རྣམ་ཐོས་སྲས་དྲག་བྱེད་ཀྱི་སྒྲུབ་ཐབས།
ཨོཾ་སྭཱ་སྟི། གསང་བདག་ཐུགས་ལས་སྤྲུལ་པ་ནི། །མངོན་སྤྱོད་ལས་ཀྱི་བདག་པོར་བསྔགས། །རྡོ་རྗེ་དྲག་བྱེད་ལ་བཏུད་ནས། །དེ་ཡི་སྒྲུབ་ཐབས་བཤད་པར་བྱ། །ཆོ་ག་སྤྱི་ཕལ་ཆེར་སེར་ཆེན་དང་འདྲ་བ་ལས། རྟེན་གཏོར་ནག་པོ་གྲུ་གསུམ་སྙིང་གི་གཟུགས་ལྟ་བུ་བཤམ། འབུལ་གཏོར་མདུང་དམར་ཅན་བཞིན་བྱ། མདུན་བསྐྱེད་བསངས་སྦྱངས། སྟོང་པའི་ངང་ལས་བྷྲཱུཾ་ལས་གཞལ་ཡས་ཁང་དྲག་པོ་འབར་བའི་རྒྱན་གྱིས་བརྒྱན་པའི་དབུས་སུ། གནམ་ལྕགས་ཀྱི་འཁོར་ལོ་རྩིབས་བརྒྱད་པའི་ལྟེ་བར་པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། བཻ་ཡིག་ནག་པོ་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས་རྒྱལ་པོ་ཆེན་པོ་རྣམ་ཐོས་སྲས་སྐུ་མདོག་དུས་མཐའི་སྤྲིན་ལྟར་རབ་ཏུ་གནག་ལ་འཇིགས་པ། ཞལ་གཅིག་ཕྱག་གཉིས་གཡས་ཀ་ཤིའི་རས་ཀྱི་བ་དན་དཔྱངས་
པའི་རྡོ་རྗེའི་དབྱུག་ཐོ་ནམ་མཁའ་ལ་འཕྱར་བ། གཡོན་མཆོད་རྟེན་ནག་པོ་ཐུགས་ཀར་འཛིན་པ། སྤྱན་གསུམ་དམར་ལ་ཟླུམ་ཞིང་མཆེ་བ་གཙིགས་པ། ཁྲོ་གཉེར་བསྡུས་ཤིང་སྨ་ར་སྨིན་མ་དབུ་སྐྲ་ཁམ་སེར་གྱེན་དུ་བརྫེས་པ། སྟག་ལྤགས་ཀྱི་ཤམ་ཐབས་དང་དར་གྱི་སྟོད་གཡོགས་ཅན། ཀླུ་ཆེན་པོ་བརྒྱད་ཀྱིས་བརྒྱན་པ། རིན་པོ་ཆེའི་དབུ་རྒྱན་ཅན། ཕྲག་གོང་གཡས་གཡོན་ནས་ཉི་ཟླ་འཆར་བ། སྐུ་སྟོད་ནས་བྱ་གཅན་གདུག་པའི་ཚོགས་དང༌། སྐུ་སྐེད་ནས་གནོད་སྦྱིན་སྲིན་པོའི་ཚོགས་དང༌། སྐུ་སྨད་ནས་སེང་གེ་སོགས་གཅན་ཟན་གདུག་པའི་ཚོགས་དཔག་ཏུ་མེད་པ་སྤྲོ་བ། མེ་དཔུང་འབར་བའི་དབུས་ན་གཡོན་བརྐྱང་བའི་སྟབས་ཀྱིས་བཞུགས་པའོ། །འདམ་མ་བརྒྱད་ལ་ཕུཿཡིག་ནག་པོ་བརྒྱད་ཡོངས་སུ་གྱུར་པ་ལས། ཀླུ་ཆེན་བརྒྱད་པོ་ཐམས་ཅད་ཀྱང་སྐུ་མདོག་མཐིང་ནག་ཁྲོ་ཞིང་མཆེ་བ་ཅུང་ཟད་གཙིགས་པ། ཕྱག་ཐུགས་ཀར་ཐལ་མོ་སྦྱར་བས་ནོར་བུ་འཛིན་པ། སྦྲུལ་མགོའི་གདེངས་ཀ་བདུན་བདུན་དང་ལྡན་ཞིང༌། སྨད་སྦྲུལ་འཇུག་ཏུ་འཁྱིལ་བ། གཙུག་གི་ནོར་བུ་ལས་འོད་འཕྲོ་ཞིང་ཞལ་ནས་ཕུགས་ཀྱི་སྒྲ་སྒྲོག་པ། ཕྱི་རོལ་དུ་གནོད་སྦྱིན་བྱེ་བའི་ཚོགས་དང༌། ལྷ་སྲིན་སྡེ་བརྒྱད་ཀྱི་ཚོགས་ཀྱིས་ཡོངས་སུ་བསྐོར་བའོ། །སྔགས་ནི། ཨོཾ་ནི་ལཾ་བ་ར་དྷ་ར་བཛྲ་པཱ་ཎི་མཧཱ་ཡཀྵ་
རཱ་ཛ་ཀུ་བེ་ར། བཻ་རུ་དྷ་ཀ་སིདྡྷི་མྨེ་པྲ་ཡཙྪ་ཧཱུཾ་ཧཱུཾ་ཕཊ། ཅེས་པའོ། །གཏོར་མའི་ཆོ་ག་མདུང་དམར་ཅན་དང་འདྲ། བསྟོད་པ་ནི། སྟོབས་ཆེན་མི་སྡུག་འཇིགས་པའི་གཟུགས། །གཏུམ་པོ་མ་རུང་ཚར་གཅོད་པ། །རྒྱལ་ཆེན་འཁོར་དང་བཅས་རྣམས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཞེས་བརྗོད། རྗེས་གནང་གི་སྐབས། རྡོ་རྗེ་འཛིན་པ་དགོངས་སུ་གསོལ། སོགས་ཀྱིས་གསོལ་བ་བཏབ། རྗེས་གནང་གི་ངོ་བོ་སེར་ཆེན་ཉིད་འདོན་པ་སྤོས་པས་ཆོག་པ་ལ། གཞུག་གི་སྨོན་ལམ་གདབ་མི་དགོས། སློབ་མ་ཡི་དམ་གྱི་བསྙེན་སོང་ཡིན་ན་གནད་ལ་དབབ་པའི་དྲག་པོའི་རྗེས་གནང་དེ་ཡང་ངེས་པར་མཛད། དྲེགས་བྱེད་འདི་ལ་སེང་གེའི་གདན་བྱེད་པ་དང༌། ཤིང་རྟ་ལ་བཞུགས་པ་དང༌། ན་བཟའ་འཇོལ་བེར་གསོལ་བ་དང༌། གོ་ཁྲབ་སོགས་གསོལ་བ་བྱེད་པའི་ལུགས་ཀྱང་ཡོད་པ་གང་མོས་སུ་བྱའོ། །ཀུན༵་ནས་རབ་དག༵འ་རྒྱུད་གཞུང་དང༌། །འབྲེལ་བའི་སྒྲུབ་ཐབས་ཡིད་ཆེས་ཅན། །ཡིག་སྣ་ཤིན་ཏུ་མང་པོ་ཡི། །ཉེར་མཁོ་སྙིང༵་པོ༵་མདོ་ཙམ་མོ། །རྣམ་ཐོས་སྲས་དྲག་བྱེད་ཀྱི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །