གཉིས་པ་གང་བརྗོད་པའི་དངོས་པོ།

གཉིས་པ་གང་བརྗོད་པའི་དངོས་པོ་ནི།

ཡུལ་དུས་དེ་ན་འཁྲིག་པ་གསལ་པོར་གྲགས་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་རང་གི་གཞིའི་ཡན་ལག་གི་རྣམ་པ་མ་དོར་བར་འཛིན་པའི་ཤེས་པའོ། །ཀུན་སློང་ནི་རང་དོན་དུ་འཁྲིག་པ་སྨྲ་བའི་བདེ་བ་ཉམས་སུ་མྱོང་བར་བྱ་བའི་འདུན་པས་འཁྲིག་པ་སྨྲ་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བའི་ཡན་ལག་ནི། གང་ལ་བསམས་པ་དེ་ཉིད་ལ་ངག་མཚན་ཉིད་ལྔ་ལྡན་གྱིས་འཁྲིག་པ་སྨྲ་བར་ཞུགས་པའོ། །བཞི་བ་མཐར་ཐུག་གི་ཡན་ལག་ནི། སྦྱོར་བ་དེའི་རྐྱེན་གྱིས་དོན་གོ་བའོ། །འཁྲིག་ཚིག་མ་སྨྲས་པར་འཁྲིག་མིང་གསལ་པོར་སྨྲས་ན་ཡང་ལུང་རྣམ་འབྱེད་ལས་རྒྱའི་རྣ་རུ་ཞེས་བྱ་བའི་མིང་བརྗོད་པར་བྱེད་ན་དགེ་འདུན་ལྷག་མར་འགྱུར་རོ་ཞེས་གསུངས་སོ། །གསོལ་བ་དང་ཉེ་བར་གསོལ་བའི་ཁྱད་པར་ནི། ལུང་རྣམ་འབྱེད་ཀྱི་འགྲེལ་པ་ལས། གསོལ་བ་ནི། དངོས་སུ་གསོལ་བར་བྱེད་པའོ། །ཉེ་བར་གསོལ་བ་ནི། དངོས་སུ་མ་སྨོས་པར་གསོལ་བར་བྱེད་པའོ་ཞེས་བཤད་དེ། ལུང་རྣམ་འབྱེད་ལས་ཀྱང་དོན་དེ་ལྟར་གསུངས་སོ། །འདྲི་བ་དང་ཡོངས་སུ་འདྲི་བའི་ཁྱད་པར་ནི། རྣམ་འབྱེད་འགྲེལ་པ་ལས། འདྲི་བ་ནི་སྐབས་འདྲི་བར་བྱེད་པའོ། །ཡོངས་སུ་འདྲི་བ་ནི་སྐབས་དང་སྐབས་མ་ཡིན་པ་གཉིས་ཀ་ཀུན་ནས་འདྲི་བར་བྱེད་པའོ། །ཞེས་གསུངས་ཏེ། ལུང་རྣམ་འབྱེད་ལས་ཀྱང་དོན་དེ་ལྟར་གསུངས་སོ། །བྱེ་བྲག་མེད་པ་ཉིད་དོ་ཞེས་པ་ནི་འཁྲིག་པ་གསལ་པོར་བརྗོད་ཅིང་དེ་རྣམས་སྨྲས་ན་དགེ་འདུན་ལྷག་མར་འགྱུར་བ་ལ་བྱེ་བྲག་མེད་ཅིང༌། འཁྲིག་པ་གསལ་པོར་མ་བརྗོད་པར་དེ་རྣམས་སྨྲས་ན་སྦོམ་པོར་འགྱུར་བ་ལ་བྱེ་བྲག་མེད་པ་དེ་ལུང་རྣམ་འབྱེད་དང་རྒྱ་ཆེར་འགྲེལ་པ་ལས་དེ་ལྟར་བཤད་དོ། །དོན་གཞན་ལ་བསམས་པས་ཞེས་པ་ལ་ལུང་ན་གླེང་གཞི་མ་གསུངས་སོ། །རྩ་བར། མིང་གི་ཆ་ཉིད་འདྲ་བ་ལ་ཡང་ངོ། །ཞེས་པ་ནི་ལུང་རྣམ་འབྱེད་ལས། ནས་ཀྱི་མིང་དང་རྩའི་མིང་དང་ཡོལ་བའི་མིང་བརྗོད་པ་ལ་ལྟུང་བ་མེད་དོ་ཞེས་གསུངས་པ་ནི། རྣམ་འབྱེད་འགྲེལ་བ་ལས། ནས་ལ་ནི་ཡ་བ་ཞེས་བྱ། རྩ་ལ་ནི་ཡ་པ་ཞེས་བྱ། ཡོལ་བ་ལ་ནི་ཡ་བ་ནི་ཀ་ཞེས་བྱ། འཁྲིག་པ་ལ་ནི་ཡ་བྷ་ཞེས་བྱ་སྟེ་མིང་གི་ཆ་འདྲ་བའོ། །ཞེས་གསུངས་སོ། །