ལྔ་བ་སྨྱན་བྱེད་པའི་དགེ་འདུན་ལྷག་མ།

ལྔ་བ་སྨྱན་བྱེད་པའི་དགེ་འདུན་ལྷག་མ་ལ།

རྩ་བར། ཕྲད་ནའོ། །གཞན་དང་ངོ། །གཞན་དུའོ། །མི་མཐུན་པ་སྒྲུབ་པའི་ཕྱིར་རོ། །ཞེས་སོགས་བྱུང༌། འདིའི་དོན་ལ་བཞི་ལས། གླེང་གཞི་ལ་གཉིས་ལས། བྱུང་ལ་མ་བཅས་པའི་གླེང་གཞི་ནི་ཡུལ་མཉན་ཡོད་དུ་གང་ཟག་རི་དྭགས་འཛིན་གྱི་བུ་ནག་པོས་སྨྱན་བྱས་པའི་བྱུང་བ་སྟེ། བཅས་པ་མ་མཛད་དོ། བྱུང་ལ་བཅས་པའི་གླེང་གཞི་ནི། ཡུལ་མཉན་ཡོད་དུ་གང་ཟག་དྲུག་སྡེས་ཉོན་མོངས་པ་ཆགས་པས་ཉེས་པ་སྐྱེས་པ་དང་བུད་མེད་ཆུང་མ་ཉིད་དང་མཛའ་ན་མོ་ཉིད་སྨྱན་བྱེད་པ་ལས་དགེ་འདུན་ལྷག་མར་བཅས་སོ། །གཉིས་པ་དགག་བྱ་ནི་གཞན་ཆགས་ཤིང་ཀུན་ནས་ཉོན་མོངས་པ་དང༌། རང་ཕམ་པ་དང་པོའི་རྒྱུར་འགྱུར་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་སྐྱེས་པ་དང་བུད་མེད་མི་ཚངས་པར་སྤྱོད་པའི་སྒོ་ནས་མཐུན་པ་སྒྲུབ་པའི་ཆེད་དུ་འཕྲིན་གསུམ་མམ་དེ་དང་འདྲ་བའི་སྦྱོར་བ་དེའི་རྐྱེན་གྱིས་དེ་གཉིས་ཕྲད་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། གཞིའི་ཡན་ལག་ལ། གང་དག་སྤྲད་པའི་ཡུལ་དང༌། གང་ལ་གོ་བྱའི་ཡུལ་དང་གཉིས། །དང་པོ་ལ་བདུན་ཏེ། སྐྱེས་པ་བུད་མེད་གཉིས་ཀའི་མཚན་དོན་ཡོད་པ་དང༌། གཉིས་ཀའི་མཚན་བསྟེན་དུ་རུང་བ་དང༌། གཉིས་ཀ་ཐ་སྙད་བཞི་དང་ལྡན་པ། གཉིས་ཀ་ལུས་ཐ་མལ་པར་གནས་པ་དང༌། གཉིས་ཀ་རྫུ་འཕྲུལ་གྱི་ཆོས་ཅན་མ་ཡིན་པ་དང་ལྔ་ནི་སྔར་འཁྲིག་ཚིག་གི་སྐབས་སུ་བཤད་པ་དང་འདྲ་སྟེ། འདིར་སྐྱེས་པ་དང་བུད་མེད་གཉིས་ཀ་ཞེས་པས་ཁྱད་པར་དུ་བྱས་སོ། །རང་ལས་ཐ་དད་ཅིང་དེ་གཉིས་ཀྱང་ཐ་དད་པ་སྟེ། གཞན་དང༌། གཞན་དུའོ་ཞེས་པས་སོ། །མཐུན་པར་གནས་པ་མ་ཡིན་པ་སྟེ། མི་མཐུན་པ་མཐུན་པར་བསྒྲུབ་པའི་ཕྱིར། ཞེས་སོ། །གཉིས་པ་གང་ལ་གོ་བྱའི་ཡུལ་ལ་གསུམ་ལས། ཐ་སྙད་ལྔ་དང་ལྡན་པ་དང༌། ལུས་ཐ་མལ་པར་གནས་པ་ནི། སྔར་རྫུན་སྨྲའི་ཕམ་པའི་སྐབས་སུ་བཤད་ཟིན་ཏོ། །དེ་ཉིད་ལ་དབང་བྱེད་པ་ཉིད་དུ་གནས་པ་སྟེ།དེ་གཉིས་ཀྱི་བདག་པོ་དག་ལ་ནི། ཞེས་སོ། །གཉིས་པ་བསམ་པའི་ཡན་ལག་ལ་གཉིས་ལས།འདུ་ཤེས་ནི་གཞིའི་ཡན་ལག་གི་རྣམ་པར་མ་དོར་བར་འཛིན་པའི་ཤེས་པའོ། །ཀུན་སློང་ནི་མི་ཚངས་སྤྱོད་པའི་སྒོ་ནས་མི་མཐུན་པ་མཐུན་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རང་ངམ་བསྐོས་པས་འཕྲིན་གསུམ་མམ་དེ་དང་འདྲ་བ་བྱེད་པར་ཞུགས་པའོ། །དེ་དང་འདྲ་བ་ནི་ཕྱང་ཡར་ཞེས་དགེ་སློང་རང་གི་གཏམ་འཁྱམ་པོ་ཐོས་པ་ཉིད་ན་དེ་བྱས་པ་ཉིད་དོ། །ཞེས་སོ། །བཞི་པ་མཐར་ཐུག་ནི། སྦྱོར་བ་དེའི་རྐྱེན་གྱིས་དེ་གཉིས་ཕྲད་པ་སྟེ་ཕྲད་ནའོ། །ཞེས་སོ། །སྐབས་འདིར་མཚོ་ཊཱིཀ་ལས། གཞན་དུའོ་ཞེས་པའི་ཊཱི་ཀ་ལས། བུད་མེད་ལ་སོགས་པ་བསྟེན་པར་བྱ་བ་རྨའི་སྒོ་དང་ལྡན་པར་རོ། །ཞེས་སོ། །དེ་ལ་བརྟེན་ནས་ཁ་ཅིག་ནི་སྐྱེས་པ་དང་སྐྱེས་པ་མི་ཚངས་པར་སྤྱོད་པའི་སྨྱན་བྱས་ནའང་དགེ་འདུན་ལྷག་མར་འགྱུར་ཏེ། ཊཱི་ཀ་ལས། བུད་མེད་ལ་སོགས་པ་ཞེས་པའི་སོགས་ཁོངས་སུ་སྐྱེས་པ་བསྡུས་པ་སྟེ། སྐྱེས་པ་མ་བསྡུས་ན་བསྡུ་རྒྱུ་གཞན་མེད་པས། ལ་སོགས་ཀྱི་སྒྲ་ལ་བསྡུ་རྒྱུ་མེད་ན་བསྟན་བཅོས་རྩོམ་པ་པོ་རྟོག་ལྡན་གྱི་ངག་ཡིན་པ་དང་འགལ་བར་འགྱུར་རོ། །འགྲེལ་པ་དགའ་བ་བསྐྱེད་པ་ལས་ཀྱང་སྐྱེས་པ་དང༌། བུད་མེད་སྤྲད་པ་ལས་དགེ་འདུན་ལྷག་མར་གྱུར་ན་སྐྱེས་པ་དང་སྐྱེས་པ་སྤྲད་པ་ལ་ཆེས་འགྱུར་ཏེ། ཆེས་སྡིག་ལྕི་བའི་ཕྱིར་རོ་ཞེས་བཤད་དོ། །ཞེས་ཟེར་རོ། །དེ་ནི་མི་རིགས་ཏེ། སོ་སོར་ཐར་པ་དང་རྣམ་འབྱེད་ལས། བུད་མེད་ལ་སྐྱེས་པའི་ཚིག་དང་སྐྱེས་པ་ལ་བུད་མེད་ཀྱི་ཚིག་གིས་སྨྱན་བྱེད་ན། ཞེས་པ་དང༌།མེ་ཏོག་ཕྲེང་རྒྱུད་ལས་ཀྱང༌། རང་ངམ་གཞན་བྱེད་འཇུག་ཀྱང་རུང༌། །བུད་མེད་སྐྱེས་པ་ཕྲད་ན་ནི། །དགེ་འདུན་ལྷག་མའི་རལ་གྲི་ཡིས། །རང་གི་མགོ་བོ་གཅོད་པ་ཡིན། །ཞེས་གསུངས་པ་དང་འགལ་ལོ། །བུད་མེད་དང་སྐྱེས་པ་ཞེས་གསུངས་པ་དེ་གླེང་གཞིའི་དབང་གིས་མཚོན་བྱེད་དུ་བསྟན་པ་ཡིན་གྱི་ངེས་གཟུང་ནི་མ་ཡིན་ནོ་ཞེ་ན། མི་རིགས་ཏེ། གཞུང་འགྲེལ་དང་བམ་པོ་ལྔ་བཅུ་པའི་སྨྱན་བྱེད་པའི་ལྷག་མའི་སྐབས་ལས། འདིའི་བྱེད་པ་པོ་ནི་མིའི་འགྲོ་བར་གཏོགས་པའི་སྐྱེས་པ་དང༌། བུད་མེད་དོ་ཞེས་བཤད་ཅིང༌། བྱེད་པ་པོ་ནི་མེད་ན་མི་འབྱུང་བའི་རྒྱུ་ཡིན་ཏེ། བྱེད་པ་པོ་ཉིད་ནི་བུད་མེད་དོ་ཞེས་པའི་ཊཱི་ཀ་ལས་དེ་མེད་ན་ལྟུང་བ་འདི་འབྱུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །ཞེས་གསུངས་སོ། །གཞན་ཡང་ཁྱེད་ལྟར་ན། དགེ་སློང་གིས་བུད་མེད་ལ་འཕྲིན་བླངས་ནས་བསྐྱལ་བ་དང་བུད་མེད་དེ་སྐྱེས་པར་གྱུར་ཏེ་སྐྱེས་པ་གཞན་དེ་དང་ཕྲད་པར་བྱས་པ་ལས་ཀྱང་ལྷག་མ་བསྐྱེད་པར་ཐལ་བར་འགྱུར་བ་ལས། ལུང་ཞུ་བ་ལས། དགེ་སློང་གིས་འཕྲིན་བླངས་ནས་བསྐྱལ་བ་དང༌། བུད་མེད་དེའི་མཚན་འཕོས་བཞིན་དུ་ལན་སླར་བསྐྱལ་ན་ཅིར་འགྱུར། སྦོམ་པོར་འགྱུར་རོ་ཞེས་གསུངས་པ་དང་འགལ་ལོ། །རིགས་པས་ཀྱང༌།སྐྱེས་པ་དང་སྐྱེས་པ་སྨྱན་བྱས་པ་ཆོས་ཅན། སྨྱན་གྱི་ལྷག་མ་མི་བསྐྱེད་པར་ཐལ། འབྱུང་རིང་འབྲེལ་ཆུང་དགག་བྱ་གནས་སྐབས་ཀྱི་སྒོ་ནས་མི་རྫོགས་པའི་ཕྱིར་ཏེ། དཔེར་ན་དགེ་སློང་མས་ཡང་ཡང་ཟ་བ་ལ་ལྟུང་བྱེད་མི་བསྐྱེད་པའི་རྒྱུ་མཚན་དུ། ཊཱི་ཀ་ལས། དགེ་སློང་མ་རྣམས་ནི་ཤས་ཆེར་མཆོད་པར་བྱ་བ་ཉིད་མ་ཡིན་པའི་ཕྱིར། དེ་དག་ལ་དེ་འབྱུང་དཀའ་བའི་ཕྱིར་རོ་ཞེས་གསུངས་པ་དང་མགོ་མཚུངས་སོ། །སྒྲུབ་བྱེད་གཞིག་པ་ནི། ཊཱི་ཀ་ལས། བུད་མེད་ལ་སོགས་པ་ཞེས་པའི་སོགས་ཁོངས་སུ་བསྡུ་བ་ནི་མཚན་གཉིས་པ་བུད་མེད་ཀྱི་མཚན་ཤས་ཆེ་བ་ཅན་བསྡུ་བར་བྱ་སྟེ། རྣམ་པ་དེ་ལྟ་བུ་ཉིད་ལ་མཚན་ཅིག་ཤོས་དོན་མེད་དོ། །ཞེས་པ་དང༌། ཊཱི་ཀ་ལས། མཚན་གཉིས་པ་བུད་མེད་ཀྱི་དབང་དུ་གྱུར་ན་ནི་དེའི་ཚེ་དགེ་སློང་ལ་བུད་མེད་ཀྱི་སྐབས་ཀྱི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །ཞེས་བཤད་པས་སོ། །ཞེས་གསུངས་སོ། །སྨྱན་གྱི་སྦྱོར་བ་ལ་འཕྲིན་གསུམ་ལས། འཕྲིན་དང་པོ་ནི། སྤྲད་པར་བྱ་བ་ལ་སྤྲིང་བ་མནོས་པའོ། །འཕྲིན་གཉིས་པ་ནི། གཞན་དེ་ལ་གོ་བར་བྱས་པའོ། །འཕྲིན་ཐ་མ་ནི་དེས་སྨྲས་པ་སྔ་མ་ལ་བརྗོད་པའོ། །འཕྲིན་ཐ་མ་ལ་ཆ་གཉིས་སུ་དབྱེ་སྟེ། དེས་སྨྲས་པ་དང་སྔ་མ་ལ་བརྗོད་པའོ། །སྔ་མ་ལ་བརྗོད་ནའོ་ཞེས་པ་དེ་འཕྲིན་ཐ་མའི་ཕྱེད་དེ། འཕྲིན་ཐ་མའི་ཕྱེད་ཆ་དེ་ནི་དགེ་སློང་གིས་མ་བརྗོད་ཀྱང༌། ཕ་རོལ་པོས་གཞན་དེ་ལས་ཐོས་ཏེ་དོན་གོ་ན་དེས་ཀྱང་འགྲུབ་ཅེས་སྟོན་པ་ནི། འཇུག་པ་བར་མའི་ཞེས་སྨོས་ཏེ། འཕྲིན་ཐ་མ་སྨྲས་པ་དེ་དགེ་སློང་གིས་མནོས་ཟིན་པ་ཉིད་ན་འཕྲིན་གྱི་ལན་དེ་ཚུར་བསྐྱལ་བར་འཇུག་པ་སྟེ་ཚུར་བསྐྱལ་བར་འོས་པའོ། །བར་མ་སྟེ་འཕྲིན་མནོས་པ་དང་ཚུར་སྐྱེལ་གཉིས་ཀྱི་བར་ན་གནས་པའོ། །འཕྲིན་གྱི་ལན་དེ་དགེ་སློང་གིས་མ་བརྗོད་ཀྱང༌། ཕྱེད་ཡར་ཐོས་པ་སྟེ་གཏམ་རྣམ་པར་འཁྱམས་པ་ལ་སོགས་པ་ཐོས་པ་ཉིད་ན། སྔ་མ་ལ་བརྗོད་ན་དེ་བྱས་པ་སྟེ་འཕྲིན་ཐ་མའི་ཕྱེད་བྱས་པ་ཉིད་དོ། །འཕྲིན་ནོད་པ་དང་འཕྲིན་ཕར་སྐྱེལ་བ་དང་འཕྲིན་ཚུར་སྐྱེལ་བ་སྟེ། གསུམ་པོ་དེ་དག་གི་བྱ་བའི་འབྲས་བུ་སྦྱོར་ལྟུང་ཉིད་ནི་ཐ་དད་པ་སྟེ་སྦོམ་པོ་ཐ་དད་གསུམ་བསྐྱེད་པ་ཉིད་དོ། །འདི་ནི་ལུང་རྣམ་འབྱེད་ལས། དགེ་སློང་གཉིས་ཀྱིས་གཉིས་ཀས་སྤྲིང་བ་མནོས་ནས། དེ་གཉིས་ལས་གང་འཕྲིན་ཕར་ཡང་སྐྱེལ་བར་མི་བྱེད་ལ་ཚུར་ཡང་སྐྱེལ་བར་ནི་མི་བྱེད་པ་དེ་ལ་ནི་སྦོམ་པོ་རེ་རེར་འགྱུར་རོ། །གང་འཕྲིན་ཕར་སྐྱེལ་བར་ནི་བྱེད་ལ་ཚུར་སྐྱེལ་བར་ནི་མི་བྱེད་པ་དེ་ལ་ནི་སྦོམ་པོ་གཉིས་སུ་འགྱུར་རོ། །གང་འཕྲིན་ཕར་ཡང་སྐྱེལ་བར་བྱེད་ཚུར་ཡང་སྐྱེལ་བར་བྱེད་པ་དེ་ལ་ནི་དགེ་འདུན་ལྷག་མར་འགྱུར་རོ། །ཞེས་གསུངས་པའོ། །འགྲེལ་ཆུང་ལས་ལན་བརྒྱ་ཞིག་བསྐྱལ་ཏེ་བྱས་ན་སྦོམ་པོ་བརྒྱའོ་ཞེས་བཤད་དོ། ། དྲུག་པ་ཁང་པའི་ལྷག་མ་འཆད་པ་ལ། སྤྱོད་ལམ་བཞི་ཤོང་སོགས་བཤད་པ་དང༌།ཁང་བའི་ལྷག་མའི་ཐུན་མོང་མ་ཡིན་པའི་ཡན་ལག་དང་གཉིས། དང་པོ་ནི། རྩ་བར། སྤྱོད་ལམ་བཞིའི་སྣོད་མ་ཡིན་པ་ཉིད་ལ་ནི་ཞེས་སོགས་ཀྱི་དོན་བཤད་པ་ལ། སྐབས་ཀྱི་དོན་ལ་སྦྱར་བ་དང༌། འདིས་མཚོན་ནས་གནས་ལས་གྱུར་པའི་ལྟུང་བ་རྣམས་སྤྱིར་གཏན་ལ་དབབ་པ་དང༌། ཞར་བྱུང་ནུབ་ལྷག་པར་ཉལ་བའི་ས་ཐག་གི་ཚད་གཏན་ལ་དབབ་པ་དང༌། ཁང་པ་ཁང་ཆེན་གྱི་ཁྱད་པར་གཏན་ལ་དབབ་པ་དང་རྣམ་པ་བཞི། དང་པོ་ནི་སྤྱོད་ལམ་བཞི་པོ་འགྲེང་འཆག་ཉལ་ འདུག་བཞི་ཤོང་བའི་སྣོད་མ་ཡིན་པར་བརྩིགས་པ་ཉིད་ལ་ནི་ཆོས་ཅན། འདི་ལ་ཁང་པ་ཁང་ ཆེན་གྱི་བཅས་པ་ལས་འདས་པའི་ཉེས་ལྟུང་བསྐྱེད་པ་མེད་དེ། འདི་ལ་ཁང་པ་ཁང་ཆེན་གྱི་ལྟུང་བར་མ་བཅས་པའི་ཕྱིར་རོ། །