རླུང་མཚམས་ཀྱི་པདྨའི་ལྟེ་བར་ཚངས་མ་སེར་མོ་ངང་བ་དཀར་པོ་ལ་གནས་པ།
རླུང་མཚམས་ཀྱི་པདྨའི་ལྟེ་བར་ཚངས་མ་སེར་མོ་ངང་བ་དཀར་པོ་ལ་གནས་པ་ལ།
ཁྱབ་འཇུག་ནག་པོ། གཡས་གཉིས་ཀྱིས་འཁོར་ལོ་དང་དབྱུག་ཐོ། གཡོན་གཉིས་ཀྱིས་པདྨ་དང་སྐྱེ་བ་ལྔ་བའི་དུང་༼ཕྱོགས་རྒྱལ་སྒྲུབ་ལེའི་རྒྱུད་མཆན་ལས། ཏི་མའི་གཟུགས་འཛིན་པའི་ལྷ་མིན་སྐྱེ་བ་ལྔ་པའི་རུས་པ་ལས་བྱུང་བའི་དུང་སྟེ་ཏི་མི་ནི་ཆུ་སྲིན་གྱི་བྱེ་བྲག་དཔག་ཚད་བརྒྱད་པའོ། །ཞེས་སོ། །ཚིག་མཛོད་འགའ་ཞིག་ན་དུང་དཀར་གཡས་འཁྱིལ་ཡིན་པར་བཤད་དོ། །༽འཛིན་པས་འཁྱུད་པ། མདུན་དང་རྒྱབ་ཀྱི་འདབ་མ་ནས་གཡས་སྐོར་གྱི་རིམ་པས་མཆོད་སྦྱིན་༼སྒྲུབ་ཐབས་ལྗོན་ཤིང་དང་འཇུག་པ་གཉིས་ཀ་ན་མཆོད་སྦྱིན་འདོན་མ་༽༼རྡོ་རྗེ་བསྟོད་ཆེན་རྩ་འགྲེལ་གཉིས་ཀར་མཆོད་སྦྱིན་འདོད། ཅེས་གསུངས་ལ། ༽འདོད་མ་དང༌། ངག་གི་དབང་ཕྱུག་མ་དང༌། པད་མའི་སྤྱན་མ་དང༌། ཆུ་སྐྱེས་ལྡན་མ་དང༌། བློ་གྲོས་མ་དང༌། གླུ་ལེན་མ་དང༌། གློག་མ་དང༌། དྲན་མ་རྣམས་ཀྱང་སེར་མོ་སྟེ། གཙོ་འཁོར་གྱི་རྣལ་འབྱོར་མ་དགུ་ཆར་ཡང་ཕྱག་བཞིའི་གཡས་གཉིས་ཀྱིས་པད་མ་དང༌། ཚངས་པའི་དབྱུག་པ། གཡོན་གཉིས་ཀྱིས་སྤྱི་བླུགས་དང༌། བར་བུ་འཛིན་པའོ། །གསུང་གི་ལྷ་སྣམ་གྱི་ལྷ་བཤད་པའི་སྐབས་འདིར་ཤེས་དགོས་པ་གཞོན་ནུ་མ་གདོང་དྲུག་ཡབ་དང་བཅས་པ་བཅུ་པོ་གདོང་དྲུག་པ་དང་ཚངས་མ་འཁོར་བཅས་བཅུ་པོ་གདོང་བཞི་བ་ཡིན་ཏེ། འབའ་འདའ་བླ་མའི་དུས་འཁོར་གྱི་བསྐྱེད་རིམ་སྒོམ་ཚུལ་བདུད་རྩིའི་བུམ་བཟང་༡༠༦ལས། ལྷོ་ནུབ་ཀྱི་གཞོན་ནུ་མ་གཙོ་འཁོར་ཡབ་དང་བཅས་པ་གདོང་དྲུག་སྟེ་གདོང་དྲུག་ནི་ཕྱོགས་བཞི་དང་སྟེང་དུ་ཞལ་གཉིས་བརྩེགས་པ་དང༌། ནུབ་བྱང་གི་ཚངས་མ་འཁོར་བཅས་གདོང་བཞི་པ་སྟེ། ལྷག་མའི་གཙོ་འཁོར་ཐམས་ཅད་གདོང་གཅིག་པའོ། །ས་གའི་སྟབས་ནི་བཞེངས་ཏེ་རྐང་པ་གཉིས་ཀྱི་བར་ཐག་ཁྲུ་གང་ཙམ་བཞག་རྐང་མགོ་གཡས་གཡོན་དུ་བསྟན་པ་དང༌། རོལ་པའི་སྟབས་ནི་བཞེངས་ཏེ་ཞབས་གཡོན་པ་དྲང་པོར་བཙུག་པའི་བོལ་གོང་ལ་ཞབས་གཡས་པའི་རྟིང་པ་གཏད་པ་ཡིན་ལ། དེ་ལས་གོ་བཟློག་བྱས་ཀྱང་ཆོག ཅེས་གསུངས་སོ། །གལ་ཏེ་གཞོན་ནུ་མའི་ཡབ་ཚོགས་བདག་ལྟ་བུ་ཞལ་འགྱུར་བ་མེད་པར་ཞལ་གཅིག་པ་ཡིན་ན་ཡབ་ཀྱི་སྐབས་སུ་གཞོན་ནུ་དང་ཚངས་པ་གཉིས་ཡོད་པ་དག་ནི་རིམ་བཞིན་ཞལ་དྲུག་པ་དང་ཞལ་བཞི་པ་ཡིན་དགོས་ཀྱང་དེ་མ་ཡིན་པར་སྒྲུབ་ཐབས་དཔག་བསམ་ལྗོན་ཤིང་དང་དེ་ལ་འཇུག་པ་གཉིས་སོགས་ཀྱིས་སྐབས་སུ་གསལ་བར་གསུངས་ལ། གསུང་གི་ལྷའི་ཞལ་ཕྱག་བཤད་སྐབས་གཞོན་ནུ་མ་དང་ཚངས་མ་འཁོར་བཅས་ཞལ་མི་འདྲ་བ་ཡིན་པ་ལས། གཞོན་ནུ་དང་ཚངས་པ་ཞལ་མི་འདྲ་བར་མ་གསུངས་ལ། སྐུའི་ཚེས་ལྷའི་སྐབས་སུ་གཞོན་ནུ་དང་ཚངས་པ་ལས་གཞོན་ནུ་མ་དང་ཚངས་མ་ཞལ་ཕྱག་མི་འདྲ་བར་ཟུར་དུ་མ་བཤད་པ་ཡིན་ཏེ། དུས་འཁོར་བསྟོད་ཆེན་ལས། རྨ་བྱར་གནས་པའི་གཞོན་ནུ་མ་ནི་ཚོགས་བདག་གིས་འཁྱུད་པདྨ་མ། །ཞེས་པ་ནས། བྱི་རུའི་འོད་འཕྲོ་གདོང་དྲུག་མ། །ཞེས་སོགས་དང༌། ངང་པར་གནས་པའི་ཚངས་མ་ལ་ནི། ཞེས་པ་ནས། རིག་བྱེད་གདོང་མ་གསེར་མདོག་མ། ཞེས་སོགས་དང༌། དངོས་གྲུབ་ཉེར་འཚོ་༢༥༡ལས། འདི་དག་ལས་གཞན་ཐམས་ཅད་ཞལ་གཅིག་ཕྱག་བཞི་མ། ཚངས་མ་འཁོར་བཅས་གདོང་བཞི་དང༌། གཞོན་ནུ་མ་འཁོར་བཅས་གདོང་དྲུག་ཡིན་པ་དང༌། འོག་ཏུ་ཚེས་ལྷའི་སྐབས་སུ་ཡང་ཚངས་པ་འཁོར་བཅས་གདོང་བཞི་དང༌། གཞོན་ནུ་འཁོར་བཅས་གདོང་དྲུག་ཏུ་གསལ་བར་བཤད་པས་དེ་ལས་བཟློག་སྟེ་ཞལ་གཅིག་པར་འཆད་པ་ནི་མ་བརྟགས་པའོ། །ཞེས་གསུངས་སོ།།དེ་ལས་དཔེར་ན་གཞོན་ནུ་མ་འཁོར་བཅས་གདོང་དྲུག་པར་གསུངས་པས་ཡུམ་གཙོ་བོར་གྱུར་བ་ཡིན་པས་ཡབ་འཁོར་དུ་བསྡུས་པ་ཤེས་ན་འཁྲུལ་བའི་གནས་མེད་དོ། །ཞལ་ཡང་གཞན་དུ་འགྱུར་བ་ཡོད་པ་ནི། དངོས་གྲུབ་ཉེར་འཚོ་༢༥༧ལས། དཔེར་ན་རིགས་ཀྱི་བུ་མོ་དེ་རིགས་གཞན་གྱི་ཁྱིམ་དུ་སོང་བ་ན་བདག་པོ་དེ་དང་བྱ་བ་གཅིག་པར་གྱུར་བ་བཞིན་ཡུམ་རྣམས་ཀྱང་ཡབ་དང་ཕྱག་མཚན་མཐུན་པར་བྱེད་ཅིང༌། ད་དུང་རུས་དང༌། ངོ་བོ་མ་གྱུར་བ་བཞིན་དུ་ཁ་དོག་ཐ་དད་དུ་བྱེད་པ་ཡིན། ཞེས་ཀྱང་གསུངས་ཏེ་མན་ངག་གོ། །ཞེས་དང༌། སྐབས་ཐོབ་ཀྱི་ཞལ་ཕྱག་འགྱུར་འགྲོ་བ་ཤིན་ཏུ་མང་བའི་ཕྱིར། ཞེས་གསུངས་སོ། །ཡང་ཁ་ཅིག་དངོས་གྲུབ་ཉེར་འཚོར་སྤྱིར་ཡབ་ཡུམ་ཞལ་གྲངས་མཉམ་ཡང་དམིགས་གསལ་དུ་ཚངས་མ་དང་གཞོན་ནུ་མ་སོགས་ཡབ་ཡུམ་ཞལ་གྲངས་མི་མཉམ་པར་གསུངས་པ་ཡིན་ཏེ། དངོས་གྲུབ་ཉེར་འཚོ་༢༦༦ལས། གཙོ་བོ་ཡབ་ཡུམ་ནི་བརྗོད་པའི་ཡུལ་མ་ཡིན། གཞན་སྐུ་གསུང་ཐུགས་ཀྱི་དཀྱིལ་འཁོར་ལ་རྩིག་པའི་ནང་ཚུན་ཆད་ཀྱི་ལྷ་རྣམས་ཞལ་སྦྱོར་དུ་ཡོད་པའི་ཚེ་ཕྱག་གྲངས་མཉམ་ཁོ་ན་ཡིན་ཞིང༌། དམིགས་གསལ་ཚངས་མ་གཞོན་ནུ་མ་ཚངས་པ། གདོང་དྲུག་རྣམས་མ་གཏོགས་ཞལ་རས་ཀྱང་ངོ། །ཞེས་གསུངས་ཕྱིར་ཟེར་ན་མ་ཁྱབ་པ་ཁོ་ན་ཡིན་ཏེ། ཐུགས་ཀྱི་རྩིག་པའི་ནང་གི་ལྷ་རྣམས་ཞལ་གསུམ་ཕྱག་དྲུག་མཉམ་པ་དང༌། གསུང་དཀྱིལ་གྱི་རྩིག་པའི་ནང་གི་ལྷ་རྣམས་སྤྱིར་ཞལ་གཅིག་ཕྱག་བཞི་ཡིན་ཀྱང་དམིགས་གསལ་དུ་གཞོན་ནུ་མ་འཁོར་བཅས་གདོང་དྲུག་པ་དང༌། ཚངས་མ་འཁོར་བཅས་གདོང་བཞི་བ་ཡིན་པ་དང༌། སྐུ་དཀྱིལ་གྱི་རྩིག་པའི་ནང་གི་ལྷ་རྣམས་སྤྱིར་ཞལ་གཅིག་ཕྱག་བཞི་མཉམ་པ་ཡིན་ཀྱང་དམིགས་གསལ་དུ་གཞོན་ནུ་འཁོར་བཅས་གདོང་དྲུག་དང༌། ཚངས་པ་འཁོར་བཅས་གདོང་བཞི་བ་ཡིན་པར་གསུངས་པའི་ཕྱིར་ཏེ། དངོས་གྲུབ་ཉེར་འཚོ་ནི་ཆོས་རྗེ་ཀུན་མཁྱེན་རིན་པོ་ཆེའི་མཛད་པའི་སྒྲུབ་ཐབས་དཔག་བསམ་ལྗོན་ཤིང་གི་དོན་འགྲེལ་ཡིན་ལ། དངོས་གྲུབ་ཉེར་འཚོའི་དེའི་ཐད་ཀྱི་སྒྲུབ་ཐབས་དཔག་བསམ་ལྗོན་ཤིང་༤༢ལས། ཐམས་ཅད་ཞལ་གཅིག་མ་སྤྱན་གསུམ་མ་ཕྱག་བཞི་མ་དག་གོ །འོན་ཀྱང་ཚངས་མ་ལ་སོགས་པ་ནི་གདོང་བཞི་དང་གཞོན་ནུ་མ་ལ་སོགས་པ་ནི་གདོང་དྲུག་ཏུ་རྟོགས་པར་བྱའོ། །ཞེས་དང༌། ཚེས་ལྷའི་སྐབས་སུ་དེ་༤༦ལས། ཐམས་ཅད་ཞལ་གཅིག་ཕྱག་བཞི་པ་དག་གོ །འོན་ཀྱང་ཚངས་པ་ལ་སོགས་པ་དང་གཞོན་ནུ་ལ་སོགས་པ་ནི་གདོང་བཞི་དང་དྲུག་ཏུ་རྟོགས་པར་བྱའོ། །ཞེས་གསུངས་པའི་ཕྱིར་རོ། །རྩིག་པའི་ནང་སྨོས་པ་ཡང་རྒྱས་པའི་ལུགས་ལ་རྩིག་པའི་ཕྱི་རོལ་གྱི་འདོད་མི་འདོད་ལ་ཞལ་གྲངས་མི་འདྲ་བ་དུ་མ་འོང་བའི་རྒྱུ་མཚན་གྱིས་སོ། །ཞལ་རས་ཀྱང་ངོ། །ཞེས་པ་ཡང་གཞོན་ནུ་མ་སོགས་དམིགས་བསལ་ལས་གཞན་དག་ཞལ་གཅིག་མཉམ་པའི་དོན་ཡིན་པ་ལས། དམིགས་གསལ་དེ་དག་ཡབ་ཡུམ་ཞལ་མི་མཉམ་པའི་དོན་མ་ཡིན་ནོ། །རང་ལ་ལུང་རིགས་མེད་ན་གང་ལ་ལུང་རིགས་ཡོད་པ་དེའི་རྗེས་སུ་འབྲང་བ་ནི་དམ་པའི་ལུགས་སོ། །གོང་དུ་ཕྱག་མཚན་བཞུགས་སྟངས་བཤད་པ་དེ་དག་གི་ཁུངས་རེ་ཟུང་ཅུང་ཟད་བརྗོད་ན་འབའ་མདའ་བླ་མས། རྣལ་འབྱོར་མའི་གདན་པད་མའི་ལྟེ་བའི་མཁའ་ལྡིང་དང་མ་ཧེ་སོགས་ནི་སྤྱི་ལྟར་ཏེ། བཞོན་པའི་ཚུལ་དུ་གནས་པ་ཡིན་གྱི་མནན་པའི་ཚུལ་དུ་བསྒྱེལ་བ་ནི་མ་ཡིན་ནོ། །ཞེས་པ་ནས། ས་གའི་སྟབས་ནི་བཞེངས་ཏེ་རྐང་པ་གཉིས་ཀྱི་བར་ཐག་ཁྲུ་གང་ཙམ་བཞག་རྐང་མགོ་གཡས་གཡོན་དུ་བསྟན་པ་དང༌། རོལ་པའི་སྟབས་ནི་བཞེངས་ཏེ་ཞབས་གཡོན་པ་དྲང་པོར་བཙུག་པའི་བོལ་གོང་ལ་ཞབས་གཡས་པའི་རྟིང་པ་གཏད་པ་ཡིན་ལ། དེ་ལས་གོ་བཟློག་བྱས་ཀྱང་ཆོག ཅེས་དང༌། དངོས་གྲུབ་ཉེར་འཚོ་༢༨༠ལས། ༼གཙོ་མོ་བརྒྱད་ས་གའི་སྟབས་ཀྱིས་གནས༽ས་གའི་སྟབས་ནི་རྐང་སོར་ལོགས་སུ་ཅུང་ཟད་བསྟན་པའི་རྟིང་པའི་བར་དུ་སོར་ཉེར་དྲུག་ཟེར་ཡང་རགས་རྩིས་ཀྱི་ཚུལ་དུ་ཁྲུ་གང་བཞག་ཅིང་སྒྱིད་པ་བསྲང་བའོ། །རོལ་བའི་སྟབས་ལ་བཞེངས་བཞུགས་གཉིས་ཡོད་ཀྱང༌། ༼རྣལ་འབྱོར་མའི་འཁོར་རྣམས་རོལ་བའི་སྟབས་ཀྱིས་བཞེངས་པ་ཡིན།༽ བཞེངས་པ་ནི་རྒྱུད་ལས། ཅུང་ཟད་པུས་མོ་ཕྱེད་ནི་འཁྱོག་པ་རོལ་པར་འགྱུར་ཏེ། ཞེས་གསུངས་པ་ལྟར། གཡས་རོལ་ནི་རྐང་བ་གཡོན་པ་དྲང་པོར་བསྲང་ཞིང༌། རྐང་མགོ་མདུན་དུ་བསྟན་ལ་གཡས་པའི་པུས་མོ་གཡས་སུ་ཅུང་ཟད་འཁྱོགས་ཤིང༌། སོར་མོ་ལོགས་སུ་བསྟན་རྟིང་པ་བཏེག་སྟེ་བོལ་གོང་ལ་རེག་པའམ་བར་ཏུ་སོར་བཞི་བཞག་པའོ། །གཡོན་རོལ་ནི་དེ་ལས་བཟློག་པ་ཡིན་ཞིང༌། བཞུགས་པའི་རོལ་སྟབས་ནི་སྐྱིལ་ཀྲུང་ཕྱེད་པ་དང་ཕལ་ཆེར་འདྲའོ། །ཟླུམ་པོའི་གདུག་སྟངས་ནི། རྟིང་པ་གཉིས་ཀྱི་བར་དུ་ཁྲུ་གང་བཞག པུས་མོ་ངང་པའི་གཤོག་པ་ལྟ་བུ་སྟེ། གཡས་གཡོན་དུ་འབུར་པོར་བསྐྱེད་པ། ཞེས་པ་ནས། ཤཀྟི་ནི་མདུང་ཐུང་གི་རིགས་ལ་སོ་ནི་དགྲ་སྟ་ཁ་ཕྱིར་བསྟན་པ། ཞེས་པ་ནས། ཚངས་པའི་དབྱུག་པ་ནི་སྣེ་གཉིས་སུ་ཏོག་དང་བཅས་པར་ངེས་པ་ལས་དབྱུ་གུ་གཅིག་པ་ཡིན་ན། སྦོམ་ཕྲ་མེད་པ་རིང་ན་ལུས་ཚད་ཙམ་པ་ལ་སྟེང་འོག་བར་གསུམ་དུ་སོར་བཞི་ཙམ་རེ་སྲད་བུ་དཀར་པོས་མི་མངོན་པར་དཀྲིས་པ་ཡིན། དབྱུག་གུ་གསུམ་པ་ཡིན་ན་དེ་ཀ་འདྲ་བའི་དབྱུ་གུ་ཕྲ་སང་ངེ་བ་གསུམ་བསྒྲིགས་ནས། སྲད་བུ་དཀར་དམར་ནག་གསུམ་གྱིས་སྟེང་འོག་ཏུ་མཐོ་རེ་ཙམ་དང་བར་བར་དུ་ཇི་ལྟར་འོས་པ་དཀྲིས་པའོ། །གཞན་ཡང་སྔོན་གྱི་དྲང་སྲོང་རྣམས་ཀྱི་དབྱུ་གུ་རྩེ་གསུམ་པ་ཡང་ཚངས་པའི་དབྱུག་པའོ། །ལྟོས་འགྲོ་ནི་སྦྲུལ་ཉིད་དང༌། བར་བུ་ནི་ལྷུང་བཟེད་དང་དབྱིབས་འདྲ་རུང་གི་སྣོད་ཁ་གཅོད་ཅན་ནོ། །བེ་ཅོན་དང་དབྱུག་པ་ཀུན་ལ་གྲགས་ཀྱང༌། བེ་ཅོན་ཙང་མགོ་ཙང་གཞུག་ཆེ་ཞིང༌། རྩེ་མོར་ཏོག་ཡོད་མེད་གཉིས་ཀ་འབྱུང་བ་འདིར་ནི་རྡོ་རྗེའི་ཏོག་ཅན་ནོ། །དབྱུག་པ་ནི་ཙང་མགོ་ཙང་གཞུག་ཧ་ཅང་ཆེ་བ་མེད་ཅིང༌། རིང་བ་རྩེ་མོར་ངེས་པར་ཏོག་ཡོད་པ་དང༌། བེ་ཅོན་ཁྲུ་དོ་ལས་མི་རིང་ཞིང༌། དབྱུག་པ་ཁྲུ་དོ་ལས་མི་ཐུང་བའོ། །ཡོངས་འདུའི་མེ་ཏོག་ནི་ཤིང་གི་ཡལ་ག་ལ་མེ་ཏོག་དཀར་རྐྱང་ངམ་སྣ་ལྔ་སྐྱེས་པའོ། །སྦྲུལ་དང་བཅས་པའི་ཁ་ཊཱཾ་ག་ནི་སྦྲུལ་གྱིས་དཀྲིས་པའི་དོན་ཡིན་ལ། ཞེས་པ་ནས། འདིའི་དྲག་པོ་དང་དྲག་མོའི་ཕྱག་ན་རྩེ་གསུམ་ལོགས་སུ་ཡོད་པས་རྩེ་གསུམ་གྱིས་མཚན་པའི་ཁ་ཌཱཾ་ག་ནི་མི་དགོས་ལ། འཇིག་རྟེན་པའི་ཁ་ཌཱཾ་ག་ལ་སྤྱི་ལྡོག་ནས་རྡོ་རྗེས་མཚན་པ་ཡང་མེད་མོད་ཀྱི། འདིར་ནི་རྡོ་རྗེའི་རིགས་སུ་སྦྱངས་པ་ཉིད་ཀྱི་ཕྱིར་རྡོ་རྗེས་མཚན་པར་བྱ་ཡང༌། མི་མགོ་གསུམ་ལ་སོགས་པའི་རྒྱས་པ་མི་དགོས་ཏེ། དབྱུག་པ་ཙང་མགོ་ཙང་གཞུག་ཅན་གྱི་སྟེང་དུ། མི་མགོ་སྐམ་རློན་གང་རུང་ཡོད་པ། མི་མགོའི་མགུལ་དུ་དར་དཔྱངས་བཅིངས་ཤིང་དྲིལ་ཆུང་བཏགས་པ་ཙམ་གྱིས་ཆོག་གོ། །ཞེས་གསུངས་སོ། །ཀུན་མཁྱེན་ཕྱོགས་རྒྱལ་བའི་སྟངས་སྟབས་དང་འདུག་སྟངས་མི་འདྲ་བར་བཞེད་དེ། དུས་འཁོར་བསྡུས་རྒྱུད་མཆན་༡༢༢ལས། འདིར་འདུག་སྟངས་དང་སྟངས་སྟབས་ཀྱི་ཁྱད་པར་མ་ཕྱེད་པར་ལྷ་མང་པོའི་སྟངས་སྟབས་འདུག་སྟངས་སུ་བྱས་པ་ལ་སོགས་པ་འཁྲུལ་བར་རིག་པར་བྱའོ། །ཞེས་གསུངས་སོ། །གསུང་དཀྱིལ་གྱི་རྣལ་འབྱོར་མ་ཡབ་དང་བཅས་པ་བརྒྱད་ཅུ་ལ་དར་གོས་མེད་པར་གཅེར་བུ་ཁོ་ན་ཡིན་ནོ། །