས་ཀ་ནས་འོད་ཟེར་འཕྲོས་པས། སངས་རྒྱས་བྱང་སེམས་རྣམས་ཀྱི་བྱིན་རླབས་དང་ནུས་མཐུ་ཐམས་ཅད་གཅིག་བསྡུས་ཀྱིས་རིལ་བུར་ཐིམ་པ་སོགས་ཆོ་ག་ལྟར་སྒྲུབ་པར་བྱོས་ལ། མངོན་སུམ་དང་རྨི་ལམ་གང་རུང་ལ། འགྲུབ་པའི་རྟགས་མ་བྱུང་གི་བར་དུ་བསྒྲུབ་དགོས། མ་མཐའ་ཡང་གྲངས་དང་བསྙེན་ཚད་ཙམ་ངེས་པར་དུ་འགྲོ་དགོས་སོ། །

༤ རིལ་སྒྲུབ་ཀྱི་ཕན་ཡོན། འཕགས་མ་མཚོ་ལྡན་མའི་རིལ་སྒྲུབ་ལས། ཞག་བདུན་ཟོས་པས་དིག་པ་དང་། །ལྐུགས་པ་ལྒིན་པ་དག་ཀྱང་འཚོ། །བཅུ་གཅིག་སྐད་བཟང་མགྲིན་པ་བདེ། །ཉི་ཤུས་མི་བརྗེད་གཟུངས་འཐོབ་འགྱུར། །ཟླ་བ་གཅིག་ཏུ་ཟོས་གྱུར་ན། །བློ་ནི་མེ་དང་འདྲ་བར་འགྱུར། །རབ་ཏུ་བསྟེན་ན་ཚེ་རིང་ཞིང་། །རྒས་པའི་སྐྱོན་གྱིས་གོས་པ་མེད། །ཅེས་དང་། གཞན་ཡང་། མི་འཁྲུགས་པའི་རིལ་སྒྲུབ་ཚད་ལྡན་བྱས་པ་ཟོས་ན་ངན་སོང་གི་སྒོ་ཁེགས་པ་དང་། འཇམ་དབྱངས་ཀྱི་རིལ་སྒྲུབ་ཟོས་ན་ཤེས་རབ་འཕེལ་བ། ཚེ་དཔག་མེད་ཀྱིས་ཚེ་རིང་བ། སྨན་བླས་ནད་འཇོམས་པ། དམིགས་བརྩེ་མས་རྒྱུད་ལ་བྱིན་རླབས་འབྱུང་བ་སོགས་ཕན་ཡོན་བསམ་གྱིས་མི་ཁྱབ། འཇུ་མི་ཕམ་གྱིས་ཀྱང་རིལ་བུ་མགུལ་དུ་འདོགས་པའམ། ནངས་མ་རེ་ལ་རིལ་བུ་ཟོས་ན། བརྒྱ་ཡིས་མི་བརྗེད་གཟུངས་ཐོབ་པ་དང་། རྫས་ཀྱི་བཅུད་ལེན་སོགས་ཀྱི་དགོས་པ་དང་། དབང་སྡུད་མངོན་ཤེས་སོགས་འགྲུབ་པར་གསུངས་སོ། །དབྱངས་ཅན་མའི་རིལ་སྒྲུབ་ཀྱི་ཕན་ཡོན་ནི། དམ་པའི་རྒྱ་གཞུང་ལས། རིལ་བུ་རྒྱ་ཆེན་བཞིར་མཐོང་ནས། །ཤེས་རབ་འཇམ་དཔལ་རྡོ་རྗེ་དང་། །སངས་རྒྱས་ཀུན་དང་མཉམ་པར་འགྱུར། །རིལ་བུ་དབྱངས་ཅན་མར་མཐོང་ནས། །སངས་རྒྱས་ཞིང་དུ་འགྲོ་བར་འགྱུར། །རིལ་བུ་ཉི་ཟླར་མཐོང་གྱུར་ནས། །སྔོན་གྱི་སྐྱེ་བ་དྲན་པར་འགྱུར། །རིལ་བུ་འོད་དུ་མཐོང་གྱུར་ནས། །སྒྲ་བཞི་དག་ལ་མཁས་པར་འགྱུར། །འོད་དང་དུ་བ་རྔ་སྒྲ་དང་། །དུང་འབུད་ཉི་ཟླ་ཤར་བ་དང་། །མེ་ཏོག་འཛུགས་དང་ཞིང་རྨོ་དང་། །སྣག་ཚ་འཐུང་དང་ཉམས་དགའ་དང་། །ཡི་གེ་འབྲི་ཀློག་མཐོང་བ་དང་། །མངོན་པར་ཤེས་པ་འཆར་བ་རྣམས། །ཤེས་རབ་འཕེལ་བའི་རྟགས་སུ་འདོད། །ཅེས་སོ། །

འཕོ་བ་འདེབས་སྟངས།

༡ འཕོ་བའི་ཁུངས། སྤྱིར་ན་འཕོ་བ་ཟེར་བ་ནི། ནཱ་རོ་བས། རླུང་གི་གཞུ་ལ་སེམས་ཀྱི་མདའ། །ཧིག་གི་སྒྲ་ཡིས་རབ་བསྐུལ་ནས། །རྣམ་པར་ཤེས་པའི་ཆོས་ཉིད་འདས། །མིང་ཡང་འཕོ་བའི་གདམས་ངག་ཟེར། །གསུངས་པ་ལྟར་ལགས་ལ། འཕོ་བ་ཞེས་པའི་གདམས་ངག་ཁྱད་པར་ཅན་འདི་ཉིད། སྔགས་བླ་མེད་ཀྱི་ཕ་རྒྱུད་མ་རྒྱུད་གཉིས་ལས་གསུངས་ཀྱང་། གཙོ་བོ་མ་རྒྱུད་གདན་བཞི་དང་། སམྦུ་ཊ། བདེ་མཆོག་སྡོམ་འབྱུང་སོགས་ལས་གསུངས་ཏེ། གདན་གཞི་ལས། ཐམས་ཅད་ལུས་ལ་གནས་པ་ཡི། །ཡེ་ཤེས་ཀྱིས་ནི་ཡེ་ཤེས་མཆོག། སྟེང་དུ་ཚངས་པའི་སྒོ་འདི་ནི། །མདོ་ལས་འཕོ་བའི་མིང་དུ་བཤད། །ཅེས་སོགས་དང་། པཎ་ཆེན་བློ་བཟང་ཆོས་རྒྱན་གྱིས། ཚུལ་འདི་སྡིག་ཅན་བཙན་ཐབས་འཚང་རྒྱའི་ཐབས། །མ་བསྒོམ་འཚང་རྒྱ་འཕོ་བའི་མན་ངག་ཅེས། །བླ་མེད་རྒྱུད་སྡེའི་སྙིང་བོ་བསྡུས་པ་ཡིན། །ཞེས་དང་། བླ་མཆོད་ལས། ལམ་སྣ་མ་ཟིན་འཆི་བའི་དུས་བྱེད་ན། །བཙན་ཐབས་འཚང་རྒྱ་བླ་མའི་འཕོ་བ་ནི། །སྟོབས་ལྔ་ཡང་དག་སྦྱར་བའི་གདམས་ངག་གིས། །དག་པའི་ཞིང་དུ་བགྲོད་པར་བྱིན་གྱིས་རློབས། །ཞེས་པ་འདི་དག་གོ ། 　

དགེ་ལུགས་པར་མཚོན་ན་སྲད་རྒྱུད་ལུགས་ཀྱི་དགའ་ལྡན་འཕོ་ཁྲིད་ཐུན་མོང་མ་ཡིན་པའི་དམིགས་བརྩེ་མ་འབུམ་གྱི་བཀའ་རྒྱ་ཅན་འདི་འཇམ་དབྱངས་བཞད་པའི་རྡོ་རྗེ་ཡན་ཆད་ལ་ཡི་གེ་མེད་པའི་སྙན་བརྒྱུད་དུ་བཞུགས་པ་ལས། དེའི་དྲུང་དུ་ཐུགས་སྲས་འཇམ་དབྱངས་བདེ་བའི་རྡོ་རྗེས་གསན་ཏེ། ཟིན་བྲིས་བཏབ་པ་ནས་ཡིག་ཐོག་ནས་དར་ཁྱབ་བྱུང་ལ། འདིའི་ཁྲིད་འཐོབ་པ་ལ་དམིགས་བརྩེ་མ་སུམ་འབུམ་མམ། མ་མཐའ་འབུམ་གཅིག་ངེས་པར་དུ་གསུངས་དགོས་སོ། །གཞན་ཡང་། གསར་མའི་ལུགས་སུ་འཕོ་བ་མཁའ་སྤྱོད་མ་དང་འཕོ་བ་སྐར་ཁུང་སོགས་དང་། རྙིང་ལུགས་སུ་པདྨ་འོད་འབར་གྱི་འཕོ་བ་དང་། ཉི་ཟླ་སངས་རྒྱས་ཀྱི་འཕོ་བ་འཇག་བཙུགས་མ། ཀརྨ་གླིང་བའི་ཞི་ཁྲོའི་འཕོ་བ་དྲན་པ་རང་གྲོལ་སོགས་ཡོད་དོ། །

༢ འཕོ་བའི་དབྱེ་བ། སྤྱིར་འཕོ་བ་ལ་དབྱེ་ན་བཅུ་གཅིག་ཡོད་དེ། སྦྱངས་ཏེ་འཕོ་བ་ཏིང་ངེ་འཛིན། སྲོག་དང་རྩོལ་བའི་འཕོ་བ། རྣམ་ཤེས་བླ་མར་འཕོ་བ། བཙན་ཐབས་དག་ཏུ་འཕོ་བ། སྤྲོས་མེད་ཆོས་སྐུའི་འཕོ་བ། སྤྲོས་བཅས་གཟུགས་སྐུའི་འཕོ་བ། ལོངས་སྤྱོད་རྫོགས་སྐུའི་འཕོ་བ། སྤྲུལ་བ་སྐུ་ཡི་འཕོ་བ། ཡིད་འོང་མཁའ་འགྲོའི་འཕོ་བ་དང་། གཞན་ཡང་། འཕོ་བ་ལ་དྲུག་ཏུ་ཡང་བཤད་དེ། ༡ རབ་ཆོས་སྐུའི་འཕོ་བ་ནི། ཚེ་འདིར་གནས་ལུགས་མ་བཅོས་པའི་ལྟ་བ་མ་ནོར་བ་རྒྱུད་ལ་སྐྱེས་ཤིང་གོམས་འདྲིས་ཡོད་པ་རྣམས། འཆི་ཁའི་ཚེ་ཀ་དག་མཁྲེགས་ཆོད་ཀྱི་གསང་ལམ་ནས་དབྱིངས་རིག་གི་གནད་ལ་བརྟེན་ཏེ་ཆོས་སྐུའི་ཀློང་དུ་འཕོ་བ་དེ་ཡིན། འཕོ་བ་ཐེབས་པའི་ཕྱི་རྟགས་སུ་ནམ་མཁའ་གཡའ་དག་པ་དང་། ནང་རྟགས་སུ་ཕུང་བོ་ཡུན་རིང་བཀྲག་མི་ཡལ་བ་དང་། གསང་རྟགས་སུ་ཨ་དཀར་བོ་དང་ཧཱུཾ་མཐིང་ག་སོགས་འབྱོན་ནོ། །

༢ འབྲིང་ལོངས་སྐུའི་འཕོ་བ་ནི། བསྐྱེད་རྫོགས་ཀྱི་རྣལ་འབྱོར་ལ་གོམས་འདྲིས་བྱས་ཤིང་སྒྱུ་མ་ལྟ་བུའི་ལྷ་སྐུ་ལ་རྩལ་འབྱོངས་པ་དག་འཆི་ཁའི་ཚེ། བར་དོའི་འཁྲུལ་སྣང་འཆར་བ་དང་མཉམ་དུ་ཟུང་འཇུག་ཡེ་ཤེས་ཀྱི་སྐུར་འཕོ་བ་དེ་ཡིན། ལོངས་སྐུའི་འཕོ་བ་ཐེབས་ན། ཕྱི་རྟགས་སུ་ནམ་མཁའ་འཇའ་དང་འོད་ཀྱིས་གང་བ་དང་། ནང་རྟགས་སུ་སྤྱི་བོའི་ཚངས་བུག་ཏུ་ཁྲག་དང་ཆུ་སེར་ཐོན་པ་དང་། ཟིལ་བ་ཁྲོམ་པ། སྐྲངས་པ་སོགས་འབྱུང་། གསང་རྟགས་སུ་གདུང་རིགས་རྣམ་པ་ལྔའམ་གང་རུང་དང་ལྷ་སྐུ་འམ་ཕྱག་མཚན་སོགས་འབྱོན་ནོ། །

༣ ཐ་མ་སྤྲུལ་སྐུའི་འཕོ་བ་ནི། གསང་སྔགས་སྨིན་བྱེད་ཀྱི་དབང་ཐོབ་ཅིང་། དམ་ཚིག་ལ་སྐྱོན་མ་ཞུགས་པར་བར་དོའི་གདམས་ངག་དང་ལྡན་ཞིང་། སྐྱེ་བ་སྤྲུལ་བའི་ལམ་འཁྱེར་ལ་བརྟེན་ནས་ཞིང་དག་པའི་གནས་སུ་འཕོ་བ་ཡིན། ཕྱི་རྟགས་སུ་འཇའ་སྤྲིན་དང་མེ་ཏོག་གི་ཆར་འབབ་པ་དང་། ནང་རྟགས་སུ་སྣ་བུག་གཡོན་དུ་ཁྲག་གམ་ཆུ་སེར། ཡང་ན་བྱང་སེམས་ཐོན་པའོ། །གསང་རྟགས་སུ་རིང་བསྲེལ་ལམ་དབུ་ཐོད་བུམ་ཧྲིལ་དང་། ཕྱག་མཚན་སོགས་འབྱོན་ནོ། །༤ ཐ་མལ་འདུ་ཤེས་གསུམ་ལྡན་གྱི་འཕོ་བ་ནི། རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ལ་མགྲོན་པོའི་འདུ་ཤེས། གནས་བདེ་ཆེན་དག་ཞིང་ལ་འགྲོ་སའི་འདུ་ཤེས་བཞག་སྟེ་འཕོ་བ་དང་། ༥ སྐད་ཅིག་མའི་འཕོ་བ་ནི། མེ་ཆེན་པོའི་ནང་དུ་ཧྲིལ་གྱིས་ཐིམ་པ་དང་། ཆུ་ཆེན་པོའི་ནང་དུ་བུབ་ཀྱིས་འཁྱེར་བ། གཡང་གཟར་དུ་འཚུབ་བེ་ལྷུང་བ། མགོ་ལ་ཐོག་བརྒྱབ་པའམ། སྙིང་ལ་མདའ་གྲིས་བསྣུན་པ། གཟའ་གདོང་ཐུག་བརྒྱབ་པ་ལྟ་བུ་བྱུང་དུས། རིག་པ་སྤྱི་བོའི་བླ་མ་འོད་དཔག་མེད་ལ་གཏད་པའོ། །༦ གཤིན་པོ་རྗེས་འཛིན་གྱི་འཕོ་བ་ནི། རྟོགས་པ་ཚད་ལྡན་གྱི་དམ་པ་སྣང་སེམས་ལས་སུ་རུང་བ། བར་དོའི་རྒྱུད་མཁྱེན་པའི་རྣལ་འབྱོར་བས། གཞན་འཆི་ཁ་མའམ། བར་དོ་ན་ཡོད་པར་འཕོ་བ་འདེབས་པ་དེ་ཡིན། སྐབས་འདིར་འཆད་བྱའི་འཕོ་བ་ནི་འདི་ཉིད་དོ། །

༣ འཕོ་སྦྱོང་བྱེད་སྟངས། ཐོག་མར་ཚད་ལྡན་བླ་མ་དམ་པའི་དྲུང་ནས། འཕོ་བ་ལུང་རྐྱང་ཙམ་མ་ཡིན་པར། བླ་སློབ་ཟུང་གིས་དམིགས་རིམ་དང་ལྡན་པའི་སྒོ་ནས། ལུང་ཁྲིད་སོགས་ཁུངས་བཙན་མནོས་རྗེས། དབེན་གནས་སུ་འཕོ་སྦྱང་བྱས་ཏེ། འཕོ་རྟགས་ཐོན་རེག་བར་དུ་སྦྱངས་དགོས་ལ། ཐོན་རྗེས་བླ་མས་གཞན་ལ་འཕོ་བ་འདེབས་པའི་གསུང་གི་གནང་བ་འཐོབ་པ་ན། རང་ཉིད་དམ་སྡོམ་ལ་གནས་པའི་སྒོ་ནས་འཕོ་བ་འདེབས་པ་ཡིན་ནོ། །རྣམ་ཤེས་འཕོ་བའི་སྒོ་ཡང་། རྡོ་རྗེ་གདན་བཞི་རྒྱུད་ཆེན་པོ་ལས། ལམ་བཟང་བོ་ནི་མཛེས་པའི་གནས། །ལམ་ངན་སྲིད་པའི་སྐྱོན་གྱིས་གོས། །ཐིག་ལེ་ལྟེ་བ་སྤྱི་གཙུག་དང་། །མིག་དང་སྣ་དང་རྣ་བ་དང་། །ཆུ་དང་ཆུ་མིག་སྒོ་ཡིན་ཏེ། །སྒོ་དགུ་ཡི་ནི་མཚན་ཉིད་ཡིན། །ལྟེ་བ་འདོད་ཅན་མཐོ་རིས་ཏེ། །ཐིག་ལེ་གཟུགས་ཀྱི་ལུས་ཅན་ནོ། །སྟེང་ནས་སྟེང་གི་གནས་ཡིན་ཏེ། །མི་གདུགས་ལ་སོགས་དེ་རུ་འགྲོ། །རྣ་ནས་གནོད་སྦྱིན་གནས་སུ་འགྲོ། །རྣ་བ་དག་ནི་གྲུལ་བུམ་ལྷ། །གལ་ཏེ་མིག་ལས་ཡེ་ཤེས་འགྲོ། །མི་རྣམས་ཀྱིས་ནི་བདག་པོར་འགྱུར། །སྲིད་པའི་སྒོ་ནི་ཡི་དྭགས་ཏེ། །དེ་ནི་ལྕི་བས་དུད་འགྲོའོ། །ཆུ་མིག་རྣམ་ཤེས་མྱུར་བ་རུ། །དམྱལ་བ་བརྒྱད་དུ་ཤེས་པར་བྱ། །སྒོ་རྣམས་ཀྱི་ནི་བྱེ་བྲག་གི ། འཁོར་བའི་བྱེ་བྲག་འབྱུང་བ་ཡིན། །དེ་བས་སྒོ་ནི་བྱེ་བྲག་ལས། །སྒྲུབ་པ་པོས་ནི་ལམ་བཟང་བསྟེན། །ཅེས་དང་། ནཱ་རོ་པཎ་ཆེན་གྱིས། སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་གཅིག་དབྱེ། །ཞེས་དང་། ཡང་བཤང་སྒོར་ཐོན་ན་དམྱལ་བར་མཆི་སྟེ། མཁའ་འགྲོ་མ་ཀུ་རུ་ཀུ་ལེའི་རྒྱུད་ལས། རྣམ་ཤེས་རླུང་ལ་ཞོན་ནས་ནི། །འོག་གི་གནས་སུ་འཕོས་གྱུར་ན། །ཆོས་ལ་གོམས་པའི་གང་ཟག་ཀྱང་། །ངན་སོང་རྒྱུད་དུ་སྐྱེ་འགྱུར་ཏེ། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །གསུངས་པ་དང་། ཁ་ནས་ཐོན་ན་ཡི་དྭགས། ཆུ་ལམ་ནས་ཐོན་ན་དུད་འགྲོ། མིག་ནས་ཐོན་ན་མི། རྣ་བར་ཐོན་ན་ལྷ་མིན། ལྟེ་བར་ཐོན་ན་འདོད་ལྷ། སྣ་ནས་ཐོན་ན་གནོད་སྦྱིན། མིག་དབུས་སྨིན་མཚམས་ནས་ཐོན་ན་གཟུགས་ཁམས་སུ་སྐྱེ་བར་གསུངས་པས་སྒོ་གཞན་བརྒྱད་བཅད་དེ། སྤྱི་གཙུག་གསེར་གྱི་སྒོ་ནས་ཐོན་དགོས་པར་ཁྲི་བློ་བཟང་རྒྱལ་མཚན་སེང་གེས་གསུངས་ལ། སྤྱི་གཙུག་ཚངས་བུག་ནི་དག་པ་མཁའ་སྤྱོད་དུ་འགྲོ་བའི་ལམ་ཡིན་པས་དེ་ལས་རྣམ་ཤེས་ཐོན་ན་ཐར་བ་འཐོབ་པར་འགྱུར་བས། དེར་འདུན་པ་གཏད་པ་གལ་ཆེའོ། །

༤ འཕོ་བ་འདེབས་སྐབས་ཀྱི་སྦྱོར་བ། རང་ཉིད་འཕོ་འདེབས་ཀྱི་གནས་སུ་མ་སླེབས་གོང་ནས། ཡི་དམ་རྡོ་རྗེ་འཇིགས་བྱེད་ལྟ་བུ་ཡིན་ན། དེའི་ང་རྒྱལ་ལ་གནས་པའི་ཐུགས་ཀའི་ས་བོན་ཧཱུཾ་ཡིག་ལས་ཁྲོ་བོའི་ཚོགས་དཔག་མེད་སྤྲོས་ཏེ། རོ་རྩར་སླེབས་ཚེ་གཤིན་འདྲེ་ལ་སོགས་པ་ལ་ཕན་སེམས་ཀྱི་སྒོ་ནས་གསུར་དང་གཏོར་མ་བཏང་། འདིའི་རྣམ་ཤེས་དང་ཉེ་འབྲེལ་ལ་མ་གནོད་པར་སོང་ཞིག་ཅེས་བརྗོད་ལ། གལ་ཏེ་གནོད་འདྲེ་རྣམས་མི་འགྲོ་བར་གླགས་འཚོལ་བར་སེམས་ན། སྙིང་ཀ་ནས་ཁྲོ་ཚོགས་དཔག་ཏུ་མེད་པ་འཕྲོས་ཏེ། གཤིན་རྗེ་དེ་དག་རྒྱ་མཚོའི་ཕར་འགྲམ་དུ་བསྐྲད་ཅིང་བརླག་པར་བསམས་ལ། སྔགས་དང་གུ་གུལ་བདུག ཡུངས་དཀར་ལ་ཡི་དམ་གྱི་སྙིང་བོ་སོགས་བཟླས་ནས་བྲབས་པར་བྱའོ། །

༥ འཕོ་བ་འདེབས་ཚུལ་དངོས། འཕོ་བ་འདེབས་ཀྱི་ཚེ། དང་བོ་རྫས་ཀྱི་འཕོ་བ་སྟེ། དེ་བཞིན་གཤེགས་པའི་འཕེལ་གདུང་ངམ། སྐྱེས་ཆེན་དམ་པའི་གདུང་རུས། ཡང་ན། སྒྲུབ་མཆོད་སྐབས་ཀྱི་རྡུལ་ཚོན། མགྲོན་བུ་མེར་བསྲེག་པའི་ཐལ་བ། ཁབ་ལེན་རྡོ་རྣམས་ཕྱེ་མར་འཐག་པ། སྦྲང་རྒོད་དང་མར་སྦྱར་བའི་ལྡེ་གུ སྤྱི་གཙུག་ཏུ་སྲབ་མཐུག་ཀོ་བ་ཙམ་བྱུགས། དེ་ཡང་ཕྱི་དབུགས་ཆད་མ་ཐག་ནས་ལུས་ཀྱི་དྲོད་ཕལ་ཆེར་བསྡུས་ཤིང་། སྙིང་ཀའི་ཐད་དུ་དྲོད་ཅུང་ཟད་ཡོད་པའི་སྐབས་དེར་འཕོ་བ་འདེབས་དགོས། ཚེ་འདས་དེ་ཉིད་ཤི་ནས་ཞག་ཁ་ཡར་སོང་བ་ལྟ་བུ་ཡིན་ན་རྣམ་ཤེས་འགུག་གཞུག་བྱ་དགོས། རོ་མེད་ན་གོས་སམ་མིང་བྱང་སོགས་ཐ་མལ་བའི་ཆ་བྱད་ཅན་ཙོག་པུར་ཐལ་མོ་སྦྱར་ནས་འདུག་པར་བསམ་ལ། སྐྱབས་འགྲོ་སེམས་བསྐྱེད་དང་། ཚད་མེད་བཞི་སྒོམ་སྟེ། མགོན་པོ་འོད་དཔག་མེད་འཁོར་དང་བཅས་པ་སྤྱན་དྲངས། ཚེ་འདས་ཀྱི་རྣམ་ཤེས་ཁ་དོག་དམར་ཞིང་གསལ་ལ་ཨ་ཐུང་གི་གཟུགས་ཅན་དུ་བཀུག་སྟེ། སྤྱི་གཙུག་ནས་སྙིང་ཀར་ཐིམ་པར། བདེན་ཚིག་བརྗོད་དེ་བགེགས་བསྐྲད་བྱས། དེ་ནས། བར་དོ་ངོ་སྤྲོད་དང་བཅས་ཕྱག་ཐལ་མོ་སྦྱར་ནས་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ་སྟེ། བླ་མ་སྟོན་པ་འོད་དཔག་མེད་ཀྱི་མཚན་བརྗོད་པ་ཉེར་གཅིག་བྱ། དེ་ནས་ཚེ་འདིའི་ལུས་ལོངས་སྤྱོད་གཉེན་ཉེ་གང་ལའང་མ་ཆགས་པར་འོད་དཔག་མེད་ལ་གསོལ་བ་རྩེ་གཅིག་ཏུ་འདེབས་དགོས་པའི་གསལ་འདེབས་དང་། ལུས་རྙིང་བ་ཙོག་པུར་ཡོད་པའི་དབུས་སུ་རྩ་དབུ་མ་སྦོམ་ཕྲ་མདའ་སྨྱུག་ཙམ་ཡོད་པའི་མར་སྣེའི་ལྟེ་བ་དང་། ཡར་སྣེ་ཚངས་བུག་ཏུ་ཟུག་པའི་མར་སྣེ་ཁ་ཟུམ་ཞིང་། ཡར་སྣེ་སྐར་ཁུང་ཁ་ཕྱེ་བ་ལྟ་བུར་གྱུར་བའི་མར་སྣེའི་ནང་དུ། རྣམ་ཤེས་ཀྱི་ངོ་བོ་ཐིག་ལེ་དཀར་ལ་དམར་བའི་མདངས་ཅན་རྒྱ་སྲན་ཙམ་ཡང་ཞིང་གཡོ་བ་འཕུར་ལ་ཁད་ཀྱི་རྣམ་པར་གསལ་བཏབ་སྟེ། དེ་ལ་དམིགས་པ་བཟུང་ནས། རང་གི་སྙིང་ཀ་ནས་རླུང་ཅུང་ཟད་སྤྲོས་ཏེ། ཚེ་འདས་ཀྱི་སྙིང་གི་ཐིག་ལེ་འོག་ཏུ་གནས་པ་ཆེར་འཕེལ་ཏེ། ཐིག་ལེ་བསྐྱོད་པར་ནུས་པ་དང་ལྡན་པར་བསམ་ལ། ཚེ་འདས་ཀྱིས་ཀྱང་གསོལ་བ་གདབ་པར་མོས་ཏེ། རང་ཉིད་ཀྱིས་སྐད་སྙན་མོས་མགོན་པོ་འོད་དཔག་མེད་ལ་གདུང་ཤུགས་དྲག་པོས་གསོལ་བ་ལན་གསུམ་བཏབ་པས། འོད་དཔག་མེད་ཀྱི་ཐུགས་ཀ་ནས་འོད་ཀྱི་སྦུ་གུ་ཕུ་ཐུང་བརྐྱངས་པ་ལྟ་བུ་ཞིག་བྱུང་སྟེ་ཚངས་བུག་ལ་ཟུག དེའི་ནང་ནས་འོད་ཟེར་ལྕགས་ཀྱུ་ལྟ་བུ་བྱུང་བ་དབུ་མའི་ནང་བརྒྱུད། ཚེ་འདས་ཀྱི་རྣམ་ཤེས་ཐིག་ལེར་གསལ་བཏབ། རང་གི་སྙིང་ག་ནས་སྤྲོས་པའི་ཐིག་ལེ་འོག་ཏུ་གནས་པ་ཆེར་འཕེལ་བ་དེས་བསྐྱོད་པར་བསམ་ལ། སྐད་གསང་མཐོན་པོས[ཧིག] གསུམ་དང[ཕཊ]གཅིག་བརྒྱབ། [ཧིག]དང་བོའི་སྐབས་སུ་ཚེ་འདས་ཀྱི་རྣམ་ཤེས་དེ་སྙིང་ག་ནས་མགྲིན་པར་དྲངས། གཉིས་པས་མགྲིན་པ་ནས་ཚངས་བུག གསུམ་པས་ཚངས་བུག་ནས་སྤྱི་བོ་བླ་མ་འོད་དཔག་མེད་ཀྱི་ཐུགས་ཀའི་ཧྲཱྀ་ཡིག་ལ་ཐིམ། མཐར[ཕཊ]དྲག་པོ་ཞིག་བརྗོད་ཚེ་དཔའ་ཆེན་གྱི་མདའ་འཕངས་པ་བཞིན་བདེ་བ་ཅན་གྱི་སྤྲུལ་གཞི་ལ་ཐིམ། དེའི་ཐུགས་ཀ་ནས་སླར་ཡང་རང་སེམས་ཚུར་འོང། གཤིན་པོའི་རྣམ་ཤེས་ཐིག་ལེའི་རྣམ་ཅན་སྐར་མདའ་མཆེད་པ་བཞིན་འདབ་སྟོང་པདྨའི་སྦུབས་སུ་ཐེག་ཆེན་གྱི་རིགས་ཅན་དབང་རྣོན་དུ་སྐྱེས། སངས་རྒྱས་ཀྱི་ཞལ་མཐོང་ཞིང་། ཆོས་མཐའ་ཡས་པའི་ཡོན་ཏན་བརྙེས་པས། རྒྱལ་བ་འཁོར་བཅས་མཉེས་ཏེ་བླ་ན་མེད་པའི་བྱང་ཆུབ་འཐོབ་པར་ལུང་བསྟན། སངས་རྒྱས་ཀྱི་ཞིང་གྲངས་མེད་དུ་བགྲོད་ནས། ཐེག་ཆེན་གྱི་ཆོས་ཉན་ཞིང་། མ་དག་པའི་འགྲོ་བ་སྒྲོལ་ནུས་པའི་མོས་པ་བྱས་ལ། རྗེས་སུ་བཟང་སྤྱོད་སོགས་སྨོན་ལམ་གྱིས་མཐའ་བརྒྱན་པར་བྱའོ། །ཞིབ་པར་ངག་དབང་འཇམ་དབྱངས་བློ་གྲོས་ཀྱི་འཕོ་ཁྲིད་དགའ་ལྡན་ཞིང་དུ་བགྲོད་པའི་མྱུར་ལམ་སོགས་ལས་ཤེས་པར་བྱའོ། །

ཡང་རྡོ་རྗེའི་གདན་བཞིའི་རྒྱུད་ལས། རིམས་ལ་སོགས་པ་མ་ཕོག་པར། །གོང་དུ་འཕོ་བའི་སྦྱོར་བ་མཆོག། སྔོན་དུ་བུམ་པ་བརྩམས་པ་ཡིན། །སྒོ་རྣམས་ཐམས་ཅད་བཅིང་བར་བྱ། །རྒྱལ་བ་ལྔ་ཡི་མཆོད་རྟེན་གྱི། །སྒོ་ནི་དགག་པར་བསྒོམ་བྱ་སྟེ། །དེ་ལ་འོག་གི་སྒོ་རུ་ནི། །ཆུ་ཡི་ས་བོན་དཀར་བོ་བསམ། །ཆུ་དང་ཆུ་མིག་སྒོ་ལ་ནི། །མེ་ཡི་ས་བོན་འབར་བ་སྟེ། །དེ་ལ་ཤིན་ཏུ་མཉམ་བཞག་པས། །དབུགས་ནི་བུམ་པ་ཅན་དུ་བསྒོམ། །ཞེས་རླུང་སྦྱོར་དང་བཅས་པ་སྒོམ་པར་གསུངས་ནའང། །རྙིང་ལུགས་ལྟར་ཞི་ཁྲོ་འཕོ་བ་རང་གྲོལ་གྱི་སྒོམ་ལུགས་ནི། མཁས་གྲུབ་ཀརྨ་ཆགས་མེད་ཀྱིས། བདེ་བའི་གནས་ལ་སེམས་དཔའི་སྐྱིལ་ཀྲུང་གིས་འདུག་ལ་འཁོར་བའི་སྒོ་དགག་པ་ནི། ལུས་དྲང་བོར་བསྲངས། ལག་པ་གཉིས་ས་ནོན་གྱི་ཕྱག་རྒྱས་པུས་མོ་གཉིས་བཀབ། དཔུང་བ་གཉིས་བརྒྱངས། དེ་ནས་རང་གི་སྙིང་གར་ཡི་གེ་ཧཱུཾ་མཐིང་ནག་འོད་དུ་འབར་བ་གཅིག ཧཱུཾ་གཅིག་ཆད་པས་བཤང་ལམ་དུ་སོང་། དམྱལ་བའི་སྒོ་ཁྲིག་གེར་བཀག དེ་ནས་ཧཱུཾ་གཅིག་ཆད། སྲིད་པའི་སྒོར་སོང་། ཡི་དྭགས་ཀྱི་སྒོ་བཀག དེ་བཞིན་དུ་ཧཱུཾ་གཅིག་གིས་ཆུ་ལམ་དུད་འགྲོའི་སྒོ་བཀག དེ་ནས་སྣ་བུག་གཉིས། དེ་ནས་རྣ་བའི་བུ་ག་གཉིས་ཧཱུཾ་འོད་དང་ལྡན་པ་རེ་རེས་བཀག་པར་བསམ། སྤྱི་བོ་ཚངས་པའི་བུ་ག་ནས་རྔྷི་མགོ་ཐུར་དུ་བསྟན་པས་བཀག་པར་བསམ། ལུས་ཀྱི་དབུས་རྩ་དབུ་མ་ལུག་རྒྱུད་ཀྱི་རྒྱུ་མ་ཕུས་བཏབ་པ་ལྟར། མར་སྣེ་ལྟེ་འོག་ཏུ་ཟུག་པ། ཡར་སྣེ་ཚངས་བུག་ཏུ་ཟུག་པ། དཀར་ལ་འཚེར་བའི་མདངས་དང་ལྡན་པ། ལུས་ཀྱི་དབུས་སུ་དྲང་བོར་ཁྲང་ངེ་ཡོད་པའི་མར་སྣེ་ལྟེ་འོག་རྩ་གསུམ་འདུས་མདོར་རིག་པའི་ངོ་བོ་ཐིག་ལེ་དཀར་ལ་འཚེར་བ་གསལ་ལ་དྭངས་པ། དབུགས་ཀྱི་སྐྱིབ་སྐྱིབ་འཕར་ལྷབ་ལྷབ་ཡར་ལ་ཁད་པ་ཡོད་པར་བསམ། སྤྱི་བོའི་སྟེང་གི་ནམ་མཁར་བླ་མ་དེ་འོད་དཔག་མེད་ཀྱི་ཆ་ལུགས་འཛུམ་དམུལ་ལེར་བཞུགས་པར་བསམ། ལུས་ཤེད་སྟེང་དུ་སྤུག་ལ་སྒྲིམ། བཤང་ལམ་དུ་དྲག་ཏུ་བསྡམས། མིག་གྱེན་དུ་ལྡོག ལྕེ་ཡ་རྐན་ལ་སྦྱར། ལག་པའི་མཐེ་བོང་གཉིས་ཀྱིས་སྲིན་རྩ་མནན་པའི་ཁུ་ཚུར་དྲག་ཏུ་བཅང་ཞིང་ལྟེ་འོག་ནས་ཡར་དྲག་ཏུ་འཐེན་ཅིང་། ངག་ཏུ﹝ཧིག﹞﹝ཧིག﹞ཅེས་ཁོང་ཤེད་དང་ལྡན་པས་དྲངས། འོག་རླུང་གི་ཤུགས་ཀྱིས་ཐིག་ལེ་དེ་རང་དབང་མེད་པར་དབུ་མའི་ནང་ནས་ཡར་ངང་ཧྲིལ་ལེ་དྲངས་པ། ﹝ཧི﹞བདུན་གྱིས་ལྟེ་བར་དྲངས། དེ་ནས་བདུན་གྱིས་སྙིང་གར། དེ་ནས་བདུན་གྱིས་མགྲིན་པར། དེ་ནས་བདུན་གྱིས་སྨིན་མཚམས་སུ། དེ་ནས﹝ཧིག﹞ཅེས་ཚངས་བུག་གི་རྔྷི་དེ་ལ་གཏུགས། ཐུག་པ་དང་ཀ་ཞེས་ཡང་ཐིག་ལེ་དེ་མར་བབས་པ་སྟེ། ལྟེ་འོག་ཏུ་ངང་ཀྱི་ལེར་གནས་པར་བསམ། དེའི་བར་ལ་ཅུང་ཟད་ངལ་གསོ། ཡང་སྔོན་ལྟར་སྦྱངས། ཐིག་ལེ་རིམ་པར་སྤར་བར་གསུངས་ལ།

ཡང་འཇག་བཙུགས་པའི་འཕོ་བ་སྦྱང་ལུགས་ནི། སེམས་ཅན་ཐམས་ཅད་ཀྱི་དོན་དུ་བདག་གིས་འཕོ་བ་སྦྱང་བར་བྱའོ་སྙམ་དུ་སེམས་བསྐྱེད་ནས། རང་ཉིད་ཡི་དམ་རྡོ་རྗེ་རྣལ་མའི་སྐུ་ཕྲུ་མ་ཕུས་བཏབ་པ་ལྟ་བུ་ཁོག་པ་སྟོང་སང་ངེ་བར་བསམ་པའི་སྤྱི་བོར་བླ་མའི་ངོ་བོ་སངས་རྒྱས་འོད་དཔག་མེད་སྐུ་མདོག་དམར་བོ་ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱར་མཛད་པ་ཞབས་རྡོ་རྗེ་སྐྱིལ་ཀྲུང་གིས་བཞུགས་པར་བསམ། རང་གི་ལུས་ཀྱི་དབུས་ནས་ཡར་རྩ་དབུ་མ་ཕྱི་དཀར་ལ་ནང་དམར་བ། སྤྱི་གཙུག་ནས་ལྟེ་འོག་སོར་བཞིའི་བར་སླེབས་པ་ཕྲ་སྦོམ་སྦ་ལྕག་འབྲིང་བོ་ཙམ་བསམ་པའི་ཚངས་བུག་ཏུ་རྔྷི་ཡིག་དཀར་བོ་མགོ་ཐུར་དུ་བསྟན་པ། དེ་ནས་རང་གི་དབུ་མའི་ནང་གི་སྙིང་ཐད་དུ་པདྨ་དམར་བོ་འདབ་མ་བརྒྱད་པའི་ལྟེ་བར་རམ་ལས་ཉི་མའི་དཀྱིལ་འཁོར་གྱི་སྟེང་དུ་རང་གི་རྣམ་པར་ཤེས་པའི་ངོ་བོ་ཐིག་ལེ་དཀར་ལ་འཚེར་བ། སྣུམ་ཞིང་འགྲིལ་བ། སྲན་མའི་རྡོག་པོ་ཙམ། འཕར་འདར་ལིང་ལིང་བ་ཞིག་བསམས་ལ། ལུས་ཐ་མལ་བའི་སྐྱིལ་ཀྲུང་སོར་མོ་རྣམས་བསྐུམས། ཉྭ་བཞི་བསྒྲིམས། ལག་པ་རྡོ་རྗེ་ཁུ་ཚུར་བསྡམས། བྲང་གི་སྒྲོག་རུས་གཡས་གཡོན་ནོན་ཙམ་བྱ། མགྲིན་པ་འགུགས། ལྕེ་ཡ་རྐན་ལ་སྦྱར། མིག་གྱེན་ལ་ལྡོག གསུས་པ་སྟོད་དུ་ཡར་སྤུངས་ནས། ངག་ཏུ﹝ཧིག﹞ཞེས་པས་ཐིག་ལེ་སེན་རྡེལ་འཕངས་པ་ལྟར་སྤྱི་བོའི་རྔྷི་ལ་ཕོག་པར་བསམ། ཀ་ཞེས་པས་སྐར་མདའ་ལྷུང་བ་ལྟར་ཧྲིལ་གྱིས་ལྷུང་བར་བསམ། དེ་ལྟ་བུ་ཡར་འཕོ་མར་ཕབ། རྟགས་མ་ཐོན་གྱི་བར་དུ་འབད་དགོས་པར་གསུངས་སོ། །རྟགས་ནི་འཇག་བཙུགས་མའི་གཞུང་ལས། རྟགས་ནི་སྤྱི་བོ་ཟ་བ་དང་། ཚ་ཚག་དང་། སྦྲིད་པ། སྐྲངས་པ། བེམ་པ། གཡའ་བ། སྤྱི་གཙུག་ཏུ་ཆུ་སེར་དང་ཁྲག་ཐོན་པ། འབུར་བ་དང་། འབུག་པོ་ཡིན། ལུས་ཀྱང་ཟོ་མདོག་བདེ། དྲོད་སྐྱེས། ཟས་འཇུ་བ་སོགས་འབྱུང་ངོ་། །

༦ འཕོ་བ་ཐེབས་པའི་ཕན་ཡོན། གདན་གཞི་ལས། ཉེས་པ་ཀུན་གྱིས་གོས་པ་ནི། །འཕོ་བའི་སྦྱོར་བ་སྦྱར་བས་གྲོལ། །ཉིན་རེར་བྲམ་ཟེ་གསོད་པ་དང་། །མཚམས་མེད་ལྔ་བོ་བྱེད་པ་དང་། །རྐུ་འཕྲོག་འདོད་ལོག་སྤྱད་པ་ཡང་། །ལམ་འདི་ཡིས་ནི་དག་གྱུར་ཏེ། །སྡིག་པས་གོས་པར་མི་འགྱུར་ཞིང་། །སྲིད་པའི་སྐྱེན་ལས་རིང་དུ་འགྲོ། །ཇི་ལྟར་འདམ་སྐྱེས་པདྨ་ནི། །འདམ་གྱིས་གོས་པར་མ་གྱུར་ལྟར། །ཞེས་དང་། སྒྲོལ་མ་རིག་བྱེད་མའི་རྒྱུད་ལས། རྣམ་ཤེས་རླུང་ལ་ཞོན་པ་ནི། །སྟེང་གི་ལམ་ནས་འཕོས་ན་ནི། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བར་འགྱུར། །མགྲོན་པོ་ལམ་དུ་ཞུགས་པ་ལ། །གྲོགས་ཀྱིས་བསྒྱུར་བ་ཇི་བཞིན་ནོ། །ཞེས་དང་།

ཡང་། སྔོན་ཁྲི་སྲོང་ལྡེ་བཙན་གྱི་བློན་པོ་ཉི་མ་བྱ་བས་མེ་མཆེད་ཤོར་ཚེ་བླ་མཆོད་དང་ཕ་མ་གཉིས་མི་ཟོག་སུམ་བརྒྱ་ཙམ་ཚིག་སྟེ་དམྱལ་བར་སྐྱེས། བློན་པོ་སེམས་ཁོང་དུ་ཆུད་ནས་ཟས་ཀྱང་མ་ཟོས་པར་མུན་ཁུང་དུ་ཞུགས་ནས་འཆི་ལ་ཉེ་སྐབས། རྒྱལ་བོས། སློབ་དཔོན་པདྨ་འབྱུང་གནས་ལ་ཞུས་པས། སློབ་དཔོན་གྱིས་ཟབ་བེར་གྱིས་དབུ་བཏུམ་ནས་སྐད་ཅིག་གིས་བདེ་བ་ཅན་དུ་བྱོན་ནས། ཚོགས་འཁོར་བསྐོར་ནས་སངས་རྒྱས་བྱང་སེམས་ཐམས་ཅད་སྤྱན་དྲངས་ནས། ཨོ་རྒྱན་གྱི་ཐུགས་ཀར་བསྟིམས་ནས་བཀའ་བསྒོ་མཛད། འཕོ་བའི་གདམས་པ་བླངས་ཏེ་ཚུར་བྱོན་ནས་བློན་པོ་མུན་ཁུང་ལས་བཏོན་ཏེ། བློན་པོ་ཉི་མ་ལ་ཆིག་བརྒྱུད་དུ་བསྩལ། བློན་པོ་ཉི་མས་བསྒོམས་པས་ཞག་གསུམ་ནས་སྡུག་བསྔལ་སངས། ཞག་ལྔ་ནས་ཚེ་འདས་རྣམས་སངས་རྒྱས་འཐོབ་པ་ཀུན་གྱིས་མཐོང་། བློན་པོ་འཇའ་གུར་གྱི་ཀློང་དུ་འཕོ་བ་སྦྱངས་པ་དང་ལྷ་དང་ལྷ་མོ་ཡང་ཞལ་གཟིགས་བྱུང་ངོ་། །

༧ འཕོ་བ་མ་ཐེབས་པའི་ཉེས་སྐྱོན། འཆི་ཁ་མར་རྩ་བའི་བླ་མ་དྲན་པ་སོགས་རང་ལ་ནུས་པ་ཡོད་ན་གཞན་གྱི་འཕོ་བ་འདེབས་མི་དགོས་པར། དག་ཞིང་སོགས་སུ་བགྲོད་པའི་མཆོག་སྟེ། དཔུང་བཟང་གིས་ཞུས་པའི་རྒྱུད་ལས། སྐྱེས་བུ་གང་ཞིག་འཆི་བའི་ཚེ། །བླ་མ་སྐད་ཅིག་དྲན་གྱུར་ན། །འཕོ་བ་རྣམས་ཀྱི་མཆོག་ཏུ་འགྱུར། །སྐྱེས་བུ་དེ་ནི་མངོན་སངས་རྒྱས། །ཞེས་གསུངས་ལ། འཕོ་བ་བཏབ་ཀྱང་འདེབས་མཁན་དེའི་བསམ་སྦྱོར་མ་དག་ན། རང་གཞན་ཕུང་ལ་སྦྱོར་བ་སྟེ། རྡོ་རྗེ་མཁའ་འགྲོ་ལས། དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ལྷ་རྣམས་བསད་པ་ཙམ་གྱིས་ནི། །དམྱལ་བར་ངེས་པར་སྲེག་པར་འགྱུར། །དེ་བས་འཆི་བའི་མཚན་མ་རྣམས། །མཁས་པས་འབད་དེ་ཤེས་པར་བྱ། །ཞེས་གསུངས་ལ། འཕོ་ཁྲིད་མི་ཕམ་བླ་མའི་ཞལ་ལུང་ལས། ལས་སྦྱོར་གྱི་ཞལ་ཤེས་ཀྱང་འཆི་ལྟས་བྱུང་ན་བཟློག་ཐབས་མ་བྱས་པར་བཙན་ཐབས་ཀྱིས་འཕོས་ན་ལུས་ལ་དམ་པ་རིགས་བརྒྱ་གནས་པས་ལྷ་བསད་པའི་ཉེས་པ་འབྱུང་བར་གསུང་རྒྱུན་ལས་བྱུང་། ཚེ་འདིའི་ཆགས་ཞེན་ཆེ་ན་འཕོ་རྟགས་ཐོན་ཡང་དག་ཞིང་དུ་འཕོ་དཀའ་བ། བྱ་ནམ་མཁར་འཕུར་ཀྱང་གཤོག་པ་ལ་རྡོ་བཏགས་པ་ལྟ་བུ་ཡིན་གསུངས་པ་དང་ཡང་མཐུན་ནོ། །

རྗེ་བཙུན་མི་ལས། མི་ཤི་བའི་རོ་ཡི་སྔས་མགོ་ལ། །ནོར་ལེན་འདོད་ཀྱི་བན་བོན་ཅ་ཅོ་འདོན། །ཞེས་པ་ལྟར། འཕོ་བའི་སྐབས་ལོངས་སྤྱོད་འཐོབ་འདོད་ཀྱི་བརྣབ་སེམས་དང་། ཡིད་དུང་དུང་དང་། མིག་ཟུམ་ཟུམ། སྨིན་མ་ཟེང་ཟེང་གིས་གཤིན་བསླུས་མཛའ་མགུ་འབའ་ཞིག་ལྷུར་ལེན་པ་ནི། རང་ཉིད་ད་ལྟ་ཉིད་ནས་རྡོ་རྗེ་དམྱལ་བར་མིང་རྟགས་འགོད་པར་གསུངས་ལ། གཞན་ཡང་། གཤིན་དོན་དུ་ངན་སོང་སྦྱོང་བའི་ཆོ་ག་དང་། གཟུངས་སྔགས་བཟླ་བ། འཕོ་བ་སོགས་བྱས་པ་དེ་མ་དག་པ་དང་། བྱིང་རྒོད་ཀྱི་དབང་དང་། དམ་ཚིག་མི་གཙང་བ་སོགས་ཀྱི་དབང་དུ་བཏང་ན། བར་དོ་བ་དེས་མངོན་ཤེས་ཕྲ་མོས་མཐོང་ནས། ཀྱེ་མ་འདི་རྣམས་ཀྱིས་བདག་བསླུས་སོ་སྙམ་ནས་ཡི་མུག་སོགས་ཀྱིས་རྐྱེན་བྱས་ཏེ། ངན་སོང་དུ་འགྲོ་བའི་རྐྱེན་དུ་འང་འགྱུར་བར་གསུངས་སོ། །

སྨྱུང་གནས།

༡ སྨྱུང་གནས་ཀྱི་བརྒྱུད་རིམ། སྔོན་འཇིག་རྟེན་གྱི་ཁམས་རིན་པོ་ཆེའི་བརྒྱན་པ་ཞེས་བྱ་བ་ཞིག་ན། སངས་རྒྱས་ལེགས་མཐོང་ཞེས་བྱ་བའི་ཆོས་འཁོར་བསྐོར་ཞིང་། ཐམས་ཅད་གསོ་སྦྱོང་ཡན་ལག་བརྒྱད་པའི་ཁྲིམས་ལ་གནས་བཅུག་ནས། གནས་སྐབས་དང་མཐར་ཐུག་གི་བདེ་བར་བཀོད་ཚེ། འཁོར་སྒྱུར་གསོ་སྦྱོང་འཕགས་ཞེས་བྱ་བས་ཀྱང་དེ་བཞིན་གཤེགས་པ་དེ་ལས། གསོ་སྦྱོང་ཡང་དག་པར་བླངས་ཏེ། ནམ་མཁར་འཕགས་ནས། སྐྱེ་བོ་མང་བོ་སྨྱུང་གནས་ཡན་ལག་བརྒྱད་པ་ལ་བཀོད་ནས། མི་དང་ལྷ་གནས་སུ་སྐྱེས་སོ། །

ཡང་། སྔོན་བསྐལ་བ་དཔག་ཏུ་མེད་པའི་སྔ་རོལ་ཏུ་སངས་རྒྱས་གཟི་བརྗིད་སྟོབས་ཞེས་པ་འཇིག་རྟེན་དུ་བྱོན་ནས་སེམས་ཅན་མང་བོ་སྨྱུང་གནས་ལ་བཀོད་དེ། ལ་ལ་དག་བྱང་ཆུབ་སེམས་དཔའ་དང་། ཐ་མ་རྣམས་ཀྱང་ལྷ་མིའི་གོ་འཕང་འཐོབ་བོ། །

དེ་ནས་སངས་རྒྱས་འོད་སྲུངས་མྱ་ངན་ལས་འདས་ནས་དམ་ཆོས་འཇིག་ལ་ཉེ་བ་ན། བྲམ་ཟེ་གཉིས་ཀྱིས་གསོ་སྦྱོང་ཡན་ལག་བརྒྱད་པ་བླངས་པས། གཅིག་གིས་ཚུལ་ཁྲིམས་རྣམ་དག་བསྲུངས་པས་རྒྱལ་བོར་སྐྱེས་པ་དང་། ཅིག་ཤོས་ཀྱིས་ཕྱི་དྲོའི་ཁ་ཟས་ཟོས་པས་ཀླུར་སྐྱེས་པས། ཀླུར་སྐྱེས་པ་དེས་རྒྱལ་བོའི་ར་བ་སྲུང་མཁན་བརྒྱུད་དེ། ཉིན་ཞག་གཅིག་གི་ཁྲིམས་ཀྱི་ཆོ་ག་བདག་ལ་བསྩལ་ཏུ་གསོལ། མ་གནང་ན་རྒྱལ་བོའི་ཡུལ་ཡང་རྒྱ་མཚོར་བསྒྱུར་རོ་ཞེས་འཕྲིན་སྤྲིངས་པས། རྒྱལ་བོ་ཤིན་ཏུ་མི་དགའ་ནས། བློན་པོ་མཆོག་གཅིག་མཆིས་པ་དེ་ལ་ཁྱོད་ཀྱིས་དཔེ་ཆ་དེ་མ་རྙེད་ན་གསོད་དོ། །ཞེས་བཀའ་ཕབ། བློན་པོ་ཨུ་ཐུག་ཏེ་ཕ་རྒན་ལ་སྨྲས་པས། ཕ་རྒན་གྱིས། རང་ཅག་གི་ཁྱིམ་ན་ཀ་བ་ཞིག་ལ་རྟག་ཏུ་འོད་འབྱུང་སྟེ། དེའི་ནང་ན་ཅི་ཡོད་ལྟོས་ཤིག་ཅེས་བསྒོས་པ་ལྟར། ཀ་བ་གཤགས་ཏེ་བལྟས་པས། རྟེན་འབྲེལ་བཅུ་གཉིས་ཀྱི་མདོ་དང་ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་བྱུང་བ་རྒྱལ་བོར་ཕུལ་བས། ཀླུ་དང་མིའི་ཡུལ་དུ་གསོ་སྦྱོང་ཡན་ལག་བརྒྱད་པ་དར་བར་མཛད་པ། མཛངས་བླུན་མདོ་ལས་ཀུན་ཏུ་རྒྱུས་ཚུལ་ཁྲིམས་བསྲུངས་པའི་ལེའུར་གསུངས་པ﹙བཤད་ཚུལ་འདི་དང་ཅུང་ཟད་མི་མཐུན་པ་བྲག་དཀར་སྤྲུལ་སྐུ་དང་བློ་བཟང་ལུང་རིགས་རྒྱ་མཚོའི་སྨྱུང་གནས་ཀྱི་ཆོ་གའི་ཟུར་བརྒྱན་ལས་གསུངས་པའི་ཁུངས་འཚོལ། ﹚དང་།

འོ་ན། ད་ལྟའི་སྨྱུང་གནས་ཀྱི་རྣལ་འབྱོར་ལ་བརྩོན་པ་འདི་གང་ལས་བརྒྱུད་ཅེ་ན། རྣམ་འདྲེན་བཞི་བ་སྟོན་པ་ཤཱཀྱ་ཐུབ་པས། ཐུགས་རྗེ་ཆེན་པོའི་རྒྱུད་རྣམས་འཕགས་པ་སྤྱན་རས་གཟིགས་དང་། འཇམ་དཔལ་དབྱངས། ཕྱག་ན་རྡོ་རྗེ་སོགས་ལ་གནང་། དེ་ལས་མགོན་པོ་ཀླུ་སྒྲུབ་ཡབ་སྲས་དང་། སློབ་དཔོན་ཛེ་ཏ་རི་དང་། རྡོ་རྗེ་གདན་པ་ཡབ་སྲས་བརྒྱུད་ཚུལ་དང་། ཡང་དགེ་སློང་མ་དཔལ་མོས་ཀྱང་གྲུབ་ཆེན་ཕག་ཚད་པ་སོགས་མཁས་གྲུབ་མང་དུ་བསྟེན་པ་སོགས་བརྒྱུད་རིམ་མང་དུ་སྣང་ཡང་། དེང་སང་ཡོངས་གྲགས་ལ་ཐུགས་རྗེ་ཆེན་པོ་ནས་དགེ་སློང་མ་དཔལ་མོར་བརྒྱུད་པ་འདི་གཙིགས་ཆེ། དེ་ཡང་དགེ་སློང་མ་དཔལ་མོས་ཐུགས་རྗེ་ཆེན་པོ་ཞལ་གཟིགས་ཤིང་། དབང་དང་གདམས་པ་ཐམས་ཅད་བུམ་པ་གང་བྱོའི་ཚུལ་དུ་གནང་བ་འདི། བྱིན་རླབས་ཉེ་བརྒྱུད་ཀྱི་དབང་དུ་བྱས་པ་ཡིན། དགེ་སློང་མ་དཔལ་མོ་ནས་རང་གི་དྲིན་ཆེན་རྩ་བའི་བླ་མའི་བར། རྡོ་ལག་རྒྱུན་དང་ཆུ་བུམ་རྒྱུན་གྱི་དཔེ་བཞིན་བརྒྱུད་པ་ནི། དགེ་སློང་མ་དཔལ་མོ་ནས་རིམ་བཞིན་པཎྚྀ་ཏ་ཟླ་བ་གཞོན་ནུ། མཁས་པ་ཡེ་ཤེས་བཟང་བོ། བལ་བོ་བེ་ཉ་བ། བྱང་སེམས་ཟླ་བ་རྒྱལ་མཚན། ཉི་ཕུག་པ་ཆོས་ཀྱི་གྲགས་པ། སྤྲུ་བ་རྡོ་རྗེ་རྒྱལ་བོ། ཞང་སྟོན་དགྲ་འཇིགས། རྩེ་འདུལ་ཐུགས་རྗེ་བྱང་ཆུབ། མཁན་ཆེན་བདེ་བ་ཅན་པ། ཆུ་བཟང་བྱང་ཆུབ་འབར། རིན་པོ་ཆེ་ཤེས་རབ་འབུམ། རྒྱལ་སྲས་ཐོགས་མེད་བཟང་བོ། ཀུན་མཁྱེན་ཤེས་རབ་དཔལ། ཞལ་སྔ་ནས་ཚུལ་ཁྲིམས་རྒྱལ་མཚན། རྗེ་ཡོན་ཏན་རིན་ཆེན། རྗེ་སངས་རྒྱས་རྒྱ་མཚོ། སྐྱབས་མཆོག་དཔལ་བཟང་། རྒྱལ་བ་བློ་བཟང་དོན་འགྲུབ། མཁས་གྲུབ་སངས་རྒྱས་ཡེ་ཤེས། པཎ་ཆེན་བློ་བཟང་ཆོས་ཀྱི་རྒྱལ་མཚན། དྲུང་བ་རྟ་ཕུག་པ་དམ་ཆོས་རྒྱལ་མཚན། སྒྲུབ་ཁང་དགེ་ལེགས་རྒྱ་མཚོ། ཕུར་ལྕོག་ངག་དབང་བྱམས་པ། ཡོངས་འཛིན་ཡེ་ཤེས་རྒྱལ་མཚན། གྲུབ་དབང་བསྐལ་བཟང་བསྟན་འཛིན་སོགས་བརྒྱུད་པ་ཡིན་ལ། སྨྱུང་གནས་བླ་མ་བརྒྱུད་པའི་རྣམ་ཐར་ཅུང་ཟད་རེ་བྲག་དཀར་སྤྲུལ་སྐུའི་སྨྱུང་གནས་བླ་མ་བརྒྱུད་པའི་རྣམ་ཐར་དང་ཕན་ཡོན་ན་གསལ་བས། དེར་གཟིགས་པར་བྱ་ལ།

འདིར་དགེ་སློང་མ་དཔལ་མོའི་རྣམ་ཐར་མདོར་བསྡུས་ཤིག་བཀོད་ན། རྒྱལ་སྲས་ཐོགས་མེད་བཟང་བོ་དཔལ་གྱིས། ཨིནྡྲ་བྷུ་ཏིས་ལུང་བསྟན་འཕགས་པ་བསྒྲུབས། །ཤིང་འཕེལ་གནས་སུ་མཆོག་གི་དངོས་གྲུབ་འཐོབ། །ཁ་སར་བ་ཎིར་ཆོ་འཕྲུལ་ཆེན་པོ་བསྟན། །དཔལ་ལྡན་དཔལ་མོའི་ཞབས་ལ་གསོལ་བ་འདེབས། །ཞེས་དང་། རྒྱལ་མཆོག་སྐལ་བཟང་རྒྱ་མཚོས། རྣམ་གྲོལ་མཆོག་གི་སར་གཤེགས་དཔལ་མོའི་ཞབས། །ཞེས་བསྔགས་པའི་དགེ་སློང་མ་དཔལ་མོ་ནི། རྒྱལ་བོ་ཨིནྡྲ་བྷུ་ཏིའི་སྲས་མོར་འཁྲུངས། སྐྱེད་བསྲིངས་ནས་རྒྱ་གར་ཉི་འོག་གི་རྒྱལ་བོ་སྡིག་སྤྱོད་ལ་དགའ་བ་ཞིག་ལ་ཆུང་མར་བརྫངས་ཀྱང་། དེར་མ་སླེབས་ཙམ་དུ་འཁོར་བ་ལ་ཞེན་ལོག་འཁྲུངས་ཏེ། སྨྱོ་རྫུ་གནང་ནས། དགེ་སློང་མའི་སྡོམ་པ་བླངས་ཤིང་། གྲུབ་ཆེན་ཕག་ཚད་པ་སོགས་མཁས་གྲུབ་མང་དུ་བསྟེན་ནས་རིག་པའི་གནས་ལྔ་དང་། ཁྱད་པར་དུ་གསང་སྔགས་ཀྱི་ཉམས་ལེན་ལ་བརྩོན་པ་མཛད། ནམ་ཞིག་གི་ཚེ། དགེ་སྦྱོར་གནད་དུ་སྨིན་ཏེ་སྒྲུབ་པ་ལ་སྐུལ་བའི་ཆེད་དུ། སྐུ་ལུས་ལ་མཛེ་ནད་བཞེས་ཏེ་སྣག་ཁྲག་བྱུང་ནས་ཟུག་གཟེར་གཟོད་དཀའ་བ་བྱུང་སྟེ། ཕྱག་གཡས་པའི་མཁྲིག་མ་ནས་ཆད་པས། བཟའ་བཏུང་ཡང་སྤྱོད་དཀའ་བ་བྱུང་སྟེ། དུད་འགྲོ་ལྟར་ཁ་སྦུབ་ཏུ་ཟ་དགོས་པ་བྱུང་བས། འཁོར་རྣམས་ཀྱིས་རྩའི་སྤྱིལ་བུ་ཞིག་ཏུ་བསྐྱལ། དེར་ཐུགས་ཧ་ཅང་སྐྱོ་བས་བཤུམ་གྱིན་བཞུགས་པའི་ཚེ། མཚན་ལམ་དུ་ཡབ་རྒྱལ་བོ་ཨིནྡྲ་བྷུ་ཏི་བྱོན་ནས། ཁྱོད་ལི་ཁ་ར་ཤིང་འཕེལ་དུ་བྱོན་ལ་ཐུགས་རྗེ་ཆེན་པོ་སྒྲུབས་ཤིག་ཅེས་ལུང་བསྟན་པ་བཞིན། དེར་ཕེབས་ཏེ་བཅུ་གཅིག་ཞལ་གྱི་དྲུང་དུ་བཞུགས་ནས། མཆོག་གི་དངོས་གྲུབ་མ་འཐོབ་བར་དུ་གཞན་དུ་མི་འགྲོ་བའི་དབུ་མནའ་བཞེས་ཏེ། ཐུགས་དམ་ལ་དམར་བས། ནད་ཐམས་ཅད་སྦྲུལ་ཤུན་ལྟར་ཕུད་ཅིང་། ཕྱག་གཡས་པ་ཡང་སོར་ཆུད་པས། སྐུ་ལུས་སྔར་བས་ཀྱང་ཡིད་འོང་དུ་གྱུར་ཏེ། ས་ལམ་གྱི་རྟོགས་པ་ཁྱད་པར་ཅན་ཐུགས་རྒྱུད་ལ་འཁྲུངས་ཤིང་། ལྷ་ཀླུ་བཙན་གསུམ་བྲན་ཏུ་འཁོལ་བར་མ་ཟད། རྗེ་བཙུན་སྒྲོལ་མ་དང་། དོན་ཞགས་ལྷ་ལྔ་སོགས་ཞལ་གཟིགས་ཤིང་། ཁྱད་པར་དུ་ས་ག་ཟླ་བའི་ཚེས་བཅོ་ལྔའི་ཉིན་ཐུགས་རྗེ་ཆེན་པོ་དངོས་སུ་ཞལ་གཟིགས་ཏེ། དབང་དང་གདམས་པ་བུམ་པ་གང་བྱོའི་ཚུལ་དུ་གསན། དེ་ནས་སེམས་ཅན་གྱི་དོན་དུ་སྨྱུང་གནས་ཟླ་གསུམ་དུ་སྲུང་མཐར། ཡུལ་དབུས་སུ་བྱོན་པས་ཐམས་ཅད་ཀྱི་སྐུ་ལུས་ཉ་ཟླ་ལྟར་དྭངས་པ་མཐོང་བས། དགེ་སློང་མ་འདིས་བསླབ་སྡོམ་ལ་ཅུང་ཟད་གཡེལ་ལམ་ཞེས་ཟེར་བས། གཞན་མ་དད་པ་ལྡོག་པའི་ཕྱིར། ཁ་སར་བ་ཎིའི་དུས་མཆོད་ཀྱི་ཁྲོམ་གསེབ་ཏུ་བྱོན་ཏེ་རང་གི་དབུ་བཅད་ནས། མཁར་གསིལ་གྱི་རྩེ་མོར་བཏགས་ཏེ། གར་བྱེད་པ་སོགས་ཆོ་འཕྲུལ་མང་དུ་བསྟན་ནས། ཁོ་ལ་ཕམ་པ་བྱུང་ན་མགོ་བོ་འབྱར་དུ་མི་བཏུབ། མ་བྱུང་ན་སླར་འབྱར་བའི་བདེན་སྟོབས་བརྗོད་པས། སླར་འབྱར་ཏེ་ཐམས་ཅད་ཀྱི་ལོག་ལྟ་ཞི་ཞིང་དད་པའི་ས་ལ་བཀོད་དེ། དབང་དང་བྱིན་རླབས་གནང་བས་གྲུབ་པ་འཐོབ་པའི་བུ་སློབ་མང་དུ་བྱུང་ངོ་། །

༢ བསྙེན་གནས་དང་ཐེག་ཆེན་གསོ་སྦྱོང་གི་མི་འདྲ་བའི་ཁྱད་པར། བསྙེན་གནས་དང་ཐེག་ཆེན་གསོ་སྦྱོང་གཉིས་སྤང་བྱ་བརྒྱད་སྤོང་བ་ཙམ་དུ་མཚུངས་ཀྱང་། མི་འདྲ་ས་གཞན་མང་སྟེ། ༡ གང་ནས་གསུངས་པའི་ཁུངས་མི་འདྲ་བ་ནི། བསྙེན་གནས་ཀྱི་ཆོ་ག་བྲམ་ཟེ་གནས་འཇོག་གི་མདོ་དང་། ཐེག་ཆེན་གསོ་སྦྱོང་ནི་དོན་ཞགས་ཞིབ་མོའི་རྒྱུད་ལས་གསུངས་པ་ཡིན། ༢ སྡོམ་པ་ལེན་པའི་རྟེན་མི་འདྲ་བ་ནི། བསྙེན་གནས་ནི་རབ་བྱུང་གིས་ལེན་དུ་མི་རུང་ལ། གསོ་སྦྱོང་ནི་དགེ་སློང་རྡོ་རྗེ་འཛིན་པས་ཀྱང་བླངས་ཆོག་པ་ཡིན། ༣ ལེན་པའི་ཀུན་སློང་མི་འདྲ་བ་ནི། བསྙེན་གནས་ནི་རང་དོན་ཁོ་ནར་མྱང་འདས་འཐོབ་འདོད་ཀྱི་བསམ་པ་ཙམ་ལ་བརྟེན་ནས་སྐྱེས་ལ། ཐེག་ཆེན་གསོ་སྦྱོང་ནི་གཞན་དོན་དུ་སངས་རྒྱས་འཐོབ་འདོད་དགོས་པ་ཡིན་ནོ། །༤ ཆོ་ག་མི་འདྲ་བ་ནི། བསྙེན་གནས་ནི་དགོངས་གསོལ་སྐྱབས་འགྲོ་སྔོན་དུ་བཏང་སྟེ་ལེན་དགོས་ལ། གསོ་སྦྱོང་ནི་ཕྱོགས་བཅུའི་སངས་རྒྱས་དང་བྱང་སེམས་ལ་དགོངས་གསོལ་སྔོན་དུ་བཏང་ནས། སྔོན་བྱོན་གྱི་རྒྱལ་བ་རྣམས་དང་ཚུལ་མཚུངས་པར་ཁས་ལེན་ལན་གསུམ་དུ་བྱས་ཏེ་ལེན་དགོས། ༥ འཐོབ་བྱའི་འབྲས་བུ་མི་འདྲ་བ་ནི། བསྙེན་གནས་ལ་སེམས་བསྐྱེད་པ་ལྟར་ཐེག་པ་ཆེ་ཆུང་གི་མྱང་འདས་གཉིས་ཀ་འབྱུང་ལ། གསོ་སྦྱོང་ལ་ནི་མ་ཉམས་ན་རྫོགས་པའི་བྱང་ཆུབ་ཀྱི་འབྲས་བུ་འབྱུང་བའི་ཕྱིར་རོ། །དེ་ལྟར་མི་འདྲ་བའི་ཁྱད་པར་མང་དུ་ཡོད་ཀྱང་། སྔོན་བྱོན་དམ་པ་རྣམས་ཀྱི་ལྔར་བསྡུས་ཏེ་གསུངས་པ་ལྟར། འདིར་ཡང་དེ་ལྟར་བཀོད་དོ། །

༣ ཐེག་ཆེན་གསོ་སྦྱོང་གི་སྡོམ་པ་ལེན་པའི་ཚུལ། སྡོམ་པ་མ་བླངས་པའི་སྔོན་འགྲོ་ལ་ཐ་མ་ཁ་དང་ཆང་། སྒོག་ཙོང་། ཟྭ་ཚོད་སོགས་ཉིན་འགའི་སྔོན་ལ་འཛེམ་དགོས་སྟེ། རནྟའི་ལུང་བསྟན་ལས། རྟེན་གྱི་སྐུ་ལ་དུ་བ་ཕོག་པ་ཡིས། །ལྷན་ཅིག་སྐྱེས་པའི་ལྷ་ནི་བྲོས་པ་དང་། །འཐུང་བའི་མོད་ལ་བྱང་ཆུབ་སེམས་རྩ་སྐེམ། །སྲོག་རྩར་གདོན་ཞུགས་ཚེ་ཐུང་དབུགས་ཀྱང་འཚང་། །བཞི་བརྒྱ་རྩ་བཞིའི་ནད་རྣམས་སྣ་འདྲེན་བྱེད། །ཅེས་དང་། འཐུང་བའི་མི་རྣམས་ཡི་དམ་ལྷ་བསྒྲུབ་ཀྱང་། །ལྷ་ཞལ་མི་སྟོན་ཚུར་ལ་གདོན་ཞལ་མཐོང་། །བསྐལ་བར་བསྒྲུབས་ཀྱང་མི་འགྲུབ་བར་ཆད་འབྱུང་། །ཞེས་དང་། ཆང་ལའང་འདུལ་བ་ལུང་ལས། ཆང་འཐུང་དམྱལ་བ་ངུ་འབོད་སྐྱེ། །སྦྱིན་མཁན་དེ་ཡི་འཁོར་དུ་སྐྱེ། །ཞེས་དང་། ཙོང་སྒོག་སོགས། འདུལ་བ་མདོ་རྩར། སྒོག་སྐྱ་ཞག་བདུན། ཀུན་དོང་ནི་ཞག་གསུམ། ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ། །ཞེས་སོ། །

སྡོམ་པ་ལེན་པའི་རྟེན་ལ། ཡོད་ན་རྟེན་དང་གང་ཟག མེད་ན་རྟེན་གསུམ་ལས་ཀྱང་ལེན་རུང་ལ། རབ་དགེ་སློང་ཁྲིམས་ལྡན་དང་། མིན་ན། ཁྱིམ་པ་གསོ་སྦྱོང་ལ་གནས་པ་ལས་ཀྱང་ངོ་། །སྡོམ་པ་ལེན་པ་དེ་ཡང་། སྐྱབས་གསུམ་སྔོན་དུ་བཏང་སྟེ། སྡོམ་པ་ཞུ་བའི་དོན་དུ་མཎྜལ་དབུལ། དེ་ནས་བྱང་ཆུབ་སེམས་ཀྱི་ཀུན་སློང་གསལ་བཏབ་ནས། ཕྱོགས་བཅུ་ན་བཞུགས་པའི་ཞེས་སོགས་དགོངས་གསོལ་སྔོན་དུ་བཏང་སྟེ། དངོས་གཞི་ལ། ཇི་ལྟར་སྔོན་གྱི་དེ་བཞིན་གཤེགས་པ་ཞེས་པ་ནས། གསོ་སྦྱོང་ཡང་དག་པར་བླང་བར་བགྱིའོ། །ཞེས་པའི་བར་བླ་མ་ལ་ཐུགས་རྗེ་ཆེན་པོའི་འདུ་ཤེས་བཞག་ནས། རྗེས་ཟློས་ལན་གསུམ་རྫོགས་པ་དང་ལྷན་དུ་སྡོམ་པ་མནོས་པའི་ཐོབ་བློ་བྱས་ཏེ། དགའ་བ་སྒོམ་པ་གལ་ཆེ། ཐབས་ལགས་ཀྱང་བྱ། དེ་ནས་ཚུལ་ཁྲིམས་སྔར་ཉམས་པ་སོས་ཤིང་། སླར་རྣམ་དག་འབྱུང་ཕྱིར་ཚུལ་ཁྲིམས་རྣམ་དག་གི་གཟུངས་ཉེར་གཅིག་བཟླ་ལ། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །སོགས་བཏོན་ཏེ་ཚུལ་ཁྲིམས་རྣམ་དག་གིས་མཐར་བརྒྱན་པར་བྱའོ། །

རྟེན་གྱི་དྲུང་དུ་ལེན་ཚེ། རྟེན་ལ་ཐུགས་རྗེ་ཆེན་པོ་དངོས་ཀྱི་འདུ་ཤེས་བཞག དགོངས་གསོལ་དང་། ཐབས་ལགས་འདོར་བ་མ་གཏོགས། གཞན་རྣམས་སྔར་ཇི་ལྟ་བ་བཞིན་ནོ། །

༤ ཐེག་ཆེན་གསོ་སྦྱོང་གི་བསྲུང་བྱ་ཡན་ལག་བརྒྱད། བཤེས་སྤྲིངས་ལས། འཚེ་དང་ཆོམ་རྐུན་འཁྲིག་པ་རྫུན་དང་ནི། །ཆང་དང་དུས་མིན་ཟས་ལ་ཆགས་པ་དང་། །མལ་སྟན་མཐོ་ལ་དགའ་དང་གླུ་དག་དང་། །གར་དང་ཕྲེང་བའི་ཁྱད་པར་རྣམ་སྤོང་ཞིང་། །ཞེས་དང་། ཐེག་ཆེན་གསོ་སྦྱོང་གི་ཆོ་ག་ལས། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ནི་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཀྱང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་བོ་ཉེར་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཞེས་སོ། །

དེ་ཡང་སྡོམ་པ་འཐོབ་པ་ཙམ་གྱི་མི་ཆོག་པར་ཚུལ་བཞིན་སྲུང་བ་འདི་ཤིན་ཏུ་ནས་ཀྱང་གལ་ཆེ་སྟེ། བྱམས་པའི་ལུང་བསྟན་པའི་མདོ་ལས། ཤཱཀྱ་སེང་གེ་བསྟན་པ་ལ། །བསླབ་གཞི་ཡང་དག་བླངས་ནས་སུ། །ཇི་ལྟར་སྲུང་བཞིན་བསྒྲུབས་པ་ནི། །ང་ཡི་བསྟན་ལ་ལྷགས་པ་ཡིན། །ཞེས་སོ། །སྐབས་འདིར་བསླབ་གཞི་གང་ཞེ་ན། རྩ་བ་བཞི་དང་ཡན་ལག་བཞི་སྤོང་བ་སྟེ། མངོན་པ་མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་གསུམ་རིམ་གོ་རིམ་བཞིན། །ཞེས་པ་ལྟར། དང་བོ་བཞི་ཚུལ་ཁྲིམས་ཀྱི་ཡན་ལག་དང་། ཆང་སྤོང་བ་བག་ཡོད་ཀྱི་ཡན་ལག ལྷག་མ་གསུམ་བརྟུལ་ཞུགས་ཀྱི་ཡན་ལག་ཏུ་འདུའོ། །ཇོ་བོ་རྗེས་དེའི་སྟེང་གུང་ཚིགས་དཀར་གསུམ་ཁོ་ནར་སྤྱོད་པ་དང་། བག་ཡོད་ཀྱི་སླད་དུ་ཆབ་ལེན་པ་གཉིས་བསྣན་པའོ། །སྲུང་དུས་ཀྱང་། ལུས་དཀའ་ཐུབ། ངག་སྨྲ་བཅད། ཡིད་རྣམ་རྟོག་གིས་མ་བསླད་པར། གཙང་སྦྲ་དང་ལྡན་པའི་སྒོ་ནས་དགེ་སྦྱོར་ལ་བརྩོན་པར་བྱ་ལ། ཐ་ན་གཉིད་དང་གླལ་བ། འོག་རླུང་སོགས་ཀྱང་བསྡམས་ཞིང་། གལ་ཏེ་ཤོར་ན་གཟུངས་ཆུས་བཀྲུ་བར་བྱའོ། །ནངས་སྔ་མོའི་ཐོ་ཐུག་ཀྱང་ལུས་ལ་གནས་པའི་སྲིན་འབུ་རྣམས་གསོ་ཆེད་ཡིན་པས། འབག་ཐང་ཙམ་གྱིས་འཐུས་པར་བྱའོ། །

༥ སྨྱུང་གནས་སྲུང་བའི་དུས། སྨྱུང་གནས་སྲུང་བའི་དུས་ནི། ལྷའི་དབང་བོས་ཞུས་པའི་མདོ་ལས། ཚེས་བརྒྱད་དག་དང་བཅོ་ལྔ་དང་། །ཆོ་འཕྲུལ་ཆེན་པོའི་ཟླ་བ་ལ། །བསྙེན་གནས་ཡན་ལག་བརྒྱད་སྲུང་བས། །དེ་ནི་སངས་རྒྱས་ཉིད་དུ་འགྱུར། །ཞེས་དང་། བྱམས་པའི་ལུང་བསྟན་པའི་མདོ་ལས། ཟླ་ཕྱེད་ཀྱི་ནི་བཅུ་བཞི་དང་། །བཅོ་ལྔ་དེ་བཞིན་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་ཕྱེད་ལ། །ཡན་ལག་བརྒྱད་ལ་ལེགས་གནས་པའི། །བསྙེན་གནས་གསོ་སྦྱོང་བྱས་པས་ནི། །ང་ཡི་བསྟན་ལ་ལྷགས་སོ་གསུངས། །ཞེས་དང་། ཞབས་དཀར་ཚོགས་དྲུག་རང་གྲོལ་གྱིས། ཚེས་གྲངས་བརྒྱད་ལ་བསྙེན་གནས་ཀྱི། །སྡོམ་པ་ཚུལ་བཞིན་བསྲུངས་གྱུར་ན། །གཅོད་གཏུབ་དམྱལ་བ་ལས་ཐར་ནས། །བསྐལ་བ་སུམ་ཅུའི་སྒྲིབ་པ་བྱང་། །བཅོ་ལྔའི་ཉིན་པར་བསྙེན་གནས་ཀྱི། །སྡོམ་པ་ཚུལ་བཞིན་བསྲུང་གྱུར་ན། །གྲང་བའི་དམྱལ་བ་ལས་ཐར་ནས། །བསྐལ་བ་སུམ་ཅུའི་སྡིག་པ་བྱང་། །གནམ་སྟོང་ཉིན་པར་བསྙེན་གནས་ཀྱི། །སྡོམ་པ་ཚུལ་བཞིན་སྲུང་གྱུར་ན། །ཚ་བའི་དམྱལ་བ་ལས་ཐར་ནས། །བསྐལ་བ་བརྒྱ་ཡི་སྡིག་པ་བྱང་། །དེ་ཕྱིར་ཁྱིམ་པ་དད་ལྡན་ཚོ། །བསྙེན་གནས་སྡོམ་པ་ཅི་ཐུབ་སྲུང་། །ཞེས་སོ། །འདི་དག་ནི་དུས་འགྱུར་གྱི་དགེ་རྩར་དམིགས་ནས་གསུངས་པ་ཡིན་ལ། གཞན་དུ་ཆོས་སེམས་འཁྲུངས་ཤིང་མཐུན་རྐྱེན་འཛོམས་ན་དེ་ཉིད་དུ་རུང་སྟེ། ཚེ་ལ་ངེས་པ་མེད་པའི་ཕྱིར་རོ། །རྒྱལ་བུ་སྙིང་རྗེ་ཆེར་སེམས་ཀྱིས་ཇི་སྲིད་འཚོའི་བར་དུ་སྡོམ་པ་བླངས་པ་དཀོན་བརྩེགས་ལས་གསུངས་པ་ལྟར་རོ། །

༦ ཚུལ་ཁྲིམས་རལ་བའི་ཉེས་དམིགས་བཤད་པ། འདུལ་བ་ལུང་ལས། འདི་ན་ལ་ལས་རྒྱལ་བོའི་ཚིག་ཆེན་ལས། །ལན་འགར་འདས་ཀྱང་ཆད་པ་འཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདའ་བྱེད་ན། །དུད་འགྲོ་འགྲོ་འགྱུར་ཨེ་ལའི་འདབ་ཀླུ་བཞིན། །ཞེས་པ་ལྟར། ཀླུ་ཨེ་ལའི་འདབ་ཅེས་པ་སངས་རྒྱས་འོད་སྲུང་གི་བསྟན་པ་ལ། བཅས་པ་ཁྱད་དུ་བསད་དེ། ཤིང་ཨེ་ལའི་འདབ་མ་ཞིག་ཞེ་སྡང་གིས་བཅད་པས། དེའི་རྣམ་སྨིན་གྱིས། ད་ལྟ་ཡང་ཀླུ་ཨེ་ལའི་འདབ་ཞེས་བྱ་བ་མགོ་བོ་བདུན་ཡོད་པ། མགོ་བོ་རེ་རེ་ལ་ཨེ་ལའི་སྡོང་བོ་སྐྱེས་པ། སྲིན་འབུའི་རིགས་བརྒྱ་ཕྲག་དུ་མས་གང་བ། སྦྲང་བུའི་ཚོགས་དུ་མ་ལྡིང་ཞིང་སྣག་ཁྲག་འཛག་ཅིང་དྲི་ང་བ་ཞིག་ཏུ་སྐྱེས་པ་དང་།

ཡང་། སྨྱུང་གནས་ཀྱི་སྐབས། ཡན་ལག་རེ་རེ་མ་བསྲུངས་པའི་ཉེས་དམིགས་ནི། ༡ སྲོག་བཅད་ན། བསད་པས་ཚེ་ཐུང་ཞེས་པ་ལས་གཞན། དམྱལ་བ་ལས་སྐྱེས་ཏེ་སྡུག་བསྔལ་བཟོད་གླགས་མེད་པར་མྱངས་དགོས་པར་མ་ཟད། སྲོག་རེ་རེ་བཅད་པས། སྲོག་ལན་དགུ་བརྒྱ་གོ་དགུ་ནས་སུམ་བརྒྱའི་བར་མཆོག་དམན་ལ་ལྟོས་ནས་འཇལ་དགོས་པ་དང་། ༢ མ་བྱིན་པར་བླངས་པས། དམྱལ་བ་ངུ་འབོད་དུ་སྐྱེས་ལ། མིར་སྐྱེས་ཀྱང་ལོངས་སྤྱོད་དབུལ་ཞིང་གཞན་གྱིས་སྡང་བ། ༣ འཁྲིག་ཆོས་བརྟེན་པས། ངུ་འབོད་ཆེན་པོར་སྐྱེས་ལ། སྐྱེ་བ་ལྔ་བརྒྱར་མཛེ་མོ་དང་དབང་བོ་མི་ཚང་བ་སོགས་སུ་སྐྱེ། ༤ རྫུན་གྱིས་ནི། ཐིག་ནག་ཏུ་སྐྱེས་ལ། མིར་སྐྱེས་ཀྱང་ངག་ལྐུགས་པ་དང་། ཕྲག་དོག་ཆེ་བ། ཆོས་སྐད་མི་གོ་བར་སྐྱེ། ༥ ཆང་འཐུང་བས། ཟངས་ཞུན་ཁོལ་མ་འཐུང་བའི་ཚ་དམྱལ་དུ་སྐྱེས་ལ། མིར་སྐྱེས་ནའང་། གཏི་མུག་དང་བརྗེད་ངས་ཆེ་བ། ཁྲེལ་དང་ངོ་ཚ་མེད་པ། གནོད་སྦྱིན་དང་ཁྱི་དང་སྨྱོན་པ་རྣམས་ཀྱི་སྐྱེ་བ་ལྔ་བརྒྱ་རེ་ལེན་པ་དང་། ༦ ཁྲི་སྟན་ཆེ་མཐོ་ལ་བསྡད་པས། མལ་སྟན་མི་འབྱོར་ཞིང་། གཞན་གྱིས་གུས་བཀུར་མི་འཐོབ་པ་དང་། ཁྲི་སྟན་ཆེ་མཐོ་བསྡད་དེ་ཚུལ་ཁྲིམས་ཉམས་པས་ལན་ཆགས་ཤ་འཁོན་གཉེར་བའི་ལོ་རྒྱུས་ཤིག་ལ། སྔོན་རྒྱ་ནག་གི་ཡུལ་དུ་ཧྭ་ཤང་གི་སློབ་དཔོན་ཊི་ཥ་ན་བྱ་བ་འདུལ་ཁྲིམས་མིག་འབྲས་བཞིན་བསྲུང་བ་ཞིག་གིས། རྒྱལ་བོས་གནང་བའི་ཨ་ཀ་རུ་ནག་པོའི་ཁྲི་རིན་པོ་ཆེས་སྤྲས་པ་ཞིག་ལ་རྒྱལ་བོའི་བཀའ་ནན་ཆེ་བས་དབང་མེད་དུ་ལན་འགའི་བར་ལོངས་སྤྱད། མི་རིང་བར་པུས་མོའི་ལྷ་ང་ལ་ཕོལ་མིག་ཕོར་ཚད་ཙམ་མིག་གཉིས། སྨིན་མ་ཁ་སྣ་ཐམས་ཅད་ཚང་བ། ཁར་ཟས་བཅུག་ན་ཟ་བ། ན་ཚ་ཟུག་ཟེར་བཟོད་གླགས་མེད་པ་ཞིག་བྱུང་ནས་ཤིན་ཏུ་གདུངས་པ་ན། སྤྱན་རས་གཟིགས་ཀྱི་རྣམ་འཕྲུལ་ཧྭ་ཤང་ཞིག་དང་མཇལ་བས་དེས་ཆུ་མིག་ཞིག་གི་འགྲམ་དུ་ཁྲིད་ནས། ཕོལ་མིག་ཆུས་འཁྲུ་ཞིང་རྔ་ཡབ་ཀྱིས་བྱབས་བཞིན། དགེ་བཤེས་ཁྱོད་སྔོན་ཧཱན་གུར་གྱི་རྒྱལ་བོ་གིང་དྷིའི་ནང་བློན་ཡུའང་ཨང་དང་། ཕོལ་མིག་ཁྱོད་བློན་པོ་བཞོའུ་ཚོར་གྱུར་བ་ཨེ་དྲན། ཡུའང་ཨང་གིས་རྒྱལ་བོ་ལ་ཕྲ་མ་བཅུག་ནས་བཞོའུ་ཚོར་བསད་པ་ཨེ་དྲན། དེ་ནས་ཡུའང་ཨང་འགྱོད་པ་སྐྱེས་ནས་རབ་ཏུ་བྱུང་། ཡང་སྲིད་ཕྱི་མ་ནས་ད་ལྟའི་བར་མཐར་ཆགས་སུ་ཚུལ་ཁྲིམས་སྲོག་ལྟར་བསྲུངས་པས། བཞོའུ་ཚོ་ཁྱོད་ཀྱིས་ཤ་འཁོན་གཉེར་ནས་ཁོའི་སྐྱེ་བ་བཅུའི་བར་དུ་འབྲངས་ཀྱང་། ཚུལ་ཁྲིམས་བསྲུང་བའི་སྟོབས་ཀྱིས་གླགས་མ་རྙེད་པ་ཨེ་དྲན། ཞེས་གསུངས་པ་རྣམས་ལ་ཕོལ་མིག་གིས་ཀྱང་། ཨང་ཞེས་ལན་རེ་བཏབ། ཡུའང་ཨང་གི་སྐྱེ་བ་འདིར་དེ་ཉིན་ཁྲི་རིན་ཐང་ཅན་ལ་ལོངས་སྦྱད་པས་བཅས་འགལ་བྱུང་སྟེ། ཁྱོད་ཀྱིས་གླགས་རྙེད་ནས་གནོད་པ་བྱེད་ཐུབ་འདུག་ཀྱང་། ཁྱོད་ལའང་སླར་ལས་འདིའི་རྣམ་སྨིན་འབྱུང་བར་ངེས་པས། ད་རེས་ངེད་ཀྱིས་ཁྱེད་གཉིས་འདུམ་པར་བྱ་ཡི་ཐོངས་ཤིག་ཅེས་གསུངས་པས། ཕོལ་མིག་དེ་འབག་དོར་བ་བཞིན་དུ་ལྷུང་ཞེས་རྒྱ་ནག་ཆོས་འབྱུང་ལས་གསུངས་སོ། །༧ དུས་མིན་གྱི་ཟས་ཟོས་པས། སྔོན་སངས་རྒྱས་འོད་སྲུང་གི་བསྟན་པ་ལ། བྲམ་ཟེ་གཉིས་ཀྱིས་ཐེག་ཆེན་གསོ་སྦྱོང་གི་སྡོམ་པ་བླངས། གཅིག་གིས་ཕྱི་དྲོའི་ཁ་ཟས་ཟོས་པས། ཀླུར་སྐྱེས་པ་མཛངས་བླུན་མདོ་ན་གསུངས་པ་དང་།

ཡང་བྲམ་ཟེ་སྤྲང་བོ་ཞིག་གིས་གསོ་སྦྱོང་བླངས་ཏེ་སོང་བས། རི་བྲག་ཅིག་ཏུ་སླེབས་པ་ན་མུན་རུབ་པས། གནས་ཚང་གཡར་ཏེ་ཁ་ཟས་མ་ཟོས་པས། གནས་བདག་གིས་ཁྱེད་ཀྱིས་མི་ཟ་ན། ངེད་ཀྱི་ཁྱིམ་དུ་མ་འདུག་ཅིག་ཅེས་སྤྲད་པས། ཁོ་སྐྲག་ཏེ་ཁ་ཟས་ཟོས་པས། ཚེ་འཕོས་ནས་རྒྱལ་ཆེན་རིགས་བཞི་ལས་ལྷའི་བུ་གསོ་སྦྱོང་རལ་ཞེས་མིང་ངན་ཐོགས་ཏེ། ལོངས་སྤྱོད་དང་གཟི་བརྗིད་ལྷ་གཞན་ལས་དམན་པ་ཞིག་ཏུ་སྐྱེས་པ་དང་། ཡང་རྒན་མོ་སྡིག་རྒན་མ་མི་བཅུ་བསད་པ་ཞིག་སྨྱུང་གནས་ཐེངས་གསུམ་བསྲུངས་པས། ཐེངས་གཅིག་ཁ་ཟས་ཅུང་ཙམ་ཟོས། ཐེངས་གཅིག་ཆུ་འཐུང་། ཐེངས་གཅིག་ལེགས་པར་བསྲུངས་ནས་ཚེ་འཕོས་པས། རྒྱལ་སྲས་ཤིག་ཏུ་འཁྲུངས་ཀྱང་། ཟས་ཟོས་པས་མདོག་ངན་པ་དང་། ཆུ་འཐུང་བས་སེམས་རྣལ་ཏུ་མི་གནས་པའི་སྨྱོན་པ་ཞིག་ཏུ་སྐྱེས་པ་ལྟ་བུའོ། །འོན་ཀྱང་ཞབས་དཀར་བས། ན་ན་བསྙེན་གནས་སྡོམ་པ་སྲུང་། །མ་ཐུབ་བཞག་ན་འཆོར་བ་མིན། །ན་བ་སོས་ནས་མ་བསྲུང་ན། །སྡོམ་པ་འཆོར་བའི་སྲུང་བར་གྱིས། །བརྗེད་ནས་རྩམ་པ་སོགས་ཟོས་ཀྱང་། །བཤགས་ཏེ་བསྲུངས་ན་ཉེས་པ་མེད། །ཚོགས་ཀྱི་འཁོར་ལོ་བསྐོར་བའི་ཚེ། །ཟོས་ན་སྡོམ་པ་འཆོར་བ་མིན། །ཟོས་རྗེས་སྔར་ལྟར་མ་བསྲུང་ན། །སྡོམ་པ་འཆོར་བས་སྲུང་བར་མཛོད། །ཅེས་ཀྱང་གསུངས་སོ། །༨ ཆགས་སེམས་ཀྱིས་དྲི་བྱུགས་པས། ཚེ་འཕོས་ནས་དྲི་ངན་བྲོ་བ་དང་། མཚན་བཟང་མི་ལྡན་པ། གླུ་གར་གྱི་རྩེད་འཇོར་རོལ་བས། ཚེ་རབས་ཀུན་ཏུ་ཤེས་རྒྱུད་རྒོད་པ་དང་། ངག་ལ་ཆོས་ཀྱི་སྒྲ་མི་འཁྱོངས་པའོ། །

༧ གསོ་སྦྱོང་ཡན་ལག་བརྒྱད་པའི་ཕན་ཡོན་བཤད་པ། དང་བོ། ཡན་ལག་བརྒྱད་པ་སྤྱིའི་ཕན་ཡོན། ༡ དུས་ཀྱི་སྒོ་ནས་ཕན་ཡོན་ཆེ་བ་ནི། ཏིང་འཛིན་རྒྱལ་བོའི་མདོ་ལས། བསྐལ་བ་བྱེ་བ་གང་གཱའི་བྱེ་སྙེད་ཀྱི། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེ་ཕྲེང་བ་ཡིས། །སངས་རྒྱས་བྱེ་བ་ཁྲི་ཕྲག་རིམ་གྲོ་བྱས། །གང་གི་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་གྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་བྱེ་བྲག་འཕགས། །ཞེས་བསྐལ་བ་གྲངས་མེད་དུ། དང་བའི་སེམས་ཀྱིས་མཆོད་པའི་རྣམ་གྲངས་ཇི་སྙེད་ཅིག་གིས། སངས་རྒྱས་འབྱམས་ཀླས་པར་རིམ་གྲོ་བྱས་པ་ལས། བསྟན་པའི་དུས་མཐའ་འདིར་བསླབ་པ་སྣ་གཅིག་སྲུང་ན་ཕན་ཡོན་ཆེ་བར་བསྟན་པའི་ཤུགས་ལས། གསོ་སྦྱོང་གི་སྡོམ་པ་ལན་གཅིག་སྲུང་ན་ཕན་ཡོན་ཆེ་བ་གཏོགས་ཐུབ། བྱམས་པ་རང་གི་གསུངས་ལས་ཀྱང་། ཤཱཀྱ་ཐུབ་པའི་བསྟན་པ་ལ། །དད་པས་གང་གིས་ཆོས་ཉན་ཅིང་། །བསྙེན་གནས་ཡན་ལག་བརྒྱད་བསྲུངས་པ། །དེ་ཡི་འཁོར་དུ་སྐྱེ་བར་འགྱུར། །ཞེས་དང་། དབྱིག་གཉེན་གྱིས། གང་གི་དད་པའི་སེམས་ཀྱིས་ནི། །ལོ་བརྒྱར་སྦྱིན་པ་བྱིན་པ་བས། །གང་གི་ཉིན་གཅིག་ཚུལ་ཁྲིམས་ནི། །བསྲུངས་པའི་བསོད་ནམས་ཁྱད་པར་འཕགས། །ཞེས་སོ། །༢ ཡུལ་གྱི་སྒོ་ནས་ཕན་ཡོན་ཆེ་བ་ནི། དག་ཞིང་རྣམས་སུ་དགེ་བ་རྣམ་དག་བསྐལ་བར་བསྒྲུབས་པ་ལས། མ་དག་པའི་ཞིང་ཁམས་འདིར་དགེ་བ་སྣ་གཅིག་སེ་གོལ་གཏོགས་པའི་ཡུན་ཙམ་དུ་བསྒྲུབས་ན། བསོད་ནམས་ཁྱད་དུ་འཕགས་པར་གསུངས་སོ། །ཚུལ་འདི་ལ་དགོངས་ནས། ཡབ་རྗེ་བླ་མས་ཀྱང་། ལྷ་སྤྱན་རས་གཟིགས་ལས་མྱུར་བ་མེད། །ཆོས་ཡི་གེ་དྲུག་མས་ཟབ་པ་མེད། །སྡིག་སྦྱོང་ཐབས་བསྙུང་གནས་ལས་ལྷག་མེད། །འགག་ཉག་ག་མ་ནོར་རི་ཁྲོད་པ། །གསུངས་སོ། །༣ མི་མིན་གྱི་བར་ཆད་ཀྱིས་མི་ཚུགས་པ་ནི། ཚུལ་ཁྲིམས་ཡང་དག་པར་ལྡན་པའི་མདོ་ལས། ཇི་ལྟར་སྦྲུལ་གདུག་ཀླུ་ཆེན་ནག་པོ་ཡང་། །ཚུལ་ཁྲིམས་ལྡན་ལ་གནོད་མེད་གཞན་ཅི་སྨོས། །ཞེས་པ་ལྟར། སྔོན་རྒན་མོ་ཞིག་ཡན་ལག་བརྒྱད་པའི་གསོ་སྦྱོང་བླངས་ཏེ། ནམ་ཕྱེད་ཙམ་ན། རྒྱལ་བོ་གསལ་རྒྱལ་གྱིས། མི་ནག་ཆེན་ཞིག་ལ་ལྟོ་བསྐྱལ་བར་བང་ཆེན་དུ་མངགས་པས། ལམ་བར་དུ་མི་མ་ཡིན་ཁག་གསུམ་དང་འཕྲད་ཀྱང་། དེ་དག་གིས་གནོད་པའི་གླགས་མ་རྙེད་པའི་ལོ་རྒྱུས་འདུལ་བ་ལུང་ལས་གསུངས་པ་དང་། ༤ རྟེན་གྱི་སྒོ་ནས་ཕན་ཡོན་ཆེ་བ་ནི། དཔུང་བཟང་གིས་ཞུས་པའི་རྒྱུད་ལས། ཇི་ལྟར་ལོ་ཏོག་ཐམས་ཅད་ས་ལ་ནི། །བརྟེན་ནས་སྐྱོན་མེད་པར་ནི་སྐྱེས་པ་ལྟར། །དེ་བཞིན་ཚུལ་ཁྲིམས་བརྟེན་ནས་ཆོས་དཀར་མཆོག། སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཞེས་པ་ལྟར། ཚུལ་ཁྲིམས་ནི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་ཀྱི་གཞི་རྟེན་ཡིན་པར་མ་ཟད། ཆོས་སྒྲུབ་པ་ལ་ས་ཆོད་གཞན་ལས་ཆེ་སྟེ། ཞབས་དཀར་བས། བསྙེན་གནས་མ་བསྲུངས་གནས་སྐབས་སུ། །མར་ཁུ་རྒྱ་མཚོ་ཙམ་ཞིག་ལ། །སྡོང་བུ་རི་རབ་ཙམ་པ་ཞིག །བཙུགས་ནས་མར་མེ་ཕུལ་བ་བས། །སྡོམ་པ་བསྲུངས་པའི་ཉི་མ་དེར། །མར་ཁུ་ཐིགས་པ་ཙམ་ཞིག་ལ། །སྡོང་བུ་ཁབ་རྩེ་ཙམ་པ་ཞིག །བཙུགས་ནས་མར་མེ་ཕུལ་བ་དེ། །ཕན་ཡོན་ཤིན་ཏུ་ཆེ་བ་ཡིན། །བསྙེན་གནས་བསྲུང་བའི་ཉི་མ་དེར། །ཚོགས་བསགས་རྒྱ་ཆེན་བྱས་གྱུར་ན། །ཕྱི་མ་འདོད་ཁམས་ལྷ་རུ་སྐྱེ། །ཚོགས་བསགས་འབྲིང་ཙམ་བྱས་གྱུར་ན། །རབ་ཏུ་བྱུང་བའི་མི་རུ་སྐྱེ། །ཚོགས་བསགས་ཅུང་ཟད་བྱས་ན་ཡང་། །ཕྱི་མ་མི་ལུས་གཙང་མ་འཐོབ། །དེ་ཕྱིར་སྡོམ་པ་སྲུང་བའི་ཉིན། །ཚོགས་བསགས་གྱིས་ཤིག་དད་ཅན་ཚོ། །ཞེས་སོ། །ཡིག་དྲུག་གི་ཕན་ཡོན་བརྗོད་པ་པད་དཀར་ཆུན་པོ་ལས་ཀྱང་། སྨྱུང་གནས་བྱས་པའི་ནངས་པར་སྔ་དྲོ་དེ་དག་ལ་བཤོས་དྲངས་ན། ས་བརྒྱད་པ་ལ་གནས་པའི་བྱང་ཆུབ་སེམས་དཔའ་དྲངས་པ་དང་བསོད་ནམས་མཉམ་པ་དང་། གསོ་སྦྱོང་བླངས་པ་ཙམ་ལ་དྲངས་ན་དགྲ་བཅོམ་པ་ལ་དྲངས་པ་དང་བསོད་ནམས་མཉམ་པར་གསུངས་སོ། །༥ སྨྱུང་བར་གནས་པའི་གཏམ་རྒྱུད་དང་སྦྱར་ཏེ་ཕན་ཡོན་འགའ་བཤད་ན། མི་གཅིག་གིས་ཕ་མ་ཤི་སྟེ་ཆོས་བྱེད་རྒྱུ་མེད་པས་སྡུག་བསྔལ་ཤིན་ཏུ་ཆེ་སྐབས། བླ་མ་རིན་པོ་ཆེ་ཐོགས་མེད་ཀྱིས་དགོངས་ནས། ཁྱེད་ཀྱིས་ཕ་མའི་དྲིན་ལན་བསབ་ན་སྨྱུང་གནས་གྱིས། གསུངས་པ་བཞིན། གདན་གཅིག་སོ་ལྔ་བྱས་པས། ཕ་མ་གཉིས་ཐར་བ་འཐོབ་ལ། ཁོ་ཡང་དགྲ་བཅོམ་འཐོབ་པར་གསུངས་སོ། །

ཡང་། གནོད་སྦྱིན་ཤ་ཟ་ལྔས་རྒྱལ་བོ་བྱམས་པའི་སྟོབས་ལ་ཤ་ཁྲག་དྲོན་མོ་བསླངས་པས། རྒྱལ་བོས་སྐུ་ཤ་བཅད་དེ་བྱིན་པས། དེ་དག་གིས་ཁ་ཟས་ཀྱི་ཆེད་དུ་སྐུ་ཉིད་ལ་གནོད་པ་བྱས་པ་གཟོད་པར་འཚལ་ཞུས་པས། རྒྱལ་བོས་དེ་དག་གསོ་སྦྱོང་ཡན་ལག་བརྒྱད་པར་བཀོད་པས། དེའི་ཕན་ཡོན་གྱིས། བཅོམ་ལྡན་འདས་ཀྱི་སྤྱད་པ་སྤྱོད་པའི་ཚེ་འཁོར་ཤ་སྟག་ཏུ་སྐྱེས་ཤིང་། མཐར་སངས་རྒྱས་པའི་ཚེ་ཡང་འཁོར་གྱི་ཐོག་མ་ལྔ་སྡེར་འཁྲུངས་ཏེ་དགྲ་བཅོམ་འཐོབ་པ་ཡིན།

ཡང་། གྲུབ་ཆེན་ཉི་མ་སྦས་པའི་ཞལ་ལས། བུད་མེད་ཅིག་བུ་གཅིག་དང་། དུད་འགྲོ་ཡང་མང་བོ་ལག་ཉེས་ལ་སོང་བ་ཞིག ཕྱིས་སུ་བླ་མ་བཟང་བོ་ཞིག་དང་འཕྲད་པས། སྔར་བྱས་ལ་འགྱོད་པ་དྲག་པོ་འཁྲུངས་ཏེ་སྨྱུང་གནས་བརྒྱ་དང་བརྒྱད་བསྲུངས་པས། ཚེ་འཕོས་ནས་ལྷོ་ཕྱོགས་དཔལ་གྱི་རི་ལ་འགྲོ་དོན་བྱེད་ནུས་པའི་བླ་མ་བསོད་ནམས་འབྱུང་གནས་ཞེས་པར་འཁྲུངས།

ཡང་། མ་ཇོ་ཆོས་སྐྱིད་བྱ་བས་སྨྱུང་གནས་མང་དུ་བསྲུངས་པས། མོ་ཤི་བའི་དུས་སུ་རུས་པ་དུར་ཁྲོད་དུ་བསྐྱལ་བ་བྱ་རོག་གིས་རུས་པའི་དུམ་བུ་འཁྱེར་བ་རིང་བསྲེལ་དུ་སོང་བ་དང་།

དེ་མིན། སྨྱུང་གནས་གཅིག་སྲུང་ཡང་བསྐལ་བ་བཞི་ཁྲིའི་འཁོར་བ་ཕྱིར་བསྙིལ་བར་འགྱུར། བརྒྱ་རྩ་བརྒྱད་བསྲུང་ན། མི་དེ་རི་མགོར་སོང་ན་དེ་ཕྱོགས་ཀྱི་རླུང་ཕོག་ཚད་ཀྱི་སེམས་ཅན་ལ་ངན་འགྲོ་མེད་གསུངས། ཆུ་ལ་བརྒལ་ན། ཆུ་དེ་འཐུང་ཚད་ཀྱི་སེམས་ཅན་ལ་ངན་འགྲོ་མེད། མཐོང་ཐོས་དྲན་རེག་ལུས་ཀྱི་གྲིབ་མ་ཕོག་ཚད་ཡན་ཆད་ལ་ངན་འགྲོ་མེད་ཅེས་རྒྱུད་ནས་གསུངས་སོ། །དེ་ལས་གཞན་སྨྱུང་གནས་སྲུང་བའི་ཕན་ཡོན་གཏམ་རྒྱུད་མང་བོ་སྨྱུང་གནས་ཀྱི་ཆོ་ག་ཐར་བའི་ཐེམ་སྐས་ལས་གསལ་བས་དེར་གཟིགས་པར་བྱའོ། །

གཉིས་པ། གསོ་སྦྱོང་ཡན་ལག་བརྒྱད་པོ་སོ་སོའི་ཕན་ཡོན། ༡ སྲོག་གཅོད་སྤངས་པས་ཚེ་རིང་ནད་མེད་དང་། གཟི་བརྗིད་ཆེ་བ། ༢ མ་བྱིན་ལེན་སྤངས་པས། ཚེ་རབས་ཀུན་ཏུ་ལོངས་སྤྱོད་ཆེ་ཞིང་། རང་གི་ལོངས་སྤྱོད་ལ་གཞན་གྱིས་གནོད་པ་མེད་པར་རང་དབང་དུ་འདུ་བ། ༣ འཁྲིག་སྤྱོད་སྤངས་པས། གཟུགས་མཛེས་ཤིང་ཤ་མཚག་ལེགས་ལ། དབང་བོ་ཡོངས་སུ་ཚང་བ། ༤ རྫུན་སྤངས་པས། གཞན་གྱི་བསླུ་བྲིད་ཀྱིས་མི་ཐུབ་ཅིང་། ངག་ལ་བརྩི་མཐོང་ཆེ་བ། ༥ ཆང་སྤངས་པས། ཚེ་རབས་ཀུན་ཏུ་དྲན་ཤེས་བརྟན་ཞིང་ཤེས་རབ་ཕུན་སུམ་ཚོགས་པ། ༦ ཁྲི་སྟན་ཆེ་མཐོ་སྤངས་པས། གཞན་གྱིས་བསྟོད་བཀུར་འཐོབ་ཅིང་། མལ་སྟན་བཟང་ཞིང་བཞོན་པ་མང་བར་འགྱུར་རོ། །༧ དུས་མིན་གྱི་ཟས་སྤངས་པས། བཟའ་བ་དང་ལོ་ལེགས་ཀྱིས་ཕྱུག་པ། ༨ དྲི་དང་ཕྲེང་བ་སྤངས་པས། ཚེ་རབས་ཀུན་ཏུ་ལུས་དྲི་ཞིམ་པོ་དང་། མདོག་དབྱིབས་མཛེས་ལ་མཚན་བཟང་དུ་མ་དང་ལྡན་པ། གླུ་གར་སོགས་སྤངས་པས། ཚེ་རབས་ཀུན་ཏུ་ལུས་དང་ཤེས་རྒྱུད་དུལ་བ་དང་། ངག་ལས་ཆོས་ཀྱི་སྒྲ་དབྱངས་མི་ཆད་པར་སྒྲོགས་པ་བཅས་སོ། །

མདོར་ན། གུང་ཐང་བསྟན་པའི་སྒྲོན་མེས། མི་སྡིག་ཅན་བཙན་ཐབས་འཚང་རྒྱའི་ཆོས། །དཀོར་བག་ཆགས་ངན་པ་སྦྱོང་བ་ལ། །ཆེས་ཟབ་པའི་མཐར་ཐུག་སྨྱུང་གནས་ཡིན། །འདིའི་ཕན་ཡོན་ནམ་མཁའི་མཐའ་དང་མཉམ། །དུས་དེང་སང་ངན་པ་མགོ་མཐོ་ཡང་། །ལམ་བར་དོའི་འཕྲང་རིང་བརྒལ་བའི་ཉིན། །དགྲ་གཤིན་རྗེ་དམག་གིས་བསྐོར་བའི་ཚེ། །ཆོས་ཚུལ་བཞིན་བྱས་པའི་མི་དེ་སྐྱིད། །འཕྲང་ཡ་ངའི་འཇིགས་པ་སེལ་འདོད་ཅིང་། །མར་ངན་སོང་སྐྱེ་སྒོ་གཅོད་འདོད་ན། །ལྷ་ཐུགས་རྗེ་ཆེན་པའི་ཞབས་ལ་འཇུས། །ཞེས་གསུངས་སོ། །

སྨྱུང་གནས་ཀྱི་ཕན་ཡོན་རྒྱས་པར་བཀའ་འགྱུར་བ་བློ་བཟང་ཚུལ་ཁྲིམས་ཀྱི་དགེ་སློང་མ་དཔལ་མོའི་ལུགས་སྨྱུང་གནས་ཀྱི་ཕན་ཡོན་དང་། བཀྲ་ཐང་བློ་བཟང་ཆོས་ཀྱི་ཉི་མའི་སྨྱུང་གནས་ཕན་ཡོན་དགེ་སྐུལ་སྙན་པའི་གླུ་དབྱངས་སོགས་སུ་གཟིགས་པར་འཚལ་ལོ། །

གླིང་མེ།

གླིང་མེ་ནི། དགོན་པའི་གླིང་བར་དང་སྒེའུ་ཁུང་། གཙུག་ལག་ཁང་གི་ཡང་སྟེང་སོགས་སུ་སྒྲོན་ཏེ། མར་མེ་འོད་སྣང་གླིང་བར་ཁོར་ཡུག་ཀུན་ཏུ་ཁྱབ་པའི་ཆ་ནས་གླིང་མེ་དང་། ཡང་རྣམ་འདྲེན་ལྔ་བ་རྗེ་བཙུན་བྱམས་པ་མྱུར་མོ་འབྱོན་འགྱུར་གྱི་རྟེན་འབྲེལ་ལ། བྱམས་པའི་སྐུ་གཟུགས་གླིང་བར་དུ་གདན་འདྲེན་པ་ལ་བྱམས་པ་གླིང་བསྐོར། ཞེས་པའང་གླིང་མེ་ཞེས་པའི་ཐ་སྙད་འདྲ་ཁུངས་གཅིག་གི་སྒོ་ནས་མིང་བཏགས་པའོ། །གླིང་མེ་ནི་དགའ་ལྡན་ལྔ་མཆོད་ཀྱི་མཆོད་པའི་ཆ་ཤས་ཤིག་སྟེ། དེ་ཡང་ཤར་ཙོང་ཁ་པ་བློ་བཟང་གྲགས་པའི་དཔལ་ས་ཕག﹙སྤྱི་ལོ༡༤༡༩﹚ལོར་དགའ་ལྡན་དུ་ཕེབས་ནས། སྐུ་བེར་དང་དབུ་ཞྭ་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ། རྒྱལ་ཚབ་ཏུ་བསྐོ་བཞག་མཛད་ནས་བཅུ་བའི་ཚེས་ཉེར་ལྔ་ལ། གཟིམ་ཁང་འོད་དཔག་སྦུག་ཏུ་སྐུ་གཤེགས། དེའི་ཕྱི་ལོར་དགའ་ལྡན་དུ་རྡོ་རྗེ་སློབ་དཔོན་བརྒྱ་ཕྲག་དུ་མས། གསང་སྡེ་འཇིགས་གསུམ། ཀྱེ་རྡོར། དུས་འཁོར། ཚེ་དཔག་མེད། ཀུན་རིག་སོགས་ཀྱི་དཀྱིལ་འཁོར་ལ་བརྟེན་པའི་དགོངས་རྫོགས་སྒྲུབ་མཆོད་རྒྱ་ཆེར་མཛད་པ་དང་། ཡང་། སྣེའུ་གདོང་དཔོན་ནམ་མཁའ་བཟང་ཁུ་དབོན་གྱིས་ཡོན་སྦྱར་ཏེ། ཆོས་རྗེ་ཤཱཀྱ་ཡེ་ཤེས་ར་ཁ་བྲག་ཏུ་སྤྱན་དྲངས་ཏེ། དགེ་འདུན་མང་བོར་མཆོད་འབུལ་དང་། དགོངས་རྫོགས་བཏང་བ་ནས་བཟུང་། དེང་སང་ཡང་། དགའ་ལྡན་ལྔ་མཆོད་ཆེན་མོ་ཞེས། གྲུབ་མཐའ་རིས་མེད་དང་། རྒྱ་བོད་ཧོར་སོག་གི་དད་ལྡན་སེར་སྐྱ་ཕོ་མོ་ཇི་སྙེད་པས་ཉིན་དེར་རྣམ་དཀར་ལས་ལ་བརྩོན་ཞིང་། དེ་ཉིན་གོང་ས་མཆོག་དང་ཡོངས་འཛིན་རྣམ་གཉིས་སོགས་གཞུང་ཞབས་སེར་སྐྱ་མང་བོ། རྩེ་ཕོ་བྲང་གི་རྟེན་གཙོ་འཕགས་པ་ལོ་ཀེ་ཤྭ་ར་སོགས་མཆོད་འབུལ་གཟབ་རྒྱས་གནང་སྲོལ་ཡོད་པ་དང་། དགུང་མོར་སེར་འབྲས་དགའ་གསུམ་དང་། རྩེ་པོ་ཏ་ལའི་ཡས་མས་ལྷ་ཞོལ་དགོན་ཁག མདོར་ན་གྲུབ་མཐའ་རིས་མེད་ཀྱི་དགོན་གྲོང་སེར་སྐྱ་ཚང་མས་གླིང་མེའི་མཆོད་པ་རྒྱ་ཆེར་འབུལ་ཞིང་། དགོན་སྡེ་དག་ལས། གཙུག་ལག་ཁང་གི་ཡང་སྟེང་དུ་མར་མེ་བཞག་སྟེ། མཆོད་པའི་རོལ་མོ་དང་། གདུང་དབྱངས་དང་བཅས་དམིགས་བརྩེ་མ་གདངས་སྙན་མོ་འཐེན་པ་དང་། གྲྭ་ཤག་དང་དུད་ཁྱིམ་རྣམས་ཀྱིས་སྒེའུ་ཁུང་ལས་མར་མེ་ཕྲེང་བ་རྒྱ་ཆེར་མཆོད་པ་དང་། ཨ་མདོ་སོགས་སུ་ཁང་བའི་སྟེང་འོག་ཀུན་ཏུ། གཞོང་བ་ཆེན་པོའི་ནང་དུ་མར་མེའི་བསྟར་ཕྲེང་བསྒྲིགས་ཏེ། དམིགས་བརྩེ་མ་གདངས་དབྱངས་སྙན་མོས་གསུང་བཞིན། ཁང་བའི་སྟེང་འོག་ཀུན་ཏུ་འཁྱེར་སྲོལ་ཡོད། ཚུལ་འདི་ལ་དགོངས་ནས། མཁས་གྲུབ་རྗེས། མདོར་ན་མྱ་ངན་ལས་འདས་པའི་མཛད་པ་བསྟན་པའི་རྗེས་སུ་ཡང་། ཉིད་ཀྱིས་ངོ་མཚར་བའི་མཛད་པ་དག་གིས་གདུལ་བྱ་དཔག་ཏུ་མེད་པ་སྨིན་གྲོལ་གྱི་ལམ་ལ་འཇོག་པར་མཛད་དོ། །ཞེས་དང་། འབྲུག་རྒྱལ་དབང་ཆོས་རྗེས། དེང་སང་གི་བར་དུ་འང་དགའ་ལྡན་ལྔ་མཆོད་ཆེན་མོ་ཞེས་ཧོར་ཟླ་བཅུ་བའི་ཚེས་ཉེར་ལྔ་ལ་རྒྱ་བོད་ཧོར་སོག་སྐྱ་སེར་གྲུབ་མཐའ་རིས་སུ་མ་ཆད་པ་ཐམས་ཅད་ཀྱིས་གླིང་མེ་སྦར་བ་སོགས་རྣམ་དཀར་ལས་ལ་བརྩོན་པ་རྒྱུན་མི་ཆད་པ་འདི་དག་ཀྱང་རྗེ་ཐམས་ཅད་མཁྱེན་པ་ཉིད་ཀྱི་འཕྲིན་ལས་ཁོ་ན་སྟེ་གསུངས་པ་ནི། དེ་ཁོ་ན་ཉིད་ལགས་ལ། མཁས་དབངདགེ་ཆོས་ཀྱིས་ཀྱང་། ལྔ་མཆོད་ཀྱི་གླིང་མེ་འདི་ལ་ཐུགས་གཞིགས་ལེགས་པར་བཏང་སྟེ། ཤར་ཙོང་ཁ་པ་བློ་བཟང་གྲགས་པའི་དཔལ་ཞི་བར་གཞོལ་ནས། ལོ་དྲུག་བརྒྱ་ལྷག་ཕྱིན་ཡང་བོད་མི་དམངས་ཀྱི་སེམས་ཁོང་ན་དད་གདུང་དང་དྲན་གསོ། གླིང་མེར་འཕོས་ཏེ་ནམ་མཁའི་སྐར་ཚོགས་ས་ལ་བབས་འདྲའི་འོད་ཆེམ་ཆེམ་འབར་བ་འདི་མཐོང་ན། ང་ཚོ་ཨ་མདོ་ནས་ཇི་འདྲའི་བླ་རྒན་རླབས་ཆེན་ཞིག་འཁྲུངས་པ་རེད་ཨང་། ཞེས་མཚམས་ཆོད་དཀའ་བའི་མིག་ཆུ་བཏོན་པའང་གཟུར་གནས་མཁས་པས་ཤེས་ནས་དད་གདུང་འཁྲུངས་པའི་རྟགས་ཡང་དག་གོ།

གཞན་ད་ལྟ་ཨ་མདོ་ཕྱོགས་ཀྱི་དགོན་སྡེ་ཁག་ན། དགོན་བདག་དང་སྐྱེས་ཆེན་དམ་པ་ཞི་བར་གཞོལ་བའི་དུས་སྐར་ལ། གོང་ལྟར་གླིང་མེ་སྒྲོན་པའི་ཕྱག་སྲོལ་ཡོད་ཅིང་། ཞལ་ངོ་དང་ཆབ་རིལ་སོགས་གྲྭ་ཤག་ཡོངས་སུ་གླིང་མེ་བཞག་ཡོད་མེད་ལ་གཟིགས་བསྐོར་དུ་ཕེབས་པའི་སྒྲིག་སྲོལ་ཡང་ཡོད་དོ། །ཡང་ལྷ་སའི་ཕྱོགས་སུ་རྗེ་བདག་ཉིད་ཆེན་པོ་དྲན་གསོའི་ཕྱིར་དུ་མྱང་ཐུག་ཅེས་པའི་བག་ཐུག་ཀྱང་འཐུང་སྲོལ་ཡོད་པར་གྲགས་སོ། །མདོར་ན་གླིང་མེ་འདི། བོད་མི་དམངས་ཡོངས་ཁྱབ་ཀྱིས་རྗེ་ཙོང་ཁ་པའི་མཛད་འཕྲིན་ལ་རྗེས་དྲན་དང་། དགོངས་རྫོགས་ལ་མར་མེ་མཆོད་པ་འབུལ་བ་ཡིན་ནོ། །

ཆོས་བསྐོར།

ལོ་རེའི་དབྱར་ཟླ་ལྔ་བ་འམ་དྲུག་པའི་ནང་། སོ་ནམ་པ་རྣམས་ཀྱིས་ཆོས་བསྐོར﹙ཕྲག་རྒྱབ་ཏུ་ཆོས་ཀྱི་ལྒིགས་བམ་འཁུར་ཏེ་ཞིང་ཁར་བསྐོར་བ་རྒྱག་པ﹚རྒྱག་པ་འདི་ལ། དབུས་གཙང་སོགས་སུ་འོང་བསྐོར་ཟེར། འོང་བསྐོར་ཞེས་པ་དེའི་གོ་དོན་ཡང་། འོང་ནི་འོང་ཁ་སྟེ། སྟོན་ཐོག་དང་ལྡན་པའི་ཞིང་ས་ངོས་འཛིན་ལ། བསྐོར་ནི་ཞིང་ཁ་ལ་བསྐོར་བ་བརྒྱབ་པའི་དོན་དུ་བཤད། ཡང་། ཡུལ་འགར། ཞིང་བསྐོར་དང་། ཆོས་ཁུར་རྒྱག་པ། སེར་བཟློག་ལྷ་འཁྱེར་ཡང་ཟེར།

ཆོས་བསྐོར་རྒྱག་སྲོལ་འདིའི་ཁུངས་ནི། བོད་རྒྱལ་དགུ་བ་པུ་དེ་གུང་རྒྱལ་གྱི་དུས་སུ། མཛངས་བློན་རུ་ལས་སྐྱེས་ཀྱིས་ཞིང་ལས་ཐོན་སྐྱེད་ལ་བརྩི་མཐོང་ཆེར་གནང་སྟེ། ཞིང་ལས་གོང་འཕེལ་གནང་སྐབས། བོན་པོ་རྣམས་ཀྱིས་ཕྱག་དཔེ་བསྣམས་ནས་ཞིང་ཁ་བསྐོར་བ་བརྒྱབ་སྟེ། སྟོན་ཐོག་བཟང་བོ་སྨིན་པའི་གསོལ་འདེབས་དང་། ཕྭ་གཡང་གི་ཆོ་ག་སྤེལ་སྲོལ་ཡོད་པ་དེ་ཡིན། རིམ་གྱིས་ངལ་རྩོལ་མི་དམངས་རྣམས་ཀྱིས་ངལ་འབྲས་དོན་སྨིན་དུ། ལོ་ལེགས་ཡོང་བར་སྐྱབས་བཅོལ་དུས་ཆེན་ཞིག་ཏུ་གྱུར་བ་ཞིག་ཡིན་པར་སེམས་ཏེ། ལྷ་སར་ལོ་རེའི་ཟླ་བདུན་པའི་ཚེས་གང་བཟང་རེ་བདམས་ནས། བོད་ས་གནས་སྲིད་གཞུང་གི་སྐབས། ལྷ་སའི་མི་དཔོན་གཉིས་དང་། ལྷ་ས་གཉེར་ཚང་བ། དཀོར་གཉེར་དཔོན་སོགས་ཀྱིས་དབུ་ཁྲིད་ནས། ཇོ་བོ་རིན་པོ་ཆེའི་ན་བཟའ་གདན་ཞུས་ཀྱིས་ཞིང་བསྐོར་ཉིན་མོར། སོ་ནམ་པ་རྣམས་གོས་རྒྱན་ལེགས་པར་སྤྲོས་ཏེ། སེར་སྲུང་ལག་སྟོད་པས། རྟ་ཧྲག་གི་སྣེ་ཁྲིད་གནང་ནས་སྲིད་པ་ཧོར་འཁྱེར། ཕ་མ་གཉིས་འཛོམས་ཀྱི་ཕོ་མོ་གཉིས་རྟར་ཞོན་ཏེ། ལག་ཏུ་མདའ་དར་འཁྱེར་ནས། བཀའ་བསྟན་གྱི་པོ་ཏི་རྒྱབ་ཏུ་བསྣམས་ནས། བསྟར་ཕྲེང་བསྒྲིགས་ཏེ་ཞིང་བསྐོར་ཉིན་གུང་བར་གྲུབ་པར་བྱས་རྗེས། ཞིང་འགྲམ་གྱི་སྤང་ཐང་དུ་རས་གུར་ཕིབ་ནས། ས་མ་རུབ་བར་དུ་བཟའ་བཏུང་རྩེད་འཇོར་རོལ་ཞིང་ལྷ་བསང་བཏང་སྟེ། ཀི་སྭོ་ལྷ་རྒྱལ་དང་བཅས་མཇུག་གྲུབ་པ་ཡིན། ཕྱི་ཉིན་ལྷ་སའི་མི་དཔོན་སོགས་ནོར་གླིང་དུ་ཕེབས་ནས་ལོ་ཕུད་འབུལ་སྲོལ་ཆགས་ཡོད།

ཨ་མདོའི་ཕྱོགས་སུ་ཕོ་མོ་གཞོན་གྲས་རྣམས་ཀྱིས་པོ་ཏི་སྣ་ཚོགས་ཕྲག་རྒྱབ་ཏུ་འཁུར་ཏེ། ས་ཚིགས་བཀས་བཅད་ཀྱིས་ངལ་གསོ་གནང་སྐབས། ལྷ་བསང་ཕུད་པ་དང་། ངག་ལས་མ་ཎི་དང་མགུར་གང་རུང་དབྱངས་སུ་གྱེར་ནས་བཞུད་དོ། །

དགོས་པ་ཡང་། ལོ་གཅིག་གི་སྟོན་ཐོག་ལ་སད་དང་སེར་བ། བཙའ་དང་ཐན་པ། ཤྭ་འོད་དང་འབུ་སྲིན་སོགས་ཀྱིས་གནོད་འཚེ་མེད་པར། སྟོན་འབྲས་ལེགས་པར་འགྲུབ་པའི་རེ་བ་ཟབ་མོ་བཅངས་ཡོད་དོ། །

གཏོར་མ།

༡ གཏོར་མའི་ཁུངས་ནི། སྔོན་འཕགས་ཡུལ་སེར་སྐྱའི་ནགས་ཚལ་དུ། སྟོན་པའི་སྐུ་གཅུང་དགའ་བོས་ཆོས་བྱེད་ཅིང་མཆིས་པར། ནམ་གྱི་སྨད་ཆ་ལ་ཡི་དྭགས་ཁ་ལ་མེ་འབར་འཇིགས་ཤིང་སྐྱི་གཡའ་བ་ཞིག་བྱུང་ནས། ཁྱོད་ད་སྟེ་ཞག་བདུན་ནས་འཆི་བ་ཡོང་། ངའི་ཟས་སྐལ་ཡིན་ཟེར་བས། དགའ་བོ་བྲེད་ནས་སངས་རྒྱས་ལ་ཞུས་པས། སྟོན་པས་གཟུངས་སྔགས་གཟི་བརྗིད་ཚད་མེད་པའི་གཏོར་མ་འདི་གཏོང་དགོས་པར་གདམས་པས། དུས་ཚེ་དགའ་བོས་གཏོར་མ་བཏང་བས་འཆི་བ་ལས་གྲོལ་བར་གསུངས། དེ་ནས་གཅུང་དགའ་བོ་ནས་རིམ་བཞིན་དགེ་སློང་མ་དཔལ་མོ། གྲགས་འཛིན་མ། ཉེ་གནས་མ་དགྲ་བཅོམ་པ། ཨཱ་ནན་ད་བཛྲ། རྡོ་རྗེ་གདན་པ། གསེར་གླིང་བ། མཉམ་མེད་ཇོ་བོ་རྗེ་སོགས་བརྒྱུད་དེ། ད་ལྟའི་བར་ཕྱག་ལེན་ཟམ་མ་ཆད་པར་བྱུང་བ་འདིའོ། །

ཡང་། བདུད་རྩི་འབྱུང་བའི་གཟུངས་ཞེས་བྱ་བ་ཆབ་གཏོར་གྱི་རྒྱུད་ནི། སྟོན་པ་རྒྱལ་བའི་ཁབ་ན་བཞུགས་ཚེ། ཁྱིམ་བདག་བཟང་སྐྱོང་གིས་སྤོས་ཆུ་ལ་སྨན་དང་མེ་ཏོག་སྣ་ཚོགས་བཏབ་པ་ཞིག་འཁྱེར་ནས་བཅོམ་ལྡན་འདས་ལ། སངས་རྒྱས་བྱང་སེམས་རིགས་དྲུག་ལ་ཕུལ་བའི་ཕན་ཡོན་ཆེན་པོ་འབྱུང་བར་བྱིན་གྱིས་བརླབ་ཏུ་གསོལ་ཞེས་ཞུས་པས། བདུད་རྩི་འབྱུང་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་དྲུག་ཏིང་ངེ་འཛིན་དྲུག་གསུངས་ཏེ། གཏོར་མའི་ལས་བྱས་ནས་སྦྱངས་པ་རྣམ་པ་དྲུག་སོགས་གནང་བའོ། །

ཡང་། སྟོན་པ་རྒྱལ་བྱེད་ཚལ་དུ་བཞུགས་པ་ལ། མ་ག་དྷར་ཁྱིམ་བདག་ཕྱུག་པོ་དགེ་ཞེས་པས། སངས་རྒྱས་འཁོར་བཅས་ལ་ཆོས་སྟོན་དྲངས་པས། ཕྱི་ལོ་ཁྱིམ་བདག་དབུལ་བོར་གྱུར་ཏེ་སྟོན་པར་ཞུས་པས། སངས་རྒྱས་ཀྱིས་སྤྱན་རས་གཟིགས་ལ་ཞུ་དགོས་པའི་བཀའ་བསྩལ་བ་བཞིན། སྤྱན་རས་གཟིགས་ཀྱིས་ཁྱིམ་བདག་ཁྱོད་ཀྱིས་སྔར་མཆོད་པའི་ཡི་དྭགས་འབྱུང་བོ་སྐལ་བ་བཅད་པས། ད་ནས་མཆོད་ཅིག་ཅེས་འབྱུང་གཏོར་གསུངས་ཞིང་སླར་མཆོད་པས། ཁྱིམ་བདག་སྔར་ལྟར་འབྱོར་བ་དང་ལྡན་པར་གྱུར་བ་དང་།

ཡང་། ཆོས་འབྱུང་མཁས་དགའ་ལས། པདྨ་སམ་བྷ་བའི་ཞལ་ནས་སང་གི་གྲོ་ལམ་ན་ཉི་ཚེ་བའི་དམྱལ་ཁམས་ཤིག་ཡོད་པས་སྙིང་རྗེ་བྱ་དགོས་གསུངས་ནས་གཟིངས་ལས་བབས་ཏེ་འུ་ཡུག་ཏུ་གཏོང་མ་དང་དགོངས་པ་མཛད་ཅེས་གསུངས་ལ། དེ་བས་བདག་འཛིན་གྱི་འཆིང་བ་བཅད་དེ་ཐམས་ཅད་མཁྱེན་པའི་གོ་འཕང་འཐོབ་པ་ལ། ཐབས་ཤེས་ཟུང་འབྲེལ་བྱ་དགོས་ཤིང་། དེ་ཡང་ཐབས་ཀྱི་ཆ་བསོད་ནམས་བསགས་པ་ལ། སྟོན་པའི་གསུང་རབ་ཀྱི་ཁུངས་དང་འབྲེལ། གྲུབ་པའི་མན་ངག་གིས་ཟུར་བརྒྱན་ཏེ། ཆོག་བསྒྲིགས་ཤིག་ལ་མ་བརྟེན་ན་མི་བཏུབ་པས། སྔོན་གྱི་དམ་པ་བྱང་སེམས་རྒྱལ་མཚན། རྗེ་བཙུན་གྲགས་པ་རྒྱལ་མཚན། རྒྱལ་སྲས་ཐོགས་མེད་བཟང་བོ་རྣམས་ཀྱིས། ཡི་དྭགས་མོ་ཁ་འབར་མ་དབུགས་དབྱུང་བའི་གཏོར་མའི་ཆོ་ག་སོགས་ཀྱི་ཁུངས་དང་འབྲེལ་དར་སྤེལ་གནང་བ་ཡིན་ནོ། །

༢ གཏོར་མའི་ངོ་བོ་སོགས། ཕྱི་སྣོད་ཀྱི་འཇིག་རྟེན་རྣམ་པར་དག་པའི་རང་བཞིན་ཆོས་ཀྱི་དབྱིངས་དང་། ནང་བཅུད་ཀྱི་སེམས་ཅན་རྣམ་པར་དག་པའི་རང་བཞིན་རིག་པ་ཡེ་ཤེས་ཀྱིས་མཚོན་ཏེ། ཡུལ་སྟོང་བ་ཉིད་ཡུལ་ཅན་ཡེ་ཤེས་གཉིས་དབྱེར་མེད་པ་གཏོར་མའི་ངོ་བོར་བཤད། ངེས་ཚིག་ལ། འཛིན་རྟོག་མཚན་མ་གཏོར་བས་གཏོར་དང་། རིག་པ་ཡེ་ཤེས་བསྐྱེད་པའི་མ་ཞེས་བྱའོ། །ཞང་བོད་ཏི་སེའི་འོད་ཅེས་པར། དེ་དག་གིས་དམར་མཆོད་བྱེད་སྲོལ་ཡོད་པ་ལ། གཤེན་རབ་མི་བོ་ཆེ་མ་དགྱེས་ནས། བདུད་བོན་དང་གདོད་བོན་རྣམས་ཆམ་ལ་ཕབ། དེ་དག་གི་སྤྱོད་ཚུལ་དུ་སེམས་ཅན་གྱི་རིགས་གང་ཞིག་བསད་ནས་ཤ་རུས་ཀྱིས་མཆོད་པ་བྱེད་སྲོལ་ཡོད་པ་དེདག་གི་ཚབ་ཏུ་འབྲུ་དཀར་གྱི་གཏོར་མས་འཐུས་པར་བྱས་པ་དང་། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་ཀྱང་འབྱུང་ངོ་། །

༣ གཏོར་མ་ལ་དབྱེ་ན། ཕྱི་ནང་གསང་གསུམ་གྱི་གཏོར་མ། བསམ་གཏན་དང་། མཚོན་པའི་གཏོར་མ་སོགས་ལས། འདིར་བཤད་པ་ནི་དང་བོ་ཡིན། གཏོར་མ་འདི་སྐྱ་སེར་སུས་ཀྱང་བཏང་ཆོག་ལ། བསོད་ནམས་ཆེ་ཆུང་ཡོད། རབ་ཀྱིས་མགྲོན་སོ་སོའི་སྤྱན་ལམ་དུ་ཇི་འདོད་བཞིན་སྤྲུལ་ནུས་ལ། དེ་ལྟར་མི་ནུས་ཀྱང་། ཆོ་ག་དང་བསྟུན་ཏེ་བྱིན་གྱིས་བརླབས་ནས་བཏང་ན་ཕན་ཡོན་འབྱུང་བ་གདོན་མི་ཟ།

སྔགས་འཆང་རྒྱན་མེ་ལས། གཏོར་མའི་གཟུགས་རྣམ་པ་གཉིས་སུ་གསུངས་ཀྱང་། འདིར་ངེས་པ་ཅན་ཏེ་རྣམ་པ་དྲུག་ལས། བྱིན་རླབས་བླ་མའི་གཏོར་མ། དངོས་གྲུབ་ཡི་དམ་གཏོར་མ། འཕྲིན་ལས་མགྲོན་པོའི་གཏོར་མ། དམ་ཅན་ཆོས་སྐྱོང་གཏོར་མ། དྲེགས་པ་སྡེ་བརྒྱད་གཏོར་མ། ཐམས་ཅད་འདུས་པའི་གཏོར་མ་སྟེ། དེ་དག་གི་བཟོ་དབྱིབས་དང་། ཞི་རྒྱས་དབང་དྲག་གི་དབྱེ་བ། གྲངས། གཙོ་གཏོར་དང་གཏོར་ཕྲན་སོགས་དེ་ཉིད་དུ་ཞིབ་བརྗོད་གནང་ཡོད་ལ།

མ་ཎི་བཀའ་འབུམ་ལས་གཏོར་མ་ལ་དབྱེ་བ་དྲུག་ཕྱེས་ཡོད་ལ། ༡ ཕྱིའི་གཏོར་མ་ནི། གཏོར་སྣོད་རིན་པོ་ཆེ་རྒྱ་ཆེན་པོར་བསམ། གཏོར་མ་བདུད་རྩིའི་རྒྱ་མཚོར་དཀར་མེར་གྱིས་ཁེངས་པར་བསམ། བླ་མ་ཡི་དམ་མཁའ་འགྲོ་མདུན་གྱི་ནམ་མཁར་བཞུགས་པར་བསམ་ལ། ཨོཾ་མ་ཎི་པདྨེ་ཧཱུཾ། ཞེས་འབུལ་ལོ། །༢ ནང་གི་གཏོར་མ་ནི། ཆུ་ཐམས་ཅད་རཀྟ། ས་ཐམས་ཅད་ཤ་ཆེན། བྲག་དང་རྡོ་ཐམས་ཅད་རུས་པར་བསམ་ལ་འབུལ་ལོ། །༣ གསང་བའི་གཏོར་མ་ནི། རང་ལུས་ཀྱི་ཤ་ཁྲག་རུས་པ་ཐམས་ཅད་གཏོར་མར་བསམ་ནས། བླ་མ་ཡི་དམ་མཁའ་འགྲོ་དང་། རིགས་དྲུག་སེམས་ཅན་དང་། ལན་ཆགས་ཀྱི་བགེགས་རྣམས་ལ་ཆགས་པ་དང་ཞེན་པ་མེད་པར་དབུལ་ལོ། །༤ དོན་གྱི་གཏོར་མ་ནི། བློས་བླངས་པའི་ཆོས་ཐམས་ཅད་ཆགས་པ་དང་ཞེན་པ་མེད་པར་འཁྲི་བ་ཆོད་ན་གཏོར་མ་ཐེབས་པ་ཡིན་ནོ། །༥ རྟགས་ཀྱི་གཏོར་མ་ནི། རིག་པ་རང་ངོ་ཤེས་ནས་རང་ཤར་གྲོལ་ཙ་ན་གཏོར་མ་ཐེབས་པ་ཡིན་ནོ། །༦ མཚོན་པའི་གཏོར་མ་ནི། ཅི་ཟ་ཅི་འཐུང་གིས་བླ་མ་དཀོན་མཆོག་མཆོད་དོ། །ཞེས་གསུངས་སོ། །

༤ གཏོར་མགྲོན་ལ་དབྱེ་ན། མཆོད་པར་བྱ་བ་དང་། སྦྱིན་པར་བྱ་བ་གཉིས་སུ་འདུ་བས། མཆོད་བྱའི་ཡུལ་བཞི་སྟེ། མཆོག་ཐུན་གྱི་དངོས་གྲུབ་སྩོལ་ཕྱིར་བླ་མ་མཆོག་གསུམ་དང་། བར་ཆད་སེལ་ཕྱིར་མཁའ་འགྲོ་ཆོས་སྐྱོང་དང་། སྨོན་ལམ་བཟང་བོ་གདབ་ཕྱིར་དགེ་སྦྱོང་བྲམ་ཟེ། འབྱོར་བ་རྒྱས་ཕྱིར་ནོར་ལྷ་ལྷན་སྐྱེས་རྣམས་ལ་འབུལ་བ་ཡིན་ནོ། །སྦྱིན་པར་བྱ་བའི་ཡུལ་ལ་འཇིག་རྟེན་པའི་ལྷ་ཀླུ་གདོན་བགེགས་སོགས་སོ། །གཞན་ཡང་། དཀོན་མཆོག་མཆོད་པའི་མགྲོན། དཔལ་མགོན་ཡོན་ཏན་གྱི་མགྲོན། རིགས་དྲུག་སྙིང་རྗེའི་མགྲོན། གདོན་བགེགས་ལན་ཆགས་ཀྱི་མགྲོན་བཞིའོ། །དེ་ཡང་དཀོན་མཆོག་ལ་རྒྱལ་བོར་དཔྱ་ཁྲལ་འབུལ་བའི་ཚུལ་གྱིས་ཕུལ་ན་ཚོགས་རྒྱ་ཆེན་རྫོགས་ཤིང་། ཐུགས་རྗེ་གཡེལ་བ་མེད་པར་སྐྱོབ། ཡོན་ཏན་གྱི་མགྲོན་རྣམས་ལ་གྲོགས་ལ་མགྲོན་བྱེད་པའི་ཚུལ་གྱིས་ཕུལ་བས། ཕན་པ་སྒྲུབ་ཅིང་བར་ཆད་ལས་སྲུང་བར་འགྱུར། སྙིང་རྗེའི་མགྲོན་རྣམས་ལ་སྟོན་མོའི་ཚུལ་དུ་ཕུལ་བས། གཞན་དོན་འགྲུབ་ཅིང་ཐེག་ཆེན་པར་འགྱུར། ལན་ཆགས་ཀྱི་མགྲོན་རྣམས་ལ་བུ་ལོན་གྱི་ཚུལ་དུ་ཕུལ་བས། ཤ་འཁོན་བྱང་ཞིང་ཕྱིས་མི་འཚེ་བར་འགྱུར། འཇུར་འགགས་ཅན་གྱི་ཡི་དྭགས་ནི་ཁ་ཟས་ལ་སྤྱོད་དབང་མེད་པའི་ལས་ངན་ཡིན་ཕྱིར། ཟུར་དུ་མ་བསྔོས་ན་མི་འཐོབ་པས། ཐོག་མཐའ་གཉིས་སུ་བསྔོ་བར་མཛད་པའང་། དང་བོ་སླེབས་པ་དང་། རྗེས་སུ་གློ་བུར་དུ་ལྷགས་པའི་རིགས་ཅན་གཉིས་སུ་དགོངས་པའོ། །སྤྱིར་སྦྱིན་ཡུལ་མཐར་ཐུག་དབུལ་ཕོངས་ཡིན་ཞིང་། དབུལ་ཕོངས་ཀྱི་མཐར་ཐུག་ཡི་དྭགས་ཡིན་ལ། ཡི་དྭགས་ཀྱི་མཐར་ཐུག་འཇུར་འགགས་ཡིན་པས་སྔ་མ་ལས་ཕྱི་མ་རིམ་བཞིན་བསོད་ནམས་རྒྱ་ཆེ་བར་སྟོན་པས་ཞལ་གྱིས་བཞེས་སོ། །

ཛམ་ལྷར་དམིགས་སུ་དཀར་ནས་ཆུ་འབུལ་བ་ནི། རྒྱུད་ལས། ཛམ་བྷ་ལ་ལ་ཆུ་སྦྱིན་བྱ། །ཞེས་གསུངས་ལ། དེ་ཡང་ཆོས་མཐུན་གྱི་འཚོ་བའི་མི་ཕོངས་ཤིང་བསྒྲུབ་བྱའི་ཆོས་བཅུ་བདུན་གྱི་ནང་ཚན་དང་མི་འགལ་བའི་ཕྱིར་རོ། །འབུལ་ཚེ་ཡང་སྣོད་དེ་དག་ཆུ་གཙང་མ་སོགས་སྲོག་ཆགས་མེད་པས་ཁེངས་པར་འགེངས་ཤིང་། ཡ་ཡོ་མེད་པ་དང་གཏོར་མའི་རྫས་ཀྱང་ཤིན་ཏུ་གཙང་བ་དང་། ཉམས་པས་མ་འབགས་པ་དགོས་ཏེ། མགྲོན་དེ་དག་ཕལ་ཆེར་གཙང་སྦྲ་ལ་དགའ་བ་དང་། ཕལ་ཆེར་དམིགས་པས་ཚིམ་པ་དང་། ལ་ལ་བཤམས་པས་ཚིམ་པ་དང་། འགའ་ཞིག་བསྔོས་པས་ཚིམ་པ་དང་། ཁ་ཅིག་རེག་པས་ཚིམ་པ་དང་། གཞན་དག་རྫས་ཀྱིས་ཚིམ་པ་སོགས་ཡོད་པས་ཕྱིར་རོ། །

༥ གཏོར་མགྲོན་འབྱོན་མི་འབྱོན་གྱི་ཁྱད་པར། མཆོད་སྦྱིན་གཏོར་མའི་རྣམ་བཤད་དགེ་བའི་ཉི་མ་ལས། ༡ སངས་རྒྱས་བྱང་སེམས་ཉན་རང་ཆོས་སྐྱོང་ཐམས་ཅད་ནི། མོས་གུས་དང་གདུང་ཤུགས་ཀྱིས་སྤྱན་དྲངས་ན། དེའི་ཕྱོགས་སུ་སྐད་ཅིག་གིས་འབྱོན་པ་ཡིན་ཏེ། ཐུགས་རྗེ་རྫུ་འཕྲུལ་གྱི་མཐུ་མངའ་བའི་ཕྱིར། སྤྱན་དྲངས་ན་འབྱོན་པའི་མགྲོན་ཞེས་བྱའོ། །༢ གནོད་སྦྱིན་ལག་རིང་རི་རབ་འགྱེལ་དོགས་ཀྱིས་དེ་ལ་འཁྱུད་པ་དང་། ལག་ན་གཞོང་ཐོགས་ཁང་བ་ཆུས་འཁྱེར་དོགས་ཀྱིས་དེ་ཆགས་པ་དང་། རྟག་མྱོས་འདོད་ཡོན་གྱིས་མྱོས་པས་འོང་བའི་སྐབས་མེད་པ་དང་། གནོད་སྦྱིན་རྩེ་སྐན་རི་རབ་རྩེ་ནས་གླིང་བཞིར་དགྲ་བྱུང་མིན་བལྟ་བས་འོང་སྐབས་མེད་པ་སྟེ། དེ་བཞི་ནི་སྤྱན་དྲངས་ཀྱང་མི་འབྱོན་པའི་མགྲོན་ཞེས་བྱའོ། །༣ ཡི་དྭགས་མཁའ་ལ་རྒྱུ་བ་དང་། བྱིངས་ན་གནས་པ་གཉིས། དྲི་ཟ་མཁའ་ལ་རྒྱུ་བ་དང་། ཀླུང་ན་གནས་པ་གཉིས་ཏེ་བཞི་ནི། མཆོད་སྦྱིན་གང་བྱེད་ཀྱི་ཕྱོགས་སུ་ངང་གིས་འདུ་བ་ཡིན་པས། དེ་ལ་སྤྱན་མ་དྲངས་ནའང་འབྱོན་པའི་མགྲོན་ཞེས་བྱའོ། །༤ ས་བདག་སྟོབས་པོ་ཆེ་མགྲོན་དུ་བོས་ན་ཁོ་རི་རབ་ཀྱི་འོག་ཏུ་གནས་པས་འོག་གཞི་རླུང་དཀྲུགས་ནས་འཇིག་རྟེན་ཁམས་སུ་ས་ཡོམ་འོང་ཉེན་ཡོད་པ་དང་། ཡི་དྭགས་གཏེར་སྲུང་བོས་ན། གཏེར་བུམ་གཞན་གྱིས་འཁྱེར་ནས་འཇིག་རྟེན་ཁམས་སུ་མུ་གེ་འབྱུང་ཉེན་ཡོད་པ་དང་། ས་བདག་ཤྲྀ་པ་ཏྲ་བོས་ན། ལག་ཏུ་ནད་རྐྱལ་ཡོད་པས་མི་ནད་ཕྱུགས་ནད་འབྱུང་ཉེན་ཡོད་པ་དང་། ཀླུ་ཧོང་ཕན་བོས་ན། ཁོ་ལ་མཐོང་དུག་ཡོད་པས་ཀླུ་ནད་སྣ་ཚོགས་འབྱུང་ཉེན་ཡོད་པ་སྟེ། དེ་བཞི་ལ་སྤྱན་དྲང་དུ་མི་རུང་བའི་མགྲོན་ཞེས་བྱའོ། །

༦ གཏོར་འབུལ་གྱི་ཚེ་སྔགས་ནུས་ནི། ཨོཾ་ཨཱཿཧཱུཾ་གིས་བྱིན་གྱིས་བརླབས་པ་ནི། རྒྱུད་ལས། ཨོཾ་གྱིས་འབྱུང་བོ་དབང་དུ་སྡུད། །ཨཱཿཡིས་རྫས་སོགས་དག་པར་བྱེད། །ཧཱུཾ་གིས་འབྲེལ་དང་ཁྱབ་པར་སྦྱིན། །གསུངས་ལ། ན་མཿ་སརྦ་ཏ་ཐཱ་ག་ཏ་ཨཱ་ཝ་ལོ་ཀི་ནི་ཨོཾ་སམ་བྷ་ར་སམ་བྷ་ར་ནི་ཧཱུཾ། ཞེས་པ་དོན་འགྱུར་གྱི་དབང་དུ་བཏང་ན། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །སྐུ་གསུང་ཐུགས་ཀྱི་བདུད་རྩིས་འཇིག་རྟེན་ཁམས་ཀྱི་སེམས་ཅན་ཐམས་ཅད་སྐྱེ་བ་མེད་པའི་བདེ་བའི་མཆོག་ཏུ་མཛོད་ཅིག བདེ་བའི་མཆོག་ཏུ་མཛོད་ཅིག ཅེས་པ་ལགས་ལ། གཟུངས་སྔགས་ཟབ་མོ་འདིའི་སྟོབས་ཁོ་ནས་ཕྱོགས་བཅུའི་སངས་རྒྱས་ཀྱི་ཞིང་ཁམས་མ་ལུས་པའི་དཀོན་མཆོག་བཞུགས་སོ་འཚལ་ལ་མཆོད་པའི་བྱེ་བྲག་བསམ་གྱིས་མི་ཁྱབ་པས་མཆོད་པར་འགྱུར་རོ། །བྲམ་ཟེ་དང་དྲང་སྲོང་དང་། ཡི་དྭགས་གང་གཱའི་ཀླུང་གི་བྱེ་མའི་གྲངས་དང་མཉམ་པ་རྣམས་ལ་སོ་སོར་ནས་ལྷའི་ཞལ་ཟས་མཆོག་ཏུ་གྱུར་བ། ཡུལ་མ་ག་དྷའི་བྲེ་བོ་ཆེས་འཇལ་བའི་བྲེ་བདུན་རེ་འཐོབ་པར་གསུངས་སོ། །

སྦྱིན་ཡུལ་གྱི་སྐབས། དེ་བཞིན་གཤེགས་པ་བཞིའི་མཚན་བརྗོད་པའི་རྒྱུ་མཚན་ཡང་། མདོ་ལས། རིན་ཆེན་མང་གི་མཚན་བརྗོད་པའི་བྱིན་རླབས་ཀྱིས་ཡི་དྭགས་ཐམས་ཅད་ཀྱི་སྐྱེ་བ་མང་བོ་སེར་སྣ་བྱས་པའི་མི་དགེ་བའི་ལས་བཅོམ་ཞིང་བསོད་ནམས་ཡོངས་སུ་རྫོགས་པར་འགྱུར་རོ། །གཟུགས་དམ་པའི་མཚན་ནས་བརྗོད་པས་ཡི་དྭགས་མང་བོའི་བྱད་གཟུགས་མི་སྡུག་པ་བཅོམ་ཞིང་གཟུགས་དང་མཚན་ཕུན་སུམ་ཚོགས་པར་འགྱུར་རོ། །སྐུ་འབྱམས་ཀླས་ཀྱི་མཚན་ནས་བརྗོད་པས་ཡི་དྭགས་མང་བོའི་སྐོམ་པ་སྤངས་ཤིང་ཚིམ་པར་གྱུར་ཏེ། སྦྱིན་པའི་གནས་སུ་ཡིད་བཞིན་དུ་ཟ་བ་དང་ཆོག་ཀྱང་འདྲོངས་པར་འགྱུར་རོ། །འཇིགས་པ་དང་བྲལ་བའི་མཚན་བརྗོད་པས་ཡི་དྭགས་མང་བོའི་འཇིགས་པ་ཐམས་ཅད་དང་བྲལ་ཏེ། ཡི་དྭགས་ཀྱི་ཁམས་ཞི་བར་འགྱུར་རོ། །ཞེས་གསུངས་སོ། །

༧ གཏོར་སྣོད་ནི། སྤྱིར་ན། ཕྱིའི་གཏོར་སྣོད་རིན་ཆེན་སྣ་ལྔ། ནང་གི་གཏོར་སྣོད་མཚན་ལྡན་ཀཱ་པ་ལ། གསང་བའི་གཏོར་སྣོད་རུས་སྦལ་གྱི་ཁོག་པ། དོན་གྱི་གཏོར་སྣོད་ནམ་མཁའ་ཡངས་པ། རྟགས་ཀྱི་གཏོར་སྣོད་ཕྱི་སྣོད་ཀྱི་འཇིག་རྟེན། མཚན་མའི་གཏོར་སྣོད་གང་འབྱོར་སྣོད་ལ་བྱའོ། །བྱེ་བྲག་ཏུ། གཏོར་འབུལ་གྱི་སྐབས་སུ། སྣོད་གཙང་མ། ཆུ་གཙང་མ། རྫས་གཙང་མ་གསུམ་གལ་ཆེ་ལ། སྣོད་ནི། ཆུང་བ་དང་། མ་དག་པ་དང་། ཁ་ཆག་ཞབས་བརྡོལ་དང་། བསེ་དང་། རྭ་དང་། ཐོད་པ་དང་། ལི་དང་། འཁར་བ་དང་། ལྕགས་ཀྱི་སྣོད་བརྒྱད་དང་། རུས་པ། དུག་གཟེར་ཅན་ནི་མི་རུང་བས་སྤང་བྱ་སྟེ། རུས་པ་དང་པགས་པ་ལས་བྱས་པ་ནི་ཡི་དྭགས་སྐྲག་ཅིང་། གཙང་སྦྲ་ཅན་མི་འཁོར། ལྕགས་ནི་མཚོན་ཆའི་རྒྱུ་ཡིན་པས་གོ་མཚོན་སོགས་སུ་མཐོང་ནས་སྐྲག་པར་འགྱུར། ཁ་ཆག་ཞབས་བརྡོལ་ནི་མི་ཤིས་པའི་སྣོད་ཡིན་པས་བྱིན་རླབས་མི་ཆགས་ཞེས་པཎ་ཆེན་གྱི་གསུང་གྲུབ་ཆེན་སྙིང་སྟོབས་རྒྱ་མཚོ་ལས་ཐོས་པའི་གསུང་དང་། འཇིམ་ལོའི་གསུང་ལས། ཀ་པཱ་ལ་ལ་ཡི་དྭགས་ཕྲ་མོ་འཇིགས་པ་དང་། ཏིང་ནི་ལྷ་མ་ཡིན་གྱིས་ཐོད་པར་མཐོང་བའོ། །ལྕགས་ནི་དྲག་པོའི་རྫས་མཚོན་ཆའི་རྒྱུ་ཡིན་པས་ཡི་དྭགས་ཐམས་ཅད་འཇིགས་པའོ། །རུང་བའི་སྣོད་ནི། གསེར་གཞོང་། དངུལ་གཞོང་། ཟངས་གཞོང་། རག་གཞོང་། ཤིང་གཞོང་། རྫ་གཞོང་དྲུག་གོ། ཆེ་ཆུང་ཡང་ཆུང་བ་ཕུལ་གང་ཤོང་བ་ནས། ཆེ་བ་ཚད་མེད་པའི་བར་ལ་ཏི་ཚ། ལ་ཆ། གཤའ་རྩི་མེད་པ་དང་། དབྱིབས་ལ་རྒྱ་ཆེ་བ་ལ། ཁ་གཡེལ་བ་ཞིག་དགོས་པར་བཤད།

ཆུ་ནི། མི་གཙང་བས་གོས་པ་དང་། དམར་སྐྱུར་གྱིས་སྦགས་པ་སྤངས་ནས་གཙང་ཞིང་དག་པར་བྱའོ། །

༨ གཏོར་མའི་རྫས་ནི། གས་ཆག་དང་ནག་ནོག་གི་དྲི་མས་མ་གོས་པའི་སྣོད་དྭངས་ཤིང་འོད་འཚེར་བ་སོགས་ཀྱི་ནང་དུ། གཙོ་བོ་རྣམ་པ་དགུ། དཀར་གསུམ་མངར་གསུམ། ཤ་ཆེན་རྣམ་གསུམ་ལས། ཕྱིའི་དཀར་གསུམ་ནི། མར་ཁུ་འོ་མ་ཞོ། མངར་གསུམ་ཀ་ར་བུ་རམ་སྦྲང་རྩི། གཞན་ཡང་། འབྲུའི་དངོས་བོ་ཕྱེ་ཟན། རིན་པོ་ཆེའི་མེ་ཏོག་སྣ་ཚོགས་གཙང་མ་རྣམས་སོ། །རྫས་དེ་རྣམས་ཀྱང་རང་ཅག་ལྷ་བཤོས་ཀྱི་སྐབས། དཀར་གསུམ་མངར་གསུམ་དང་དྲི་བཟང་སོགས་སྤྲུས་ཏེ་སྦྱོར་བ་ནི། ཇི་འདྲ་ཞིག་ཏུ་འགྱུར་སྙམ་སྟེ། གཏམ་རྒྱུད་གསེར་ཐང་ལས། རྒྱ་གར་བ་རྣམས་ཟས་ཟ་ཚུལ་གསུངས་སྐབས། ལི་སྡེར་ཆེན་པོ་ཞིག་གི་ནང་དུ་ངོས་གཅིག་ལ་འབྲས་ཆན་དང་། ངོས་གཅིག་ལ་ཚོད་མ་ཚོམ་བུ་དུ་མ་བཀོད། གཞན་ན་སྣོད་ཆུང་མང་བོར་ཞོ་དང་འོ་མ་སོགས་སྣ་མང་བོ་བླུགས་ཏེ། གཅིག་ཟོས་པའི་མཇུག་ཏུ་སྣ་གཞན་འཁྱེར་ཏེ་འོང་ཞིང་། མགྲོན་བཟང་བོ་ཚོ་ལ་ཆུ་ཚོད་ལྷག་ཙམ་ཟས་མཇུག་མི་རྫོགས། ཞལ་ཟས་རོ་བརྒྱ་འབུལ་ཚུལ་སོགས་ཀྱང་འདི་ལྟར་བསམ་དགོས་ཀྱི། རང་རེའི་དཀར་གསུམ་མངར་གསུམ་ལྷ་བཤོས་ལ་བསྲེས་པ་བཞིན། ཐམས་ཅད་འདྲེས་ན་རོ་ངན་པའི་མཐར་ཐུག་ཅིག་འོང་སྙམ་པ་སོགས་གོ་བ་ནོར་བ་ཡིན། ཞེས་གསུངས་པ་དེ་ག་རང་ལགས་པས། གཏོར་རྫས་རྣམས་མ་འདྲེས་པའམ། སོ་སོར་མཐུན་པར་སྦྱར་ཏེ། རང་གི་ནུས་ཚོད་དང་བསྟུན་ནས། བློས་དམིགས་པ་བཟའ་བ་རི་རབ་ཙམ། བཏུང་བ་རྒྱ་མཚོ་ཙམ་དུ་སྤྲུལ་ཏེ་འབུལ་ལ། མ་འབྱོར་ན་འབྲུ་རྡོག་གཅིག་གམ། ཟས་ཁམ་གང་། ཆུ་ཕུལ་གང་ཙམ་ཡང་གཏོང་བ་སྟེ། སྔགས་འཆང་རྒྱན་མེ་ལས། བསོད་ནམས་ཚོགས་ཆེན་སྤེལ་བའི་ཕྱིར། །ཅི་འབྱོར་གཏོར་མ་ཆེ་བར་བསྐྱེད། །མ་འབྱོར་གང་བཤམས་དམིགས་པས་བསྐྱེད། །ཅེས་དང་། རྒྱལ་བའི་སྡེ་སོགས་ཀྱིས་ཀྱང་། རབ་འབྱོར་ན་སྨན་ལྔ་དང་། དྲི་ལྔ་དང་། རིན་པོ་ཆེ་ལྔ་དང་། འབྲུ་ལྔ་དང་། སྙིང་བོ་ལྔ་དང་། སྤོས་དང་། མེ་ཏོག་དང་། དཀར་གསུམ་མངར་གསུམ་དང་འབྲས་སོགས་ཀྱི་ཆན་པ་དང་། འཁུར་བ་སོགས་དང་། མ་འབྱོར་ན་ཆུ་ལ་ཟན་ནམ་ཕྱེ་གང་རུང་ལྟ་བུ་ཅི་ཙམ་འབྱོར་བ་བཤམས་པས་ཆོག་པར་གསུངས་པའི་ཕྱིར།

༩ གང་གིས་གཏོང་བའི་གང་ཟག་ནི། རབ་དགེ་ཚུལ་སློང་དང་དགེ་བསྙེན། མ་མཐའ་ཆོག་ཤེས་པ་ཅིག་གིས་གཏང་ཡང་རུང་བར་བཤད་དོ། །དེ་ཡང་དབང་བོ་རབ་ཀྱིས་བདེན་མེད་ཀྱི་ལྟ་བ་དང་འབྲེལ་བའི་ཐབས་ཤེས་ཟུང་འཇུག་གི་བསམ་པས་གཏོང་བ་དང་། འབྲིང་གིས་སྔགས་དང་བསམ་པའི་ཁྱད་པར་ཟུང་འབྲེལ་གྱིས་གཏོང་བ་དང་། ཐ་མས་སྔགས་ཀྱི་སྟོབས་ཁོ་ནར་ཡིད་ཆེས་ཀྱིས་གཏོང་ངོ་། །དེ་ཡང་མཐར་གཏུགས་ན་བསམ་པ་རྒྱ་ཆེ་ཆུང་ལ་རག་ལས་ཏེ། བྱང་ཆུབ་སེམས་དཔའི་སྡེ་སྣོད་ལས། སྦྱིན་པ་པོ་རྫས་ཀྱི་དངོས་བོ་རྒྱ་ཆུང་ཡང་། བསམ་པ་རྒྱ་ཆེ་བ་ནི་མཆོག་ཡིན། དངོས་བོ་རྒྱ་ཆེ་ཡང་། བསམ་པ་རྒྱ་ཆུང་བ་ནི་དེ་ལྟར་མ་ཡིན་ནོ། །མཁས་པས་སྦྱིན་པ་ཆུང་ཡང་མང་བོར་བྱེད་པ། ཡེ་ཤེས་ཀྱི་སྟོབས་ཀྱིས་ལྷག་པར་བྱེད་པ། ཤེས་རབ་ཀྱི་སྟོབས་ཀྱིས་རྒྱས་པར་བྱེད་པ། སྨོན་ལམ་གྱི་སྟོབས་ཀྱིས་དཔག་ཏུ་མེད་པར་བྱེད་དོ། །ཞེས་སོ། །

༡༠ གང་དུ་གཏོང་བའི་གནས་ནི། སྐྱེ་བོའི་རྒྱུ་འགྲུལ་དང་ཅ་ཅོ་ཆེ་བ། སྡིག་སྤྱོད་དང་མི་གཙང་བའི་གནས་སྤངས་ནས། བདེ་ཞིང་མཐོང་གསལ་ཆེ་བ། གཙང་ཞིང་ཡིད་དུ་འོང་བའི་གནས་སུ་ལས་དང་བོ་བས་གཏང་བར་བྱའོ། །

དུས་གང་གི་ཚེ་གཏང་བ་ནི། སྤྱིའི་དུས་ནི། སྔ་དྲོ་དང་། ཕྱི་དྲོ་དང་། ཉིན་གུང་དང་། མཚན་མོའི་སྐབས་གང་ཡང་རུང་ཞིང་། ཁྱད་པར་གྱི་དུས་ནི། ས་རུབ་ཁ་ཟས་མ་ཟོས་གོང་དུ་མ་བཏང་ན་ཟས་དྲི་ཚོར་བ་ཙམ་གྱིས་སྐྲག་པ་སྐྱེ་བས་དེའི་དུས་སུ་བཏང་བའམ། ཕྲག་དོག་གིས་སེམས་རྒྱུད་འཁྲུགས་ནས་གླགས་ལྟ་བར་བྱེད་པས། དེའི་ཉེས་པ་སྐྱོབ་ཕྱིར་སྔ་མོ་ཉིད་ནས་བཏང་བའོ། །གཏོར་མ་གཞན་ཡང་འཛམ་གླིང་དུ་ཉི་ཤར་གྱི་ཚེ་བཀྲ་ཤིས་པའི་དུས་ཡིན་པས་བསོད་ནམས་ཆེ་ཞིང་། སྲོད་དང་མཚན་མོ་འབྱུང་བོ་དང་ཡི་དྭགས་མཐུ་བོ་ཆེ་རྣམས་ཀྱི་གཞན་ལ་འཚེ་བའི་དུས་ཡིན་པས་བགེགས་ཞི་བར་འགྱུར་རོ། །

༡༡ གཏོར་མའི་དམ་ཚིག་ལ། གཏོར་མ་གཏོང་མཁན་གྱི་ཤ་ཆང་སྒོག་ཙོང་སོགས་སྤངས་ཏེ། གཏང་བྱའི་སྣོད་ཆུ་རྫས་གསུམ་དྭངས་གཙང་གི་ངོས་ནས། བཀོད་པ་མཛེས་པར་བཤམས་ཏེ། ཆོ་ག་ཆད་ལྷག་མེད་པའི་སྒོ་ནས་དམིགས་རྣམས་རྒྱ་ཆེན་པོ་བསྐྱེད་དེ་གཏོང་དགོས་སོ། །གཏོར་མ་གྲུབ་པའི་རྟགས་སུ། དགུན་གྱི་གྲང་སྒང་ལ་གཏོར་མ་མི་འཁྱག་པ། གཏོར་མ་ཞུ་བ་དང་བདུད་རྩི་འབབ་པ་སོགས་གཏོར་མ་གྲུབ་རྟགས་སུ་བཤད་ཀྱང་། སྐབས་འགར་དེ་ལྟ་བུ་བར་ཆད་དུ་གྱུར་བའང་བཤད་དོ། །

༡༢ གཏོར་མའི་བཟོ་དབྱིབས་ནི། བཀའ་བསྟན་རྣམས་སུ། གཏོར་མ་ཆ་གསུམ་དང་ཆ་བཞི་སོགས་ཙམ་ལས་མི་སྣང་ལ། གཏོར་མ་བརྒྱ་རྩ་སོགས་བཟོ་ཚུགས་མི་འདྲ་བ་མང་བོ། རང་རེའི་གངས་ཅན་པའི་ཕྱག་སྲོལ་དུ་སྣང་། རྒྱ་གར་རྒྱལ་བོ་ཨག་བྷར་ལ་ཡང་། བོད་ནས་ཡོང་བའི་རྒྱ་གར་བ་ཞིག་གིས་གཡག་ཅེས་བྱ་བའི་སྲོག་ཆགས་ཤིག་དང་། བོད་སྟོན་རྣམས་ཀྱིས་ཟན་དང་མར་ལས་བྱས་པའི་གཏོར་མ་བྱ་བ་ངོ་མཚར་བའི་ལྟད་མོ་གཉིས་མཐོང་བ་ཞུས་ཚུལ་གྱིས་ཀྱང་། རང་རེའི་ཕྱག་སྲོལ་ཡིན་པ་རྟོགས། ཡང་གསེར་ཐང་ལས། གཏོར་མ་ནི་འབྲས་དང་འཁུར་བ་སོགས་མིའི་ཟ་ལུགས་དེ་ལྟར་བྱས་ཏེ་ཕུལ་བ་ལས། རང་རེ་བཞིན་རྩེ་མོ་རིང་བོ་སོགས་དབྱིབས་སྣ་ཚོགས་པར་བྱེད་པ་མེད། དེ་འདྲ་བྱེད་པ་སྔོན་གྱི་ཆོ་ག་སོགས་ནའང་མེད་ཟེར་བས། བོད་རང་གི་སྲོལ་ཡིན་པར་སེམས། བླ་མ་སོག་བཟློག་པས། རྒྱ་བྲིས་ཀྱི་ཐང་ག་ལ་གཏོར་མ་འདུག་བྱ་བ། མཆོད་རྫས་གཞན་ཞིག་ལ་ནོར་བའམ། ཐང་ག་དེ་བལ་བོ་ཞིག་གིས་བོད་དུ་བྲིས་པ་ཡིན་མཆི། བོད་ཀྱི་ཕ་མེས་རྣམས་གངས་རི་ལ་བརྩི་བས་ཞྭ་མོ་དང་། གཏོར་མ་ལྷ་རྟེན་སོགས་ཀྱི་རྩེ་མོ་རྣོ་རྩེ་རེ་ཡོད་པ་ཞིག་ལ་དགའ་བ་ཡིན། ཡང་དག་པར་དུ་ན་གཡུང་དྲུང་བོན་གྱི་ཕྱག་ལེན་དུ་སེམས་གསུངས་པ་ལྟ་བུ་དང་། ཆང་གི་དཀར་གསུམ་ནི། རྩི་ཞག་རུས་པ། མངར་གསུམ་ནི་དྲི་ཆེན། ཚིལ་ཆེན། གསུར་ཆེན་ནོ། །གཞན་དྲི་ཆུ། ཨ་མྲི་ཏ། མང་ས། ཤ་ཆེན། ཞལ་ཟས་སྣ་ཚོགས་སོ། །གསང་བའི་དཀར་གསུམ་ནི། རྐང་ཀླད་བྱང་སེམས་དང་། མངར་གསུམ་བུད་མེད་རྩི་ཆེན། མཚལ་ཆེན་དྭངས་མའོ། །གང་ལྟར་བོད་ཀྱི་གཏོར་མ་བཟོ་སྟངས་ལ། གཏོར་མ་གཏོང་ཡུལ་དང་། གྲུབ་མཐའ་སོ་སོའི་བླ་མའི་ཕྱག་བཞེས་བཞིན། སྣ་སྒོ་མོ་མཆིས་ཀྱང་། ཁ་དོག་གི་ཆ་ལ། དཀར་གཏོར་དང་དམར་གཏོར་གཉིས་ཡོད། མར་ཁུ་བྱུགས་པའི་དཀར་གཏོར་དེ་ཞི་བའི་ལྷ་རྣམས་ལ་འབུལ་བའི་གཏོར་མ་དང་། དམར་གཏོར་དེ་དྲག་པོའི་ལྷ་རྣམས་ལ་འབུལ་བའི་གཏོར་མ་ཡིན།

༡༣ གཏོར་མའི་བྱེད་ནུས། སྐབས་འགར་དམར་ཟོར་ནི། བོན་པོའི་རྟ་ཟོར་འཕེན་པ་བཟློག། ཅེས་པའི་ཚིག་དེ་ལ་བལྟས་ན། དང་བོ་བོན་པོའི་དྲག་སྦྱོར་བྱེད་ཚུལ་ཞིག་ཡིན་པར་མངོན་ཞེས་དུང་དཀར་རིན་པོ་ཆེས་གསུངས་ལ། བཀའ་བརྒྱུད་རྣམ་བཤད་དང་སྤྱི་དོན་འོད་གསལ་སྙིང་བོ་ཡང་དག་གྲུབ་པའི་ཚིག་འགྲེལ་ལས་ཀྱང་འཕྲིན་ལས་ཀྱི་གཟེར་ཆེན་ལྔ་བགྲང་བའི་ཚེ་འཁོར་ལོ་ལ་བརྟེན་ཏེ་སྲུང་བའི་གཟེར། གཏོར་མ་ལ་བརྟེན་ཏེ་བཟློག་པའི་གཟེར། ཞེས་གཏོར་མའི་ནུས་པ་ནི་དགྲ་བགེགས་བཟློག་པའི་བྱེད་ལས་ཅན་དུ་གསུངས་ཡོད། དེ་ཡང་གཏོར་ཟོར་ལ་ཕྱི་ལྟར་ན་གཏོར་མའི་ཕུང་བོ་དང་། ནང་ལྟར་ན་ལྷ་ཚོགས་ཀྱི་རང་གཟུགས། གསང་བ་ལྟར་ན་དྲག་པོའི་མཚོན་ཆར་གསུངས་པས། གྲུབ་པའི་རྣལ་འབྱོར་བས་གཏོར་ཟོར་འཕེན་པའི་དམིགས་རིམ་ཁྲོད། དྲག་གཏོར་དེ་ཐོག་མར་ཡི་དམ་གྱི་ལྷར་སྒོམ་པ་དང་། བར་དུ་ལྷ་དེའི་ཞལ་ཟས་སུ་སྒོམ་པ། མཐའ་མར་དྲག་པོའི་མཚོན་ཆར་བསྐྱེད་ནས་ཞིང་བཅུ་ཚང་བའི་དགྲ་བགེགས་ཕྱོགས་སུ་བརྫངས་པ་ཡིན་ནོ། །

དུང་དཀར་གྲུབ་མཐའ་ལས། གཏོར་ཟོར་འཕེན་པ་ཟེར་བ་ནི། གཏོར་མ་ཟུར་གསུམ་ཆེན་པོ་དེ་འདྲ་བཞེངས་ཐོག ཚེ་ཟོར་ཞེས་གཏོར་མའི་སྟེང་དུ་གང་སར་པད་ཁའི་གང་བུ་འཛུགས་པ་དང་། ཡུམ་ཟོར་ཞེས་ཤིང་ཀྱེར་པ་རིང་ཐུང་ལི་རྨི་གསུམ་ཙམ་ལ་གཞོགས་བརྒྱབ་ནས་རྩེ་རྣོ་བོ་བཟོས་ཏེ་འཛུགས་སྲོལ་ཡོད། གཏོར་མ་གཡུགས་སྟངས་ལ། གཏོར་མ་དེ་ལྷ་ཡིན་བསམ་པ་བྱས་ཏེ་གཡུགས་སྲོལ་ཞིག་དང་། ལྷ་ལ་ཕུལ་བའི་དམིགས་པ་བྱས་ཏེ་གཡུགས་སྲོལ་ཞིག་གཉིས་ཡོད། གཏོར་མ་དེ་ལྷ་ཡིན་བསམ་པའི་དམིགས་པའི་གཡུགས་སྟངས་དེ་ཧ་ཅང་ཉེན་ཁ་ཆེན་པོར་བརྩི་གི་ཡོད། ཅེས་དང་། མཁས་གྲུབ་ར་ག་ཨ་སེས། བསྟན་ལ་ཐུག་པའི་དགྲ་བོ་བྱུང་སྲིད་ན། །ཟོར་དུ་འཕངས་ན་ཧུར་ཐུམ་འགྲོ་བར་བཤད། །རང་ཉིད་ཡི་དམ་ང་རྒྱལ་བརྟན་པོ་ཡི། །ལྷ་ཉིད་གདན་དང་བཅས་ཏེ་འཕངས་བསྒོམས་པས། །ཕ་རོལ་རྡུལ་དུ་བརླག་པར་གདོན་མི་ཟ། །ནུས་པ་ཆུང་ན་རང་ལ་ལྡོག་དོགས་ཆེ། །བསྐུལ་བ་བཏོན་ནས་ལྷ་དེ་ནམ་མཁར་བཏེགས། །སེར་སྤྲིན་བཞིན་དུ་འུར་ཆེམ་བཅས་ཏེ་སོང་། །གཏོར་མ་མེ་དཔུང་མཚོན་ཆར་དམིགས་ཏེ་འཕངས། །དེ་ཡིས་རང་ལ་ལྡོག་དོགས་ཡོད་པ་མིན། །གསུངས་སོ། །གཏོར་མ་བཏང་ནས་སླར་འཁོར་ཚེ། གཏོར་སྣོད་ཁ་ཕྱིར་བསྟན་ན་དངོས་གྲུབ་ཡོལ་ཞིང་། ཁ་ནང་དུ་བསྟན་ནས་འཁྱེར་ཡོང་ན་དངོས་གྲུབ་འདུ་བར་གསུངས་སོ། །

ཡང་། ར་ག་ཨ་སེའི་གཏོར་མའི་ཡིག་སྣ་ལྷ་ཡི་ནོར་བུ་ལས། གཏོར་མ་བཅའ་ཐབས་ཤིག་ལ། གཏོར་ཆེན་བཟོ་ན་སྟོད་སྨད་རྣམ་པ་ལྔར་སོ་སོར་ཤོག་དྲིལ་འཇུག་པར་བཤད་དེ། སྟོད་དུ་བླ་མའི་མཚན་སྔགས། དེའི་འོག་ཡི་དམ་གང་ཡིན་གྱི་སྙིང་བོ། དེའི་འོག་བསྙེན་སྔགས་དང་འབོད་སྔགས་བཅུག སྐེད་པར་སྒྲུབ་སྔགས་དང་རྦད་སྔགས། རྩ་བར་གསང་སྔགས་འཇུག་པར་བཤད་པ་དང་། གཏོར་མ་ཆུང་ན་ཟངས་སྦུག་གམ་སྨྱུག་ཚིགས་ཀྱི་ནང་དུ་སྔགས་ལྔ་བོ་བྲིས་ཏེ་གཏོར་མའི་སྲོག་ཤིང་དུ་བྱས་ཀྱང་འཐུས་པར་བཤད་དོ། །ཡང་འཇིག་རྟེན་པའི་ལྷ་ལ་བླ་མའི་མཚན་མི་འཇུག་པར་གོང་ནོན་གཉེན་པོའི་ལྷ་ཡིས་སྔགས་ཀྱི་ཆོག་ལ། གཏོར་མའི་དབུས་སུ་རིན་ཆེན་སྣ་ཚོགས་བཅུག་ན་ལོངས་སྤྱོད་འཕེལ་བ། སྨན་སྣ་བཅུག་ན་ནད་སེལ་བའི་རྟེན་འབྲེལ་དང་། གསེར་དང་གསེར་ཤོག་མང་དུ་བཅུག་པ་ལ་གསེར་གཏོར་ཞེས་ཁམས་ཆེན་དུ་བརྩི་བ་དང་། ཡང་ཕྱག་ལེན་ཞིག་ལ་གོས་ཆེན་གཏོར་དབྱིབས་སུ་བཟོས་ནས། ནང་དུ་འབྲུ་སྨན་དང་རིན་ཆེན་ཤོག་དྲིལ་བཀང་། དངུལ་གྱི་མར་རྒྱན་འདོགས་པ་སོགས་གཏོར་བཟོ་མང་དུ་བཤད་ལ།

ཡང་། དགྲ་བགེགས་བསྒྲལ་ལུགས་ལ། ལྕགས་མཁར་སྲེག་པ་ཞེས་དྲག་ལས་བྱེད་སྲོལ་ཞིག་ཡོད། དེ་ནི་སླ་ང་ཆེན་པོའི་ནང་སྣུམ་ཁོལ་ཐག་ཆོད་པའི་སྐབས་སུ། དགྲ་བགེགས་སྒྲོལ་བ་བོ་དེས་གནོད་བྱེད་དེའི་གཟུགས་བརྙན་བྲིས་ཐོག སྙིང་ཁར་དགྲ་བགེགས་དེའི་མིང་བྱང་བྲིས་ཏེ། རྫས་ངན་མང་བསྲེས་བྱུགས་པའི་ཤོག་ལྷེ་ཞིག་དབྱུག་པའི་རྩེར་བསྐོན་ནས་འཁྱེར་ཐོག ཨ་རག་སྤུས་ལེགས་ཀ་ལི་གང་འཁྱེར་ནས་འཆམ་རྒྱག་བཞིན། མེ་ལ་བསྐོར་བ་གསུམ་བརྒྱབ་ནས་ཨ་རག་དེ་སྣུམ་ཐོག་ཏུ་བླུགས་ནས། མེ་ལྕེ་དྲག་ཏུ་འབར་བ་དང་ཆབས་ཅིག་དགྲ་གཟུགས་ཀྱི་ཤོག་ལྷེ་དེ་མེའི་ནང་དུ་སྲེག་སྲོལ་ཡོད་པ་དེའོ། །

༡༤ གཏོར་མའི་མཚོན་དོན། གཏོར་མ་གཏོང་བ་འདི་ལ། ཕྱིན་དྲུག་དང་བསྡུ་བཞི། སྡོམ་གསུམ་ཚང་བར་མཁས་པ་སྔ་མ་དག་གིས་གསུངས་ཏེ། གཏོར་རྫས་བཏང་བས་སྦྱིན་པ། གཙང་ཞིང་གནོད་འཚེ་སྤངས་པས་ཚུལ་ཁྲིམས། མི་འཚེ་ཞིང་དཀའ་བ་དང་དུ་བླངས་པས་བཟོད་པ། གཏོང་ཕོད་ཆེ་ཞིང་ལེ་ལོ་བྲལ་བས་བརྩོན་འགྲུས། གཏོང་བའི་དུས་སུ་སེམས་གཞན་དུ་མི་གཡེངས་བས་བསམ་གཏན། འཁོར་གསུམ་ཡོངས་སུ་དག་པར་རྟོགས་པས་ཤེས་རབ་ཚང་ངོ་། །བསྡུ་བཞི་ཚང་བ་ནི། མགྲོན་སོ་སོར་བསྔོས་པའི་སྦྱིན་པ། མགྲོན་སོ་སོར་བསྔགས་པ་བརྗོད་པས་སྙན་སྨྲ། འདོད་དོན་ཞུ་བས་དོན་སྤྱོད་པ། འཁོར་གསུམ་དག་པར་བསྔོས་པས་དོན་མཐུན་པ་ཚང་བའོ། །སྡོམ་གསུམ་ཚང་བ་ནི། གཏོར་མ་གཏོང་དུས་གཙང་ཞིང་མི་འཚེ་བ་སོགས་མི་དགེ་སྤངས་པས་སོ་ཐར་གྱི་སྡོམ་པ། གཞན་དོན་དུ་གཏོང་བའི་བྱང་སེམས་ཀྱི་སྡོམ་པ། ལྷ་སྒོམ་ཞིང་གཟུངས་སྔགས་བཟླས་ཏེ་གཏོང་བས་གསང་སྔགས་ཀྱི་སྡོམ་པ་ཚང་ངོ་། །ཡང་གཏོར་མ་ལ་གཞི་ལམ་འབྲས་གསུམ་གྱི་གནས་སྐབས་དང་སྦྱར་ན། སྦྱངས་གཞི་ལུས་ངག་ཡིད་གསུམ་དང་ཁུ་ཁྲག་རླུང་གསུམ་གྱི་སྦྱར་བྱ་ཤིན་ཏུ་ཕྲ་བའི་བག་ཆགས་གསུམ་དང་། དུག་གསུམ། སྒོ་གསུམ་གྱི་སྐྱོན་རྣམས་སྦྱངས་ཏེ་སྦྱོང་བྱེད་རྡོ་རྗེ་གསུམ་མཐར་ཕྱིན་པ་དང་། སྦྱང་འབྲས་སྐུ་གསུང་ཐུགས་རྡོ་རྗེ་འགྲུབ་པའི་རྒྱུ་སྨིན་བྱེད་དུ་འགྱུར་བའི་ཆེད་དུ་སྨན་རག་གཏོར་མ་འབུལ་བ་ཡིན་ནོ། །

ཡང་སྙིང་ཐིག་གཏོར་མའི་རེག་ཟིག་ལས། དང་བོ་བླ་མ་མཆོད་པ་དང་ཡང་གསང་བླ་སྒྲུབ་འདྲ་བར་ཟླུམ་གཏོར་དམར་བོ་པདྨ་འདབ་བཞི་བ། ནང་སྒྲུབ་རིག་འཛིན་འདུས་པ་ལ། བང་རིམ་དམར་བོ་གསུམ་གྱི་འོག་མ་ལ་འཁོར་ཚོགས་སྤྱི་འདུས་སུ་འཐེབ་ཀྱུ་ཅི་མང་། བར་མ་ལ་རྗེ་འབངས་ཉེར་ལྔ་མཚོན་བྱེད་མར་གྱི་ནོར་བུ་ཉེར་ལྔ། སྟེང་མ་ལ་རིག་འཛིན་བརྒྱད་མཚོན་བྱེད་རིན་ཆེན་ཟུར་བརྒྱད་པ་སེར་བོ། དེའི་སྟེང་བདེ་སྟོང་གཉིས་ཀྱི་མཚོན་བྱེད་ཉི་ཟླ་གཉིས་ཀྱི་སྟེང་འཁོར་བའི་སྐྱོན་གྱིས་མ་གོས་པའི་རྟགས་པདྨ་འདབ་བཞིའི་མཛེས་ཚོན་ཅན་གྱི་དབུས་སུ་ཟླུམ་གཏོར་བརྗིད་ལྡན། ཞེས་གསུངས་སོ། །

༡༥ གཏོར་མ་བཏང་བའི་ཕན་ཡོན་ནི། གཏོར་མ་ལས་རྣམས་ཀྱི་སྔོན་དུ་འགྲོ་བ། འཕྲིན་ལས་མ་ཚང་བ་ཁ་སྐོང་བ། ཚེ་བསྲིངས་ཤིང་བར་ཆད་སེལ་བ། མདངས་དང་ལྡན་པར་འགྱུར་བ། ལོངས་སྤྱོད་འཕེལ་བ། གཟི་བརྗིད་དང་མཐུ་སྟོབས་ཆེ་བ། གནས་སྐབས་བདེ་འགྲོ་དང་། མཐར་ཐུག་སངས་རྒྱས་འཐོབ་པའི་ཕན་ཡོན་སོགས་བརྗོད་ལས་འདས་སོ། །གཏོར་མའི་ཡིག་སྣ་ལྷའི་ནོར་བུ་ལས། གཏོར་མ་མེད་ན་བར་ཆད་སེལ་བ་མེད། །གཏོར་མར་བརྩོན་ན་བར་ཆད་མི་ཚུགས་ཤིང་། །མཆོག་ཐུན་དངོས་གྲུབ་སྒྲུབ་པའི་མཆོག་ཏུ་གསུངས། །

ཡང་ཀྲི་ཡ་དཔུང་བཟང་གི་རྒྱུད་ལས། ནད་ཀྱི་བསྐལ་བ་བསལ་བའི་ཕྱིར། །སྨན་སྣ་ལྔ་ནི་བུམ་པར་བླུགས། །ཚུལ་ཁྲིམས་རྣམ་པར་དག་བྱའི་ཕྱིར། །དྲི་སྣ་ལྔ་ཡང་བུམ་པར་བླུགས། །དགོས་འདོད་རེ་བ་བསྐང་བ་དང་། །མཚོན་གྱི་བསྐལ་བ་བསལ་བའི་ཕྱིར། །རིན་ཆེན་ལྔ་ཡང་བུམ་པར་བླུགས། །ཀུན་གྱི་སྙིང་བོར་གྱུར་བ་དང་། །དགོས་འདོད་རེ་བ་བསྒྲུབ་བྱའི་ཕྱིར། །སྙིང་བོ་ལྔ་ཡང་བུམ་པར་བླུགས། །ཞེས་སོ། །

ཡང་མཁས་པ་མང་བོ་ཞིག ཇོ་བོའི་ཞལ་ལས། བོད་ཕྱུག་པོ་མི་འོང་། གཏོར་ཟན་སླ་མོ་བྱེད། གཏོར་མ་མཐེབ་ཀྱུ་བྱེད་པར་འདུག་གསུངས་ལ། ཀུན་མཁྱེན་འཇམ་དབྱངས་བཞད་པས། གཏོར་མའི་རྣམ་བཤད་མང་བོར་དེ་ལྟར་མི་སྣང་བས་ཇོ་བོས་དེ་ལྟར་བཤད་པ་མི་བདེན་པར་ཡང་གསུངས་སོ། །

བྷ་ལིང་ཨཱ་ཙརྱའི་ཆོས་སྐྱོང་ཐམས་ཅད་ཀྱི་གཏོར་ཆོག་ལས། བསོད་ནམས་ཀྱི་ཚོགས་གསོག་པ་དང་། གཏོར་མས་བར་ཆད་ཐམས་ཅད་ཞི་བ་དང་། གཏོར་མས་འཕྲིན་ལས་རྣམ་བཞི་འགྲུབ་པ་དང་། གཏོར་མ་ནི་ལྷ་སྒོམ་པ་དང་། རབ་གནས་དང་། སྦྱིན་སྲེག་དང་། ལས་ཚོགས་ཀུན་ལ་སྔོན་དུ་འགྲོ་བ་དང་། གཏོར་མས་སངས་རྒྱས་ཐམས་ཅད་ཀྱིས་དགོངས་ཤིང་། ལྷ་རྣམས་ཀྱིས་སྲུང་ཞིང་སྐྱོབ་པ་དང་། སྦྱིན་པའི་ཕར་ཕྱིན་ཡོངས་སུ་རྫོགས་པར་འགྱུར་བ་དང་། གཏོར་མས་ཚེ་རིང་ཞིང་བསོད་ནམས་ཚད་མེད་པ་བསྐྱེད་ཅིང་འཕེལ་བ་དང་། སྦྱིན་པའི་ཕར་ཕྱིན་མྱུར་དུ་རྫོགས་པར་བྱེད་ཅིང་། གཏོར་མས་བསོད་ནམས་དང་ཚེའི་ཚད་ཀྱང་འཕེལ་ཞིང་སྐྱེ་བར་བྱེད་པ་དང་། གཏོར་མས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་སྙེད་མཆོད་པའི་བསོད་ནམས་འཐོབ་པས། ཚེ་རིང་བ་དང་། བསོད་ནམས་དང་། མདངས་དང་། སྟོབས་སྐྱེ་ཞིང་འཕེལ་བ་དང་། དགེ་བའི་རྩ་བ་ཡོངས་སུ་རྫོགས་པ་དང་། མི་དང་མི་མ་ཡིན་པ་དང་། གནོད་སྦྱིན་དང་། སྲིན་པོ་དང་། ཡི་དྭགས་མ་རུངས་པ་ཐམས་ཅད་ཀྱིས་འཚེ་ཞིང་གནོད་པ་བྱེད་མི་ནུས་པ་དང་། དེ་དག་སོགས་གཞན་ལ་གཟི་བརྗིད་ཚད་མེད་པ་དང་ལྡན་པར་འགྱུར་བ་སོགས་མཐའ་ཡས་པའི་ཕྱིར་གསུངས་སོ། །དཔེར་ན། གཏོར་མ་བཏང་བས་ཚེ་རིང་བ་དང་བསོད་ནམས་འཐོབ་པ་གྲུབ་ཆེན་ལྕེ་སྒོམ་ལྟ་བུ་སྟེ། ལྕེ་སྒོམ་པ་ལོ་བརྒྱད་ཅུ་རྩ་གྲངས་བཞུགས་པ་གཏོར་མའི་བྱིན་རླབས་ཡིན་གསུངས་པ་དང་། ཡང་ལྕེ་སྒོམ་པའི་ཞལ་ལས། ང་ལ་དང་བོ་རྒྱགས་སུ་ཞོག་གཅིག་ལས་མེད་དེ། ད་ལྟ་ལོངས་སྤྱོད་ཆེ་བ་གཏོར་མའི་དོན་ཡིན་པར་འདུག་གསུངས་པ་དང་། ཆོས་པ་ལྟོ་གོས་ཀྱིས་ཕོངས་པ་མཐོང་ཙ་ན། གཏོར་མ་མ་ཐོངས་པ་ཡིན་གསུངས་ལ། སྐབས་ཤིག་བླ་མའི་རྒྱགས་ཆད་ནས་ཕྱེ་ཕད་སྤྲུགས་པས་རྩམ་པ་བྲེ་བཞི་བྱུང་བ་གཏོར་མ་བཏང་བས། ཉིན་ཕྱེད་ནས་ཡོན་བདག་འགས་ནས་མང་བོ་དང་ཆོས་སྟོན་བཟང་བོ་ཁྱེར་ནས་བྱུང་བས། བླ་མས་ཉེ་གནས་ལ་ཞིང་གི་སྟོན་ཐོག་ལས་མི་མགྱོགས་སམ་གསུངས་པ་ལྟར་རོ། །

མདོར་ན། མཆོད་གཏོར་གྱི་སྐབས་སུ་གཅེས་པར་འཛིན་པ་དང་། ལྡན་དགོས་པ། འབྲས་བུ་ཇི་ལྟར་འཐོབ་པ་ནི། མཆོད་སྦྱིན་གཏོར་མའི་རྣམ་བཤད་དགེ་བའི་ཉི་མ་ལས། སྦྱོར་བའི་སྐབས་སུ་སེམས་བསྐྱེད་དམ་པ་གཅེས། །དངོས་གཞི་འཁོར་གསུམ་བདེན་མེད་ཤེས་པ་གཅེས། །རྗེས་སུ་འདུན་པ་བྱང་ཆེན་རྒྱུར་བསྒྱུར་གཅེས། །གཅེས་པ་རྣམ་གསུམ་ལམ་གྱི་སྲོག་ཤིང་ཡིན། །དང་བོ་གཏང་བྱའི་རྫས་ལ་གཙང་སྦྲ་དགོས། །བར་དུ་ཆོ་གའི་ལས་ལ་འཁྲུལ་མེད་དགོས། །ཐ་མར་རང་གཞན་ཡིད་ཆེས་ལྡན་པ་དགོས། །དགོས་པ་རྣམ་གསུམ་བརྗོད་བྱའི་སྙིང་བོ་ཡིན། །དཀོན་མཆོག་མཆོད་པས་བསོད་ནམས་ཚོགས་ཆེན་རྫོགས། །རིགས་དྲུག་སྦྱིན་པས་ལམ་གྱི་ཡན་ལག་རྫོགས། །ཐབས་ཤེས་འབྲེལ་བས་ཚོགས་གཉིས་ཟུང་འཇུག་རྫོགས། །རྫོགས་པ་རྣམ་གསུམ་འདི་ཡི་འབྲས་བུ་ཡིན། །ཞེས་སོ། །

གཏོར་མའི་སྐོར་རྒྱས་པར་དགེ་ལུགས་པར་མཚོན་ནའང་། དེ་མོ་ངག་དབང་དགེ་ལེགས་རྒྱལ་མཚན་གྱི་གཏོར་མའི་དེ་ཉིད་གསལ་བར་སྟོན་པ་ནོར་བུའི་མེ་ལོང་དང་། ཞབས་དྲུང་ཆོས་རྗེ་ངག་དབང་ཚེ་རིང་གི་གཏོར་མའི་རྣམ་བཞག་གདོན་གྲོལ་ཉེར་མཁོ། རོང་ཐ་བློ་བཟང་དམ་ཆོས་རྒྱ་མཚོའི་གཏོར་མའི་རིམ་པ་སྣ་ཚོགས་དང་། གཞན་ཡང་། མཆོད་སྦྱིན་གཏོར་མའི་རྣམ་བཤད་དགེ་བའི་ཉི་མ་ལས། གཏོར་མའི་སྔོན་འགྲོ། དངོས་གཞི། རྗེས་ཀྱི་རིམ་པ་བཅས་གསུངས་ཡོད་པ་དང་། གཡུ་ཐོག་རྙིང་ཐིག་གི་གཏོར་མའི་དཔེ་རིས་དང་བཅས་པ་སྡེ་དགེ་པར་ཁང་དུ་ཡོད་པ་དང་། རྫོགས་ཆེན་གྱི་གཏོར་མའི་དཔེ་རིས་ཀྱང་གྲོང་ཆོག་པ་རྣམས་ཀྱི་ལག་ན་མང་དུ་གདའ་བས། ཞིབ་ཏུ་དེ་དག་ལ་གཟིགས་པར་ཞུ།

ཞལ་ཟས་རྒྱ་མཚོ།

ཞལ་ཟས་ཀྱི་གཏོར་མ་ཇི་ལྟར་བྱུང་བ་དང་། དར་ཚུལ་གྱི་བརྒྱུད་རིམ་སོགས། གཏོར་མའི་རྣམ་བཤད་སྐབས་སུ་བཤད་ཟིན་ལ། འདིར་སྐབས་སུ་བབ་པ་མཆོད་པའི་བྱེ་བྲག་ཞལ་ཟས་རྒྱ་མཚོ་བཟོ་སྲོལ་ཇི་ལྟར་བྱུང་ཚུལ་བརྗོད་ན། རྗེ་བདག་ཉིད་ཆེན་པོ་དགུང་ལོ་ང་གསུམ་གྱི་ཚེ། ཆོ་འཕྲུལ་སྨོན་ལམ་ཆེན་མོའི་དུས་མཆོད་བཙུགས་སྐབས། ཇོ་བོ་རྣམ་གཉིས་གཙོས་སངས་རྒྱས་བྱང་སེམས་རྣམས་ལ་རྒྱན་དང་ན་བཟའ་ཕུལ། མཆོད་ཚོགས་རྒྱ་མཚོའི་སྤྲིན་ལྟར་ཕུལ་དུས། ཞལ་ཟས་རྒྱ་མཚོ་འདི་གསར་དུ་བཞེངས་པ་སྟེ། རྗེའི་རྣམ་ཐར་དད་པའི་འཇུག་ངོགས་ལས། ཞལ་ཟས་མདའ་ཚད་ཙམ་ལྷག་ཙམ་ལ་མར་གྱི་རྒྱལ་སྲིད་རིན་པོ་ཆེ་སྣ་བདུན་ལ་སོགས་པའི་རྒྱན་ཡིད་འཕྲོག་པས་བརྒྱན་པ་བརྒྱ་རྩ་བརྒྱད་རེ་ཉིན་རེར་ཞིང་གསར་བ་ཕུལ་ཞིང་། ཀོང་བུ་ཆེན་པོའི་གཡས་གཡོན་དུ་ས་སྟེགས་ལ། རྩམ་པ་ཁལ་བཞི་བརྒྱ་རེ་ལས་བྱས་པའི་ལྷ་བཤོས་རྒྱན་བཟང་བོ་དཔག་ཏུ་མེད་པས་སྤྲས་པ། འཕྱར་དར་བཙུགས་པ་དང་། བཅས་པ་མངོན་པར་བཤམས་པའི་ཞལ་ཟས་རྙིང་བ་རྣམས་ནི་བདག་གིར་བྱེད་པ་མེད་པར་སྐྱེ་བོ་ཕོངས་པ་སྤྲང་བོའི་ཚོགས་ལ་ལྟོས་པ་མེད་པར་བྱིན་པས། ཕོངས་པ་དག་ཀྱང་བཀྲེན་པའི་འདུ་ཤེས་ཀྱི་འཆང་བ་ལས་གྲོལ་ནས་བཟའ་བཏུང་གིས་ཚིམ་པ་ལྷག་པར་འཐོབ་པས། སླར་བཟའ་བ་ཡིད་ལ་མི་བྱེད་པ་ལྟ་བུར་གྱུར་ཏོ། །ཞེས་པ་ལྟར། སྐབས་དེར་རྨང་གཞི་རྩམ་གཏོར་ཆེན་པོའི་སྟེང་དུ། མར་ཚོན་ལས་བཞེངས་པའི་རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། རྫས་བརྒྱད་སོགས་བཟོ་བཀོད་ཕུན་སུམ་ཚོགས་པ་བཤམས་པ་ལས། ཕྱིས་སུ་སྤྱི་ལོ ༡༥༨༣ ལོར་རྒྱལ་དབང་སྐུ་ཕྲེང་གསུམ་པ་སྐུ་འབུམ་དུ་གདན་དྲངས་སྐབས། སྐུ་འབུམ་དགོན་པའི་མཁན་པོ་བརྩོན་འགྲུས་བཟང་བོས་ལྷ་ལྡན་སྨོན་ལམ་ཆེན་མོ་ཇི་བཞིན་སྨོན་ལམ་སྐབས་སུ་མར་རྒྱན་གྱི་མེ་ཏོག་མཆོད་པ་སྣ་ཚོགས་བཤམས་པ། ད་ལྟའི་མིང་དུ་གྲགས་པའི་སྐུ་འབུམ་དགོན་པའི་མེ་ཏོག་མཆོད་པ་འདི་དར་བས། སྔོན་ཆད་ཀྱི་བཟོ་ཚུལ་ལ་འགྱུར་བ་ཆེན་པོ་ཐེབས་ཡོད། དེ་ནི་རྨང་གཞི་རྩམ་གཏོར་བཏང་སྟེ། མར་ཚོན་གྱི་ཕྱག་རྩལ་འབུར་དུ་ཐོན་པར་བྱས་ནས། མར་བཟོས་རྒྱན་མཆོད་དང་འབྲེལ། ལོ་རེ་བཞིན་རྒྱལ་ལོ་ཚེས་བཅོ་ལྔ་ཉིན་མཆོད་ཚོགས་དང་བཅས་པའི་དུས་མཆོད་ཅིག་ཡིན། དེ་ལ་རྟེན་གཙོ་འཇམ་དབྱངས་ཀུན་གཟིགས། སྟོན་པ་ཤཱཀྱ་ཐུབ་པའི་འཁྲུངས་རབས་ཁག་གཅིག ཆོས་རྒྱལ་སྲོང་བཙན་གྱིས་རྒྱ་བཟའ་ཀོང་ཇོ་བོད་དུ་གདན་དྲངས་ཚུལ་གྱི་བརྒྱུད་རིམ་མདོར་བསྡུས། དེ་མིན་མེ་ཏོག་དང་ཁང་བཟང་། སྲོག་ཆགས་མང་བོའི་མར་བཟོས་སྣང་བརྙན་སོགས་བཞེངས་ཏེ། སྐུ་འབུམ་མར་བཟོས་རྒྱན་མཆོད་ཅེས་ཡོངས་སུ་གྲགས་པ་དང་།

གཞན་ཡང་། མདོ་དབུས་ཁམས་གསུམ་གྱི་དགོན་སྡེ་མང་བོས་ལོ་རེར་བཞིན། ཞལ་ཟས་རྒྱ་མཚོའི་མཆོད་གཏོར་ལ་སྲོག་ཆགས་དང་། མེ་ཏོག་སྣ་ཚོགས་ཀྱི་མར་རྒྱན་སྣ་མང་བཟོས་ཏེ། གཙུག་ལག་ཁང་དུ་འབུལ་སྲོལ་དར་བ་ལས་གཞན། སེམས་བསྐྱེད་མཆོད་པ་སོགས་ཀྱི་མཆོད་སྤྲིན་རྒྱ་མཚོ་སྤྲོ་སྐབས། ཞལ་ཟས་རྒྱ་མཚོ་ཇི་སྙེད་ཅིག་བཞེངས་པའི་སྲོལ་རྒྱ་ཆེར་དར་ཡོད་དོ། །

ལྷ་བསང་།

༡ ལྷ་བསང་གི་ཁུངས། ལྷ་བསང་གཏོང་བའི་ཁུངས་དང་བྱུང་རིམ་ནི་མ་གྷ་དྷ་བཟང་མོའི་རྟོགས་བརྗོད་ལས། སངས་རྒྱས་བཅོམ་ལྡན་འདས་བུ་རམ་ཤིང་འཕེལ་དུ་མ་གྷ་དྷ་བཟང་མོས་སྤྱན་འདྲེན་པ་ལ་སྤོས་དང་མེ་ཏོག་ཁྱེར་ནས་ཁང་བཟང་གི་རྩེར་འཛེག་སྟེ། མ་ལུས་སེམས་ཅན་ཀུན་གྱི་མགོན་གྱུར་ཅིང། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་བའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་གསོལ་བ་བཏབ་སྟེ། སྙིམ་པས་མེ་ཏོག་དཀར་དམར་སྔོ་སེར་གཏོར་བས་བདུག་སྤོས་ཀྱི་དུད་སྤྲིན་དང་། དྲི་བཟང་འཐུལ་ཞིང་ནམ་མཁའ་ལ་དལ་བུས་སོང་བ། སངས་རྒྱས་ཀྱི་ཞབས་པད་ལ་མེ་ཏོག་རྣམས་དང་སྤོས་དང་བཅས་པ་བབས་ཤིང་། ཞུ་བའི་ཚིག་དབྱངས་དང་བཅས་པ་གསན་པ་དེ་དང་། གསེར་འོད་དམ་པ་ལས། བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེ་དབང་བོའི་རྒྱལ་བོ་དེ་ལ་མཆོད་པའི་སླད་དུ་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ། རྒྱལ་བོ་ཆེན་པོ་བདག་ཅག་བཞིའི་རང་རང་གི་ཁང་བའི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་སུ་གནས་པར་འགྱུར། ཞེས་དང་། ཡང་། དེ་ཉིད་ལས། སྤོས་དང་གུ་གུལ་དང་ཙན་དན་དང་། ག་བུར་དང་། དུ་རུ་ཀ་དང་། ཨ་ཀ་རུ་དང་། པོག་དཀར་བོ་ལ་སོགས་པ་འདི་དག་མཉམ་པར་སྦྱོར་བའི་སྔགས་འདི་བཟླས་པའི་རྒྱལ་བོ་ཆེན་པོ་རྣམ་ཐོས་ཀྱི་བུ་སྤྱན་དྲངས་པར་བྱའོ། །ཞེས་དང་། ཐུའུ་བཀྭན་ཆོས་ཉིས། གསང་འདུས་རྩ་རྒྱུད་སོགས་སུ། དྲི་ལ་རྣམ་གསུམ་ཤེས་བྱས་ནས། །ཞེས་པའང་ཁུངས་སུ་བཀོད་དོ། །འདུལ་བ་མེ་ཏོག་ཕྲེང་རྒྱུད＜སྡེ་དགེ་བསྟན་འགྱུར﹙﹝ཤུ﹞ ༥༣ ན ༥﹚ལས། སངས་རྒྱས་སྐུ་གཟུགས་གྲོང་སོགས་སུ། །སྤྱན་དྲངས་པ་ནི་གསུངས་པ་བཞིན། །དེར་ནི་ཆག་ཆག་བྱུགས་པ་དང། །སྲང་གི་བཞི་མདོར་ས་གཞི་ལ། །སྣ་ཚོགས་མེ་ཏོག་བཀོད་པ་ཡིས། །རབ་ཏུ་མཛེས་པར་བྱེད་པ་ཡིན། །ཙན་དན་ཨ་གར་བུ་རམ་གྱི། །བདུག་སྤོས་ཀུན་ནས་དབུལ་བར་བྱ། །ཞེས་དང་། ཡང་མཉན་ཡོད་དུ་སངས་རྒྱས་བཞུགས་པའི་སྤྱན་སྔར་མཆོད་པའི་སྤྲིན་ཕུང་འཁྲིགས་པའི་ལོ་རྒྱུས་སོགས་མདོ་ལས་བྱུང་བ་རྣམས་ནི་བསང་གི་ཁུངས་སོ། །

གཞན་ཡང་ཀརྨ་ཆགས་མེད་ཀྱིས། བསང་གི་རྒྱུད་བྱུང་གང་ནས་བྱུང་། །གྲངས་མེད་བསྐལ་བའི་སྔོན་རོལ་དུ། །བཅོམ་ལྡན་ཤཱཀྱ་ཐུབ་པ་ཉིད། །རྒྱལ་བོ་ཆོས་ཀྱི་དབང་ཕྱུག་གྱུར། །དེ་ཡིས་སངས་རྒྱས་མཆོད་པའི་ཕྱིར། །སྤོས་ཀྱི་རིལ་བུ་གཅིག་བསྲེགས་ནས། །སིལ་སྙན་དཀྲོལ་ཞིང་བསང་མཆོད་མཛད། །སྤོས་སྤྲིན་ན་བུན་ཆེན་པོ་ཡིས། །ཞག་བདུན་བར་དུ་འཛམ་གླིང་ཁྱབ། །དེ་ནས་བསང་བྱུང་གང་ནས་བྱུང་། །སློབ་དཔོན་འཕགས་པ་ཀླུ་སྒྲུབ་ཀྱིས། །འཛམ་གླིང་སྤྱི་བསང་བསྡུས་པ་བརྩམས། །རྒྱ་གར་ལྷ་འདྲེ་ཐམས་ཅད་མཉེས། །རྡོ་རྗེ་གདན་གྱི་གཙུག་ལག་གྲུབ། །དེ་རྗེས་སློབ་དཔོན་པདྨ་ཡིས། །ཞི་བརྔན་བསང་གསུམ་ཆོ་ག་མཛད། །བོད་ཀྱི་ལྷ་འདྲེ་ཐམས་ཅད་མགུ། །དཔལ་གྱི་བསམ་ཡས་གཙུག་ལག་གྲུབ། །དེ་རྗེས་རང་བྱུང་རྒྱལ་བ་ཡིས། །འཛམ་གླིང་སྤྱི་བསང་རྒྱས་པ་མཛད། །ཁམས་སོགས་ས་བདག་ཀླུ་གཉན་དགའ། །སོག་གི་ཆུ་ལ་ཟམ་པ་བཙུགས། །སྔོན་གྱི་སྲིད་པ་དེ་བཞིན་དུ། །ད་ལྟ་རྣལ་འབྱོར་བདག་ཅག་གི། །བཟང་ཤིང་སྣ་ཚོགས་བསྲེགས་པ་ཡི། །འབྲུ་སྣ་ཕྱེ་མར་ཟས་ཕུད་མཆོད། །ཇ་ཆང་འོ་ཞོའི་ཕུད་ཀྱིས་མཆོད། །ཅེས་དང་།

ཡང་། སྔགས་འཆང་ཆོས་རྗེ་བས། དུག་ཁྲག་ཡུངས་ཀར་གུ་གུལ་ནག་པོ་སོགས། །དྲག་པོའི་རྫས་མཆོག་སྦྱར་བའི་མཐུན་པའི་སྤོས། །རོ་སོལ་མེ་ཡིས་བསྲེགས་པའི་དུད་སྤྲིན་འདིས། །ཞེས་དང་། རེ་མ་ཏིའི་དམག་ཟོར་གྱི་མན་ངག་ལས། གསུར་ཆེན་མ་མོ་མཉེས་པར་བྱ། །སོགས་དམར་བསང་དང་ཆ་འདྲ་བ་ཞིག་ཆོ་ག་མང་བོ་ལས་གསུངས་པ་ནི། རྒྱུད་ལས་གསུངས་པའི་སྔགས་ཀྱི་ཞལ་ཤེས་ལས་རྟོགས་པ་མ་གཏོགས་འདིར་སྐབས་སུ་མ་བབས་སོ། །

གཞན་ཡང་། རྒྱལ་དབང་ལྔ་བས་ཞང་ཞུང་ཤེས་རབ་མེས་པོའི་གཡུང་དྲུང་བོན་གྱིས་སྲོལ་བཏོད་པར་བཞེད་དེ། གངས་རིའི་དཔལ་ལྡན་སཱ་ལའི་ལྗོངས་ཆེན་པོའི། །ལྷ་ཀླུ་གཞི་བདག་དགའ་བར་བྱེད་པའི་བསང་། །ཞང་ཞུང་གཤེན་རབ་མེས་པོའི་རྗེས་འབྲང་བའི། །གཡུང་དྲུང་བོན་གྱིས་སྲོལ་བཏོད་ཐོག་མར་དར། །ཞེས་པ་ལྟར། དུས་གསུམ་གཤེན་རབ་ཀྱི་འབྱུང་ཁུངས་དང་མཛད་པའི་རྒྱུད་འདུས་པ་རིན་པོ་ཆེ་གཟེར་མིག་གི་མདོ་ལས། འཁོར་མང་བོས་ཀྱང་། ལ་ལ་ནི་སེལ་བཏབ། ལ་ལ་ནི་ཁྲུས་གསོལ་ཞེས་འབྱུང་པ་ལྟར། སེལ་གྱི་ཆོ་ག་འདི་སྟོན་པ་གཤེན་རབ་མ་བྱོན་པའི་ཡར་སྔོན་དུ་ཡོད་པ་ཡིན་ལ། སྤྱིར་བཏང་སེལ་གྱི་གཞུང་ལ་རྩ་དཀར་འཕེལ་བའི་ཡར་སེལ་བཞི། རྩ་ནག་འགྲིབ་པའི་མར་སེལ་བཞི། མཉམ་གཉིས་བསོར་བའི་བར་སེལ་བཞི་བཅས། དབྱེ་བ་ཆེན་པོ་བཅུ་གཉིས་ཡོད། དེ་དག་ལ་ཡང་སེལ་དཀར། སེལ་ནག སེལ་ཁུ་བཅས་ཀྱི་དབྱེ་བ་ཡོད་ཅིང་། དེ་རེ་རེ་ལ་དབྱེ་སྒོ་བརྒྱ་དང་ཉི་ཤུ་རེ་ཕྱེས་པས། སྲིད་པ་རྨང་ཆེན་སེལ་གྱི་སྒོ་སུམ་བརྒྱ་དྲུག་ཅུར་གྲུབ་པ་སོགས་བོན་གྱི་དྲི་མེད་གཟི་བརྗིད་དང་། དུག་དབྱུང་འབར་བ་ནག་པོ། ཀུན་བཟང་བསང་ནག་སོགས་ལས་ཤེས་ལ། མདོར་ན། བསང་གི་ངོ་བོ་ཡང་མནོལ་གྲིབ་མི་གཙང་བའི་རིགས་རྣམས་བསང་བའམ་དག་པར་བྱེད་པ་སྟེ། གཉའ་ཁྲི་ལྷ་ཡུལ་ནས་ཕེབས་ཚུལ་གསུངས་སྐབས་ཀྱང་ཡབ་ཀྱི་ཞལ་ལས། གནམ་ལྷ་དོག་ལ་གཤེགས་པ་ན། མི་ཡུལ་བཙོག་དང་མནོལ་ཆེ་བས། ཡ་ངལ་གྱིས་སྣ་དྲོངས་ཤིག མཚེ་མིའི་སྐུ་ཡི་གཡས་རྟེན་ཅིག ཙོ་མིས་སྐུ་ཡི་གཡོན་རྟེན་ཅིག ཡ་ངལ་གྱིས་སེལ་དང་སངས་ཀྱིས། གསུངས་པ་ལས་ཤེས་ལ། ཡང་བོད་རྗེ་འཚོལ་བའི་ཤེས་པ་ཅན་མི་བཅུ་གཉིས་ཀྱི་གྲས་སུ་གཙང་ཤེས་སེལ་འདེབས་ཡོད་པར་གཞིགས་ན། དེའི་ཡར་སྔོན་ནས་བསང་གི་ཆོ་ག་ཡོད་པར་རྟོགས་ནུས། འདི་ལ་ཡང་དཔྱད་གཞི་ཧ་ཅང་ཆེ་བར་སེམས་ཏེ། གནའ་རྫས་རྟོག་ཞིབ་པས་ཆབ་མདོའི་ཁ་རུབ་ནས་རྡོ་བརྩིགས་སྒོ་མོ་གཉིས་རྙེད་དེ། བསང་ཁྲི་ཡིན་པར་ངོས་བཟུང་བར་མ་ཟད། ལོ་ངོ་ལྔ་སྟོང་ལྷག་གི་སྔོན་དུ་བོད་ལ་ལྷ་བསང་ཕུད་སྲོལ་པར་བཤད་དོ། །

གཞན་ཡང་། བོད་རྒྱལ་སྲོང་བཙན་སྒམ་པོའི་དུས་སུ། དགྲ་སླེབས་ཚེ་མེ་སྦར་ནས་ཕན་ཚུན་བརྡ་གཏོང་ཞེས་པ་ལྟར། བཙན་པོའི་སྐབས་སུ་དུས་ཟིང་གི་འགྱུར་ལྡོག་གང་འདྲ་ཞིག་ལ་འཕྲད་ཀྱང་། མེ་དང་དུ་བ་ལ་བརྟག་ནས་ཆབ་སྲིད་ཀྱི་བྱ་བ་མཛད་སྲོལ་ཡོད་པས། རིམ་གྱིས་འགྱུར་ནས་ཛ་དྲག་གི་སྐབས་དེར་ལྷ་འབོད་ཀླུ་འབོད་བཏང་ནས་དཀར་བསང་དམར་བསང་ཕུད་སྲོལ་འདི་བྱུང་བར་ཡང་མངོན་ཏེ། དེབ་དཀར་ལས་བཙན་པོ་རྗེ་བློན་རྣམས་ལོ་ལྟར་མནའ་སྐྱེལ་ཞིང་། དེ་དུས་ལུག་ཁྱི་སྤྲེའུ་གསུམ་དམར་མཆོད་དུ་འབུལ། ལོ་གསུམ་རེ་ན་མནའ་ཆེན་སྐྱེལ་ཞིང་། མཚན་གྱི་དགུང་ལ་རྟ་ཕྱུགས་བོང་བུ་རྣམས་དམར་མཆོད་བྱེད། སྲོག་ཆགས་རྣམས་ཀྱི་རྐང་ལག་བཅད་ཅིང་དོན་སྣོད་མདུན་དུ་སྤངས་ཏེ། བན་དྷི་ཞིག་གིས་ཆོ་ག་གཏོང་ཞེས་པ་འདི་ཡང་སྔོན་གྱི་ཚེ་བོད་དུ་ལྷ་བསང་གཏོང་བའི་ཁུངས་ཡིན་པར་དཔྱད་གཞི་ཅུང་ཆེ་བར་སེམས་སོ། །

ཚུལ་དེ་ལྟ་བུའི་ཤན་ཞུགས་ཐེབས་ནས་གླིང་སྒྲུང་འཛམ་གླིང་སྤྱི་བསང་ལས། ཀོང་བོའི་བོན་རི་མཐོན་པོའི་གཡོན་ཕྱོགས། རི་ནག་པོ་དགུ་བརྩེགས་ཀྱི་མདུན་ངོས་སུ། མི་མགོའི་ལབ་ཙེ་རྔམ་པ། པགས་པའི་རླུང་རྟ་གཡོ་བ། རྒྱུ་མ་རློན་པའི་རྨུ་ཐག་འཐེན་པ། ཚིལ་བའི་ཅོད་པན་འཕྱང་བ་ཞིག་བྱས་ཏེ་བདུད་སྲིན་རྣམས་མཆོད། ཅེས་ནག་ཕྱོགས་པ་ལ་སེམས་ཅན་བསད་ནས་དམར་མཆོད་བྱེད་སྲོལ་དར་ལ། དེ་ལས་ལྡོག་སྟེ་གཡུལ་འགྱེད་ཀྱི་ཛ་དྲག་སྐབས། དཀར་ཕྱོགས་པ་མཆོད་ཚུལ་ཡང་ཧོར་གླིང་གཡུལ་འགྱེད་ལས། འདན་མས་ཧོར་དམར་ནག་བཅུ་གཉིས་ཀྱི་ལས་དམག་དེ་ལྟ་བ་མིག་གིས་མི་བཟོད་པ་ཞིག་བྱས་ནས་གླིང་ལ་གཏད་ཡོད་པ་མཐོང་ནས། དེ་རིང་དཔའ་དེ་བྱས་ཅིག་གི་རྟིང་མ་མ་བླངས་ན། ཕོ་ཤི་ལེ་དགུ་བས་མཐུ་བསམས་ནས། ཉིན་རི་ངོས་ནས་བ་ལུ་བཏུས། སྲིབ་རི་ངོས་ནས་ཤུག་པ་བཏུས། ཉིན་སྲིབ་བར་ནས་མཁན་པ་བཏུས་ནས། ལྷ་བསང་སྤྲིན་དཀར་ལངས་འདྲ་ཞིག་བཏང་ནས་དགྲ་ལྷ་དཔངས་བསྟོད་བྱས། ཞེས་པ་ལས་འཚུབ་ཆེ་བའི་སྐབས་སུ་ཅི་འབྱོར་གྱི་དཀར་བསང་ཕུད་སྲོལ་གྱི་རྣམ་པ་ཞིག་མཐོང་ངོ་། །

འོན་ཀྱང་། སློབ་དཔོན་པདྨ་འབྱུང་གནས་ཀྱིས་བསང་རྫས་ལ་དག་ཐེར་དང་། ལྷ་མཆོད་འདྲེ་བཀར་གྱི་མཛད་འཕྲིན་གནང་སྟེ། བསམ་ཡས་ཆོས་འཁོར་བཞེངས་པའི་སྔོན་འགྲོ་སོགས་སུ་བསང་མཆོད་མཛད་དེ་དར་སྤེལ་བཏང་བས། ད་ལྟ་བོད་ཀྱི་སྐྱ་སེར་ཕོ་མོ་ཀུན་གྱིས་ལྷ་བསང་གཏོང་སྲོལ་འདི་བྱུང་བ་ཡིན།

༢ བསང་རྫས། བསང་མེ་ལའང་ཐུའུ་བཀྭན་ཆོས་ཉིས། མེ་ཡང་རྡོ་སོལ་གྱི་མེ་མི་རུང་ཞིང་བ་ལྕི་དང་ཤིང་སོལ་སོགས་ཀྱི་མེ་གཙང་མ་སྟ་གོན་བྱའོ། །ཁྱད་པར་དུ་གཙང་ཕུད་ཡིན་པ་གལ་ཆེ་སྟེ། རྒྱལ་སྲས་འཇིགས་གྲགས་ཀྱིས། མགྲོན་རིགས་དགྱེས་པའི་མཐུན་རྫས་འབྱོར་བཞིན་དུ། །སླ་ཆོས་ཀྱིས་དོར་ཕྱེ་མར་ཅུང་ཟད་ཀྱང་། །རང་ཉིད་ཟ་ཞིང་འཁྱེར་འདོད་ཀྱིས་ཟིན་པས། །མགྲོན་རིགས་དགྱེས་པའི་ལྷ་བསང་འབྱུང་བ་དཀའ། །གསུངས་པས་ཤེས་ལ། ཡོངས་གྲགས་སུ་བསང་རྫས་ལ། རིན་ཆེན་སྣ་ཚོགས་དང་དར་ཟབ་འབྲུ་སྣ། སྨན་སྣ། ཤུག་པ། སྤ་མ། ཙན་དན། ཨ་གར། ཀུར་གུམ། སྤང་སྤོས། རྒྱ་སྤོས། བྲག་སྤོས། ཞོ་ཤ་གསུམ། གེ་སར་གསུམ། འབྲས་བུ་གསུམ། མཁན་པ་རིགས་གསུམ། ད་ལི། སྒྲོན་ཤིང་། སྤེན་དཀར་སོགས་རི་བཟང་བོའི་རྩི་སྔོན་སྣ་ཚོགས་དང་། མར་གྱིས་སྤྲུས་པའི་བསང་རྩམ་དང་། དཀར་གསུམ་མངར་གསུམ་སོགས་ཟས་སྣ་ཚོགས་གཙང་མ་མེར་བསྲེགས་ཏེ། སྤྱན་གཟིགས་མདའ་མདུང་རལ་གྲི་ངར་ཆེན། དར་ཚོན་མདའ་དར། འཕྱར་དར་སྣ་ཚོགས། གོ་ཁྲབ་སོགས་བཤམས། རོལ་མོ་རྔ་དུང་སིལ་སྙན་སྣ་ཚོགས་དཀྲོལ་ཏེ། སྔགས་དང་ཏིང་འཛིན་གྱིས་བྱིན་གྱིས་བརླབས་ནས་འདོད་ཡོན་ཉེར་སྤྱོད་ཀྱི་མཆོད་པ་དང་བཅས་འབུལ་བའོ། །དེ་མཚུངས་སུ་གླིང་སྒྲུང་འཛམ་གླིང་སྤྱི་བསང་ལས། དེའི་དུས་སུ་གླིང་གི་ལྷ་བསང་བ་རྣམས་རྨ་ཀུ་རའི་ལྷ་རི་ཁྱུང་རྩེར་འཚོགས་ཏེ། བསང་མཆོད་བྱས་ཤིང་ཕུན་སུམ་ཚོགས་པའི་བསང་རྫས་ཡངས་ཤིང་རྒྱ་ཆེ་བ་གསོས་ཁར། ཁ་དོག་སྣ་ལྔའི་དར་ཕྲེང་། གཞན་ཡང་མཛེས་སྡུག་གཟུགས་ཀྱི་བྱེ་བྲག སྙན་འཇེབས་རོལ་མོའི་སྒྲ་དབྱངས། རེག་འཇམ་ལྷ་རྫས་ཀྱི་གོས་བཏགས། གྱ་ནོམ་པའི་འདོད་ཡོན་གྱི་རྣམ་པ་འབུམ་ཕྲག་མང་བོས་མཆོད་ཅིང་། གླིང་དཀར་བསང་བ་རྣམས་ཀྱིས་སྐྱིད་པའི་གླུ་བླངས། སྤྲོ་བའི་དར་འཕྱར། སྙན་པའི་དུང་བུས། གསེར་གྱི་རྔ་ཆེན་བརྡུངས་ཤིང་། ཀི་སྭོ་ལྷ་རྒྱལ་གྱི་སྒྲ་སྐད་ལྡིར་ཞིང་མཆོད། ཅེས་བཤད་དོ། །

ཡང་། བྱེ་བྲག་ཏུ་འཕྲིན་ལས་བཞིའི་བསང་ཤིང་གི་དབང་དུ་བཏང་ན། ཀརྨ་ཆགས་མེད་ཀྱིས། སུར་དཀར་དུང་ལོ་ཞི་བའི་ཤིང་། །སྟག་པ་གསེར་ལོ་རྒྱས་པའི་ཤིང་། །ཤུག་པ་ཙན་དན་དབང་གི་ཤིང་། །ཨ་གར་དྲི་དང་དྲག་པོའི་ཤིང་། །ཞེས་དང་། འབུལ་ཡུལ་གྱི་དབང་དུ་བཏང་ན། དེ་ཉིད་ཀྱིས། བ་ལུ་དཀར་བོ་ལྷ་ཡི་ཤིང་། །འོམ་བུ་ཀླུ་ཤིང་སྨན་གྱི་མཆོག། སྟག་པ་སེར་བོ་གཉན་གྱི་ཤིང་། །སྤེན་མ་དངོས་གྲུབ་གཡུང་དྲུང་ཤིང་། །ཉ་བྲིད་ས་བདག་དགའ་བའི་ཤིང་། །ཞེས་ཀྱང་གསུངས་སོ། །དེ་ཡང་མཆོད་གཏོར་བཅའ་ཚུལ་དང་། བསང་བསྔོའི་སྔགས་འགྲེལ། བསང་རྫས། ཡས་མགྲོན་དང་མས་མགྲོན་གྱི་ཁྱད་པར། བསང་གི་དག་སྦྱོར། མཆོད་ཚུལ། མཇུག་ཏུ་གསེར་སྐྱེམས་འབུལ་བ་དང་། གཡང་འགུགས་དང་བཟོད་གསོལ་སོགས་ཞིབ་པར་ཐུའུ་བཀྭན་ཆོས་ཉིའི་བསང་ཆོག་བཀྲ་ཤིས་དབྱངས་སྙན་གྱི་ལྷན་ཐབས་བཀྲ་ཤིས་སྒོ་བརྒྱ་འབྱེད་པའི་ལྡེ་མིག་ལས་རྟོགས་པར་གྱིས་ཤིག

གཞན་ཡང་། ཆོས་སྲུང་དང་ཡུལ་ལྷ་རེ་རེ་ལ་གཏོར་མ་མི་འདྲ་བ་བཅའ་སྟངས་དང་། བསང་རྫས་ལ་ཡུལ་ལུགས་སོ་སོའི་ཁྱད་ཆོས་རེར་ཡང་ཡོད་ལ། ད་ལྟ་ལྟ་ངན་རེའི་ཤན་ཞུགས་ཐེབས་ཏེ། སེམས་ཅན་གྱི་གསོན་སྙིང་དམར་འདོན་བྱེད་པའམ། གསོལ་བ་བོའི་ལུས་ཀྱི་ཁྲག་གཏར་སྟེ་དམར་མཆོད་བྱེད་པ་ནི། ནང་བསྟན་ཆོས་ལུགས་དང་རྒྱབ་འགལ་ཏུ་གྱུར་བར་མ་ཟད། ད་ལྟའི་དུས་རབས་འདིར་འཇིག་རྟེན་མི་ཆོས་དང་ལྟག་སྤྲོད་ཏུ་སོང་བས་དགག་བྱ་ཁོ་ནའོ། །

ཡང་། ཞང་བོད་ཏི་སེའི་འོད་ཅེས་པར། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་འབྱུང་བར་གཞིགས་ན། ད་ལྟའི་བསང་རྫས་སུ། ནས་བརྔོས་པ་ལ་ཨ་མདོའི་སྐད་དུ་ཤེར་རྩིག་ཏུ་འབོད་པ་འདི་ཁྲག་གི་སྐད་དོད་ཤེ་ཚུ་བྱ་བ་དེ་བརྡ་ཟུར་ཅུང་ཟད་མ་གཏོགས་མ་འགྱུར་བར་ཡོད་ལ། སྔོན་གྱི་བག་ཆགས་ཀྱི་དབང་གིས་ནས་བརྔོས་ཚེ་མདོག་དམར་ནག་ཏུ་གྱུར་བའི་ཆ་ནས་ཁྲག་ཚབ་ཏུ་ལྷ་སྲུང་ལ་ཕུལ་བར་འདོད་དོ། །དེའི་ཤེས་བྱེད་ནི་ཀརྨ་ཆགས་མེད་ཀྱིས། ཤེལ་ཚིག་ཁྲི་དཀར་སྟོང་ནག་འདི། །རྟ་ནོར་ལུག་གསུམ་ཁྱུ་རུ་དམིགས། །ཞེས་དང་། ཤེལ་ཚིག་ཁྲི་དཀར་སྟོང་ནག་འདི། །ཁྲ་བོ་ཀུ་རུ་རྟ་བརྒྱ་ཡིན། །ཁམ་པ་འགྱིང་བ་གཡག་བརྒྱ་ཡིན། །ཟིལ་ཆུང་ཐུ་ལེ་འབྲི་བརྒྱ་ཡིན། །དཀར་བ་གཡང་མོ་ལུག་བརྒྱ་ཡིན། །གཡུ་ར་བརྒྱ་དང་ཤེལ་ར་སྟོང་། །བ་ཟོག་བརྒྱ་དང་བེའུ་ཁྲི་སྟོང་། །ས་བདག་ཀླུ་གཉན་རྣམས་ལ་འབུལ། །ཞེས་དང་། ཨ་ལགས་རྒྱལ་བོའི་ལབ་བསྟོད་དུའང་། ཀྱེ་ཀྱེ། ཤེལ་ཚིག་ཁྲི་དཀར་སྟོང་ནག་འདི་དག་ནི། །དཀར་མོ་ལུག་བརྒྱའི་འབའ་སྒྲ་འུ་རུ་རུ། །ནག་མོ་འབྲི་བརྒྱའི་ངུར་སྒྲ་ཏོངས་སེ་ཏོང་། །ཁྲ་བོ་རྟ་བརྒྱའི་འཚེར་སྐད་སི་ལི་ལི། །ཞུར་བོ་ར་བརྒྱའི་འབའ་སྒྲ་ཙེར་རེ་རེ། །འབུལ་ལོ་ས་བདག་ཀླུ་གཉན་རྣམས་ལ་འབུལ། །ཞེས་དང་། དེ་མིན། ཀརྨ་ཆགས་མེད་ཀྱིས། ཁྱད་པར་རྟ་གླང་ར་ལུག་དང་། །མཛོ་གཡག་སྦལ་སྦྲུལ་ལ་སོགས་དང་། །ཞེས་སྦལ་སྦྲུལ་སོགས་ཀྱང་བསང་རྫས་སུ་བཤད་ཀྱང་དེ་ནི་བོད་སྲོལ་དུ་མ་དར་བ་ཞིག་གོ།

༣ བསང་རྫས་མ་དག་པའི་ཉེས་དམིགས། བསང་རྫས་མ་དག་ན་ཇི་སྐད་དུ། རྒྱལ་སྲས་འཇིགས་མེད་ཡེ་ཤེས་གྲགས་པའི་གསུང་ལས། གཙང་མིན་དབྱེ་བ་མེད་པའི་གང་བྱུང་ནས། །རྣམ་རྟོག་རྩིང་བོས་བསྒྲུབས་པའི་བསང་ཤིང་རྣམས། །གང་བྱུང་གནས་སུ་འོང་བའི་མི་གཙང་བ། །འབུ་སྲིན་མང་བོ་བཅས་ཏེ་བསྲེགས་པ་མཐོང་། །མི་གཙང་གིས་བགོས་རྡོག་པས་བརྫིས་པ་ཡི། །བསང་ཤིང་དུད་པས་སླར་ཡང་འབག་བཙོག་འགྱུར། །འབུ་སྲིན་མང་བོར་བཅས་ཏེ་བསྲེགས་པ་ཡིས། །གཞོབ་དང་སྡིག་ཚོགས་སྒྲུབ་པའི་བསང་དེ་དོར། །ཞེས་དང་། ར་ག་ཨ་སེས་མདོ་སྡེ་བཀའ་གཏེར་གཉིས་པ་ལས་བསྡུས་པ་བསང་ཤེས་པའི་ཕན་ཡོན་དང་མ་ཤེས་པའི་ཉེས་དམིགས་གསལ་བར་བཀོད་པ་ལས། བསང་དང་ཆབ་གཏོར་ལའང་མ་ཚར་བར་དུ་ཤ་ཁྲག་དང་། ཆང་སྒོག་སོགས་བཟའ་བ་དང་བཏུང་བ་སོགས་བྱས་ན་གཞི་བདག་ཐམས་ཅད་བརྒྱལ་ནས་འགྲོ་བས་མི་རུང་། བསང་རྫས་རྣམས་ལ་དམེ་ཕོ་སྡིག་ཅན་གྱིས་བསང་ཤིང་ཐུ་བ་དང་། ཡུགས་ས་མས་ཕྱེ་ཕུད་འཐག་པ་དང་། སེར་སྣས་འབག་པ་དང་། མི་གཙང་བའི་རྫས་དང་། ཚེར་མ་ལ་སོགས་པ་དུག་ཤིང་ལ་འཛེམ། ཆོ་ག་གཞན་མ་ཤེས་པ་ལ་སྐྱོན་འགལ་ཆུང་། བསང་མ་ཤེས་ན་འཇིག་རྟེན་ཁམས་ཀྱི་གཞི་བདག་ཕྲག་དོག་ཆེ། ཀླུ་དང་ས་བདག་གཉན་རྣམས་ལ་མཐོང་དུག་དང་། བལྟས་དུག ཁ་རླངས་ཀྱི་དུག་སོགས་ཡོད་པས་དམིགས་རིམ་དང་ཆོ་ག་ཤེས་པ་གལ་ཆེ། གཞན་ཡང་། ར་ག་ཨ་སེའི་བསང་བཤད་དེར། ཉིན་ཞིག་ཁོའི་ཉམས་སྣང་ལ་གཞི་བདག་མང་བོས་འོ་དོད་བོས་ཏེ། བརྒྱལ་བ་དང་། ན་བ། ཞ་བ་དང་། ལོང་བ། ལུས་ལ་རྣག་ཁྲག་ཆུ་སེར་བབས་ནས་ངུ་འབོད་བྱེད་པ་མཐོང་བར། རྒྱུ་མཚན་དྲིས་པས། ཁོ་ཚོ་དམ་ཉམས་སྔགས་པ་ཞིག་གིས་བསང་མགྲོན་དུ་བཀུགས་པས། དམེ་ཅན་ཞིག་གིས་བསང་ཤིང་འཐུས་པ་དང་། རྩི་བཅུད་འོ་ཞོ་ལ་མི་དང་ཁྱི་དམར་ཞིག་གིས་འཐུང་འཕྲོ་དང་། མར་ལ་བུད་མེད་ཅིག་གིས་མཚན་མར་རེག་ནས་ལག་པ་མ་བཀྲུས་པ་སོགས་ཀྱི་རྐྱེན་འགའ་ལས་ཉེས་ཚུལ་གསུངས་པ་ལྟ་བུའོ། །ཁྱད་པར་དུ་ཀླུ་དང་ས་བདག་ལ་དཀར་མཆོད་ཡིན་པས། མཆོད་པ་པོས་དཀར་ཟས་ལ་རོལ་ནས། གཙང་སྦྲ་སྔོན་དུ་བཏང་ནས་ཁྲུས་དང་གོས་དཀར་བོ་གྱོན་ནས་དཀར་མཆོད་བྱེད་པ་ལས། ཤ་ཆང་སྒོག་ཙོང་སོགས་ཀྱིས་སྦགས་ཏེ་ཀླུ་བསང་གཏོང་བ་མི་རུང་ངོ་། །

༤ བསང་གི་དབྱེ་བ། ཡུལ་སྲོལ་འདྲ་མིན་གྱི་དབང་གིས་བསང་གི་དབྱེ་བ་ལ་སྣ་ཚོགས་མཐོང་སྟེ། རི་བསང་དང་། གྲོང་བསང་། ཐབ་བསང་། ལམ་བསང་། ཐོག་བསང་རྣམས་སུ་མ་འདུས་པ་མེད། ༡ རི་བསང་ནི། རི་མཐོ་ས་གཙང་ངམ་ཁ་དབུགས་དྭངས་པའི་ཡུལ་ལྷ་གཞི་བདག་གི་གནས་རིར་བསང་མཆོད་ཀྱི་ཆོ་ག་བྱེད་སྲོལ་ཡོད་པ་དེ་ཡིན། ༢ གྲོང་བསང་ནི། གྲོང་དང་གྲོང་ཁྱེར་གྱི་ལྷ་ཁང་མདུན་ནས་བསང་མཆོད་བྱེད་སྲོལ་ཡོད་པ་དེ་ཡིན་ལ། དཔེར་ན། ལྷ་སའི་ཇོ་ཁང་གི་མདུན་ནས་བསང་མཆོད་བྱེད་པ་ལྟ་བུའོ། །༣ ཐབ་བསང་ནི། གནས་མཇལ་བ་དང། ཚོང་འགྲུལ། ཇག་ལས་བྱེད་པ་སོགས་ཀྱིས་ལག་ལེན་དུ་བསྟར་བ་སྟེ། ཇ་བསྐོལ་རྗེས། སུམ་ཚུགས་ཐབ་རྡོའི་བར་དུ་བསང་རྩི་གཞན་འབྱོར་ན་རབ། མ་འབྱོར་ན་རྩམ་པ་ཉུང་ཤས་ཀྱིས་བསང་གསོལ་གཏོང་སྟངས་དེའོ། །༤ ལམ་བསང་ནི། སྐུ་གསུང་ཐུགས་རྟེན་གདན་འདྲེན་པ་འམ། ཡང་ན་བླ་དཔོན་བསུ་སྐྱེལ་སྐབས་ཕེབས་ལམ་དུ་བསང་གསོལ་གཏོང་བ་དེའོ། །༥ ཐོག་བསང་ནི། ཁང་ཐོག་ནས་བསང་མཆོད་བྱེད་པ་དེའོ། །

༥ ལྷ་བསང་གཏོང་ཡུལ་དང་དགེ་མཚན། ལྷ་བསང་གཏོང་ཡུལ་ལ། རྒྱལ་དབང་ལྔ་བས། སྤངས་རྟོགས་ཡོན་ཏན་ཕ་མཐའ་གཞལ་དཀའ་ཡང་། །ཡེ་ཤེས་ལྷ་ཡི་ཚད་བཟུང་ག་ལ་ནུས། །གྱ་གྱུའི་སེམས་ཀྱི་རོལ་བ་མཐའ་ཀླས་པས། །འཇིག་རྟེན་ལྷ་འདྲེའི་གྲངས་ཀྱང་ག་ལ་གཞལ། །ཞེས་གསུངས་ལ། སྡོམ་དུ་བསྡུས་ནས་སྨྲས་ན། དཀོན་མཆོག་སྲི་ཞུའི་མགྲོན། མགོན་པོ་ཡོན་ཏན་གྱི་མགྲོན། རིགས་དྲུག་སྙིང་རྗེའི་མགྲོན། གདོན་བགེགས་ལན་ཆགས་ཀྱི་མགྲོན་ཏེ་བཞིར་འདུས་ལ། དེ་ཡང་མཆོག་ལ་མཆོད་པ་དང་། དམན་པར་སྦྱིན་པ་གཏོང་བ་ཡིན། མགྲོན་ཡུལ་གྱི་ཁྱད་པར་ཞིབ་རྒྱས་ཐུའུ་བཀྭན་བསང་ཆོག་ལས་གསལ་ལ། དེ་དག་ལས་གང་གཙོ་བྱེད་པ་ནི། རྒྱལ་དབང་ལྔ་བས། དེང་དུས་ལྷ་ཀླུ་ཞར་བྱུང་ཙམ་བྱས་ནས། །བླ་མ་ཡི་དམ་གཙོར་བཏོན་བསང་ཡིག་རྣམས། །དགོས་དོན་མ་རྟོགས་གྱ་ཚོམ་སྨྲ་བའི་ཚིག །མཆོད་རྟེན་ནག་འཇམ་བྲག་ལ་དཀར་རྩི་བཞིན། །ཞེས་ཀྱང་གསུངས་སོ། །དེ་ལས་གཞན་ལྷ་བསང་གཏོང་བ་ནི། མཁས་གྲུབ་ཀརྨ་ཆགས་མེད་ཀྱིས། དེ་ཡང་ཕྱི་རབས་རྣལ་འབྱོར་བས། །གང་འདོད་འཕྲིན་ལས་བསྒྲུབ་པ་དང་། །སངས་རྒྱས་བསྟན་པ་བསྲུང་བ་དང་། །སྒྲུབ་པའི་བར་ཆད་སེལ་བ་དང་། །འཁོར་སྲུང་རྐྱེན་བཟློག་གྲགས་པ་སྤེལ། །ལྷ་ཁང་བཞེངས་དང་མཆོད་རྟེན་བརྩིགས། །མི་ནད་ཡམས་ནད་བཅད་པ་དང་། །མཁར་ལས་བྱེད་དང་བཀྲ་ཤིས་འདོད། །ཐག་རིང་མགྲོན་ལ་འགྲོ་བ་དང་། །ཆུ་ཆེན་གྲུ་ལ་འགྲོ་བ་དང་། །ལམ་འཕྲང་བསྒྲོད་དང་དམག་ལ་འགྲོ། །ལྷོ་བལ་སྦས་ཡུལ་འགྲོ་བ་དང་། །ཆེ་དྲག་བྱ་བ་ཐམས་ཅད་ལ། །སྔོན་དུ་བརྔན་འདི་བྱས་པས་འགྲུབ། །ཅེས་སོ། །

༦ བསང་ཡུལ་སྤྱན་འདྲེན་པའི་ཚུལ། བསང་མགྲོན་ཐམས་ཅད་སྤྱན་དྲངས་པ་དང་དུས་མཚུངས་སུ། འཁོར་འདས་ཀྱི་མགྲོན་ཐམས་ཅད་སྟེང་ནས་སྤྲིན་འཐིབས་པ་དང་ཁ་བ་བུ་ཡུག་འཚུབ་པ་ལྟ་བུ། འོག་ནས་ས་ཆེན་པོའི་རླངས་པ་ཐོན་པ་ལྟ་བུ་འུར་གྱིས་བྱོན་པའི་མོས་པ་དང་། འཇིག་རྟེན་པ་རྣམས་ཀྱང་གདུག་རྩུབ་ཀྱི་སེམས་ཞི་ནས་རང་ལ་དགའ་ཞིང་དགུ་བའི་རྣམ་པར་བསམ་པ་དང་། དེ་ཡང་སྟེང་གི་ཆ་ལ་བླ་མ། དེའི་འོག་ཏུ་ཡི་དམ་རྣམས་རྒྱུད་སྡེ་གོ་རིམ་བཞིན་དང་། དེའི་འོག་ཏུ་ལོངས་སྤྲུལ་གྱི་སངས་རྒྱས་རྣམས། དེའི་འོག་ཏུ་བྱང་སེམས་རང་རྒྱལ་ཉན་ཐོས་དཔའ་བོ་མཁའ་འགྲོ་ཆོས་སྐྱོང་སྲུང་མ་རྣམས། དེ་དག་གི་འོག་ཏུ་དཔལ་མགོན་དོན་ལྔ། སྡེ་བརྒྱད། འགོ་བའི་ལྷ་ལྔ་སོགས་དང་། ལོ་ཟླ་ཞག་དུས་སྤར་སྨེ། ས་བདག་ཡུལ་ལྷ་གཞི་བདག་རྣམས་དང་། འོག་གི་ས་གཞི་ལ་རིགས་དྲུག་གདོན་བགེགས་ལན་ཆགས་ཤ་འཁོན་གཉེར་བ་ཐམས་ཅད་ནག་མེར་གྱིས་འཁོད་པར་བསམ་པ་དང་།

ཡང་ན། གཏེར་མའི་ཆོག་བསྒྲིགས་རྣམས་སུ། སྤྱན་རས་གཟིགས་ཨ་རོ་ལི་ཀ་ཁ་སརྦ་ནི་ལྟ་བུ་སྐུ་ཤིན་ཏུ་ཆེ་བ་རྣམ་སྣང་གངས་ཅན་མཚོ་འདྲ་བའི་གཙུག་ཏོར་ནས་མགྲིན་པའི་བར་ལ་དཀོན་མཆོག་སྲི་ཞུའི་མགྲོན། ཐུགས་ཀ་ནས་ལྟེ་བའི་བར་ལ་མགོན་པོ་ཡོན་ཏན་གྱི་མགྲོན། སྐུ་སྨད་ཀྱི་ཆ་ལ་རིགས་དྲུག་སྙིང་རྗེའི་མགྲོན། པད་གདན་གྱི་ཆ་ལ་བགེགས་རིགས་ལན་ཆགས་ཀྱི་མགྲོན་རྣམས་འཁོད་པར་བསམ་པ་ཡང་བཤད་དོ། །

༧ བསང་གི་དག་སྦྱོར། ལྕང་སྐྱ་རོལ་བའི་རྡོ་རྗེས་མཛད་པའི་བསང་མཆོག་ཡིད་བཞིན་དབང་རྒྱལ་ལས། ཐབས་དང་ཤེས་རབ་ཡེ་ཤེས་མེར། །སྒྲིབ་གཉིས་བསང་རྫས་བསྲེགས་པ་ལས། །ལྷན་ཅིག་སྐྱེས་དགའི་དུད་སྤྲིན་གྱིས། །མ་དག་དྲི་མ་སངས་ཕྱིར་དུ། །སྤྱན་སོགས་ལྔ་ཡི་རང་བཞིན་ཉིད། །འབྱུང་བ་ལྔ་ཡི་དྭངས་མ་ལས། །འཆི་མེད་བདུད་རྩིའི་དཔལ་རབ་སྟེར། །དྲི་ཞིམ་སྨན་གྱི་དངོས་གྱུར་བ། །རྩི་ཤིང་ནགས་ཚལ་སྣ་ཚོགས་འཁྲུངས། །ཁ་དོག་དྲི་རོ་མཐའ་ཡས་ཀྱིས། །ནད་རིགས་བཞི་བརྒྱ་རྩ་བཞི་སེལ། །གསེར་ཞུན་འཁྱིལ་འདྲའི་མེ་ལྕེ་ཡིས། །གཏི་མུག་མུན་པའི་ཚོགས་ཀུན་འཇོམས། །དུད་སྤྲིན་འཆི་མེད་ལམ་ཆགས་པས། །སྡུག་བསྔལ་གསུམ་གྱི་ཚ་གདུང་སྐྱོབ། །ཅེས་གསུངས་སོ། །

༨ ལྷ་བསང་གཏོང་བའི་གཟའ་སྐར། ལྷ་བསང་གི་སྐར་མ་ནི། མོན་གྲེ མེ་བཞི། མོན་གྲུ། མགོ མཆུ། ལྷ་མཚམས། ཆུ་སྟོད། ཆུ་སྨད། དབོ། ས་རི། ནམ་གྲུ། སྣར་མ། རྒྱལ། བྱི་བཞིན། ཁྲིམས་སྨད། སྨིན་དྲུག་རྣམས་ལ་བཟང་། དེ་ལྟར་བཀྲ་ཤིས་པའི་ཉི་མ་དང་འགྲུབ་པའི་སྦྱོར་བ། ཡར་ཚེས་དང་དུས་ཆེན་བརྒྱད་ལ་ཐེབས་ཡོད་པས་ལྷ་མཆོད་བཟང་། གཞན་ཡང་། ར་ག་ཨ་སེས། ཉི་ནག་བསང་བྱས་ཁྱི་ཡིས་གཡབ། །ཤར་ཕྱོགས་དམག་དྲངས་བསྟན་ལ་གནོད། །ཅེས་དང་། ཉི་མ་ནག་པོར་བསང་བྱས་ན། །ལྷ་འདྲེ་ཐམས་ཅད་འཁྲུག་པའི་གཞི། །སྟག་གི་ཉི་མར་བསང་བྱས་ན། །ལྷ་འདྲེ་ཁྲོས་ནས་ན་ཤི་དུར་གསུམ་འོང་། །ལྷ་ཀླུ་སྡེ་བརྒྱད་ལྡོག་ནས་ཕན་གནོད་མེད། །དེ་སོགས་རིགས་པས་དཔྱད་ལ་བྱོལ་བར་བྱ། །ཞེས་དང་། བསང་མི་རུང་བ་མེ་དུད་སོལ་གསུམ་ཡིན། །བསང་བྱས་བར་སྣང་ལྷ་སྲིན་ཐམས་ཅད་ལ། །མེ་ཆེན་སྣང་བ་འབྱུང་ལ་ཉེས་པ་ཆེ། །ཚེས་གཅིག་བསང་བྱས་དམེ་ངོ་ཁྲག་ངོ་གྲི་ངོ་ལྡང་། །ཚེས་དྲུག་བཅུ་དྲུག་ཉི་ཤུ་དྲུག་རྣམས་ལ། །རི་མགོར་བསང་བྱས་ལྷ་རྣམས་མི་དགའ་བས། །ལོ་ཐོག་མི་ལེགས་རྐྱེན་དུ་འགྱུར་བ་ཡིན། །ཞེས་གསུངས་ལ། རྒྱུན་བསང་ལ་ནི། ར་ག་ཨ་སེས། རྒྱུན་བསང་ཆག་མེད་ལ་ནི་བརྩི་སྲོལ་མེད། །བསང་བརྒྱ་བཏང་བ་རྒྱུན་བསང་དབུ་འཛུགས་ལ། །སྐར་སྐྱོན་མེད་ཅིང་གཟའ་སྐར་བཟང་བ་གཅེས། །གསུངས་སོ། །

༩ ལྷ་བསང་གི་ཕན་ཡོན། བསང་གི་ལྷ་མོ་སྔོན་མོས་གཡས་བདུད་རྩིའི་བུམ་པ་དང་། གཡོན་གྱི་སྨན་གཞོང་འཛིན་པའི་བུམ་པ་ནས་བདུད་རྩིའི་ཆབ་རྒྱུན་གཏོར་ཏེ། མི་གཙང་བ་སངས་ཞིང་དག་ནས། མཆོད་པའི་སྤྲིན་ཕུང་གི་དྲི་བཟང་ཕྱོགས་ཐམས་ཅད་དུ་ཁྱབ་ནས་བསང་ཡུལ་བླ་མ་ཡི་དམ་དང་། སངས་རྒྱས་བྱང་སེམས། དཔའ་བོ་མཁའ་འགྲོ། ཆོས་སྐྱོང་སྲུང་མ། ཡུལ་ལྷ་གཞི་བདག་ཐུགས་དགྱེས་པ་ཆེན་པོས་སྡོང་གྲོགས་དང་ཕན་པ་རྒྱ་ཆེན་སྩོལ་བ་དང་། སྤྱིར་ཉེས་སྐྱོན་དང་ཁྱད་པར་དུ་གྲིབ་དང་མི་གཙང་བའི་རིགས་དག་སེལ་བྱེད་ནུས་པ་སྟེ། ཀུན་བཟང་བསང་ནག་ལས། དམེ་རྨུགས་ནད་འཚེ་མཛེ་ཡུག་དང་། །གསོན་གྱི་བང་དམེ་ཁྲག་རླངས་དང་། །གཤིན་གྱི་རོ་དུད་རོ་ལངས་སོགས། །མི་གཙང་དམེ་དགུ་ཅི་ཡང་ཤར། །འབྱུང་བ་དུག་སེལ་འདི་ཡིས་ཐུར་དུ་མནན། །ཞེས་དང་། བསང་རྒྱུད་ལེའུ་བཅོ་བརྒྱད་ལས། སྔགས་དང་ཆོ་ག་དག་ན་ལྷ་དང་བླ་མ་མཉེས་ནས་བྱིན་རླབས་འཇུག ཡི་དམ་མཉེས་ནས་དངོས་གྲུབ་འབྱུང། ཆོས་སྐྱོང་དམ་ཅན་མཉེས་ནས་ལས་བཞི་འགྲུབ། ནོར་ལྷ་གནོད་སྦྱིན་མཉེས་ནས་བཅུད་སྟོབས་རྒྱས། རིགས་དྲུག་སེམས་ཅན་ཚིམ་པས་བུ་ལོན་ལན་ཆགས་བྱང་། ཞེས་དང་། སེམས་བསྐྱེད་དམིགས་པ་གསལ་ན་ལེགས་ཚོགས་ཡོན་ཏན་འགྲུབ། །ཉེས་ཚོགས་དག་ནས་རྣམ་མཁྱེན་སངས་རྒྱས་འཐོབ། །འབྱོར་བ་ལོངས་སྤྱོད་རྒྱུན་མི་ཆད་པར་འཕེལ། །སྔགས་དང་མཆོད་རྫས་གཙང་ན་བསོད་ནམས་ཀྱི། །གཞི་མ་ཚོགས་གཉིས་རྫོགས་ནས་སྒྲིབ་པ་བྱང་། །ཕར་ཕྱིན་དྲུག་རྫོགས་མདངས་དང་གཟི་བརྗིད་རྒྱས། །འཐབ་རྩོད་དང་བྲལ་མི་ནད་ཕྱུགས་ནད་ཆད། །བཙའ་སད་སེར་བ་ཐན་པ་ལོ་ཉེས་ཞི། །རྩྭ་དང་ལྗང་བུ་ལེགས་ཤིང་ལོ་འབྲས་འཕེལ། །བཀྲ་ཤིས་དོན་འགྲུབ་དགྲ་གདོན་ཐུལ་བ་དང་། །ཚོང་དང་ཁེ་སྤོགས་དམག་ཇག་དགྲ་ལས་རྒྱལ། །འགྲོ་དོན་རྒྱ་ཆེན་འགྲུབ་པ་བསམ་འཕེལ་ནོར་བུ་འདྲ། །ཞེས་དང་། ཞུ་ཆེན་ཚུལ་ཁྲིམས་རིན་ཆེན་གྱིས་ཀྱང་། དག་བྱེད་དྲི་ཞིམ་ཆོ་ག་གང་ཞིག ཉེས་སྐྱོན་སྒྲིབ་བྱེད་ཐམས་ཅད་བྱང་ཞིང་། བདེ་ལེགས་སྟེར་བའི་ནུས་པ་དང་ལྡན་པ། བསང་གི་མཚན་ཉིད་དུ་བཞག་པ་དེའོ། །ཞེས་དང་། འཇུ་མི་ཕམ་གྱིས། འདི་ཡིས་རླུང་རྟ་རྒུད་པ་གསོ། །དགེ་མཚན་རྟེན་འབྲེལ་ཕྱོགས་མེད་རྒྱས། །སྙན་གྲགས་རྒྱལ་མཚན་སྲིད་ན་མཐོ། །མཆོག་ཐུན་དངོས་གྲུབ་ཡིད་བཞིན་འགྲུབ། །ཅེས་ཀྱང་གསུངས་ལ། གཞན་བསང་མཆོད་འགའ་ཞིག་ཏུ། རྣལ་འབྱོར་བའི་རྟོགས་པ་ལ་བག་ཐོན་པའི་ཐབས་སུ་འང་གསུངས་སྟེ། ཡོངས་གྲུབ་བདེ་གཤེགས་སྙིང་བོ་ལ། །ཀུན་བཏགས་གྲིབ་ཀྱིས་ཕོག་པ་བསང་། །འཁོར་འདས་བདེ་བ་ཆེན་པོ་ལ། །གཟུགས་འཛིན་གྲིབ་ཀྱིས་ཕོག་པ་བསང་། །ཞེས་དང་། བསང་ཤིང་ཤུག་པ། མཁན་པ། བ་ལུ་གསུམ་སྲེག་པའི་ཕན་ཡོན་ཡང་། ཐུའུ་བཀྭན་བསང་ཆོག་ལས། འཆི་བ་མེད་པའི་ཡོན་ཏན་བདུད་རྩིའི་ཤིང་། །དྲི་ཞིམ་སྤོས་ངད་དུད་སྤྲིན་ནམ་མཁར་འཁྲིགས། །ལྷ་འདྲེ་མི་གསུམ་རྨུགས་ཤིང་འཐིབ་པ་སེལ། །འོད་གསལ་མེ་ལྕེའི་འོད་གསལ་ཕྲེང་བར་འཕྲོ། །མ་རིག་རྨོངས་པའི་མུན་ནག་ཐམས་ཅད་སེལ། །མེ་སྟག་ཚ་ཞིང་བསྲེག་པའི་ངར་ལྡན་པས། །མནོལ་ནག་མི་གཙང་ལྗིན་ལྗིན་སྲེག་པར་བྱེད། །དེ་ལྟར་ཡོན་ཏན་ཁྱད་འཕགས་ཤིང་གསུམ་འདི། །ཞེས་དང་། བསང་ཤེས་པའི་ཕན་ཡོན་དང་མ་ཤེས་པའི་ཉེས་དམིགས་གསལ་བར་བཀོད་པ་ལས་ཁོང་གི་ཉམས་སྣང་ལ་ཆབ་མདོའི་ཕོ་བྲང་གི་དབུས་ནས་བསང་དུད་བཏང་བས། མཐོ་སྲིད་པའི་རྩེ་མོ་ནས་འོག་དམྱལ་ཁམས་བཅོ་བརྒྱད་རིགས་དྲུག་གི་སྡུག་བསྔལ་སེལ་བ་དང་། ཅི་འདོད་འཐོབ་ཚུལ་དང་། བསང་གི་དྲི་ཚོར་བ་ཙམ་གྱིས་ན་བ་སོས། ཞ་བ་དྲག འོན་པས་ཐོས། ལོང་བས་རིག ལྐུགས་པས་སྨྲ་ཤེས་ཚུལ་སོགས་རྒྱ་ཆེར་བསྟན་ཡོད།

སྤྱིར་ན་དེང་སང་བསང་མཆོད་འདི་བོད་མིའི་ཡུལ་སྲོལ་ཞིག་ཏུ་འཛིན་པ་ཤས་ཆེ་ཡང་། དེ་ལས་ཀྱང་གལ་ཆེ་བ་ནི་ལུས་ངག་ཡིད་གསུམ་གྱི་ལས་འབྲས་ཀྱི་རྟེན་འབྲེལ་ཚད་ལྡན་བྱེད་པ་འདི་གལ་ཆེ་སྟེ། ཇི་སྐད་དུ། སྣང་སྲིད་ལྷ་འདྲེ་སྡེ་བརྒྱད་ཀུན། །རང་སེམས་ཡིན་པར་ཐག་ཆོད་ཀྱང་། །བསང་མཆོད་དཀར་གཏོར་བསྔོ་བ་སོགས། །རྟེན་འབྲེལ་ཁྱད་དུ་མི་གསོད་པ། །འདི་ཡང་རྒྱུད་ཀྱི་དགོངས་པ་ཡིན། །ཞེས་གསུངས་པ་ལྟར། མཚན་ཡིག་རྣམས་སུའང་། ཆོས་ཀྱི་ལས་དང་འགལ་བའི་སྤྱོད་པ་དག། ལྷ་ལ་གསོལ་མཆོད་བགྱིས་པའི་ཅི་ལ་ཕན། །ལུས་ངག་ཡིད་ཀྱི་སྤྱོད་པ་ཚད་ལྡན་ན། །མཆོད་གསོལ་སྨོན་པའི་སྦྱོར་བ་དེ་ཡིས་འཐུས། །ཞེས་དང་། ཁྱད་པར་དུ་ཆོས་པ་ཚད་ལྡན་ཞིག་ཡིན་ན། ལྷ་བསང་ལ་དེ་འདྲའི་དོ་སྣང་མི་བྱེད་དེ། དཔེར་ན། བཀའ་གདམས་གོང་མ་རྣམས་དང་རྗེ་ཡབ་སྲས་རྣམས་ཀྱིས་བསང་ཆོག་ཕྱག་བཞེས་མཛད་མི་འདུག་ཅིང། པཎ་ཆེན་བློ་བཟང་ཆོས་རྒྱན་གྱིས། ཚོགས་ཀྱི་ཞིང་མཆོག་བླ་མ་ཡི་དམ་ལ། །གཙོ་བོར་མི་བྱེད་འཇིག་རྟེན་དྲེགས་པ་ཡི། །མིང་སྤེལ་དོ་ཤལ་རིང་བོས་མགྲིན་འཁྱུད་པ། །དེ་དག་གཤེན་རབ་བོན་པོའི་རྣམ་ཐར་ཡིན། །ཞེས་ཀྱང་གསུངས་སོ། །

༩ བསང་ལ་བརྟག་ཚུལ། ལྷ་བསང་ལ་བརྟག་ཚུལ་ཞིག་འཇུ་མི་ཕམ་གྱིས﹙ལྕགས་པར་དེབ་གྲངས་བཅུ་དགུ་ཤོག་ངོས༣༨༠ནས༣༨༡ བར﹚གསུངས་པ་འདིར་བཀོད་ན། དེ་ཡང་བསང་ཕོར་གྱི་ནང་དུ་བདུད་རྩི་ཅན་གྱི་ཤིང་གསུམ་ཧ་ཅང་མི་མང་ཧ་ཅང་མི་ཉུང་བ་དང་འོ་སྐོལ་བསྲེགས་ལ་ཆབ་བྲན་ནས་བཞག་པས། དུ་བ་ལེགས་པར་འཐུལ་ཞིང་འབར་སྐྱེན་ན་རླུང་རྟ་དར། དོན་འགྲུབ་པ་ལ་ཚེགས་མེད། ཤིན་ཏུ་འབར་དཀའ་ན་དོན་མི་འགྲུབ། དུ་བ་གྱེན་དུ་དྲང་ཐལ་ལེ་འགྲོ་བ་རླུང་རྟ་དར་བའི་རྟགས། གཡས་སུ་འཁྱིལ་ཞིང་ཕྱུར་ཕྱུར་འགྲོ་ན་ཕོ་ལྷ་དར། གཡོན་དུ་འཁྱིལ་ཞིང་དལ་བ་མཛེས་ན་ཕུག་ལྷ་ལྷ་མོ་དགྱེས། ཁ་དོག་དཀར་ན་ལྷ་ལ་མནོལ་བག་མེད་པས་ངོ་སོ་མཐོ། སྔོན་པོ་མཐིང་འོད་འཚེར་ན་བཟང་། སྔོ་དམར་བྱུང་ན་ལྷ་འཁྲུགས་ངོ་། དབྱིབས་བཀྲ་ཤིས་པའི་རྫས་དང་། དཔག་བསམ་ཤིང་། སྤྲིན་རིས། འབྲུག་ལྟ་བུ་བཟང་། ཚུབ་ཚུབ་པོ་ཧོར་ཆོད་ཅན་བར་ཆད་ཆེ། གནམ་རྡོ་ལྷུང་བ་དང་། རྦབ་འདྲིལ་བ་དང་། ཕད་རྩེ་ནག་པོ་དང་། བ་ལང་གི་མགོ་དང་། སྲིན་པོའི་གདོང་ལྟ་བུ་སོགས་ཡིད་དུ་མི་འོང་བ་བཀྲ་མི་ཤིས་པའི་ངོ་། དྲི་ཞིམ་ཞིང་གཙང་ལ་མདོག་དབྱིབས་ཡིད་དུ་འོང་ན་དོན་འགྲུབ། དེ་ལས་ལྡོག་ན་མི་དགེ་ཞིང་ངན། ཕྱིས་བཟང་དུ་བྱུང་ན། རིམ་འགྲོས་འགྱུར་ཏེ། དང་བོ་བཟང་། ཕྱིས་ངན་དུ་སོང་ན་བར་ཆད་ཆེ་བས་གཟབ། དུ་བ་ལྷ་གཞི་དང་རྣལ་འབྱོར་ལ་འཁྱིལ་ཞིང་གྱེན་དུ་འགྲོ་ན་ལྷས་མགོན་པས་བཟང་། ཞེས་དང་།

མཁས་གྲུབ་ཀརྨ་ཆགས་མེད་ཀྱིས་བསང་དུད་ལ་བརྟགས་ཏེ། ངན་ན་སྲུང་བཟློག་བྱ་ཚུལ་བསྟན་པ་ནི། དུ་བ་དཀར་བོས་ལྷ་དགྱེས་ཞི་བའི་ལས་འགྲུབ། ནག་པོས་བདུད་རྨུགས་གྲིབ་ཀྱི་ངོ་ཁྲུས་དང་གྲིབ་སེལ་བྱ། དམར་པོས་བཙན་དང་ས་བདག་གདོན། ས་བདག་འཁྲུགས་བཅོས་བྱེད། དཀར་ནག་འདྲེས་ན་བྱད་ཀས་གདོན། བྱད་ཟློག་བསྲུང་བ་བཟློག་པ་གསུམ། སེར་བོས་ཡུལ་ལྷ་གཞི་བདག་གནོད། བུམ་གཏེར་གཞུག་ཅིང་ཡུལ་ལྷ་མཆོད། སྦལ་སྦྲུལ་འདྲ་བ་ཀླུ་ཡིས་གདོན། །ཀླུ་མཆོད་ཀླུ་ཆོག་བུམ་གཏེར་སྦ། །སྤྲིན་ཕུང་འདྲ་ན་ལོངས་སྤྱོད་རྒྱས། །གཡས་གཡོན་དུ་ནི་མ་སོང་ནས། །དུ་བ་གནམ་དུ་ཤ་ལེར་སོང་། །གནམ་སྒོ་གཅོད་ཅིང་གནམ་ཐིལ་བཀལ། །ས་ལ་འཁྱིལ་ཞིང་གྲམ་པ་ནི། །ས་སྒོ་བྱེ་བས་ས་སྒོ་བཅད། །འགུགས་ཤིང་བན་བུན་སོང་བ་ན། །བསེ་རག་འགོང་བོ་རྒྱལ་བོའི་གདོན། །ཚག་སྒྲ་ཆེ་ཞིང་དུ་བ་འཐོར། །དགྲ་དང་ཆོམ་རྐུན་འུར་ཟིང་འོང་། །དང་བོའི་དུས་སུ་མེ་འབར་དང་། །རྗེས་ནས་མེ་ནི་འབར་ན་བཟང་། །ཐལ་བ་དཀར་དང་ཁམ་པ་རྣམས། །དངོས་གྲུབ་འབྱུང་དང་ན་ཚ་མེད། །ནག་དང་རྨུགས་ན་མནོལ་གྲིབ་འོང་། །དུ་བ་འཁྲུགས་ཤིང་འཐིབས་པ་ན། །ན་ཚ་སྡུག་བསྔལ་མྱ་ངན་འོང་། །དྭངས་ཤིང་དགུང་དུ་འཁྲིགས་ན་བཟང་། །གཞན་ཡང་ཤར་འབར་བཀྲ་ཤིས་ཤིང་། །དོན་གྲུབ་ལྷ་མཉེས་བདེ་སྐྱིད་ལྡན། །ལྷོར་འབར་ལས་བཞིའི་ཕྲིན་ལས་འགྲུབ། །ནུབ་འབར་ནད་ངོ་གྲིབ་ངོ་ཆེ། །བྱང་འབར་ཆོམ་རྐུན་དགྲ་ངོ་ཡོད། །ཤར་ལྷོར་ཞི་བའི་ལས། ལྷོ་ནུབ་རྒྱས་པའི་ལས། ནུབ་བྱང་དབང་གི་ལས། བྱང་ཤར་ནས་འབར་ན་ལོངས་སྤྱོད་ལས་རྣམས་འགྲུབ། དབུས་ནས་འབར་ན་ཡོན་མཆོད་ཀུན། བསམ་པ་འགྲུབ་ཅིང་བདེ་སྐྱིད་ལྡན། མི་ཕྱུགས་ནད་མེད་སྲུང་སྒབ་དྲོ། ཞེས་གསུངས་སོ། །

འཛམ་གླིང་སྤྱི་བསང་།

བོད་ཟླ་ལྔ་བའི་ཚེས་བཅོ་ལྔར་དབུས་གཙང་ཁུལ་དུ་འཛམ་གླིང་སྤྱི་བསང་ཞེས་པའི་དུས་སྟོན་གཏོང་སྲོལ་ཡོད། དེ་ཇི་ལྟར་དར་བའི་ཁུངས་ནི། ཉིན་དེར་གུ་རུ་མཚོ་སྐྱེས་རྡོ་རྗེས་བོད་ཀྱི་ལྷ་སྲིན་གདུག་པ་ཅན་ཐམས་ཅད་བཀའ་བཞག་དམ་འདོགས་དང་། རྣམ་དཀར་འཕྲིན་ལས་སྒྲུབ་པར་གཉེར་གཏད་དེ། བསམ་ཡས་གཙུག་ལག་ཁང་ལེགས་གྲུབ་བྱུང་བས། དེ་དག་ལ་བཏང་རག་མཚོན་བྱེད་དུ་ཧད་པོ་རིའི་རྩེ་མོར། རྒྱགས་རྔན་ལྷ་བསང་གི་འདོན་ཆོས་བརྩམས་ཏེ། བསང་མཆོད་རྒྱ་ཆེན་གནང་བ་འདི་ཡིན།

གཞན་ཡང་། རྒྱལ་བོ་མུ་ནེ་བཙན་པོས། ལྷ་ས། ཁྲ་འབྲུག བསམ་ཡས་ཆོས་འཁོར་གསུམ་ལ། སྡེ་སྣོད་གསུམ་གྱི་མཆོད་རྒྱུན་བཙུགས་པའི་ཡ་གྱལ་ལྷ་ས་འདུལ་བའི་མཆོད་པ་ཞེས་གྲགས་པའི་ལམ་སྲོལ་འཛིན་པའི་རྗེས་དྲན་གྱི་ཟླ་བ་དེའི་ཡར་ངོའི་ཚེས་བཟང་ཞིག་ལ། གཞུང་ཕྱོགས་ནས་ཀྱང་དབྱར་གསོལ་ཞེས། གནས་ཆུང། དགའ་བ་གདོང་སོགས་གཞུང་བསྟེན་སྲུང་མ་རྣམས་ལ་གསོལ་མཆོད་རྒྱ་ཆེར་བཏང་སྟེ། ལྷ་འབེབས་གནང་ནས། རྒྱལ་བསྟན་ཆབ་སྲིད་སྐོར་བཀའ་ལུང་ཞུས་པ་དང་། དབྱར་གསོལ་གྲོལ་རྗེས་སྡེ་བ་གཞུང་གི་ལས་གཉེར་ཁག་སྐྱོ་སངས་ཉིན་འགར་གཏོང་བར་མ་ཟད། ལྷ་བ་རྣམས་ཀྱིས་གཟབ་འཆོར་གང་ལེགས་སྤྲས་ཏེ། དཔལ་ལྷ་ཅོག་དང་། གཙང་བོའི་འགྲམ། གླིང་བསྐོར། རི་རྩེ་སོགས་སུ་ལྷ་སྲུང་སྤྱི་ལ་གསོལ་མཆོད་གཟབ་རྒྱས་གཏོང་། གཞུང་འབྲེལ་མ་ཡིན་པའི་ལྷ་འབེབས་གནང་བ་དང་། ས་ཆ་འགར་འཆམ་རྒྱག་སྲོལ་ཡང་ཡོད།

གཞན་གླིང་སྒྲུང་འཛམ་གླིང་སྤྱི་བསང་ལས། ཛམ་གླིང་གེ་སར་རྒྱལ་བོས་རྟ་རྒྱུགས་སྐུགས་སུ་བཞག་ནས། གླིང་དཀར་སྟོད་ཀྱི་གསེར་ཁྲི་དང་། སྒ་སྐྱ་ལོའི་འབྲུག་མོའི་སྐྲ་བདག་བླངས་རྗེས། ཟླ་ལྔ་བའི་ཚེས་བཅུ་གསུམ་ཉིན་རྨ་རྒྱལ་སྦོམ་རའི་ལབ་བསྟོད་དུ་རྒྱལ་བློན་ཧྲག་བསྡུས་ཀྱིས་རྨ་ཀུ་རའི་ལྷ་རི་ཁྱུང་རྩེར་འཚོགས་ཏེ། འཛམ་གླིང་སྤྱི་བསང་ཞིག་བཏང་བའི་རྣམ་པ་འཁོད་པ་ནི། འདིར་འབྲེལ་ཆེ་བས་འདི་ལྟར། ཕུན་སུམ་ཚོགས་པའི་བསང་རྫས་ཡངས་ཤིང་རྒྱ་ཆེ་བ་གསོས་ཁར། ཁ་དོག་སྣ་ལྔའི་དར་ཕྲེང་། གཞན་ཡང་། མཛེས་སྡུག་གཟུགས་ཀྱི་བྱེ་བྲག་སྙན་འཇེབས་རོལ་མོའི་སྒྲ་དབྱངས། རེག་འཇམ་ལྷ་རྫས་ཀྱི་གོས་བཏགས། གྱ་ནོམ་པའི་འདོད་ཡོན་གྱི་རྣམ་པ་འབུམ་ཕྲག་མང་བོས་མཆོད་ཅིང་། དེའི་སྐབས་སུ་མཁའི་སྤྲིན་སྔོན་གྱི་བླ་བྲེ། བར་སྣང་འཇའ་ཚོན་གྱི་ཀ་བ། ས་གཞི་མེ་ཏོག་གི་ཆར་བ། སྔར་མེད་པའི་དགེ་མཚན་གྱི་སྣང་བ་འབུམ་ཕྲག་གསར་དུ་བརྡོལ་ཞིང་། གླིང་དཀར་ལྷ་བསང་བ་རྣམས་ཀྱིས་སྐྱིད་པའི་གླུ་བླངས། སྤྲོ་བའི་དར་འཕྱར། སྙན་པའི་དུང་བུས། གསེར་གྱི་རྔ་ཆེན་བརྡུང་ཞིང་ཀི་སྭོ་ལྷ་རྒྱལ་གྱི་སྒྲ་སྐད་ལྡིར་ཞིང་མཆོད་པའི་ཚེ། རྩ་གསུམ་དམ་ཅན་སྲུང་མ། 　དཀར་ཕྱོགས་ཡུལ་ལྷ་གཞི་བདག་མང་བོས་དགྱེས་པའི་ཞལ་བསྟན། འཛུམ་པའི་མདངས་བྱུང་། སྙན་པའི་གསུང་ཐོས། མགོན་སྐྱབས་དང་སྡོངས་གྲོགས་མཛད་པར་ཞལ་གྱིས་བཞེས་ཤིང་། དེ་ནས་རྒྱལ་བློན་རྣམས་ཀྱིས་ཇ་ཆང་གི་ཕུད་སྐྱེམས། ཤ་ཐུད་ཀྱི་གསོལ་འདྲེན། ཕྱེ་མར་གྱི་སྡེར་ཁ་བསྒྲིགས། དཔའ་ཐུལ་ལ་ལས་རྟ་རྒྱུགས་དང་མདའ་འགྲན་བཅས་དགའ་སྤྲོ་ཁོལ་བའི་ངང་གནས་དེ་ནས་ཞག་མལ་གནང་སྟེ་ཕྱིར་ཕེབས། ཞེས་སོ། །

ཚ་གསུར།

༡ ཚ་གསུར་གྱི་ཁུངས་དང་སྣོད་རྫས། ཚེ་འཕོས་པ་ཇི་ལྟར་འགྱུར་བའི་མདོ་﹙བཀའ་འགྱུར་མདོ་╜ལ╝དུམ་པ ༢༣༡ ན ༢﹚ལས ། ཚེ་འཕོས་པ་སྐྱེ་བ་མི་ལེན་པར་གཤིན་པོ་འཇིག་རྟེན་ན་ཡོད་ན། བཟའ་བཏུང་དང་ཞོན་པ་དང་གོས་དང་རྒྱན་དག་བདག་པོར་བྱེད་པ་ནི་མ་ཡིན་ནོ། །ཞེས་དང་། རྒྱལ་བོ་ལ་གདམས་པའི་མདོ﹙╜ལ╝དུམ་པ ༢༣༠ ན ༧﹚ལས། ཀྱེ་རྒྱལ་བོ་ཆེན་པོ་ཚེ་འཕོས་པའི་ཕ་སྤད་དང་སྤུན་གཅིག་ལ་ཉེ་འབྲེལ་འཛིན་པ་ཕན་པར་འདོད་པ་རྣམས་ད་ལྟ་མ་ཤི་བ་ལུས་དང་ལྡན་པ་ཡང་གཅིག་ཡུལ་གཞན་དུ་སོང་ན། དེ་ལ་ཕའམ་མའམ་བུའམ་སྤུན་གང་ཡང་རུང་བས་ཟས་སྐོམ་མང་བོ་སྦྱིན་ནོ་གསོལ་ལོ་ཞེས་བསྔོས་པ་ཡང་། ཡུལ་གཞན་དུ་སོང་བའི་རྨི་ལམ་དུ་ཡང་མི་འབྱུང་ན་དངོས་སུ་ཟ་ཞིང་འཐུང་བ་ལྟ་ག་ལ་ཡོད། ཚེ་འཕོས་ནས་ལུས་དང་བྲལ་བ་ལ་བསྔོས་ཤིང་གཏད་པ་ཟ་ཞིང་འཐུང་བ་ལྟ་ག་ལ་ཡོད། ཅེས་གསུངས་པ་རྣམས་ལ་དགོངས་ནས་མེ་ལ་རྫས་བཏབ་སྟེ་གསུར་ཕུད་སྲོལ་འདི། བུ་སྟོན་སོགས་ཀྱིས་ཁུངས་མ་མཐོང་བར་གསུངས་ལ། ཁྱད་པར་དུ་རྒྱལ་དབང་ལྔ་བས། ཚ་གསུར་གྱི་ཆོ་གའི་རིམ་པ་ཡིད་བཞིན་འདོད་འཇོ་ལས། མེ་ལ་རྫས་བཏབ་པའི་གསུར་འདི་བསྟན་པ་ཕྱི་དར་གྱི་མདོ་རྒྱུད་མན་ངག་ཏུ་གསལ་བ་ཡོད་མེད་རང་གིས་བརྟགས་ཤིང་། མང་དུ་ཐོས་པའི་རིགས་དུ་མར་དྲིས་ཀྱང་ཁུངས་རྙེད་ས་མེད་པ་འདྲ། གསང་སྔགས་རྙིང་མའི་ཕྱོགས་ལ་ཡོད་དོ་ཞེས་ཐམས་ཅད་མགྲིན་པ་བཏེག་ནས་སྨྲ་ནའང་། རྙིང་མའི་རྒྱུད་འབུམ་དུ་ངོ་སྤྲོད་པ་མ་བྱུང་། བླ་མ་དགོངས་འདུས་སུ་ཡོད་ཟེར་ཡང་ལྒིགས་བམ་དང་ཐོབ་ཡིག་བསྡུར་ནས་བཙལ་ཀྱང་མ་རྙེད། གཏེར་ཁ་གོང་འོག་གི་ཡིན་ཟེར་བའི་དཔེ་འཁྱར་འདྲ་མཐོང་ཡང་། གཏེར་གཞུང་ཚད་མ་ཡིད་ཆེས་ཀྱི་ཡི་གེར་མི་འདུག་ཅིང་། ཁོ་བོས་གཏེར་ཁ་དེ་གཉིས་གཙོ་བོར་གྱུར་བའི་གཏེར་སྟོན་བརྒྱད་ཅུར་ཉེ་བའི་ཆོས་ཁ་མནོས་རུང་དེའི་ཁྲོད་དུ་ཡེ་མ་བྱུང་བ། སྔགས་རྙིང་མའི་ལུགས་ལ་ཡོད་ཅེས་མགྲིན་པ་བཏེག་ནས་སྨྲ་བར་མི་ནུས་མོད། ཅེས་དང་། ཡང་ཁོང་གིས་སྡེ་བ་བློ་བཟང་མཐུ་སྟོབས་ཀྱི་ཉམས་ལེན་ལ་གནང་བའི་གསུར་ཆོག་དང་དཀར་ཆ་བཞིའི་ངག་འདོན་ཕན་བདེའི་འདོད་འཇོ་ལས་ཀྱང་དེ་ལུགས་སུ་གསུངས་སོ། །

ཡིན་ནའང་། བསྟན་དར་ལྷ་རམས་པས། ལྔ་བ་ཆེན་པོས་ཚ་གསུར་ལ་ཁུངས་མེད་དུ་བཞེད་པ་མ་ཡིན་པར། རྒྱུད་སྡེ་ཉེར་སྤྱོད་ཀྱི་མཆོད་པའི་ནང་གི་བདུག་སྤོས་ཕུལ་བའི་ཚིག་ཇི་སྙེད་པ་དང་། འདོད་ཡོན་ལྔའི་དྲི་ཕུལ་བའི་ཚིག་ཇི་སྙེད་བྱུང་བ་ཐམས་ཅད་ཁུངས་སུ་བཞེད་ལ། དེ་ལྟར་ན། ངན་སོང་སྦྱོང་རྒྱུད﹙རྒྱུད་╜ཇ╝དུམ་པ་༤༨༧ བ ༤﹚ལས། ངན་སོང་གི་དཀྱིལ་འཁོར་གྱི་ལམ་དུ་ཇི་ལྟར་གནས་པའི་བདེ་བའི་བདག་ཉིད་གནས་སྐབས་ཅན་དེ་དག་ཀྱང་དགའ་བ་དང་མགུ་བ་དམ་པ་དང་བདེ་བ་དང་ཡིད་བདེ་བ་མྱོང་བར་བགྱི་བ་དང་། ངན་སོང་གི་རྒྱུད་ཐམས་ཅད་དུ་འཇུག་པར་ཁ་བལྟས་པའི་ལམ་ལས་བཟློག་པར་བགྱི་བའི་སླད་དུ། རྡོ་རྗེ་ཧཱུཾ་མཛད་ཀྱི་དཀྱིལ་འཁོར་དུ་འཇུག་པར་རུང་ངོ་། །ཞེས་དང་། བཟང་སྤྱོད་སྨོན་ལམ་ལས། བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ཞེས་དང་། སྤྱོད་འཇུག་ལས། སྤོས་མཆོག་ཡིད་འོང་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་འབུལ། །ཞེས་དང་། དཔེ་ཆོས་ལས། དཔེར་ན། མི་ཆུས་འཁྱེར་བ་ལ་ནུས་པ་ཅི་ཡང་མེད་པ་ལ། སྐམ་ས་ན་ཡོད་པའི་མིས་སྐྲ་འམ་གོས་ལ་སོགས་པ་གང་ནས་འཐེན་ཀྱང་སྐམ་སར་ནར་གྱིས་འདྲོངས་པ་ལྟར། སེམས་ཅན་ཤི་བ་རྣམས་ལས་ཀྱི་རླུང་གིས་དེད་ནས་གར་སྐྱེ་རང་དབང་མེད་ཅིང་། བདེ་སྡུག་གི་འདམ་ཁ་བྱ་དབང་མེད་པ་ལ། ཤུལ་ན་འདུག་པའི་ཉེ་དུའི་འབྲེལ་བ་རྣམས་ཀྱིས་ཤི་བ་དེའི་དོན་དུ་སྡིག་པ་དང་མ་འདྲེས་པའི་དགེ་བ་ལ་འབད་ཅིང་དེའི་དོན་དུ་སྨོན་ལམ་བཏབ་ན། དགེ་བའི་རྩ་བ་དེ་དག་ཕྱི་བཞིན་དུ་རྗེས་སུ་འབྲང་ཞིང་དེ་སྡུག་བསྔལ་གང་ཡིན་པ་ལས་ཐར་ངེས། ཞེས་དང་། ཡང་། པཎ་ཆེན་བློ་བཟང་ཆོས་རྒྱན་གྱིས་ཚ་གསུར་ན་མགྲོན་ཚན་བཞི་ཕྱེས་པ་ལས། དཀོན་མཆོག་སྲི་ཞུའི་མགྲོན་གྱི་དབང་དུ་བཏང་ན། ཐམས་ཅད་གསང་བ་ཞེས་བྱ་བའི་རྒྱུད་ལས། དེ་ནས་པུས་མོ་གཡས་པའི་ལྷ་ང་ས་ལ་བཙུགས་ནས་དུ་རུ་ཀའི་བདུག་པའམ། ཅི་བདོག་པས་གསོལ་ཏོ། །ཞེས་དང། ནག་པོ་ཆེན་པོའི་སྒྲུབ་ཐབས་ལས། དུག་དང་ཁྲག་དང་སྒོག་པ་དང་ཡུངས་དཀར་རྣམས་ཀྱིས་ནག་པོ་ཆེན་པོ་ལ་སྤོས་ཕུལ་ནས་དང་། གསང་བ་འདུས་པའི་རྩ་རྒྱུད་ལས་ཀྱང་། དྲི་ལ་རྣམ་གསུམ་ཤེས་བྱས་ནས་དང་། མདོ་སྡེར་གཏོགས་པའི་ལུང་ཡང་། སྤྱོད་འཇུག་ལས། བདུག་སྤོས་ཡིད་འཕྲོག་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་འབུལ། །ཞེས་སོགས་མདོ་རྒྱུད་དང་རྒྱ་གཞུང་ཇི་སྙེད་ཅིག་གསུངས་པ་ཡང་ཚ་གསུར་གྱི་ཁུངས་སུ་འགྲོ་སྟེ། ཚུལ་འདི་ལ་དགོངས་ནས། ཀུན་གཟིགས་ལྔ་བ་ཆེན་པོས་ཀྱང་ཚ་གསུར་འདི་ཡུལ་གོང་མ་རྣམས་ལ་ཉེར་སྤྱོད་ཀྱི་ནང་གི་བདུག་སྤོས་ཕུལ་བ་དང་ཕྱོགས་མཚུངས་གསུངས་པའང་དོན་ལ་གནས་སོ། །

ཚ་གསུར་གྱི་སྣོད་ནི། གས་ཆག་ཅན་དང་། ལག་པ་ཁྲུས་པ། ཡང་ན། ཚེ་འདས་དེ་ཉིད་ཀྱི་ཟས་ལྷག་གོས་རྙིང་ཤ་ཆང་སྒོག་ཙོང་སོགས་བསྲེ་བ། འོད་ཅན་སོགས་གཏན་ནས་མི་རུང་ངོ་། །སྣོད་བསྐྱེད་པ་ནི། སྟོང་བའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས། ཞེས་རྣམས་ཞེས་མང་ཚིག་གསུངས་པ་ནི་མགྲོན་ཚན་རེ་ལ་སྣོད་རེ་བསྐྱེད་པ་སྟེ། པཎ་ཆེན་གྱི་ཚ་གསུར་ཡིད་ལ་འདོད་འཇོ་ན་གསལ་ལོ། །

རྫས་ནི་ཟས་སྣ་ལོངས་མ་སྤྱད་པ་གང་བཟང་དང་། དར་གོས་སྣམ་སོགས་གཙང་མ་དང་། འབྲུ་སྨན། དྲི་རྙིང་རིན་པོ་ཆེ་སོགས་ཕྱེ་མ་སོགས་རུང་ངོ་། །རང་བྱུང་རྡོ་རྗེའི་དཀར་གསུར་ཞིང་ཁམས་ཀུན་ཁྱབ་ལས། དཀར་ཕྱེ་གཙང་མ་མར་གྱི་ཁུ་བས་སྦགས་པ་སྣུམ་བག་ཅན་གྱི་ཁྲོད། ཤིང་ཏོག་དཀར་གསུམ། མངར་གསུམ། རིན་པོ་ཆེ། བདུད་རྩིའི་ཕུར་མ་སོགས་ཀྱང་བཏགས་ནས་འདྲེས་པར་བྱས་པ་སོལ་མེ་དང་། སོ་ཏོག་ལ་སོགས་མ་ཡིན་པའི་མེ་ཐལ་འཇམ་པོ་ལ་བཏབ། ཆུ་གཙང་ཁོ་ནས་བྲན། ཞེས་སོ། །

༢ ཚ་གསུར་གཏོང་ཡུལ་ནི། གདུགས་དཀར་མཆོག་གྲུབ་མ་ལས། ཟས་སུ་དྲི་ཟ་བ་དང་། ཟས་སུ་བདུག་པ་ཟ་བ་དང་། ཟས་སུ་སྦྱིན་སྲེག་ཟ་བ་སོགས་འབྱུང་བ་ལྟར། དྲི་ཟ་སྤྱི་དང་། ཁྱད་པར་དུ་བསད་ལྕེབས་གཡང་ལ་ལྷུང་བ་དང་། བར་དོ་འཁྱམས་པའི་སེམས་ཅན་སོགས་ལ་སྦྱིན་པ་གཏོང་བ་སྟེ། པཎ་ཆེན་བློ་བཟང་ཆོས་རྒྱན་གྱིས་མཛད་པའི་ཚ་གསུར་གཏོང་ཚུལ་ལས། དྲི་མཆོག་འདོད་ཡོན་ལྔ་ལྡན་པའི། །ཟག་མེད་གསུར་གྱི་མཆོད་པ་འདི། །བླ་མ་ཡི་དམ་དཀོན་མཆོག་གསུམ། །མཁའ་འགྲོ་ཆོས་སྐྱོང་ཐམས་ཅད་དང་། །དྲི་ཟའི་རྒྱལ་བོ་རབ་དགའ་དང། །དྲི་ཟའི་ཚོགས་རྣམས་མ་ལུས་དང་། །མར་གྱུར་རིགས་དྲུག་སེམས་ཅན་དང་། །ཡུལ་ལྷ་གཞི་བདག་ཚོགས་རྣམས་དང་། །གསུངས་པ་ལས། གསུར་ཡུལ་དུ་བླ་མ་ཡི་དམ་དང་། མཁའ་འགྲོ་ཆོས་སྐྱོང་སོགས་ཀྱང་འགྲོ་བ་གསལ་ལ། འདིར་ལྷ་བསང་དང་མི་འདྲ་ས་ནི། མཛོད་ལས། དྲི་ཟ་སེམས་ཅན་བར་མའོ། །གསུངས་པ་ལྟར། པཎ་ཆེན་བློ་བཟང་ཆོས་རྒྱན་གྱིས། ཁྱད་པར་ཁ་སང་དེ་རིང་བར། །བསད་ལྕེབས་ཤི་ནས་སྔ་ལུས་བོར། །ཕྱི་ལུས་མ་རྙེད་བར་དོ་ཡི། །ཇི་སྙེད་སེམས་ཅན་ཐམས་ཅད་ལ། །ཞེས་བར་དོ་འཁྱམས་པའི་སེམས་ཅན་ལ། འཇིགས་སྐྲག་འཁྲུལ་སྣང་དང་། ངན་འགྲོའི་སྡུག་བསྔལ་ལས་གྲོལ་ཏེ། དལ་འབྱོར་གྱི་རྟེན་བཟང་འཐོབ་པ། ས་ལམ་རིམ་བགྲོད་ཀྱིས་རྫོགས་བྱང་གི་གོ་འཕང་འཐོབ་པར་གསུངས་པ་ནི་ཚ་གསུར་གྱི་ཆེད་དམིགས་ཡིན་ལ། དེ་བས་གཙོ་ཆེར་ལྷ་བསང་ནི་ཡས་མགྲོན་དང་འཇིག་རྟེན་པའི་ལྷ་ཐུ་བོ་ཆེ་རྣམས་ལ་འཕྲིན་བཅོལ་དང་ཚོགས་གསོག་བྱ་ཚུལ་ཞིག་དང་། ཚ་གསུར་ནི་དེ་དག་ལས་གཞན། ཡི་དྭགས་དང་བར་དོ་བ་སོགས་ཉམ་ཐག་འགྲོ་བ་ལ་སྙིང་རྗེས་ཕུལ་ཏེ་བཀྲེས་སྐོམ་སེལ་བར་ཆེད་དམིགས་ཀྱིས་ཚོགས་གསོག་བྱ་ཚུལ་ཞིག་ཡིན་ནོ། །

སྤྱིར་ན། པཎ་ཆེན་བློ་བཟང་ཆོས་རྒྱན་གྱིས་ཚ་གསུར་གྱི་ཡུལ་ལ་མགྲོན་ཚན་བཞིར་ཕྱེས་ཡོད་པ་ནི། ༡ དཀོན་མཆོག་སྲི་ཞུའི་མགྲོན་དུ་སྤྱན་འདྲེན་པ་ནི། མཉམ་མེད་ཤཱཀྱའི་རྒྱལ་བོ་ལ། དྲིན་ཆེན་རྩ་བརྒྱུད་བླ་མ་དང་། །རྒྱུད་སྡེ་བཞི་འབྲེལ་ལྷ་ཚོགས་དང་། །དུས་གསུམ་བདེ་གཤེགས་དམ་པའི་ཆོས། །ཚོགས་བཅས་དཀོན་མཆོག་གསུམ། ཞེས་མཆོག་ཐུན་གྱི་དངོས་གྲུབ་སྩོལ་ཕྱིར་འདྲེན་པ་དང་། ༢ ཡི་དམ་ཆོས་སྐྱོང་ཡོན་ཏན་གྱི་མགྲོན་དུ་སྤྱན་འདྲེན་པ་ནི། ཕྱག་ན་རྡོ་རྗེ་ལ། མྱུར་མཛད་མགོན་པོ་འཁོར་བཅས་དང་། །ཆོས་ཀྱི་རྒྱལ་བོ་རྣམ་ཐོས་སྲས། །གུར་མགོན་ཞལ་དང་ཕྱག་བཞི་བ། །དམག་ཟོར་དྲེགས་པ་ལྕམ་སྲིང་དང་། །གཙང་མའི་རིས་ཀྱི་མགོན་པོ་སོགས། །ཆོས་བཞིན་སྐྱོང་བ་ཐམས་ཅད་དང་། །གནས་གསུམ་དག་ན་བཞུགས་པ་ཡི། །དཔའ་བོ་མཁའ་འགྲོའི་ཚོགས། ཞེས་བར་ཆད་སེལ་ཕྱིར་དུ་འདྲེན་པ་དང་། ༣ རིགས་དྲུག་སྙིང་རྗེའི་མགྲོན་དུ་སྤྱན་འདྲེན་པ་ནི། འཕགས་པ་སྤྱན་རས་གཟིགས་ལ། འགྲོ་བ་རིགས་དྲུག་ལམ་རྒྱུད་ལྔ། །སྐྱེ་གནས་རྣམ་པ་བཞིས་བསྡུས་པའི། །དྲིན་ཅན་ཕ་མར་གྱུར་བ་ཡི། །མཁའ་མཉམ་འགྲོ་བའི་ཚོགས་ཞེས། སྦྱིན་པའི་ཡུལ་དུ་འདྲེན་པ་དང་། ༤ གདོན་བགེགས་རྣམས་ལན་ཆགས་བུ་ལོན་བྱང་ཕྱིར་སྤྱན་འདྲེན་པ་ནི། རྟ་མགྲིན་དབང་བོ་ལ། བགེགས་རིགས་སྟོང་ཕྲག་བརྒྱད་ཅུ་དང་། །གདོན་རིགས་སུམ་བརྒྱ་དྲུག་ཅུ་དང་། །བྱིས་པའི་གདོན་ཆེན་བཅོ་ལྔ་སོགས། །སྟེང་འོག་བར་གསུམ་དབྱེ་བ་ཡི། །གདོན་བགེགས་འབྱུང་བོ། ཞེས་དང་། ཐོག་མེད་དུས་ནས་ད་ལྟའི་བར། །བསད་དང་བཅིངས་དང་བརྡེག་པ་དང་། །འཕྲོག་དང་བརྐུས་ལ་སོགས་པ་ཡིས། །ལན་ཆགས་ཤ་འཁོན་གཉེར་བ་དང་། །བུ་ལོན་ཆགས་པ་རྣམས། ཞེས་སྡིག་སྒྲིབ་བྱང་ཕྱིར་འདྲེན་པའོ། །དེ་ལྟར་མགྲོན་ཚན་བཞི་བོ་སྒྲུབ་པ་པོའི་མདུན་གྱི་ནམ་མཁར་ཁྲ་ལམ་མེར་སྤྱན་དྲངས་ཏེ་སྟེང་འོག་དང་། འོག་མའི་གཡས་གཡོན་སུ་གསལ་བཏབ་སྟེ་གོ་རིམ་བཞིན་བཞུགས་པའི་མོས་པ་བྱའོ། །མགྲོན་ཚན་བཞི་བོ་ལ་གསུར་འབུལ་ཚུལ་ཡང་། རིམ་པ་བཞིན། རྒྱལ་བོ་ལ་དཔྱ་ཁྲལ་འབུལ་བ་དང་། གྲོགས་མཆེད་ལ་སྟོན་མོ་འགྱེད་པ། ངན་སློང་ལ་སྦྱིན་པ་གཏོང་བ་དང་། བུན་བདག་ལ་བུ་ལོན་འཇལ་བའི་ཚུལ་དུ་བསྔོ་ཞིང་། ལྷག་པར་མཆོད་སྦྱིན་གྱི་འཁོར་གསུམ་པོ་རང་བཞིན་མེད་བཞིན་དུ་སྣང་བ་སྒྱུ་མ་ལྟ་བུའི་ངང་ནས། ཡས་མགྲོན་ལ་དད་པས་ཕུལ་བས་ཟག་མེད་བདེ་སྟོང་གསར་དུ་འཁྲུངས་ཏེ་དགྱེས་པར་བསམ་པ་དང་། མས་མགྲོན་ལ་སྙིང་རྗེས་བསྔོས་པས་ལུས་སེམས་ཚིམ་ཞིང་མགུ་ནས་ཐབས་ཤེས་ཀྱི་རྟོགས་པ་ཁྱད་པར་ཅན་འཁྲུངས་པའི་དམིགས་པ་འཛིན་དགོས་སོ། །

ཡང་མི་ཕམ་པས། རིགས་དྲུག་སྙིང་རྗེའི་མགྲོན་རྣམས་དང་། །ཁྱད་པར་ཕྱོགས་འདིར་རྒྱུ་བ་ཡི། །བགེགས་རིགས་ལན་ཆགས་ཤ་འཁོན་ཅན། །ཟ་འདྲེ་ཤི་གཤེད་གྲེ་ཕོ་མོ། །ནད་བདག་རིམས་བདག་གོད་ཁའི་བདག། ཡུལ་འདྲེ་རྦད་འདྲེ་ཉེ་དུའི་འདྲེ། །ཆགས་དང་འཇུངས་པའི་འདུ་ཤེས་ཀྱིས། །མི་དང་ནོར་ཕྱིར་འབྲང་བ་འམ། །ཕྲག་དོག་སྡང་བའི་བསམ་པ་ཡིས། །གནོད་པ་རྩོམ་པའི་རིགས་ཀུན་དང་། །དྲི་ཟ་སྲིད་པ་བར་མའི་འགྲོ། །ལྟོགས་འགོང་བསེ་རག་ཡི་དྭགས་རིགས། །སྲིད་པར་ལས་ཀྱི་དབང་སོང་བའི། །སྣ་ཚོགས་གཟུགས་ཅན་ཀུན་ཏུ་རྒྱུ། །སྣ་ཚོགས་ཟས་ཅན་ཡོངས་འཚོལ་ཅན། །བསམ་སྦྱོར་སྣ་ཚོགས་མི་འདྲ་བ། །གནོད་པ་སྣ་ཚོགས་ཀུན་ཏུ་སྦྱོར། །དབང་ཆེན་དབང་ཆུང་སྣ་ཚོགས་པའི། །གདོན་བགེགས་འབྱུང་བོ་ཐམས་ཅད་ལ། །ཕམ་རྒྱལ་ཕྱོགས་ལྷུང་མེད་པ་ཡི། །འདོད་དགུ་མི་ཟད་གཏེར་དུ་བསྔོ། །ཞེས་དང་། རང་བྱུང་རྡོ་རྗེའི་དཀར་གསུར་ཞིང་ཁམས་ཀུན་ཁྱབ་ལས་ཚ་གསུར་གཏོང་ཡུལ་ལ་མང་དུ་གསུངས་སོ། །གཞན་ཡང་། ཚ་གསུར་མཐོ་དམན་བར་གསུམ་དུ་གཏོང་ཡུལ་གྱི་སྐོར། སི་ཁྲོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་རྫ་དཔལ་སྤྲུལ་གྱི་གསུང་འབུམ﹝ཉ﹞དུམ་པའི་ཤོག་གྲངས ༨༩ ནས་༡༠༡ བར་གསུར་མཆོད་ཉེར་མཁོ་སྤྱི་དང་དམིགས་བསལ་﹝བ﹞ལེ་ཚན་གྱི་སྐོར་ཞེས་པར་ཁ་གསལ་ཞིང་དོན་ལ་འབྱོར་བ་མང་དུ་གསུངས་ཡོད་ཀྱང་འདིར་ཡི་གེ་མང་དུ་འཇིགས་ནས་མ་བཀོད་དོ། །

ཁ་ཅིག ཚེ་འཕོས་པ་ཇི་ལྟར་འགྱུར་བ་ལུང་བསྟན་པའི་མདོ་ལས། ཚེ་འཕོས་པ་སྐྱེ་བ་མ་བླངས་པར་གཤིན་པོའི་འཇིག་རྟེན་དུ་ཡོད་ན། བཟའ་བཏུང་དང་ཞོན་པ་དང་གོས་དང་རྒྱན་དག་བདག་པོར་བྱེད་པ་མ་ཡིན་ནོ། །ཞེས་དང་། རྒྱལ་བོ་ལ་གདམས་པའི་མདོར་བར་དོ་ལ་ཟས་སྐོམ་ཅི་བསྔོས་ཀྱང་མི་ཐོབ་པར་གསུངས་པ་དང་། རྒྱལ་དབང་ལྔ་བས། མེ་ལ་རྫས་བཏབ་པའི་གསུར། སྔགས་གསར་རྙིང་དང་མདོ་ཕྱོགས་གང་ནས་ཀྱང་བཤད་པ་མ་མཐོང་བར་མ་ཟད། བར་དོ་ལ་བསྔོ་བ་དོན་ལ་མི་གནས་པར་ཐམས་ཅད་མཁྱེན་པ་བུ་སོགས་བཞེད་ཅིང་། ཞེས་སོགས་གསུངས་པའི་ཚིག་ཟིན་ཙམ་ལ་བརྟེན་ནས། འགའ་ཞིག་བར་དོ་བ་དེའི་ཆེད་དུ་ཚ་གསུར་བཏང་བ་དགོས་པ་མེད་དོ་སྙམ་དུ་རྟོག་པ་འཆར་ཡང་། ཚེ་འཕོས་པ་ཇི་ལྟར་འགྱུར་བའི་མདོ་ལས་གཤིན་པོར་བཟའ་བཏུང་སོགས་བསྔོས་ཀྱང་གཤིན་པོར་མི་འཐོབ་པར་གསུངས་པ་ནི། སྔགས་དང་ཏིང་འཛིན་ཕྱག་རྒྱ་སོགས་ནུས་མཐུ་བསམ་གྱིས་མི་ཁྱབ་པས་ཐབས་མཁས་ཁྱད་པར་ཅན་གྱིས་མ་ཟིན་པར། འཇིག་རྟེན་པ་དག་རང་གར་དུར་ཐོག་དུ་བཟའ་བཏུང་བསྒྲིགས་ནས། གཤིན་པོ་དེར་འཐོབ་པའི་རེ་བ་རྒྱག་པ་ནི། དོན་ལ་མི་གནས་པ་སོགས་ཞིབ་ཆ་འབྱེད་དགོས་པ་ཡིན།

ཚུལ་འདི་ལ་དགོངས་ནས། རྟ་ཚག་ཡེ་ཤེས་བློ་བཟང་བསྟན་པའི་མགོན་པོས་རག་ར་སྤྲུལ་སྐུའི་དྲིས་ལན་དུ། གཤིན་པོ་ལ་ཟས་བསྔོས་པས་མི་འཐོབ་པར་གསུངས་པ་ནི། དེང་སང་རྒྱ་གར་ནག་སོགས་སུ་གཤིན་པོའི་རོ་དང་དུར་སར་ཟས་ཀྱི་རྣམ་གྲངས་མང་བོ་བསྒྲིགས་ནས་མཆོད་པ་བྱེད་པ་དར་བས། དེ་འདྲ་བ་དེ་གཤིན་པོ་སྐྱེ་གནས་གཞན་དང་བར་དོར་འཕོས་ཟིན་ནས་འགྲོ་བ་རིས་མི་གཅིག་པས་མི་ཐོབ་པར་གསུངས་པ་ནི། འཆི་འཕོ་བ་ཇི་ལྟར་འགྱུར་བའི་མདོ་ལས་ཀྱང་རྒྱས་པར་གསུངས་པ་དོན་ལ་གནས་ཀྱང་། གསུར་ལྟ་བུ་སྔགས་དང་ཕྱག་རྒྱ་ཏིང་ངེ་འཛིན་གྱི་བྱིན་གྱིས་བརླབས་ནས་བསྔོས་ན་མི་ཐོབ་པ་ཡང་མ་ཡིན་ཞིང་། དཔེར་ན། ཡི་དྭགས་ལ་ཟས་རང་གར་སྦྱིན་ཡང་མི་ཐོབ་ལ། འཇུར་འགེགས་ལ་ཆུ་སྦྱིན་གྱི་སྔགས་ཀྱིས་བསྔོས་ན་ཐོབ་པར་གསུངས་པས། གསང་སྔགས་ཀྱི་བྱིན་རླབས་བསམ་གྱིས་མི་ཁྱབ་པའི་ཕྱིར། བར་དོ་ལ་མདོ་རྒྱུད་ཁུངས་མ་ནས་དྲི་ཟ་ཞེས་བྱུང་བས། དྲི་ལ་ལོངས་སྤྱོད་པ་ལས། ཟས་རགས་པ་གཞན་མེད་འདྲ། དབང་བོ་ཀུན་ཚང་ཡིན་ཡང་ཟས་མི་དགོས་པ་ནི། བསྐལ་བ་དང་བོའི་མི་ལའང་ཡོད་པས། ཞེས་དང་། ཡང་ཨ་ལ་ཤས། བར་སྲིད་པས་དྲི་ཟ་ཚུལ་ལ་རིགས་པས་སྒྲུབ་ཡོད་པ་ནི། བར་སྲིད་པ་དེ་གསུར་ལ་སོགས་པའི་དྲི་དོན་དུ་གཉེར་བའི་གང་ཟག་ཡིན་ཏེ། ཟས་སུ་དྲི་ཟ་མཁན་ཡིན་པས་ཕྱིར། མཛོད་ལས། དྲི་ཟ་སེམས་ཅན་བར་མའོ། །ཞེས་གསུངས་སོ། །དེས་ཀྱང་གསུར་ལ་སོགས་པའི་དྲི་ལ་དངོས་སུ་སྤྱོད་ནུས་པ་ཡིན་ཏེ། དེ་ལ་དྲི་ཚོར་བའི་དབང་བོ་དང་དབང་ཤེས་དག་ཀྱང་མ་ཉམས་པར་ཡོད་པའི་ཕྱིར། དེ་ཉིད་ལས། དབང་བོ་ཀུན་ཚང་ཐོགས་མེད་རྒྱུ། །ཞེས་གསུངས་སོ། །གསུར་དྲི་བཏང་བ་དང་མཉམ་དུ་གནས་དེར་སླེབས་ནུས་ཏེ། རྫུ་འཕྲུལ་གྱིས་འགྲོ་བའི་ཤུགས་དང་ལྡན་པ་ཡིན་པའི་ཕྱིར། དེ་ཉིད་ལས། ལས་ཀྱི་རྫུ་འཕྲུལ་ཤུགས་དང་ལྡན། །ཞེས་རིགས་ལམ་བཏང་ཡོད་པ་དང་། བར་སྲིད་པའི་དྲི་ལོངས་སུ་སྤྱོད་ཚུལ་ནི། བར་དོ་བ་དེ་ཆོ་ག་བྱེད་སར་འོང་ནས་རང་ལ་བསྔོས་པའི་གསུར་དྲི་དང་གྲོགས་སོགས་ལ་རྨི་ལམ་རྨིས་པ་བཞིན་དུ་ལོངས་སྤྱོད་པར་ཆོས་མངོན་པར་གསུངས་སོ། །

རྒྱལ་བོ་ལ་གདམས་པའི་མདོ﹙╜ལ╝དུམ་པ༢༣༠ན༧﹚རང་ལས་ཀྱང་། ཀྱེ་རྒྱལ་བོ་ཆེན་པོ་ཚེ་འཕོས་པའི་ཕ་སྤད་དང་སྤུན་གཅིག་ལ་ཉེ་འབྲེལ་འཛིན་པ་ཕན་པར་འདོད་པ་སོགས་ཞེས་སྔར་དྲངས་ཟིན་པ་དེས་གྲུབ་ལ། དེ་ལ་རིགས་པས་ཀྱང་རྟོགས་ནུས་པ་ཨ་ལ་ཤའི་ཚ་གསུར་དོགས་གཅོད་ལས། བར་དོ་བ་དེ་དྲི་ཁོ་ནས་འཚོ་བ་ཡིན་པས། བཟའ་བ་དང་བཏུང་བ་གཞན་གྱི་དགོས་པ་མེད། རྫུ་འཕྲུལ་ཁོ་ནས་འགྲོ་བ་ཡིན་པས་ཞོན་པ་མི་དགོས། ཤིན་ཏུ་དྭངས་པའི་ལུས་ཅན་ཡིན་པས་གོས་དང་རྒྱན་སོགས་ཀྱི་དགོས་པ་མེད་པའི་ཕྱིར་རོ། །ཞེས་བར་དོ་དེར་དྲི་ལས་གཞན་པའི་དགོས་པ་མེད་ཚུལ་རིགས་པས་དཔྱད་ན་དེ་འདྲ་ཡིན་མཆི་ཡང་། ཁྲུས་ཆོག་སོགས་ལས་སྔགས་ཀྱི་རྣལ་འབྱོར་དང་འབྲེལ་ཏེ་ཚེ་འདས་ལྟར་བསྐྱེད་ནས་ལོག་འཚོས་མ་སླད་པའི་འདོད་ཡོན་ལྔ་ལྡན་གྱི་མཆོད་པར་བྱིན་གྱིས་བརླབས་ཏེ་དཀོན་མཆོག་གསུམ་གྱི་བདེན་པ་དང་། རིག་སྔགས་ཏིང་འཛིན་གྱི་མཐུ་སྟོབས་དང་། ཆོས་ཀྱི་དབྱིངས་རྣམ་པར་དག་པའི་བསམ་གྱིས་མི་ཁྱབ་པའི་ནུས་མཐུ་ལ་བརྟེན་ནས་བསྔོ་བ་བྱས་ན། ཕན་ཡོན་ཆེ་བར་མཁས་གྲུབ་དམ་པ་རྣམས་མགྲིན་གཅིག་དུ་གསུངས་པ་དང་། ཁ་ཅིག་གཤིན་པོའི་དོན་དུ་ཆོ་ག་བསྒྲུབས་ཚེ། རྣམ་ཤེས་དངོས་སུ་འགུགས་མི་ནུས་ཏེ། གལ་ཏེ་ཁུགས་ན་རོ་ལ་རྣམ་ཤེས་བཀུགས་ཏེ་གསོན་པོར་བསྒྱུར་ནུས་ཞེ་ན། མི་སྐྱོན་ཏེ། ཀུན་རིག་ཊྲཱྀཀ་ཆེན་རིག་པའི་རྣམ་བཤད་ལེགས་བཤད་ཐམས་ཅད་ཀྱི་སྙིང་བོ་ལས། སྟོད་ལུགས་པ་ཁ་ཅིག་ན་རེ། གཤིན་པོའི་དོན་དུ་དམིགས་ནས་ཆོ་ག་བྱས་པས་ཆོག་གི རྣམ་ཤེས་དགུག་མི་དགོས་ཏེ། བཀུགས་ཀྱང་མི་ཁུགས་པའི་ཕྱིར། གལ་ཏེ་ཁུགས་ན་རོ་ལ་རྣམ་ཤེས་ཁུགས་པས་གསོན་པོར་བྱེད་ནུས་པར་འགྱུར་རོ་སྙམ་ན། སྐྱོན་མེད་དེ། རྣམ་ཤེས་བར་དོ་ན་གནས་པ་ཁུགས་ནས་གསོན་པོར་འགྱུར་སྲིད་པ། དུས་འཁོར་གྱི་མཆོག་མི་འགྱུར་གྱི་སྐབས་ནས་ཤི་ལོག་དཔེར་བརྗོད་པའི་སྐབས་ཀྱིས་ཀྱང་འགྲུབ་ལ་ཞེས་གསུངས་པའི་ཕྱིར། ཞེས་གསུངས་སོ། །

༣ དམར་གསུར་གཏོང་སྲོལ། ཡང་། དམར་གསུར་ཕུད་སྲོལ་གྲུབ་མཐའ་གཞན་དུ་གསུངས་ཡོད་དེ། མཁྱེན་བརྩེ་ལྷས་དམར་གསུར་ལ་བརྟེན་ནས་རང་གཞན་གྱི་འཆི་བ་བླུ་བ་ལས། སྤྱིར་དུས་ལ་ངེས་པ་མེད་ཅིང་ཁྱད་པར་མུན་སྲོད་ལ་གནོད་སྦྱིན་རྣམས་གཞན་གྱི་སྲོག་ལ་འཚེ་བའི་སླད་དུ་རྒྱུ་བ་ཡིན་པས། དེའི་ཚེ་དམར་གསུར་སྦྱིན་ཞིང་རང་གི་རྒྱུད་ལ་བྱམས་སྙིང་རྗེ་བྱང་ཆུབ་ཀྱི་སེམས་དང་། ཆོས་དང་ཟང་ཟིང་གི་སྦྱིན་པ་ཐུན་མོང་དུ་འགྱུར་བ་འདི་བྱས་ན་ཕན་ཡོན་བསམ་གྱིས་མི་ཁྱབ་པ་ཡིན་ནོ། །ཞེས་དང་། གཏོང་ཡུལ་ནི། སོ་སོའི་ཡིད་ལ་གང་འདོད་པའི། །ཟད་མི་ཤེས་པའི་ལོངས་སྤྱོད་དུ། །གྱུར་ནས་ཤ་འཁོན་བུ་ལོན་བྱང་། །གནོད་སེམས་འཁོན་འཛིན་དག་པར་ཤོག །ཁྱད་པར་གཞན་གྱི་ལུས་སྲོག་ལ། །རྣམ་པར་སྡང་བའི་གནོད་སྦྱིན་དང་། །ཤ་ཟ་སྲིན་པོ་འབྱུང་བོའི་གདོན། །ཚེ་སྐུ་མདངས་འཕྲོག་སྲོག་ལེན་ཞིང་། །ཤ་དང་ཁྲག་ལ་གདུང་བ་རྣམས། །དམར་གསུར་འདོད་ཡོན་ཀུན་ཁྱབ་འདིས། །ངོམས་ཤིང་ཚིམས་ལ་མཐུན་གྱུར་ཅིག །ཁྲོ་ཞིང་གཏུམ་པའི་སེམས་བོར་ནས། །བྱང་ཆུབ་སེམས་དང་ལྡན་པར་ཤོག །ཅེས་དང་།

བཀའ་བརྒྱུད་པའི་ཞལ་འདོན་ཕྱོགས་བསྒྲིགས་ལས། ཤ་ཁྲག་འབྲུ་སྨན་སྦྱར་བ་ཡི། །གསུར་མཆོད་འདོད་ཡོན་ལྔ་ལྡན་འདི། །བདག་ཅག་དཔོན་སློབ་འཁོར་བཅས་ཀྱི། །ཚེ་དང་སྲོག་ལ་བར་གཅོད་པའི། །འཆི་བདག་གཤིན་རྗེ་མ་མོའི་སྡེ། །འབྱུང་བོ་ཤ་ཟ་གནོད་སྦྱིན་ཚོགས། །སྲིན་པོ་དྲི་ཟ་ཡི་དྭགས་ཚོགས། །མ་རུངས་གདུག་པའི་སེམས་འཆང་བ། །འཁོར་དང་བཅས་པ་ཀུན་ལ་བསྔོ། །ཞེས་གསུངས་པ་དང་།

གསུར་མཆོད་འདོད་ཡོན་སྤྲིན་ཕུང་ལས། དམར་གསུར་བྱེད་ན། སྲོད་ཀྱི་དུས་སུ་ཚིལ་གྱིས་སྤྲུས་པའི་ཕྱེ་མར་ལ་བྱིན་རྟེན་གང་འཛོམས་བསྲེ་ཞིང་། གསུངས་པ་དང་། བསྔོ་ཡུལ་ཡང་། དམར་གསུར་འདོད་པའི་ཡོན་ཏན་ལྔ་ཚང་བས། །ཧེ་རུ་ཀ་དཔལ་གནས་གསུམ་མཁའ་འགྲོའི་ཚོགས། །དཔལ་མགོན་ལྕམ་དྲལ་དམ་ཅན་རྒྱ་མཚོ་བཅས། །དགྱེས་ཤིང་ཚིམ་ནས་འདོད་དོན་གང་བཅོལ་སྒྲུབས། །གཞན་ཡང་འགྲོ་བའི་ཤ་ཁྲག་སྲོག་དབུགས་ལ། །རྔམ་པའི་འབྱུང་བོའི་ཚོགས་ཀུན་རབ་ཚིམ་ནས། །གནོད་འཚེ་བསམ་སྦྱོར་སྤོངས་ལ་བྱམས་སེམས་བསྐྱེད། །འཇིག་རྟེན་ཀུན་ཏུ་བདེ་ལེགས་རྒྱ་ཆེན་སྒྲུབས། །སྔོན་ཚེ་རང་དོན་ལ་ཞེན་གཏི་མུག་པས། །གཞན་ལ་བསད་བརྡུང་འཕྲོག་བཅོམ་ལས་བསགས་པའི། །འཁོན་འགྲས་ཞི་ཞིང་བུ་ལོན་ལན་ཆགས་འཁྱེར། །ཀུན་ཀྱང་ཕན་བདེའི་དཔལ་ལ་སྤྱོད་གྱུར་ཅིག །ཅེས་སོ། །

ཁྱད་པར་དུ་རྫ་དཔལ་སྤྲུལ་གྱིས་ཕྱུགས་ཀྱི་ནད་ཡམས་གཅོད་ཕྱིར། དམར་གསུར་གཏོང་ཡུལ་ཁ་གསལ་བ་ཞིག་གསུངས་ཡོད་པ་ནི། འབྱུང་བོ་མི་མ་ཡིན་ཤ་ཟ་ཚེ་ལ་རྐུ་བ་མདངས་འཕྲོག་པ། སེམས་ཅན་གཞན་གྱི་དབུགས་ལ་རྔམ་པ། སྡང་བ་དང་སྡུག་པའི་བསམ་སྦྱོར་ཅན་མི་ཡི་ནད་བདག གནག་ཕྱུགས་ཀྱི་གོད་བདག་ལ་སོགས་པ་རྒྱ་འདྲེ་འགོང་བོའི་རིགས་ཆེ་ཆུང་ཇི་སྙེད་མཆིས་པ་མཁོ་རྒུའི་འདོད་ཡོན་ཟད་མི་ཤེས་པའི་ལོངས་སྤྱོད་ཆེན་པོ། བཟའ་བཏུང་གནས་མལ། ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད། པགས་རློན་དང་སྐྲ་ཡི་བསྒོ་བ། རྐང་ཀླད་ཞག་གི་གྲུ་ཆར་ལ་སོགས་པ་རང་རང་ཅི་འདོད་ཀྱི་དངོས་བོ་བཟའ་བས་མི་ཟད་པ། བཏུང་བས་མི་བྲི་བ། བསྒོས་པའི་མི་རྙིང་བ། རི་བོ་བས་འཕང་མཐོ་བ། རྒྱ་མཚོ་བས་གཏིང་ཟབ་པ། ཆུ་ཀླུང་བས་རྒྱུན་རིང་བ། ནད་ཀུན་སེལ་བའི་སྨན་མཆོག འཆི་བ་གསོ་བའི་བདུད་རྩི། སྡུག་བསྔལ་སེལ་བའི་རྩི་ཆེན་དུ་དམིགས་ཏེ་འབུལ་ལོ། །སྦྱིན་ནོ། །བསྔོའོ། །དེ་རྣམས་ཀྱི་འདོད་པ་ཚིམ་ནས། སེམས་ཅན་ཐམས་ཅད་ལ་བྱམས་པའི་སེམས་དང་། སྙིང་རྗེའི་སེམས་དང་། སྙིང་ཉེ་བའི་སེམས་དང་ལྡན་ནས་མི་དང་གནག་ཕྱུགས་ལ་གནོད་པའི་འཚེ་བ་སྤངས་ཏེ་འགྲོ་བ་མང་བོ་སྲོག་གི་འཇིགས་པ་ལས་ཐར་བར་གྱུར་ཅིག ཅེས་སོ། །

ཡང་། ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་ཆོས་སྐོར་ལས་རྡོར་ལེགས་ལ་གསུར་མཆོད་བྱེད་ཚུལ་ལས་ར་སྐྱེས་ཁམ་པའི་བམ་གྱི་རྭ་དང་རྨིག་བཞིའི་རྩིད་སྤུ་རྣམས་དོར་ཞིང་། གྲོད་པ་དང་རྒྱུ་མ་སོགས་ཀྱི་མི་གཙང་བ་རྣམས་ལེགས་པར་བསལ་ལ། དོན་སྙིང་དབང་བོ་ནང་ཁྲོལ་ཤ་ཚིལ་རུས་པ་པགས་པ་དང་བཅས་པ་ཞིབ་མོར་གཏུབ་ཏེ་གཙང་མར་བསྐམས་ནས། སྤོས་དཀར་དང་ཙན་དན་ཤུག་པ་སོགས་སྨན་སྤོས་བཟང་བོ་བསྲེས་ནས་ཕྱེ་གཙང་དང་སྦྱར་བའི་གསུར་རྫས་དང་། མ་འབྱོར་ན་ར་ཚིལ་སྤོས་དཀར་འབྲུ་ཕྱེ་སྦྱར་བ་ཙམ་ཡང་རུང་ལ། གསུར་རྫས་དུ་བ་མ་ཡལ་བར་མི་སྒུལ་བར་གསུངས་པ་དང་། ཡང་། དེ་ཉིད་ལས། དེང་སང་འགའ་ཞིག་གིས་ར་ལུག་སོགས་གསོན་པོར་མེར་བསྲེག་ནས་དམ་ཅན་དང་ཁྱབ་འཇུག་སོགས་ལ་གསུར་གཏོང་ཁུལ་བྱེད་པ་མུ་སྟེགས་ཀྱི་ལུགས་སྲོལ་རང་ཉིད་འཇིག་རྟེན་ཕྱི་མར་དམྱལ་བའི་མེར་བསྲེག་པའི་རྒྱུ་འབའ་ཞིག་སྒྲུབ་པར་ཟད་ཀྱི། སྲུང་མ་དགྱེས་པའི་ཐབས་སུ་འགྱུར་མི་སྲིད་པས་བློ་ལྡན་རྣམས་ཀྱིས་ངན་སྐྱུགས་ལྟར་དོར་བར་བྱོས་ཤིག་ཅེས་གདམས་ཡོད་དོ། །

༤ ཚ་གསུར་གྱི་ཕན་ཡོན། གསུང་རྒྱུན་ལ་དགྲ་བཅོམ་པ་ལྔ་བརྒྱར་ཞལ་ཟས་དྲངས་པ་དང་། ཚ་གསུར་བཏང་བ་ཕན་ཡོན་མཉམ་པར་བཤད་པ་དང་། ཐ་ན་ཨ་མདོའི་དམངས་གཞས་ལས་ཀྱང་། དམྱལ་བའི་འཕྲང་ལམ་བར་མ་ནས། །ཞིམ་པོའི་ཟས་ཞིག་ཟོས་ནི་མེད། །ཞིམ་པོའི་ཟས་ཞིག་ཟོས་ནོ་འདི། །སྔས་མགོ་བླ་མའི་ཚ་གསུར་རེད། །ཞེས་གསུངས་པ་ལས་ཀྱང་དམངས་ཁྲོད་དུ་ཚ་གསུར་དར་ཁྱབ་ཇི་ལྟར་ཆེ་བ་རྟོགས་ཐུབ་པ་དང་། གཞན་ཡང་། ཚེ་ལྡན་རྣམས་ཀྱང་གནས་སྐབས་སུ་བར་ཆད་སེལ་ཞིང་། བདེ་བ་ཅན་དུ་སྐྱེ་བ་སོགས་ཆོས་མཐུན་གྱི་བསམ་དོན་འགྲུབ་པ་དང་། མཐར་ཐུག་ཚོགས་གཉིས་རྫོགས་ཏེ་འཚང་རྒྱ་བར་འགྱུར་རོ། །ཞེས་པཎ་ཆེན་བློ་བཟང་ཆོས་རྒྱན་གྱིས་གསུངས་སོ། །

ཡང་། མི་ཕམ་པས། འདི་ནི་སྦྱིན་པའི་ཕར་ཕྱིན་རྫོགས་པ་དང་། བར་ཆད་ཞི་བའི་ཐབས་ཁྱད་པར་ཅན་ཡིན་པས། སུས་ཡང་ཉམས་སུ་བླང་བར་བྱ་ལ། ལྷག་པར་དུ་དུས་ངན་གྱི་སེམས་ཅན་རྣམས་བརྣབ་སེམས་དང་བརྐམ་ཆགས་འཕེལ་བའི་སྐབས་སུ། ཟ་འདྲེ་འགོང་བོ་མང་ཞིང་མི་ཕྱུགས་ལ་འཚེ་བ་དང་། ལོངས་སྤྱོད་ལ་གནོད་པ་མང་བའི་དུས་དང་། ཟས་ནོར་གྱི་ཕྱིར་ཡུལ་སྣ་ཚོགས་སུ་རྒྱུ་བའི་སྐབས་དང་། གཅན་སྤྱང་བྱི་བ་སོགས་ཀྱིས་གནོད་པ་དང་། འདྲེ་གནོད་དང་འདྲེ་དོགས་ཆེ་བའི་སྐབས་སོགས་སུ་སྙིང་རྗེས་ཀུན་ནས་བསླང་སྟེ་བྱས་ན་འཆི་བ་བསླུ། ནད་གདོན་བྲལ། སྲིས་རྨེ། མཐུན་རྐྱེན་འཕེལ། ཚོགས་རྫོགས་པ་སོགས་རང་གཞན་ལ་འཕྲལ་དང་ཡུན་གྱི་ཕན་པའི་དགོས་པ་དུ་མ་ཡོད་པ་ནི། སྨོས་མ་དགོས་པར་ནན་ཏན་བྱའོ། །ཞེས་དང་།

ཡང་། ཀུན་བཟང་བླ་མའི་ཞལ་ལུང་ལས། དཀར་གསུར་དམར་གསུར་ལ་སོགས་པ་འདི་དག་ཀྱང་མཁའ་ལ་རྒྱུ་བའི་ཡི་དྭགས་ཀྱི་རིགས་ལ་ཕན་ལྷག་པར་ཆེ་ཞིང་། དེ་ལ་བརྟེན་ནས་སེམས་ཅན་གྱི་སྲོག་ལ་ཟ་བའི་འབྱུང་བོ་མི་མ་ཡིན་པ་རྣམས། གནས་སྐབས་དྲི་གསུར་གྱི་ཟས་ཀྱིས་ཚིམ་པ་དང་། ཆོས་ཀྱི་སྦྱིན་པས་རྒྱུད་གྲོལ་བ་སོགས་ལ་བརྟེན་ནས་སེམས་ཅན་གྱི་སྲོག་ལ་མི་འཚེ་བས་སེམས་ཅན་མང་པོ་འཆི་བའི་འཇིགས་པ་ལས་སྐྱོབ་པས། སྐྱབས་ཀྱི་སྦྱིན་པའང་ཡིན་ཏེ། དོན་དུ་སྦྱིན་པ་རྣམ་པ་གསུམ་ག་ཚང་། ཞེས་ཀྱང་གསུངས་སོ། །

གཞན་སྟོན་པ་ཞལ་བཞུགས་དུས། ཕག་རྫི་མོའི་བུ་སྐྱེ་བ་སྔོན་གྱི་དྷ་སུའི་སྐབས་ཀྱི་ཉེས་པའི་རྣམ་སྨིན་གྱིས། ཁ་མེད་པ་ཞིག་ཏུ་སྐྱེས་པ་ལ། འཆི་ལ་ཐུག་པའི་ཚེ། ཕ་མ་ཅི་བྱ་གཏོལ་མེད་དུ་གྱུར་ཏེ། ཟས་སུ་གསུར་བཏང་བས་ཁོས་ལྟོ་བ་འགྲང་ནས། ཕྱིས་སུ་ཆོས་སྒོར་ཞུགས་པ། འབྲུག་པ་ཀུན་ལེགས་ཀྱི་རྣམ་ཐར་ན་ཡོད་པ་དང་།

ཡང་། རྗེ་བཙུན་མི་ལ་རས་པས་གཉའ་ནང་བདུད་འདུལ་ཕུག་ཏུ་སྒོམ་སྒྲུབ་མཛད་སྐབས། ཉིན་མཚན་བཅོ་བརྒྱད་དུ་ཁ་བ་བབས་པས། ཟླ་དྲུག་ལ་འགྲུལ་ལམ་ཁ་བས་བཀག་དུས། ཡོན་བདག་རྣམས་ཀྱིས་རྗེ་བཙུན་མུ་གེས་གྲོངས་པར་ཐག་བཅད་ནས་དགོངས་རྫོགས་བསྒྲུབས་ཏེ། སྐུ་གདུང་གདན་འདྲེན་དུ་ཕྱིན་དུས། ཁོང་སྔར་བས་གཟི་མདངས་ཆེ་བར་མཐོང་ནས། རྒྱུ་མཚན་ཞུས་ཙ་ན། རྗེ་བཙུན་གྱི་ཞལ་ནས། ང་ཕལ་ཆེར་ཏིང་ངེ་འཛིན་གྱི་ཟས་དང་མཁའ་འགྲོའི་ཚོགས་སྐལ་སོགས་དང་། ཁྱད་དུ་ཁ་རྩང་རྟའི་ཟླ་བའི་སྨད་ལ་ཁྱེད་བུ་སློབ་རྣམས་ཀྱིས་བཟའ་བཏུང་མང་བོ་སྟེར་བྱུང་བའི་ཉམས་ཤིག་ཤར་བ་ནས་ཟ་མ་ཟ་སྙིང་ཡེ་མི་འདོད་པ་ཞིག་བྱུང་བས། དེ་དུས་ཁྱེད་ཚོས་ཅི་བྱས་པ་ཡིན་གསུངས་པར། ཁོང་ཚོས་དགོངས་རྫོགས་སུ་མཆོད་པ་ཕུལ་ཚུལ་ཞུས་པས། རྗེ་བཙུན་གྱི་ཞལ་ནས། འཇིག་རྟེན་པ་རྣམས་ཀྱིས་དགེ་རྩ་བགྱིས་པ་བར་དོ་བ་ལ་ཕན་པར་འདུག་གོ ། ཞེས་སོ། །

ཡང་། བར་སྲིད་པ་ཞིག་མིའི་ཁོག་ཏུ་ཞུགས་ཏེ། འོད་སྣང་ཡོད་སར་སྡོད་མི་ཚུགས་པར་མུན་ཁམས་ནས་ང་ལ་ཟ་རྒྱུ་མེད། འཐུང་རྒྱུ་མེད། གྲོད་ཁོག་ལྟོགས་ཀྱི་འདུག་ཟེར་མཁན་ཞིག་ཁྲི་བྱང་རིན་པོ་ཆེའི་མདུན་དུ་ཡོང་བར། ཁོང་གིས་གསུར་བཏང་ཀྱང་། སྣ་ཤེས་ལ་ཚོར་བ་མེད་སྙམ་དུ་འདུག་པ་ལ། ཁྲི་བྱང་རིན་པོ་ཆེས་སྔགས་དྲུག་ཕྱག་དྲུག་ཅེས་གསུར་བསྔོས་གནང་བས། བར་སྲིད་ཁོག་ཞུགས་དེ་གསུར་ལ་ཆོབ་ཆོབ་ཅེས་ཟ་རྒྱུ་དང་ངོམས་རྒྱུ་ཡོད་པ་ལྟར་བྱས་ནས། ད་ང་གྲོད་ཁོག་རྒྱགས་སོང་། ཞེས་བརྗོད་པའི་ལོ་རྒྱུས་རྒྱལ་དབང་བཅུ་བཞི་བའི་ནང་ཆོས་ངོ་སྤྲོད་ལས་གསུངས་པ་དང་།

ཡང་། སྤྱི་ཚོགས་རྙིང་བའི་ནང། བོད་མི་མང་བོར་མ་ཉེས་ཁ་གཡོག་ཐེབས་ཏེ་འཛིན་བཟུང་བྱས་ནས། ཉིན་ཞག་མང་བོར་ཟས་བཅད་བཏང་སྟེ། མུན་ནག་ཏུ་བཀག་ཉར་བྱས་པས། ཡུལ་མི་ཀུན་གྱིས་ཕལ་ཆེར་གྲོངས་ཡོད་ལས་ཆེ་སྙམ་ནས་ཚ་གསུར་བཏང་བས། དུས་ཚོད་འཁྲུལ་མེད་དུ་སྣ་ལམ་ལ་རྩམ་དྲི་འཐུལ་བའི་རྒྱུ་མཚན་ད་ལྟ་ཡང་དངོས་སུ་བཤད་རྒྱུ་ཡོད་དོ། །གོང་གསལ་འདི་དག་ལ་གཞིགས་ན། གསོན་པོ་ཁ་ཅིག་ལའང་གསུར་གྱིས་ཕན་ཐོགས་པར་གདོན་མི་ཟའོ། །དེ་ཡང་ཚ་གསུར་གྱི་སྐོར་ཞིབ་ཏུ་རྟོགས་འདོད་པ་དག་གིས། མ་མཐའ་ཡང་། ཁྲི་སྤྲུལ་བློ་བཟང་རྒྱལ་མཚན་སེང་གེ བསྟན་དར་ལྷ་རམས་པ། བཀྲ་ཐང་བློ་བཟང་ཆོས་ཀྱི་ཉི་མ། ཆེ་ཤོས་ངག་དབང་བཤད་སྒྲུབ་བསྟན་པའི་ཉི་མ་སོགས་ཀྱི་ཚ་གསུར་གྱི་ཆོ་ག་ལ་བལྟ་བར་བྱའོ། །

དཀར་ཟས།

༡ སྲོག་གཅོད་ཀྱི་ལས་ངོས་བཟུང་བ། རྗེ་བཙུན་མི་ལ་སྐུ་མྱ་ངན་ལས་འདའ་ཁར། མདོར་ན། ཆོས་ཐམས་ཅད་ཀྱི་རྩ་བ། ལས་འབྲས་ལ་ཡིད་ཆེས་ཀྱི་དད་པ་འདི་ཁོ་ན་ཡིན་པས། ཞེས་བཀའ་བསྩལ་བ་བཞིན། དེའི་ཚུལ་ཡང་། མདོ་སྡེ་ལས་བརྒྱ་བ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡིན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །ཞེས་པ་ལྟར། སྤྱིར་བདེ་སྡུག་ཐམས་ཅད་ལས་ཀྱི་རྣམ་སྨིན་ལས་འབྱུང་ལ། འདིར་ལས་ལམ་བཅུའི་བྱེ་བྲག་སྲོག་གཅོད་པའི་ལས་ཀྱི་ངོ་བོ་ནི། ཡུལ་ཕ་རོལ་བོ་དུད་འགྲོ་སོགས་གང་ཡིན་ཡང་། དེ་ཉིད་གསོད་འདོད་ཀྱིས། གསོད་པའི་སྦྱོར་བ་དངོས་སུ་བརྩམས་ཏེ། དེའི་སྲོག་གི་དབང་བོ་འགག་པར་བྱེད་པའོ། །དེ་ཡང་སེམས་ཅན་ཕྱུགས་ལྟ་བུ་ལ་མཚོན་ན། གསོད་མཁན་གྱིས་ཡ་ང་བག་ཚ་མེད་པར་སུག་བཞི་བཀྱིགས། མཆུ་བསྡམས། ཁྲག་རྩ་བཅད། སྙིང་ཁྲག་དྲོན་མོ་རྒྱང་ངེ་ཐོན། ཧར་སྒྲ་འབྱིན། མིག་ཀླད་ལ་ལྡོག་པ་དང་། ཡང་ན། སྐེ་བྲེག་པ། གསོན་བཞིན་ཐབ་ཏུ་བསྲེགས་པ། འགྲོ་ལྡོག་བྱེད་བཞིན་ལྟོ་བ་བཤགས་ཏེ་ནང་ཁྲོལ་ཕྱུང་བ་སོགས། འཇིགས་ཤིང་སྐྱི་བུང་བའི་གསོད་ལུགས་དྲག་པོས། ཙེར་སྐད་ལྷང་ངེ། བཤང་གཅི་ཐར་རེ། མཆི་མ་ཤར་རེ། འཕག་འཚག་ལྷང་ངེ་དབུགས་ཀྱི་རྒྱུ་བ་གཅོད་པ་ནི། ཡ་རབས་དམ་པས་བལྟར་མི་བཟོད་པ་དང་། མ་རབས་ཐ་ཤལ་ཅིག་ཡིན་ཡང་། ཡིད་འགྱུར་ཐེབས་པ་འདི་དག་ནི་སྲོག་གཅོད་ཀྱི་ངོ་བོའོ། །ཞིབ་ཏུ་གཞི། བསམ་པ། སྦྱོར་བ། མཐར་ཐུག་བཅས་དངོས་གཞི་ཚང་མ་ཚང་སོགས་གཞུང་ལུགས་གཞན་ལས་ཤེས་པར་བྱའོ། །

༢ སྲོག་གཅོད་དང་དམར་ཟས་བསྟེན་པའི་ཉེས་དམིགས། སྲོག་གཅོད་ལ་ཉེས་དམིགས་ཆེ་བའི་རྒྱུ་མཚན་ནི། དམ་པ་ལྷ་ཆོས་ལྟ་ཅི། འཇིག་རྟེན་མི་ཆོས་ཀྱི་དྲང་ཐད་ནས་བཤད་ནའང་། རང་སྲོག་ལ་མི་གཅེས་པའམ། འཆི་བ་ལ་མི་འཚེར་བ་གཅིག་ཀྱང་མེད། ཁ་དཔེར་ཡང་། མི་བསྡད་སར་རང་སྡོད། ཟེར་བ་བཞིན། བདག་བཞན་བརྗེ་སྤོར་བརྒྱབ་སྟེ་བསམ་བློ་བཏང་ན། དེ་ལ་ཞེ་མི་འཚེར་བའམ་སྙིང་མི་རྗེ་བའི་རང་དབང་ག་ན་ཡོད། མི་སྐད་ཤེས་པ་དང་འཕྲལ་གྱི་ཀླད་པ་མྱུར་བུལ་གྱི་ཁྱད་པར་མ་གཏོགས་པ་སྡུག་བསྔལ་གྱི་ཚོར་བ་གཅིག་མཚུངས་ཡིན་པ་མཐོང་ཆོས་སུ་སྣང་སྟེ། སེམས་ཅན་དེ་དག་གསོད་ཚེ། སྲོག་གཅེས་ཀྱི་རྒྱུ་མ་དྲུད་ནས་བྱེར་བ། སྐད་ངན་མི་བཟད་པ་འདོན་པ། འཕག་འཚག་དང་། དངངས་སྐྲག་གི་རྣམ་འགྱུར་འདྲ་མིན་སྟོན་པ་སོགས་མངོན་སུམ་དུ་སྣང་བ་དེའོ། །འདི་ནི། ཚོམས་ལས། འཆི་བའི་མི་འཇིགས་གང་ཡང་མེད། །འཚོ་བའི་སྲོག་ལ་ཀུན་ཀྱང་འཛེམས། །རང་གི་ལུས་ལ་དཔེར་ལོངས་ལ། །གཞན་ལ་གནོད་པ་མ་བྱེད་ཅིག། ཞེས་པ་དང་མཐུན་སྣང་དུ་གྲུབ་བོ། །ཁྱད་པར་དུ། ཚེ་འདིའི་དབང་དུ་བཏང་ན་དམར་ཟས་ལ་བསྟེན་པའི་ཉེས་དམིགས་ཤིན་ཏུ་ཆེ་སྟེ། སྙིང་ནད་དང་ཁྲག་ཤེད་མཐོ་བ། ཁྲག་གར་མོར་གྱུར་ཏེ་ཁྲག་རྩའི་ནང་དུ་འཚངས་པ། ཤའི་ནང་གི་སྲིན་འབུ་ཕྲ་མོ་ལུས་ལ་ཞུགས་ཏེ་ནད་སྣ་ཚོགས་བསྐྱེད་པ། མི་ནི་གཅན་གཟན་ལས་རྒྱུ་མ་རིང་བས། ཤ་མི་འཇུ་བར་རྒྱུ་མ་ལ་ཡུན་རིང་གནས་པ་དུག་ཏུ་གྱུར་ཏེ། མཆིན་པའི་ཁུར་ལྗི་རུ་གྱུར་ནས། ཁྲག་ནད་བསྐྱེད་པ། རྒྱུད་དམུ་རྒོད་པོ། ཡ་ང་བ་མེད་པ། སེམས་དུག་ལྡན་པ། གཏུམ་དྲག་ཅན། ཅུང་ཟད་འགུལ་བསྐྱོད་བྱས་ཀྱང་ཐང་ཆད་པ། གཉིད་ཆེ་ཞིང་རིག་པ་མི་གསལ་བ་སོགས། རིག་གསར་ཚན་རིག་གིས་དཔྱད་བརྡར་ཞིབ་ཏུ་བཏང་སྟེ། ཚགས་པར་དང་བརྙན་འཕྲིན་ཁག་ལས་བརྒྱུད་སྒྲོགས་གནང་བ་མཐའ་ཡས་པས། དེ་དག་ལ་ཞིབ་ཏུ་གཟིགས་ན་ངེས་ཤེས་འདྲོངས་པར་འགྱུར་རོ། །

དམ་པ་ལྷ་ཆོས་ཀྱི་ཕྱོགས་ལས་བཤད་ནའང་། ལང་ཀར་གཤེགས་པའི་མདོ་ལས། བློ་གྲོས་ཆེན་པོ། སྲོག་ཆགས་ཡུན་རིང་བོ་ནས་འཁོར་བ་རྣམས་ལ། གང་ཕ་འམ། མ་འམ། སྤུན་ནམ། སྲིང་མོ་འམ། བུ་འམ། བུ་མོ་འམ། གཉེན་བཤེས་སམ། གཉེན་དང་གཉེན་ལྟ་བུར་གང་ཡང་རུང་བར་མ་གྱུར་བའི་སེམས་ཅན་དེ་ནི། རྙེད་པར་སླ་བའི་རྣམ་པ་གང་ཡང་མེད་དོ། །གཉེན་དང་གཉེན་ལྟ་བུར་གྱུར་བ་དེ་དག་ཚེ་གཞན་དུ་ལུས་བརྗེས་པ་རི་དྭགས་དང་། ཕྱུགས་དང་། བྱའི་སྐྱེ་གནས་གང་ཡང་རུང་བར་གྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་འདོད་པ། འབྱུང་བོ་ཐམས་ཅད་བདག་དང་འདྲ་བ་གྱུར་བར་འདོད་པས། སྐྱེ་བོ་སྲོག་ཆགས་སུ་གྱུར་བ་ཐམས་ཅད་ལས་བྱུང་བའི་ཤ་ཇི་སྐད་དུ་བཟའ་བར་བྱ། ཞེས་དང་། གཞན་ཡང་། སྟོན་པ་བཅོམ་ལྡན་འདས་ཀྱིས་འདུལ་བ་ལས། རྣམ་གསུམ་དག་པའི་ཤ་དེ་ཡང་། གནས་སྐབས་ཐབས་ལ་མཁས་པས་གནང་བ་ཙམ་མ་གཏོགས། དགོངས་གཞི་དོན་གྱིས་གནང་བ་མིན་ཏེ། མྱང་འདས་ལས། དེ་བཞིན་གཤེགས་པས་ཅིའི་ཕྱིར་ཤ་བཟའ་བར་མ་གནང་བ་ཡིན། བཀའ་བསྩལ་བ། ཤ་བཟའ་བའི་མིར་སྙིང་རྗེ་ཆེན་པོའི་ས་བོན་མེད་དེ། འོད་སྲུང་གིས་ཅིའི་ཕྱིར་རྣམ་གསུམ﹙མཐོང་ཐོས་དོགས་གསུམ་དང་བྲལ་བའི་ཤ﹚དག་པའི་ཤ་གནང་པ་ཡིན། བཀའ་བསྩལ་བ། འོད་སྲུང་དེ་ནི་ངས་ཁོང་ཚོས་ལམ་སེང་ཤ་ཟས་གཅོད་མི་ཐུབ་པར་འཇིགས་པ་བྱེད་པ་ཡིན་པས། གནས་སྐབས་ཙམ་སྟབས་བདེ་སླད་གནང་བ་ཡིན་ཏེ། དེ་ནི་ལས་དང་བོ་རྣམས་རིམ་བཞིན་ཤ་གཅོད་དུ་འཇུག་པའི་སླད་ཡིན་པས། རིམ་བཞིན་ཤ་གཅོད་དུ་འཇུག་པའི་ཆེད་དུའོ། །འོད་སྲུང། ངས་དུས་ད་ནས་བཟུང་གཏན་ལ་འབེབས་ཏེ། སངས་རྒྱས་ཀྱི་སློབ་མ་ཐམས་ཅད་ཀྱིས་འགྲོ་བ་སེམས་ཅན་གང་གིས་ཀྱང་ཤ་བཟའ་མི་ཆོག་གོ། ཞེས་ནང་བ་སངས་རྒྱས་པ་ཞིག་ཡིན་ཕྱིན་ཤ་བཟའ་བ་གཏན་གཅོད་བྱས་ཡོད་དོ། །

དེ་ལས་གཞན་མདོ་ལས། ང་མྱ་ངན་ལས་འདས་པའི་རྗེས་ཆོས་ཀྱི་སྙིགས་མའི་དུས་སུ། ལྷ་འདྲེ་འདི་དག་འཇིག་རྟེན་དུ་འུར་ཞིང་དར་ནས། དེ་དག་གིས་ཤ་ཟོས་པས་བྱང་ཆུབ་ཀྱི་གོ་འཕང་འཐོབ་བོ་ཞེས་འཆད་དོ། །ཀུན་དགའ་བོ་ངས་དགེ་སློང་རྣམས་ལ་རྣམ་པར་དག་པའི་ཤ་ལྔ་ཟ་བར་གནང་བ་ནི། ཤ་འདི་དག་ངའི་རྫུ་འཕྲུལ་གྱིས་བསྐྱེད་པ་ཡིན་གྱི། སྲོག་དང་འབྲེལ་བ་མ་ཡིན་ནོ། །ཁྱེད་ཅག་བྲམ་ཟེའི་གནས་དྲོད་གཤེར་དང་ལྡན་པའི་སྟེང་དུ་རྡོ་བ་དང་བྱེ་མ་དང་བཅས་པའི་རྩྭ་དང་ལོ་མ་མི་སྐྱེ་བས། ངས་སྙིང་རྗེ་ཆེན་པོ་དང་རྫུ་འཕྲུལ་གྱིས་བྱིན་གྱིས་བརླབས་ནས། འདི་ལྟ་བུས་བྱམས་སྙིང་རྗེ་ཆེན་པོས་རྫུན་པའི་ཤ་ཞེས་མིང་དུ་བཏགས་ནས་ཁྱེད་ཅག་གིས་རོ་མྱོང་བར་གྱུར་ཏོ། །དེ་བཞིན་གཤེགས་པ་མྱ་ངན་ལས་འདས་པའི་རྗེས་སུ། སེམས་ཅན་གྱི་ཤ་ཟ་བཞིན་དུ་ཇི་ལྟར་ཤཱཀྱའི་སྲས་ཞེས་བྱ། ཁྱེད་ཅག་ཤེས་པར་གྱིས་ཤིག སྐྱེ་བོ་ཤ་ཟ་བ་འདི་དག་བློ་སད་ནས་བསམ་གཏན་འཐོབ་པར་གྱུར་ན་ཡང་། དེ་དག་ཐམས་ཅད་སྲིན་པོར་གྱུར་ནས། ལས་ཀྱི་འབྲས་བུ་རྫོགས་ཏེ་ངེས་པར་སྐྱེ་འཆིའི་སྡུག་བསྔལ་གྱི་རྒྱ་མཚོར་ལྟུང་ངོ་། །དེ་བཞིན་གཤེགས་པའི་སློབ་མ་ཡིན་པའི་སྐྱེ་བོ་འདི་དག་ཕན་ཚུན་གསོད་པ་དང་། མིད་པ་དང་། ཟ་བ་དག་རྒྱུན་མི་ཆད་པ་འདི་དག་ཁམས་གསུམ་ལས་ཇི་ལྟར་འབྱུང་བར་འགྱུར། ཁྱོད་ཀྱིས་འཇིག་རྟེན་གྱི་སྐྱེ་བོ་དག་ཏིང་ངེ་འཛིན་ལ་སློབ་ཏུ་འཇུག་པས་ན། གཞན་གསོད་པའི་རྒྱུན་ཆོད་ཅིག་དང་། འདི་ལ་དེ་བཞིན་གཤེགས་པའི་སྔོན་གྱི་བཅོམ་ལྡན་གྱི་ཡང་དག་པའི་རྣམ་པར་དག་པ་རྨད་དུ་བྱུང་བའི་བསླབ་པ་གཉིས་པ་ཞེས་གསུངས་སོ། །ཞེས་དང་།

གཞན་ཡང་། ལང་གཤེགས་ལས། སྔོན་གྱི་དྲང་སྲོང་གི་ཟས་བོར་ནས་ཤ་གཟན་བཞིན་དུ་ཤའི་ཟས་ཀྱིས་ལྟོ་གང་ཞིང། ནམ་མཁའ་དང་། ས་དང་། ཆུ་ལ་གནས་པའི་འགྲོ་བ་ཕྲ་མོ་སྐྲག་པར་བྱེད་པ་རྣམས། འཇིག་རྟེན་འདི་དག་ཀུན་ཏུ་རྒྱུའོ། །འདི་དག་གིས་དགེ་སྦྱོང་ཉིད་ཉམས་སོ། །ཞེས་དང་། མྱང་འདས་ལས། ཤ་ཟ་བ་ནི་འགྲོ་ཡང་རུང་འདུག་ཀྱང་རུང་སྟེ། སྲོག་ཆགས་ཐམས་ཅད་དེའི་དྲི་ཚོར་ནས། དེས་འཇིགས་ཏེ། དཔེར་ན། མིས་ཤིང་ཀུན་ནམ་སྒོག་སྐྱ་ཟོས་ན། མིའོ་ཅོག་གི་སེམས་མ་དད་པར་འགྱུར་ཞིང་། མི་མཐུན་པར་འགྱུར་ལ། མི་མང་བོ་ཚོགས་པའང་སྐྱེ་བོ་མང་བོས་གང་བའི་ནང་དུ། སེམས་ཅན་དེ་དག་གིས་ཆེ་གེ་མོ་ཞིག་གིས་ཟོས་སོ། །ཞེས་པ་སོགས་མྱང་འདས་དང་། སྤྲིན་ཆེན། སོར་ཕྲེང་གི་མདོ་ལས་གསལ་བསྒྲགས་བྱས་ཡོད་པས། ཞིབ་ཏུ་དེ་དག་ཏུ་གཟིགས་པར་བྱའོ། །

བོད་ཀྱི་གཤིན་ཆོས་བྱེད་སྟངས།

༡ བར་དོ་འགྲུབ་ལུགས། འཆི་ལྟས་ལ་མདོ་རྒྱུད་སོགས་ལས་མང་དུ་བཤད་ཀྱང་། གསོ་རིག་རྒྱུད་བཞི་ལས། ལུས་ཀྱི་འཇིག་ལྟས་རྣམ་པ་བཞི་ཡིན་ཏེ། རིང་དང་ཉེ་བ་མ་ངེས་ངེས་པའོ། །ཞེས་མན་ངག་རྒྱུད་ཀྱི་ལེའུ་བདུན་པར་གསལ་ཞིང་རྒྱས་པར་གསུངས་པ་བཞིན། འཆི་ལྟས་ཀྱི་མཇུག་ཏུ་རྣམ་ཤེས་འཕོ་བ་སྟེ། དེ་ཡང་མིའི་ལུས་ལ་རྩ་དབུ་རྐྱང་རོ་གསུམ་ཡོད་པ་ལས། དབུས་ཀྱི་རྩ་དབུ་མའི་ནང་སྙིང་ཀའི་ཐད་ཀྱི་རྩ་མདུད་གསུམ་ཡོད་པའི་ནང་དུ། རྣམ་ཤེས་དང་བོ་གང་དུ་ཆགས་པའི་གནས་མི་ཤིགས་པའི་ཐིག་ལེ་རྒྱ་སྲན་ཙམ་ཡོད་པ་དང་། འཆི་བའི་དུས་ཀྱང་རྣམ་ཤེས་རགས་པ་རྣམས་རིམ་གྱིས་བསྡུས་ཏེ། ལུས་ཀྱི་འབྱུང་བ་རྣམས་ཐིམ་ཚར་རྗེས། རྣམ་ཤེས་ཤིན་ཏུ་ཕྲ་བ་དེ་ཉིད་མི་ཤིགས་པའི་ཐིག་ལེའི་དཀྱིལ་ནས་ཐོན་པ་དང་། ལུས་སེམས་ཀྱི་འབྲེལ་བ་ཆད་པ་སྟེ། འཆི་སྲིད་འགག་པ་དང་དུས་མཉམ་དུ་སྲང་མདའི་མཐོ་དམན་བཞིན་བར་དོ་གྲུབ་ལ། དེ་ཡང་སྐྱེ་བ་ཕྱི་མའི་བྱད་གཟུགས་བཞིན། བར་དོ་བ་དེ་དབང་བོ་ཀུན་ཚང་མངོན་ཤེས་ཡོད་པ། ལས་ཀྱི་རྫུ་འཕྲུལ་ཅན། སྐྱེ་གནས་དང་རྟེན་བྱིན་ཅན་མ་གཏོགས་གང་ལ་འང་ཐོགས་པ་མེད་པ། རིས་མཐུན་ལྷ་མིག་དག་པས་མཐོང་བའོ། །ཐ་མལ་བ་ཤི་བའི་རྗེས་སུ་རྣམ་ཤེས་ཁ་བྲལ་ཏེ་བར་དོ་གྲུབ་རྗེས་ཞག་ཞེ་དགུའི་ཚུན་ཆད་དུ་སྐྱེ་བ་ངེས་པར་ལེན་དགོས་ཏེ། ལམ་རིམ་ཆེན་མོར། ཚེ་ཚད་ནི་སྐྱེ་བའི་རྐྱེན་མི་རྙེད་ན། རེ་ལྟར་ཐོགས་ནའང་ཞག་བདུན་དུ་གནས་སོ། །རྐྱེན་རྙེད་ན་ནི་ངེས་པ་མེད་དོ། །མ་རྙེད་ན་ཡང་ལུས་བརྗེས་ནས་ཞག་བདུན་ཕྲག་བདུན་ཚུན་ཆད་དུ་གནས་ཀྱི། དེ་ཚུན་ཆད་དུ་ངེས་པར་སྐྱེ་བའི་རྐྱེན་རྙེད་པས་དེ་ཕན་ཆད་དུ་མི་གནས་སོ། །གཞུང་ཁུངས་མ་གང་ནས་ཀྱང་དེ་ལས་རིང་བ་མ་བཤད་པས། དེ་ལས་རིང་བར་འདོད་པ་ནི་མི་རིགས་སོ། །ཞེས་པའི་ལུང་འདིས་གྲུབ་ལ། ཡང་བཙུན་པ་དཔལ་ཆེན་གྱིས། ཇི་སྲིད་སྐྱེ་བའི་ཚོགས་པ་མ་རྙེད་བར་དུ་གནས་པས་ཚེ་ཚད་མཐའ་གཅིག་ཏུ་མ་ངེས་ཏེ། བར་སྲིད་ཚེ་རིང་ཐུང་གིས་དབང་གིས་དེའི་སྔོན་དུས་ཀྱི་སྲིད་པ་ཚེ་རིང་ཐུང་དུ་གྱུར་བའི་ཕྱིར་ཏེ། མདོ་མྱང་འདས་ལས། སངས་རྒྱས་འོད་སྲུངས་འཇིག་རྟེན་དུ་བྱོན་དུས། རྒྱལ་བོ་འོད་མཛེས་ཀྱི་སྲས་རྒྱལ་བུ་གཞོན་ནུ་ཤི རྒྱལ་བོ་བཙུན་མོ་འཁོར་དང་བཅས་པའི་མྱ་ངན་གྱིས་དབང་གིས་ལོ་གསུམ་ལ་བར་དོར་གནས་ཞེས་ཀྱང་གསུངས་ལ་བརྟག་པར་བྱའོ། །

ཡང་། ཀརྨ་ཆགས་མེད་ཀྱི་ལྷོ་སྒོའི་དམིགས་རིམ་ཐར་བའི་ལམ་སྟོན་ལས། སེམས་ཅན་གྱི་སྲོག་དང་དབུགས་ལེན་པ་པོ་ཐ་དད་དུ་ཕྱེས་ནས། སྤྱིར་ནི་སྦྱོར་བ་བྱེད་ལུགས་ངོས་བཟུང་བ། །དུས་གསུམ་སངས་རྒྱས་མན་ནས་སྲིན་བུ་ཡན། །སྲོག་གཅོད་གཤེད་ནི་ལས་ཀྱི་གཤིན་རྗེར་གསུངས། །འགྲོ་བ་ཀུན་གྱི་དབུགས་ནི་ལེན་པ་པོ། །དཔལ་ལྡན་ལྷ་མོ་ཡིན་པར་རྒྱུད་ལས་གསུངས། །ཞེས་ཀྱང་གསུངས་ལ། བར་དོ་བའི་གནས་ཚད་ཀྱང་། ཀརྨ་ཆགས་མེད་ཀྱི་མཚུན་བཅོས་ལས། ལ་ལ་ནི་མི་རབས་མང་བོར་ལུས་མི་ལེན་པར་བར་དོར་འདུག་དགོས་པའང་ཡོད་ཅེས་བཤད་པ་ནི་ནང་བསྟན་སྤྱིའི་ལུགས་ལྟར་ན་དོན་ལ་མི་གནས་པའི་གཏམ་མོ། །

བར་དོ་སྣང་ཚུལ་གྱི་ཁ་དོག་གི་ཁྱད་པར་ནི། མངལ་དུ་འཇུག་པ་ལས། དམྱལ་བའི་བར་དོ་ནི་སྡོང་དུམ་ཚིག་པ་ལྟ་བུ། ཡི་དྭགས་ཀྱི་བར་དོ་ཆུ་ལྟ་བུ། འདོད་པའི་ལྷ་དང་མིའི་བར་དོ་གསེར་ལྟ་བུ་དང། གཟུགས་ཁམས་པའི་བར་དོ་དཀར་བོར་གསུངས་སོ། །གཞན་ཡང་། སྲིད་པ་བར་དོའི་སྐབས་སུ་མ་ངེས་པའི་རྟགས་དྲུག་ཀྱང་སྣང་དུ་ཡོད་དེ། གནས་ངེས་མེད་རི་རྩེ་ཐང་སྟོང་ལ་སོགས་པར་ཡུད་ཙམ་རེ་སྡོད། རྟེན་ངེས་མེད་ཟམ་པ་མཆོད་རྟེན་ལ་སོགས་པར་ཡུད་ཙམ་རེ་བརྟེན། སྤྱོད་པ་ངེས་མེད་སྐད་ཅིག་རེ་ལ་སྣ་ཚོགས་རེ་བྱེད། ཟས་ངེས་མེད་རིགས་དྲུག་གི་ཟས་སྣ་ཚོགས་མཐོང་ཡང་མི་འཐོབ་པ། གྲོགས་ངེས་མེད་ལྷ་དང་འདྲེ་སྲིན་བར་དོའི་འགྲོ་བ་སྣ་ཚོགས་དང་ཡུད་ཙམ་རེ་འགྲོགས། སྣང་ཚུལ་ངེས་མེད་འཆར་སྒོ་བདེ་སྡུག་སྣ་ཚོགས་སྐད་ཅིག་ལ་འགྱུར་ལྡོག་བྱེད་པའི་སྣང་བ་འཆར་བ་སོགས་སོ། །

ཁ་ཅིག་གཤིན་པོ་དེ་གསོན་པའི་སྐབས་ཀྱི་རྣམ་པ་དང་ཆ་བྱད་ཇི་འདྲ་བ་ཡོད་པ་བར་དོ་ལ་བསྡད་འདུག་པས། འཕྲིན་དང་ལན་བསྐུར་ཚུལ་སོགས་ཟོག་རྫུན་ཡིན། དེ་འདྲ་རེ་གཉིས་སྲིད་ཀྱང་ཕལ་མོ་ཆེར་མི་མ་ཡིན་གྱིས་གཤིན་པོའི་གཟུགས་སུ་བསྒྱུར་བ་སྟེ། མདོ་ལས། དྲི་ཟ་ཁྱབ་བྱེད་དང་། གནོད་སྦྱིན་སྨྲ་འདོད། དྲི་ཟ་འཆི་ཁའི་སེམས་ལ་ཉེ་བར་འཇུག་པ་རྣམས་ཀྱིས་ཟས་འཚོལ་ཕྱིར་ཚེ་འདས་ཀྱི་གཟུགས་ཇི་ལྟ་བ་བཞིན་གཤིན་པོའི་དབྱིབས་བྱད་ཅན་མངོན་སུམ་དུ་མཐོང་བ་དང་། མིའི་ཁོག་ཏུ་བརླམས་ནས་དན་རྟགས་མང་བོ་སྨྲ་བ་ལྟ་བུས་འཇིག་རྟེན་པ་བསླུ་བར་བྱེད་པ་ཡིན། ཞེས་དང་། ཀརྨ་ཆགས་མེད་ཀྱིས། ཕ་མཚུན་དགྲ་བླ་ཀུན་གྱི་རྗེས་འབྲང་བའི། །ཡེ་ངམ་ནག་པོ་དྲིལ་ནག་སྤུང་སྐྲ་ཅན། །དམ་སྲི་བསེ་རག་ལྟོགས་འགོང་དབུལ་སྲི་དང་། །མཚུན་མིན་མཚུན་དུ་བརྫུ་བའི་བསེ་རག་རྣམས། །ཞེས་དང་། གཞན་ཡང་དྲི་ཟ་ཀུན་ཏུ་ཁྱབ་བྱེད་དང་། །གནོད་སྦྱིན་རྟོགས་འདོད་འབྱུང་བོ་བ་ར་ཧི། །དེ་སོགས་ནག་ཕྱོགས་བདུད་རིགས་མང་བོ་ཡིས། །འཆི་ཁར་དབུགས་ལེན་ཕུང་བོ་བདག་ཏུ་འཛིན། །ཚེ་འདས་གཟུགས་བཟུང་གསོན་པོ་རྣམས་ལ་གནོད། །ཚེ་འདས་ལ་བསྔོས་ཟས་སྐོམ་བར་ནས་འཇོམས། །ཚེ་འདས་ཡིན་པར་བརྫུས་ནས་ཆ་འཕྲིན་བསྐུར། །དེ་འདྲ་དཔག་ཏུ་མེད་པ་ཡོད་པའི་ཚུལ། །ཚེ་འཕོ་ཇི་ལྟར་འགྱུར་བའི་མདོ་ལས་གསུངས། །དེ་དག་རྣམས་དང་ཕྱེ་བར་མ་བྱས་ན། །གསོན་པོ་རྣམས་ལ་གནོད་པའི་གསོན་བདུད་ཟེར། །ཞེས་གསུངས་པར་མ་ཟད། དེ་བཟློག་ཚུལ་དང་བཅས་པ་བསྟན་ཡོད་དོ། །

དེའི་ཤེས་བྱེད་ནི། སྔོན་ཤཱཀྱ་དགའ་བྱེད་ཟེར་བ་ཤི་ནས། ཀུན་ཏུ་རྒྱུ་རྣམས་ཀྱིས་གཤིན་ཆོས་བྱེད་སྐབས། གཤིན་པོ་དེ་ཀུན་ནས་གཟུགས་དངོས་སུ་སྟོན་པ་ལ་བཟའ་བཏུང་སྟེར་བ་སོགས་བྱ་སྲོལ་ཡོད་པ་དེ་བཞིན་བྱས་ཏེ། ཉེ་དུ་རྣམས་ཀྱིས་དེ་ཤཱཀྱ་དགའ་བྱེད་དངོས་ཡིན་བསམ་པ་ན། སྟོན་པས་དྲི་ཟ་ཁྱབ་བྱེད་དང་། གནོད་སྦྱིན་གཏོགས་འདོད་སོགས་ཀྱིས་གཤིན་པོར་བརྫུས་པ་ཡིན་གསུངས་པ་ལ། དེ་དག་ཡིད་མ་ཆེས་པར། སྟོན་པས་ཤཱཀྱ་བ་རྣམས་ལ་འབྲུའི་ཐུམ་པོར་ཁྱིམ་སོ་སོའི་མིང་བྱང་བཅུག་པ་རེ་ཁྱེར་ཤོག་གསུངས་པས། ཤཱཀྱའི་མི་ཁྱིམ་ཧ་ཅང་མང་བོ་ཞིག་གིས་དེ་ལྟར་ཕུལ་བས། འབྲུའི་ཕུང་བོ་གླང་ཆེན་གྱི་རྒྱབ་ཁབ་ལོངས་པ་ཙམ་བྱུང་བ་རྣམས། སངས་རྒྱས་ཀྱིས་འདི་དང་འདིའི་ཡིན་ཞེས་གཅིག་ཀྱང་མ་ནོར་བར་ངོས་འཛིན་མཛད་པས་ཡིད་ཆེས་པ་བྱུང་། ཞེས་དང་། གཞན་ཡང་། རྗེ་མི་ལས་བོན་གྱི་ཁྱིམ་ཚང་ཞིག་ནས་མི་མ་ཡིན་གཤིན་པོར་བརྫུས་པ་དེ་མཐར་སྤྱུགས་བཏང་བའི་ལོ་རྒྱུས་ཡོད་པ་ལས་རྟོགས་ཐུབ་སྟེ། དེ་ནི་མི་ལའི་རྣམ་མགུར་གཤིན་དོན་ཐུགས་རྗེ་ལྕགས་ཀྱུ་ལས། རྗེ་མི་ལ་རས་པ་གཉའ་ནང་གྲོད་ཕུག་ན་བཞུགས་དུས། ལ་ཞིང་ཞེས་པའི་ས་ཆར་མི་ལའི་སློབ་མ་བོན་པོ་ཞིག་མཆིས་པ། འཆི་ཁར་གཤིན་དོན་དུ་མི་ལ་ཞུ་དགོས་པའི་ཁ་ཆེམས་ལྟར། རྗེ་བཙུན་ཞུས་དུས། རྗེ་བཙུན་དཔོན་སློབ་སྟེང་ཁང་དུ་བཞུགས། བོན་པོ་རྣམས་འོག་ཏུ་ཆོ་ག་བྱས་པས། དཀྱིལ་འཁོར་གྱི་རྩ་ན་སྔར་ཤི་བའི་བོན་པོ་དེ་སྔོ་ཐུལ་ཞོལ་ལེ་ཆང་འཐུང་ཞིང་འདུག་པ་པེ་ཏས་མཐོང་བ་དང་། པེ་ཏ་ལ་བོན་པོ་རྣམས་ན་རེ། མི་ལ་རས་པ་དག་ངེད་ཚོ་ལ་འཐབ་སྟེ། ངེད་ཀྱི་ཆོས་གཤིན་པོ་མངོན་སུམ་དུ་ཁུགས་པ་འདི་འདྲ་ཁོ་ལ་མེད་བཤད་པས། རྗེ་བཙུན་གྱིས་རྫུན་ཁུངས་བརྟོལ་ཕྱིར། ཞི་བ་འོད་བཏང་བས། གཤིན་གཟུགས་དེའི་རྗེ་བཙུན་གྱི་ཟིལ་མ་བཟོད་པར། ང་འགྲོ། ང་བོན་པོའི་བླ་འཁྱེར་མཁན་སྣང་ཡུལ་གྱི་བདུད་ངར་མི་ཟན་ཡིན། བོན་པོའི་ཆོས་ལ་གཏད་སོ་མི་འདུག་པས་རྔན་ཆན་བྱེད་འོང་བ་ཡིན། ཞེས་སྲང་བར་ནས་མར་སྔོ་ཐུལ་ཞོལ་ལེ་སོང་བ་དེད་པས། རི་ལོགས་ཤིག་ཏུ་སྤྱང་ཀིར་སོང་སྐད། དེ་ནས་རྗེ་བཙུན་གྱིས་བོན་པོ་རྣམས་ལ་ཡིད་ཆེས་བསྐྱེད་པའི་ཕྱིར། གཤིན་ད་ལྟ་ལུང་བའི་ཕུ་ཡ་གི་ན་ལྕི་སེར་སྐམ་པོ་ཞིག་གི་འོག་ན་འབུ་ཕྲ་ལ་རིང་བ་ཞིག་ཏུ་སྐྱེས་འདུག་ཅེས་ཐམས་ཅད་དེར་བྱོན་ཏེ། གསང་མཚན་ནས་བོས་ནས། ང་ཁྱོད་རང་གི་བླ་མ་མི་ལ་རས་པ་ཡིན་པས་འདིར་ཤོག་གསུངས་པ་དང་། ལྕི་བའི་འོག་ནས་འབུ་དེ་བྱུང་ནས་རྗེ་བཙུན་གྱི་སྐུ་འཕང་དུ་ཁྱིལ་ཉལ་སོང་བ་ལ། རྗེ་བཙུན་གྱིས་ཆོས་བཤད་དང་། འཕོ་བས་གནས་སྤོར་མཛད། རེ་ཞིག་དགོངས་པ་ལ་ཞུགས་ནས་ལམ་སྟོན་མཛད་པས། རྗེ་བཙུན་རིན་པོ་ཆེ། བདག་ཐར་བའི་བདེ་བ་ལ་བཀོད་པ་བཀའ་དྲིན་ཆེ་ཞེས་བརྗོད་ཅིང་སོང་བ་ཀུན་གྱིས་མཐོང་བས་ཡིད་ཆེས་པ་ལྟ་བུ་དང་། ཁྲུས་ཆོག་ལས་ཀྱང་། ཚེ་ལས་འདས་པའི་ཆ་བྱད་བཟུང་ནས། དེའི་ཉེ་འབྲེལ་དང་། འཇིག་རྟེན་པ་རྣམས་བསླུ་ཞིང་གནོད་པར་བྱེད་པའི་གནོད་སྦྱིན་དང་། ཤ་ཟ་དང་། འབྱུང་བོ་ལ་སོགས་པ་ཐམས་ཅད་གཏོར་མ་འདིས་ཚིམ་པར་གྱིས་ལ། གནོད་པ་དང་འཚེ་བའི་བསམ་པ་ངན་པ་ཐམས་ཅད་སྤོང་ལ། ཞེས་གསུངས་པ་ལྟ་བུའོ། །

༢ གཉིས་པ་བེམ་པོ་བཅོས་སྟངས། བོད་ཀྱི་ཡུལ་སྲོལ་དུ་བེམ་པོ་བཅོས་སྟངས་འདྲ་མིན་ཡོད་ཀྱང་། འདིར་ཤེས་ཚོད་ཙམ་ཞིག་ཞུ་ན། སྐྱེས་བུ་དམ་པ་རྟོགས་ལྡན་ཞིག་ཡིན་ན། སློབ་མའམ་གྲོགས་དམ་གཙང་རེ་གཉིས་ཀྱིས་རེག་ནས། སེང་གེ་འགྱིང་སྟབས་ལྟར་བཅོས་པ་སྟེ། སྐུ་ཕུང་གི་དབུ་བྱང་དང་། གདོང་ནུབ། ཞབས་ལྷོར་བསྟན། རྒྱབ་ཤར་དུ་བསྟན་ཏེ། གློ་གཡས་ས་ལ་ཕབ་ནས། ཕྱག་གཡས་པ་འགྲམ་པ་གཡས་པར་བརྟེན། ཞབས་ཀྱི་པུས་མོ་ཟུང་ཅུང་ཟད་བསྐུམ་ནས། སྣ་བུག་གཡས་པ་ནས་ཞེ་སྡང་གི་རླུང་རྒྱུ་བ་འགོག་ཆེད་སྲིང་བལ་གྱིས་བཀག་ཅིང་། སྐུ་ཕུང་སྟེང་ཆོས་གོས་རྣམ་གསུམ་འགེབས་སོ། །

ཡང་། རྟོགས་ལྡན་རེ་ཟུང་ཕྱག་ཐལ་མོ་སྦྱར་ཏེ་རྡོ་རྗེ་སྐྱིལ་ཀྲུང་ལ་བཞུགས་པ་ཡིན་ན། རང་འདོད་ཀྱིས་བསྒྱུར་བཅོས་བྱེད་མི་རུང་བ་དང་། དེར་མ་ཟད་ས་པཎ་གྱི་སྐུ་སྲིང་བཟོད་པ་རིང་མོ་དང་། རྒྱ་ནག་གི་ཧྭ་ཤང་འགའ་རེ་བཞེངས་བཞིན་དུ་འདས་པའང་ཡོད། ཉེ་འཁོར་དུ་སྤོས་བཟང་མི་སྒྲོན། རྒྱུ་མཚན་ནི། ཐུགས་དམ་གྱི་ཚེ་རུས་ཚིགས་ལྷོད་ཉེན་ཆེ། ཐུགས་དམ་དུ་བཞུགས་མེད་ཀྱང་། ལ་ལས་ཁེ་གྲགས་སོགས་ལ་དམིགས་ནས་བཙན་གྱིས་ཙོག་བཞུགས་བཅོས་པ་ཡིན་ན། ཡུལ་དེར་གནོད་རྐྱེན་དུ་འགྲོ་བར་དམ་པ་གོང་མས་ཞལ་ལས་ཐོས་སོ། །སེང་གེ་འགྱིང་སྟབས་དང་སྐྱིལ་ཀྲུང་གང་ལྟར་བཞུགས་རུང་། ལམ་སྔགས་སོགས་ཞལ་ཕྱེས། སྐུ་གདུང་གི་ཉེ་འཁོར་དུ་མཆོག་གསུམ་གྱི་རྟེན་དགྲམ་ཞིང་། ཅི་འབྱོར་བའི་མཆོད་ཚོགས་རྒྱ་ཆེར་བཤམས། དགེ་འདུན་གྱི་སྡེ་ལ་བསྙེན་བཀུར་དང་། སྐྱེ་བོ་མང་ལ་སྦྱིན་གཏོང་། མདོ་རྒྱུད་དང་པོ་ཏི་ལྔའི་རྩ་བ། ལམ་རིམ་དང་སྔགས་རིམ་སོགས་ཀློག་པ། རྒྱུད་སྡེ་བཞིའི་སྒྲུབ་མཆོད་སོགས་ཅི་ནུས་བྱའོ། །ཐུགས་དམ་སོགས་ཉིན་འགར་གསང་རྒྱ་བྱས་པའི་དབང་དུ་བཏང་ན། ཐུགས་དམ་མ་གྲོལ་གོང་དུ་སྐུ་ལ་སྒུལ་བསྐྱོད་མི་བྱེད་པ་དང་། ལམ་སྔགས་རེ་ཀློག་པ་ལས། མི་མང་ཚོགས་ནས་གདུང་ཆོག་མི་འདོན་པ་དང་། ཐུགས་དམ་གྲོལ་ནས་སྐུ་ཁྲུས་འབུལ་བ། གནས་ཡིག་འདོགས་པ་སོགས་བྱས་རྗེས་ཁྲི་ཁར་བཞུགས་སུ་འཇུག་པ་དང་། དེ་ནས་གདུང་མཆོད་ཀྱི་ཆོ་ག་སོགས་གོ་རིམ་ལྟར་བྱེད་དོ། །གདུང་མཇལ་གཏོང་དགོས་པའི་གོ་རིམ་ནི་རྗེ་འཇིགས་མེད་རིགས་པའི་བློ་གྲོས་ཀྱི་རང་རྣམ་དུ་གསལ་བས་དེར་བལྟ་བ་དང་། གཞན་ཡང་། ཞབས་དྲུང་ཆོས་རྗེ་ངག་དབང་ཚེ་རིང་གི་ཤི་བའི་ཕུང་བོ་ཇི་ལྟར་བྱེད་ཚུལ་དང་། དེ་མོ་ངག་དབང་དགེ་ལེགས་རྒྱལ་མཚན་གྱི་འཕོ་བ་དང་ཐུགས་དམ་དག་ལ་ངོ་སྤྲོད་པ་ཡེ་ཤེས་སྒྲོན་མེ་སོགས་ལ་བལྟ་བར་བྱའོ། །

མི་ཕལ་བར་རོ་བཅོས་བྱ་སྟངས་ལ། མའི་མངལ་གྱི་འདུག་སྟངས་ཏེ་ཙོག་པར་འདུག་པའི་སྟངས་ཀ་བྱེད་པ་ནི་བདེན་ཤས་ཆེ་སྟེ། འཇར་པན་གྱི་དམངས་སྲོལ་མཁས་ཅན་ཀྲུང་ཧྲན་སི་ལེས། མངལ་གྱི་འདུག་སྟངས་ལྟར་གཤིན་པོ་རོ་བཅོས་བྱས་པར་དགེ་མཚན་བཞི་གསུངས་ཡོད་དེ། གཅིག་ནས་སྲ་མཁྲེགས་ཀྱི་བྲག་སོགས་ལས་པུར་ཁང་སློག་སྐབས། ངལ་རྩོལ་སྟབས་བདེར་བཟོས་ཡོད་པ་དང་། གཉིས་ནས་དང་ཐོག་མངལ་གྱི་ཚེ། ཙོག་པར་བདེ་བར་གནས་པ་ལྟར། ཐ་མའི་ཚེ་ཡང་དེ་ལྟར་དར་གོས་ཀྱིས་ལྕིབས་ཏེ། མ་ཡུམ་ས་གཞིའི་པང་དུ་ལོག་པ་དང་། གསུམ་ནས་བདེ་བར་ཙོག་པོར་གཉིད་ལ་ཡུར་བའི་ཚུལ་གྱིས་གཤིན་བཅོས་བྱས་པ་དང་། བཞི་ནས་རོ་ལངས་རྒྱག་པ་སོགས་འཇིགས་རུང་གི་སྣང་ཚུལ་འགོག་སླད། འཕག་འགུལ་མི་ནུས་པའི་ཚུལ་གྱིས་བཀྱིགས་པ། ཞེས་གསུངས་པར་ཡང་གོ་རྒྱུ་ཡོད་དོ། །འཛེམ་བྱ་ནི། བེམ་པོ་ཡོད་སར་ཁྱི་དང་བྱི་ལའི་འགྲོ་འདུག་གཏན་འགོག་བྱེད་དགོས། རྒྱུ་མཚན་ནི། སེམས་ཅན་དེ་དག་གི་སྤུ་ལ་གྲ་ཡོད་པས། བེམ་སྟེང་དུ་ལྷུང་ན་རོ་ལངས་རྒྱག་པའི་ཉེན་ཁ་ཡོད་དོ། །

༣ སྤུར་སྦྱོང་ཚུལ། སྤུར་སྦྱོང་ཞེས་པ་ནི། དག་ཡིག་གི་དགོངས་དོན་ལྟར་ན། གཤིན་པོ་དེ་གཙང་བཟོ་བྱས་ཏེ་ཡང་དག་པར་སྦྱང་བ་ལ་བྱ་ཞིང་། བོད་དུ་སྤུར་སྦྱོང་བྱེད་པ་ལ་རིགས་མང་ཡང་བསྡུ་ན། སྤུར་སྦྱངས་བྱ་སྟངས་དྲུག་གི་ནང་དུ་འདུ་བར་སེམས་ཏེ། ༡ མེར་བསྲེགས་པ། ༢ བང་སོར་སྦ་བ། ༣ ཕུང་བོ་གཟན་ལ་བསྒྱུར་བ། ༤ གདུང་རྟེན་བཞེངས་པ། ༥ དམར་གདུང་དུ་འཇོག་པ། ༦ ཆུར་བསྐྱུར་བའོ། །

༡ ཕུང་བོ་མེར་བསྲེགས་པ། ཕུང་བོ་མེར་སྲེག་སྐབས་དུར་གྱི་ས་དཔྱད་ལ་གཞིགས་ཏེ། རུས་མཐོ་བ་དང་ཡོན་ཏན་ལྡན་པ། ཡང་ཚ་མཐོང་བའི་རྒན་པོ་ཡིན་ན། གདན་ཁྲི་ལྟ་བུའི་མཐོ་ས་དང་། རུས་དམན་པ་དང་ཡོན་ཏན་ཆུང་བ། ལོ་ཆུང་དག་དམའ་སར་འཇོག གྲིར་ཤི་དང་མཛེ་ཅན། གདུག་པའི་ནད་ཀྱིས་ཤི་བ་རི་སྣ་དང་བྲག་སྣ་མནོན་པའི་དམའ་ས་ལའོ། །

༡ ཕུང་བོ་སྲེག་སྦྱངས་གཏོང་བའི་དུས་ནི། ལྷ་མོ་བློ་བཟང་ཚུལ་ཁྲིམས་ཀྱི་འབྱུང་རྩིས་དཔག་བསམ་ལྗོན་ཤིང་ལས། ཕུང་བོ་གཏོང་བའི་རིམ་པ་ལ། །ཕྲན་ཚེགས་སོགས་ཀྱི་དགོངས་པ་བཞིན། །ཐུགས་དམ་བཞུགས་པའི་རྣལ་འབྱོར་བ། །མ་གྲོལ་བར་དུ་གཏང་མི་བྱ། །བཤེས་གཉེན་ཡོན་ཏན་ལྡན་པའི་ཚོགས། །ཞག་བདུན་འདས་ནས་གཏོང་བ་གཅེས། །ཐ་མར་རྣམ་ཤེས་ངེས་མེད་ཀྱང་། །ཞག་བཞི་འདས་ནས་གཏོང་བར་བྱ། །མདོར་ན་མཆོག་དམན་གང་ལའང་། །དཀར་དམར་ཁམས་ཀྱི་ཉི་ཟླའི་འགྲོས། །སྟེང་འོག་སྒོར་ཐོན་རྟགས་མེད་པར། །བསྲེག་པ་ལ་སོགས་སྤང་བར་བྱ། །

༢ སྲེག་སྟངས་ནི། གསང་སྔགས་ཀྱི་རྒྱུད་སྡེའི་ལས་གསུངས་པ་ལྟར། རྡོ་རྗེ་སེམས་དཔའ་དང་། མི་འཁྲུགས་པ་། ཀུན་རིག་སྟེ་ངན་སོང་སྦྱོང་བའི་ལྷ་གསུམ་གང་རིགས་ཀྱི་ཆོ་ག་ལྟར། རྫས་ཆེན་བཅུ་གཉིས་དང་སྲེག་ཤིང་ལ་མར་དང་སྣུམ་བྱུགས་ནས། ཚེ་འདས་ཀྱི་ཕུང་བོ་ལྔས་རྒྱལ་བ་རིགས་ལྔ་མཆོད་པའི་སླད་དུ། མེ་སྦར་ཏེ་ཐབ་གྱི་ནང་དུ་སྦྱངས་པ་ཡིན། ཡང་ན། པུར་ཙན་དན་གྱི་སྤུར་སྒྲོམ་མར་ཁུས་བཀང་བའི་ནང་དུ་བཞག་སྟེ། སྲེག་ཐབ་ཀྱི་སྟེང་དུ་བཞག་ལ། མེ་སྒྲོན་ཚུལ་ཡང་། ཀརྨ་ཆགས་མེད་ཀྱི་རོ་སྲེག་ཆོ་ག་ངན་སོང་གནས་འདྲེན་སྡུག་བསྔལ་མཚོ་སྐེམ་ལས། རང་གིས་ཆོས་འབྲེལ་ཞུས་པའམ། །རང་གི་ཉེ་དུ་ཡིན་ན་ནི། །རང་གིས་མེ་ནི་མི་སྦར་བར། །གྲྭ་བ་ཞིག་ལ་སྦར་དུ་བཅུག། ཐ་མལ་ཕུང་བོ་མེ་སྦར་བ། །ཉེས་པ་ཡོད་ཅེས་ལ་ལས་སྨྲ། །མེ་སྦར་མཁན་གཅིག་གླ་སྦྱིན་འཚོལ། །ཚེ་འདས་དེ་ཡི་མིང་ནས་འབོད། །མེ་ཐལ་གྲོས་ཞེས་བརྗོད་པ་ནི། །བླ་དེ་རོ་ལ་གནས་པའི་ཕྱིར། །དེ་ལ་སྐྲག་སྣང་འབྱུང་དོགས་ཟེར། །དེ་འདྲ་ལོག་པ་ཡིན་པའི་ཕྱིར། །དེ་འདྲའི་མིག་ལྟོས་མི་བྱ་བར། །མེ་ནི་སློབ་དཔོན་རང་གིས་སྦར། །ཞེས་གསུངས་ལ། བླ་མ་འམ་སྐྱེས་བུ་དམ་པ་ཞིག་ཡིན་ན། ཆོས་འབྲེལ་མེད་པ་ཞིག་གིས་ཕྱག་གསུམ་བཙལ་བ་ལ་དཔལ་འབར་གཏད་དེ། ཆོ་ག་བ་རྣམས་ཀྱིས་ཕལ་བ་རྣམས་ལ་གསོན་ཤིག་དགོངས་ཤིག་རིགས་ཀྱི་བུ། ཞེས་པའི་ཚབ་ཏུ། དཔལ་ལྡན་བླ་མ་དགོངས་སུ་གསོལ། །ཕུང་བོ་ལྔ་ཡི་བུད་ཤིང་ལ། །རྒྱལ་བ་ལྔ་ཡི་མེ་སྦར་རོ། །འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི་མེ་སྦར་རོ། །དབང་བོ་དྲུག་གི་བུད་ཤིང་ལ། །བྱང་ཆུབ་སེམས་དཔའི་མེ་སྦར་རོ། །ཡུལ་རྣམ་དྲུག་གི་བུད་ཤིང་ལ། །ལྷ་མོ་དྲུག་གི་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་དུ་འགྲུབ་པར་ཤོག། མེ་སྦར་རོ་ཞེས་སྔ་མ་རྣམས་ལ་སྦོར་བའི་སྟངས་ཀ་རེ་དང་། ཐ་མའི་སྐབས་སུ་དཔལ་འབར་མེ་ཚང་དུ་འཇུག་གོ། འོན་ཀྱང་ཕུང་བོ་ཞུགས་འབུལ་སོགས་ཕྱག་ལེན་གྱི་ཆ་ལ་བན་བོན་གཉིས་འདྲེས་མང་སྟེ། དུང་དཀར་གྲུབ་མཐའ་ལས། སྔོན་མ་ཁྲི་སྲོང་ལྡེ་བཙུན་སྐབས་བོན་ཆོས་བསྣུབས་དུས་བོན་གྱི་ཆོས་བྱེད་སྟངས་ཁག་གཅིག་རང་སོར་བཞག་ཡོད་པ་དཔེར་ན། མདོས་བཞེངས་པ། གླུད་གཏོང་བ། གཡང་སྒྲུབ་བྱེད་པ། གཏོར་ཟོར་འཕེན་པ། ལྕགས་མཁར་སྲེག་པ། རྔ་རྡུང་སྦུབ་དཀྲོལ། ཕུང་བོ་ཞུགས་འབུལ་བྱེད་པ་སོགས་ཡིན། དེ་དག་རང་སོར་འཇོག་དགོས་དོན་ནི། དེ་དག་མང་ཚོགས་ནང་ས་ཁྱབ་རྡོ་ཁྱབ་སོང་ནས་ཚང་མས་ཁས་ལེན་གྱི་ཡོད་པས་ཡིན། ཞེས་གསུངས་པས་སོ། །

དེ་ལྟར་གསང་སྔགས་ཀྱི་ཆོ་ག་ལྟར་བསྲེགས་ན། དུ་བ་ཕོག་པའི་བྱ་དང་རི་དྭགས། ཐལ་བ་ཆུར་འཕོས་ན་ཆུ་དེ་འཐུང་བའི་སེམས་ཅན་ཡོད་ཚད་ལ་ཕན་པ་རྒྱ་ཆེན་པོ་འབྱུང་ལ། ཚེ་འདས་དེས་ཀྱང་རང་གི་དབང་བོ་ལྔས་མཆོད་པ་བྱས་པའི་སྟོབས་ལ་བརྟེན་ནས། བདེ་འགྲོར་སྐྱེས་པར་གསུངས་ལ། དེ་ཡང་། སྒྲུབ་པ་པོ་དང་བསྒྲུབ་ཡུལ་ཚད་ལྡན་དགོས་སོ། །ཆོས་རྒྱལ་ཁྲི་སྲོང་ལྡེ་བཙན་སྐབས་སུ་ཡང་། སློབ་དཔོན་པད་འབྱུང་དང་ཅོག་རོ་ཀླུའི་རྒྱལ་མཚན་གྱིས་བསྒྱུར་བ་ཟ་བྱེད་རོལ་བའི་རྒྱུད་དང་། དུར་ཁྲོད་ཁུ་བྱུག་རོལ་བའི་མདོ། གཤིན་རྗེ་རོལ་བའི་རྒྱུད་སོགས་དང་། སློབ་དཔོན་པད་མའི་བཀའ་ཐང་དུའང་། སྲེག་སྦྱོང་རོའི་ལས། ཚེ་འདས་གཤིན་གྱི་ལས་སོགས་མཆིས་པ་ལྟར། ཚད་ལྡན་གྱི་གཞུང་དེ་དག་ལ་བརྟེན་ནས་སྲེག་སྦྱོང་གྲུབ་རྗེས། ཐབ་ལས་རུས་པ་ཕྱིར་བཏོན་ཏེ་རུས་ཆོག་བསྐུར་དགོས་པ་སྟེ། དེ་ཡང་ར་ག་ཨ་སེའི་ལྷོ་སྒོའི་དམིགས་རིམ་ཐར་བའི་ལམ་སྟོན་ལས། ཚན་ཆེར་སྔགས་པའི་བྱེ་མ་ཡོད་གྱུར་ན། །མི་དང་དུད་འགྲོའི་རོ་དང་རུས་པ་ལ། །ཕྱིར་ལྡོག་མིན་ཀྱང་འདེབས་རྒྱུར་བསྐུར་ན་ཕན། །དེ་ནས་ཁྲུས་ཀྱི་གོ་བ་ལེན་པ་ནི། །ཐུབ་རྣམས་སྡིག་སྒྲིབ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ཏེ། །འོན་ཀྱང་གདམས་ངག་བསྟན་ནས་སེལ་གསུངས་པ། །སྔགས་དང་ཏིང་འཛིན་མེད་པའི་ཆུ་གཙང་གིས། །ཕ་མའི་རུས་པ་བཀྲུས་ན་ཕན་ནོ་ཞེས། །ཕྱི་རོལ་བ་རྣམས་སྨྲ་བ་དགག་ཕྱིར་ཡིན། །སྔགས་ཅན་ཆུ་ཡིས་རང་བཞིན་ཁྲུས་བྱས་ནས། །ལུས་ཅན་སྡིག་པ་འདག་ཅེས་རྒྱུད་ལས་གསུངས། །ཞེས་པ་ལྟར་རུས་ཆོག་གནང་སྟེ། རུས་པ་ཕྱེ་མར་སྒྲུག་ནས་རི་མཐོ་ས་ལས་རླུང་ལ་བསྐྱོན་པའམ། ཡང་ན། རུས་པ་དང་གཟུངས་ཆུ་ས་དམར་དང་སྦྲུས་ཏེ་མི་འཁྲུགས་པའི་སྐུ་དང་ས་ཙྪ་བཏབ་ནས་རི་མཐོ་སར་སྐྱེལ་བའམ་ཆུ་ཀླུང་དུ་ཕྱགས་པ་ཡིན། ཀརྨ་ཆགས་མེད་ཀྱིས་བཀྲ་རྒན་གྱི་དཀར་རྩི་བླངས་ནས་ཁྱིམ་ཕུག་ཏུ་བཞག་ན་མི་རྒྱུད་ཕྲ་བ་ལ་སྲིད་འཕེལ་ཞིང་རྒུད་པ་དར། གཡང་དང་དཀོར་བདག་འགུགས་པར་བཟང་བར་བཤད་ལ། དཀར་རྩི་མེད་ན་ཤིང་རིས་དང་མདའ་དར་ལུག་མགོ་ཤིང་རྩི་དཀྱིལ་ཀ་ལ་བཅིངས་པར་ཡང་བཤད་དོ། །

༣ རུས་པ་བཏུལ་ཚུལ་ཡང་། ཀརྨ་ཆགས་མེད་ཀྱི་རོ་སྲེག་ཆོ་ག་ངན་སོང་གནས་འདྲེན་སྡུག་བསྔལ་མཚོ་སྐེམ་ལས། ཚེ་འདས་དེ་ཡི་སློབ་མ་དང་། །ཉེ་འབྲེལ་མིན་ཅིང་སྡིག་ཆེན་མིན། །དེ་འདྲ་ཞིག་གི་རུས་པ་བཏུལ། །ཆུས་སྦྱོང་ཕུག་རོན་དང་རུ་ཙམ། །དེ་ཡིས་ས་སྤྲུས་འཇིམ་པ་བྱ། །ཞེས་དང་།

༤ རུས་པ་ཆུར་གཤེགས་པའི་ཕན་ཡོན་ཡང་། ཀརྨ་ཆགས་མེད་ཀྱི་ཞི་ཁྲོའི་སྒོ་ནས་ཕུང་བོ་སྲེག་སྦྱང་ལས། ཐལ་སོལ་ཆུ་ཆེན་ལ་དོར་བས་ཆུ་འཐུང་གི་སེམས་ཅན་སྒྲིབ་པ་དག་པའི་ཆེད་ཡིན་པས་འབྲེལ་ཚད་དོན་ལྡན་དེ་ལྟར་བྱའོ། །ཕལ་བའི་ཐལ་སོལ་ཀླུ་མེད་པའི་ས་བཀྲ་བཟང་སར་བླུགས་པས་བཀྲ་ཤིས་པར་ཡང་བཤད་དོ། །ཆུ་ཀླུང་དུ་གཤེགས་དུས་པཎ་ཆེན་བློ་བཟང་ཆོས་རྒྱན་སོགས་ཀྱི་ས་ཙྪ་ཆུ་གཤེགས་ཞེས་པའི་ཆོ་ག་འང་ཡོད་དོ། །ཕུང་བོ་མེར་སྲེག་སྲོལ་འདི་སྤུར་སྦྱོང་ལས་མཆོག་གྱུར་ཞིག་ཏུ་བཤད་དེ། རྗེ་འཇིགས་མེད་རིགས་པའི་བློ་གྲོས་ཀྱིས། བདག་ཅག་སྟོན་པ་རྣམ་འདྲེན་ཤཱཀྱའི་རྒྱལ་བའི་རིང་ལུགས་པ་ཞིག་ཡིན་ཚེ། ཁོང་གི་མཛད་པ་དང་བསྟུན་ཏེ་རང་ཅག་ལ་ཅི་འདྲས་བཀའ་དྲིན་ཆེ་བའི་བླ་མ་དང་སློབ་དཔོན་ཡིན་ནའང་། རྒྱུད་སྡེ་དང་མཐུན་པར་གདུང་ཞུགས་ལ་ཕུལ་ནས་སྦྱངས་ཆོག་བྱས་པའི་རུས་ཕྱེ་རྣམས་སྨན་འདམ་དང་སྦྱར་ཏེ། སྐུ་འམ་ས་ཙྪ་རེ་བཞེངས་ན་དེ་ལྷག་མེད་ཅེས་བདག་གིས་ཐལ་མོ་སྦྱར་ནས་གསོལ་བ་འདེབས་སོ། །ཞེས་གསུངས་སོ། །

༥ སྲེག་ཆོག་ལྟར་པུར་སྦྱོང་བྱས་པའི་ཕན་ཡོན་ནི། སྦྱོང་རྒྱུད་ལས། དེ་ཡི་མིང་ནས་བརྗོད་ནས་ནི། །མཁས་པ་འབུམ་ཕྲག་བརྒྱ་འམ་ནི། །ཡང་ན་བརྒྱ་ཕྲག་སྟོང་ཉིད་དུ། །སྦྱིན་སྲེག་བྱས་པར་གྱུར་ནས་ནི། །དམྱལ་བ་ཆེན་པོར་ལྟུང་བའི་མི། །སྡིག་པ་དེ་ལས་ཐར་བར་འགྱུར། །ཞེས་དང་། གསང་འདུས་རྒྱུད་ལས། རྣམ་ཤེས་ལྔ་བྲལ་བེམ་པོའི་ལུས། །བག་ཆགས་སྦྱང་བས་ཐར་བ་འཐོབ། །སྦྱང་ཤེས་ཕྱི་དང་ནང་གིས་སོ། །སྦྱོང་བྱེད་འབྱུང་བ་ཡེ་ཤེས་མེ། །འབྱུང་བའི་མེ་ཡིས་བག་ཆགས་སྦྱངས། །ཡེ་ཤེས་མེ་ཡིས་ཉོན་མོངས་བསྲེག །ཅེས་དང་། སློབ་དཔོན་པདྨས། དེ་ལྟར་བྱས་པའི་ཡོན་ཏན་ནི། བླ་མ་གང་ཟག་བཟང་བོ་ཞིག་ཡིན་ན། ཐུགས་ཀྱི་དགོངས་པ་མཐའ་རུ་ཕྱིན་པར་བྱེད། རྣལ་འབྱོར་པ་ཡིན་ན་ཕྱིར་མི་ལྡོག་པའི་ས་འཐོབ། སྐྱེ་བོ་ལ་སོགས་ཕལ་བ་ཡིན་ན། རིགས་དྲུག་གི་སྐྱེ་སྒོ་ཆོད་པའོ། །རང་བྱུང་ཡེ་ཤེས་ཀྱི་མེས་ལས་དང་བག་ཆགས་སྦྱོང་། སྐུ་གསུམ་ཡོངས་སུ་རྫོགས་པར་གསུངས་སོ། །

རྒྱས་པར། བཀའ་འགྱུར་བ་བློ་བཟང་ཚུལ་ཁྲིམས་ཀྱི་རོ་སྲེག་སྡིག་སྦྱོང་མུན་སེལ་སྒྲོན་མེ་ཐར་ལམ་གསལ་བྱེད་དང་། དབལ་མང་དཀོན་མཆོག་རྒྱལ་མཚན་གྱི་གཤིན་པོའི་སྦྱང་ཆོག་གི་བཤད་པ་དྲིས་ལན་དང་བཅས་པ་སོགས་སུ་བལྟ་བར་བྱའོ། །

༢ བང་སོར་སྦ་སྟངས། ༡ བང་སོ་འདེབས་སྟངས་དངོས། མིའི་རིགས་ཀྱི་ཚེ་ཚད་རྫོགས་ཏེ་རྣམ་ཤེས་ཀྱིས་བཏང་བའི་བེམ་པོ་དང་དགོས་ཆས་རྣམས་ཚགས་སུ་ཆུད་པ་ལ་དུར་དང་། དེར་ས་གནས་ཞིག་གཏན་འཁེལ་བྱས་ཏེ་ས་འོག་ཏུ་སྦས་པ་ལ་དུར་སྦས་ཞེས་བརྗོད་པ་ཡིན། དེ་ཡང་མི་ཕལ་བ་ལ་དུར་སྦས་དང་། རླབས་ཆེན་གྱི་མི་སྣ་འཇོག་ས་ལ་བང་སོ་ཞེས་བརྗོད་པ་རེད། མིང་གི་རྣམ་གྲངས་ལ། མཆད་པ། རིང་ཁང་། བམ་ཆེན། མདང་གནས། བང་ཆེན། པུར་ཁང་། དུར་ས། དུར་ཁྲོད། དུར་གནས་བཅས་ཟེར། བང་སོའི་ནང་དུ་སྦས་ནས་དུར་འཇུག་བྱེད་སྟངས་འདི། འཛམ་གླིང་རྒྱལ་ཁབ་ཁག་དང་མི་རིགས་ཕལ་ཆེར་ལ་དར་སོ་ཆེ་ལ། རྒྱུ་མཚན་ནི། དེང་སང་ཕྱོགས་ཡས་མས་ན་བང་སོ་བྲུས་ཏེ་གནའ་རྫས་སྔོག་འདོན་བྱེད་པ་ལས་རྟོགས་ཐུབ། དེ་ཡང་མི་སྣ་རླབས་ཆེན་ལ་དཔལ་འབྱོར་གྱི་འགྲོ་གྲོན་འབོར་ཆེན་བཏང་བ་དང་། མི་ཕལ་བར་རང་བཞིན་གྱིས་ས་དུར་བྱེད་སྲོལ་གཉིས་ཡོད། འདི་ནི་བོན་གྱི་ལུགས་སྲོལ་ཞིག་ཡིན་ཚུལ་བཀའ་ཐང་དང་དེབ་དཀར་ལས་བཤད་ལ། དེ་ཡང་མཚོ་སྔོན་ས་ཁུལ་གྱི་རྡོ་ཆས་གསར་མའི་དུས་རབས་ཀྱི་རིག་གནས་ཤུལ་རྫས་རྙེད་པ་ལས་བྱུང་བའི་དུར་དང་། སྤྱི་ལོ ༡༩༧༤ དང་༧༥ ལོའི་དཔྱིད་ཀའི་བར་སྔ་རྗེས་སུ་ཉིང་ཁྲི་ས་ཁུལ་ནས་རྡོ་ཆས་གསར་མའི་དུས་རབས་ཀྱི་མིའི་རུས་པའི་ལྷག་མ་དང་དུར་ས། ཆུ་གོང་གནའ་ཤུལ། ལྷོ་ཁའི་ལྷུན་རྩེ་རྫོང་། སྣེ་གདོང་རྫོང་། གཞིས་རྩེའི་རིན་སྤུངས་རྫོང་སོགས་ལས། སྔ་རྗེས་སུ་བཙལ་རྙེད་བྱུང་བའི་རྡོ་སྒམ་དུར་རམ་བང་སོ། བྱང་ཐང་དང་སྟོད་མངའ་རིས་སོགས་ལས་རྙེད་པའི་རྡོ་ཕུང་དུར་རམ་བང་སོ་དང་། ཁྱད་པར་དུ་ཆབ་མདོའི་ཁ་རུབ་ནས་རྙེད་པའི་རྡོའི་པུར་སྒམ་ནང་གི་རུས་སྒྲོམ་དང་། རྫ་ཆས་སོགས་རྙེད་པས། ལོ་ངོ་བཞི་སྟོང་ལྔ་སྟོང་ལྷག་གི་སྔོན་ལ་བོད་དུ་གདོད་མའི་ཆོས་ལུགས་ཤིག་ཡོད་པར་ར་སྤྲོད་བྱེད་པ་ཡང་། དོན་དུ་བོན་ཆོས་འདི་ལས་མ་འདས་ལ། བང་སོའི་ནང་དུ་རིན་པོ་ཆེ་དང་དངོས་རྫས་སྣ་ཚོགས་འཇོག་སྲོལ་ཡོད་པ་ལས་གཞན། བོན་གྱི་དུར་ཆོག་རྣམས་སུ། ཉ་ཕག་ར་ཤ་རྒྱུ་མ་འདི། །ཁྱོད་ཀྱི་དུར་རྒྱགས་རྫོངས་སུ་འདེབས། །འདི་ལ་དུར་གྱི་རྒྱགས་སྐལ་གྱིས། །གསོན་གྱི་ཟས་གཡང་མ་རྐུ་ཞིག། ཅེས་ཀྱང་གསུངས་ཡོད་དོ། །

དེ་ཡང་པུ་དེ་གུང་རྒྱལ་གྱི་ཡབ་གྲི་གུམ་བཙན་པོའི་སྤུར་ཟངས་ཆེན་ཁ་སྦྱོར་གྱི་ནང་དུ་བཅུག་སྟེ་གཙང་ཆུའི་གཞུང་ལ་བསྐྱུར་བ་ཀོང་པོར་བུད་པ་དེ། བླུས་ནས་འཕྱང་བ་དར་ཐང་དུ་དུར་བཏབ་པ་འདི། བོད་ཀྱི་ཡིག་ཚང་རྣམས་སུ་བང་སོའི་ཐོག་མ་ཡིན་པར་བཤད་ཀྱང་། ལོ་ངོ་སྟོང་ཕྲག་ལྔ་དྲུག་ཡན་གྱི་སྔོན་ནས་ཡོད་པ་བོད་ཀྱི་ས་གནས་སོ་སོ་ནས་བུད་པའི་དུར་རྫས་རྣམས་ཀྱིས་ར་སྤྲོད་བྱེད་ཐུབ། གྲི་གུམ་གྱི་བང་སོ་ས་ལ་བཏབ་པ་དེ། སྤ་སྟོན་བསྟན་རྒྱལ་བཟང་བོས་གསུངས་པ་བཞིན། རྒྱལ་དུར་ལ་དེ་སྔ་བས། ད་ལྟ་རྗེའི་དུར་ས་བང་སོ་ཁྲོད་བྱ་བ་ཡོད། སྲིད་པའི་བང་སོ་ས་ལ་ཟུག་པ་ཡང་དེ་ལགས་སོ། །ཞེས་པ་ལྟར་བོད་ཀྱི་རྒྱལ་དུར་ལ་སྔ་ཤོས་སུ་བཟུང་ན་འགྲིག་གོ། དེའི་ཕྱིས་སུ། བཀའ་ཐང་སྡེ་ལྔ﹙མི་རིགས་དཔེ་སྐྲུན་ཁང་གི་ལྕགས་པར་ཤོག་གྲངས༡༥༣-༡༥༦ བར་གསལ﹚ལས། རྒྱལ་བོ་ཐོ་རེ་སྙན་ཤལ་སྐུ་རིང་ལ། ཡུམ་བུ་བླ་མཁར་གོང་ཡ་ཚད་བྲག་མཐའི་སྐྱིབས་ན། བང་སོ་དམར་བོ་དང་། རྒྱལ་བོ་འབྲོང་གཉན་ལྡེ་རུའི་བང་སོ་བརྩིགས་ཚུལ་བཀོད་ཡོད་པ་དང་།

ཡིག་ཚང་རྣམས་སུ། རྒྱལ་བོ་སྔོན་མ་རྣམས་ཀྱི་བང་སོའི་དབྱིབས་ས་ཕུང་སྤུངས་པ་ལྟ་བུ་ལས། བཟོ་དབྱིབས་མེད་པ་བོད་རྗེ་གྲི་གུམ་བཙན་པོ་ནས་ཁྲི་གཉན་གཟུགས་བཙན་བར་དུ་གསལ་ལ། འབྲོང་གཉན་ལྡེ་རུ་བང་སོར་གསོན་པོར་བཅུག་སྟབས། གུར་གྱི་དབྱིབས་ལྟ་བུ་ཟླུམ་པོ་ཡིན་པ་དང་། དེའི་རྗེས་གནམ་རི་སྲོང་བཙན་ནས་བང་སོ་གྲུ་བཞི་བརྩིགས་སྲོལ་དར་ཏེ། མངའ་བདག་རལ་བ་ཅན་གྱི་བར་དང་། དེ་ཡང་གྲུ་བཞི་སོག་པའི་རུས་ལེབ་དང་འདྲ་བར་སྒབ་ཆེ་མགོ་ཆུང་ཞིག་ཡོད། ལྷག་པར་ཆོས་རྒྱལ་སྲོང་བཙན་གྱི་བང་སོ་ནི། སྲོང་བཙན་བང་སོའི་དཀར་ཆག་ནང་། སྲོང་བཙན་བང་སོ་ཆུ་བོའི་མདའ་རུ་ཆགས། །ཆེ་ཆུང་ཚད་ནི་དཔའ་ཆེན་མདའ་རྒྱང་གང་། །སྟེང་གི་ཞེང་ནི་ཉག་གི་རྡོ་རྒྱང་གང་། །ནང་དུ་ལྷ་ཁང་ལྔ་ཡི་བཞུགས་སུ་གསོལ། །བང་སོ་ནང་རྒྱན་ཅན་དུ་གྲགས་པ་ཡིན། །གསང་བའི་མཚན་ནི་མུ་རི་སྨུག་པོ་ཞེས། །འཛམ་བུ་གླིང་གི་ནོར་ཕུད་ལན་གསུམ་བསྡུས། །ལྷ་ཀླུ་མི་ཡི་སྐྱེ་འགྲོའི་བདེ་སྐྱིད་བསྐྲུན། །ཞེས་གསུངས་ཡོད་པ་དང་། ཡང་། དེབ་ཐེར་འགར། བང་སོ་འདིར་རེའུ་མིག་དགུ་ཡོད་པའི་དབུས་སུ་བཙན་པོའི་སྐུ་ཕུང་གསེར་གྱི་བཏུམས་པ་བཞུགས་ཤིང་། ནང་གི་རེའུ་མིག་ཐམས་ཅད་ནོར་གྱིས་བཀང་བ། ཕྱིའི་དབྱིབས་གྲུ་བཞི། ནང་དུ་ལྷ་ཁང་ལྔ། དབུས་སུ་རིང་ཚད་ཁྲུ་ཙི་བརྒྱད་ཙམ་ཡོད་པའི་བྱུ་རུའི་སྡོང་བོ་དང་། རྒྱལ་བོ་དང་རྒྱ་བཟའ། བལ་བཟའ་གསུམ་གྱི་འཇིམ་སྐུ་བཞུགས་ཤིང་། ཟུར་བཞིའི་མཆོད་ཁང་ནང་རིན་པོ་ཆེ་སྣ་ཚོགས་ཀྱིས་བཀང་བའི་བང་མཛོད་དང་། ནང་གི་འོག་བཞིར་རྡོ་གཅལ་བཏིང་བ། ཕྱི་སྐྱ་གྱང་ས་མཐུག་པོ་བསླངས་ཤིང་། ནང་སྐྱ་རྡོ་རྩིག་ཅན། བང་སོའི་སྒོ་མོ་ནུབ་ཕྱོགས་སུ་བསྟན་པ། བང་སོའི་ཕྱི་ར་ས་སྨུག་པོ་དང་། རྡོ་ཧྲུག་གིས་བཀབ་ནས་རི་ཆུང་དེའུ་འབུར་ཞིག་དང་འདྲ་བར་གྱུར་བ། དེའི་མཐའ་བསྐོར་དུ་ཞེང་ཚད་གོམ་པ་བརྒྱ་ལྷག་ཙམ་དང་། མཐོ་ཚད་གཞུ་འདོམ་བཅུ་གཉིས། བང་སོའི་རྩེ་མོར་ལྷ་ཁང་ཆུང་ངུ་ཞིག་བཅས་ཡོད་པར་བཤད་དོ། །སྙིགས་མའི་དུས་སུ་ཆུ་བོས་འཇིག་སྟེ། གནམ་སྒོ་ཕྱེ་རྒྱུ་ཡོད་པ་སོགས་བརྗོད་པ་ལྟ་བུ་དང་། ཡང་། རྒྱ་ནག་གི་རྒྱལ་རབས་སུ། རི་མཚམས་བང་སོ་རི་ཆུང་ནང་བཞིན་མང་བོ་ཡོད། བང་སོའི་འཁྲིས་སུ་ཁང་བ་ཆུང་ངུ་རེ་ཡོད། ཁང་བའི་སྟེང་ལ་སྟག་རིས་དཀར་བོ་བྲིས་ཡོད། ཅེས་ཀྱང་འབྱུང་། རྒྱལ་བོ་བཀའི་ཐང་ཡིག་ལས། ཆོས་རྒྱལ་སྲོང་བཙན་སྒམ་པོའི་མཛད་འཕྲོ་བསྡུས་ལུགས་ལ། སངས་རྒྱས་རྣམས་ཀྱིས་སྤྲུལ་བ་བསྡུས་པ། ནང་བློན་རྣམས་ཀྱིས་ལྷ་ལ་ཐིམ་པ། རྒྱལ་བརྒྱུད་རྣམས་ཀྱིས་ཡར་ཀླུང་སྨུག་རིར་བང་སོ་བརྩིགས་ལུགས་གསུམ་དུ་མཐོང་པ་ལས། བང་སོའི་བརྩིགས་ཚུལ། སྲུང་མཁན། མཆོད་ལུགས་སོགས་འཁོད་ཡོད་དོ། །

འདིར་བོད་ཀྱི་རྒྱལ་བོ་རིམ་བྱོན་གྱི་བང་སོ་བརྩིག་ཡུལ་དང་ལོ་ཚིགས་རགས་བསྡུས་ཙམ་བཀོད་ན། གྲི་གུམ་བཙན་པོའི་བང་སོ་སྤྱི་ལོ་དུས་རབས་དང་བོའི་ནང་ཕྱིང་ཡུལ་དར་ཐང་དུ་བཏབ། འདི་ནས་བཟུང་བོད་དུ་རྒྱལ་དུར་ཐོག་མ་དར། བྱ་ཁྲིའི་བང་སོ་དུས་རབས་དང་བོའི་ནང་གཡའ་དང་རྫ་ལ་བཏབ། ལེགས་དྲུག་བང་སོ་དུས་རབས་དང་བོ་ནས་རིམ་བཞིན་དོན་མཁར་གཡའ་སྤང་མཚམས་སུ་བཏབ། ལྡེ་བརྒྱད་བང་སོ་ཆུ་བོའི་གཞུང་ལ་བཏབ། བཙན་བཞིའི་བང་སོ་ཕྱིང་ཡུལ་དར་ཐང་དུ་བཏབ། ལྷ་ཐོ་ཐོ་རིའི་བང་སོ་ཆུ་རྟ༣༧༤ ལོར་ཕྱིང་ཡུལ་དར་ཐང་དུ་བཏབ། ཁྲི་གཉན་གཟུང་བཙན་གྱི་བང་སོ་དོན་མཁར་མདར་བརྩིགས། འབྲོང་གཉན་ལྡེའུ་བང་སོ་ཞང་མདར་བརྩིགས། སྟག་རི་གཉན་གཟིགས་ཀྱི་བང་སོ་ས་ཡོས ༦༡༩ ལོ་དང་གནམ་རི་སྲོང་བཙན་གྱི་བང་སོ་ལྕགས་སྟག ༦༣༠ ལོར་དོན་མཁར་མདར་བརྩིགས། འདིའི་སྔོན་དུ་བང་སོ་ཐམས་ཅད་ཟླུམ་པོ་ཡིན་ཀྱང་། འདི་ནས་བཟུང་བང་སོ་གྲུ་བཞིའི་སྲོལ་དར། སྲོང་བཙན་གྱི་བང་སོ་ལྕགས་ཁྱི ༦༥༠ ལོར་འཕྱོངས་རྒྱས་དང་། རྒྱ་བལ་བཟའི་བང་སོ་འཕྱོངས་རྒྱས་སུ་བརྩིགས། གུང་རི་གུང་བཙན་གྱི་བང་སོ་ཤིང་ཡོས ༦༥༥ ལོར་དོན་མཁར་མདར་བརྩིགས། མང་སྲོང་མང་བཙན་གྱི་བང་སོ་ས་ཡོས ༦༧༩ ལོར་དོན་མཁར་གླང་རིའི་གཡོན་དུ་བརྩིགས། འདུས་སྲོང་མང་རྗེའི་བང་སོ་ཤིང་འབྲུག ༧༠༤ ལོར་དོན་མཁར་དུ་མང་སྲོང་གི་གཡོན་དུ་བརྩིགས། མེས་ཨག་ཚོམ་གྱི་བང་སོ་ཤིང་ལུག ༧༥༥ ལོར་མུ་ར་རིར་བརྩིགས། གྱིམ་ཤིང་ཀོང་ཇོའི་བང་སོ་ས་ཡོས ༧༣༩ ལོར་འཕྱོངས་རྒྱས་ཀྱི་རྒྱབ་རིར་བརྩིགས། འཇང་ཚ་ལྷ་དབོན་གྱི་བང་སོ་ལྕགས་ཁྱི ༧༡༠ ལོར་མུ་ར་རིར་བརྩིགས། ཁྲི་སྲོང་ལྡེ་བཙན་གྱི་བང་སོ་ཤིང་གླང ༧༨༥ལོར་མུ་ར་རིར་བརྩིགས། འདིའི་བང་སོའི་མདུན་དུ་བཙན་པོ་རྣམས་ཀྱི་མཛད་རྗེས་བཀོད་ཡོད། མུ་ནེ་བཙན་པོའི་བང་སོ་མེ་ཡོས ༧༨༧ ལོར་མུ་ར་རིར་བརྩིགས། མུ་ཏིག་བཙན་པོའི་བང་སོ་མེ་བྱ ༨༡༧ ལོར་འཕྲུལ་རྒྱལ་མདུན་དུ་བརྩིགས། ལྷ་རྗེའི་བང་སོ་ཤེལ་གྱི་བྲག་ལ་བཏབ། ཁྲི་གཙུག་ལྡེ་བཙན་གྱི་བང་སོ་དོན་མཁར་མདའི་གཡོན་ཕྱོགས་སུ་བརྩིགས། གླང་དར་མའི་བང་སོ་མེ་སྟག་ལོར་འཕྲུལ་དང་རྒྱལ་ཆེན་བར་བརྩིགས་ཏེ། རྩིག་འཕྲོ་ལུས་ཡོད་སྐད། འོད་སྲུངས་ཀྱི་བང་སོ་འཕྲུལ་རྒྱལ་གྱི་རྒྱབ་ཏུ་བརྩིགས་སོ། །གཞན་དུ་ན་མཚོ་སྔོན་ཏུའུ་ལན་རྫོང་གཅིག་པུར་མཚོན་ནའང་བང་སོ་སྟོང་གཅིག་དང་ཉིས་བརྒྱ་ལྷག་ཡོད་པར་འབྲེལ་ཡོད་ཡིག་ཆ་ཁག་ལས་བཤད་ཡོད། དེ་མཚུངས་སུ་བོད་རྒྱལ་བཙུན་མོ་ཕལ་མོ་ཆེ་བང་སོ་བརྩིགས་པའི་སྲོལ་མེད་ཀྱང་། ཁྲི་སྲོང་ལྡེ་བཙན་གྱི་བཙུན་མོ་འབྲོ་བཟའ་བྱང་ཆུབ་རྗེ་དང་། ཁྲི་རལ་བ་ཅན་གྱི་བཙུན་མོ་ཅོག་རོ་ངང་ཚུལ་མ་སོགས་ལ་བང་སོའི་ཚབ་ཏུ་མཆོད་རྟེན་བརྩིགས་པར་ལོ་རྒྱུས་ཁག་ཏུ་འབྱུང་ལ། དེ་རྣམས་འཕྱོངས་རྒྱས་དོན་མཁར་མདའ་རུ་ཡོད་ཀྱང་། དེར་སང་ངོས་འཛིན་བྱེད་དཀའ་ལ། གང་ལྟར། དེ་རུ་བང་སོའི་ས་ཕུང་ལྟ་བུ་མཇལ་རྒྱུ་མང་ངོ་། །

༢ བེམ་པོ་འཇོག་སྟངས་ཡང་། ཕུང་བོ་གཙང་མར་བཀྲུས་རྗེས་དུར་ས་གཙང་མའི་མཐིལ་དང་། མཐའ་འཁོར་དུ་སོལ་བས་བཏུམས་པའི་དཀྱིལ་དུ་བཞག་སྟེ་མི་རུལ་བ་བྱས་ཐོག བེམ་པོའི་མདུན་དང་མཐའ་འཁོར་དུ་ཟས་གོས་དང་། གཤིན་པོའི་རྒྱུན་སྤྱོད་ཡོ་བྱད་སོགས་བཞག སྟེང་དུ་སས་གཡོགས་པའི་ཐོག ཤིང་སྣ་འདེབས་འཛུགས་བྱེད་པ་སྟེ། ཆོ་ག་རྣམས་སུ་འདས་པོའི་བླ་ནི་དུར་ན་གནས་པར་བཤད་པས། ཤིང་དེ་ལའང་བླ་ཤིང་ཟེར། ཤིང་སྡོང་འཛུགས་པ་འདི་ད་ལྟ་སྔོན་ཐོན་རྒྱལ་ཁབ་ཨ་རི་སོགས་ནའང་འབྱུང་བས། དེ་ཡང་སྔ་སོར་བོད་ཀྱི་སྲོལ་ཡིན་པར་སེམས། ཡང་། དམག་ཐོག་ཏུ་གྲོངས་ན་གནས་དེར་བང་སོ་བརྩིགས་ཤིང་སྟེང་དུ་སྟག་གི་རི་མོ་སོགས་འབྲི་བར་བཤད།

གཞན་ཡང་། རྒྱལ་བློན་བར་དུ་བྲོ་བོར་བའི་མནའ་རྟེན་དུ་རྡོ་དཀར་བོ་ཞིག་བཟུང་སྟེ་མནའ་ཚིག་བརྗོད་རྗེས་གཅིག་ནས་གཅིག་ཏུ་བརྒྱུད་ལ། ཕྱིས་མནའ་འདོར་མཁན་གཙོ་བོ་དེའི་མཆད་པའི་རྨང་དུ་འཇོག་སྲོལ་ཡོད། དེ་ནི་ངག་རྒྱུན་ཏུ་རྡོ་དཀར་མ་མོའི་གྲོད་པུ་ཟེར་བ་དེ་ཡིན་ཚོད་འདུག་ལ། མཆད་ཀྱི་རྨང་དུ་འཇོག་སྲོལ་ལ་གཞིགས་ན་བླ་རྡོ་ཟེར་བའང་འདི་ཡིན་པར་སྣང་། གནམ་རི་སྲོང་བཙན་དང་དབྱི་ཚབ་ཟུང་གིས་མནའ་རྡོ་དེ། ཕྱིས་དབྱི་ཚབ་ཀྱི་མཆད་པའི་རྨང་རྡོ་བྱས་ཚུལ་དང་། བྲོ་བོར་ཚེ་གོར་མ་ལག་ཏུ་ལེན་སྲོལ་དེ་ཉེ་ཆར་ཁམས་དང་འབྲས་ལྗོངས་ན་ཡོད་ཚུལ་དེབ་དཀར་ལས་གསུངས་སོ། །ཡང་། དེབ་དཀར་ལས། གྲོངས་པའི་ཚེ་ཤ་རུས་རྣམས་གསེར་ཕྱེ་དང་མཉམ་དུ་བསྲེས་ནས། ལྕགས་སྣོད་དུ་བཅུག་སྟེ་ས་ལ་སྦ། ཞེས་ཀྱང་གསུངས། དམག་ཐོག་ཏུ་གྲོངས་ན་གནས་དེ་རུ་བང་སོ་བརྩིགས་ཤིང་སྟེང་དུ་སྟག་གི་རི་མོ་སོགས་ཀྱང་འབྲི་བར་བཤད། དེ་ནི་དཔའ་བའི་རྫིག་ཉམས་མཚོན་བྱེད་དང་ཐོབ་རྟགས་ཡིན་པར་སྙམ་ལ། ཐང་ཡིག་ལས་ཀྱང་། མི་ཤི་ཚེ་རོ་དུར་དུ་སྦ། བང་སོར་ཚོས་སྣ་ཚོགས་བྱུག ཞེས་དང་། ཐང་ཡིག་གསར་མ་ལས། བང་སོའི་ལོགས་སུ་ས་ཁང་ཞིག་བརྩིགས་ཏེ་ཚོས་དམར་བོར་བསྒྱུར་ཡོད་ལ། དེའི་ཐོག་ཏུ་སྟག་དཀར་བོ་ཞིག་བྲིས་འདུག དེ་ཚོ་འཚོ་བའི་སྐབས་སུ་སྟག་ལྤགས་གྱོན་ཞིང་། འདས་པའི་རྗེས་སུ་སྟག་གི་གཟུགས་བརྙན་བྲིས་ཏེ་དཔའ་བོའི་རྟགས་སུ་ངོམ་པ་འདྲ། ཞེས་པ་དང་མཐུན་ནོ། །དེ་ལས་གཞན་མུ་ར་རིར་བཏབ་པའི་ཁྲི་གཙུག་ལྡེ་བཙན་གྱི་བང་སོ་སོགས་སུ་རྡོའི་སེང་གེ་བུད་པའང་དེ་དང་འདྲ་བར་སེམས་སོ། །

ཡང་སྦ་བཞེད་དུ། གསལ་སྣང་གི་བུ་མོ་ཤི་བའི་རོ་རྫའི་ནང་དུ་བཅུག་ནས། མའི་མལ་འོག་ཏུ་སྦས་ཚུལ་སོགས་ཀྱང་འབྱུང་བ་ལྟར། ད་ལྟ་བོད་ཁམས་ཀྱི་ས་ཆ་ཕལ་མོ་ཆེར་རྫ་བུམ་ལས་ཀེང་རུས་མང་དུ་འབྱུང་བས། སྔོན་དུས་སྲོལ་དེ་བོད་དུ་ཆེས་ཆེར་དར་བར་གསལ་ལོ། །རྫའི་ནང་དུ་བྱིས་པའི་བེམ་པོ་འཇུག་སྲོལ་ཁ་གསལ་ཞིག་ཡེ་ཤེས་འཕྲིན་ལས་ཀྱིས་བརྩམས་པའི་ཕུང་བོ་དུར་འཇུག་བྱེད་སྟངས་སྐོར་བོད་རིགས་ཀྱི་གོམས་སྲོལ་འགའ་ཞིག་ཅེས་པར་འདི་ལྟར་འབྱུང་སྟེ། ཕུང་བོ་རྫ་མའི་ནང་བཞག་ནས་ཁ་བཀག་པ་སྟེ། དེ་ནི་ཕྲུ་གུ་ཆུང་ངུ་ཤི་བའི་ཕུང་བོ་རྫ་མའི་ནང་བླུགས་ཏེ། ཁམ་སྟར་སོགས་ཤིང་འབྲས་སྐམ་པོ་སྣ་ཚོགས་དང་། ཀ་ར་བུ་རམ་སོགས་མཉམ་བླུགས་ཀྱིས་རྫ་ཁ་རླུང་མ་ཤོར་བར་འདག་པས་བཀག་པའི་རྫ་མ་དེ་རི་མཐོན་པོའི་བྲག་གསེབ་བམ། རི་མཐོ་སར་སྐྱེལ་ཞིང་དེ་ནི་བྲག་རི་མཐོ་སར་སྐྱེལ་བས་གཤིན་པོའི་རྣམ་ཤེས་ཡར་རྒྱུགས་ཏེ་ལྷ་དང་། མིའི་འགྲོ་བར་སྐྱེ་བའི་ཁྱད་ཆོས་ཡོད་ཅེས་ཤོད་སྲོལ་དང་། ཡང་ཕ་མ་ལ་ལར་ཕྲུ་གུ་ཡང་ཡང་ཤི་བ་དང་། ཧ་ཅང་གཅེས་སྤྲས་བྱེད་པའི་ཕྲུ་གུ་ཤི་རྗེས་གོང་བཞིན་རྫ་མའི་ནང་བླུགས་པ་དེ་ཁང་བའི་ཐོག་ཁང་ངམ། ཤོད་མཛོད་ཀྱི་ཕུག་ཏུ་བཀལ་ནས་འཇོག་པའམ། ཡང་ན། ཕ་མ་ཉལ་སའི་འོག་ལ་འཇོག་གི་ཡོད། མོན་གྱི་ས་ཆ་འགའ་ཤས་སམ་མཐའ་མཚམས་ཀྱི་ས་གནས་འགའ་ཤས་སུ་མི་རྒན་པའི་ཕུང་བོ་ཡང་ཤིང་ཟོམ་ནང་བླུག་སྟེ་ཐོག་ཁང་ངམ་ཡང་ན་ཤོད་མཛོད་དུ་འཇོག་པའང་ཡོད། དེ་ནི་གཡང་མི་ཤོར་བའམ་གཤིན་པོའི་རྣམ་ཤེས་ཁྱིམ་དེ་རང་ལ་འཁོར་བས་གཤིན་པོ་རང་ཁྱིམ་དུ་སླར་ཡང་སྐྱེ་བ་ལེན་ཚུལ་གྱི་ཁྱད་ཆོས་ཡོད་ཅེས་ཤོད་སྲོལ་ཡོད་པར་བཀོད་ཡོད་དོ། །

གཞན་ཡང་། དུང་དཀར་ཚིག་མཛོད་ལས། རྒྱལ་བོ་དང་བཙུན་མོ་བློན་པོ་བཅས་ཀྱི་བང་སོ་བརྩིགས་པའི་ནང་དུ་མི་གསོན་པོ་བང་སོའི་ནང་དུ་འཇུག་པའི་སྲོལ་ནི་བོད་ནང་དུ་གཏན་ནས་མ་བྱུང་ཞེས་གསུངས་ཀྱང་། དེ་འདྲ་གནའ་རབས་ཀྱི་ལོ་རྒྱུས་ལས་གསལ་བར་སྣང་སྟེ། བོད་རྒྱལ་ཉེར་དགུ་བ་འབྲོང་གཉན་ལྡེ་རུ་ལ་མཛེ་ནད་ཕོག་པས་རྒྱལ་བོ་དང་མཆིམས་བཟའ་ཀླུ་རྒྱལ། བློན་ཆེན་སྙགས་ཐང་བ་ཡར་རྗེ་དང་བཅས། ཡར་ལུང་ཁང་མདར་བང་སོར་བཅུག་པ་ལ། ས་ཙྪ་དང་གུར་གྱི་བཟོ་དབྱིབས་འདྲ་བས། གསོན་མཆད་ཟླུམ་པོ་ཟེར་བ་ལོ་རྒྱུས་མང་བོ་ན་ཉི་ཤར་སྤར་མོས་མི་ཁེབས་པར་གདའ་ལ། ཆོས་འབྱུང་མཁས་པའི་དགའ་སྟོན་དུའང་། རྗེས་འབངས་གསུམ་ནི་གསོན་བཞིན་བང་སོར་གཤེགས། །ཞང་མདའི་བང་སོ་གསོན་མཆད་ཟླུམ་པོར་གྲགས། །ཞེས་དང་། ཐང་ཡིག་ལས་ཀྱང་རྗེ་བློན་རྣམས་མནའ་མཆེད་བསྒྲིགས། མི་ལྔ་དྲུག་ཙམ་གྱིས་ལྷན་ཅིག་དབུ་སྙུང་། བྲོ་མནའ་བོར། རྗེ་བོ་བཀྲོངས་ཚེ་དེ་རྣམས་ཀྱང་རང་སྲོག་བཅད་དེ་རྗེ་དང་དུར་ཁུང་གཅིག་ཏུ་སྦ། འཚོ་དུས་ཀྱི་གོས་དང་། རྩེད་ཆས། ཆིབས་རྟ་སོགས་གཅེས་ནོར་གང་ཡོད་དུར་དུ་སྦས་ཏེ་བང་སོའི་སྟེང་དུ་ད་དུང་དེའུ་འབུར་འདྲ་བ་ཞིག་བརྩིགས་ནས་ཤིང་སྡོང་སྣ་ཚོགས་བཙུགས་ཏེ་དུར་མཚོད་བྱེད། ཅེས་གསུངས་སོ། །རྒྱའི་ཡིག་ཚང་གཞན་ལས་ཀྱང་། མི་ཤི་ཚེ་དུར་གྲོགས་སུ་རྟ་ནོར་གསོད། བང་སོ་གྲུ་བཞི་འབུར་མར་བརྩིགས་ཤིང་། རྡོ་མང་བོ་བསགས་ནས་བརྩིགས་པ་དང་དབྱིབས་ཁང་ལེབ་དང་འདྲ་སེ་བ་འདུག རྟ་དང་གནག་ཕྱུགས་ཀྱི་མགོ་བཅད་ནས་དེའི་མཐའ་ལ་སྤུངས། བཙན་པོ་དང་འཁོར་བློན་ནི་གྲོགས་ཀྱི་ཚུལ་དུ་བགྱིད། དེར་བྲོ་ལ་གཏོགས་པ་ཟེར་ཞིང་། མི་གྲངས་ནི་ལྔ་ཙམ་ལས་མེད། བཙན་པོ་འདས་པའི་ཉིན་དེར་བཙན་པོའི་བྲོ་ལ་གཏོགས་པ་རྣམས་ཉིན་མཚན་ཀུན་ཏུ་ཆང་འཐུང་། དུར་སྦ་དུས་དེ་དག་གི་རྐང་བ་གཤགས་ཤིང་། ཁྲག་ཕྱུངས་ཏེ་ཤིར་འཇུག དེ་ཡིས་བཙན་པོའི་དུར་གྲོགས་བྱེད། ཡང་ན། གཉེན་ཉེ་དུ་མཆིས་ན་ནི། གྲི་ཡིས་གདོང་གྱེན་དུ་གཤགས་པའམ། དབྱུག་པ་རིང་ཐུང་ཁྲེ་ཙི་བཞི་ཅན། སྦོམ་ཕྲ་མཛུབ་མོ་ལྟ་བུ་ཡོད་པ་ཞིག་གིས་རྩིབ་རུས་འབིགས། ཀུམ་པོ་ནི་བཅུ་ཆ་ལས་ཕྱེད་ཀ་ཙམ་སྲིད། དེའང་དུར་གྲོགས་སུ་སྦ་ཞེས་ཀྱང་ཟེར་རོ། །དེང་སང་དུར་སར་གསུར་གཏོང་བའང་དེའི་དོད་ཡིན་པར་བཤད་ལ། ལྷག་པར་མཉམ་འཆི་མཉམ་གསོན་ཀྱི་བྲོ་བོར་ཚེ་གཅིག་ཤི་ན་ཅིག་ཤོས་ཀྱང་དུར་དུ་སྦ་བའི་ལུགས་མཆིས་ཏེ། དེབ་དཀར་ལས། སྐབས་འགར་རྒྱལ་བོ་དང་མི་ཆེན་རྣམས། མཉམ་འཆི་མཉམ་གསོན་བྱེད་པའི་མནའ་འདོར། དེ་འདྲ་བ་རྣམས་རྒྱལ་བོ་གྲོངས་ཚེ་རང་ཉིད་ཀྱང་ལྕེབས་ཤིང་དུར་ཁུང་གཅིག་ཏུ་སྦ་བ་ཡིན། བཙན་པོའི་རྟ་དང་། གོ་ཁྲབ་གཅེས་ནོར་རྣམས་ཀྱང་དུར་དུ་འཇུག དུར་སྟེང་དུ་རི་དེའུ་འདྲ་བ་ཞིག་བརྩིགས། དེར་ཤིང་སྡོང་འཛུགས་ཤིང་། ལོ་རེ་བཞིན་མཆོད་པ་ཡིན་ནོ། །ཞེས་གསུངས་པ་ལྟར་གསོན་མཆད་འདེབས་པའི་སྲོལ་ག་ཡོད་དོ། །

དེ་ལས་གཞན། དེང་དཔའ་རིས་ཡུལ་ནས་བོད་ཀྱི་དུར་ས་སྔོག་འདོན་བྱས་པ་ལས། མི་ཆེན་གྱི་ཀེང་རུས་ལོགས་སུ་མི་འགའ་རེ་ཕྱི་ལག་ལ་བཀྱིག་ཏེ་དུར་སྦས་བྱས་པ། དེང་སང་ས་དེའི་བཤམས་སྟོན་ཁང་དུ་མཐོང་རྒྱུ་ཡོད་ལ། བང་སོ་དེ་ནི་ལོ་ངོ་བཞི་སྟོང་སྔོན་གྱི་བོད་ཀྱི་དུར་ས་ཡིན་པར། ཚན་རིག་པས་ངོས་འཛིན་གནང་ཡོད་དོ། །དེ་ལས་གཞན་རྒྱལ་བ་སྐུ་ཕྲེང་གསུམ་པ་བསོད་ནམས་རྒྱ་མཚོ་མཚོ་སྔོན་དུ་ཕེབས་དུས། ཁྱོ་ག་ཤི་ཚེ་ཆུང་མ་གསོན་དུར་དུ་འདེབས་པ་མ་བཟོད་པར། སྲོལ་ངན་དེ་བཅད་པ་ཁོང་གི་རྣམ་ཐར་ན་གསལ་ལོ། །

༣ བོད་དུ་དུར་མཆོད་ཡོད་མེད་རགས་ཙམ་བཤད་ན། གཤིན་པོའི་ཉེ་འབྲེལ་རྣམས་དུར་སར་འཛོམས་ནས་དྲན་གསོའི་མཆོད་པ་འབུད་སྲོལ་ཡང་བོད་ཀྱི་ལུགས་ལ་ཡོད་པ་སྟེ། ཀརྨ་ཆགས་མེད་ཀྱིས་རྒྱ་གར་གྱི་མཁན་པོ་ཤི་ལེནྡྲ་བོ་དྷི་དང་། ཤཱཀྱ་པྲ་ཝ། དྷ་ན་ཤཱི་ལ། བོད་ཀྱི་ལོ་ཙཱ་བ་བཻ་རོ་ཙ་ན་དང་། པྲ་ཏི་ཛཱ་ཡ་སེ་དང་། ཛ་ཡ་ར་ཏྲཱི་ཏ་ལ་སོགས་པས་མདོ་རྒྱུད་མང་བོ་ལས་བསྡུས་ཏེ་ཟས་གཏད་བང་སོའི་ཆོ་ག་མཛད་ཡོད་ཚུལ་བཤད་ཡོད། ནང་བསྟན་གྱིས་བན་ལུགས་ཀྱི་མཚུན་བཅོས་འདི་ལ། བོན་ཆོས་སུ་སྲིད་པའི་ལྷ་སྲས་བརྡར་བ་ཞེས་པ་དང་དོན་གཅིག་ཏུ་སྣང་ལ། ཀརྨ་ཆགས་མེད་ཀྱིས་འདིའི་ཁུངས་སུ། མོའུ་འགལ་མདོ་ཉུང་བ་ལས། འཛམ་བུ་གླིང་གི་མི་རྣམས་ཀྱི་ཕ་མ་འདས་པའི་དྲིན་ལན་བསབ་པའི་ཕྱིར། སྟོན་ཟླ་ར་བའི་ཚེས་བཅོ་ལྔའི་དུས་ལ། དཀོན་མཆོག་གསུམ་སྤྱན་དྲངས་ལ་མེ་ཏོག་དང་ཞལ་ཟས་ཀྱི་མཆོད་པ་ཕུལ་ཏེ། དེའི་བསོད་ནམས་ཀྱི་ཚོགས་ཀྱིས་གང་ཞིག་དེའི་ཉི་མ་ལ་གཞོང་པའི་ནང་དུ་ཟན་ཕུལ་ཏེ། འདས་པའི་ཕ་མ་ལ་བསྔོས་ན་ཟས་དེ་དག་ཐམས་ཅད་འཐོབ་པར་འགྱུར་རོ། །ཞེས་དང་། ཕ་མ་སྔར་དུས་ཤི་ལ་ལོ་དུས་བཞིན། །ཟས་བསྔོ་བྱ་ཚུལ་མདོ་ཞིག་མདོ་མང་བཞུགས། །ཞེས་སོགས་འདྲེན་ཡང་། དེ་ནི་དཀོན་མཆོག་ལ་མཆོད་པའི་ཚོགས་བསགས་ཀྱི་སྟོབས་དང་དགེ་རྩ་དེ་དག་བསྔོས་ན་ཚེ་འདས་ལ་ཕན་པའི་དོན་ལགས་ཀྱི། བང་སོ་མཆོད་པའི་ཁུངས་སུ་མི་འགྲོའོ། །དེ་བཞིན་དུ་སྔོན་ཚེ་རྒྱལ་བོ་གཟུགས་ཅན་སྙིང་བོ་ཚེ་ལས་འདས་ཚེ་བུ་མོ་སྣང་བའི་སྒྲོན་མས་ཟས་གཏད་པ་དང་། མ་སྐྱེས་དགྲ་འདས་ནས་ཚ་བོ་ཤཱ་རིའི་བུས་ཟས་གཏད་པ་སོགས་དགེ་བའི་ཕུལ་དུ་གྱུར་བའང་དེ་བཞིན་ནོ། །

ཡང་། བཤད་ཚུལ་དེ་ལས་ལྡོག་སྟེ་ར་ག་ཨ་སེའི་ལྷོ་སྒོའི་དམིགས་རིམ་ཐར་བའི་ལམ་སྟོན་ལས། སྔོན་ཚེ་བོད་འདིར་རྒྱལ་རབས་ཉེར་ལྔ་ལ། །དམ་ཆོས་མ་དར་བོན་ལུགས་དར་ཆེ་བས། །རྒྱལ་བོ་རྣམས་ལ་བང་སོའི་མཆོད་པ་ཟེར། །ཕལ་བ་རྣམས་ལ་ལོ་དུས་ཤི་བའི་ཚོད། །གཏད་ཡར་ཞེས་པ་མཆོད་པ་རྒྱ་ཆེར་དར། །བྱང་བུ་ལ་ནི་རྟ་ཡི་སྲབ་མདའ་གཏད། །བྱང་བུ་རྟ་གོང་བསྐྱོན་ལ་བྱ་རུ་ཟེར། །དེ་བཞིན་ཁལ་མའི་སྣ་ཐག་གོ་ཁྲབ་སོགས། །ཟས་དང་ཆས་ཀ་བྱང་བུ་ལ་བསྔོས་ནས། །དེ་ནས་སློབ་དཔོན་ཉིད་ཀྱིས་འཁྱེར་སྲོལ་བྱུང་། །བནྟེ་ལུགས་ལ་དེ་རྣམས་མེད་པའི་ཕྱིར། །བོད་རྣམས་མ་མགུ་བན་ལ་མ་དད་པས། །ཨོ་རྒྱན་ལ་སོགས་པཎྚི་ཏ་རྣམས་ཀྱིས། །བོན་ལ་དཔེ་བླངས་ཟས་གཏད་ཆོ་ག་ནི། །དཀར་ཆོག་ཞེས་བྱ་ཙཀ་ལི་གཏད་རྒྱུད་མཛད། །ཞེས་བཤད་པ་ནི་ལོ་རྒྱུས་ཀྱི་རྐང་དང་འགྲིག་ལ། དེ་བས་པད་འབྱུང་གི་ལུང་བསྟན་ཞིག་ལས། གཤིན་གྱི་དུར་མཆོད་རྒྱུན་མི་ཆད། །ཆད་ན་མཐའ་རྗེས་ལོངས་སྤྱོད་དབུལ། །དེ་ཕྱིར་བང་སོའི་དུར་མཆོད་བརྩོན། །ཞེས་གསུངས་པ་ནི་རྒྱ་ནག་གི་རྩིས་གཞུང་གི་བཤད་ཚུལ་དང་མཐུན། རྒྱལ་བོའི་ཐང་ཡིག་ལས། མཆོད་པའི་དུས་ནི་གུང་ལ་གཤེགས་པ་ཡི། །རྒྱལ་གྱི་ཉི་མར་སྲོང་གི་བང་སོར་མཆོད། །ཕྱི་རབས་རྒྱལ་བོ་འདས་དུས་གང་ཡིན་ལ། །རྒྱལ་བརྒྱུད་རྒྱལ་འབངས་འཁོར་དང་བཅས་པ་ཡིས། །མཆོད་པའི་ལོངས་སྤྱོད་སྤྱན་གཟིགས་སྣ་ཚོགས་བཏེགས། །ཞེས་དང་། ཡང་དེ་ཉིད་ལས། སང་གི་ཉི་མར་སྲོང་གི་བང་སོར་མཆོད། །གཤིན་པོ་ཐམས་ཅད་བྱེས་ཀྱི་ལུང་བར་སོང་། །དེ་སྐད་སྨྲས་ནས་མཆོད་པ་རྒྱས་པར་བྱེད། །ཕུད་དང་ནོར་དང་གོས་ལ་སོགས་པ་དང་། །རྟ་ཕྱུགས་རྐང་འགྲོས་མཆོད་པའི་རྫས་རྣམས་ཀྱིས། །མཆོད་པ་ཚར་ནས་ལྷག་མ་ཤུལ་དུ་སྤུངས། །གཤིན་པོ་ཤོག་ལ་དེ་ལས་ཟོ་ཞིག་བསྔོ། །ཕྱི་མིག་མི་ལྟ་རང་གི་གནས་སུ་འབྱོན། །ཞེས་གསུངས་པ་ནི། ཚེ་འདས་དེ་དག་ཡི་དྭགས་ཀྱི་རིགས་སུ་གཏོགས་པའི་ཡུལ་ལྷ་གནས་བདག་ཏུ་སྐྱེས་པ་རྣམས་ལ་གསོལ་མཆོད་བྱས་ན་ཕྱི་རབས་པར་མགོན་སྐྱབས་བྱེད་པའི་དོན་དུ་དགོངས་པར་སྙམ་མོ། །

ཡང་། བོན་ལུགས་ཀྱིས་ཚེ་འདས་ཀྱི་བླ་ཚེ་སྲོག་གསུམ་ལས་བླ་དེ་འདས་པོ་དེ་ཉིད་ཀྱི་བྱད་གཟུགས་བཟུང་ནས་དུར་དེར་གནས་པས། དེ་ལ་ཕན་གནོད་གང་བྱས་ན་འབྲས་བུ་དེ་འདྲ་འབྱུང་བར་ཡང་བཤད་ཡོད། དེ་བས་ཀརྨ་ཆགས་མེད་ཀྱི་མཚུན་བཅོས་ལས། འདོན་ཆོག་དང་མཆོད་རྫས་བཤམས་ཚུལ་སོགས་རྒྱས་པར་བཤད་ཡོད།

འོན་ཀྱང་། ནང་ཆོས་ཀྱི་ལུགས་སུ་དེ་ལྟར་བྱེད་པ་ཤིན་ཏུ་མི་རུང་ཚུལ། མཁས་པ་འགའ་ཞིག་གིས་བཀག་པ་དོན་ལ་གནས་པར་སེམས་སོ། །བོད་ཀྱི་ལོ་རྒྱུས་ཁག་ན། བེམ་པོ་གསེར་ཕྱེ་སོགས་རིན་ཆེན་བསྲེས་ཏེ་འཇོག་པའམ་དཀོར་ནོར་རྩ་ཆེན་གྱིས་བཀང་སྟེ་འཇོག་སྟངས་ཡང་། དེབ་དཀར་ལས། བང་སོ་ནང་གི་རེའུ་མིག་དགུའི་དབུས་སུ། བཙན་པོའི་སྐུ་སྤུར་གསེར་གྱིས་བྱུགས་ནས་འཇོག དཀོར་ནོར་གྱིས་བཀང་། ནང་བློན་གང་ཡིན་དེ་དུར་སྲུང་དུ་འཇོག ཁོང་རང་འཁོར་བཅས་གཤིན་པོའི་རྟགས་བཏབ་སྟེ། རྒྱལ་རྒྱུད་གསོན་པ་རྣམས་དང་འཕྲད་མི་ཆོག་པ་ཡིན། བ་ཕྱུགས་སོགས་བང་སོའི་ཉེ་འཁོར་དུ་འཁྱར་ན་ཁོང་རྣམས་ཀྱིས་བཟུང་སྟེ་གཤིན་པོའི་རྟགས་བཏབ་ནས་སླར་བདག་པོ་ལ་མི་སྤྲོད། ལོ་དུས་ཀྱི་མཆོད་པའི་སྐབས་སུ་དུང་བརྡ་བཏང་བ་དང་མཉམ་དུ། ཁོང་རྣམས་ལུང་བ་ཞིག་ཏུ་བྲོས་ནས་ཡིབ་སྟེ་སྡོད། དེ་ནས་བཙན་པོ་འཁོར་བཅས་ཀྱིས་མཆོད་པ་ཕུལ་བའི་རྗེས་སུ་སླར་འཁོར་ནས། མཆོད་པ་རྣམས་བསྡུས་ནས་ལོངས་སྤྱོད་ཚུལ་སོགས་བཤད་པ་ལྟར། ཡང་། སྐབས་ལན་རེར་ནང་བློན་གང་ཡིན་རྒྱལ་བོའི་དུར་སྲུང་དུ་འཇོག་པ་དང་། སྐུ་གླུད་དུ་བརྫངས་པ་ལ་གསོན་པོར་དུར་དུ་བཅུག ཅེས་རགས་བཤད་ཙམ་གྱི་བརྡ་སྦྱར་བ་ཡོད་དེ། བཀའ་ཐང་སྡེ་ལྔ﹙མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་ཤོག་གྲངས ༡༤༦ ན་གསལ། ﹚ལས། ནང་བློན་གང་ཡིན་རྒྱལ་བོའི་བང་སོ་སྲུང་། །གཤིན་པོའི་ཚུལ་བཟུང་པུར་གྱི་འབངས་སུ་བསྔོས། །གསོན་གཤིན་བྱེ་བྱས་མི་ཡི་ཁྱུ་ནས་བུད། །རྒྱལ་བརྒྱུད་གསོན་པོ་རྣམས་དང་མི་འཕྲད་ཅིང་། །མཆོད་པའི་དུས་མིན་བང་སོའི་ཐོ་ཕྱི་རུ། །གསོན་པོའི་མི་དང་རྟ་ཕྱུགས་འཁྱམས་དབང་མེད། །མི་ནོར་བྱུང་ན་དུར་སྲུང་གཤིན་པོས་འཛིན། །དུར་སྲུང་གིས་རེག་གསོན་ཁྱུར་མི་ཚུད་ཅིང་། །གཤིན་པོའི་རྟགས་བཟུང་དུར་སྲུང་བྲན་གཡོག་བྱེད། །གཞན་གྱི་བྱ་བ་གང་ཡང་མི་འབབ་ཅིང་། །ས་ཁུལ་བང་སོའི་པུར་ཁ་ནོར་རྫས་སྲུང་། །ཞེས་དང་། གཞན་ཡང་། ས་ཁྱོན་ཡངས་སར་ལོ་ཏོག་འདེབས་ཞིང་། གཞུང་ལས་སུ་འགྲོ་མི་དགོས་པར་མ་ཟད། དམག་ལའང་འགྲོ་མི་དགོས་པར་བཤད་དོ། །དུང་དཀར་ཚིག་མཛོད﹙ཤོག་གྲངས༡༥༨༩﹚ལས། རྒྱལ་བོ་ཁྲི་སྲོང་ལྡེ་བཙན་སྐུ་ན་ཕྲ་བའི་དུས་ཀྱི་བློན་པོ﹙མ་ཞང་དྲོན་པ་སྐྱེད་དང་ཁྲོན་པ་སྐྱེས་ཞེས་པའང་སྣང﹚འདི་བོན་ལ་དགའ་བས། རྒྱལ་བོ་སྐུ་ནར་མ་སོན་པའི་རིང་འདིས། སུས་ཆོས་བྱེད་པ་ཕོ་རང་དུ་མཐར་སྤྱུག་གོ་ཞེས་ཁྲིམས་བུ་ཆུང་མཛད། བློན་ཆེན་ཆོས་ལ་དགའ་བ་མང་དབལ་གཉིས་ལ་བཀྱོན་ཕབ་སྟེ་བོད་ནག་པོར་བཏང་། སྐབས་དེར་གསེར་གྱི་ལྷ་ཤཱཀྱ་མུ་ནེ་བྱེ་དོང་དུ་སྦས་པ་དང་། མཁར་བྲག་དང་མགྲིན་བཟང་གི་ལྷ་ཁང་སོགས་བཤིག ལྷ་ས་གཙུག་ལག་ཁང་དུ་བཤས་ར་བྱས་པར་གྲགས། མཐར་རྒྱལ་བོ་དང་ཆོས་ལ་དགའ་བའི་བློན་པོ་རྣམས་གྲོས་མཛད་ནས་མ་ཞང་གྲོམ་པ་སྐྱེས་སྟོད་ལུང་དང་། སྟག་ར་ཀླུ་གོང་འཕན་པོར་རྒྱལ་བོའི་སྐུ་གླུད་དུ་བརྫངས་ནས་གསོན་པོར་དུར་དུ་བཅུག་ཅེས་ལོ་རྒྱུས་ཡིག་ཚང་དུ་གསལ། སྐབས་དེའི་གསོན་པོར་དུར་དུ་བཅུག་ཟེར་བ་ནི། མི་གསོན་པོར་སྦས་ཏེ་གསོད་པ་མ་ཡིན་པར། མི་དེ་དུར་རམ་བང་སོར་བསྡད་དེ་གསོན་པོའི་མི་དང་འཕྲད་མི་ཆོག་པ་དང་། དུར་མཆོད་བྱེད་པོ་དང་དུར་དུ་གནས་པ་རྣམས་ལ་ལྟོ་དང་གོས་སོགས་མཁོ་བའི་ཡོ་ཆས་སྐྱེལ་མི་དུར་སར་ཡོང་སྐབས་ཐག་རིང་ནས་དུང་ཞིག་གཏོང་དགོས། དེ་སྐབས་གཤིན་པོའི་མིང་བཏགས་པ་རྣམས་རང་རང་གི་ཁྱིམ་དུ་ཡིབ་ནས་སྡོད་དགོས། ཁོང་ཚོ་ཕྱིར་ལོག་རྗེས་གཤིན་པོའི་མིང་ཅན་རྣམས་ཕྱིར་ཐོན་ནས་རང་རང་ལ་ཐོབ་འོས་པའི་ཟས་གོས་ལ་ལོངས་སུ་སྤྱོད། ཁོང་ཚོའི་སྒོ་ཕྱུགས་སེམས་ཅན་ལ་ཤི་བའི་མཚན་མ་བཏབ་ཡོད་པས། གསོན་པོ་སུས་ཀྱང་བདག་གཉེར་མི་བྱེད། ཅེས་གསུངས་སོ། །

ས་དུར་ལ་འདེབས་སྐབས་ས་ཆོག་བསྡུས་པ་ནི། དུར་ས་ལ་སྟོན་ནས། སའི་ལྷ་མོ་སྤྱན་མ་ལ་ཕྱག་འཚལ་ཞིང་སྐྱབས་སུ་མཆིའོ། །སའི་ལས་བཀྲ་ཤིས་པར་མཛད་དུ་གསོལ། ཨོཾ་ཧ་རི་ནི་ས་ཤན་ཏིམ་གུ་ཀུ་སྭཱ་ཧཱ་ཞེས་བཟླས་ཏེ་སྦའོ། །

༤ དུར་རྫས་ཀྱི་རྣམ་གྲངས་བཀོད་ནི། བང་སོའི་ནང་ཁྱད་ནོར་སྦས་ཚུལ་ནི་མི་རིགས་ཕལ་མོ་ཆེའི་ལུགས་སྲོལ་ཞིག་དང་། ལྷག་པར་དུ་གནའ་རབས་སུ་བོད་ཀྱི་གོམས་སྲོལ་ལྟ་བུར་ཆགས་ཡོད། དཔེར་ན། ལྷ་སའི་ཆུ་གོང་གི་རྡོ་ཆས་གསར་མའི་དུས་མཇུག་གི་བང་སོའི་ནང་དུ་གཤིན་པོ་ཚེ་ལས་མ་འདས་གོང་གི་རྒྱུན་སྤྱོད་རྫ་ཆས་ཡོད་པར་མ་ཟད། ཆེད་དམིགས་གཤིན་པོར་བཟོས་པའི་དུར་རྫས་སོགས་ལྷང་ལ་བུད་ཡོད། པུར་རྒྱལ་གྱི་དུས་སྐབས་ལ་སླེབས་དུས་སྔར་གྱི་རྨང་གཞིའི་སྟེང་། གོང་འཕེལ་དང་འཐུས་སྒོ་ཇེ་ཚང་དུ་བཏང་ཡོད། བཀའ་ཐང་སྡེ་ལྔ་ལས། རྒྱལ་བརྒྱུད་རྣམས་ཀྱིས་ཡར་ཀླུང་སྨུག་རི་རུ། །བང་སོ་བརྩིགས་ནས་ཡབ་ཡུམ་གསུམ་གྱི་པུར། །གསེར་གྱིས་བྱུགས་ནས་དངུལ་གྱི་གའུར་བཅུག། བང་སོ་རེའུ་མིག་དབུས་མར་ཁྲི་ལ་བཞུགས། །གསེར་དངུལ་གཡུ་སོགས་བྲེ་ཡི་ཁལ་རེ་དང་། །རྒྱལ་བོའི་དཀོར་ནོར་གང་ཡིན་སྤྱན་སྔར་སྤུངས། །ཞེས་པ་ལྟར། སྲོང་བཙན་ཀྱི་བང་སོའི་ཁྱད་ནོར་བསྡུས་ཚུལ་གོང་དུ་ཟུར་ཙམ་བརྗོད་ཟིན་ལ། གཞན་སྲོང་བཙན་བང་སོའི་ནང་སྦས་པའི་དངོས་རྫས་སྐོར་ལ། འཇིགས་མེད་གླིང་བའི་གསུང་འབུམ་ལས། འཛམ་བུ་གླིང་གི་ནོར་ཕུད་ལན་གསུམ་བསྡུས། །ལྷ་ཡི་རིན་ཆེན་སྣ་ལྔ་དང་། །མི་ཡི་རིན་ཆེན་སྣ་ལྔ་སོགས། །ས་བཅུད་གསོ་ཞིང་སྐྱེ་འགྲོ་བདེ་ཐབས་བསྐྲུན། །དེ་དུས་ས་ནི་འབྲིང་གི་རི་ནས་རྙེད། །དམ་གྱི་ས་ནི་གཉན་གྱི་རི་ནས་བླངས། །སྒོ་ནི་ནུབ་ཕྱོགས་བལ་བོའི་ཡུལ་དུ་བསྟན། །ནང་གི་ཆ་ནི་རྣམ་པ་ལྔ་རུ་བཀོད། །དབུས་སུ་རྡོ་རྗེ་གཙུག་གི་དམ་སྲི་མནན། །དེ་ཡི་སྟེང་དུ་ཙན་དན་ས་མཆོག་གི། ཀ་བ་ཁོར་ཡུག་ཁྲུ་ཚད་བཅོ་བརྒྱད་དང་། །ལྟེ་བ་དེ་རུ་རྒྱལ་བོའི་ན་བཟའ་དང་། །ནོར་བུའི་རིགས་བྱེད་བསམ་གྱིས་མི་ཁྱབ་ཅིང་། །རིན་པོ་ཆེ་ཡི་པྲོག་ཞུ་བྱེ་བ་ཡོད། །དེ་ཡི་སྟེང་དུ་ཙན་དན་སྦྲུལ་སྙིང་གི ། གདུགས་ནི་ཀུན་ལ་ཁྱབ་པར་ཕིབ་ནས་ཡོད། །རྒྱ་ནག་རྒྱལ་བོའི་ནོར་གྱི་སྙིང་ཐོབ་པ། །ཨུགས་ཡ་ན་ལི་ཁྲབ་ཀྱི་བལ་བོ་གཅིག །བྱང་བུ་རེ་ལ་གསེར་སྲང་བྱེ་བ་རེ། །དེ་ནི་ནུབ་ཀྱི་ཕྱོགས་ན་ཚས་བཟང་བ། །རིན་ཆེན་ཟངས་ཀྱིས་བསྒྲིལ་ཏེ་སྦས་ནས་ཡོད། །རི་རྒྱལ་ལྷུན་པོའི་ཕྱོགས་ནས་རྙེད་པ་ཡི། །རྒྱ་ནག་རྒྱལ་བོའི་ནོར་གྱི་སྙིང་ཐོབ་པ། །རིན་ཆེན་བྱུ་རུའི་རྒྱལ་མོ་ལག་གཡས་པ། །ཁྲུ་བརྒྱད་ཡོད་པའི་འོད་ཟེར་འབར་བ་ཞིག །མར་མེའི་ཚུལ་བྱས་བྱང་གི་ཕྱོགས་ན་ཡོད། །རྒྱལ་བོ་རང་གི་ནོར་གྱི་སྙིང་འཐོབ་པའི། །ནོར་བུ་མཆིང་བུའི་ཕུང་བོ་ཁྲུ་གང་བ། །དེ་ནི་དབུས་ཀྱི་ཕྱོགས་སུ་ཚས་བཟང་བ། །ཟ་འོག་དག་གིས་བསྒྲིལ་ཏེ་སྦས་ནས་ཡོད། །ཧོར་གྱི་རྒྱལ་བོའི་ནོར་གྱི་སྙིང་ཐོབ་པའི། །གསེར་གྱི་མི་རྟའི་གཟུགས་སུ་བྱས་པ་དག། ལེབ་བརྒན་འབར་བ་དར་སྣས་གྲིལ་ཏེ་ཡོད། །མི་རྟའི་གཟུགས་དང་མཉམ་པའི་འཁྲུལ་འཁོར་ཅན། །དེ་ནི་ཤར་གྱི་ཕྱོགས་ན་སྦས་ནས་ཡོད། །ཡ་རྩེ་རྒྱལ་བོའི་ཕྱག་ནས་བླངས་པ་ཡི། །མུ་ཏིག་ཁལ་དུ་གཞལ་བའི་སུམ་གཉིས་དག །ཤ་ཕྲུག་རླིད་བུར་བཅུག་ནས་ལྷོ་ཕྱོགས་སྦས། །གཞན་ཡང་ནོར་ནི་རྣམ་པ་སྣ་ཚོགས་པ། །རིན་པོ་ཆེ་ཡི་གདུང་ལ་བཀལ་ནས་ཡོད། །ཅེས་ཞིབ་ཙམ་གསུངས་ཡོད།

བོད་སིལ་བུར་འཐོར་རྗེས། བློན་པོ་ཤུད་པུ་སྟག་རྩེ་གཉགས་སོགས་གྲོས་བྱས་ཏེ། བང་སོ་རྣམས་གཉགས་དང་། ཤུད་པུ། ཁུ། སྙི་བ། འབྲོ། ཅོག་རོ་བཅས་རུས་རྒྱུད་ཚོ་བ་དྲུག་གིས་བགོ་བཤའ་བརྒྱབ་ནས་བྲུས་པ་སྟེ། གཉགས་ཀྱིས་དོན་མཁར་མདའི་སྟག་རི་གཉན་གཟིགས་དང་། གནམ་རི་སྲོང་བཙན་སོགས་ཀྱི་བང་སོ་བྲུས་པ་དང་། ཤུད་པུས་སེང་གེ་ཅན་གྱི་བང་སོ་བྲུས་པ་དང་། ཁུས་འཕྲུལ་རྒྱལ་ཏེ་འདུས་སྲོང་མང་རྗེའི་བང་སོ་བྲུས་པ་དང་། སྙི་བས་མང་སྲོང་མང་བཙན་གྱི་བང་སོ་བྲུས་པ་དང་། འབྲོ་དང་ཅོག་རོས་སྲོང་བཙན་གྱི་བང་སོ་ཕྱོགས་ཁག་གཉིས་སུ་བྲུས་པས་བང་སོའི་ནོར་རྫས་ས་ཁར་ཕུད་པ་དང་།

དེ་མཚུངས་སུ། དུས་རབས་འདིར་བང་སོ་སྔོག་པའི་དུར་རྫས་ཀྱི་རྣམ་གྲངས་ལ། གནའ་བོའི་བོན་གྱི་དུར་མཆོད་ཆོ་གའི་ནང་བེད་སྤྱོད་བྱེད་པའི་དུར་རྫས་ལ། གྲོ ནས། བྲ་བོ་སོགས་འབྲུ་རིགས་དང་། གསེར་ཁུང་གྲོང་གི་བང་སོ་ལས་ཐོན་པའི་འབྲུ་རིགས་ལས་སྣོན་བྱེད་ཆས་གཏུན་བུ་དང་ལག་བསྐོར་དང་། ནས་ཆང་། གྲོ་ཆང་། འབྲས་ཆང་། རྒུན་ཆང་སོགས་བཏུང་བྱའི་རིགས། འོ་ཟས། ཁ་ཏོག མར། ཐུག་པ། སྐྱོ་མ་སོགས་ཟས་རིགས། མཚལ། གླ་རྩི། སྨན་རྩྭ་སོགས་སྨན་རིགས། མིག་མངས། རྡེའུ། རོལ་ཆས། ཉལ་ཆས། གོ་མཚོན། ཕྱིང་བ། སྣམ་བུ། དར་གོས། རུས་ཁབ། སྐུད་པ། ཐག་པ། འུར་ཆ། བརྡར། སྒྱེ་མོ། སྡེར་མ། རྐྱལ་བ། ཐབ་ཆས་སོགས་རྒྱུན་སྤྱོད་རིགས། གཟི། གཡུ། གཡང་ཊི། ལག་གདུབ། སྐྲ་རྒྱན་སོགས་རྒྱན་ཆའི་རིགས། གོ་མཚོན། ལྕགས་གྲི། མདའ། སྒ་ཆས་སོགས་དམག་ཆས་ཀྱི་རིགས། གཞན་གཤིན་པོའི་འཇིམ་གཟུགས་དང་། བོད་ཡིག་གི་ཤིང་བྱང་སོགས་སོ། །

རང་ཅག་གི་གདོད་མའི་སྐབས་སུ་སེམས་ཅན་མང་བོས་ལྷ་ལ་དམར་མཆོད་བྱེད་པའི་ལུགས་སྲོལ་ཡོད་པ་བཞིན། རྒྱལ་བོའམ་རླབས་ཆེན་གྱི་མི་སྣ་ནི་ལྷར་མཐོང་བའི་འདུ་ཤེས་ཟབ་པ་དང་། ལྷག་པར་དུ་གཤིན་པོའི་བླ་ནི་དུར་སར་གནས་པར་བཤད་པས། བང་སོའི་ནང་དུའང་སྲོག་ཆགས་མང་བོ་དུར་སྦས་བྱས་ཏེ་གསོལ་མཆོདབྱེད་པ་ཡིན། དཔེར་ན། སྣེ་གདོང་རྫོང་གི་མཆིམས་ལུང་རྩེ་མོའི་བང་སོའི་ནང་དུ་རྟའི་རུས་སྒྲོམ་ལྔ་ཐོན་པ་དང་། དེ་བཞིན་ལྷོ་བྲག་རྫོང་སྐྱིད་འདུས་བང་སོའི་ནང་རྟ་བོང་གཡག་གསུམ་གྱི་རུས་པ་དང་། གཅན་གཟན་གྱི་རིགས་གང་ཡིན་མི་ཤེས་པའི་རུས་པ་བུད་པ་དང་། ཡང་། གྲ་ནང་རྫོང་རྡོ་སྐུ་རིའི་དུར་ལས་རྫ་མའི་ནང་ལུག་གི་རུས་པ་དང་། ནོར་ཕྱུགས་ཀྱི་མགོ་བཅུ་གསུམ། ཁྱིའི་རུས་སྒྲོམ་བརྒྱད་ཐོན་པ་དང་། གཞན་ཏུན་ཧོང་གཏེར་ཡིག་ལས་དྲི་རྟ་དང་། དྲི་གཡག དྲི་ལུག སྣམ་རྟ། སྣམ་ལུག་ཅེས་འཁོད་པ་ལྟར་ན། སྲོག་ཆགས་དེ་དག་མི་རུལ་བའི་ཐབས་སུ་དྲི་སྣ་ཚོགས་བྱུག་པར་ཡང་གསལ་ལ། ཡང་རྟ་དོ་མ་དང་། གཡག་དོ་མ། རྟ་རྒྱན་ཅན། དོ་མ་སྙིང་དགས། སྐྱིབས་ལུག་ཅེས་པར་གཞིགས་ན། སྒ་རྒྱན་ཁལ་དང་བཅས་པ་དུར་སྦས་བྱེད་སྲོལ་ཡོད་པར་ཡང་རྟོགས་སོ། །ཁྱད་པར་དུ་རྟ་དུར་སྦས་བྱེད་པ་འདི་རྒྱ་ཆེ་བར་བསམ་སྟེ། ཏུན་ཧོང་ཡིག་རྙིང་ལས། བཙན་པོས་བཀའ་སྩལད་པ། དབྱི་ཚབ་གློ་བ་ཉེ་བས། གུམ་ན་མཆད་པྱག་དར་ཏེ་བརྩིགས་པར་གནང་། རྟ་ནི་བརྒྱའ་དགུམ་བར་གནང་། ཞེས་པ་ལས་རྟོགས་སོ། །དེ་ལས་གཞན་མཚོ་སྔོན་གཏེར་ལེན་རྫོང་གི་བང་སོ་ལས་འབྱུང་བའི་རྣམ་གྲངས་ཙམ་བཀོད་ན། ས་འདིར་པུར་རྒྱལ་དུས་ཀྱི་བང་སོ་མི་འདྲ་བ་སྟོང་ལ་ཉེ་བ་ཡོད་ཅིང་། རྒྱ་མཚོའི་ངོས་ལས་སྤྱི་ཁྲེ ༣༤༠༠ ལྷག་གི་སར་བཏབ་ཡོད། དེའི་ནང་ནས་ཆེ་འབྲིང་ཁག་བཞིའི་དུར་རྫས་སྔོག་འདོན་བྱས་པ་ནི། བང་སོ་དེ་དག་གི་ནང་དུར་རྫས་རྐུ་འཁྱེར་བྱས་པའི་ལྷག་འཕྲོ་ལུས་པ། གསེར། དངུལ། ལྕགས་རིགས། ཕ་ལམ། གཡུ་སོགས་ཀྱི་རྒྱན་ཆ་དང་། ཟངས་ཆས། ཤིང་ཆས། ཤིང་བྱང་། སི་བཏགས་དང་། ཚོན་རྩིའི་ཡོ་བྱད། རྫ་ཆས། རྡོ་ཆས། རུས་ཆས། ཀོ་ཆས་སོགས་རིགས་མི་འདྲ་བ་༨༥ ཙམ་ཐོན་ཡོད།

༥ བྱེ་བྲག་དུར་གྱི་ས་ལ་དཔྱད་ཚུལ་ནི། རང་ཅག་བོད་ཀྱི་རིག་གནས་ཁྲོད་ས་དཔྱད་ཆོ་ག་འདི། ལྷ་ཁང་བཞེངས་པ་དང་། གཞི་ཁྱིམ་བརྩིགས་པ། སྒྲུབ་ཁང་འཛིན་པ་སོགས་ལ་མེད་དུ་མི་རུང་གི་གྲུབ་ཆ་གཙོ་ཤོས་ཤིག་ཡིན། ཁྱད་པར་དུ་དུར་གྱི་ས་དཔྱད་ནོར་ན། ཤི་གསོན་གཉིས་ཀ་གནོད་སྐྱོན་འབྱུང་བར་བཤད། འགྲོ་བ་གང་ལ་མཚོན་ནའང་བླ་སྲོག་རྣམ་ཤེས་གསུམ་ལུས་ལ་བརྟེན་ལ། གྲོངས་ཚེ་བླ་ནི་དུར་ལ་གནས་པར་བཤད་པས། དུར་ས་ངན་ན་བླ་དེ་རྒུད་པ་ཡིན་པས། ཤི་གསོན་གཉིས་ཆར་ནས་བྱུར་སྣ་ཚོགས་འབྱུང་བར་བཤད་དེ། ནོར་འཛིན་དཔྱད་པ་ལེགས་ཉེས་འབྱེད་པའི་ལྡེ་མིག་ལས། སྤྱིར་ན་རི་ཁྲོད་ཁང་བ་དང་། །གཏེར་དང་དུར་ས་གང་ལ་ཡང་། །ས་དཔལ་ཐམས་ཅད་བཟང་བར་དགོས། །ཁྱད་པར་དུར་གྱི་ས་མིག་འདི། །ངན་ན་ཤི་གསོན་གཉིས་ཀ་སྡུག། སྲོག་དང་རྣམ་ཤེས་བླ་དང་གསུམ། །སྲོག་དེ་གཤེད་མ་འདྲེ་ཡིས་གཅོད། །རྣམ་ཤེས་ལས་ཀྱི་རྗེས་སུ་འབྲང་། །བླ་ནི་དུར་ལ་གནས་པ་ཡིན། །དུར་ས་བཟང་ན་བླ་ཡང་དར། །བདེ་སྐྱིད་འཛོམས་ནས་གསོན་ལ་ཡང་། །མགོན་སྐྱབས་འཚོལ་དུ་འོང་བ་ཡིན། །ཞེས་དང་། དེ་བཞིན་དུ། ཀརྨ་ཆགས་མེད་ཀྱིས་ཀྱང་། བླ་སྲོག་རྣམ་ཤེས་གསུམ་དུ་སྲིད། །སྲོག་དབུགས་གཤེད་མ་འདྲེ་ཡིས་འཁྱེར། །རྣམ་ཤེས་ལས་ཀྱི་རྗེས་སུ་འབྲང་། །བླ་ནི་དུར་ས་དེ་ལ་གནས། །ཆ་ལུགས་གསོན་དུས་གཟུགས་དང་འདྲ། །དར་ཞིང་ཕྱུག་ན་མགོན་སྐྱབས་བྱེད། །རྒུད་ཅིང་དབུལ་ན་གསོན་པོ་ལ། །ཟ་རེ་འཐུང་སྐོམ་ན་ཚ་ལྡང་། །ཕྱེ་མར་བང་སོ་མཆོད་པའི་ཆོ་ག་དར། །ཞེས་པ་ལྟར། འདིར་སྐབས་སུ་བབ་པ་དུར་གྱི་ས་ལ་བརྟག་ཚུལ་མདོ་ཙམ་བརྗོད་ན། ས་དཔྱད་རིན་ཆེན་ཀུན་འདུས་ལས། དེ་ནས་དུར་གྱི་ས་དཔྱད་ལ། །རུས་ཆེན་ཡོན་ཏན་ཆེ་བ་དང་། །སྦྲ་རྒན་ཡང་ཚ་མཐོང་བ་རྣམས། །གདན་ཁྲི་བང་རིམ་མང་བོ་དང་། །མཐོ་བའི་ས་ལ་བཞག་པར་བྱ། །ལོ་ནི་མང་ཉུང་རུས་ཆེ་ཆུང་། །དེ་དང་མཐུན་པའི་མཐོ་དམན་བྱ། །ཞེས་དང་། ས་དཔྱད་འདོད་འབྱུང་བུམ་བཟང་ལས། རབས་ཆད་གྲི་རོ་མཛེ་ཅན་དང་། །གདུག་པའི་ནད་ཀྱིས་ཤི་བ་རྣམས། །གཉའ་མནོན་ཆེ་ཞིང་དམའ་སར་བཏབ། །གཉའ་མནོན་རི་སྣ་བྲག་སྣ་ལ། །ཅུང་ཟད་གཟུར་བ་མན་ངག་ཡིན། །ཞེས་དང་། ཡང་། བཻ་དཀར་ས་དཔྱད་ལས། ཡང་ན་འདི་ལྟར་ཤེས་པར་བྱ། །ཆོས་དུར་མཆོད་རྟེན་འདྲ་བ་གདབ། །བཙད་པོ་རྒྱལ་བོ་གདན་བཞུགས་འདྲར། །རྗེ་རིགས་རི་ཐོད་བཅིངས་འདྲ་ལ། །བློན་པོ་རི་གྲལ་བསྒྲིགས་འདྲ་ལ། །འབངས་ནི་ཁྱི་ཐོད་མཆོང་འདྲའི་རིར། །བྱིས་པ་པང་ན་བུ་ཐོགས་འདྲར། །བན་བོན་རྡོ་རྗེ་འདྲ་བ་ལ། །རྩིས་མཁན་རུས་སྦལ་ལྟོ་འདྲ་ལ། །སྨན་པ་སྨན་གྱི་པུར་བུ་འདྲར། །ཀློག་མཁན་ཁྱི་མོར་འདྲ་བ་ལ། །ཕྱུག་པོ་རིན་ཆེན་འདྲ་བ་ལ། །སྤྲང་བོ་ཐུ་བ་ཁེངས་འདྲ་ལ། །མི་མགོ་མི་ཐོན་རྒན་རིམ་འཆི། །རི་དམིགས་ཞེས་བྱ་སྟོད་ལ་འདེབས། །དར་མ་གྲིར་འཆི་མང་བ་ན། །རི་སྙིང་ཞེས་བྱ་རི་རྐེད་གདབ། །བྱིས་པ་མ་སོས་ཆུ་སོ་ཞེས། །རི་ཡི་སྨད་ལ་འདེབས་པའོ། །ཞེས་དང་། གཞན་ཡང་། དེ་ཉིད་ལས། འབྱུང་ཁམས་དང་སྦྱར་ཏེ་དུར་འདེབས་ལུགས་ལ། སྤྱི་དང་བྱེ་བྲག་ཏུ་གསུངས་པ་དང་། ཕྱི་ནང་བར་གསུམ་གྱི་དུར་སྲུང་དང་། དུར་བཅོས་སོགས་འཁོད་པས། ཞིབ་ཏུ་ཤེས་འདོད་པ་དག་དེར་བལྟ་བར་བྱའོ། །

ཡང་། དུར་ས་ནོར་བའི་དཔྱད་འབྲས་ནི། ས་དཔྱད་འདོད་འབྱུང་བུམ་བཟང་ལས། རྒས་དུར་དམའ་ཞིང་གཞོན་དུར་མཐོ། །ཤི་རིས་གཞོན་ལ་འབབ་པ་ཡིན། །ཆུང་དུར་གཉའ་མནོན་ཆེ་ཆུང་དེ། །ཤི་གྲངས་མང་ཉུང་དེ་དང་བསྟུན། །གྲི་དུར་ལུང་བའི་ཡངས་དོག་ནི། །མདའ་འཕེན་ཙམ་ལས་ཡངས་མི་རུང་། །དེ་ཡང་ཕར་རི་ཚུར་རི་གཉིས། །བྲག་ཟུར་ཐད་འབབ་དུར་གྲི་ངན། །རྒྱབ་རི་འགྱིང་ཞིང་མདུན་འཇམ་དགོས། །ལོ་སྐོར་བཅུ་གཉིས་ས་མལ་ལ། །ལོ་གཞོན་ས་དགྲ་སྔར་བཞིན་ལ། །རང་རང་ལོ་བར་མི་གནོད་ཚུལ། །རིགས་པས་དཔྱད་དེ་ཤེས་པར་བྱ། །ས་དགྲ་དེ་དང་འཕྲད་གྱུར་ན། །ལོ་གསུམ་རྟགས་འབྱུང་འདིར་ཡང་འདྲ། །ཞེས་དང་། གཞན་ཡང་། ས་དཔྱད་བྱེ་མ་བརྡལ་སྤུངས་ནའང་། དུར་ས་བཟང་ངན་ལས་བྱུང་བའི་ལེགས་ཉེས་མང་དུ་གསུངས་ཡོད་པས། གཞུང་དེ་དག་ལས་གསུངས་པ་ལྟར། ས་བབ་དང་བསྟུན་ནས་ས་དུར་བྱེད་པ་གནད་ཀྱི་དོན་པོའོ། །

༣ ཕུང་བོ་གཟན་བསྒྱུར། ཕུང་བོ་གཟན་བསྒྱུར་ཏེ། བྱ་རྒོད་སོགས་ལ་སྟེར་བ་དེར་རླུང་དུར་ཞེས་ཀྱང་བརྗོད་ལ། བྱ་གཡེང་ལུགས་སྲོལ་འདི་རྒྱ་གར་དང་བོད་གཉིས་ཀར་རང་སྐྱ་ཕེར་བའི་རང་རང་གི་ལུགས་སྲོལ་རེ་ཡོད་པར་སྙམ། ཅིའི་ཕྱིར་ན། ཀླུ་སྒྲུབ་ཀྱི་ཤེར་ཕྱིན་རྣམ་བཤད་ལས། དུར་ཁྲོད་དུ་བྱ་རྒོད་འཕུར་ཡོང་ནས་མི་རོ་ཟ། ཞེས་དང་། ཐང་སན་རྟོགས་བརྗོད་ལས། རྒྱ་གར་དུ་དུར་མཆོད་བྱེད་སྲོལ་གསུམ་སྟེ། བྱར་གཡེང་། སྦྱིན་སྲེག སྙིང་རྗེའི་སྦྱིན་གཏོང་། ཞེས་དང་། སྤྱོད་འཇུག་ལས། ཁྱོད་ཉོན་མོངས་པའི་གདོང་དེ་ནི། །ད་ལྟ་མངོན་སུམ་གྱུར་བ་བཞིན། །བྱ་རྒོད་ཀྱིས་བསལ་བྱས་མཐོང་ནས། །ཞེས་དང་། བདག་གིས་འདི་ལྟར་བསྐྱངས་པ་འམ། །བྱ་རྒོད་སོགས་ཀྱིས་ཟོས་ཀྱང་རུང་། །ཞེས་གསུངས་པ་ལས། ཕུང་བོ་གཟན་བསྒྱུར་འདི་རྒྱ་གར་གྱི་ཡུལ་ཆོས་ཤིག་ཏུ་གྲུབ་ལ། བོད་དུའང་མཁས་པ་ལྡེའུ་མཛད་པའི་རྒྱ་བོད་ཆོས་འབྱུང་རྒྱས་པ་ལས། ངར་ལ་སྐྱེས་ཀྱི་མྱང་རོ་ཤམ་པོ་མཁར་གྱི་ཕ་རོལ་ན་རྒོད་ཚང་ཡོད་པ་ལ་སྙད་བཏགས་ནས། བྱ་རྒོད་ཀྱི་གསོབ་ཏུ་ཞུགས་ཏེ། མྱང་རོ་ཤམ་པོ་རྩེ་ནས་ཕབ། ཞེས་འབྱུང་བའི་ཤུགས་ལས་དེ་དུས་སུ་ཕུང་བོ་བྱ་རྒོད་ལ་འགྱེད་པའི་ལུགས་སྲོལ་རང་རེའི་བོད་དུ་ཡོད་པར་རྟོགས་ཐུབ། ཁྱད་པར་དུ་སློབ་དཔོན་པད་འབྱུང་གི་རྣམ་ཐར་ལས། རྒྱ་གར་གྱིས་གཅན་གཟན་དང་བྱ་རྒོད་ཀྱིས་མི་རོ་ཟ་རུ་འཇུག་པའི་དུར་མཆོད་ཀྱི་སྲོལ་དེ་ནི། བོད་ཀྱི་བྱར་གཡེང་དུར་མཆོད་དང་ཆ་འདྲ། ཞེས་པ་ལས་རྒྱ་གར་ལ་རག་མ་ལས་པའི་བྱ་གཡེང་དུར་སྲོལ་བོད་ལ་ཡོད་པ་རྟོགས་ཐུབ།

ཁ་ཅིག འབྲི་གུང་རིན་ཆེན་དཔལ་ལམ། ཕ་དམ་པ་སངས་རྒྱས་གང་རུང་ནས་བྱར་གཡེང་དུར་མཆོད་འདི་སྲོལ་བཏོད་པར་བཞེད་པ་ཡོད་ཀྱང་། དེ་ནི་སྔར་སྲོལ་གྱི་རྨང་གཞིའི་སྟེང་ཁྱབ་རྒྱ་ཇེ་ཆེར་སྤེལ་བ་ལུང་དེ་དག་གིས་གྲུབ་བོ། །དེ་ལྟར་བྱར་གཡེང་དུར་སྲོལ་ནི་བོད་ལ་གདོད་མ་ནས་ཡོད་ཀྱང་། འབྲི་གུང་གི་དུས་སུ་བྱ་གཡེང་དུར་གནས་གཏན་ཁེལ་བར་གསལ་ཏེ། དུས་རབས་བཅུ་གཅིག་པའི་ནང་འབྲི་གུང་བཀའ་བརྒྱུད་པ་རིན་ཆེན་དཔལ﹙༡༡༤༣ནས༡༢༡༧﹚གྱིས་འབྲི་གུང་རི་ན་སྒོམ་སྒྲུབ་མཛད་སྐབས། ཁོང་གི་ཉམས་སྣང་ལ། གནས་རི་འབྲི་གུང་འདི། སྲིན་མོ་ཞིག་གི་ལུས་སྤྲུལ་ཡིན་པར་མཁྱེན་ཞིང་། དེའི་ཤར་གྱི་ཕྱུག་པོ་རི་སྤྱན་རས་གཟིགས་ཀྱི་ཚུལ་དང་། ལྷོའི་མགོན་པོ་རི་རྣམ་པར་སྣང་མཛད་ཀྱི་ཚུལ་དང་། ནུབ་ཀྱི་རྔ་མོང་རི་གསང་བདག་ཕྱག་རྡོར་གྱི་ཚུལ་དང་། བྱང་རི་འདི་འཇམ་དབྱངས་ཀྱི་འདྲ་དབྱིབས་སུ་མཐོང་ནས། གདན་ས་ཆེན་པོའི་རྒྱབ་རི་རྨོག་པོའི་རིའི་ནུབ་རྒྱུད་འདི་ཁྲོས་མ་ནག་མོ་འགྱིང་བའི་རྣམ་པར་ཡོད་ལ། དུར་ཁྲོད་འདི་ཉིད་ཁྲོས་མའི་ལྟེ་བའི་དབུས་སུ་ཡོད། སྤེན་མའི་ཚོགས་རྣམས་ཆོས་འབྱུང་དང་། ཞབས་གཡས་ཀྱི་མཐིལ་དུ་ལོ་ཆུང་དང་གྲི་ཤིར་ཐེབས་པའི་རོ་གཏོར་ས་ཡོད།

རི་རྩེ་དང་ཁོར་ཡུག་དག་ན་ནགས་ཚལ་ཆེ་ཆུང་བརྒྱད་ཡོད་པ་རྣམས་ཀྱང་། རྒྱ་གར་གྱི་དུར་ཁྲོད་ཆེན་པོ་བརྒྱད་དང་འདྲ་བ། གནས་རི་དང་ནགས་ཚལ་དེ་དག་ཏུ་གནས་པའི་འདྲེ་སྲིན་རྣམས་རིམ་གྱིས་ཞི་ནས་ལྷར་གྱུར་ཏེ། རེ་ཞིག་ནགས་ཚལ་བརྒྱད་ནས་འོད་ཟེར་མི་འདྲ་བ་བརྒྱད་འཕྲོས་ནས། གཅིག་ལ་གཅིག་ཐིམ་གྱིས། ཁ་དོག་སྣ་ལྔའི་འཇའ་གུར་ཆེན་པོ་ཞིག་ཏུ་གྱུར་ཏེ། དེའི་དབུས་ལ་རྡོ་ཆེན་པོ་ཞིག་བྱུང་ནས། ད་ལྟའི་འབྲི་གུང་དུར་ཁྲོད་དུ་ལྷུང་ལ།

ཡང་། བཤད་ཚུལ་གཞན་ལ་རྒྱ་གར་བསིལ་བ་ཚལ་གྱི་དུར་ཁྲོད་ནས་མཁའ་འགྲོ་མ་རྣམས་ཀྱིས་འཇའི་དྲྭ་བ་ལས་དུར་རྡོ་ཞིག་འདིར་སྤྱན་དྲངས་ནས་ཕུལ་ཡང་ཟེར། དུར་ཁྲོད་འདི་དང་བསིལ་བ་ཚལ་གཉིས་སུ་མེད་པའི་རྟགས་སུ། དེ་གཉིས་ཀྱི་བར་དུ་འོད་ཟེར་འཕྲོ་བ་རྒྱུན་མི་ཆད་ཅིང་། ཞིང་སྐྱོང་གི་མཁའ་འགྲོ་དང་། ཁྲ་དང་། བྱ་རྒོད། ཀེང་རུས། རོ་ལངས་དང་དུར་བྱ། དུར་ཕག ཀང་ཀ བཞད་སོགས་ཕན་ཚུན་བར་དུ་རྒྱུ་བ་དག་སྣང་ཅན་གྱིས་རྒྱུན་པར་མཐོང་བར་གྲགས་ལ། དུར་རྡོའི་སྟེང་དུ་མ་ཎི་ཡིག་དྲུག་ཚོན་མདོག་ལྡན་པ་རང་བྱུང་བབས་པས། དུར་རྡོ་འཇའ་ཚོན་མར་ཡང་གྲགས། འོག་ཏུ་སྐྱོབ་པ་རིན་པོ་ཆེས། ངན་སོང་སྦྱོང་བའི་ཞི་ཁྲོའི་དཀྱིལ་འཁོར་བཀོད་ཅིང་། རབ་གནས་མཛད་པར་མ་ཟད། ཁོང་གི་ཐུགས་སུ། གནས་འདིར་དུར་གནས་ཞིག་གཏན་ཁེལ་བྱས་ན། དེར་བསྐྱལ་བའི་འདས་པོ་ཐམས་ཅད་སྤྱན་རས་གཟིགས་ལ་དངོས་སུ་མཇལ་བ་དང་། དམྱལ་བར་ལྷུང་བ་མི་སྲིད་དོ། །ཞེས་བཀའ་ལུང་དྲོན་མོ་བསྩལ་བས། འབྲི་གུང་བྱར་གཡེང་གི་དུར་ཁྲོད་འདི་གནས་ཁམས་ཅན་དུ་བྱས་ཏེ་གཏན་ཁེལ་བྱས་པ་ཡིན། ཡང་། སྐབས་ཤིག་སྐྱོབ་པ་རིན་པོ་ཆེ་བུ་སློབ་སུམ་ཅུ་ཙམ་རྟ་ལྕག་སྟེང་ཀར་ཕེབས་ཏེ། ཁོང་གི་སློབ་མ་ཚོར། དེ་རིང་ཁྱེད་རྣམས་ཀྱིས་གྲུབ་རྟགས་རེ་སྟོན་དགོས་ཞེས་སྐུལ་བས། མགར་དམ་པ་འཇིགས་བྱེད་ཀྱི་སྐུར་སྤྲུལ་བ་དང་། གཉོས་རྒྱལ་བ་ལྷ་ནང་བས་རྒྱ་གར་ནས་ཨ་རུ་ར་རློན་པ་སྐད་ཅིག་གིས་བླངས་པ་དང་། དཔལ་ཆེན་ཆོས་ཡེ་བླ་མའི་སྐུར་གཉིས་མེད་ཐིམ་པ་དང་། ཁ་ཅིག་རྡོ་དྲིལ་བར་སྣང་དུ་བཞག་པ། སྐུ་སྟོད་དུ་མེ་སྦར་བ། སྐུ་སྨད་དུ་ཆུ་བྲུབས་པ་སོགས་བསྟན་པ་དང་། ཐ་ན་ཇ་མ་སྤོ་བོ་བཀྲ་ཤིས་ཀྱིས་ཀྱང་གཟན་དང་གཟར་བུ་ཉི་ཟེར་ལ་བཀལ་བ་སོགས་གནང་བས། ཉེ་གནས་རིན་ཆེན་གྲགས་སྐུ་ན་ཆུང་བས་གྲུབ་རྟགས་སྟོན་མ་སྤོབས་པར་སྐུ་གཤེགས། གདུང་དུར་སྟེང་དུ་དྲངས་ནས་བསིལ་བར་བརྩམས་པ་ན་གྲི་མ་ཟུག་པས་རྗེ་སྐྱོབ་པར་ཞུས་ཚེ། ཁོང་གིས་གདུང་གི་སྙིང་ཀར་སྦ་འཁར་བཙུགས་ཏེ་འཕོ་བའི་མགུར་རྟ་ལྕག་ལྟེང་ཀ་མ་ཞེས་པ་གསུངས་རྗེས། འཇའ་འོད་བཀྲ་ཞིང་། གདུང་ཡུངས་དཀར་གྱི་རྐྱལ་བ་གཤགས་པ་བཞིན་རིང་བསྲེལ་གྱི་ཕུང་བོ་གྱུར་ཏེ་འཐོར་བས། ཕྱགས་མས་འཕྱག་པས་དེ་ཕྱིན་མིང་རྟེན་འཕྱག་སྒང་ཞེས་གྲགས་སོ། །

དེ་ནི་ཕ་དམ་པ་སངས་རྒྱས་བོད་ལ་ཐེངས་ལྔར་ཕེབས་པར་གྲགས་པའི་ཕེབས་ཐེངས་གསུམ་པ་སྟེ། དུས་རབས་བཅུ་གཉིས་པའི་མགོར་ཞི་བྱེད་གཅོད་ཀྱི་གདམས་པ། ཕུང་བོ་གཟན་བསྒྱུར་གཏོང་བའམ་བྱ་རྒོད་སོགས་ལ་སྟེར་བ་འདི་གཅོད་གཞུང་གི་ཆོ་ག་དང་སྦྱར་ཏེ་འཐུས་ཚང་དུ་གྱུར་བ་ཡིན་ལ། དེ་ཡང་། གཅོད་ཀྱི་སྐོར་ལ་ཕོ་གཅོད་དང་མོ་གཅོད་གཉིས་ལས། དང་བོ་ནི། སྨང་ར་སེར་བོ་ནས་བརྒྱུད་པ་དང་། གཉིས་པ་ནི། མ་གཅིག་ལབ་སྒྲོན་ནས་བརྒྱུད་པའོ། །མ་གཅིག་ལབ་སྒྲོན་གྱིས་བརྩམས་པའི་ཕུང་བོ་གཟན་བསྒྱུར་གྱི་གཅོད་གཞུང་ཡང་མང་དུ་སྣང་སྟེ། གཅོད་གཞུང་བཀའ་ཚོམ་ཆེན་མོ། ཡང་རྩོམ། ཉིང་རྩོམ། ལེའུ་ལག གནས་ཐེམ། ཁོང་རྒོལ། གཡང་བ་བརྡ་ཆོས་ལ་བཟླས་སྐོར་གསུམ། གཞི་ལས་སློང་བ། ཁྱད་པར་གྱི་སྨན་ངག་བཅས་བཅུ་ཡོད། དེ་ཡང་། ནང་ཆོས་ལས། རྟ་དང་གླང་བོ་བརྒྱ་འགྱུར་ཡིན། །བུ་དང་ཆུང་མ་སྟོང་འགྱུར་ཡིན། །ལུས་ཀྱི་མཆོད་སྦྱིན་འབུམ་འགྱུར་ཡིན། །ཞེས་གསུངས་པ་སོགས་ལ་ཁུངས་གཏུགས་པ་ཡིན་ནོ། །གཤིན་པོའི་ཕུང་བོ་གཟན་ཏུ་བསྒྱུར་ཚུལ་ལ། དཀོན་མཆོག་སྲི་ཞུའི་མགྲོན་ལ་མཆོད་པའི་ཚུལ་དུ་འབུལ་བ་དང་། མགོན་པོ་ཡོན་ཏན་མགྲོན་ལ་གཏང་རག་གི་ཚུལ་དུ་འབུལ་བ། རིགས་དྲུག་སྙིང་རྗེའི་མགྲོན་ལ་སྦྱིན་པའི་ཚུལ་དུ་གཏོང་བ། གདོན་བགེགས་ལན་ཆགས་ཀྱི་མགྲོན་ལ་བུ་ལོན་གྱི་ཚུལ་དུ་གཏོང་བ་བཅས་དམིགས་རྣམ་བསྐྱངས་ཏེ། དངོས་སུ་བྱ་རྒོད་ལ་སྟེར་བ་ཡིན་ཅིང་། གཤིན་པོ་དུར་ཁྲོད་དུ་བསྐྱལ་ནས་བྱ་གཏོར་བྱེད་མཁན་རྣལ་འབྱོར་རྟོགས་ལྡན་པ་ཡིན་ན་རབ་དང་། མིན་ཡང་སྦྱིན་པ་ཙམ་གྱི་ཕན་ཡོན་ཡོད་དོ། །ཚུལ་འདི་ལ་དགོངས་ནས་གཙང་བ་རྒྱ་རས་པས། བདག་ཤི་བའི་འོག་ཏུ་ཡང་མགོ་དང་། རྐང་ལག་དང་། ཤ་དང་། རུས་པ་དང་། ཡན་ལག་དང་། ཉིང་ལག་དང་། སྐྲ་དང་བ་སྤུ། སོ་དང་སེན་མོ། ཁྲག་དང་ཆུ་སེར། ཞག་དང་ཚིལ་བུ། དབང་བོ་ལྔ་ལ་སོགས་པའི་སྒོ་ནས་ཀྱང་འགྲོ་དོན་དཔག་ཏུ་མེད་པ་འགྲུབ་པར་གྱུར་ཅིག ཅེསགསུངས་སོ། །འོན་ཀྱང་། འགོས་ནད་དང་། ཁྲིམས་ཐོག་ནས་བསད་པ་ཡིན་ན། སར་སྦས་པ་ལས། ཕུང་བོ་གཟན་བསྒྱུར་བྱེད་པ་མེད།

བེམ་པོ་དོ་དམ་བྱེད་སྟངས་ལ། དབུས་གཙང་ལ་མཚོན་ན། ཆེད་བསྐོས་ཀྱི་བདག་གཉེར་མཁན་ཡོད་ལ། དོ་དམ་པས་བེམ་པོ་དུམ་བུར་གསིལ་ཞིང་། རྩམ་གསེས་བརྒྱབ་ནས། བྱ་རྒོད་ལ་ཟར་བཅུག་རྗེས། རུས་ཆེན་རྣམས་བསླངས་ཏེ་ཕུར་བུ་ལ་འདོགས་པ་དང་། མཐར་རུས་པ་རྣམས་ཆུང་ངུར་བཅགས་ཏེ་བྱ་རྒོད་ལ་ཤུལ་ལུས་མེད་པར་ཟར་འཇུག་གོ ། མདོ་སྨད་ལ་ཆ་མཚོན་ན། ཆེད་བསྐོས་དོ་དམ་མི་སྣ་མེད་ཀྱང་། རང་རང་གི་གྲོང་ཚོའི་ཤ་རུས་གང་ཡང་མ་ཉེ་བ་དུ་མ་བདམས་ནས་བྱར་གཡེང་བྱེད་དོ། །དེ་ཡང་བེམ་རོ་དུམ་བུར་བསིལ་ཏེ་བྱ་འབོད་བཏང་ན། བྱ་ཚོགས་ཀྱིས་རུབ་འཛིང་བྱས་ནས་ཁྱུར་མིད་གཏོང་ལ། བེམ་རོ་ལ་ལར་རང་གི་བླ་བྱ་མ་ཐོན་བར་དུ་བྱ་རྒོད་གཞན་གྱིས་ཁ་འཇོག་མི་ཕོད་ལ། བླ་བྱ་དེས་ཤ་རྡོག་གསུམ་བཞི་ཙམ་ཟོས་རྗེས་རུབ་ཟ་བྱས་ཏེ་ལྷག་ལུས་མེད་པར་ཟ་ལ། ཤུལ་དུ་ལུས་པའི་སྐྲ་རུས་གྱོན་པ་སོགས་མེར་སྲེག་བཏང་སྟེ། མཐུན་རྐྱེན་འཛོམས་ན་དགེ་འདུན་སོགས་ཀྱིས་སྐྲ་ཆོག་དང་རུས་ཆོག་བྱེད་དོ། །ཡུལ་གྲུ་གང་ལ་མཚོན་ནའང་། ཐོག་མར་ས་སློང་བ། བྱ་འབོད་ཀྱི་ཆོ་ག་དང་། ཚ་གསུར་ཕུད་སྲོལ་སོགས་གཅིག་མཚུངས་སོ། །

ཕུང་བོ་གཟན་བསྒྱུར་བྱ་སྟངས་ཀྱི་དམིགས་ཡུལ་དང་དགོས་པ་ནི། མི་རྟག་པར་སྐུལ་ལྕག་འདེབས་པའི་ཡང་མཆོག་སྟེ། བཀའ་གདམས་གོང་མ་ཚོས། གསང་སྤྱོད་ཁང་སོགས་སུ། བེམ་པོ་ཝ་ཁྱི་དང་བྱ་རྒོད་སོགས་ཀྱིས་ཟ་བ་འབྲི་སྲོལ་ཡང་ཡོད་དོ། །གཞན་ཚེ་འདས་ཀྱི་ལུས་ཕུང་བྱ་རྒོད་ལ་བཏང་བས་སྦྱིན་པའི་ཕན་ཡོན་དང་། བྱ་རྒོད་ཀྱི་མིང་གི་རྣམ་གྲངས་ལ། རིང་འཕུར་དང་། ནམ་འཕང་བསྟོད་ཟེར་བས། ཕུང་བོ་ཟོས་རྗེས་ཉིན་ཞག་བདུན་ལ་ཨ་སྔོན་བསྟད་ནས་འདུག་པར་གྲགས་པས། གཤིན་པོ་དེའི་རྣམ་ཤེས་མཐོ་རིས་སུ་སྐྱེས་པའི་རྟེན་འབྲེལ་དང་། བེམ་པོ་ཟོས་པའི་བྱ་བྲུན་རི་མཐོ་ས་གཙང་དུ་འདོར་པས་ཁྱད་ཆོས་ལྡན་པ་དང་། བྱ་རྒོད་ཐ་མར་འཆི་ཚེ་ཡང་བྱ་རོ་རླུང་གི་སྤུ་གྲིས་འཐག་སྟེ་ས་ལ་མི་ལྷུང་བ་སོགས་ཡིན།

བྱེ་བྲག་བེམ་པོ་ལ་བྱ་འབོད་གཏོང་ཚུལ་ལ། ལས་སྣ་ཚོགས་ཀྱི་བེའུ་བུམ་ལས་འབྱུང་བ་འདིར་བཀོད་ན། ཨོཾ་རྡོར་གླང་སྭཱ་ཧཱ། ཞེས་པ་འདི་རྡོ་ལེབ་ལ་བྲིས་ཏེ་རོའི་སྙིང་ཀར་བཞག་པས། གཤེད་སོགས་ཕྲལ་བར་བྱེད། སླར་བྱ་འབོད་སྔགས། སརྦ་ཛ་ཡེ་ཀ་ཡ། ཞེས་བརྒྱ་རྩ་བརྒྱད་བཟླས། ཕྱོགས་བཞིར་ཕུས་བཏབ། རྐང་གླིང་དྲག་ཏུ་བུས་བས། བྱ་རྣམས་ཁ་བ་བབས་པ་ལྟར་འདུས་པར་བསམ་པས་ལོན་ནོ། །

ཡང་། བྱ་འབོད་སྔགས་འདི་རྡེའུ་ལ་བརྒྱ་ཚོ་གསུམ་སྔགས། རྡེའུ་རྣམས་བྱ་རྒོད་དུ་བསམ་ལ་གཏོར་བས་བྱ་མི་འོང་བ་མི་སྲིད་དོ། །ཨོཾ་ལིང་ཁུག་ལིང་ཁུག་ཛ། ཟབ་བོ། །

ཡང་། བྱ་འབོད་ན། རང་མཁའ་འགྲོ་མ་དམར་མོ་བྱ་རྒོད་ལ་བཅིབ་པ་བསྒོམ། དང་བོ་བགེགས་བསྐྲད་དེ། དེ་ནས་གསུར་ཆེན་པོ་བཏང་། ལུས་སྦྱིན་ཚར་གཅིག་བཏོན། དེ་ནས་ཚེ་འདས་ཀྱི་ལོ་གྲངས་རྡེའུ་ལ་སྔགས་འདིས་སྔགས་ནས་ཕུང་བོར་བྲབ། ཨོཾ་རྡོར་ལིང་ཕོབ། ལྡིང་ལྡིང་ཕོབ། རྒྱང་རྒྱང་ཕོབ། ཤར་ཤར་ཕོབ། ཐིབ་ཐིབ་ཕོབ། བརྒྱ་རྩ་བརྒྱད་བཟླས་པས་ཆོག་སྟེ། ཕ་དམ་པའི་མན་ངག་གསང་རྒྱ་ཅན་ནོ། །

ཡང་། གཅིག་རྡོ་ལེབ་བཞི་ལ། བྱ་བཞིའི་གཟུགས་ནང་སྔགས་བཞི་བྲིས་ལ། ཕྱོགས་བཞི་འམ་ཕུང་བོའི་སྟེང་དུ་བཞག དེ་ཡང་འཛོམས་ན་བྱ་ལོ་བ་གཅིག་གིས་བཞག རོ་བསང་དང་གསུར་ཆེ་བ་བཏང་། བ་རི་མ་ཤམ་ཤམ། ཞེས་བཟླས་པས་མྱུར་དུ་བྱ་འབབ་པར་འགྱུར་རོ། །

ཡང་། བྱ་འབེབས་ཀྱི་ཆོ་ག་ལས། གཡམ་མ་ལ་རྡོ་རྗེ་རྒྱ་གྲམ་བྲིས་ལ། དེའི་ལྟེ་བ་ལ་ཨོཾ་པ་ཤི་ཤམ་ཤམ་པ་རི་ཤམ་ཤམ་སྭཱ་ཧཱ། ཞེས་པའི་སྔགས་ཡིག་མགོ་ནང་དུ་བསྟན་ཏེ་བྲིས། དེ་ཉིད་རོའི་སྙིང་ཁར་བཞག སྔགས་མང་དུ་བཟླས་ལ། བྱེ་མ་རོའི་ངོ་གདོང་ལ་བྲབ་ཅིང་། དམིགས་པ་ནི། ཕྱོགས་མཚམས་སྟེང་འོག་རྣམས་ནས་བྱའི་ཚོགས་དཔག་ཏུ་མེད་པ་བཀུག་ནས། བྱ་དེ་ཐམས་ཅད་ཀྱིས་རོ་ཧབ་ཐོབ་ཏུ་བཟའ་བར་སྒོམ་ལ་སྔགས་བཟླས་ཤིང་བྲབ་བོ། །

༤ གདུང་རྟེན་བཞེངས་པ། ༡ སྐུ་གདུང་མཆོད་རྟེན་གྱི་ཁུངས་སོགས་ནི། སྔོན་གྱི་ཚེ་མི་རྣམས་ཀྱི་ཚེ་ལོ་བཞི་ཁྲིར་སྤྱོད་པའི་ཚེ་སྟོན་པ་འཁོར་བ་འཇིག་མྱ་ངན་ལས་འདས་ནས། རྒྱལ་བོ་མཛེས་པས་སྐུ་གདུང་ལ་མཆོད་རྟེན་བརྩིགས་ཏེ། བཀུར་སྟི་བགྱིས་པ་མདོ་སྡེ་ལས་བརྒྱའི་བམ་པོ་ཉེར་བརྒྱད་པ་ལས་གསུངས་པ་དང་། ཡང་མྱང་འདས་ཀྱི་བམ་པོ་བཞི་བཅུ་རྩ་གཉིས་པ་ལས་ཀུན་དགའ་བོ། མྱ་ངན་ལས་འདས་ནས་བསྲེགས་ཏེ་འཁོར་རྣམ་བཞིའི་རིང་བསྲེལ་བསྡུས་ནས་རིན་པོ་ཆེ་སྣ་བདུན་བུམ་པར་བཅུག་ལ། མཆོག་གི་གྲོང་ཁྱེར་གྱི་ནང་ལམ་བཞི་མདོ་རིན་པོ་ཆེ་སྣ་བདུན་གྱི་བུམ་པར་བཅུག་ལ། ཞེས་པ་ནས་འཁོར་རྣམ་བཞིས་མཆོད་པར་བྱའོ། །ཞེས་དང་། ཡང་། སངས་རྒྱས་མྱ་ངན་ལས་འདས་ནས་སྐུ་གདུང་ཞུགས་འབུལ་གཏོང་སྐབས། སྡིག་ཅན་ཡུལ་གྱི་གྱད་མི་རྣམས་དང་། རྟོག་གཡོའི་ཡུལ་གྱི་རྒྱལ་རིགས་པུ་ལུ་ཀ་དང་། སྒྲ་སྒྲོགས་ཀྱི་རྒྱལ་བོ་ཀྲོ་དྷ། ཁྱབ་འཇུག་གླིང་དུ་གནས་པའི་བྲམ་ཟེ། གྲོང་ཁྱེར་སེར་སྐྱའི་ཡུལ་གྱི་ཤཱཀྱ། ཡངས་པ་ཅན་དུ་གནས་པའི་ལི་ཙ་བྱི་བཅས་ཁག་བརྒྱད། སྔ་གཞུག་ཏུ་སླེབས་ནས། སྐུ་གདུང་བསྒོ་བའི་རྩོད་ལྒིང་བྱུང་སྐབས། བྲམ་ཟེ་བྲེ་བོ་དང་མཉམ་པའི་སྐུ་གདུང་ཆ་བརྒྱད་དུ་བགོས་ཏེ། མ་གྷ་དྷའི་ཁལ་རེ་རེ་བྱུང་བས། དེ་རང་རང་གི་ཡུལ་དུ་སྤྱན་དྲངས་ཏེ། སྐུ་གདུང་ཡོད་པའི་མཆོད་རྟེན་རེ་བཞེངས་པ་བཅས་ཀྱི་ལོ་རྒྱུས་ཡོད་པ་ལ། ཞེས་གསུངས་པ་དེ་རྣམས་ཡིན་ལ། རང་ཅག་བོད་ལ་མཚོན་ན་ཡང་། རྒྱལ་སྲས་སེམས་དཔའ་འམ་རྟོགས་ལྡན་པ་ཚོའི་སྐུ་གདུང་། མེས་སྦྱངས་པའི་གདུང་རུས་དང་། ཐལ་བ་ལ་རུས་ཆོག་བྱས་ཏེ། ས་ཙྪ་གདབ་པའམ། གདུང་ཐལ་སྣག་ཚ་དང་གསེར་དངུལ་སོགས་སུ་བསྲེས་ཏེ། བཀའ་བསྟན་དང། འབུམ་སོགས་གསུང་རྟེན་བཞེངས་སྲོལ་ཡོད་པ་དང་། ཡང་ན། རིང་བསྲེལ་དང་སྐུ་རུས་ནང་གཞུག་བྱས་ནས་མཆོད་རྟེན་བཞེངས་སྲོལ་ཡོད་དེ། རྒྱལ་བ་པཎ་ཆེན་རྣམ་གཉིས་དང་། གྲུབ་མཐའ་སོ་སོའི་སྐྱེས་ཆེན་དག་གི་སྐུ་གདུང་མཆོད་རྟེན་མང་དུ་བཞུགས་པ་དེའོ། །

དེ་ཡང་། ཞིབ་ཙམ་བཤད་ན། སངས་རྒྱས་བྱང་སེམས་དང་ཆོས་འབྲེལ་དངོས་འཐོབ་ཀྱི་རྩ་བའི་བླ་མ་སོགས་ཀྱི་སྐུ་ཕུང་དེ། དུར་རམ་ས་ཕྱོགས་གཙང་མ་ཞིག་ཏུ་སྤྱན་དྲངས་ཏེ། རྡོ་རྗེ་གུར་དང་ངན་སོང་སྦྱོང་རྒྱུད་ཀྱི་ཆོ་ག་འམ། ཡང་ན། གྲུབ་མཐའ་སོ་སོའི་མཁས་པས་མཛད་པའི་སྦྱངས་ཆོག་ལྟར་ཞུགས་འབུལ་གཏོང་བ་སྟེ། བུ་སྟོན་རིན་པོ་ཆེ་དང། འབྲོང་རྩེ་ལྷ་བཙུན་རིན་ཆེན་རྒྱ་མཚོ་སོགས་ཀྱིས་མཛད་པ་ཡོད་ཀྱང་། དགེ་ལུགས་པར་མཚོན་ན། ཞལ་གསལ་ཞིང་འཇུག་བདེ་བ་ཐུའུ་བཀྭན་ཆོས་ཀྱི་ཉི་མས་མཛད་པའི་རྡོ་རྗེའི་སེམས་དཔའི་སྒོ་ནས་ཡུལ་ཁྱད་པར་ཅན་སྐུ་གདུང་མཆོད་ཅིང་སྦྱང་བའི་ཆོ་ག་རིན་ཆེན་སྒྲོན་མེ་བྱ་བ། ཁོང་གི་གསུང་འབུམ་ལྷ་ས་ཞོལ་པར་མའི་[ང]བའི་ནང་བཞུགས་པ་དེ་ལེགས་ལ། ཆོ་ག་དེར། མྱ་ངན་ལས་འདའ་ཁར་ཐུགས་དམ་གསལ་འདེབས་ཇི་ལྟར་གནང་ཚུལ་དང་། དགོངས་པ་རྫོགས་རྗེས་སྐུ་གདུང་ལྷར་བསྐྱེད་དེ། ཁྲུས་གསོལ་དང་། མཆོད་འབུལ། དགོངས་རྫོགས་ཀྱི་ཆོ་ག ཞུགས་འབུལ་གཏོང་ཚུལ། སྐུ་རུས་གདན་འདྲེན་ཚུལ། སྐུ་རུས་དང་རིང་བསྲེལ་སོགས་བདག་གཅེས་ཞུ་སྟངས། གདུང་སྦྱངས་ཀྱི་གནས་དེར་མཆོད་རྟེན་བཞེངས་ཚུལ་སོགས་ཞིབ་རྒྱས་འཁོད་ཡོད། ཡང་། གདུང་སྦྱངས་དེར་མི་གསལ་བའི་མཐོང་བརྒྱུད་ཕྱག་ལེན་སྐོར། བླ་མ་སྐྱེས་ཆེན་དམ་པ་རྣམས་དགོངས་པ་རྫོགས་རྗེས། སྐུ་གདུང་ལ་ཕྱག་གསུམ་ཕུལ་ཏེ། རས་གཙང་དཀར་བོ་ཞིག་གིས་ཞལ་གྱི་ཨོག་སྐོའི་འོག་ནས་སྐུའི་ཐུགས་ཀ་བར་བཀབ་སྟེ་བཞག་ཐོག ཐུགས་དམ་གྲོལ་བའི་རྟགས་མ་བྱུང་བར་སྐུ་གདུང་ལ་གཡོ་འགུལ་སོགས་མི་གཏོང་། ཐུགས་དམ་གྲོལ་བའི་རྟགས་ཤངས་བུག་གཉིས་ལས་བྱང་སེམས་དཀར་དམར་ཕེབས་པའི་མཚམས། སྐུ་གདུང་ལ་དར་གོས་དཀར་བོ་འམ་དམར་སེར་གང་རུང་གིས་དྲུག་ཆིངས་རྒྱག་པ་སྟེ། དྲུག་ཆིངས་རྒྱག་སྟངས་ནི། མཁས་དབང་ཚེ་ཏན་ཞབས་དྲུང་གི་རང་རྣམ་བདེན་གཏམ་རྣ་བའི་བདུད་རྩི་ལས། དྲུག་ཆིངས་ཞེས་པ་ཐོག་མར་རྡོ་རྗེ་སྐྱིལ་ཀྲུང་མཛད་པའི་ཞབས་གཉིས་ཀྱི་བསྣོལ་མཚམས་སུ་མདུད་པ་གཅིག དེ་ནས་ཕྱག་གཉིས་མཉམ་བཞག་མཛད་པའི་ཕྱག་ངར་ལ་དཀྲིས་བརྒྱབ་ནས་སྐུ་རྒྱབ་ཏུ་མདུད་པ་གཅིག དེ་ནས་ཐུགས་ཀའི་ཐད་དུ་མདུད་པ་གཅིག དེ་ནས་སྐུ་དཔུང་ལ་དཀྲིས་བརྒྱབ་ནས་གཉའ་ལྟག་ཏུ་མདུད་པ་གཅིག དེ་ནས་དཔྲལ་བའི་ཐད་དུ་མདུད་པ་གཅིག དེ་ནས་དབུ་ཐོད་ཀྱི་རྒྱབ་ཏུ་མདུད་པ་གཅིག དེ་ནས་དར་གཉིས་ཀྱི་སྣེ་མོར་དཔྲལ་བ་གཡས་གཡོན་ནས་ཁུགས་ལོ་བྱས་ཏེ་མར་ལ་དཔྱངས་པར་བྱས་པ་ནི་དྲུག་ཆིངས་ཀྱི་ཕྱག་ལེན་ཏེ། འདི་སྐྱེ་བོ་ཐ་མལ་བ་རོ་སྲེག་བྱེད་པ་ལ་ཡང་ལག་ལེན་དུ་འདེབས་རུང་བར་གསུངས་སོ་ཞེས་འཁོད་ཡོད། དེ་ལྟར་དྲུག་ཆིངས་བརྒྱབ་སྟེ། གདུང་སྒྲོམ་ནང་དུ་བཞག་ནས་ཆོས་གོས་རྣམ་གསུམ་སོགས་གསོལ་ཏེ་རབ་བྱུང་གི་ཆས་དང་། དེའི་སྟེང་ལྷའི་ཆོས་འཇུག་སྒྲོན་ཏེ། དགུང་ཞག་ཇི་ཙམ་འཇོག་རིང་གདུང་ཁྲུས་དང་། གདུང་སྒྲུབ། དད་ལྡན་ཁག་གིས་དགོངས་རྫོགས་མཆོད་འབུལ་བཅས་གྲུབ་མཚམས། ས་གཙང་ཞིག་ཏུ་སོ་ཕག་སོགས་ཀྱིས་སྲེག་ཐབ་བཞེངས་ཏེ། དེའི་སྟེང་ཟླུམ་པོའི་སྟེང་དུ་མེ་སྒོ་དོད་པ་ཞིག་གི་ནང་། སྟོད་ཀྱི་ཆར། ལྕགས་ཁྲས་བཀབ་པའི་སྟེང་དུ་སྐུ་གདུང་བཞག་སྟེ། ཤུག་པ་དང་ཙན་དན་སོགས་དྲི་བཟང་གི་ཤིང་ཕྱོགས་བཞི་ནས་བརྩིགས་ཏེ། ཏིལ་སྣུམ་མར་ཁུ་བསྲེས་པ་བླུགས་ནས་སྐུ་རུས་རྣམས་གཙང་མར་མ་ཚིག་གི་བར་དུ། ཆོ་གའི་ནང་གསལ་བ་ལྟར་ཞུགས་འབུལ་དང་། ཉིན་ཤས་སོང་རྗེས་སྤུར་ཁང་ཞལ་ཁ་ཕྱེས་ཏེ། སྐུ་གདུང་གི་ཆ་འགའ་ཞིག་སློབ་མ་དང་ཡོན་བདག་རྣམས་ལ་འགྲེམས་པ་དང་། མངས་ཆེ་བ་སྐུ་གདུང་མཆོད་རྟེན་དུ་འདྲ་སྐུ་བཞེངས་པའི་ནང་གཟུངས་སུ་ཕུལ་དགོས་པ་ཡིན། སྐུ་གདུང་ཞུགས་འབུལ་གཏོང་ཚུལ་གྱི་རིམ་པ་རྗེ་འཇིགས་མེད་རིགས་པའི་བློ་གྲོས་ཀྱི་གདུང་ཆོག་ཕན་བདེའི་འདོད་འཇོ་ལས་ཀྱང་ཞིབ་ཏུ་བརྗོད་ཡོད།

ཡང་། རིང་བསྲེལ་བབས་པ་ཡིན་ན། རིང་བསྲེལ་གསུམ་སྟེ། ཆོས་སྐུའི་རིང་བསྲེལ། སྐྲ་བལ་གྱི་རིང་བསྲེལ། སྐུ་གདུང་གི་རིང་བསྲེལ་ལོ། །དང་བོ་ནི། གཟུགས་ཀྱི་རིགས། གཉིས་པ་ནི། དབུ་སྐྲ་དང་ཕྱག་སེན་གྱི་རིགས། གསུམ་པ་ནི། སྐུ་གདུང་གི་རིང་བསྲེལ་དངོས་སོ། །ཡང་། སྐུ་གདུང་ལ་རིགས་ལྔ་སྟེ། ཤ་རི་རམ། ཆུ་རི་རམ། བ་རི་རམ། ཉ་རི་རམ། པཉྩཱ་རམ་དང་ལྔ་ལྡན་གདུང་རིགས་ལྔའི་གདུང་སྟེ་སྐུ་ཡང་འབྱུང་། དེ་རྣམས་སྐུ་འཐོབ་རྟགས་ཡིན་ཏེ་ཞེས་པས། ཤའི་རྟེན་དུ་ཤ་རི་རམ་དཀར་སེར་རིན་པོ་ཆེའི་གདུང་སྟེ། ཡང་དག་གི་རྟེན་དུ་བཞག་པའོ། །ཁྲག་གི་རྟེན་དུ་ཆུ་རི་རམ་མཐིང་ག་རྡོ་རྗེའི་གདུང་སྟེ། སྲ་ཞིང་མཁྲེགས་པས་རྡོ་རྗེ་གདུང་དུ་བཞག་པའོ། །རུས་པའི་རྟེན་དུ་བ་རི་རམ་སེར་བོ་རིན་པོ་ཆེའི་གདུང་དུ་བྱོན་ཏེ། རྒྱལ་ཚབ་ཉིད་ཀྱི་རྟེན་དུ་བཞག་པའོ། །ཡན་ལག་གི་རྟེན་དུ་ཉ་རི་རམ་ལྗང་ཁུ་ལས་ཀྱི་གདུང་སྟེ། ཤིན་ཏུ་སྲ་ཞིང་མཁྲེགས་པའི་ལས་ཀྱི་གདུང་དུ་བཞག་པའོ། །འབྱུང་བཞིའི་དྭངས་མ་ལ་པཉྩཱ་རམ་འབྱོན་ཏེ་ཁ་དོག་ལྔ་ལྡན་དེ་བཞིན་གཤེགས་པའི་གདུང་དུ་བཞག་པའོ། །ཡང་ཤ་རི་རམ་མགོ་ལས་འབྱུང་། ཆུ་རི་རམ་ཁྲག་ལས་འབྱུང་། བ་རི་རམ་སྒལ་ཚིགས་ལས་འབྱུང་། ཉ་རི་རམ་རྐང་ལས་འབྱུང་། པཉྩཱ་རམ་སྙིང་ལས་འབྱུང་བར་ཡང་གསུངས་སོ། །ཡང་། རྒྱས་པར་ཤེས་འདོད་པ་དག་གིས་ས་པཎ་གྱིས་མཛད་པའི་སྡོམ་གསུམ་རབ་དབྱེའི་ནང་རིང་བསྲེལ་སྐོར་ལ་དོགས་དཔྱོད་དང་དཔྱད་གཏམ་མང་བོ་སྤེལ་གནང་མཛད་ཡོད་པས། དེར་གཟིགས་པར་བྱའོ། །

༢ དམར་གདུང་དུ་འཇོག་པ། སྐྱེས་ཆེན་དམ་པ་ནུས་ལྡན་རྣམས་དགོངས་པ་རྫོགས་རྗེས། ཕྱིས་འབྱུང་གི་དགོས་པ་མང་བོའི་དོན་དུ། སྐུ་གདུང་མ་ཉམས་པར་འཇོག་པར་བཤད་དེ། དཔེར་ན། གཞོན་ནུ་ནུས་ལྡན་གྱིས། སློབ་དཔོན་ཀླུ་སྒྲུབ་ཀྱི་དབུ་རྩྭ་ཀུ་ཤས་བཅད་པའི་ཚེ། སྐུ་ཁྲག་འོ་མའི་རང་བཞིན་དུ་བྱུང་ཞིང་། དབུ་དེའི་ཞལ་ལས། ང་ནི་བདེ་བ་ཅན་གྱི་འཇིག་རྟེན་དུ། །ཕྱིན་ནས་ལུས་འདི་ལ་ཡང་འཇུག་པར་འགྱུར། །ཞེས་པ་ལྟར། ཕྱིས་སུ་དབུ་དང་ལུས་འབྱར་ནས། བསྟན་འགྲོར་ཕན་པ་རྒྱ་ཆེར་སྒྲུབ་པར་གྲགས་པ་དང་། བོད་དུ་ཡང། རྗེ་ཙོང་ཁ་པ་སོགས་ས་དགེ་ཀར་རྙིང་སོགས་སྐྱེས་ཆེན་དམ་པ་སུམ་ཅུ་ལྷག་དམར་གདུང་དུ་ཡོད་པ་དང། འགའ་ཞིག་ལོ་ངོ་ཆིག་སྟོང་ལྷག་དང་། ལོ་ངོ་བདུན་བརྒྱ་ལྷག་གི་ལོ་རྒྱུས་ཡོད་ཀྱང་། རིག་གསར་སྐབས་གཏོར་གཤིག་ཕོག་ནས། ད་ལྟ་ལྷག་མར་གྱུར་བ་བརྒྱད་ཙམ་ཡོད་པ་དུང་དཀར་ཚིག་མཛོད་ལས་གསུངས་པ་དང་། དེ་ཡང་དམར་གདུང་བྱེད་སྟངས་ནི། སྐུ་གདུང་ནང་གི་མི་གཙང་བ་རྣམས་སྨན་སྦྱོར་ལ་བརྟེན་ནས་རྩ་ཆུ་བཤལ་ཏེ། སྐམ་ཐག་མ་ཆོད་ཀྱི་བར་དུ་ཚྭ་ཡི་ནང་དུ་བཞག དེ་ནས་སྨན་སྦྱོར་བསྲེས་པའི་འཇིམ་པས། ཞལ་རས་ལེགས་པར་གསོས་ཏེ་འདྲ་སྐུ་བཞེངས། ཤིང་ཙན་དན་སོགས་ཤིང་སྣ་རྩ་ཆེན་གྱིས་བཟོས་པའི་སྒྲོམ་རིམ་པ་གསུམ་ཡོད་པ། རིམ་པ་རེའི་སྟོང་ཆ་ཡོད་པའི་ནང་། མར་དམར་གདུང་འཇོག་ཅིང་། སྒྲོམ་བར་ཕྱི་གཉིས་ལ་དྲི་བཟང་གི་ཤིང་བསྲེགས་པའི་སོལ་ཕྱེ་དང་སོལ་བས་བཀང་། ཁ་ཁེབས་ལེགས་པར་བཀབ་སྟེ་སྤྲ་ཚིལ་གྱིས་དམ་པོར་བསྡམས་ནས། འབུ་སྐྱོན་དང་རུལ་བསུངས་མི་འབྱུང་བའི་སྔོན་འགོག་བྱ་ཐབས་མཐོང་བརྒྱུད་ཕྱག་ལེན་མང་བོ་ཡོད་དོ། །འོན་ཀྱང་བླ་མ་སྤྲུལ་སྐུར་ཁས་འཆེས་ཏེ། བསྟན་པ་ཕྱི་བཤིག་ནང་གཤིག་བྱེད་པའི་ཐ་ཤལ་བ་འགའ་རེ་ཡང་། དམར་གདུང་དུ་བཞག་སྟེ། ཀུན་གྱིས་མཆོད་པའི་ཞིང་དུ་འཛིན་པ་ནི་མ་རུངས་པ་ཆེན་པོ་སྟེ། རྗེ་འཇིགས་མེད་རིགས་པའི་བློ་གྲོས་ཀྱིས། སྔོན་གྱི་ཕྱག་ལེན་ལ་སྐུ་གདུང་མ་བཞུས་པར་རིལ་བོར་འཇོག་པའང་ཡོད་ཀྱང་། ད་ལྟའི་དུས་ན་དེ་ལྟའི་ལག་ལེན་ཐལ་ཆེ་ན་ལྷ་ཁང་རྣམས་དུར་ཁྲོད་དུ་མི་འགྱུར་བའི་ངེས་པའང་མེད། གསུངས་པ་ལྟར་རོ། །

༥ ཕུང་བོ་ཆུ་ལ་བསྐྱུར་བ། ཕུང་བོ་ཆུ་བསྐྱུར་ལ་ཆུ་དུར་ཞེས་ཀྱང་བརྗོད་ལ། འདི་ནི་སའི་ལྡེ་བརྒྱད་ནས་དར་བ་སྟེ། བོད་ཀྱི་ལོ་རྒྱུས་སྔ་མ་རྣམས་སུ། དེ་རྣམས་ཀྱི་བང་སོ་ཆུ་བོའི་གཞུང་ལ་བཏབ་པར་གསུངས་ལ། ད་ལྟ་ཡང་རྨ་ཆུ་སོགས་ཆུ་ཀླུང་ཆེན་པོར་ཕུང་བོ་འདོར་བ་སྟེ། དེ་ནི་ཉ་སྲམ་སོགས་ཆུར་གནས་སྲོག་ཆགས་ལ་བེམ་པོ་སྦྱིན་པར་གཏོང་བའོ། །འདི་ལའང་ཆུ་ཁའི་ས་སློང་དང་། ས་བབ་ལ་བརྟག་ཏེ་ཆུ་བསྐུར་བྱེད་དོ། །ཡང་། ཆུའི་ལྷ་མོ་ལ་བསྐྱུར་ན། ཆུའི་ལྷ་མོ་མ་མཱ་ཀི་ལ་ཕྱག་འཚལ་ཞིང་སྐྱབས་སུ་མཆིའོ། །ཆུའི་ལས་བཀྲ་ཤིས་པར་མཛད་དུ་གསོལ། ཨོཾ་ཧ་རི་ནི་ས་ཤན་ཏིམ་གུ་ཀུ་སྭཱ་ཧཱ། ཞེས་བརྗོད་དེ་ཆུ་ལ་བསྐྱུར་རོ། །

ཡང་ཁ་ཅིག སའི་ལྡེ་བརྒྱད་ཀྱི་བང་སོ་ཆུ་ཡི་གཞུང་ལ་བཏབ་པས། ཆུ་ལ་ཁ་བ་བབས་པ་ལྟ་བུ་བྱུང་ཟེར་བ། ལྡེ་བརྒྱད་ཀྱི་སྐུ་གདུང་ཞུགས་ལ་སྦྱངས་ཏེ། རུས་ཐལ་སྐྱ་ཆིལ་ལེ་ཆུ་ཁར་གཡེང་བས་སམ། སྐུ་གདུང་ཁ་བཏགས་སམ་བལ་གྱི་རྫོང་བ་དང་བཅས་ཆུར་ཕྱགས་པས། ཆུ་ལ་ཁ་བ་བབས་པ་ལྟར་ཞེས་འགྲེལ་བརྗོད་གནང་ཡང་བརྟག་དགོས་སོ། །

༤ གཤིན་ཆོས་སྒྲུབ་ལུགས། ༡ དགུང་ཞག་ཞེ་དགུ་འཛིན་པའི་ཁུངས། བོད་ཀྱི་ལུགས་སྲོལ་ལ་དགུང་ཞག་ནང་། དགེ་སློང་བཞི་འམ་བདུན་གང་རུང་ཞུས་ཏེ། ངན་སོང་སྦྱོང་རྒྱུད་ཀུན་རིག་གི་ཆོ་ག་གསུངས་ཏེ་དགུང་ཞག་ཞེ་དགུ་འདི་གཙིགས་སུ་འཛིན་པ་ཡིན། དེ་ནི་སྔོན་སྟོན་པའི་སྐུ་དུས་སུ་ལྷ་ཞིག་ཚེ་འཕོས་ནས། ཕག་ཏུ་སྐྱེས་པ་ལ། བརྒྱ་བྱིན་གྱིས་སྟོན་པར་ཞུས་ནས། ཆེད་དུ་ངན་སོང་སྦྱོང་རྒྱུད་ཀུན་རིག་འདི་གསུངས་པ་ཡིན་པས། ངན་སོང་ལས་ཐར་བ་ལ་བྱིན་རླབས་ཀྱི་ཚན་ཁ་གཞན་ལས་ཆེ་བ་ཡིན། དེར་མ་ཟད། ཀྱེ་རྡོར་གྱི་སྐབས་ཞག་བདུན་ཕྲག་གསུམ་མམ་བདུན་ཕྲག་བདུན་གྱི་བར་དུ་བྱ་བ་ལ་བདུན་ཚིགས་ཞེས་གསུངས་པ་དང་། དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་བརྗོད་པའི་མདོ་ལས་ཀྱང་སངས་རྒྱས་སྨན་བླར་སྐྱབས་སུ་མཆི་ཞིང་། གདུགས་བདུན་ནམ་ཉེར་གཅིག ཡང་ན་གདུགས་ཞེ་དགུ་ལ་མཆོད་པ་སོགས་བགྱིས་ན། རྣམ་ཤེས་སླར་ལྡོག་ཅིང་དྲན་པ་རྙེད་པར་བཤད་པ་དང་། ས་པཎ་གྱིས་དོ་ཀོར་བའི་དྲིས་ལན་དུའང་། ཞེ་དགུའི་བར་དུ་གཤིན་པོ་ལ། །བདུན་ཚིགས་ཆོ་ག་བཤད་པ་དེ། །རྣམ་ཤེས་བཀུགས་ནས་མཛད་པར་གདའ། །ཞེས་དང་། ཡང་། ཆོས་རྒྱལ་འཕགས་པས། ཡུན་ནི་ཕལ་ཆེར་ཞག་བདུན་སྟེ། །བདུན་ཕྲག་བདུན་དུའང་ཡོད་ཅེས་གྲགས། ལོ་དང་བསྐལ་བར་གནས་པའང་ཡོད། །དེས་ན་གཅིག་ཏུ་ངེས་པ་མེད། །ཞེས་བར་དོར་ལོ་དང་བསྐལ་བར་གནས་པའང་བཤད་ཀྱང་རྗེའི་རང་ལུགས་དང་མི་མཐུན་ནོ། །

བདུན་ཚིགས་སྒྲུབ་པ་འདི་ཡང་ཁྲི་སྲོང་ལྡེ་བཙན་གྱི་དུས་ནས་དར་བར་སེམས་ཏེ། གྱིམ་ཤིང་ཀོང་ཇོ་བོད་དུ་ཕེབས་དུས། རྒྱ་བཟའི་ཞལ་ལས། ཁྱེད་བོད་ཀྱི་བློན་པོ་ཤི་ཚད་ལ་ཟས་སྐལ་མེད་པས། ངེད་རྒྱ་ནག་ལ་ཆོས་དར་བས་མི་ཤི་ཚད་ལ་བདུན་ཚིགས་ཡོད། བོད་ལ་ཆོས་མ་དར་བས་བློན་པོ་སྙིང་རེ་རྗེ། ཞེས་སྦ་བཞེད་ལས་གསུངས་ལ། ཡང་དེ་ཉིད་ལས། སྦ་གསལ་སྣང་གི་བུ་མིང་སྲིང་གཉིས་གུམ་པའི་ཚེ། ཧྭ་ཤང་རྒད་པོ་ཞིག་བཀུགས་ནས། ར་མོ་ཆེ་ནས་མིང་སྲིང་གཉིས་ཀྱི་བདུན་ཚིགས་བསྒྲུབས་པར་གསུངས་ཡོད་པས་སོ། །ཞེས་པ་ལྟར། ཞེ་དགུའི་ནང་བདུན་ཚིགས་རེ་གཤིན་ཆོས་སྒྲུབ་པ་དང་། ཁྱད་པར་དུ་སྐྱེ་བོ་ཕལ་མོ་ཆེ་བར་དོ་བདུན་ཕྲག་བཞི་ལས་མི་སྡོད་པར་སྐྱེ་བ་ལེན་པ་ཤས་ཆེ་བས། བདུན་ཚིགས་བཞི་བ་འདི་གལ་ཆེན་དུ་འཛིན་པ་དང་། བདུན་བདུན་ཞེ་དགུ་སྟེ་ཐ་མའི་བདུན་ཚིགས་ལ་བདུན་ཚོགས་སྔོན་མ་ལས་ཀྱང་གཤིན་ཆོས་རྒྱ་ཆེར་སྒྲུབ་བོ། །

ཚེ་འདས་ལ་ཕན་པ་ཆེ་ཆུང་ཡང་། བདུན་ཚིགས་བྱེད་པོ་ཡང་རག་ལས་པ་སྟེ། རབ་ཀྱིས་ལམ་བསྟན་ནས་གྲོལ་ནུས་པ་དང་། འབྲིང་གིས་ངན་སོང་གི་སྐྱེ་སྒོ་གཅོད། ཐ་མས་ཀྱང་ཆོ་ག་ཚུལ་བཞིན་བྱས་པས་གང་འཚམ་ཕན་པར་འགྱུར་བ་ཡིན། དེ་ལྟར་མ་ཡིན་པར་རྙེད་དང་བཀུར་བསྟི་རེ་ནས་རོ་རྫས་ལ་ཟ་རྔམ་ཆེ་ན། ཚེ་འདས་ཀྱི་དོན་དུ་དགུང་ཞག་ཞེ་དགུ་བཟུང་ཚུལ་ལུང་དང་སྦྱར་བ་ཕན་བདེའི་རྔ་ཆེན་ལས། དད་རྫས་དང་གཤིན་རྫས་ལ་སོགས་པ་ལའང་བག་མེད་དུ་ལོངས་སྤྱོད་པར་མི་བྱ་སྟེ། རང་སེམས་དགེ་སྦྱོར་ལས་གཡེང་བར་འགྱུར་བའི་ཕྱིར་དང་། ཚེ་འདས་ཀྱི་བདུན་ཚིགས་བྱེད་པ་ནི་རང་གི་ཚེ་ལ་གནོད་པར་བཤད་པ་དང་། རྒྱུན་དུ་གཤིན་ཆོག་ལ་རྒྱུག་པའི་གང་ཟག་དེ་རབ་གནས་སོགས་བཀྲ་ཤིས་པའི་ལས་ལ་སྤྱན་འདྲེན་མི་རུང་བར་བཤད་པ་དང་། གཤིན་རྫས་ཀྱིས་སྤངས་རྟོགས་ཀྱི་ཡོན་ཏན་སྔར་ཡོད་འགྲིབ་པ་དང་སྔར་མེད་གསར་དུ་མི་སྐྱེ་བར་བཤད་པ་དང་། རོའི་གྲིབ་ལ་སོགས་པས་ཐར་བ་དང་ཐམས་ཅད་མཁྱེན་པའི་ལམ་ལ་ཤིན་ཏུ་བསྒྲིབ་པར་བཤད་པའི་ཕྱིར་རོ། །ཞེས་དང་། ཡང་དེ་ཉིད་ལས། དེ་ལྟ་མིན་པར་ཤུལ་ན་གནས་རྣམས་ལ། །གཞན་གྱིས་འཕྱ་བར་དོགས་ནས་དེ་སྤང་ཕྱིར། །གཉེན་ཚན་ཡིན་པའི་སེར་གཟུགས་འདྲེན་སྟོན་དུ། །བཞག་ནས་ཞེ་དགུའི་བར་དུ་ཤ་དང་ཆང་། །ཟ་འཐུང་སྡིག་གྲོགས་བྱེད་ཅིང་ཡོན་རྫོང་སོགས། །ཉེ་བ་རྣམས་དང་མཉམ་ཟ་མཉམ་འཐུང་བྱེད། །དེ་འདྲའི་དགེ་རྩ་རང་གཞན་ཕུང་བའི་རྒྱུ། །ཐར་འདོད་ཡོན་མཆོད་རྣམས་ཀྱིས་སྤང་བར་བྱ། །ཞེས་སོ། །

༢ གཤིན་ཆོས་སྒྲུབ་ཚུལ་དངོས། འདས་མཆོད་སྒྲུབ་ཚུལ་འདི་ལ། ཡིག་རྙིང་རྣམས་སུ་བོད་རྒྱལ་བརྒྱད་པ་གྲི་གུམ་བཙན་པོའི་དུས་སུ། གྲི་གུམ་བཙན་པོའི་དུར་མཆོད་བོད་ཀྱི་བོན་རྣམས་ཀྱིས་བྱེད་མ་ཤེས་སྟབས། ཁ་ཆེ་དང་། བྲུ་ཤ ཞང་ཞུང་བཅས་ནས་བོན་པོ་མི་གསུམ་གདན་དྲངས་པས། གཅིག་གིས་གེ་གོད་ཁྱུང་དང་མེ་ལྷ་བསྒྲུབས་པ་ལ་བརྟེན་ནས་རྔ་ཞོན་ནས་ནམ་མཁའ་ལ་འགྲོ་བ་དང་། གཏར་བ་ལེན་པ། བྱ་སྒྲོས་ལྕགས་གཅོད་པ་སོགས་ཀྱི་ནུས་པ་བཏོན། གཅིག་གིས་ཇུ་ཏིག་དང་། ལྷ་བཀའ་དང་། སོག་དམར་ལ་སོགས་པ་མོ་བཏབ་ནས་ལེགས་ཉེས་གཏན་ལ་ཕབ། གཅིག་གིས་གཤིན་པོ་འདུར་བ་དང་། གྲི་འདུལ་བ་ལ་སོགས་ཤེད་ཀྱི་བྱེ་བྲག་རྣམས་ཤེས་པས། དེ་རྣམས་ཀྱིས་བསྒྲུབས་པར་བཤད་པ་དང་། འདུར་བཏང་བའི་ཕན་ཡོན་ཡང་། ལེགས་བཤད་རིན་པོ་ཆེའི་མཛོད་ལས། ཀོང་བོ་བྲེ་སྣར་རྒྱལ་གྱི་གྲི་འདུར་མཛད་པས། གསོན་པོ་བཀྲ་ཤིས་ཏེ་སྤུ་ལྡེས་རྒྱལ་ས་ཟིན། གཤིན་པོ་གནས་སླ་སྟེ་གྲི་རུམ་ཐར་བ་ཐོབ་བོ། །ད་ལྟ་ཡང་རྒྱལ་གྲི་རུམ་གྱི་གྲི་འདུར་ཡོག་བར་བ་སུམ་བརྒྱ་དྲུག་ཅུ་བྱ་བ་བཞུགས་སོ། །

འདུར་གཏོང་ཚུལ་ཡང་། འདུར་རྒྱུད་ལས། འདུར་བ་བླ་ཡི་འཇིགས་སྐྲག་འདུར། །སྦྱོང་བ་ཡིད་ཀྱི་བག་ཆགས་སྦྱོང་། །སྤར་བ་སེམས་ཉིད་དབྱིངས་སུ་སྤར། །བླ་ནི་ཡིད་ཐིམ་སེམས་ལ་ཐིམ། །སེམས་ནི་ནམ་མཁའ་འདྲ་སྟེ་སྟོང་། །ཞེས་དང་། ཡང་། བོན་ཤེས་པ་ཅན་བཅུ་གཉིས་ཀྱི་ནང་ཚན་འདུར་ཤེས་སྲིད་གཤེན་གྱིས་འདུར་བཏང་ཚུལ་ཡང་། གསང་བ་བསེན་ཐུབ་རྒྱུད་ལས། གང་ཞིག་གཤེན་རབ་རྩལ་སྟོབས་མི་ལྡན་པས། །ཚེ་འདས་ཐར་བའི་གནས་སུ་སྒྲོལ་འདོད་པ། །རྨོངས་པས་རྨོངས་ཁྲིད་ལག་སྦྲེལ་གཡང་སར་ལྷུང་། །ལས་ཀྱི་དབང་གིས་ལུས་དང་སེམས་བྲལ་ནས། །བླ་ཡིད་སེམས་གསུམ་འཁོར་བཞིར་བར་དོར་འཁྱམས། །རྩལ་གསུམ་ལུས་ལ་རྫོགས་པའི་སྐྱེས་བུ་ཡིས། །དམུ་རྒོད་བཏུལ་ནས་གཡུང་དུ་ཕེབས་པ་བཞིན། །ཤེས་རབ་སྟོབས་ལྡན་སྐྱེས་བུ་གང་ཞིག་གིས། །བླ་དང་སེམས་ཡིད་ཐིག་ལེར་འདྲིལ་ནས་ཀྱང་། །ཐོག་ཆགས་མེད་པའི་མཁའ་ཀློང་དབྱིངས་སུ་བསྒྲལ། །ཞེས་པར་དཔྱད་ན་རགས་ཙམ་རྟོགས་ནུས་སོ། །དེའི་ཕྱིས་ཀྱི་ཡིག་རྙིང་རྣམས་སུ་མདང་བྱ་བའམ་མདད་བཏང་བ་ཞེས་འབྱུང་ལ། དེབ་དཀར་ལས། རྙིང་མའི་ཆོ་ག་འགའ་རེ་ན། མདང་བསྐང་བྱ་བ་ཞིག་འདུག་པ་དེ་ལ། མར་མེ་དང་ཁྲག་དང་གཏོར་མ་རྣམས་རིམ་གྱིས་འབུལ་བར་འདུག་པས། ཕལ་ཆེར་དེ་འདྲ་ཞིག་མིན་ནམ་སྙམ། གསུངས་པ་དང་། ཆོས་ལུགས་ཀྱི་དབང་དུ་བཏང་ནའང་། བན་བོན་གཉིས་ཀྱི་བར་ཆོ་ག་གཏོང་ཚུལ་མི་འདྲ་བའི་དབང་གིས་ལན་རེར་འགལ་བ་ཤོར་བའང་ཡོད་དེ། དཔེར་ན། ཁྲི་སྲོང་ལྡེ་བཙན་གྱི་མདད་གཏོང་བར་བན་བོན་གཉིས་བར་འགལ་བ་ཆེན་པོ་བྱུང་བ་སྟེ། མཆིམས་བཙན་བཞེར་ལེགས་གཟིགས་དང་། སྣ་ནམ་རྒྱལ་ཚ་ལྷ་སྣང་། ངན་ལམ་སྟག་ར་ཀླུ་གོང་ལ་སོགས་ཀྱིས་འཕན་ཡུལ་གྱི་བོན་པོ་ཨ་ཤེན་དང་། བྱི་སྤུ། མཚེ་པོག ཡ་ངལ་ལ་སོགས་པ་མང་བོ་བསྡུས་ཏེ། རྒྱལ་བོའི་མདད་སྒྲུབ་པར་རྩོམ་པ་ན། ཆོས་ལ་སྤྱོད་པར་དགའ་བའི་འཁོན་ཀླུའི་དབང་བོ་དང་། མཁས་པ་རྣ་ཆ་ཅན་གཉིས་ཉིན་ལ་མཚན་དུ་རྒྱུགས་ཏེ། ཚ་བ་ཚ་ཤོད་ཀྱི་རྒྱལ་ཁམས་ནས་པ་གོར་བཻ་རོ་ཙ་ན་དང་རྒྱལ་མོ་གཡུ་སྒྲ་སྙིང་བོ་གཉིས་ཀྱི་སྤྱན་སྔ་ནས་བན་བོན་གཉིས་ཀྱིས་བརྩད་པས་བནྟེ་རྣམས་རྒྱལ་ཏེ་མདད་བཏང་བ། ལོ་རྒྱུས་ཡིག་ཚང་དུ་བཀོད་པ་ལྟར་རོ། །

དེང་སང་ཡོངས་གྲགས་ཀྱི་འདད་གཏོང་ལུགས་ནི། རྗེ་འཇིགས་མེད་རིགས་པའི་བློ་གྲོས་ཀྱིས། བསྟན་པའི་ཁུར་འཛིན་པའི་གང་དད་པའི་ཡུལ་དུ་གྱུར་བ་རྣམས་མྱ་ངན་ལས་འདའ་ཁར་སྐྱེ་བོ་ཐ་མལ་བ་བཞིན་དུ་གཉེན་ཉེ་དུ་སོགས་ངུ་སྐད་འཆོར་བ་ཅན་རྣམས་དྲུང་ནས་འདུག་མི་རུང་། ཆོས་ཀྱི་གནད་ཤེས་པའི་ཆོས་གྲོགས་སམ་སློབ་མ་ནང་གཙང་རེ་གཉིས་ཀྱིས་སངས་རྒྱས་ཆོས་ཚོགས་མ། དམིགས་བརྩེ་མ། ཁོང་བའི་རྩ་བའི་བླ་མའི་གསོལ་འདེབས། འདའ་ཁ་ཡེ་ཤེས། འདུ་ཤེས་བཅུ་གཅིག་བསྟན་པའི་མདོ། བར་དོའི་འཕྲང་སྒྲོལ་གྱི་གསོལ་འདེབས་རྣམས་སྐད་མཐོ་དམའ་རན་ཞིང་སྒྲ་དག་གསལ་གསུམ་གྱིས་དལ་བུའི་སྒོ་ནས་ཚིག་དོན་ལ་བསམ་བློ་གཏོང་ཁོམ་ཡོད་པ་དང་། ཚབ་ཚུབ་དང་ངུ་སྐད་མི་འབྱིན་པ་ཤིན་ཏུ་གལ་ཆེ། ཚར་གཅིག་གམ་ཚར་འགའ་འདོན་པ་སྐབས་དང་བསྟུན། བསྟན་འགྲོར་ཕན་འདོགས་པའི་སྤྲུལ་སྐུ་འཁྲུལ་མེད་རེ་འབྱོན་པའི་དགོས་པ་གལ་ཆེན་ཡོད་ན། དེ་ལུགས་ཀྱི་སྙན་སྐུལ་གནད་འདྲིལ་བ་རེ་ཚིག་སྒྲིག་གམ་ཕལ་སྐད་ཀྱིས་ཞུ། དེ་འདྲའི་དགོས་པ་མེད་ན། དཀོར་གཟན་ཇེ་མང་དུ་བཏང་བ་ལ་དགོས་པ་སྤུ་ཙམ་ཡང་མེད། ཅེས་དང་། ཐུགས་རིག་མི་གསལ་བའི་མགོ་རྩོམ་དུས་སངས་རྒྱས་ཀྱི་འཕེལ་གདུང་ངམ། རྟེན་འདུས་རིལ་བུ། སྐྱེས་བདུན་རིལ་བུ་（སྐྱེས་བདུན་རིལ་བུའི་ནང་ན་བྲམ་ཟེ་སྐྱེ་བ་བདུན་པའི་སྐུ་ཤ་ཡོད་ཅིང་། དེ་ཁར་རེག་ན་སྐྱེ་བ་བདུན་ལ་ངན་སོང་དུ་མི་འགྲོ་བར་གསུངས་ལ། ནམ་མཁའ་ནོར་བུས་བོད་དུ་གྲུབ་ཐོབ་ཨོ་རྒྱན་གླིང་བའི་སྐུ་ཤ་དེ་སྐྱེ་བདུན་གྱི་ཤ་རུ་ངོས་འཛིན་སྲོལ་ཡོད་ཅེས་ཀྱང་བཤད་དོ། །）སོགས་བྱིན་རྟེན་རྩ་ཆེ་འོ་མར་སྦངས་པ་ཞལ་དུ་ངེས་པར་འདྲེན། གསུངས་སོ། །

རང་རེའི་ལས་དང་བོར་བར་དོ་ངོ་སྤྲོད་སོགས་བྱས་ཏེ་སྐྲག་སྣང་འཆར་བ་ཞིག་ཡིན་ན། མ་བྱས་ན་བཟང་། རྣམ་ཤེས་ལུས་ཕུང་ལས་འཕོས་རྗེས། སྐར་མཁན་གྱི་དྲུང་དུ་གཤིན་རྩིས་ལ་བལྟས་ཏེ། སྐར་ཆོས་དང་ཕུད་སྐར། འགྲུབ་སྐར་སོགས་གཏན་འཁེལ་བྱས་ནས། ཤི་སྐར་ཆོད་ལ་ཁེལ་ཚེ་གཡང་འབོད་ཅི་མང་བྱ། འབྲིང་ལ་བཀྲ་བརྩེགས་དང་སྣང་རྒྱལ་སོགས་འདོན། ཤི་མི་རུང་བའི་སྐར་མར་ཁེལ་ཚེ། སྐར་ཆོས་བྱ་ཚུལ་གཤིན་རྩིས་ལས་འབྱུང་བ་ལྟར་དང་། ཡང་ན། སྐྱེས་བུ་དམ་པའི་གདམས་ངག་ལས་འབྱུང་བ་ལྟར་བྱ་དགོས་ཏེ། དཔེར་ན། ལས་སྣ་ཚོགས་ཀྱི་བེའུ་བམ་ལས། གཟའ་སྐར་ངན་པར་མི་ཤི་དང་རོ་འདོན་སོགས་ལ་ངན་པ་ཀུན་ཐུབ་ཀྱི་གདམས་པ་ནི། ཕུག་རོན་གྱི་སྒོ་ང་ལ་བུག་པ་བརྟོལ་བའི་ནང་དུ། ཤོག་བུ་ལ་བོང་བུའི་ཁྲག་གིས་སྔགས་འདི་བྲིས། པྲ་སོད་ཆུ་སོད་མེ་སོད་དུ་ཏྲི་ཆོད་ཁ་ལ་ཛ་ཛ་ཤག་ཤག་རྦད་རྦད་ཆོད་ཆོད། གཟའ་སྐར་སོགས་ངན་པའི་སྐྱོན་ཐམས་ཅད་ཕུང་སྲི་རྔ་མོང་ལ་བཏང་ངོ་། །དགྲ་དང་བགེགས་ལ་སྒྱུརད་ཅིག ཅེས་བྲིས་ལ་གཞུག དེ་བཞིན་ལྟས་ངན་སོགས་ལ་ཁ་བསྒྱུར་བྱས་ཆོག སྒོ་ངའི་ཕྱི་ལ་རྔ་མོང་སྐེ་གཅིག་ལ་མགོ་གསུམ་ཡོད་པ་བྲིས་ནས། ཉེར་དགུ་འམ་གནམ་སྟོང་ལ་དེའི་ཁ་དགྲ་ཕྱོགས་སུ་བསྟན་ཏེ་བསྐྱལ་བས། གཟའ་སྐར་དུས་ཚེས་ངན་པ་དང་། ལྟས་ངན་གྱི་རིགས་ཐམས་ཅད་བཟློག་པའི་ཐབས་མཆོག་ཏུ་གྱུར་བ་ཡིན་ནོ། །ཞེས་པ་ལྟར་བྱ་དགོས།

གཞན་ཡང་། རྗེས་ཤུལ་གྱི་སྐྱེ་འཚུབ་ངོ་བཟློག་ལུགས་ཀྱི་གཏོ་བཅོས་ནི། དཔེར་ན་གཟའ་ཆེན་ཉི་མར་འདས་པ་ཡིན་ན། ཉི་མ་དགུ་ཁྲིད། ཅེས་འཚུབ་ངོ་བཤད་པས། ཆག་སྒོ་བཟློག་ཆེད་སོག་མའི་ཚིགས་དགུ་དང་། ཆུ་བོ་དགུ་ཡི་ཆུ་སྣ་བཅས་ས་འོག་ཏུ་སྦོ་ཞིང་། ཕུད་སྐར་གྱི་ཉིན་བེམ་པོ་དང་མཉམ་དུ་ཟན་གྱི་ངར་མི་དགུ་ཡང་བསྐྱལ་དགོས། དེ་བཞིན་གཟའ་ཆེན་ཉི་མར་སྒྲུབ་པའི་ཚུལ་དུ་ཆུ་གྲང་ཕོར་གང་གི་སྟེང་དུ་གཟའ་ཉི་མའི་རི་མོ་བྲིས་ཏེ་ཁང་ཐོག་ཏུ་འཇོག་པ་དང་། གཞན་གཟའ་ཆེན་ཟླ་བར་འདས་པ་ཡིན་ན་དུར་ཁ་གཅོད་པའི་ཚུལ་དུ་ནས་དང་སྲན་མའི་ཚིགས་མ་དང་། ཉ་གཟུགས་ས་ཙྪ་བེམ་སྟེང་དུ་འཇོག་ཅིང་། ཤི་སྐར་གཟའ་ཆེན་སྤེན་པར་ཁེལ་ཚེ། གཡང་ཁ་མི་ཉམས་པའི་ཚུལ་དུ་བྲ་བོའི་ཟན་གྱི་ངར་མི་ལྔ་ས་འོག་ཏུ་སྦ་བའམ། འདས་པོའི་ཕུང་བོ་དང་མཉམ་དུ་དུར་ཆས་སྐྱེལ་བ་ཡིན་ནོ། །སྐར་ཆོས་དང་གཏོ་བཅོས་སྣ་ཚོགས་ཀྱི་བཅས་སྟངས་རྒྱས་པར་གཤིན་རྩིས་ལས་ཤེས་པར་བྱའོ། །ས་ཆ་ལ་ལར་བེམ་པོ་འཁྱེར་ཤུལ་དུ་གྲོང་བ་ཡིན་ན་ཐོང་ལྕགས་ཀྱི་ཡུ་བའི་ནང་ཤུག་པ་བལ་གྱིས་ལྕིབས་ནས་ཚིལ་རྡོག་དཀར་བོ་གསུམ་གྱི་བར་བསླངས་པ་དང་། ཐོང་ལྕགས་ནི་ས་མནོན་གྱི་རྟེན་འབྲེལ་དུ་བཤད། གྲྭ་བ་ཡིན་ན་གསེར་ཕོར་ནང་ཕྱེ་མར་འཇོག་ལ། ཕྱེ་མར་ཡང་ཚིལ་རྡོག་དཀར་བོ་གསུམ་གྱི་བར་དུ་འཇོག་སྲོལ་ཡོད་དོ། །

དེ་ལས་གཞན། སྤྱི་ཁྱབ་ཀྱིས་བེམ་པོའི་སྔས་མགོ་ལ་ལམ་སྔགས་གཉིས་དང་། མར་མེ་འཇོག་པ་ཡིན། དེ་ནས་རང་རང་གང་ལ་དད་འདུན་ཆེ་བའི་རྟོགས་ལྡན་པ་དང་ཨ་མཆོད་ཞུས་ཏེ། རྟོགས་ལྡན་པས་འཕོ་བ་དང་། ཨ་མཆོད་ཀྱིས་ཐར་མདོ་དང་སྨོན་ལམ་གསུངས་པ་ཡིན། དེ་ཡང་འཕོ་བ་གསུངས་པ་ནི། ཚེ་འདས་ཀྱི་རྣམ་ཤེས་ལ་གསལ་བཏབ་ནས། འཕོ་བའི་དམིགས་རིམ་སྒོམ་དུ་བཅུག་ནས། མན་ངག་ཁྱད་པར་ཅན་འདི་ལ་བརྟེན་ཏེ། འོད་དཔག་མེད་ཀྱི་ཞིང་ཁམས་ལ་འཕོ་བར་བྱེད་པ་དང་། ཐར་མདོ་གསུངས་པ་ནི། ཀུན་སློང་རྣམ་དག་གིས་ཐར་མདོ་འདི་བཏོན་ན། སྡིག་པ་སྟོབས་པོ་ཆེ་ཡང་ལྷག་མེད་དུ་འདག་སྟེ། མདོ་དེ་ལས། དེ་བཞིན་མཐོལ་མཚང་བྱེད་ནུས་ན། །རྩ་བ་བཞི་དང་མཚམས་མེད་ལྔ། །ལོག་སྤྱོད་བར་དུ་སྡིག་བྱང་སྟེ། །སངས་རྒྱས་འགྲུབ་པར་གདོན་མི་ཟ། །གསུངས་སོ། །ཡང་། བདག་འཇུག་བླངས་ཏེ་གཤིན་པོ་ལ་དབང་བསྐུར་ནའང་ཕན་ཏེ། རྡོ་རྗེ་གུར་གྱི་རྒྱུད་ལས། རྡུལ་ཚོན་དཀྱིལ་འཁོར་བྲིས་ནས་ནི། །གཤིན་ལ་གསོན་བཞིན་དབང་བསྐུར་ན། །ངན་སོང་གསུམ་དུ་སྐྱེས་ན་ཡང་། །དེ་ཉིད་ཀྱིས་ནི་ཐར་བར་འགྱུར། །ཞེས་དང་། ཡང་། སྨན་བླའི་མདོ་ལས། སྲོག་འགག་པའི་བེམ་པོའི་སྔས་སུ་ཞག་ཞེ་དགུའི་བར་དུ། བཅོམ་ལྡན་འདས་སྨན་བླ་མཆོད་ཅིང་གསོལ་བ་བཏབ་ན་དེའི་རྣམ་པར་ཤེས་པ་སླར་ལྡོག་པར་གསུངས་པ་དང་།

གཞན་ཡང་། ཁྲུས་ཆོག་བསྐུར་བ་སྟེ། དེ་ལ་དགོས་པ་གཉིས་ཡོད། གསོན་དུས་མིའི་ལུས་དང་སྲོག་ལ་གནོད་པར་བྱེད། ཤི་དུས་ཚེ་ལས་འདས་པའི་མཐོ་རིས་དང་ཐར་བ་ལ་བར་དུ་གཅོད་ཅིང་། ཚེ་ལས་འདས་པ་དེ་ཉིད་ཀྱི་ཆ་བྱད་བཟུང་ནས། འཇིག་རྟེན་པ་རྣམས་བསླུ་བའི་འབྱུང་བོ་མི་མ་ཡིན་པ་དག་དགར་བའི་ཆེད་དུ། ཚེ་ལས་འདས་པ་དེ་ཉིད་ཀྱི་སྡིག་སྒྲིབ་ཐམས་ཅད་སྦྱངས་པ་དྲུག་གི་སྒོ་ནས་སྦྱངས་ཏེ། བདེ་འགྲོའི་ལམ་བཟང་སྙེག་པའི་ཆེད་དུ་ཡིན།

ཕུང་བོ་སྦྱིན་སྲེག་བཏང་རྗེས། མི་འཁྲུགས་པའི་སྒོ་ནས་རུས་ཆོག་བཏང་ན། གཤིན་པོ་དེའི་སྡིག་སྒྲིབ་དག་སྟེ་མཐོ་རིས་དང་ཐར་བ་འཐོབ་ལ། དེ་ལྟར་མ་ལྕོགས་ན་ངན་སོང་སྦྱོང་བའི་གཟུངས་སྡེ་ལྔ་གསུངས་ཏེ། འབྲུ་དང་ཆུ། ཡང་ན། བྱེ་མ་སོགས་ལ་སྔགས་ནས་ཕུ་བཏབ་སྟེ། རུས་པའམ་དུར་སར་གཏོར་ན་ངན་སོང་ལས་ཐར་བར་གསུངས་ཏེ། གཙུག་ཏོར་རྣམ་རྒྱལ་མའི་གཟུངས་ལས། སེམས་ཅན་སྡིག་པ་བྱེད་པ་དེ་དག་ནི་ཤི་བའི་དུས་བྱས་པ་དེ་དག་གི་དོན་དུ་གཟུངས་འདི་ཡུངས་དཀར་ལ་ལན་ཉི་ཤུ་རྩ་གཅིག་བཟླས་ཏེ། དེ་དག་གི་རུས་གོང་རྣམས་ཀྱི་སྟེང་དུ་གཏོར་ན། དེ་དག་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེ་འཇིག་རྟེན་ནམ། ཡི་དྭགས་ཀྱི་ཡུལ་ལས་གཞན་པའི་ངན་འགྲོ་རྣམས་སུ་སྐྱེ་བར་མི་འགྱུར་ཏེ། དེ་དག་གཟུངས་འདིའི་མཐུས་ངན་འགྲོ་དེ་དག་ལས་ཐར་བར་འགྱུར་རོ། །ཞེས་སོ། །

ཡང་། སྔོན་གྱི་ཚེ་མི་ཤི་ཚེ་མྱ་ངན་ནམ་འདུན་བྱེད་སྟངས་ནི། ཐང་ཧྲུའུ་ལས། ཕ་མ་ཤི་ཚེ། སྐྲ་འབྲེག གདོང་ལ་ཚོས་ནག་པོ་འབྱུག གྱོན་པའང་ནག་པོ་བྱེད། དུར་དུ་སྦས་ཟིན་ན་འདུན་ཀྱང་གྲོལ་ཞེས་ཟུར་ཙམ་གསལ་ལོ། །དེང་སང་ཡུལ་ལུང་སོ་སོ་ན་འཇིག་རྟེན་མི་ཆོས་དང་བསྟུན་ཏེ་སྣ་ཚོགས་ཡོད་ཀྱང་། འདིར་ཉུང་ཙམ་སྨྲོས་ན། རང་གི་ཕ་མའམ་གཉེན་ཉེ་གང་རུང་ཞིག་ཚེ་ལས་འདས་ན། ལུས་ངག་གི་སྤྱོད་ལམ་ཐོག་མྱ་ངན་བྱེད་སྟངས་སྣ་ཚོགས་ཡོད། མྱ་ངན་བྱེད་པ་དེ་ལ་འདུན་ཟེར་ལ། ཞེ་དགུའི་ནང་སྐྲ་དང་སྨྲ་ར་ཁ་སྤུ་སོགས་མི་བཞར་བ་དང་། རྒྱན་ཆ་སོགས་མི་འདོགས། བུད་མེད་ཀྱིས་སྐྲ་མི་གཤད་ཅིང་། རྒྱན་ཆ་དཀྲོལ་ལ། ཡུལ་ལ་ལར། སྐྲའི་སྣེ་མོར་བལ་དཀར་འདོགས་པ་དང་། སྐྲ་ལུང་ཕྱིར་སློག་པ་སོགས་ཀྱང་ཡོད། ཕོ་མོ་གཉིས་ཀས་གྱོན་གོས་རྙིང་ཧྲུལ་གྱོན་ལ། སྐ་རགས་མདུན་དུ་བཅིངས་པ་ཡིན། ལོ་གཅིག་གི་ནང་གླུ་གར་སོགས་མི་རྩེ་བར་མ་ཟད། དུས་སྟོན་འདྲ་མིན་དུ་མི་ཞུགས་ལ། ཁང་བའི་དུད་པའང་མི་ལེན་པ་སོགས་ཡུལ་ཁམས་སོ་སོར་འདུན་བྱེད་ཚུལ་མི་འདྲ་བ་སྣ་ཚོགས་ཡོད།

ཡང་། བླ་མ་དགེ་བའི་བཤེས་གཉེན་སོགས་ཡིན་ན། གཙུག་ལག་ཁང་ལ་དཀར་རྩི་མི་བྱུགས་པ་དང་། དར་ལྕོག་ཕབ་པ། གསེར་ཏོག་དང་རྒྱལ་མཚན་རས་ཀྱིས་བཏུམས་པ་སོགས་བྱེད་ཀྱིན་ཡོད། འོན་ཀྱང་། རབ་བྱུང་བས་མྱ་ངན་གྱི་ཚེ་སྐྲ་འཇོག་པ་སོགས་མི་རུང་སྟེ། མཁས་གྲུབ་དགེ་ལེགས་དཔལ་བཟང་གིས་རྗེ་ཐམས་ཅད་མཁྱེན་པའི་དགོངས་རྫོགས་ལ། དབུས་གཙང་གི་དགེ་འདུན་གྱི་སྡེ་ཆེན་པོ་དུ་མར་ཡང་། མང་ཇ་དང་འབུལ་ནོད་ཕུན་སུམ་ཚོགས་པ་རྒྱ་ཆེར་འགྲུས་ཤིང་དེ་ཡང་ཕྱིས་ཀྱི་རབ་ཏུ་བྱུང་བ་དག་ལ། མཁན་པོ་དང་སློབ་དཔོན་དང་། བླ་མ་དག་འདས་པ་ན། ཐོས་བསམ་སྒོམ་པ་དང་། ཆོས་འཆད་ཉན་ལ་སོགས་པ་དགེ་བའི་སྦྱོར་བ་དག་རྒྱུན་བཅད་དེ། སྐྲ་ཚད་ལས་ལྷག་པར་འཇོག་པ་དང་། གོས་བསྒྱུར་བ་དང་། གཙུག་ལག་ཁང་གི་བ་དན་སྡུད་པ་ལ་སོགས་པ། གྲོང་བའི་ཆོས་ལུགས་དག་ཡོངས་སུ་གྲགས་མོད་ཀྱི། བདག་ཅག་རྣམས་ཀྱིས་ནི་རྗེ་ཉིད་ཀྱི་ཐུགས་ཀྱི་དགོངས་པ་དང་མཐུན་པར་གྲོང་བའི་ཆོས་ལུགས་དེ་དག་རིང་དུ་སྤངས་ཏེ། འདུ་བྱེད་ཐམས་ཅད་ཀྱི་མཚན་ཉིད་ནི་འདི་འདྲའོ་སྙམ་དུ་སྐྱོ་བར་འགྱུར་བའི་མཚན་མ་ཡིད་ལ་བྱེད་པས། སླར་ཡང་འོད་ཀྱི་མཚན་མར་ལོ་གཉིས་ཀྱི་བྱ་བ་ལ་ཞུགས་པར་གྱུར་ཏོ། །ཞེས་གསུངས་པ་ལ་དམ་པ་ལྷ་ཆོས་དང་བསྟུན་ན་གོ་རྒྱུ་ཆེན་པོ་ཡོད་དོ། །

༥ བེམ་པོ་སྐྱེལ་སྟངས། མི་གྲོངས་རྗེས་སྐར་མཁན་གྱི་སར་གཏུགས་ཏེ། སྐར་ཆོས་དང་། ཕུད་སྐར། འགྲུབ་སྐར་རྣམས་གཏན་ཁེལ་བྱས་རྗེས། གཟའ་སྐར་ངན་ན་སྐར་བཅོས་བྱ་ལ། དཔེར་ན། ཕུང་བོ་སྐྱེལ་སྐབས་ཁ་བ་བབས་ན། དུར་ལམ་ཁ་བས་བཅད་ཅེས་ཁྱིམ་ཚང་ལ་གོད་ཆག་འབྱུང་ཉེན་ཡོད་པས། གླུད་རྫོང་དང་བགེགས་བསྐྲད། བཟློག་བསྒྱུར་སོགས་ཀྱི་རིམ་འགྲོས་འཐུས་པར་བྱས་ནས། རུ་སྡེ་ཚང་མ་འཛོམས་ནས་མ་ཎི་དབྱངས་རྟ་དང་བཅས་ཏེ། དུར་དུ་སྐྱེལ་བ་ཡིན་ལ། བེམ་པོ་སྐྱེལ་དུས་སྨེ་སྔགས་བཏོན་ན་གཤིན་པོ་ལ་གནོད་པ་ཡིན་ཏེ། གླིང་བཟའ་ཆོས་སྒྲོན་གྱི་རྣམ་ཐར་ལས། ངུས་པའི་མཆི་མ་རྣམས་རྣག་ཁྲག་གི་ཆར་དུ་འབེབས་པ། གསུངས་པ་ལྟར་བར་དོ་བ་རླུང་ལ་བརྟེན་ནས་རྒྱུ་བ་ཡིན་པས། ངུ་ངག་འདོན་པ་སོགས་གནོད་བྱེད་དུ་འགྲོའོ། །

སྐྱེལ་སྟངས་ལ་འཚོ་གནས་ཀྱི་སྟབས་བདེ་ཁྱད་ཀྱི་ཅུང་ཟད་མི་འདྲ་བར་སྣང་སྟེ། སྐྱེས་བུ་དམ་པ་རྣམས་ཁྱོགས་ཀྱི་ནང་ཆོས་གོས་རྣམ་གསུམ་གྱིས་གཡོགས་ཏེ་ཁ་དར་སྒྲོན་ནས་སྐྱེལ་བ་དང་། གྲོང་མི་ཕལ་བ་རྣམས། བེམ་པོ་གཡག་ཏུ་འགེལ་བ་དང་། ཁྱོགས་ཀྱི་སྟེང་ལ་གདན་དཀར་བཏིང་སྟེ། མི་བཞིས་ཕྲག་པར་འཁུར་ནས། གཞན་ཀྱིས་གཡས་གཡོན་ནས་སྐྱོར་ཏེ་འགྲོ་བ་ཡིན། ཁྱིམ་ནས་བེམ་པོ་ཁ་ནང་དུ་བསྐོར་ཏེ་འཁྱེར་བ་དང་། ཕྱི་ནས་འགྱོགས་ཤིང་གོ་ལྡོག་སྟེ་འཁྱེར་བ་ཡིན། དེས་ནི་རྣམ་ཤེས་ཀྱིས་རང་ཁྱིམ་གྱི་མི་དང་རྒྱུ་ནོར་སོགས་ལ་མི་ཆགས་པར། ཡོད་ཚད་བློས་བཏང་བ་མཚོན། སྐྱེལ་མི་རྣམས་ཁ་ཕྱིར་མི་འཁོར་ལ། ངལ་གསོ་འང་མི་རྒྱག་པ་ཡིན། སྦྱིན་སྲེག་གམ་གཟན་བསྒྱུར་གྲུབ་རྗེས། ཕྱིར་ཁྱིམ་དུ་ཡ་བྱས་ཏེ་ལོག་པ་དང་། སྒོའི་ཕྱི་རོལ་གྱི་མེ་བསྒོངས་སྟེང་འགོམ་སྟེ། ཆུ་དཀར་གྱིས་ལག་པ་བཀྲུས་ནས་རྡོ་སྲེག་གི་སྟེང་དུ་ལག་ཆུ་འཛར་སྲོལ་ཡོད། དབུས་གཙང་ཁུལ་དུ་ཕུང་སྐྱེལ་བ་རྣམས་ཉིན་དེར་ཁྱིམ་ལ་མི་ཡོང་བར། གཞན་དུ་གནས་ཚང་གཡར་ནས་འདུག་སྲོལ་ཡང་ཡོད།

༦ གཤིན་པོ་ཕན་བྱེད་ཀྱི་དགེ་རྩ་གསུམ། བར་དོ་བ་དེ་ལས་ཀྱི་རླུང་གིས་བདས་ནས། གར་སྐྱེས་དང་བདེ་སྡིག་གི་གདམ་ག་བྲལ་བ་ལ། ཤུལ་ན་མཆིས་པའི་ཉེ་འབྲེལ་རྣམས་དགེ་བ་སྒྲུབ་ཅིང་། དགེ་རྩ་བསྔོས་ན་ཕན་ཆེ་སྟེ། དཔེར་ན། ཆུས་འཁྱེར་བ་སྐམ་ས་ན་ཡོད་པའི་མིས་བཏོན་པ་ལྟ་བུ་ཡིན། ཇོ་བོའི་ཞལ་ལས། མི་ཤི་བ་དེའི་མིང་མ་སྟོར་གྱི་བར་དུ་དགེ་བ་བྱས་ཤིང་བསྔོས་ན་ཕན་གསུངས་ལ། ཕ་བཟང་གི་བུ་ཞིག་ཡིན་ན། ལོ་རེ་བཞིན་ཕ་མ་སོགས་ཤི་སྐར་ལ་དུས་རན་ཞེས་རྩིས་མཐོང་གནང་སྟེ། ལྷ་དང་བླ་མ་ལ་མཆོད་པ་དང་། དགེ་འདུན་སྤྱན་དྲངས་ནས་དགེ་སྒྲུབ་གནང་བ་ཡིན། དེ་ལྟར་མ་བྱུང་ན། བུ་ངན་པས་ཕ་མའི་ཤི་སྐར་མི་ཤེས། ཞེས་འཕྱ་སྨོད་བྱེད་པ་ཡིན། དེ་ཡང་། སུ་ཐོད་ཐོད་ཀྱིས་དགེ་རྩ་བསྒྲུབས་ཤིང་བསྔོས་ན་མི་ཕན་སྟེ། རིགས་རྒྱུད་དང་། ལོངས་སྤྱོད་གཅིག་པ། ཆོས་ཀྱི་འབྲེལ་བ་གསུམ་མོ། །དེ་ལྟར་འབྲེལ་བ་གསུམ་དང་ལྡན་ན། ཆུ་ཆེན་ལ་བརྒལ་བའི་ཚེ་སྦྲེལ་ཐག་ཡོད་པ་དང་འདྲ་སྟེ། གཅིག་ཆུར་ནུབ་ཀྱང་གཅིག་གིས་འདྲོངས་ལ། སྦྲེལ་ཐག་མེད་ན་མི་འདྲོངས་པ་ལྟ་བུ་ཡིན།

༡ རིགས་རྒྱུད་དང་འབྲེལ་བའི་དགེ་རྩ་བྱས་ཤིང་བསྔོས་ན་ཕན་པ་ནི། ཇོ་བོའི་ཞལ་ལས། ད་ལྟའི་ལྡོང་གི་རྒྱངས་ལ་སོགས་པའི་དོན་དུ། ད་ལྟའི་ལྡོང་སྟོན་གྱི་མི་འདི་རྣམས་ཀྱིས་དགེ་བ་བྱས་ཤིང་བསྔོས་ན་ཕན་པར་གསུངས་པ་དང་། བཅོམ་ལྡན་འདས་ལ་ཡངས་པ་ཅན་གྱི་མི་རྣམས་ཀྱིས་ཆོས་སྟོན་འདྲེན་སྐབས། ཡངས་པ་ཅན་པའི་ཕ་མེས་མང་བོ་ཡི་དྭགས་སུ་སྐྱེས་པ་རྣམས་ཀྱིས། བཅོམ་ལྡན་འདས་ལ་དགེ་རྩ་དེ་བདག་ཅག་ལ་བསྔོ་བར་ཞུས་པས། དེར་བསྔོས་པས་ཡི་དྭགས་རྣམས་སྐྱེ་བ་འཕོས་ནས་ལྷར་སྐྱེས་པ་ལྟར་རོ། །

༢ ཡོ་བྱད་དམ་ལོངས་སྤྱོད་འབྲེལ་བས་ཕན་ཐོགས་ཚུལ་ནི། འབྲོམ་སྟོན་གྱི་ཞལ་ལས། རྭ་སྒྲེང་གི་དགེ་བསྙེན་ཀུན་ལ། ཡེ། ཁྱེད་རང་ཀུན་ཡོ་བྱད་བསྲེ་དང། གཅིག་ཤི་ཙ་ན་གཅིག་གིས་དགེ་བ་བྱས་ནས་བསྔོས་ན་ཕན་གྱིས། དེ་ཙུག་མེད་ན་བྱེད་མཁན་སོ་སོའི་དགེ་བར་འགྱུར་གསུངས་སོ། །

༣ ཆོས་ཀྱི་འབྲེལ་བའི་ཕན་ཐོགས་ཚུལ་ནི། འཕགས་པ་རྣ་བ་བྱེ་བ་རིས། ཉི་ཚེ་བའི་སེམས་ཅན་དམྱལ་བའི་གནས་སུ་ཕྱིན་སྐབས། སྐྱེ་བ་སྔོན་འཕགས་པ་ཀ་ཏ་ཡ་ན་ལ་ཆོས་འབྲེལ་མཆིས་པའི་ཉི་ཚེ་བའི་དམྱལ་བ་སྐོར་ཞིག་གིས། རྣ་བ་བྱེ་བ་རིར་འཕྲིན་བགྱིས་ཏེ། འཕགས་པ་ཀ་ཏ་ཡ་ནར་ཡོ་བྱད་ཀྱི་འབྲེལ་བཞག་ནས། དགེ་རྩ་བསྔོར་བཅུག་པས། དམྱལ་བ་ལས་ཐར་བའི་ལོ་རྒྱུས་ཡོད་པ་དང་། དགེ་སློབ་གྱིས་དགེ་རྩ་བསྔོ་རེས་བྱས་ན་ཡང་འགྲུབ། དེར་མ་ཟད། མི་ལ་གངས་ལ་ཕྱི་ན་སྒོམ་སྒྲུབ་གནང་ཚེ། ཉིན་ཞག་བཅོ་བརྒྱད་ལ་ཁ་བ་བབས་པས། ཟླ་དྲུག་ལ་ཟ་མ་ཆད། སློབ་འབངས་རྣམས་ཀྱིས་རྗེ་བཙུན་གྲོངས་ཐག་བཅད་དེ། དགོངས་རྫོགས་བསྒྲུབས། ཁ་བ་འབབ་མཚམས་ཆད་དེ་ཁོང་གི་སྐུ་གདུང་གདན་འདྲེན་དུ་ཕྱིན་དུས། མི་ལ་སྔར་ལས་སྐུ་མདངས་རྒྱས་པར་མཐོང་ཚེ། དགོངས་རྫོགས་ཀྱིས་བར་དོ་ཕན་པའི་ཚུལ་གསུངས་པ། མི་ལའི་རྣམ་མགུར་ལས། གཤེན་རྡོར་མས་ཞུས་པ། རྗེ་བཙུན་ན་ནིང་ལས་ཀྱང་སྐུ་མདངས་ཤིན་ཏུ་བཟང་བར་གདའ་བ། ལམ་སྒོ་གཉིས་ནི་ཁ་བས་ཆོད་དེ། མིའི་ཞབས་ཏོག་ནི་མེད། ལྷ་འདྲེའི་ཞབས་ཏོག་བགྱིས་སམ། རི་དྭགས་ཀྱི་ཐེད་རོ་འདྲ་རྙེད་པ་ལགས་སམ། ཇི་ལྟར་ལགས་ཞུས་པས། རྗེ་བཙུན་གྱི་ཞལ་ནས། ང་ཕལ་ཆེར་ཏིང་ངེ་འཛིན་ལ་འབྱམས་ནས་ཟས་ཟ་མ་དགོས། དུས་བཟང་གི་ཚེ་མཁའ་འགྲོ་རྣམས་ཀྱིས། ཚོགས་ཀྱི་འཁོར་ལོའི་སྐལ་བ་ཡང་བསྐྱལ། རེས་ཕྱེ་ཐུར་མགོ་ཙམ་རེ་འགམས། ཁྱད་པར་ཁ་སང་། རྟའི་ཟླ་བའི་སྨད་ལ་ཁྱེད་བུ་སློབ་རྣམས་ཀྱིས། ངའི་མཐའ་འཁོར་ནས་བཟའ་བཏུང་མང་བོ་དྲངས་པའི་ཉམས་ཤིག་ཤར་བ་ལས། ཞག་མང་བོའི་བར་དུ་ཟ་མ་ཟ་སྙིང་ཡེ་མི་འདོད་པ་ཞིག་བྱུང་། དེ་དུས་ཁྱེད་རྣམས་ཀྱིས་ཅི་བྱས་པ་ཡིན་གསུངས། དེར་ཁོང་རྣམས་ཀྱིས་དུས་བརྩིས་པས་ཐུགས་དགོངས་རྫོགས་ཐབས་ཀྱི་མཆོད་པ་ཕུལ་བ་དང་། དུས་མཚུངས་སུ་འདུག་ཚུལ་ཞིབ་རྒྱས་ཕུལ་བས། རྗེ་བཙུན་གྱི་ཞལ་ནས་འཇིག་རྟེན་པ་རྣམས་ཀྱི་དགེ་རྩ་བགྱིས་པ་བར་དོར་ཕན་པར་འདུག་སྟེ། དེ་བས་ཀྱང་ད་ལྟ་བར་དོ་གཅོད་པ་སྟོབས་ཆེ། གསུངས་པ་ལྟ་བུ། དེ་ལྟར་འབྲེལ་བ་གསུམ་གང་རུང་མི་ལྡན་པར་དགེ་རྩ་བསྔོས་ན། བྱེད་མཁན་གྱི་དགེ་བར་འགྱུར་རོ། །ཅིའི་ཕྱིར་ན་སངས་རྒྱས་ཀྱི་ཐུགས་རྗེ་ལ་ཕྱོགས་སུ་མ་ལྷུང་ཡང་། སེམས་ཅན་ཁ་ཅིག་ནི་ཐུལ། ཁ་ཅིག་ནི་མི་ཐུལ་བ་ཡང་། སྔོན་གྱི་ལས་འབྲེལ་མེད་པའི་སྐྱོན་ཡིན། ཡང་། སངས་རྒྱས་ཀྱི་མི་ཐུལ་བ་འཁོར་གྱིས་ཐུལ་བ་ཡང་། སྔོན་གྱི་ལས་འབྲེལ་གྱི་སྟོབས་ཡིན་ནོ། །