གསུམ་པ་ཞར་བྱུང་ནུབ་ལྷག་པར་ཉལ་བའི་ས་ཐག་གི་ཚད་གཏན་ལ་དབབ་པ།
གསུམ་པ་ཞར་བྱུང་ནུབ་ལྷག་པར་ཉལ་བའི་ས་ཐག་གི་ཚད་གཏན་ལ་དབབ་པ་ལ།
ཉེས་པ་མེད་པའི་ས་ཐིག་གི་ཚད་གཏན་ལ་དབབ་པ་དང༌། དངོས་གཞི་བསྐྱེད་པའི་ས་ཐིག་གི་ཚད་གཏན་ལ་དབབ་པ་དང་གཉིས། དང་པོ་ནི། ནུབ་ལྷག་གི་སྐབས་ལས། ཉེ་འཁོར་དང་བཅས་པ་ནས་གནས་ཁང་ཙམ་གྱི་ཕ་རོལ་ན་ཐ་དད་པར་གྱུར་ཅིང་གནས་པ་ནི་མ་ཡིན་ནོ་ཞེས་པས་བསྟན་ཏོ། །ཁྲུ་ཕྱེད་དང་བཅུ་གཅིག་པོ་དེ་ལ་རྩིག་ཞེང་ཁྲུ་དོ་ཕྲི་བ་སྟེ། རྡུལ་ཁྲུ་ནས་བརྩིས་པའི་ཁྲུས་ཕྱེད་དང་དགུས་བར་དུ་བཅད་ན་ནུབ་ལྷག་གི་ཉེས་པ་མི་འབྱུང་སྟེ། རྩིག་ཞེང་ཁྲུ་དོ་བརྩི་མི་དགོས་པར་གང་གིས་གྲུབ་ན། རེ་ཁྱིམ་མམ་ཀོ་ཁྱིམ་གྱིས་བར་དུ་ཆོད་ན་ཡང༌། གནས་ཁང་ཙམ་གྱིས་བར་དུ་ཆོད་པ་ཡིན་པར་གྲུབ་བོ། །དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་ཀྱང༌། ཐམས་ཅད་ཡོད་སྨྲའི་ལུགས་ཀྱིས་ཁྲུ་ཕྱེད་དང་དགུས་བར་དུ་ཆོད་ན་ནུབ་ལྷག་གི་ཉེས་པ་མེད་པ་ཡིན་གསུངས་པ་དང་ཡང་མཐུན་ནོ། །གཉིས་པ་དངོས་གཞི་བསྐྱེད་པའི་ས་ཐག་གི་ཚད་གཏན་ལ་དབབ་པ་ནི། བསྙེན་པར་རྫོགས་པ་དང་མ་རྫོགས་པ་གཉིས་ལ་འདོམ་གང་གིས་བར་དུ་ཆོད་ཀྱང༌། ཁྲུ་ཕྱེད་དང་དགུས་བར་དུ་མ་ཆོད་ན་ནུབ་ལྷག་པར་ཉལ་བའི་ལྟུང་བ་དངོས་གཞི་བསྐྱེད་དོ་ཞེས་གཟུང་བར་བྱ་ཞེས་མཚོ་ཊཱིཀ་རང་ལུགས་ལ་དེ་ལྟར་གསུངས་སོ། །