གསང་སྒྲུབ་ལྗང་ཁུའི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་རྒྱལ་པོ་ངལ་གསོས་པོ། །དེ་ལ་བཏུད་དེ་ཕྱག་འཚལ་ནས། །ནོར་སྒྲུབ་ཤིན་ཏུ་རྨད་བྱུང་བ། །གསང་སྒྲུབ་ལྗང་ཁུའི་སྒྲུབ་ཐབས་བཤད། །འདིའི་ཆོ་ག་སྤྱི་རྣམས་སེར་ཆེན་གཞིར་བཞག་པ་ལ་མདུན་བསྐྱེད་བསངས་སྦྱངས། སྟོང་པའི་ངང་ལས། ཏྲི་ལས་རིན་པོ་ཆེའི་ཁྲིའི་སྟེང་དུ་པདྨ་དང་ཟླ་བའི་གདན་ལ། བཻ་ཡིག་ལྗང་ཁུ་ལས་འོད་འཕྲོས་འདུས་ཡོངས་སུ་གྱུར་པ་ལས། རྒྱལ་པོ་ཆེན་པོ་རྣམ་ཐོས་སྲས་སྐུ་མདོག་ལྗང་ཁུ་ཞལ་གཅིག་ཕྱག་གཉིས་གཡས་ཡིད་བཞིན་གྱི་ནོར་བུས་མཚན་པའི་བེ་ཅོན་ཐུགས་ཀར་འཛིན་པ། གཡོན་པས་དངོས་གྲུབ་སྟེར་བའི་ནེའུ་ལེ་བརླ་གཡོན་པ་ལ་བརྟེན་ཏེ་བསྣམས་པ། ཞི་འཛུམ་སྒེག་ལ་ཡན་ལག་རགས་ཤིང་གསུས་ཁྱིམ་ཆེ་བ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཞིང༌། ཞལ་ནས་ནོར་བུའི་ཆར་འབེབས་པ། ཕྲག་གོང་གཡས་གཡོན་ནས་ཉི་ཟླ་འཆར་བ། སེམས་དཔའི་སྐྱིལ་མོ་ཀྲུང་གིས་གཏེར་གྱི་བུམ་པའི་སྟེང་ན་བཞུགས་པའོ། །དེའི་གཡོན་དུ་ཕུཿཡིག་ལས་ཡུམ་པདྨ་གཙུག་ཕུད་མ་སྐུ་མདོག་དམར་མོ། གཡས་ནོར་བུ་དང་གཡོན་བུམ་པ་འཛིན་པ། སྨད་སྦྲུལ་མཇུག་ཏུ་འཁྱིལ་ཞིང་སྦྲུལ་མགོའི་གདེངས་ཀ་བདུན་དང་ལྡན་པ། དར་དང་རིན་པོ་ཆེའི་རྒྱན་གྱིས་བརྒྱན་པའོ། །ནོར་བདག་གཏེར་ལ་མངའ་བརྙེས་པ། །ཀླུ་རྒྱལ་ཚོགས་ལ་དབང་ཡང་བསྒྱུར། །རྒྱལ་ཆེན་ཡབ་ཡུམ་འཁོར་བཅས་ལ། །གུས་པས་བསྟོད་དེ་ཕྱག་
ཀྱང་འཚལ། །ཞེས་བསྟོད། ཡབ་ཀྱི་སྔགས་ནི་སེར་ཆེན་དང་འདྲ། ཨོཾ་ནཱ་ག་ནི་བ་སུ་ཏེ་ཀུ་རུ་ཡེ་སྭཱཧཱ། ཡུམ་གྱི་སྔགས་སོ། །གཏོར་འབུལ་གྱིས་སྔགས་སེར་ཆེན་གྱི་གཏོར་སྔགས་བསྡུས་པ་དེས་མཛད། རྗེས་གནང་གི་གསོལ་བཏབ་དང༌། དྲི་བ་དྲི་ལན་མདུང་དམར་ཅན་གྱི་སྐབས་བཞིན་བྱེད། རྗེས་གནང་གི་ངོ་བོ་སེར་ཆེན་དང་འདྲ། སྲོག་འཁོར་གའུ་བླ་རྡོར་བཅས་པ་ཡོད་ན། སྒྲུབ་པའི་སྐབས་མཎྜལ་གྱི་དབུས་སུ་དེ་འཇོག་ཅིང༌། སློབ་མའི་སྙིང་གར་གཏུགས་ནས། རྒྱལ་ཆེན་འདི་ལ་སྩལ་ནས་ནི། །འདི་ལ་འགོ་བར་མཛད་དུ་གསོལ། །ཞེས་པ་ཐུགས་ཀྱི་རྗེས་གནང་གི་མཐར་མཛད། དེ་མ་འབྱོར་ན་བགྲང་འཕྲེང་སྙིང་གར་གཏུགས་ནས། རྒྱལ་ཆེན་སོགས་བརྗོད། རྟེན་གྱི་གཏོར་མ་ནོར་བུའི་གཟུགས་ཅན་ཁོ་ན་མཛད་པ་རྣམས་ཁྱད་པར་རོ། །ཟངས་དཀར་ལོཙྪའི་མན་ངག་ནི། །ཀུན༵་གྱི་མཐར་ཐུག་ཡིན་པར་བསྔགས། །རྒྱས་པའི་ལས་སྒྲུབ་ཆེས་དག༵འ་བ། །སྒྲུབ་ཐབས་སྙིང༵་པོ༵འི་ཡི་གེའོ། །རྒྱལ་ཆེན་རྣམ་ཐོས་སྲས་ལྗང་སེར་བེ་ཅོན་མའི་སྒྲུབ་ཐབས་ཀྱི་ལེ་ཚན་ནོ།། །།