བདུན་པ་ཁང་ཆེན་གྱི་དགེ་འདུན་ལྷག་མ་བཤད་པ།

བདུན་པ་ཁང་ཆེན་གྱི་དགེ་འདུན་ལྷག་མ་བཤད་པ་ལ།

རྩ་བར། ཚོགས་ཀྱི་དོན་དུའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི། ཡུལ་ཀོ་ཤམ་བྷིར་གང་ཟག་འདུན་པ་ལ་སོགས་པ་དྲུག་སྡེས་ཉོན་མོངས་པ་བརྙས་པ་ལ་མི་བཟོད་པས་ཉེས་པ་གཙུག་ལག་ཁང་བརྩིགས་པ་ལས་དགེ་འདུན་ལྷག་མར་བཅས་སོ། །འདུལ་བ་བདུད་རྩིའི་ཉིང་ཁུ་ལས་ཁང་བ་དང་ཁང་ཆེན་གཉིས་ཀྱི་གླེང་གཞི་འདི་གཅིག་པུ་ལས་མ་གསུངས་སོ། །གཉིས་པ་དགག་བྱ་ནི། སྲོག་ཆགས་ལ་གནོད་པ་དང༌། རྩོད་པ་རྒྱས་པ་དང༌། དོན་དང་བྱ་བ་མང་པའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་ས་གཞི་མ་དག་པར་དཀོན་མཆོག་གསུམ་གང་ཡང་རུང་བའི་ཆེད་དུ་མངོན་གྱུར་གྱི་བདག་པོ་ཚོགས་ཀྱི་དོན་དུ་གནས་བརྩིགས་པ་ལས་གྱུར་པའི་ལྟུང་བ་དངོས་གཞིའོ་ཞེས་མཚོ་ཊཱིཀ་ལས་གསུངས་སོ། །དེ་ཡང་རྩ་བར། ཚོགས་ཀྱི་དོན་དུའོ། །ཞེས་དང༌། རྩ་བར།དུ་མའི་དོན་དུའོ། །ཞེས་པའི་ཐད་ཀྱི་ཟླ་ཟེར་ལས། ཚོགས་ཁྱིམ་པའམ་རབ་ཏུ་བྱུང་བ་བཞི་ཡན་ཆད་ཀྱི་དོན་དུའོ། །ཞེས་དང༌། གང་ཟག་དུ་མའི་གཉིས་སམ་གསུམ་གྱི་དོན་དུའོ། །བརྩིགས་ན་སྦོམ་པོའོ། །ཁང་བ་ཁང་ཆེན་གྱི་ལྷག་མར་མི་འགྱུར་ཏེ། གཅིག་དོན་མ་ཚང་བའི་ཕྱིར་དང༌། ཚོགས་དོན་མ་ཚང་བའི་ཕྱིར་རོ། །ཞེས་གསུངས་པ་དག་གི་རྗེས་སུ་འབྲང་ནས་མཚོ་ཊཱིཀ་དུ་བཤད་ལ།ཀུན་མཁྱེན་འཇམ་བཞད་ཀྱིས། ཁང་ཆེན་གྱི་ལྷག་མའི་མཚན་ཉིད་ལ། བཅས་ལྡན་དགེ་སློང་གི་གནས་མ་དག་པར་དཀོན་མཆོག་གམ་བཞི་ཡན་ཆད་ཀྱི་དོན་དུ་མ་བསྟན་པར་སྤྱོད་ལམ་བཞི་ཤོང་ཡན་ཆད་ཀྱི་གནས་བྱས་པའི་དངོས་གཞིའི་ལྟུང་བ་དེ་བཞག་ཡོད་དོ། །བཞི་བ་ཡན་ལག་ལ་བཞི་ལས། དང་པོ་ནི། གཞིའི་ཡན་ལག་ལ་གཉིས་ཏེ། གང་དུ་བརྩིག་པའི་ས་གཞི་དང༌། གང་བརྩིག་པའི་དངོས་པོའོ། །དང་པོ་ས་གཞི་མ་དག་པ་གསུམ་ལྡན་སྔར་དང་འདྲའོ། །གཉིས་པ་ནི་གནས་ཀྱི་ངོ་བོར་གྲུབ་པ་དང༌། སྤྱོད་ལམ་བཞི་ཤོང་པ་དང༌། བྱེད་འཕྲོ་གཞིའི་སེལ་བར་གཏོགས་པ་མ་ཡིན་པ་དང་གསུམ་པོ་སྔར་དང་འདྲའོ། །གཉིས་པ་བསམ་པའི་ཡན་ལག་ལ་གཉིས་ལས།འདུ་ཤེས་ནི་སྔ་མ་བཞིན་ནོ། །ཀུན་སློང་ནི་དཀོན་མཆོག་གསུམ་གའམ་དེ་གསུམ་གང་རུང་གི་ཆེད་དུ་མངོན་གྱུར་གྱི་བདག་པོ་བཞི་ཡན་ཆད་ཚོགས་ལོངས་ཀྱི་དོན་དུ་གནས་བརྩིག་པར་འདོད་པ་རྒྱུན་མ་ཆད་པའོ། །འདིར་ཁང་ཆེན་གྱི་ལྷག་མ་བསྐྱེད་པ་ལ། ཚོགས་ཀྱི་དོན་དུའོ་ཞེས་གསུངས་ཏེ། རང་གི་རྣམ་བཤད་དང་ཊཱི་ཀ་ལས་འདིར་ཁྱིམ་པ་ཡན་ཆད་རབ་ཏུ་བྱུང་བ་དང་རབ་ཏུ་མ་བྱུང་བ་ཡང་རུང་སྟེ་གང་ཟག་བཞི་ཡན་ཆད་ལ་ཚོགས་ཞེས་བྱ་བར་དགོངས་སོ། །ཞེས་སོ། །འོ་ན་ལུང་རྣམ་འབྱེད་ལས། ཚོགས་ཀྱི་ཕྱིར་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ་ཞེས་གསུངས་པ་དང་འགལ་ལོ་ཞེ་ན། རང་གི་རྣམ་བཤད་དང་ཊཱི་ཀ་ལས་དེ་ནི་གླེང་གཞིའི་དབང་གིས་ཏེ་དཔེ་ཙམ་དུ་ཟད་པས་འདིར་ཉེས་པ་མེད་དོ། །ཞེས་སོ། །དེས་ན་ཁང་བ་ཁང་ཆེན་གཉིས་ལ་ཁྱད་པར་ལྔ་ཡོད་པ་ལས། བདག་པོའི་གྲངས་ཀྱི་ཁྱད་པར་ནི། ཁང་པའི་ལྷག་མ་བསྐྱེད་པ་ལ་ནི། མངོན་གྱུར་གྱི་བདག་པོ་གཅིག་དོན་ཡན་ལག་ཏུ་དགོས་ལ། ཁང་ཆེན་གྱི་ལྷག་མ་བསྐྱེད་པ་ལ་ནི་མཚོ་ཊཱིཀ་ལྟར་ན་མངོན་གྱུར་གྱི་བདག་པོ་ཚོགས་དོན་ཡན་ལག་ཏུ་དགོས་ལ།འདུལ་བ་བདུད་རྩིའི་ཉིང་ཁུ་ལས། ཀུན་སློང་ཁྱིམ་པའམ་རབ་བྱུང་གང་ཟག་བཞིར་ལོངས་པ་ཡན་ཆད་ཀྱི་དོན་དུ་རྩིག་པ་དགོས་ཤིང༌། ཞེས་གསུངས་སོ། །ཆེད་དུ་བྱ་བའི་ཁྱད་པར་ནི་དཀོན་མཆོག་ལས་གཞན་པའི་ཆེད་དུ་བརྩིགས་པའི་གནས་ནི་ཁང་པ་ཡིན་ལ། དཀོན་མཆོག་གི་ཆེད་དུ་བརྩིགས་པའི་གནས་ནི་ཁང་ཆེན་ཡིན་ནོ། །བཙལ་བ་དགོས་མི་དགོས་ཀྱི་ཁྱད་པར་ནི། ཁང་པའི་ལྷག་མ་བསྐྱེད་པ་ལ་ནི་ས་གཞི་དང་ཡོ་བྱད་བཙལ་བ་ཡན་ལག་ཏུ་དགོས་ལ། ཁང་ཆེན་ལ་དེ་ལྟར་མ་ཡིན་ཏེ། བཙལ་རུང་མ་བཙལ་རུང་ལྷག་མར་འགྱུར་རོ། །ཚད་ལས་ལྷག་པ་དགོས་མི་དགོས་ཀྱི་ཁྱད་པར་ནི་ཁང་པ་ལ་ནི་ཚད་ལས་ལྷག་པ་དངོས་གཞིའི་ཡན་ལག་ཏུ་དགོས་ལ་ཁང་ཆེན་ལ་མི་དགོས་སོ། །