གཉིས་པ་ཁང་བའི་ལྷག་མའི་ཐུན་མོང་མ་ཡིན་པའི་ཡན་ལག།

གཉིས་པ་ཁང་བའི་ལྷག་མའི་ཐུན་མོང་མ་ཡིན་པའི་ཡན་ལག་ནི།

རྩ་བར། བཙལ་བ་ལའོ། །དེས་རྗེས་སུ་གནང་བ་ལའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་ཡུལ་མཉན་ཡོད་དུ་གང་ཟག་དགེ་སློང་རབ་ཏུ་མང་པོས་ཉོན་མོངས་པ་འདོད་ཞེན་གྱི་དབང་གིས་ཁང་པ་བརྩིགས་པ་ལས་དགེ་འདུན་ལྷག་མར་བཅས་སོ། །གཉིས་པ་དགག་བྱ་ནི་འདོད་པ་ཆེས་པ་དང༌། སྲོག་ཆགས་ལ་གནོད་པ་དང༌། རྩོད་པ་རྒྱས་པ་དང༌། དོན་དང་བྱ་བ་མང་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་ས་གཞི་དང་ཡོ་བྱད་བཙལ་བས་ས་གཞི་མ་དག་པའི་སྟེང་དུ་དགེ་འདུན་ལ་མ་བསྟན་པར་དཀོན་མཆོག་ལས་གཞན་པའི་ཆེད་དུ་མངོན་གྱུར་གྱི་བདག་པོ་གཅིག་གི་དོན་དུ་ཁང་པ་ཚད་ལས་ལྷག་པ་བརྩིགས་པ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། གཞིའི་ཡན་ལག་ལ་གསུམ་སྟེ། གང་དུ་བརྩིག་པའི་ས་གཞི་དང༌། གང་བརྩིག་པའི་དངོས་པོ་དང༌། གང་གིས་བརྩིག་པའི་ཡོ་བྱད་དོ། །དང་པོ་ནི། ས་གཞི་བཙལ་བ་ལའོ་ཞེས་བཙལ་བའི་ཡུལ་ཐ་སྙད་ལྔ་དང་ལྡན་ཞིང་རང་ལས་ནོར་གྱི་སྒོ་ནས་ཐ་དད་པ་ལ། སྦྱོར་བ་ངག་གི་རིག་བྱེད་ཀྱིས་བཙལ་བ་སྟེ། སྤྱིར་བསྟན་དང་སྦྱར་རོ། །དེའི་རྗེས་སུ་གནང་བ་ལའོ་ཞེས་པ་ནི། དགེ་སློང་གིས་གཞན་བསྐོས་ཏེ་ཁང་པ་བརྩིག་ན་ནི། ཁྱོད་ཀྱིས་ས་གཞི་ཚོལ་ཅིག་ཅེས་དགེ་སློང་ལྟུང་བ་འབྱིན་པ་པོ་དེས་རྗེས་སུ་གནང་བ་ལ་བརྩིགས་ན་ཁང་པའི་ལྷག་མ་བསྐྱེད་པའོ་ཞེས་བསྟན་ཏེ། ཊཱི་ཀ་ལས། ལྟུང་བ་འབྱིན་པ་པོས་རྗེས་སུ་གནང་བའི་སློང་བ་པོའི་བཙལ་བ་ཡིན་པས། དེའི་ཕྱིར་ཇི་ལྟར་ས་གཞི་བཙལ་བ་བཞིན། ཞེས་གསུངས་སོ། །སེལ་བ་ནི་ས་གཞི་དེ་མ་བཙལ་བར་དང་པོ་ཉིད་ནས་རང་ཉིད་དབང་བའི་ས་གཞིར་བརྩིགས་ན་སྦོམ་པོར་འགྱུར་ཏེ་ས་གཞི་འཚོལ་བ་མ་བསྐོས་པར་རོ། །ཞེས་སོ། ། ས་གཞི་མ་དག་པ་གསུམ་ལྡན་ཡིན་པ་ནི། དེ་ཡང་སྲོག་ཆགས་ཕྲ་མོའི་གནས་དང་ལྡན་པ་དང༌། རྩོད་པ་དང་བཅས་པ་དང༌། བརྩམ་དུ་མི་རུང་པའོ། །དེ་ཡང་སྐྱེ་བ་པོ་ཕྲ་མོ་དེ་ཡང་གནས་དེ་ཉིད་དུ་སྐྱེས་པ་གྲངས་གཅིག་ཡན་ཆད་ཀྱི་གནས་དང་ལྡན་པའོ། ། ༢ རྒྱལ་པོ་དང་ལྷའི་གནས་དང་ཤིང་ལྗོན་པ་དང་གསུམ་ནི་མཚོན་པ་སྟེ། རྩོད་པ་དང་བཅས་པ་ཐམས་ཅད་དོ། །༣ ཆུ་ཀླུང༌། ངམ་གྲོག ཁྲོན་པ་དང་གསུམ་ག་ཚོགས་པ་ཡན་ལག་ཏུ་མི་དགོས་ཏེ། ཊཱི་ཀ་ལས། དེ་དག་ལས་གཅིག་དང་འདོམ་ན་ཡང་གནས་ཚེ་ཐུང་བར་འགྱུར་བས་བརྩམ་དུ་མི་རུང༌། ཞེས་སོ། །དེ་དག་གི་ཕྱོགས་བཞིའི་མཐའ་འཁོར་བ་ནི་མི་དགོས་ཏེ། ཊཱི་ཀ་ལས། ཕྱོགས་ཐམས་ཅད་དུ་ཁོ་ར་ཁོར་ཡུག་ཀུན་ཏུ་ཆུ་ཀླུང་ལ་སོགས་པ་ཐམས་ཅད་དང་འདོམ་པ་ལ་ནི་མི་བསྙེགས་སོ། །ཞེས་སོ། །དེ་འདྲའི་ས་གཞི་མ་དག་པ་གསུམ་ལྡན་དེ་ཡང༌། རྩ་བར། སྐྱེ་བ་པོ་ཕྲ་མོའི་གནས་དང་ལྡན་པ་ཉིད་དང༌། རྒྱལ་པོ་དང་ལྷའི་གནས་དང་མུ་སྟེགས་ཅན་གྱི་འདུག་གནས་ལ་བརྟེན་པ་ཉིད་དང༌། ཤིང་ལྗོན་པ་བཅད་པར་བྱ་བ་མ་ཡིན་པ་ཉིད་དང༌། ཕྱི་རོལ་འདོམ་གང་གི་མཐའི་ཉེ་འཁོར་གྱི་ནང་རོལ་ན་ཆུ་ཀླུང་ཞེས་པ་ལ་སོགས་པས་བསྟན་ཏོ། །སེལ་བ་ནི་དེ་དག་རེ་རེ་མ་ཚང་ན་མཐར་ཐུག་ལ་སྦོམ་པོར་འགྱུར་རོ། །དགེ་འདུན་ལ་བསྟན་པ་ནི། རྩ་བར། དགེ་འདུན་ལས་བསྟན་པ་ཐོབ་པ་ཉིད་ནི་བསྟན་པ་ཉིད་དོ། །མ་དག་པ་གསོལ་བར་མི་བྱ། ཞེས་བྱུང༌། འདིའི་དོན་ལ་དྲུག་ལས། དང་པོ་དགོས་པའི་དོན་ནི། གནང་བ་བྱིན་པས་སྦོམ་པོ་ཁེགས་པ་དང༌། ལས་ཀྱི་ཆོ་གས་བྱིན་པས་བཅས་པའི་ས་མཚམས་ཟིན་པའོ། །གཉིས་པ་ཡུལ་གང་ལ་གནང་བ་སྦྱིན་པ་ནི་ཆོས་བཅུ་ལྡན་ཏེ། བསྙེན་རྫོགས་ཀྱི་སྡོམ་པ་གསོར་རུང་ཡན་ཆད་དང་ལྡན་ཞེས་པ་ལ་སོགས་པ་བརྒྱད་ཐུན་མོང་བ་སྟེ་ལས་ཀྱི་གཞིར་འཆད་ཅིང་ས་གཞི་དག་པ་དང་ལྡན་པ་སྟེ། མ་དག་པ་གསོལ་བར་མི་བྱ་ཞེས་པ་དང༌། གཞན་དུ་ཆོས་མ་ཡིན་པར་འགྱུར་བའི་ཕྱིར་རོ། །སྔར་གནང་བ་བྱིན་པ་དང་མ་འབྲེལ་བ་སྟེ། སྔར་གནང་བ་མ་ཐོབ་པ་ལའོ་ཞེས་པའི་གནད་ཀྱིས་དང་གཞན་དུ་ན་གནང་བའི་ཆོ་ག་རྫས་གཞན་གྱི་སྟེང་དུ་དེ་དང་རིགས་འདྲ་གནང་བའི་རྫས་གཞན་མི་ཆགས་པའི་ཕྱིར་རོ། །དགེ་ཚུལ་གྱིས་ཁང་བ་བརྩིག་པ་ནའང་གནང་བ་སྦྱིན་དགོས་ཏེ། བསྡམ་བྱའི་ཉེས་བྱས་འབྱུང་བ་དེ་དགག་དགོས་པའི་ཕྱིར་རོ། །གསུམ་པ་རྟེན་གང་གིས་གནང་བ་སྦྱིན་པ་ནི། དགེ་འདུན་མཚན་ཉིད་བཞི་ལྡན་གྱིས་ཏེ། བཞི་ལྡན་སྔར་བཤད་ཟིན་ཏོ། །བཞི་པ་གཞི་གང་ལ་གནང་བ་སྦྱིན་པ་ནི། ས་གཞི་དག་པ་ལ་སྟེ། མ་དག་པ་གསོལ་བར་མི་བྱ།ཞེས་སོ། །ལྔ་པ་ཆོ་ག་གང་གིས་གནང་བ་སྦྱིན་པ་ནི། སྦྱོར་དངོས་མཇུག་གསུམ་སྟེ། སྦྱོར་བའི་ཆོ་ག་གཉིས་ལས། གང་ཟག་གིས་བྱ་བ་ནི་འདུ་བའི་སྐབས་རྗེས་སུ་བསྒྲུབས་པ་དང༌། ཕྱག་འཚལ་ཞིང་སྤྱོད་ལམ་བསྟུན་པ་དང༌། གསོལ་བ་ལན་གསུམ་གདབ་པའོ། །དགེ་འདུན་གྱི་བྱ་བ་ནི་དགེ་འདུན་རང་གིས་ས་གཞི་བརྟག་པའམ་དགེ་འདུན་གྱིས་བསྐོས་པའི་དགེ་སློང་གིས་ས་གཞི་བརྟགས་ཏེ། དགེ་འདུན་ལ་བརྗོད་པའོ། །དངོས་གཞིའི་ཆོ་ག་ནི་གསོལ་བ་དང་གཉིས་ཀྱི་ལས་ཀྱིས་སོ། །མཇུག་གི་ཆོ་ག་ནི་ལས་ཀྱི་མཇུག་སྡུད་བརྗོད་པའོ། །དྲུག་པ་གནང་བ་འཇིག་པའི་རྒྱུ་ནི། གཞི་མ་དག་པར་འཕོས་པའམ། རྟེན་བབས་པའམ་ཤི་བ་ལ་སོགས་པ་སྟེ་ཞིང་མ་ཡིན་པར་གྱུར་པའོ། །གཉིས་པ་གང་བརྩིག་པའི་དངོས་པོ་ལ་བཞི་སྟེ། གནས་ཀྱི་ངོ་བོར་གྲུབ་པ་དང༌། སྤྱོད་ལམ་བཞི་ཤོང་བ་དང༌། ཚད་ལས་ལྷག་པ་དང༌། བྱེད་འཕྲོ་གཞིའི་སེལ་བར་གཏོགས་པ་མ་ཡིན་པའོ། །དེ་ཡང་ཕལ་ཆེར་གཡོགས་པ་དང་བསྐོར་བ་ནི་གནས་ཀྱི་མཐའ་ཡིན་ནོ། །སྤྱོད་ལམ་བཞིའི་སྣོད་མ་ཡིན་པ་ཉིད་ལ་ནི་ཉེས་པ་མེད་དོ། །ཚད་ལས་ལྷག་པའོ། །འཕྲོ་ཟིན་པར་བྱེད་ན་ཡང་ངོ་ཞེས་པས་གྲུབ་སྟེ་གོ་རིམ་བཞིན་ནོ། །སེལ་བ་ནི་གནས་ཀྱི་ངོ་བོར་གྲུབ་པ་མ་ཚང་ན་སྦོམ་པོར་འགྱུར་རོ། །ཚད་ལས་ལྷག་པ་མ་ཚང་ན་ཡང་སྦོམ་པོར་འགྱུར་རོ། །ཊཱི་ཀ་ལས། རྡུལ་ཕྲ་རབ་ནས་བརྩིས་པའི་ཚད་དང་ལྡན་པའི་ཁྲུ། ཞེས་དང༌། འགྲེལ་ཆུང་ལས། མི་འབྲིང་པོའི་ལུས་ཚད་དང་ལྡན་པའི་ཁྲུ་ཞེས་ཏེ་ཚེ་ལོ་བརྒྱ་པའི་ཚེ་ན་དེ་གཉིས་གཞི་མཐུན་ཡིན་ནོ། །ཁང་བའི་ཚད་ནི། སྤྱོད་ལམ་བཞི་ཤོང་དང༌། ཁང་བའི་ནང་གི་སྲིད་དུ་རྡུལ་ཁྲུ་བཅོ་བརྒྱད་དང༌། བདེ་གཤེགས་མཐོ་བཅུ་གཉིས་ཡིན། ཞེང་དུ་ཁྲུ་ཕྱེད་དང་བཅུ་གཅིག་དང༌། བདེ་གཤེགས་མཐོ་བདུན་ཡིན་ལ། དེ་ལས་ལྷག་ན་ལྟུང་བ་དང༌། སྤྱོད་ལམ་བཞི་ཤོང་ལས་ཆུང་ན་ལྟུང་བ་དངོས་གཞི་མི་འབྱུང་ལ། བདེ་བར་གཤེགས་པའི་མཐོ་གང་ལ་ཁྲུ་ཕྱེད་དང་དོ་ཡོད་དེ། རྩ་བར། ཚད་དང་ལྡན་པའི་ཁྲུ་ཕྱེད་དང་དོ་ནི་བདེ་བར་གཤེགས་པའི་མཐོ་གང་སྟེ། ནང་རོལ་ནས་དེ་བཅུ་གཉིས་དང་བདུན་གྱི་ཚད་དོ། །ཞེས་གསུངས་པའི་ཕྱིར་རོ། །འདུལ་བ་བདུད་རྩིའི་ཉིང་ཁུ་ལས། ཆུང་མཐའ་སྤྱོད་ལམ་བཞི་ཤོང་བ་ནས་ཆེ་ཚད་མི་འབྲིང་པོའི་སྲིད་དུ་ཁྲུ་བཅོ་བརྒྱད། ཞེང་དུ་ཁྲུ་ཕྱེད་དང་བཅུ་གཅིག་ཁང་བའི་ཚད་དོ། །ཞེས་གསུངས་སོ། །