༢༽ སློབ་དཔོན་པདྨ་ལས་བྱོན་པའི་རྫོགས་ཆེན་མཁའ་འགྲོ་སྙིང་ཐིག་གི་བརྒྱུད་སྲོལ།
[༡] སློབ་དཔོན་ཆེན་པོ་པདྨ་འབྱུང་གནས།
གཉིས་པ་གུ་རུ་ནས་བྱོན་པའི་མན་ངག་རྫོགས་ཆེན་མཁའ་འགྲོ་སྙིང་ཐིག་གི་བརྒྱུད་སྲོལ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་ཞི་ཁྲོ་རབ་འབྱམས། སྤྲུལ་སྐུ་དགའ་རབ་རྡོ་རྗེ། རིག་འཛིན་ཤྲཱི་སེང་ཧ། ཨོ་རྒྱན་པདྨ་འབྱུང་། མཁའ་འགྲོ་ཡེ་ཤེས་མཚོ་རྒྱལ། ལྷ་ལྕམ་པདྨ་གསལ། གཏེར་སྟོན་པདྨ་ལས་འབྲེལ་རྩལ། ཤྭ་བན་རྒྱལ་སྲས་ལེགས་ལྡན། རྒྱལ་དབང་ཀློང་ཆེན་རབ་འབྱམས་སོགས་ནས་གྲུབ་ཐོབ་པདྨ་རིག་འཛིན་ལ་བཀའ་བབ། དེ་ནས་རིམ་པར་དཔོན་སློབ་ནམ་མཁའ་འོད་གསལ་ནས་ད་ལྟའི་བར་བརྒྱུད་པའི་ཆུ་བོའི་ཟམ་མ་ཆད་ཅིང་། མན་ངག་གི་བདུད་རྩིའི་མཚོ་མ་སྐམ། བྱིན་རླབས་ཀྱི་ཞལ་རླངས་ཅུང་ཟད་ཀྱང་མ་ཡལ་བར་གྲུབ་དབང་རྫོགས་ཆེན་པའི་ཕ་ཆོས་ཟབ་མོ་དུས་ཀྱི་མཐའ་འདིར་ལས་སྨོན་གྱི་བདེན་པ་ཟབ་མོ་ཆུད་མི་ཟ་བའི་སྟོབས་ལས་ཁོ་བོ་ཅག་གི་བགོ་སྐལ་དུ་ཐོབ་པར་བྱུང་ལ། ཐོག་མར་དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་སྐྱེས་རབས་རྣམ་ཐར་གོང་དུ་རིག་འཛིན་བརྡ་བརྒྱུད་བཤད་པའི་སྐབས་སུའང་ཉུང་བསྡུས་སོང་ཞིང་། འདིར་གངས་ཅན་བོད་ཀྱི་ཡུལ་དུ་ཞབས་ཀྱིས་བཅགས་ནས་འགྲོ་དོན་མཛད་ཚུལ་མདོ་ཙམ་བཤད་པ་ནི། དེ་ཡང་སྔོན་སྨོན་ཐུགས་བསྐྱེད་ཀྱི་དམ་བཅའ་དུས་སུ་སྨིན་པས་མངའ་བདག་རྒྱལ་པོ་ཁྲི་སྲོང་ལྡེའུ་བཙན་ལ་མཁན་ཆེན་བོ་དྷི་ས་ཏྭས་ལུང་བསྟན་པ་ལྟར་གུ་རུ་ཉིད་བོད་དུ་གདན་དྲངས། བརྟན་མ་བཅུ་གཉིས་སོགས་བོད་ཀྱི་ལྷ་སྲིན་ཐམས་ཅད་དམ་ལ་བཏགས་ཏེ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས། མཁན་སློབ་གཉིས་ཀྱིས་མེ་ཏོག་འཐོར་བས་ངོ་མཚར་གྱི་རྟགས་སྣང་མཐའ་ཡས་པ་བྱུང་བ་སོགས་སྐུ་རྟེན་གཙུག་ལག་ཁང་རྟེན་དང་བརྟེན་པར་བཅས་པ་བཞེངས། རྒྱ་གར་གྱི་པཎ་ཆེན་བརྒྱ་དང་རྩ་བརྒྱད། གཞན་ཡང་ལི་ཡུལ། རྒྱ་ནག ཞང་ཞུང་སོགས་ནས་མཁས་པའི་ཚོགས་མང་པོ་སྤྱན་དྲངས་ནས། ལོ་ཙཱ་བ་སྐ་ཅོག་ཞང་གསུམ་སོགས་གཙོ་བོར་བྱས་པའི་སྤྲུལ་བའི་ལོ་ཆེན་མང་པོ་ལྷན་ཅིག་ཏུ་ཚོགས་ཏེ། སྟོན་པའི་གསུང་རབ་མདོ་སྔགས་དགོངས་འགྲེལ་དང་བཅས་པ་རྒྱ་གར་ན་ཇི་སྙེད་བཞུགས་པ་ཡོངས་སུ་རྫོགས་པ་དང་། དཀོན་བརྩེགས་ལི་ཡུལ་དང་། ཕལ་པོ་ཆེ་རྒྱ་ནག་ནས་འགྱུར་བ་སོགས་ཀྱིས་མཚོན་འཛམ་གླིང་ན་བཞུགས་པའི་གསུང་རྟེན་དམ་པའི་ཆོས་ཐམས་ཅད་ལྷག་མ་མེད་པར་བོད་སྐད་དུ་བསྒྱུར། གདུལ་བྱ་ཐུན་མོང་གི་ངོར་གུ་རུ་པདྨས་མན་ངག་ལྟ་ཕྲེང་དང་གསང་སྔགས་ལམ་རིམ་ཆེན་མོ་སོགས་གསང་སྔགས་ཕྱི་ནང་གི་རྒྱུད་དང་མན་ངག་མང་པོ་གསུངས་ནས་སྔགས་ཀྱི་སྲོལ་འཛིན་གོས་དཀར་ལྕང་ལོའི་སྡེ་དང་། མཁན་པོས་སད་མི་བདུན་རབ་ཏུ་བྱུང་བ་སོགས་དམར་སེར་ངུར་སྨྲིག་གི་སྡེ་སྟེ་ཐུགས་རྟེན་འཕགས་པའི་དགེ་འདུན་གྱི་སྡེ་ཚུགས། མཁན་སློབ་ཆོས་རྒྱལ་གསུམ་གདན་འཛོམས་ཏེ་གངས་ལྗོངས་ཐམས་ཅད་རྒྱལ་བསྟན་རིན་པོ་ཆེའི་སྣང་བས་དཀར་འབྱམས་ཡུག་གཅིག་ཏུ་བརྡལ་བར་མཛད། ཐུན་མོང་མ་ཡིན་པ་རྗེ་འབངས་ཉེར་ལྔ་སོགས་ལས་ཅན་དག་པའི་ངོར་འདུས་པ་ཆེན་པོ་ལན་གསུམ་འཚོགས་ནས། དང་པོ་བཀའ་བརྒྱད་བདེ་གཤེགས་འདུས་པ། གཉིས་པ་བླ་མ་དགོངས་པ་འདུས་པ། གསུམ་པ་བཀའ་འདུས་ཆོས་ཀྱི་རྒྱ་མཚོ་སོགས་ཀྱི་དབང་དང་སྒྲུབ་ཐབས་རྒྱུད་ལུང་མན་ངག་མཐའ་ཡས་པ་བསྩལ། མངའ་བདག་རྒྱལ་པོས་ས་གཞི་སྤོས་ཆུས་སོགས་མཎྜལ་ཚོམ་བུ་བདུན་མ་མཛད་དེ་མཁའ་འགྲོ་ཡེ་ཤེས་མཚོ་རྒྱལ་ཐུགས་ཀྱི་གཟུངས་མས་མཚོན་རྒྱལ་སྲིད་འབངས་འཁོར་དང་བཅས་པ་དབང་ཡོན་དུ་ཕུལ། དེ་དག་གི་སྐབས་སུ་ཆོས་རྒྱལ་ཁྲི་སྲོང་ལྡེའུ་བཙན། གནུབས་ཆེན་སངས་རྒྱས་ཡེ་ཤེས། རྒྱལ་བ་མཆོག་དབྱངས། ནམ་མཁའི་སྙིང་པོ། ཛྙཱ་ན་ཀུ་མཱ་ར། ཡེ་ཤེས་མཚོ་རྒྱལ། དཔལ་གྱི་ཡེ་ཤེས། དཔལ་གྱི་སེང་གེ བཻ་རོ་ཙ་ན་སྟེ་བཀའ་བབས་སྙིང་གི་བུ་དགུས་གཙོར་བྱས་པའི་དབང་དུས་སུ་རྟོགས་པ་བརྙེས་པའི་གྲུབ་ཆེན་རྗེ་འབངས་ཉེར་ལྔ་སོགས་བྱོན། གཞན་ཡང་གུ་རུའི་ཞལ་སློབ་ལུས་དེ་ཉིད་ཀྱི་སྒོ་ནས་ཟུང་འཇུག་འཇའ་ལུས་རྡོ་རྗེའི་སྐུ་བརྙེས་པ། མཆིམས་ཕུའི་གྲུབ་ཆེན་ཉེར་ལྔ། ཡང་རྫོང་གི་རྟོགས་ལྡན་ཉེར་ལྔ། 
ཡེར་པ་དང་ཆུ་བོ་རིའི་འོད་ལུས་གྲུབ་པ་བརྒྱ་རྩ་བརྒྱད། ཤེལ་བྲག 
་གི་སྔགས་པ་སུམ་ཅུ། མཚན་ལྡན་ཇོ་མོ་རྣམ་གསུམ། གྲུབ་ཐོབ་གཙང་པ་མི་བདུན། འོད་སྐུར་གཤེགས་པའི་མཁའ་འགྲོ་ཉེར་ལྔ་སོགས་གྲུབ་ཐོབ་ཕོ་མོ་གྲངས་ལས་འདས་པ་བྱོན། རྗེ་འབངས་སོ་སོའི་ངོ་སྐལ་དུ། ཡི་དམ་རྩ་གསུམ་དང་། བླ་རྫོགས་ཐུགས་གསུམ་གྱིས་གཙོ་བོར་བྱས་པའི་རྫོགས་པ་ཆེན་པོའི་རྒྱུད་དང་སྒྲུབ་ཐབས་མན་ངག་མཐའ་ཡས་པར་གདམས། ཕྱི་རབས་ཀྱི་གདུལ་བྱ་ལ་དགོངས་ཏེ་མཚོ་རྒྱལ་སོགས་ལས་ཅན་དག་པའི་འཁོར་དང་བཅས་བོད་ཀྱི་ས་གཞི་རྟ་རྨིག་གང་ཙམ་མ་ལུས་པར་རྫུ་འཕྲུལ་གྱི་ཞབས་ཀྱིས་བཅགས། སྟོད་མངའ་རིས་གངས་བྲག བར་དབུས་གཙང་གནས་ཆེན་ཉེར་གཅིག སྨད་མདོ་ཁམས་གནས་ཆེན་ཉེར་ལྔ། སྦས་ཡུལ་རྒྱལ་པོ་གསུམ། གླིང་ལྔ། ལྗོངས་གསུམ། གླིང་གཅིག དེ་རེ་རེ་ལའང་རྩ་བ་དང་ཡན་ལག་གི་ཚུལ་དུ་རི་མཚོ་གངས་བྲག་ཐམས་ཅད་སྒྲུབ་གནས་སུ་བྱིན་གྱིས་བརླབས། གསང་སྔགས་ཀྱི་བསྟན་པ་མི་ནུབ་པ་དང་། རྟོག་གེ་བས་བསླད་ཅིང་བཅོས་སུ་མེད་པས་བྱིན་རླབས་མི་གཡེལ་བ་དང་། ལས་ཅན་གྱི་གདུལ་བྱ་རིམ་པར་འབྱུང་བ་སོགས་བསྟན་ཞབས་གཏེར་གྱིས་སྐྱོང་ཞིང་ཕྱི་རབས་ནས་ཕྱི་རབས་ལ་དགོངས་ཏེ། རྒྱལ་པོའི་བླ་གཏེར་བརྒྱ་དང་། ཐུགས་གཏེར་ཆེན་པོ་ལྔ། ཟབ་པའི་གཏེར་ཆེན་ཉེར་ལྔ་གཙོ་བོར་གྱུར་པའི་མིང་ཅན་མིང་མེད་ཀྱི་ཆོས་ནོར་དམ་རྫས་ཀྱི་གཏེར་ཁ་གྲངས་ལས་འདས་པ་སྦས། དེ་དག་གདོན་པའི་དུས། འདོན་པའི་གང་ཟག ལས་ཅན་ཆོས་བདག གསང་གྲོགས་ལས་རྒྱ་སོགས་ལུང་བསྟན་ཏེ་གུ་རུ་ཡབ་ཡུམ་གྱིས་བཀའ་རྟགས་ཕྱག་རྒྱས་བཏབ་སྟེ་གཏེར་དུ་སྦས། གཏེར་སྲུང་མ་གཟའ་དམ་གསུམ། བདུད་བཙན་ཀླུ་གསུམ། སྲོག་བདག་རྣམ་གསུམ་སོགས་སྡེ་བརྒྱད་སོ་སོ་ལ་གཉེར་དུ་གཏད། མོན་ཁ་ནེ་རེང་སེདྒེ་རྫོང་སོགས་སྟག་ཚང་མིང་ཅན་བཅུ་གསུམ་དུ་དཔལ་ཆེན་རྡོ་རྗེ་གྲོ་ལོད་ཀྱི་སྐུར་བཞེངས་ནས་ལྷ་སྲིན་ཆེ་ཕྲ་དྲེགས་པ་ཅན་ཐམས་ཅད་དམ་ལ་བཞག །ཕྱི་རབས་ཡིད་ཆེས་པའི་ཕྱིར་བུམ་ཐང་རྡོ་རྗེ་བརྩེགས་པ་སོགས་ལ་སྐུ་རྗེས་དང་། གནམ་མཚོ་ཕྱུག་མོ་སོགས་གྲགས་པའི་མཚོ་ཆེན་བཞི་ལ་ཕྱག་རྗེས། སྤ་གྲོའི་བྲག་དཀར་པོ་སོགས་ལ་ཞབས་རྗེས་རྡོ་རྗེ་བྲག་གི་ངོས་ལ་མར་དཀར་ལ་པར་གྱིས་བཏབ་པ་བཞིན། རྗེས་འཇུག་མོས་གུས་ཀྱི་རྟེན་དང་གདུལ་བྱའི་བསོད་ནམས་ཀྱི་ཞིང་དུ་མི་འགྱུར་བའི་རྟགས་ཀྱིས་བཏབ་པ་སོགས་འགྲོ་དོན་མཐའ་རུ་ཕྱིན་ཏེ་གུང་ཐང་ལ་ཐོག་ནས་ཆིབས་དང་བཅས་ལྷོ་ནུབ་སྲིན་པོའི་ཡུལ་དུ་འཇའ་འོད་ཀྱི་ཀློང་ནས་མངོན་པར་གཤེགས་སོ། །དེ་ལྟར་ཨོ་རྒྱན་ཆེན་པོ་ལ་ཞལ་སློབ་ཐུགས་སྲས་མང་དུ་བཞུགས་པ་ལས་གཙོ་བོར་གྱུར་པ་རྗེ་འབངས་གྲོགས་གསུམ་ཡིན་ལ་འབངས་བཻ་རོ་ཙ་ནའི་རྣམ་ཐར་གོང་དུ་སེམས་ཀློང་གཉིས་ཀྱི་སྐབས་སུ་སོང་ཞིང་། གྲོགས་ཡེ་ཤེས་མཚོ་རྒྱལ་ཡང་འོག་གི་བརྒྱུད་རྣམ་དུ་འབྱུང་ལ་ཉེ་བ་དང་། ཆོས་རྒྱལ་ཁྲི་སྲོང་ལྡེའུ་བཙན་གྱི་རྣམ་ཐར་རྩ་བའི་བརྒྱུད་རྣམ་དུ་དགོས་དབང་དེ་ཙམ་མི་ཆེ་ཡང་གངས་ཅན་སྤྱི་དང་སྔ་འགྱུར་གྱི་བསྟན་པ་ལ་བཀའ་དྲིན་འགྲན་ཟླ་དང་བྲལ་བས་ཅུང་ཟད་མི་གླེང་བར་ཆེས་ཕངས་པས་མཚམས་འདིར་འགོད་པ་ལ།
[༢] ཆོས་རྒྱལ་ཁྲི་སྲོང་ལྡེའུ་བཙན།
རྗེ་མངའ་བདག་ཆོས་རྒྱལ་ཁྲི་སྲོང་ལྡེའུ་བཙན་ནི། ཡབ་རྒྱལ་པོ་ཁྲི་ལྡེའུ་གཙུག་བརྟན་དང་བཙུན་མོ་གྱིམ་ཤིང་ཀོང་ཇོ་གཉིས་ཀྱི་སྲས་སུ། རབ་མྱོས་ཞེས་པ་ལྕགས་རྟ་སྟེ་སྤྱི་ལོ་༧༩༠པར་སྐུ་འཁྲུངས། ཐོག་མར་ལྷུམས་སུ་ཞུགས་ཚེ་ཡུམ་གྱི་རྨི་ལམ་དུ་རྒྱ་ནག་རི་བོ་རྩེ་ལྔ་ནས་འོད་ཉི་མ་ཤར་བ་ལྟ་བུའི་རྩེ་ལས་ཁྱེའུ་ཞིག་བྱུང་ནས་ཁོག་ཏུ་ཞུགས་པ་རྨིས། རྒྱལ་པོ་ལ་བཤད་པས་ཧ་ཤང་མངོན་ཤེས་མཁན་ཞིག་བཞུགས་པ་ལ་དྲི་བ་མཛད་ཚེ། དེས་ལེགས་པར་བརྟགས་ཏེ་སྲས་བྱང་ཆུབ་སེམས་དཔའ་འཇམ་དཔལ་གྱི་སྤྲུལ་པ་ཅིག་འཁྲུངས་པའི་ལྟས་ལགས་པས་རིམ་གྲོ་ཆེར་སྐྱེད་ཅིག་ཅེས་ཟེར་རོ། །དེ་ནས་ཟླ་བ་དགུ་ངོ་དང་བཅུ་ཚང་པ་སྐར་མ་རྒྱལ་གྱི་ཉིན་པར་སྐུ་བལྟམས་པའི་བཙས་སྟོན་རྒྱ་ཆེན་པོ་མཛད་ནས་མྱུར་བར་མཚོ་ཆེན་པོའི་པདྨ་ལྟར་ལང་ཚོ་ཆེ་ནས་ཆེར་བསྐྱེད། མཚན་གསོལ་བའི་དགའ་སྟོན་གྱི་ཚེ་མིང་ཅི་གདགས་བཀའ་བགྲོས་པ་ལས། རྒྱལ་བུ་ཉིད་བཞེངས་ནས་གནམ་ལྷ་བབ་ཀྱི་རྒྱལ་པོ། ས་ལྷུན་གྲུབ་ཀྱི་མངའ་བདག་མགོ་ནག་ཡོངས་ཀྱི་སྤྱི་རྗེ་སྤྲུལ་པའི་རྒྱལ་པོ་ཁྲི་སྲོང་ལྡེའུ་བཙན་ལགས་སོ་ཞེས་གསུངས་པས། བོད་འབངས་ཐམས་ཅད་ཡ་མཚན་སྐྱེས་ནས་ཕྱག་འཚལ་ཞིང་འདུན་ནོ། །དེ་ནས་དགུང་ལོ་བཅུ་གསུམ་ལ་ཡབ་དགུང་དུ་གཤེགས་ནས་རྒྱལ་སྲིད་ལ་མངའ་གསོལ་ཞིང་བཞུགས་པ་ལ། བློན་པོ་ཆེན་པོ་མ་ཞང་གྲོམ་པ་སྐྱེས་དབང་ཆེ་བས་ཆོས་དར་དུ་མ་གཏུབ་པར་ཐམས་ཅད་བོན་ལ་བཀོད་ནས་ཆབ་སྲིད་བཟུང་། མཁར་བྲག་དང་བྲག་དམར་མགྲིན་བཟང་བཤིག ཇོ་བོ་ཤཱཀྱ་མུ་ནེ་རྒྱ་ཡུལ་དུ་སྐྱེལ་བའི་ཐབས་བྱས་ཀྱང་མ་ཐེག་པས་ས་འོག་ཏུ་སྦས་ཤིང་འཕྲུལ་སྣང་གི་གཙུག་ལག་ཁང་དུ་བཤས་ར་བྱས། དུས་དེར་སྦས་གསལ་སྣང་མཁན་པོ་ཞི་བ་འཚོ་བལ་ཡུལ་དུ་བཞུགས་པ་མཇལ་དུ་ཕྱིན་ནས་སེམས་བསྐྱེད་ཞུས་ཏེ་བོད་ལ་འབྱོན་པར་གསོལ་བས། བོད་ངའི་གདུལ་ཞིང་ཡིན་ནའང་། བཙན་པོ་དང་ཁྱོད་མ་སྐྱེས་པས་ངས་འདི་ན་བོད་ཀྱི་རྒྱལ་རབས་དགུའི་བར་དུ་སྒུག་གིན་བསྡད་པ་ཡིན། ད་ཁྱེད་གཉིས་ཀྱང་ནར་སོན་པས་འོ་སྐོལ་རྣམས་ཀྱིས་བོད་དུ་བསྟན་པ་འཛུགས་པའི་དུས་ལ་བབ། ཅེས་གསུངས། མི་རིང་བར་རྒྱལ་བུ་སྐུ་ནར་སོན་ནས་ཡབ་མེས་ཀྱི་ཡིག་ཚང་ལ་གཟིགས་པས་ཆོས་མཛད་པར་དགོངས། དགེ་བ་བཅུའི་མདོ་དང་། རྡོར་གཅོད། སཱ་ལུ་ལྗང་པ་རྣམས་རྫ་ཁྲོད་ནས་བླངས་ཏེ་གཟིགས་པས་ལྟ་སྤྱོད་དག་ཅིང་ཟུང་དུ་འབྲེལ་བར་གོ། དེ་ནས་སྦ་གསལ་སྣང་རྡོ་རྗེ་གདན་དུ་མ་ཧཱ་བོ་དྷི་མཆོད་པ་བྱེད་དུ་ཕྱིན་ནས་རིམ་པར་བོད་དུ་ལོག །བཙན་པོ་ལ་མཁན་པོས་གསུང་རྣམས་གསོལ་བས། བཙན་པོའི་ཞལ་ནས། མ་ཞང་གིས་ཆད་པ་གཅོད་དོགས་ཡོད་པས་ཁྱོད་རང་མྱུར་དུ་སོང་།
ངས་ལྐོག་ཏུ་འགོས་རྒན་དང་གྲོས་བྱས་ནས་ཐབས་ཀྱིས་སྤྱན་འདྲེན་དུ་བཏང་གི་གསུངས། རྒྱལ་པོས་བློན་པོ་ཆེན་པོ་འགོས་ལ་བོད་ཐམས་ཅད་ཆོས་ལ་འགོད་པའི་ཐབས་དྲིས་པས། འགོས་ཀྱིས་མཆིད་ནས་དེ་ཤིན་ཏུ་ལེགས་ཀྱང་རྒྱལ་པོ་སྐུ་ཆག་ཆེ་བས་གླུད་དུ་བློན་པོ་གཉིས་ལོ་གསུམ་ཆད་པར་བཅུག་ན་ཕན་ཞེས་སྒྲོག་ཏུ་གཞུག་གིས། དེ་དུས་དེ་ལྟར་མཛད་པར་ཞུ་ཞེས་གླེང་ནས་མོ་རྩིས་པ་རྣམས་ལ་བརྔན་པ་བྱིན་ནས་སྒྲོག་ཏུ་བཅུག་པས་རྒྱལ་ཁམས་ཐམས་ཅད་དུ་བསྒྲགས་པའི་ཚེ། རྒྱལ་པོའི་བློན་འཁོར་བསགས་ནས་ང་ཡི་གླུད་དུ་འགྲོ་ནུས་པ་སུ་ཡོད་དྲིས་པས། འགོས་རྒན་པོ་ལངས་ཏེ་ང་གཅིག་འགྲོ་བར་ཞུ་ཟེར་བ་དང་། མ་ཞང་ཡང་འགྲན་པར་ལངས་ཏེ་ང་ཡང་འགྲོ་བ་ཞུ་ཟེར་རོ། །དེ་ནས་སྟོད་ལུང་བྲང་མདར་ལོ་གསུམ་གྱི་ཡོ་བྱད་དང་བཅས་བློན་པོ་ཆེན་པོ་གཉིས་གསོན་དུར་དུ་བཅུག འགོས་རྒན་ལྐོག་ནས་ཚུར་བཏོན། མ་ཞང་ཆད་པས་སྒོ་བཅད་དེ་སྲུང་མི་བཞག གཞན་ཡང་བློན་པོ་ཆོས་ལ་མི་དགའ་བ་རྣམས་ཕྱོགས་གཞན་དང་གཞན་དུ་བཏང་། དེ་ནས་འགོས་དང་རྒྱལ་པོ་བཀའ་བགྲོས་ཏེ་གཙུག་ལག་ཁང་བཞེངས་པའི་ཐབས་བྱས་ནས་བློན་འབངས་ལ་འདམ་ཀ་བཀུར་ཏེ་གྲོས་བྱས་པས་གཙུག་ལག་བྲེ་ཞབས་ཙམ་བཞེངས་པར་འཆམས་ཏེ། མཁན་པོ་ཞི་བ་འཚོ་གདན་འདྲེན་པར་བཏང་བས་མཁན་པོས་ཞལ་ནས་ཁྱེད་རྣམས་རེ་འཕྱིས། ངའི་ལོ་དགུ་བརྒྱ་བསྒུགས་པ་ལས་ད་བར་མ་བྱུང་། རྒྱལ་པོ་བཙས་པའི་ཚེ་ཡང་ང་ལ་སོ་མེད་པ་ལས་གཅིག་པོ་འདི་ཕྱིས་སྐྱེས་སོ། །
ཞེས་གསུངས་ཏེ། བོད་ཡུལ་དུ་བྱོན་པས་རྒྱལ་བློན་ཀུན་ཀྱིས་བསུ་བ་མཛད་ནས་གཙུག་ལག་ཁང་རྩིགས་པའི་རྨང་འདིང་བ་ན་ལྷ་འདྲེ་རྣམས་ཀྱིས་བརྩིགས་སུ་མ་སྟེར་བས། མཁན་པོའི་ཞལ་ནས། རྒྱ་གར་གྱི་ཡུལ་ནས་རྒྱལ་པོ་དྷརྨ་པ་ལའི་མཆོད་གནས་སུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་མཁས་ཤིང་གྲུབ་པ་བརྙེས་པ། མཐུ་དང་རྫུ་འཕྲུལ་ཐོགས་པ་མེད་པ་ཞིག་བཞུགས་པ་དེ་སྤྱན་དྲངས་ནས་ས་འདུལ་མཛད་ན་གཙུག་ལག་ཁང་འབྱོངས་པར་ལུང་བསྟན་པ་ལྟར་མཛད་པས། སློབ་དཔོན་ཆེན་པོ་རྫུ་འཕྲུལ་གྱིས་བོད་དུ་ཕེབས་ཏེ་ལྷ་འདྲེ་གདུག་པ་ཅན་རྣམས་དམ་ལ་བཏགས། ཧེ་རུ་ཀའི་གར་དང་རྡོ་རྗེའི་འགྲོས་ཀྱིས་ས་བཏུལ་བར་ཕྱི་བཞིན་རྨང་བཏིང་བས་ཕྱིའི་ལྕགས་རི་མུ་ཁྱུད་རྡོ་རྗེའི་འགྲོས་ཟུར་མང་རིས་སུ་བྱུང་ངོ་། །དེའི་ཚེ་ལས་དཔོན་ཆེན་པོ་བཞི་བསྐོས་ཏེ་རྒྱ་དཀར་ནག ཞང་ཞུང་སུམ་པ། ལྷོ་བལ་གར་ལོག ལི་མང་ཡུལ་ལ་སོགས་པའི་བཟོ་བོ་མཁས་པ་མང་པོས་ཉིན་པར་བཞེངས་ཤིང་།
མཚན་མོ་ལྷ་སྲིན་སྡེ་བརྒྱད་ཀྱིས་ལས་དཔོན་བྱས་ཏེ་མི་མ་ཡིན་པ་རྣམས་ཀྱིས་བཞེངས་པས་ཉིན་བརྩིགས་པ་བས་ནུབ་བརྩིགས་པས་མཐོ་ཞིང་། རི་མོ་དང་ཤིང་བཟོ་དང་། ལྡེར་བཟོ་ཡང་མཚན་མོའི་ལེགས་པ་བྱུང་། དེ་ལྟར་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་གླིང་བཞི་གླིང་ཕྲན་བརྒྱད་ཉི་ཟླའི་གླིང་གཉིས་དང་ཇོ་མོ་གླིང་གསུམ་སོགས་ཕྱི་རྟེན་དང་། ནང་རྟེན་རྣམས་ལེགས་པར་གྲུབ་ནས་མཁན་པོ་བོ་དྷི་ས་ཏྭ་དང་སློབ་དཔོན་པདྨ་འབྱུང་གནས་གཉིས་ཀྱིས་རབ་ཏུ་གནས་པ་མཛད་ཚེ་ཡ་མཚན་པའི་ལྟས་དཔག་ཏུ་མེད་པ་བྱུང་ཞིང་མི་ལོ་བཅུ་གསུམ་དུ་བཀྲ་ཤིས་པའི་དགའ་སྟོན་དང་ལྟད་མོའི་རིགས་མཐའ་དག་བྱས་ཏེ་རྒྱལ་འབངས་ཐམས་ཅད་བདེ་སྐྱིད་ཀྱི་ཉི་མ་ཤར་བར་གྱུར་ཏོ། །དེ་ནས་མཁན་སློབ་གཉིས་ཀྱིས་རྒྱུ་མཚན་ཉིད་ཀྱི་ཐེག་པ་དང་། འབྲས་བུ་གསང་སྔགས་རྡོ་རྗེ་ཐེག་པའི་ཆོས་བཀའ་རྒྱ་ཆེ་བ་རྣམས་གནང་ཞིང་རྗེ་འབངས་ཐམས་ཅད་སྨིན་པར་མཛད། གཞན་ཡང་རྒྱ་གར་ནས་པཎྜི་ཏ་མང་པོ་སྤྱན་དྲངས་ཤིང་མཁན་སློབ་རྣམ་གཉིས་དང་བཅས་པས་མདོ་སྔགས་ཀྱི་ཆོས་རྒྱ་ཆེ་ཞིང་གྲངས་མང་བར་བསྒྱུར་ཅིང་གཏན་ལ་ཕབ་པར་མཛད་དོ། །ཁྱད་པར་མངའ་བདག་རྒྱལ་པོ་ཉིད་ཀྱིས་འོད་གསལ་གསང་བ་སྙིང་ཐིག་གི་བརྒྱུད་པའི་མན་ངག་སློབ་དཔོན་རྣམ་གསུམ་ལས་བཀའ་ལུང་ཆིག་རྫོགས་སུ་གསན་པ་སྟེ། སློབ་དཔོན་བཱི་མ་ལ་ནས་བར་ཁང་གཡུ་ཞལ་ཅན་དུ་ཆོས་རྒྱལ་ཉིད་དང་། སྐ་བ་དཔལ་བརྩེགས། གཉགས་ཛྙཱ་ན། ཉང་བན་ཏིང་འཛིན། ལྷ་སྲས་མུ་ཏིག་བཙན་པོ་དང་ལྔས་འོད་གསལ་གསང་བ་སྙིང་ཐིག་གི་གདམས་ངག་བུམ་པ་གང་བྱོས་སུ་གསན་པ་དང་། དཔལ་གྱི་བསམ་ཡས་སུ་གུ་རུ་ནས་བརྒྱུད་པའི་གདམས་པ་ཡོངས་རྫོགས་གསན་ཞིང་དབང་དུས་སུ་མེ་ཏོག་དབུས་སུ་བབ་ཅིང་ཆེ་མཆོག་བདེ་གཤེགས་འདུས་པས་ཞལ་གཟིགས་ཏེ་རྟོགས་པ་མངོན་དུ་གྱུར། ལོ་ཆེན་བཻ་རོ་ནས་སེམས་སྡེ་སྔ་འགྱུར་ལྔ་དང་། ཀློང་སྡེ་རྡོ་རྗེ་ཟམ་པ་སོགས་ཟབ་ཆོས་མང་དུ་གསན། ཡང་བཱི་མ་དང་བཻ་རོ་ཐུན་མོང་ནས་སེམས་སྡེ་ཕྱི་འགྱུར་བཅུ་གསུམ་སོགས་གཙོ་བོར་མཛད་ནས་གསན། དེ་ལྟར་རྫོགས་ཆེན་གྱི་ཤིང་རྟ་ཆེན་པོ་གསུམ་གྱི་ཟབ་ཆོས་ཡོངས་སུ་རྫོགས་པ་གསན་ཏེ་སྒྲུབ་པ་ཉམས་བཞེས་མཛད་པས་ཆོས་ཉིད་གཅེར་མཐོང་དུ་ངོ་འཕྲོད། དགོངས་པ་ཀློང་ཆེན་ཡངས་པའི་མཁའ་ལ་གཏན་སྲིད་ཟིན་ཏེ་རྩ་བའི་ཆོས་ཀྱི་བདག་པོར་གྱུར། རིག་རྩལ་ཆོས་རབ་རྣམ་འབྱེད་ཀྱི་ཤེས་རབ་ཀློང་བརྡོལ་བས་བཀའ་ཡང་དག་པའི་ཚད་མ་སོགས་བསྟན་བཅོས་ཀྱང་མང་དུ་མཛད་པ་བཅས། མདོར་ན་རྗེ་བཙུན་འཇམ་དཔལ་དབྱངས་མངའ་བདག་ཆོས་ཀྱི་རྒྱལ་པོའི་ཚུལ་དུ་བྱོན་པ་འདིའི་སྐུ་རིང་ལ་བོད་ཡུལ་མུན་པའི་གླིང་དུ་རྒྱལ་བསྟན་མདོ་སྔགས་ཀྱི་བསྟན་པ་ཉི་མ་ཤར་བ་ལྟར་བྱུང་བ་དང་། མཐའ་ཡི་རྒྱལ་ཁམས་ཐམས་ཅད་དབང་དུ་བསྡུས་ཏེ་སུམ་གཉིས་ས་ཡི་དཀྱིལ་འཁོར་ཆེན་པོ་ལ་བཀས་མངའ་དབང་བསྒྱུར། བོད་ཡུལ་སྟོད་སྨད་ཀྱི་ཆབ་འབངས་ཐམས་ཅད་བདེ་སྐྱིད་རྫོགས་ལྡན་གྱི་དཔལ་ལ་བཀོད་པ་སོགས་ལེགས་མཛད་ཕྱོགས་བརྒྱར་སྤེལ། དེ་ལྟར་ཐུགས་བསྐྱེད་དང་བཀའ་དྲིན་རྨད་དུ་བྱུང་བའི་མཛད་པ་ནམ་ཡང་ནུབ་པ་མེད་པ་ལྗོངས་འདིར་གསལ་བར་བྱས་ཏེ་མཐར་དགུང་གྲངས་ལྔ་བཅུ་སྐོར་ཞིང་འདིའི་གདུལ་བྱ་རེ་ཞིག་རྫོགས་པའི་ཚུལ་གྱིས་མྱ་ངན་ལས་འདས་སོ། །
[༣] མཁའ་འགྲོ་ཡེ་ཤེས་མཚོ་རྒྱལ།
གྲོགས་མཁའ་འགྲོ་ཡེ་ཤེས་མཚོ་རྒྱལ་ནི། འཁྲུངས་ཡུལ་གངས་ཅན་བོད་ཀྱི་ཡུལ་དབུས་མཁར་ཆེན་ལྕོག་རོ་རུ། ཡབ་མང་རྗེ་ཐོད་དཀར་ལེགས་དང་། ཡུམ་གནུབས་གཟའ་རྒྱལ་མོ་མཚོ་གཉིས་ཀྱི་སྲས་མོ་རུ་བྱ་ལོ་སྤྲེལ་ཟླའི་ཉི་ཤར་དུས་སྐུ་འཁྲུངས་པ་སྟེ། ཡུམ་རྒྱལ་མོ་མཚོའི་རྨི་ལམ་དུ་ནམ་མཁའི་དཀྱིལ་ན་བུད་མེད་སྔོན་མོ་གཅིག་གིས་འོད་ཀྱི་སྐར་མ་ཞིག་འཕངས་པ་ཁོག་པའི་ནང་དུ་སོང་བ་རྨིས་ནས་ཟླ་བ་དགུ་ངོ་བཅུ་ན་བུ་མོ་མཛེས་མ་དཔྲལ་བར་རྡོ་རྗེ་རྒྱ་གྲམ་གྱི་རི་མོས་མཚན་པ། ཞལ་ནས་ཨུཏྤལ་གྱི་དྲི་ངད་དང་ལྡན་པ་འཇའ་འོད་འཕྲོ་ཞིང་མེ་ཏོག་གི་ཆར་བ་དང་བཅས་བལྟམས། ཆེར་སྐྱེས་པའི་དུས་མངའ་བདག་རྒྱལ་པོ་ཁྲི་སྲོང་ལྡེའུ་བཙན་གྱི་བཙུན་མོར་སྤྱན་དྲངས། འབྲི་ཀློག་སོགས་རིག་པའི་གནས་ཀུན་བརྡ་བསྟན་པ་ཙམ་གྱིས་ཐུགས་སུ་ཆུད། སློབ་དཔོན་ཆེན་པོ་བོད་དུ་ཕེབས་ནས་ཆོས་འཁོར་སྐོར་བའི་ཚེ་སློབ་དཔོན་ལ་ཤིན་ཏུ་དད་ཅིང་རྒྱལ་པོ་ལ་ཆོས་བྱེད་པར་ཞུས་པས་གནང་སྟེ་སློབ་དཔོན་ལ་ཕུལ། དེ་ནས་སློབ་དཔོན་གྱིས་ལས་རྒྱ་བགྱིས་ཏེ་གང་དུ་གཤེགས་པ་ཐམས་ཅད་དུ་བྱོན་ནས་བསྙེན་བཀུར་དང་ཞབས་ཏོག་མཛད། མཆིམས་ཕུ་དང་གཞོ་སྟོད་ཏི་སྒྲོ་སོགས་སུ་ཡབ་ཡུམ་ལྷན་དུ་སྒྲུབ་པར་བཞུགས་པས་བསད་པའི་མི་རོ་བསླངས་པའི་གྲུབ་པ་ཐོབ་པ་སྟེ་མཆོག་དང་ཐུན་མོང་གི་དངོས་གྲུབ་བརྙེས། སློབ་དཔོན་ཆེན་པོ་ལས་མདོ་སྔགས་ཀྱི་ཆོས་བཀའ་ཐམས་ཅད་ཐོབ་ཅིང་ཤིན་ཏུ་གཅེས་པའི་མན་ངག་གང་ཟབ་ཟབ་རྣམས་ཐུགས་ཀྱི་གཟུངས་མ་མཚོ་རྒྱལ་ཁོ་ན་ལ་མནོག་ཆོས་སུ་བསྩལ་ཏེ་བཀའ་གཏད་མཛད། དེ་དག་གི་སྐབས་སུ་མཚོ་རྒྱལ་གྱིས་ཞུ་བསྐུལ་དང་བཀའི་བསྡུ་བ་མཛད་དེ་དཀར་ཆག་ཏུ་བཀོད་པ་བསམ་གྱིས་མི་ཁྱབ་ཅིང་། ཁྱད་པར་དུ་སློབ་དཔོན་ཡབ་ཡུམ་གཞོ་སྟོད་ཏི་སྒྲོ་བྲག་ཏུ་སྒྲུབ་པ་མཛད་པའི་ཚེ། ཡེ་ཤེས་ཀྱི་མཁའ་འགྲོ་རྣམས་ཀྱིས་ཇོ་མོ་ལ་བསྐུལ་བ། སློབ་དཔོན་ཆེན་པོ་སྤྲུལ་པའི་སྐུའི་ཐུགས་ལ་ཚེ་འདི་ཉིད་དུ་གདོས་བཅས་ཀྱི་ཕུང་པོ་མི་སྣང་བར་ལོ་གསུམ་གྱིས་འཚང་རྒྱ་བའི་གདམས་པ་མངོན་སུམ་སྙིང་ཏིག་གི་མན་ངག་ཟབ་མོ་བཞུགས་པས་གསོལ་བ་ཐོབ་ཅིག་ཅེས་ལུང་བསྟན་ཏོ། །དེའི་ཚེ་ཚོགས་ཀྱི་འཁོར་ལོ་རྒྱ་ཆེན་པོས་མཆོད་དེ་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་ཕུང་པོ་མི་སྣང་བར་འཚང་རྒྱ་བའི་གདམས་པ་མངོན་སུམ་སྙིང་ཏིག་གི་མན་ངག་གནང་བར་ཞུ་འཚལ་ཞེས་གསོལ་བ་བཏབ་སྟེ་ཕྱག་དང་སྐོར་བ་གྲངས་མེད་པ་མཛད། སློབ་དཔོན་ཆེན་པོས་གསུངས་པ། མཚོ་རྒྱལ་ཁྱོད་ཀྱིས་ཞུས་པ་དེ་ཤིན་ཏུ་ལེགས། སྔར་དང་མི་འདྲ་བའི་གདམས་པ་ཐེག་པ་རིམ་དགུ་ཀུན་ལས་འདས་པའི་རྩེ་མོ། གནད་མཐོང་བས་ཡིད་དཔྱོད་ཀྱི་ལྟ་སྒོམ་འཇིག་པ། འབད་མི་དགོས་པར་ས་ལམ་རྫོགས་པ། བཅོས་སྒྱུར་དང་གཉེན་པོ་མི་དགོས་པར་ཉོན་མོངས་རང་སར་གྲོལ་བ། རྒྱུས་མ་བསྐྱེད་པར་འབྲས་བུ་རང་ལ་རྫོགས་པ། ལྷུན་གྱིས་གྲུབ་པའི་དགོངས་པ་སྐད་ཅིག་ལ་འཆར་བ། གདོས་བཅས་ཤ་ཁྲག་གི་ཕུང་པོ་ཚེ་འདི་ཉིད་ལ་འོད་གསལ་ལོངས་སྤྱོད་རྫོགས་པའི་སྐུར་གྲོལ་བ། འོག་མིན་གྱི་གནས་སུ་ལོ་གསུམ་གྱིས་བགྲོད་ནས་ཆོས་སྐུ་ལྷུན་གྲུབ་རིན་པོ་ཆེའི་ཞིང་དུ་གཏན་སྲིད་ཟིན་པར་བྱེད་པའི་གདམས་པ་མཁའ་འགྲོ་གསང་བ་སྙིང་ཐིག་ཡོད་ཀྱིས་བསྟན་པར་བྱའོ་གསུངས་ནས། གཞོ་སྟོད་ཏི་སྒྲོ་བྲག་གི་མཁའ་འགྲོའི་ཚོགས་ཁང་ཆེན་མོར་ཞི་ཁྲོ་དོན་གྱི་དཀྱིལ་འཁོར་ཞལ་ཕྱེས་ནས་ཇོ་མོ་མཁར་ཆེན་བཟས་ཐོག་དྲངས་ཡེ་ཤེས་ཀྱི་མཁའ་འགྲོ་མ་འབུམ་ཕྲག་གཅིག་ལ་དབང་བསྐུར་ཞིང་ཁྲིད་རྫོགས་པར་མཛད་ནས། ཡང་གསང་རྫོགས་པ་ཆེན་པོ་རྒྱུད་བཅུ་བདུན་ཀློང་གསལ་ཉི་མའི་རྒྱུད་དང་བཅོ་བརྒྱད། དེའི་མན་ངག་རབ་ཏུ་མང་པོ་དང་བཅས་པ་རྣམས་གསུངས་སོ། །དེ་ནས་དེ་རྣམས་ལས་རྒྱུད་རབ་ཏུ་རྒྱས་པའི་མན་ངག་རྣམས་གཅིག་ཏུ་ཕྱེས། སློབ་དཔོན་ཉིད་ཀྱིས་མཛད་པ་ཀུ་ས་ལིའི་སྐོར་རྣམས་གཅིག་ཏུ་ཕྱེས་ཏེ་སོ་སོར་སློབ་དཔོན་དང་མཚོ་རྒྱལ་གཉིས་ཀྱིས་ཡི་གེར་བྲིས་ཏེ་དཀར་ཆག་ལ་བསྣན་ཅིང་ལྷ་ལྕམ་པདྨ་གསལ་ལ་སྨོན་ལམ་གཏད་རྒྱ་མཛད་ནས་གཏེར་དུ་སྦས་པར་མཛད། མཐར་སློབ་དཔོན་ཆེན་པོ་དང་མཉམ་དུ་འཇའ་འོད་ཀྱི་ཀློང་ནས་ལྷོ་ནུབ་སྲིན་པོའི་ཡུལ་དུ་རྫུ་འཕྲུལ་གྱིས་གཤེགས་སོ། །
[༤] ལྷ་ལྕམ་པདྨ་གསལ།
མངའ་བདག་སྲས་མོ་ལྷ་ལྕམ་པདྨ་གསལ་ནི། ཡབ་མངའ་བདག་རྒྱལ་པོ་ཁྲི་སྲོང་ལྡེའུ་བཙན་དང་། ཡུམ་བཙུན་མོ་དམ་པ་འབྲོ་བཟའ་བྱང་ཆུབ་སྨན་གཉིས་ཀྱི་སྲས་མོར་སྐུ་བལྟམས། ཆུང་ངུ་ནས་སློབ་དཔོན་ཆེན་པོ་སོགས་པཎ་གྲུབ་རྣམས་ཀྱི་ཞལ་མཇལ་ཞིང་བྱིན་རླབས་ཀྱི་དབང་བསྐུར་ཐོབ། དགུང་ལོ་བརྒྱད་ལ་སོན་པའི་ཚེ་ན་ཚེའི་འཕེན་པ་རྫོགས་ཏེ་དུས་ཆོས་སུ་གྱུར། དེའི་ཚེ་ལྷ་སྲས་རྒྱལ་པོ་བུ་མོའི་རོ་ལ་གཟིགས་ཤིང་བཤུམས་ཏེ་ས་ལ་འགྱེལ་བ་ན། མཚོ་རྒྱལ་གྱིས་ཙན་དན་གྱི་ཆུ་གཏོར་བས་བརྒྱལ་སངས་པ་དང་སློབ་དཔོན་ཆེན་པོ་ལ་ཕྱག་དབུ་ཐོད་བུད་བུད་བཙལ་ནས་གསེར་སྐྱོགས་གཡུས་བཀང་བ་ཕུལ་ཏེ། སློབ་དཔོན་ཆེན་པོ་ལགས། བདག་གི་བུ་མོ་ལྷ་ལྕམ་འདི་ལས་དག་པ་ཞིག་ཀྱང་ཡིན་པ་འདྲ་སྟེ་བདག་རྒྱལ་པོ་ཁྲི་སྲོང་ལྡེའུ་བཙན་གྱི་བུ་མོར་སྐྱེས། ཁྱེད་ལོ་པཎ་སངས་རྒྱས་དངོས་དང་འདྲ་བ་འདི་ཙམ་གྱི་ཞལ་མཇལ་བ་ཡིན། འོན་ཀྱང་ཚེ་ཐུང་ངུ་འདི་ལྟ་བུར་གྱུར་བ་ཇི་ལྟར་ལགས་ཞུས་པས། སློབ་དཔོན་གྱི་ཞལ་ནས། ཁྱེད་ཀྱི་སྲས་མོ་ལྷ་ལྕམ་འདི་ལས་དག་པས་ཁྱེད་ཀྱི་སྲས་མོར་སྐྱེས་པ་ཅི་ཡང་མིན། སྔོན་པདྨ་བདག་དང་ཆོས་རྒྱལ་ཆེན་པོ། བོ་དྷི་སཏྭ་རྣམས་རིགས་ངན་གྱི་བུ་གསུམ་དུ་སྐྱེས་ནས་མཆོད་རྟེན་ཆེན་པོ་བྱ་རུང་ཁ་ཤོར་བཞེངས་པའི་སྐབས་སུ་ལྷ་ལྕམ་འདི་སྦྲང་བུ་ཏྲེ་མ་ཞིག་གི་ལུས་བླངས་ནས་ཡོད་པས། རྒྱལ་པོ་ཉིད་ཀྱི་རྩེའུ་ཆུང་ལ་ཟོས་པའི་ཚེ་དྲན་མེད་དུ་ཕྱག་གིས་བྱབས་པ་ལས་སྦྲང་བུ་ཤི་བར་གྱུར་བའི་སྲོག་གི་ལན་ཆགས་ཀྱིས་ཁྱེད་ཀྱི་བུ་མོར་སྐྱེས་པ་ཡིན། སྤྱིར་འདུས་བྱས་ཐམས་ཅད་འདི་དང་འདྲ་བ་རྟག་ཅིང་བརྟན་པ་མེད་པས་མི་རྟག་རྟག་པར་མ་འཛིན་པར་སྐྱེ་མེད་ཆོས་སྐུའི་དོན་ལ་སྦྱོངས། ཞེས་གསུངས། ཡང་རྒྱལ་པོས་གསོལ་བ། ཀྱེ་སློབ་དཔོན་ཆེན་པོ་ལགས། སྤྱིར་འདུས་བྱས་མཚན་ཉིད་མི་རྟག་ན། ངའི་གཙུག་ལག་ཁང་འདི་རྣམས་ཅི་ཙམ་ནས་འཇིག །སངས་རྒྱས་ཀྱི་བསྟན་པ་ནམ་འཇིག །དམ་ཆོས་ནུབ་པའི་རྐྱེན་གང་གིས་བྱེད། བུ་མོ་འདི་ཚེ་ཐུང་བའི་རྒྱུ་རྐྱེན་ཅི་ལགས། ཞེས་ཞུས་པས་སློབ་དཔོན་གྱིས་བཀའ་བསྩལ་པ། ཀྱེ། རྒྱལ་པོ་གསོན་ཅིག །སངས་རྒྱས་བསྟན་པ་ཡུན་དུ་གནས་ཀྱང་དར་རྒུད་མང་དུ་འབྱུང་ངོ་། །དེའང་རྒྱལ་པོ་ཉིད་ནས་གདུང་རབས་ལྔ་ན་སངས་རྒྱས་ཀྱི་བསྟན་པ་ཉམས་དམའ་བར་འགྱུར་རོ། །དེ་ནས་བོད་ཡུལ་མངའ་ཐང་ཉམས་ཏེ་བཙུན་པས་འདུལ་ཁྲིམས་མི་ཐུབ། སྔགས་པས་དམ་ཚིག་མི་ཐུབ། སྡེ་འཁྲུགས་དང་ནང་དམེ་བྱེད། སྐྱེ་བོས་མནའ་ཟ། ཁྲེལ་མེད། ཕ་མ་གསོད། དེ་དུས་སངས་རྒྱས་ཀྱི་བསྟན་པ་ཉམས་དམའ་ཞིང་བོད་ཁྲིམས་ཧོར་གྱིས་འཇིག །ལུང་པ་ཁྲག་མཚོར་འགྲོ། ས་གཞི་ཀེང་རུས་ཀྱིས་ཁྱབ། ལས་ཅན་དང་ཆོས་བྱེད་ཐམས་ཅད་ས་མཐར་འབྲོས་པས་རྒྱལ་པོ་ཉིད་ཀྱི་ཕྱག་དཔེ་གཏེར་དུ་སྦས་ན་འགྲོ་དོན་ཆེ། དེ་དུས་བཀའ་མ་རྣམས་བཀའ་འཆལ་ཏེ་བྱིན་རླབས་ཆུང་བས་གྲུབ་པ་ཐོབ་པ་ཉུང་ངོ་། །དུས་དེར་གཏེར་མ་འདི་བཀའ་མ་འཆལ་བས་བྱིན་རླབས་ཆེ་ཞིང་ལས་ཅན་རྣམས་ཀྱིས་གཏེར་སྒོ་ཕྱེ་ནས་དར་བར་འགྱུར་རོ་སོགས་གདམས་ངག་ལུང་བསྟན་མང་དུ་གསུངས་ནས། ཡང་ཀྱེ། རྒྱལ་པོ་ཁྱོད་ཀྱི་ལྷ་ལྕམ་འདི་ཚེ་དུས་བྱེད་པའི་རྒྱུ་ནི། སྐྱེ་བ་འདིའི་གོང་རོལ་དུ་རྒྱ་གར་གྱི་ཡུལ་ཀ་ལ་ཀི་ཏྲའི་གྲོང་ཁྱེར་དུ། རྒྱལ་པོ་བྷེ་ལ་ཀུ་ཏྲའི་བཙུན་མོར་སྐྱེས་ཚེ་མོ་ལ་བུ་མེད། བཙུན་མོ་གཅིག་ཤོས་ལ་བུ་ཡོད་པ་ཕྲག་དོག་གིས་བརྐུས་ནས་བསད་པའི་རྣམ་སྨིན་གྱིས་ཚེ་མཐར་མ་ཕྱིན་པར་ཤི་བ་ཡིན་ནོ་གསུངས། ཡང་རྒྱལ་པོས་ཞུས་པ། ཕྱི་མར་སྐྱེ་བ་གང་དུ་ལེན། མི་ལུས་ནམ་ཐོབ། ཆོས་གང་ལ་སྤྱོད། འགྲོ་དོན་གང་དུ་སྤྱོད། མཐར་བྱང་ཆུབ་ཐོབ་པའི་སྐལ་བ་མཆིས་སམ། ཅེས་ཞུས་སོ། །སློབ་དཔོན་གྱིས་གསུངས་པ། ཡབ་རྒྱལ་པོ་གསོན་ཅིག སྐྱེ་བ་འདིའི་འོག་ཏུ་ལོ་མང་དུ་སྡུག་བསྔལ་ལ་སྤྱོད་པར་འདུག་སྟེ་བཤད་ན་རྒྱལ་པོ་ཐུགས་ཁྲལ་དུ་འགྲོ། ལས་ངན་དེ་རྣམས་བྱང་ནས་བསྒྲག་གྲོང་གསར་དུ་བུད་མེད་དབང་པོ་ཚང་ལ་དད་པ་དང་ལྡན་པར་སྐྱེས་ནས་ངའི་གདམས་པ་དང་ལས་འབྲེལ་ཐོག་པ་ཙམ་དུ་འབྱུང་ངོ་། །དེ་ནས་ལྷོ་ལ་ཡག་ཏུ་བུ་མོ་སྤྲེལ་ལོ་མ་ཤེས་རབ་ཆེ་བ་གཅིག་ཏུ་སྐྱེས་ནས་མངའ་བདག་སྐུ་ཡི་སྤྲུལ་པ་ཉང་རལ་གྱིས་རྗེས་སུ་བཟུང་ནས་ལམ་སྣ་ཟིན་པར་འགྱུར་རོ། །དེ་ནས་གཡས་རུ་གྲོང་དམར་དུ་སྐྱེས་པའི་ལུས་ཐོབ་སྟེ་སྔར་རབ་ཏུ་བྱུང་བའི་བག་ཆགས་ཀྱིས་དེར་ཡང་རབ་ཏུ་བྱུང་སྟེ་ངའི་སྤྲུལ་པ་ཆོས་དབང་དང་འཕྲད་ནས་གདམས་པ་བྱིན་པས་རིག་པའི་ངོ་བོ་མཐོང་སྟེ་མཁའ་འགྲོས་རྗེས་སུ་འཛིན་པར་འགྱུར་རོ། །སྐྱེ་བ་དེའི་འོག་ཏུ་རྡོ་དང་མོན་བོད་ཀྱི་མཚམས་འབྲིན་ཐང་ཞེས་བྱ་བར་སྐྱེས་ཏེ་སྔ་མའི་བག་ཆགས་ཀྱིས་རབ་ཏུ་འབྱིན་པར་འགྱུར་རོ། །དེའི་ཚེ་མཁའ་འགྲོ་མ་རྣམས་ཀྱིས་བར་ཆད་སྲུང་ཞིང་ལུང་བསྟན་ནས་ང་ཡི་ཟབ་གཏེར་དང་འཕྲད་དེ་གཏེར་སྒོ་གསུམ་འབྱེད་པར་འགྱུར་རོ། །དེའི་དུས་སུ་སྙིང་ཐིག་ཟབ་མོའི་གདམས་ངག་དང་འཕྲད་ཀྱང་འགྲོ་དོན་མི་འབྱུང་སྟེ་སྦས་པའི་ཚུལ་གྱིས་ཉམས་སུ་ལེན་པའི་དུས་ཡིན་ནོ། །དེའི་ཚེ་ང་ཡི་ཟབ་ཆོས་ཀྱི་བདག་པོར་གྱུར་ནས་ལས་དང་ལྡན་པ་དང་མི་ལྡན་པའི་སློབ་མ་བདུན་ཅུ་འབྱུང་སྟེ་དེ་རྣམས་ལས་གདུལ་བྱ་ལས་ཅན་རྣམས་བདེ་བ་ཅན་དུ་སྐྱེ་ཞིང་ལས་མེད་ལ་ལ་ངན་སོང་དུ་སྐྱེའོ། །དེ་དུས་མཁའ་འགྲོས་ལུང་བསྟན་ཅིང་མཚན་དང་ལྡན་པའི་སློབ་མ་ཉི་ཤུ་རྩ་གཅིག་འབྱུང་། ཁྱད་པར་དུ་ཟབ་མོ་སྙིང་ཐིག་གསན་པའི་གཏེར་འདིའི་བདག་པོ་སྒྲགས་ཟུང་མཁར་གྱི་བུ་མོ་སྤྲེལ་ལོ་མ་ཤེས་རབ་ཆེ་ལ་ཆོས་ལ་མོས་པ། ཡིད་དུ་འོང་ཞིང་སོ་ཞོ་ཡོད་པ། སྨིན་མཚམས་ན་སྨེ་བ་པདྨ་དང་འདྲ་བ་ཡོད་པ། མཚོ་རྒྱལ་གྱིས་བྱིན་གྱིས་བརླབས་པ་ཞིག་འབྱུང་བས་དེ་ལ་གདམས་པ་རྣམས་བྱིན་ན་ཁ་རག་གི་ཕུར་ལྷག་མེད་དུ་སངས་རྒྱ་ཞིང་དར་ཆ་ཡང་བག་ཙམ་འབྱུང་ངོ་། །དེ་མིན་འགྲོ་དོན་མི་འབྱུང་ཞིང་ཐམས་ཅད་ཀྱི་བསམ་པ་བསྒྱུར་པས་དེ་ལ་མོས་པ་ཤིན་ཏུ་ཉུང་ངོ་། །དེ་ཡང་འབྲེལ་ཚད་དོན་དང་ལྡན་པས་ཐར་པའི་ལམ་སྣ་ཟིན་པར་འགྱུར་རོ། །དེའི་ཚེ་ཚད་དགུང་ལོ་ལྔ་བཅུ་རྩ་དགུ་སྟེ་ཚེའི་སྒྲུབ་པ་བྱས་ན་དར་ཅིག་ཕྱིར་སྣུར་ཞིང་གཞན་དུ་བར་ཆད་ཀྱིས་ལྔ་བཅུ་རྩ་དགུའི་གོང་དུ་འདའ་བའང་སྲིད། དེ་ནས་དམ་སེལ་གྱིས་འདའ་བའི་ཚུལ་སྟོན་པས་དམ་སེལ་བཤགས་པ་ལ་འབུངས། དེ་ལྟར་བྱས་ན་དགུང་ལོ་ཚད་དུ་བཞུགས་པས་དེའི་དུས་སུ་མཁའ་འགྲོ་སྡེ་ལྔས་བྱིན་གྱིས་བརླབས་པའི་བུད་མེད་གཅིག་འབྱུང་བ་དེས་ཕྱག་རྒྱ་བྱས་པས་ཚེ་ལ་གསོས་ཐེབས་ཏེ་ཚེ་ཚད་ལས་ལྷག་པར་བཞུགས་སོ། །དེ་དུས་ཟབ་གཏེར་རྣམས་བུམ་ཐང་སྨད་དུ་སྐྱེལ་ལོ། །གལ་ཏེ་མ་འཁྱོལ་ན་སྔར་གྱི་གཏེར་ཤུལ་ལམ་ལྷ་འདྲེ་མི་འཕོ་བའི་བྲག་ལ་སྦས་ན་སྐྱེ་བ་ཕྱི་མར་ཐོན་པར་འགྱུར་རོ། །སྐྱེ་བ་དེ་འདས་ནས་ལོངས་སྐུའི་ཞིང་ཁམས་དར་ཅིག་ཉུལ་ལོ། །དེ་ནས་བུམ་ཐང་ཐར་པ་གླིང་དུ་སྐྱེས་ནས་ལོ་བཅོ་ལྔ་ན་བུམ་ཐང་སྨད་ཀྱི་བྲག་སེང་གེ་འདྲ་བ་ལ་སྙིང་ཐིག་གི་རྒྱུད་མན་ངག་དང་བཅས་པ་ཐོན་ནས་འགྲོ་དོན་བྱེད་དོ། །དེ་ནས་གཏེར་སྒོ་མང་བར་འབྱེད་ཅིང་རྫུ་འཕྲུལ་ཡ་མ་ཟུང་བསྟན་ཏེ་བུད་མེད་ཀྱི་ལུས་བཟུང་བའི་མཁའ་འགྲོ་ལྔས་ཡུམ་བྱས་ནས་འགྲོ་དོན་འདུ་བར་འགྱུར་རོ། །མཚན་དྲི་མེད་འོད་ཟེར་ཞེས་བྱར་གྲགས་ཏེ་རྟ་མགྲིན་གྱི་སྤྲུལ་པའི་སྲས་ཟླ་བ་གྲགས་པ་ཞེས་བྱ་བ་གཅིག་ཀྱང་འཁྲུངས་ཤིང་། སློབ་མའང་ཟབ་མོ་གནད་ཀྱིས་ཐེབ་པ་བརྒྱ་རྩ་བརྒྱད། ཆོས་ཀྱི་འབྲེལ་བ་སྟོང་རྩ་བརྒྱད། འགྲོ་དོན་ནུས་པ་སུམ་ཅུ་འབྱུང་ངོ་། །སྦྱིན་བདག་ལ་སོགས་ཟས་ནོར་གྱི་འབྲེལ་བ་ནི་ཤིན་ཏུ་མང་ངོ་། །དེའང་ལྷོ་བྲག་དང་མཁར་ཆུ་ལ་རྫོགས་ཆེན་གྱི་བསྟན་པ་དར་ཞིང་རྒྱས་པར་བྱེད་དོ། །དེ་དུས་ལྷོ་བྲག་གི་བྲག་སེང་གེའི་གདོང་པ་ཅན་ནས་སེམས་ཕྱོགས་ཀྱི་ཆོས་སྡེ་ཐམས་ཅད་ཐོན་པར་འགྱུར་རོ། །མོན་མཁར་སྟེང་ནས་བདག་གི་ངན་སྔགས་ཟབ་མོ་ཚོ་ཐོན་ཞིང་འཆིམས་ཕུ་འདི་ཉིད་དུ་སྦས་པའི་ལྷ་ལྕམ་མོ་རང་གི་ཟབ་བེར་སྲུབ་མེད་དང་། གཡུ་གུང་རི་ཁ་དམར། གཟི་མཆོང་སྤེལ་མའི་ལན་ཚར། དངུལ་དཀར་གྱི་མེ་ལོང་རྒྱང་གསལ། ཨོ་རྒྱན་བདག་གི་ཆོས་གོས་གསེར་གྱི་ཧ་རིས་ཅན་དང་། ཐོད་པ་སྨུག་པོའི་ནང་དུ་ཚེ་གཅིག་གིས་འཚང་རྒྱ་བའི་ཆོས་དབང་བཞིའི་གདམས་པ་རྒྱུད་དང་བཅས་པ་སྦས་པས། འདི་རྣམས་ལྷ་ལྕམ་སྐྱེ་བ་འཕོས་ཏེ་བུམ་ཐང་དུ་སྐྱེས་པའི་དུས་སུ་ཐོན་ནས་འགྲོ་དོན་དཔག་ཏུ་མེད་པ་བྱས་ཏེ་སྐྱེ་བ་དེ་ལ་མངོན་པར་རྫོགས་པར་སངས་རྒྱས་ནས་ལོངས་སྐུའི་ཞིང་དུ་འགྲོ་དོན་བྱེད་ཅིང་སྐྱེ་བ་མི་ལེན་ནོ། །ཟངས་མདོག་དཔལ་རིར་རྒྱལ་པོ་ཉིད་དང་། མཚོ་རྒྱལ་དང་། ལྷ་ལྕམ་དང་། པདྨ་འོ་སྐོལ་ཞལ་མཇལ་གསུངས་སོ། །དེར་རྒྱལ་པོ་དགྱེས་ཏེ་ཕྱག་དང་སྐོར་བ་མང་པོ་མཛད་ནས་སློབ་དཔོན་ཆེན་པོ་ལགས། འཁོར་བའི་ཆོས་ལ་སྙིང་པོ་མི་གདའ་བས་ཚེ་འདིར་བདེ་ཞིང་ཕྱི་མར་སྐྱིད་ལ་ནམ་ཕུགས་སངས་རྒྱས་པའི་གདམས་ངག་ཅིག་ཞུ་འཚལ་ཞུས་པས། སློབ་དཔོན་གྱིས་རྒྱལ་པོ་ལ་ཡང་གསུངས་པ། ཨེ་མ་ཧོ། མངའ་བདག་རྒྱལ་པོ་ཆེན་པོ་ཡང་གསོན་ཅིག །འཇིག་རྟེན་ཆོས་ལ་སྙིང་པོ་མེད་པས་ན། །མུ་མཐར་འཁོར་ཞིང་ཡང་ཡང་སྡུག་བསྔལ་བས། །ཆོས་སྐུ་རྒྱལ་པོའི་གཏན་སྲིད་ཟིན་པར་མཛོད། །ཡུལ་གྱི་སྙིང་པོར་ཆོས་དབྱིངས་སྐྱེ་མེད་བཟང་། །གནས་ཀྱི་སྙིང་པོར་ནགས་ཁྲོད་དབེན་པ་བརྟེན། །དགོན་པའི་སྙིང་པོར་ཆོས་ཉིད་སྟོང་གསལ་ལྟོས། །ཁང་པའི་སྙིང་པོར་སེམས་ཉིད་གཉུག་མར་ཞོག །ཅེས་པ་ལ་སོགས་པའི་ཞལ་གདམས་སྙིང་པོར་དྲིལ་བ་མང་དུ་གསུངས་ཤིང་། སླར་ཡང་། ལྟ་བའི་སྙིང་པོར་སྟོང་གསལ་འགྱུར་མེད་ལྟོས། །བསྒོམ་པའི་སྙིང་པོར་སེམས་ཉིད་ཇི་བཞིན་ལྟོས། །སྤྱོད་པའི་སྙིང་པོར་གཉིས་འཛིན་འཁྲུལ་པ་གཞིག །འབྲས་བུའི་སྙིང་པོར་མ་བཙལ་ལྷུན་གྱིས་གྲུབ། །དེ་ལྟར་མཛད་ན་འདིར་བདེ་ཕྱི་མར་སྐྱིད། །མྱུར་དུ་རྫོགས་པའི་སངས་རྒྱས་ཐོབ་པར་འགྱུར། །ཞེས་གསུངས་པས། རྒྱལ་པོ་དགྱེས་ཏེ་ཕྱག་དང་སྐོར་བ་མང་དུ་མཛད་དོ། །དེ་ནས་ལྷ་ལྕམ་གྱི་ཟབ་བེར་གདམས་ངག་དང་བཅས་པ་བསེ་སྒྲོམ་བ་གམ་སྨུག་པོར་བཅུག་སྟེ་གཏེར་དུ་སྦས་ནས་ལྷ་ལྕམ་ཉིད་དང་འཕྲད་པའི་སྨོན་ལམ་བཏབ། སློབ་དཔོན་གྱིས་ལྷ་ལྕམ་གྱི་རོ་ཡི་སྙིང་གར་ཤེས་རབ་མཚལ་གྱིས་ནྲི་གཅིག་བྲིས་ཏེ་རྣམ་ཤེས་བཀུགས་པས་དབུགས་བྱུང་སྟེ་སྨྲ་ཤེས་པ་བྱུང་ངོ་། །དེ་ནས་མཁའ་འགྲོ་སྙིང་ཐིག་གི་དབང་བསྐུར་ཏེ་གསང་མཚན་པདྨ་ལས་འབྲེལ་དུ་བཏགས་ཤིང་། བུ་མོས་ཀྱང་དཔེ་སྒྲོམ་སྤྱི་བོར་བཟུང་ནས་མ་འོངས་པའི་དུས་སུ་ཆོས་འདི་དང་འཕྲད་དེ་སེམས་ཅན་ལ་ཕན་པར་ཤོག་ཅིག་ཅེས་སྨོན་ལམ་བཏབ་བོ། །དེ་ནས་སློབ་དཔོན་གྱིས་ལྷ་ལྕམ་ལ་ཚེ་སྔོན་གྱི་ལས་སད་པ་དང་ཡབ་སྲས་སློབ་དཔོན་དང་བཅས་ཏེ་འཕྲད་དོ། །ཞེས་གསུངས་ནས་སླར་རྣམ་ཤེས་དོན་པ་དང་བེམ་རོ་དེ་ཉིད་དུ་བསྲེགས་པའི་ཚུལ་བསྟན་ཅིང་མོའི་སྒྲིབ་པ་སྦྱང་ཕྱིར་སློབ་དཔོན་གྱིས་བསྣམས་ནས་སྐད་ཅིག་ལ་ཨོ་རྒྱན་དུ་གཤེགས་ནས་ཚོགས་ཀྱི་འཁོར་ལོ་མཛད་དོ། །ཡང་སྐད་ཅིག་ལ་ཕྱིར་བྱོན་ཏེ་གསུངས་པ། མཚོ་རྒྱལ་ཇི་ལྟར་བྱུང་བ་འདི་རྣམས་དཀར་ཆག་ལ་ཐོབ་ཅིག །ཟབ་གཏེར་གྱི་ཟླ་ལ་སྦས་ན་ཕྱིས་མོ་རང་དང་འཕྲད་དུས་ཡིད་ཆེས་པའི་དགོས་པ་ཡོད་དོ་གསུངས་པས་ཇོ་མོས་ཡི་གེར་བཏབ། སྙིང་ཐིག་གསང་བའི་གདམས་པ་འདི་རྣམས་སྤེལ་ལམ་སྦས་པར་བྱ་ཞུས་པས། སློབ་དཔོན་གྱི་ཞལ་ནས་འདི་རྣམས་ད་ལྟ་སྤེལ་བའི་དུས་ལ་མ་བབ་པས་གཏེར་དུ་སྦས་དགོས། ལྷ་ལྕམ་གྱིས་དཔེ་སྒྲོམ་སྤྱི་བོར་བཞག་ནས་སྨོན་ལམ་བཏབ་པས་མོ་ཡི་ཆོས་སྐལ་ཡིན་མོད། ད་སྟེ་ལོ་འགའ་ན་སློབ་དཔོན་ཆེན་པོ་བཱི་མ་ལ་མི་ཏྲ་འབྱོན་པས་ཁོང་གི་གདུལ་བྱ་དུས་ལ་བབ་ནས་སྙིང་ཐིག་གི་བསྟན་པ་རྒྱས་པར་འགྱུར་རོ། །བདག་གི་མཁའ་འགྲོ་སྙིང་ཐིག་གི་བསྟན་པ་འདི་སྙིང་ཐིག་སྔ་འགྱུར་འཆལ་ཏེ་ནུབ་ཏུ་ཉེ་བའི་དུས་སུ་བསྟན་པ་ནུབ་ཁར་གསལ་ཏེ་རྒྱས་ལ་དྲགས་པ་ཡུན་ཐུང་བ་མར་མེ་འཆི་ཁར་གསལ་བ་ལྟ་བུ་འབྱུང་ངོ་། །དེའི་ཕྱིར་སྦ་བར་བྱའོ་གསུངས་ནས་ཀུ་ས་ལའི་སྐོར་རྣམས་དྭགས་ལུང་ཕྲ་མོ་བྲག་བྱ་སྐྱིབས་ཅན་ལ་སྦས་ཤིང་། རྒྱུད་དང་མན་ངག་རྒྱ་ཆེ་བ་མཁས་པ་པཎྜི་ཏའི་སྐོར་རྣམས་བུམ་ཐང་སྨད་ཀྱི་བྲག་སེང་གེ་འདྲ་བ་ལ་སྦས་ནས་གཟའ་དང་མ་མོ་མཁའ་འགྲོ་མ་རྣམས་ལ་གཏད་ནས་མི་ལོ་ལྔ་བཅུ་ཁ་རལ་ན་སྐལ་ལྡན་ལས་ཅན་དེ་ལ་གཏོད་ཅིག་ཅེས་བཀའ་བསྒོས་སོ། །
[༥] གཏེར་སྟོན་པདྨ་ལས་འབྲེལ་རྩལ།
སྤྲུལ་སྐུ་རིན་ཆེན་ཚུལ་རྡོར་རམ་གསང་མཚན་པདྨ་ལས་འབྲེལ་རྩལ་ནི། པདྨའི་ཐང་ཡིག་ཆེན་མོ་ལས། དེ་ཉིད་མི་གནས་མྱ་ངན་འདས་འོག་ཏུ༔ ས་ནང་འཇིགས་བརྒྱད་ཤྭ་བའི་ར་ཅོ་འབྱུང༔ བསོད་ནམས་ཟད་པས་དབུས་སུ་མི་རྒོད་སྡིགས༔ དྭགས་པོ་ལྡང་ལྷ་བྲག་གི་གཏེར་ཁ་འདི༔ མི་བཞག་འདོན་པའི་རྟགས་དེ་བསྟན་ནས་བྱུང༔ མངའ་བདག་སྲས་མོ་རིན་ཆེན་ཚུར་རྡོར་འབྱུང༔ ཞེས་དང་། རང་གཏེར་སྙིང་ཐིག་གི་ལུང་བསྟན་གོང་དུ་རྒྱས་པར་དྲངས་པ་ལྟར་དང་། གཞན་ཡང་གཞི་ལམ་འབྲས་བུའི་མཇུག་གི་ལུང་བསྟན་ལས་ཀྱང་། ཀུ་ས་ལི་པའི་གདམས་པའི་སྐོར༔ དཔང་ལུང་ལྡང་ལྷའི་བྲག་ལ་སྦེད༔ ད་ལྟ་སྟོན་པའི་དུས་མ་བབས༔ ཚེ་ལོ་དྲུག་ཅུ་ཁ་རལ་དུས༔ གསལ་རྗེ་གངས་ཀྱི་ཤར་ཕྱོགས་ངོས༔ ལྕགས་སྒྲོམ་ལྟ་བུའི་ཡུལ་གྱི་སྟོད༔ འབྲོང་ཕོ་ཉལ་འདྲའི་དཔྱི་སྟེང་དུ༔ མཁའ་འགྲོ་སྡེ་ལྔས་བྱིན་བརླབས་པའི༔ ཆུ་ཁམས་འབྲུག་གམ་སྤྲེལ་ཡོས་ལོ༔ སྤྲོ་རིང་ཐེག་ཆེན་ཆོས་ལ་མོས༔ སྦས་ཚུལ་འཁོར་བའི་ཆ་ལུགས་འཛིན༔ མ་འགགས་སྣ་ཚོགས་སྤྱོད་པ་སྐྱོང༔ ད་ལྟ་ལྷ་ལྕམ་པདྨ་གསལ༔ སྙིགས་མའི་དུས་སུ་དེ་ལྟར་སྐྱེ༔ དེ་དུས་གདམས་པ་འདི་དང་ཕྲད༔ ཅེས་པའི་གཏེར་ལུང་དང་མཐུན་པར། གསལ་རྗེ་གངས་ཀྱི་ནུབ་ཕྱོགས་རྡོ་བོད་མཚམས་ཏེ་གཉན་རོང་འབྲི་ཐང་ཀོ་རོ་བྲག་གི་འདབས་ཞོལ་དུ། ཉང་གི་གདུང་རིགས་སྔགས་བཙུན་ཕོ་མོ་གཉིས་ཀྱི་སྲས་སུ་རབ་བྱུང་བཞི་པའི་ས་སྤྲེལ་ཏེ་སྤྱི་ལོ་༡༢༤༨ལོར་སྐུ་བལྟམས། ལོ་རོ་གློར་ཚང་གི་གྲྭ་པ་མཛད་པས་མཚན་ཚུལ་ཁྲིམས་རྡོ་རྗེར་བཏགས། ཕ་མ་གཉིས་འཁོས་ཞན་པའི་སྟབས་ཀྱིས་ཤིན་ཏུ་དབུལ་ཞིང་ཉམ་ཐག་པ་ཞིག་བྱུང་བ་དང་། ཉེ་བ་ཐམས་ཅད་ཀྱིས་ཀྱང་སྙིང་དུ་མི་སྡུག་པར་གྱུར། ཉིན་གཅིག་འབྲི་ཐང་ཀོ་རོ་ནས་གཅིག་པུར་ཕྱིན་པས་དགེ་སློང་རྒན་པོ་གཅིག་དང་འཕྲད་ཅིང་། དགེ་བཤེས་ཁྱེད་གར་འགྲོ་བ་ཡིན་ཞེས་དྲིས་པས་གར་ཡང་མི་འགྲོ་ཁྱེད་ཀྱི་རྩར་ཡོང་བ་ཡིན་ཞེས་ཨམ་ཕྲག་ནས་ཤོག་དྲིལ་གཅིག་བཏོན། བུ་ཁྱོད་ཀྱིས་ཤོག་དྲིལ་འདི་ལ་ལེགས་པར་ལྟོས་ལ་ཚིག་གི་དོན་མ་ནོར་བར་གྱིས་ལ་ལོངས་ཤིག །དངོས་གྲུབ་ཀྱི་སྐལ་པ་ཡོད་དོ་གསུངས་ནས་ཤོག་དྲིལ་གཏད། ཡུད་ཙམ་ཡེངས་པའི་བར་ལ་དགེ་སློང་གར་སོང་མ་རྙེད་ཅིང་རྩད་མ་ཆོད་པ་བྱུང་ངོ་། །དེ་ནས་རང་ཁྱིམ་དུ་ལོག་ནས་ཤོག་དྲིལ་ལ་བལྟས་པས། ལོ་གཅིག་ཆུ་མོ་གླང་ལོ་ལ་ཁྱོད་ཀྱི་ནོར་སྐལ་ལེན་པའི་དུས་ལ་སླེབས་པས་སྟོན་ཟླ་ར་བའི་ཚེས་བཅུར་སོང་ལ། དྭགས་པོའི་དྭངས་ལུང་ཁྲ་མོ་བྲག་ལོགས་ལ་གཏེར་མཚན་མཚལ་གྱི་གཡུང་དྲུང་རིས་ཤིག་ཡོད། དེ་ནས་བཙལ་བའི་བྱང་ཤར་ན། རྡོ་ཆོལ་བྲེ་ཙམ་གཅིག་ཡོད། དེ་བཀོག་པའི་ནང་ནས་ཟབ་གཏེར་རྣམས་ཐོན་ཅིག ཅེས་པའི་ཁ་བྱང་གསལ་བ་དང་། བཤད་ཚུལ་གཞན་ཞིག་ཏུ། དགུང་ལོ་ཉེར་གཅིག་བཞེས་པའི་སྐབས་སུ་བླ་མའི་གསུང་གིས་ལྷོ་ཕྱོགས་ལ་འགྲོ་དོན་འབྱུང་བས་ཕེབས་ཤིག་ཅེས་བསྐུལ་བ་ལྟར་ཕེབས་པས་ལོ་རོ་གྲོང་ནས་ཕེབས་པས་སྤྲུལ་སྐུ་རིན་ཆེན་གླིང་པ་དང་མཇལ། འབྲི་ཐང་ཀོ་རོ་བྲག་ནས་གདན་དྲངས་པའི་གཏེར་ཀྱི་ནང་ནས་ཁྲ་མོ་བྲག་གི་ཁ་བྱང་དང་། གཏེར་སྟོན་གྱི་ལུང་བསྟན་དང་བཅས་པའི་ཤོག་སེར་གཉིས་ཕུལ་ནས་གཏེར་འདི་རྣམས་འདོན་པའི་ལུང་བསྟན་པ་ཁྱོད་ལ་བབ་འདུག་པས། ཁྱེད་ཀྱིས་གཏེར་རྣམས་ལེགས་པར་ཐོན་ལ་ངེད་ཀྱང་ཐུགས་ལ་འདོགས་པར་ཞུ་ཟེར་བ་དང་། ཡང་ཁ་ཅིག་ཏུ། དགུང་ལོ་བཅུ་དྲུག་ལ་ཁ་བྱང་ལུང་བསྟན་བཅས་ཕྱག་ཏུ་བྱུང་ཟེར། གང་ལྟར་ཡང་དགུང་ལོ་ཉེར་གསུམ་བཞེས་པ་ཆུ་མོ་གླང་གི་ལོ་ལ་དྭགས་ལུང་དུ་བྱོན་ཞིང་ཁྲ་མོ་བྲག་གི་ཕུག་པར་ཞག་གསུམ་ལ་བཞུགས་ནས། ཟབ་ཆོས་མཁའ་འགྲོ་སྙིང་ཐིག་བླུན་སྒོམ་ཡིད་བྱེད་ཕྲལ་ནས་སངས་རྒྱས་ཀྱི་དགོངས་པ་མངོན་སུམ་རང་ཐོག་ཏུ་གཏན་ལ་འབེབས་པ་ལྷ་ལྕམ་པདྨ་གསལ་གྱི་ཆོས་སྐལ་དུ་སྦས་པའི་གདམས་པ་ཟབ་མོ་སྤྱན་དྲངས་ཤིང་། གཞན་ཡང་། ཕྱག་ན་རྡོ་རྗེ་དྲེགས་པ་ཀུན་འདུལ། རྟ་མགྲིན་གཉེན་པོ་ལྷ་གསུམ། ཞིང་སྐྱོང་། གཟའ། གནོད་སྦྱིན་སྤུ་གྲི་དམར་ནག་སོགས་དང་། ཆུ་ཀླུང་འཁྲུགས་བྱེད། གཏད་རྒྱུད་གསལ་སྒྲོན་སྐོར་སོགས་ཆོས་དང་ངན་སྔགས་མང་པོ་གདན་དྲངས། དེ་ནས་ཚུར་ལོག་ནས་གཉལ་གྱི་སྟོད་དུ་སླེབས། ཤོ་ཡི་ཚེར་མ་ལུང་དུ་སྔགས་པ་ཞིག་གི་ཁྱིམ་དུ་བསྡད་པས། སྔགས་པ་བཟའ་ཚང་གཉིས་ཀྱིས་ལྟོ་ཆང་གང་ལེགས་བྱིན། དེ་ནུབ་གླེང་མོལ་མང་པོ་བྱས་པས། སྔགས་པ་ན་རེ། ཁྱེད་ཁར་སང་གང་ནས་ཡོང་། དོན་ཅི་ལ་ཕྱིན་པ་ཡིན་ཞེས་དྲིས་པ་དང་། པདྨ་ལས་འབྲེལ་རྩལ་གྱིས། ངེད་ལ་སྔར་ལུང་བསྟན་ཞིག་བྱུང་བ་ལ་བརྟེན་ནས་དྭགས་པོར་ཕྱིན་གསུངས་པ་དང་། སྔགས་པ་ན་རེ། འོ་ན་ཟབ་གཏེར་རྙེད་དམ་ཟེར། རྙེད་གསུངས་པས། གང་གང་ཡོད་ཟེར། མཁའ་འགྲོ་སྙིང་ཐིག་དང་། གཉེན་པོ་ལྷ་གསུམ་གྱི་མན་ངག གཟའ་བདུད་ཀྱི་སྒྲུབ་སྐོར་རྒྱུད་དང་བཅས་པ་ཡོད་གསུངས་པས། འོ་ན་ངེད་ལ་དཔེ་སྒྲོམ་གྱིས་དབང་བྱེད་དགོས་ཟེར་བས། དཔེ་སྒྲོམ་བཏེགས་ནས་སྔགས་པ་ཡབ་ཡུམ་སྲས་དང་བཅས་པ་ལ་བྱིན་བརླབས་བྱས་སོ། །དེའི་ནངས་པར་རང་ཡུལ་དུ་ཕེབས་པར་ཆས་ཚེ་སྔགས་པའི་བུ་རྒྱལ་སྲས་ལེགས་པ་རྒྱལ་མཚན་ཤིན་ཏུ་དད་དེ་ཕྱག་ཕྱིར་བྱོན་པར་ཞུས་པས། གནང་ཞིང་རྗེས་སུ་བཟུང་ནས་གསང་བ་སྙིང་ཐིག་གི་ཆོས་བཀའ་ཐམས་ཅད་གནང་། རང་ཡུལ་འབྲི་ཐང་དུ་སླེབས་པས་དེ་གའི་མི་ཀུན་ན་རེ། ལས་འབྲེལ་རྩལ་སྔགས་རྒྱུད་ཀྱི་བྱ་བ་གང་ཡང་མ་ནུས་པར་ཟག་ཟོག་གི་ལས་ཤིག་བྱེད་འདོད་པ་ཡིན། གཏེར་དང་ཅིའི་གཏེར་ཡོད་ཅེས་མི་མང་གི་གླེང་མོལ་བྱས་པས་ཐུགས་སུན་ནས་རྒྱལ་ཁམས་ཕྱོགས་མེད་ལ་བྱོན་པའི་དགོངས་པ་མཛད་དེ། ལེགས་པ་རྒྱལ་མཚན། ནམ་མཁའ་དབང་ཕྱུག རིན་རྡོར། དཔལ་སེང་བཅས་སྐུ་འཁོར་ལྔ་དབུས་སུ་ཕེབས་ཤིང་ཐོག་མར་ཡར་ཀླུངས་སུ་སླེབས། ཤེལ་བྲག་ལ་ཞག་གསུམ་གྱི་གནས་འབྲེལ་མཛད། དེ་ནས་བསམ་ཡས་སུ་བྱོན། གཙུག་ལག་ཁང་རྣམས་མཇལ། ཡང་མཆིམས་ཕུར་བྱོན་ཏེ་དགེ་གོང་གི་མཆོད་ཁང་དུ་ཞག་བདུན་གནས་འབྲེལ་མཛད་པའི་ཞག་ལྔ་པའི་ནུབ་མོར་རྡོ་རྗེ་ཕག་མོ་ཡིན་ཟེར་བའི་བུད་མེད་དམར་མོ་ཞིག་བྱུང་ནས། པདྨ་ལས་འབྲེལ་རྩལ་འདིར་མ་སྡོད་ཅིག ལས་ལྡན་གྱི་སློབ་བུ་ཞིག་དང་འཕྲད་པ་ཡོད་པས་ལྷ་སར་སོང་ཞིག་ཅེས་ལུང་བསྟན་པ་ལྟར་དཔོན་སློབ་ལྔ་ལྷ་སར་བྱོན། ཞག་ལྔའི་བར་དུ་སྐོར་བ་བྱེད་ཅིང་སྡོད་པའི་དུས་རྗེ་ཀརྨ་པ་རང་བྱུང་རྡོ་རྗེ་ལྷ་ས་སྐུ་འབུམ་ཐང་དུ་སྒར་བརྒྱབ་ཡོད་པས། རང་བྱུང་རྡོ་རྗེའི་ཞལ་ནས། ལྷོ་རོང་གི་གཏེར་སྟོན་དཔོན་སློབ་རྣམས་ངེད་ཀྱི་རྩར་ཤོག་གསུངས་པའི་བཀའ་གནང་བྱུང་བ་དང་། དཔོན་སློབ་ལྔས་བྲམ་ཟེའི་ཤ་རིལ་གཅིག་དང་། དར་ཁ་གང་། གླ་རྩི་བུབས་གཅིག་ཁྱེར་ནས་ཕྱག་འཚལ་ཏེ་ཕུལ་བས། ཀརྨ་པའི་ཞལ་ནས་རྗེ་དཔོན་སློབ་ལྔ་ལ་གཏེར་ནས་བཏོན་པའི་གཏེར་ཆོས་རྣམས་ཡོད་དམ་ཡོད་ན་ངེད་ལ་སྟོན་དགོས་གསུངས་པས། གཏེར་སྟོན་གྱི་ཞལ་ནས། ངེད་དཔོན་སློབ་སྐོར་བ་ལ་ཕྱིན་ནས་ཞག་ལྔ་སོང་གཏེར་ཆོས་ཀྱི་དཔེ་ཆ་རྣམས་བུ་དཔེ་ལ་ཕབ་ལོང་མ་བྱུང་བས་ཤོག་སེར་གདན་དྲངས་ནས་ཡོད་ཞུས་པ་དང་། ཤོག་སེར་རྣམས་གདན་དྲངས་པ་ནི་ལེགས་ངེད་ལ་སྟོན་ཅིག་གསུངས་པ་དང་། ཤོག་སེར་རྣམས་གཟིགས་འབུལ་བྱས་ཤིང་། རྗེ་ཉིད་ཀྱིས་ཞིབ་གཟིགས་མཛད་དེ་དབུ་ཐོག་ཏུ་བཞག་ནས་ཚུར་གནང་། དེ་ནས་དཔོན་སློབ་ལྔ་སླར་ལོག་སྟེ་རྡོ་རིང་གི་རྩར་ཞག་བཞུགས་མཛད། དེ་ནུབ་རྗེ་རང་བྱུང་རྡོ་རྗེའི་རྨི་ལམ་དུ་བུད་མེད་དམར་མོ་རུས་པའི་རྒྱན་ཆ་གྱོན་པ་ཞིག་བྱུང་ནས། ཨོ་རྒྱན་ཐུགས་སྲས་པདྨ་ལས་འབྲེལ་རྩལ་ལས་གསང་སྔགས་ཀྱི་ཆོས་བཀའ་ཟབ་མོ་རྣམས་ཞུས་ལ་དབུ་སྐྲ་ཡང་ཕུལ་ཅིག དེ་ལྟར་བྱས་ན་ཕྱི་གཞུག་བསྟན་པ་དར་བར་འགྱུར་རོ་ཞེས་མནལ་ལམ་ལ་བྱུང་བ་དང་། ནངས་པར་བང་ཆེན་པ་བཏང་ནས་སྐུ་མདུན་དུ་ཤོག་གསུངས་པ་ལྟར་ཕེབས་པས། རྗེའི་ཞལ་ནས། ཁར་སང་གི་ཤོག་སེར་རྣམས་ཀྱི་བཀའ་ལུང་བྱེད་དགོས་པར་འདུག་གསུངས། པདྨ་ལས་འབྲེལ་རྩལ་གྱིས་ཁྱེད་སྐུ་ཆེ་བའི་དྲུང་དུ་འབུལ་མི་སྤོབས་ཞུས་པས། ཅིས་ཀྱང་བྱེད་དགོས་གསུངས་པའི་བཀའ་ནན་བྱུང་བ་ལྡོག་མ་ཕོད་པར་མཁའ་འགྲོ་སྙིང་ཐིག་གི་ཤོག་སེར་རྣམས་ཀྱི་སྟེང་ནས་བཀའ་ལུང་རྫོགས་པར་ཕུལ། རྗེའི་ཞལ་ནས་ངེད་ཀྱི་དབུ་སྐྲ་ཡང་བསིལ་ཕྱག་ཀྱང་རྩེ་སྤྲོད་དུ་བྱའོ་གསུངས་པ་བཞིན་མཛད་པ་བཅས། རྗེ་རང་བྱུང་རྡོ་རྗེས་བླ་མར་བཀུར་ཏེ་གདམས་པ་གསན་པའི་རྒྱུན་ལས་ཕྱིས་སུ་ཀརྨ་སྙིང་ཐིག་གི་བརྒྱུད་པ་ཞེས་གྲགས་པ་དེ་བྱུང་ངོོ་། །དེ་ནས་ལོག་སྟེ་འབྲི་ཐང་ཀོ་རོ་བྲག་ཏུ་ཟླ་བ་བདུན་ལ་སྒྲུབ་པ་མཛད་པས་གུ་རུ་ཡབ་ཡུམ་དངོས་སུ་མཇལ་ཏེ་དགོངས་བརྒྱུད་རྟོགས་པས་བྱིན་གྱིས་བརླབས། སྐབས་དེར་རྒྱལ་སྲས་ལེགས་པ་རྒྱལ་མཚན་ལ་བཀའ་ལུང་ཐམས་ཅད་ཡོངས་སུ་རྫོགས་པར་གནང་། ཡང་མཆོད་རྟེན་བྲག་མདུན་དུ་སྒྲུབ་པ་ལ་ཟླ་བ་གསུམ་བཞུགས་ཤིང་དེ་དུས་ལེགས་པ་རྒྱལ་མཚན་ཤོད་ན་བཞུགས། ཆོས་རྒྱལ་རིན་ཆེན་གླིང་པ་གཏེར་སྟོན་མཇལ་དུ་བྱོན་ཡང་སྐུ་མཚམས་ལ་བཞུགས་ཟིན་པས་མ་མཇལ་བས་ལེགས་པ་རྒྱལ་མཚན་མདུན་དུ་བྱོན་ནས། ཁྱེད་ཀྱིས་བཀའ་ལུང་གང་ཐོབ་ཐམས་ཅད་ང་ལ་བྱེད་དགོས་ཞུས་པས། རྒྱལ་སྲས་ལེགས་པས་རིན་ཆེན་གླིང་པ་ལ་མཁའ་འགྲོ་སྙིང་ཐིག་གི་བཀའ་ལུང་རྣམས་རྫོགས་པར་བྱས། དེ་ནས་སྤྲུལ་སྐུ་ལས་འབྲེལ་རྩལ་སྐུ་མཚམས་ལས་གྲོལ་ཏེ་གཉལ་སྨད་དུ་བྱོན་པ་ཐོས་པས། ལེགས་པ་རྒྱལ་མཚན་དང་རིན་ཆེན་གླིང་པ་རྣམ་གཉིས་མཇལ་དུ་བྱོན་པས་གཉལ་སྨད་སེ་ཆེན་འབུམ་པའི་དྲུང་དུ་མཇལ་འཕྲད་བྱུང་། དཔོན་སློབ་རྣམས་རིམ་གྱིས་འབྲི་ཐང་དུ་བྱོན་ནས་ཆོས་གླིང་དགོན་པར་བཞུགས། གཏེར་ཆེན་རིན་པོ་ཆེས་རིན་ཆེན་གླིང་པ་ལ་རྒྱ་ནག་ལ་ཁའི་ཕ་ཝང་རུས་སྦལ་ནག་པོའི་གཏེར་གྱི་ལྡེའུ་མིག་གཏད་ཏེ། བུ་ཁྱོད་ཀྱིས་ལྡེའུ་མིག་འདི་ཁྱེར་ཏེ་ཕ་ཝང་རུས་སྦལ་ནག་པོའི་གཏེར་རྣམས་ཐོན་ལ་སེམས་ཅན་གྱི་དོན་གྱིས་ཤིག་ཅེས་གསུངས་སོ། །དེ་ལྟར་བསྟན་འགྲོའི་དོན་མཛད་བཞིན་པའི་དགུང་ལོ་ཉེར་ལྔ་པ་ལ་གུ་རུའི་ལུང་བསྟན་གྱི་གཟུངས་མ་དང་མ་འཕྲད་པར་བདུད་མོ་ཞིག་གིས་བར་ཆད་བརྩམས་པ་སོགས་རྟེན་འབྲེལ་གཞན་དབང་གི་རྐྱེན་གྱིས་ཟབ་གཏེར་རྣམས་རྒྱལ་སྲས་ལེགས་པ་ལ་གཏད་ནས། ད་སྟེ་ལོ་ལྔ་ནས་ང་རང་དབུས་ཀྱི་གྲྭ་ཕུ་རུ། ཕ་བསྟན་པ་དང་མ་བསོད་ནམས་སྐྱིད་ཀྱི་བུར་སྐྱེས་ཏེ་ཁྱེད་དང་འཕྲད་པར་བྱའོ་ཞེས་ཞལ་ཆེམས་གནང་ནས་བྱར་སྨད་ཕྱིང་དཀར་ཞེས་པའི་ས་ཆར་སྐུ་གཤེགས། སྐུ་གདུང་སྦྱངས་པས་བུད་མེད་སྔོན་མོ་རུས་པའི་རྒྱན་ཅན་ཁྲུ་གང་པ་ཞིག་དབུ་གཙུག་ནས་ཐོན་ཏེ་ནམ་མཁའ་ལ་སོང་བ་ཀུན་ཀྱིས་མངོན་སུམ་དུ་མཐོང་བ་བྱུང་ཞིང་། གདུང་རུས་ལ་རྡོ་རྗེ་ཕག་མོའི་སྐུ་ཚོན་གང་བ་ཞིག་དང་། རིང་སྲེལ་མང་པོ་བྱོན། ཞག་བདུན་གྱི་བར་དུ་ལུང་པ་འཇའ་འོད་ཀྱིས་ཁེངས་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་སྟེ་འགྲོ་བ་རྣམས་དད་པའི་ས་ལ་བཀོད་པར་མཛད་དོ། །
[༦] ཤྭ་བན་རྒྱལ་སྲས་ལེགས་ལྡན།
དེ་ལས་ཤྭ་བན་རྒྱལ་སྲས་ལེགས་ལྡན་པས་བཀའ་ལུང་མན་ངག་རྫོགས་པར་ཞུས་པ་སྟེ། དེ་ཡང་བླ་མ་དམ་པ་སྤྲུལ་སྐུ་ལེགས་ལྡན་འཁྲུངས་ཡུལ་ནི། དམྱལ་སྨད་ཆོས་གྲོ་སེ་བ་ལུང་ཞེས་བྱ་བའི་གནས་སུ། སྔགས་རྒྱུད་ཁྱད་པར་ཅན་གྱི་རིགས་སུ་ཡབ་སློབ་དཔོན་དབང་ཕྱུག་རྒྱལ་དང་། ཡུམ་གྲུ་མོ་རྡོ་རྗེ་དགོས་གཉིས་ཀྱི་སྲས་སུ་རབ་བྱུང་ལྔ་པའི་ལྕགས་སྟག་ལོ་སྟེ་སྤྱི་ལོ་༡༢༩༠ལོར་སྐུ་འཁྲུངས། ཆུང་ངུའི་དུས་ནས་སྔོན་གྱི་སྐྱེ་བ་མང་པོ་དྲན་པ་དང་ཡི་གེ་འབྲི་ཀློག་བསླབ་མ་དགོས་པར་མཁྱེན་པ་སོགས་ཐུགས་རབ་ཆེན་པོ་མངའ། གྲུབ་ཐོབ་ཨོ་རྒྱན་པ་དང་རྟོགས་ལྡན་མགོན་པོ་ཡེ་ཤེས་ཀྱིས་ཀྱང་སེམས་ཅན་ལ་ཕན་ཐོགས་པའི་སྐྱེས་བུ་ཞིག་འོང་བར་ལུང་བསྟན་གནང་། དགུང་ལོ་བརྒྱད་ལོན་དུས་ཡེ་ཤེས་ཀྱི་མཁའ་འགྲོ་མས་དངོས་སུ་ལུང་བསྟན་ཅིང་ཡབ་མེས་ཀྱི་ཟབ་ཆོས་རྣམས་ཀྱི་བདག་པོར་བྱིན་གྱིས་བརླབས། ཡབ་ལས་རིག་པ་བཀླག་པ་སྒྲའི་བསྟན་བཅོས། རྣམ་གཞག་ཞིབ་མོ་གངྒའི་ཆུ་རྒྱུན། སྐྱེ་བོ་གསོ་བའི་ཐིག་པ་རྩ་འགྲེལ་བཅས་པ་དང་། རྟ་མགྲིན་དང་ཐུགས་རྗེ་ཆེན་པོ་དང་། སྒྲོལ་མའི་རྒྱུད་སྒྲུབ་ཐབས་དང་བཅས་པ། མ་མགོན་གྱི་རྒྱུད་མན་ངག་དང་བཅས་པ་རྣམས་གསན་ནས་མཁྱེན་པར་མཛད་ཅིང་། བླ་མ་ཐམས་ཅད་མཁྱེན་པ་ཞེས་བྱ་བ་ལས་ཞི་བྱེད་བརྒྱུད་པ་ཕྱི་མའི་དབང་དང་གདམས་པ་རྣམས་གསན། ཁུ་བོ་བླ་མ་རྒྱལ་སྲས་བརྩོན་དབང་པའི་དྲུང་དུ་སློབ་གཉེར་ལ་བྱོན་དུས་བླ་མའི་ཞལ་ནས། རྨི་ལྟས་ཤིན་ཏུ་བཟང་པོ་བྱུང་བས་སེམས་ཅན་ལ་ཕན་ལེགས་པར་ཐོགས་པ་ཞིག་འོང་བར་འདུག ཁྱེད་ཀྱི་མིང་ལ་རྒྱལ་སྲས་ལེགས་ལྡན་ཐོགས་ཤིག་གསུངས་སོ། །དེའི་ཚེ་དཔལ་གསང་བ་སྙིང་པོའི་རྒྱུད་དང་བརྟག་གཉིས་གསན་ནས་བཤད་པ་མཛད། གཞན་ཡང་འཇམ་དཔལ་ཁ་ཐུན་གྱི་རྒྱུད་དང་། འཇམ་དཔལ་ཚེ་བདག་ཁྲོ་བོ་འདུས་པའི་སྐོར། བདེ་མཆོག་མན་ངག་དང་བཅས་པ། ཁྲོ་ཕུ་ལོ་ཙཱ་ནས་བརྒྱུད་པའི་ཆོས་སྐོར་རྣམས་དང་། འཇིག་རྟེན་མགོན་པོ་ཆོས་རྗེ་འབྲི་གུང་པའི་ཆོས་སྐོར་ལ་སོགས་པ་གདམས་པ་མང་དུ་ཞུས་སོ། །སློབ་དཔོན་སངས་རྒྱས་དཔོན་གཞོན་ལས་རོ་སྙོམས་སྐོར་དྲུག་ལ་སོགས་པ་འབྲུག་པའི་ཆོས་སྐོར་རྣམས་གསན། བླ་མ་ཆོས་རྒྱལ་ལས་ཕར་ཕྱིན་ཤེས་རབ་སྒྲོན་མེ་དང་། དཔལ་གསང་བ་འདུས་པ། དགྱེས་རྡོར་རྔོག་ལུགས། སངས་རྒྱས་ཐོད་པ། ཕག་མོ་དཔྱལ་གྱི་ཆོས་དྲུག་ལ་སོགས་པ་ཞུས་སོ། །བོན་སྒོམ་སྣང་བ་རྒྱ་ཡན་ལས་དོ་ཧ་སྐོར་གསུམ་འགྲེལ་པ་བལ་ལུགས་དང་བཅས་པ་ཞུས་ཤིང་། སློབ་དཔོན་གླན་ལས་མངའ་བདག་ཉང་རལ་གྱི་གཏེར་ཁ་བདེ་གཤེགས་འདུས་པའི་བཀའ་ལུང་དང་། རྟ་མགྲིན་གྱི་རྒྱུད་ལྔ་སྒྲུབ་ཐབས་དང་བཅས་པ་དང་། ཐུགས་རྗེ་ཆེན་པོ་འགྲོ་འདུལ་གྱི་ཆོས་སྐོར། མཁའ་འགྲོ་ཡིད་བཞིན་ནོར་བུའི་སྒྲུབ་སྐོར་ལ་སོགས་པ་ཞུས་སོ། །གུ་རུའི་བརྒྱུད་འཛིན་ཉི་མ་འོད་ཟེར་ལས། བླ་མ་གསང་འདུས་སངས་རྒྱས་མཉམ་སྦྱོར། ཐུགས་རྗེ་ཆེན་པོ་ཡང་སྙིང་འདུས་པ་ལ་སོགས་པ་ཞུས་ཤིང་། རི་ཁྲོད་རས་པ་ལས་གཟེར་ལྔ་དང་ལམ་མཆོག་མཐར་ཐུག་ལ་སོགས་པ་ཞང་འཚལ་བའི་གདམས་སྐོར་རྣམས་གསན། ཞིག་པོ་འཇིགས་མེད་སྦས་པ་ལས་བཱི་མ་ལའི་སྙིང་ཏིག་གི་དབང་ཁྲིད་ཟབ་པ་པོད་བཞི། རྒྱུད་བཅུ་བདུན་དང་བཅས་པ་ཞུས་ཤིང་། རྣལ་འབྱོར་པ་ཨཱ་ཧཱུྃ་རྡོ་རྗེ་ལས་སྒྲགས་ཡང་རྫོང་མའི་གཏེར་ཁའི་ཆོས་སྐོར་རྣམས་གསན། འཇམ་དབྱངས་ཤེས་རབ་རིན་ཆེན་ལས་ལྔ་བསྡུས་ཀྱི་རྩིས་དང་། གསོ་བ་སྨན་དཔྱད་ཀྱི་སྐོར་ཕན་བྱེད་ལས་ཚོགས་མང་དུ་ཞུས་ཏེ་མཁྱེན་པར་མཛད་དོ། །ཁྱད་པར་དུ་ཚེ་རབས་ལས་ཀྱི་བླ་མ་གཏེར་སྟོན་པདྨ་ལས་འབྲེལ་རྩལ་དང་མཇལ་ཞིང་། བླ་མ་གང་དུ་ཕེབས་པའི་ཕྱག་ཕྱིར་འབྲངས། ཟབ་མོ་མཁའ་འགྲོ་སྙིང་ཏིག་གི་དབང་ཁྲིད་རྒྱུད་ལུང་མན་ངག་རྫོགས་པར་ཞུས་ཏེ་གདམས་ངག་གི་ཞུན་ཐར་བཅད། གཏེར་སྟོན་སྐུ་གཤེགས་ཁར། ཟབ་གཏེར་འདི་ཉིད་སྒྲུབ་པ་ཟབ་མོས་ཚུལ་བཞིན་ཉམས་སུ་ལོངས། ལུང་ཟིན་ཆོས་ཀྱི་བདག་པོ་ཁྱེད་རང་ཡིན་གསུངས་ནས་ཤོག་སེར་ཀྱང་གནང་སྟེ། གཏེར་དཔེ་རྣམས་ཆུད་མ་ཟོས་པར་གྱིས་དང་། ད་སྟེ་ལོ་ལྔ་ནས་ང་རང་དབུས་ཀྱི་གྲྭ་ཕུ་རུ། ཕ་བསྟན་པ་དང་མ་བསོད་ནམས་སྐྱིད་ཀྱི་བུར་སྐྱེས་ཏེ། དེ་དུས་ཁྱེད་དང་འཕྲད་པར་བྱའོ་ཞེས་ཞལ་ཆེམས་གནངས་པ་བཞིན་སྒྲུབ་པ་ཉམས་ལེན་ལ་ལོ་བཅུ་གཉིས་སུ་གཞོལ་བས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཐུགས་ལ་འཁྲུངས། ལྟ་སྒོམ་གྱི་གདེང་ཚད་མངོན་དུ་གྱུར། ཟངས་མདོག་དཔལ་རིར་གུ་རུ་པདྨའི་ཞལ་མཇལ་བ་དང་། གནུབས་ནམ་མཁའི་སྙིང་པོས་སེང་ལྡེང་གི་རྔ་གཏད་ནས་ལས་ཅན་གྱི་སློབ་མར་ལུང་བསྟན་པ་སོགས་མཚན་ལྟས་བཟང་པོ་མང་དུ་བྱུང་ཞིང་བཞུགས་པ་ལས། ཆོས་རྗེ་ཀརྨ་པ་རང་བྱུང་རྡོ་རྗེས་ཀོང་པོར་གདན་དྲངས་ཏེ་ཟབ་གཏེར་མཁའ་འགྲོ་སྙིང་ཏིག་གི་ཁྲིད་གདམས་པ་དང་བཅས་པ་རྫོགས་པར་གསན། དགྱེས་ཚོར་ཆེན་པོ་མཛད་ཅིང་ཆོས་བཀའ་བགྲོལ་ནས་རྒྱ་ཆེར་སྤེལ་བར་མཛད་པ་ལས་ཀརྨ་སྙིང་ཐིག་ཅེས་གྲགས་པའི་བརྒྱུད་སྲོལ་བྱུང་། དེའི་ཚེ་ཆོས་རྗེ་ཀརྨ་པ་ལས་ཀྱང་། དུས་འཁོར་གྱི་རྒྱུད་འགྲེལ་དྲི་མེད་འོད་དང་། མདོ་སྡེ་སྐྱེ་རབས་ཀྱི་ལུང་། སྦྱོར་དྲུག་ཆོས་དྲུག ཡང་དགོན་པའི་རི་ཆོས་སྐོར་གསུམ་སོགས་གདམས་པ་མང་དུ་གསན། དེ་ལྟར་ངོ་མཚར་མཆོག་གིས་བརྒྱན་པའི་དམ་པ་དེ་ཉིད་ཨོ་རྒྱན་ཆེན་པོས་ཟབ་གཏེར་འདི་ཉིད་ཚུལ་དང་མཐུན་པར་སྤེལ་བའི་ལས་ཅན་གྱི་སློབ་མར་ལུང་བསྟན་ཞིང་། ཞི་རྒྱས་དབང་དྲག་གི་ནུས་པ་ཆེན་པོ་མངའ་བ་དང་། གཏེར་ཡིག་ནས་ལུང་བསྟན་པ་ལྟར་སྐུ་ཚེ་མཐར་ཕྱིན་ཞིང་གདུལ་བྱ་ལས་ཅན་རྣམས་སྨིན་གྲོལ་ལ་བཀོད་དེ། དགུང་ལོ་བདུན་ཅུ་རྩ་དྲུག་པ་སྦྲུལ་ལོ་རྒྱལ་ཟླ་བའི་ཚེས་བཅུ་ལ་སྐུ་གཤེགས་པའི་ཚུལ་བསྟན། སྐུ་གདུང་ལ་ལྷ་སྐུ་རིང་བསྲེལ་སོགས་མང་དུ་བྱོན་པ་དང་ལུང་པ་འཇའ་ཡིས་ཁེངས་པ་སོགས་ངོ་མཚར་བའི་ལྟས་དཔག་ཏུ་མེད་པ་དང་བཅས་སྐལ་ལྡན་རྣམས་དད་པའི་ས་ལ་བཀོད་དོ། །