ཐུགས་ཀྱི་འདོད་སྣམ་ལ། གཟུངས་མ་བཅུ་གཉིས།
ཐུགས་ཀྱི་འདོད་སྣམ་ལ། གཟུངས་མ་བཅུ་གཉིས་ནི།
བསྟོད་ཆེན་ལས། དེ་ལྟར་ལྷ་ཡི་འཁོར་ལོ་ལེགས་མཆོད་དྲི་དང་ཕྲེང་བ་བདུག་སྤོས་མ། །སྣང་གསལ་བདུད་རྩི་འབྲས་བུ་མ་དང་སྒེག་མོ་བཞད་མ་སིལ་སྙན་མ། །གར་དང་གླུ་ཡི་སྦྱོར་བ་ལ་བརྩོན་འདོད་མ་འདོད་ལ་རབ་དགའ་མ། །རྒྱན་དང་ཆ་བྱད་རྣམ་འགྱུར་དུ་མས་ཡིད་རབ་འཛིན་མ་རྣམས་བསྟོད་དོ། །ཞེས་གསུངས་པ་ལྟར་ཤར་དུ་དྲི་མ་དུང་ཆོས་འཛིན་པ་དང༌། ཕྲེང་བ་མ་མེ་ཏོག་གི་ཕྲེང་བ་འཛིན་པ་གཉིས་ནག་མོ། ལྷོར་བདུག་སྤོས་མ་སྤོས་ཕོར་འཛིན་པ་དང་སྣང་གསལ་མ་མར་མེའི་ཀོང་བུ་འཛིན་པ་གཉིས་དམར་མོ། ནུབ་ཏུ་སྒེག་མོ་མ་དབུ་རྒྱན་འཛིན་པ་དང༌། བཞད་མ་རིན་པོ་ཆེའི་དོ་ཤལ་འཛིན་པ་གཉིས་སེར་མོ། བྱང་དུ་བདུད་རྩི་མ་ཞལ་ཟས་དང་བཅས་པའི་སྣོད་འཛིན་པ་དང༌། འབྲས་བུ་མ་ཤིང་གི་འབྲས་བུ་འཛིན་པ་གཉིས་དཀར་མོ་རྣམས་གཡོན་ནས་རིམ་པའི་གཡས་སུའོ།།སྟེང་འོག་གི་གཟུངས་མ་ཤར་དུ་སྒྲ་མ་ན་བཟའ་དང་རོལ་མོ་ཐོགས་པ་དང༌། ནུབ་ཏུ་གར་མ་རྡོ་རྗེ་དང༌། དྲིལ་བུ་འཛིན་པའི་གར་བྱེད་པ་གཉིས་ལྗང་གུ། བྱང་དུ་གླུ་མ་པི་ཝཾ་སོགས་འཛིན་པ་དང༌། ལྷོར་འདོད་མ་པདྨའམ་ཆོས་འབྱུང་འཛིན་པ་གཉིས་སྔོན་མོ་ཐམས་ཅད་སྒེག་པ་དང་ཆགས་པའི་ཉམས་ཅན་རིན་པོ་ཆེའི་རྒྱན་གྱིས་མཛེས་པའོ། །འབའ་མདའི་དུས་འཁོར་ཐིག་ཡིག་ཏུ། དེ་ཡང་གར་མ་ལྗང་གུ་ཤར། །སྒྲ་མ་ལྗང་གུ་ནུབ་ཏུ་སྟེ། །གླུ་མ་སྔོན་མོ་བྱང་དང་ནི། །འདོད་མ་སྔོན་མོ་ལྷོ་རུའོ། །ཞེས་དང༌། ཀུན་མཁྱེན་གྱི་དུས་འཁོར་བསྟོད་ཆེན་འགྲེལ་བ་༢༠༧ལས། དབང་ལེར། སྟེང་དུ་སྒྲ་མ་དང་གར་མ་ལྗང་གུ། འོག་ཏུ་གླུ་མ་དང་འདོད་པ་སྔོན་མོ་སྟེ་འདི་ནི་དབང་གི་ལེའུར་གསུངས་པའོ། །སྒྲུབ་ཐབས་ལེའུར་ནི། བྱང་དུ་སྒྲ་མ་དང་གར་མ། ནམ་མཁར་གླུ་མ་དང་འདོད་མ། འོག་ཏུ་བདུད་རྩི་མ་དང་འབྲས་བུ་མ། ཞེས་གསུངས་ཏེ་གང་བྱས་ཀྱང་རུང་བ་ལ་དགོངས་པའི་ཕྱིར་གདམ་ཀ་ཅན། ཞེས་དང༌། དངོས་གྲུབ་ཉེར་འཚོ་༢༤༨ལས། གཟུངས་མ་བཅུ་གཉིས་ལ། སྒྲུབ་ལེར། སྟེང་དུ་འདོད་མ་དང་གླུ་མ། འོག་ཏུ་བཤང་གཅིའི་རྩ་དག་པས་ལྷ་བཤོས་མ་དང༌། འབྲས་བུ་མར་གསུངས་ཤིང༌། དཀྱུས་སུ་བཀོད་པ་ནི་དབང་ལེ་ལས་འབྱུང་བ་ཡིན་ཏེ། སྤྱིར་དེ་གཉིས་འདམ་ཀ་ཡིན་ཡང་རང་རང་གི་ས་བོན་གྱི་སྔགས་ལ་སོགས་པའི་ཁྱད་པར་དང༌། མཆོད་སྔགས་ལ་སོགས་པ་དབང་ལེ་ལས་གསུངས་པ་དང་མཐུན་པ་མང་བས་གཙོ་བོ་དཀྱུས་སུ་བཤད་པ་ཉིད་ཕྱག་ལེན་དུ་མཛད་དོ། །ཞེས་དང༌། ཕྱོགས་རྒྱལ་བའི་སྒྲུབ་ལེའི་མཆན་༨ལས། ལག་ལེན་ལ་ནི་དབང་ལེའི་མཆོད་པའི་སྐབས་ལས་བྱུང་བ་བཞིན་སྦྱར་བ་འཐད་དོ། །ཞེས་གསུངས་སོ། །དུས་འཁོར་འགྲེལ་ཆེན་དྲི་མེད་འོད་ལས། ཡང་ན་མཚན་མ་རྣམས་ཏེ་དུང་ཆོས་དང༌། ༼མེ་ཏོག་གི༽ཕྲེང་བ་དང༌། སྤོས་སྣོད་དང༌། མར་མེ་དང༌། དབུ་༼སྒེག་མོ༽རྒྱན་དང༌། དོ་༼བཞད་མ༽ཤལ་དང༌། འབྲས་བུ་དང༌། ༼བདུད་རྩིའི༽སྣོད་དང༌། གོས་༼གར་མ༽དང༌། རྔ་དང༌། རྡོ་༼གླུ་མ༽རྗེ་དང༌། ༼འདོད་མ༽པདྨ་རྣམས་ཤར་གྱི་ཆ་ལ་སོགས་པར་སྦྱར་བར་བྱའོ་ཞེས་པ་ནི་ངེས་པའོ། །ཞེས་གསུངས་སོ། །