གཉིས་པ་གང་གིས་སྐུར་བ་གདབ་པའི་དངོས་པོ།
གཉིས་པ་གང་གིས་སྐུར་བ་གདབ་པའི་དངོས་པོ་ནི།
ཕམ་པའི་དངོས་གཞིས་སྐུར་པ་བཏབ་པ་ཡིན་པ་དང༌། མཐོང་ཐོས་དོགས་གསུམ་གྱི་གཞི་མེད་པ་སྟེ། ཕམ་པར་འགྱུར་བ་ལྷག་པར་སྤྱོད་པས། ཞེས་དང༌། གཞི་མེད་པ། ཞེས་པས་གྲུབ་བོ། །གསུམ་པ་གང་ལ་གོ་བར་བྱ་བའི་ཡུལ་ནི།ཐ་སྙད་ལྔ་དང་ལྡན། ལུས་ཐ་མལ་པར་གནས་བདག་ལས་ཐ་དད་པ་སྟེ། རྫུན་སྨྲའི་ཕམ་པའི་སྐབས་སུ་སྔར་བཤད་ཟིན་པ་བཞིན་ནོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞིའི་ཡན་ལག་དེ་དག་གི་རྣམ་པ་མ་དོར་བར་འཛིན་པའི་ཤེས་པའོ། འདིར་དམིགས་ཀྱིས་བསལ་བ་ནི། ཕམ་པས་མ་དག་པ་ལ་དག་པར་འདུ་ཤེས་འཁྲུལ་ཏེ་སྐུར་པ་བཏབ་ན་ལྷག་མར་འགྱུར་རོ། །ཀུན་སློང་ནི་ཉམས་འདུན་གྱིས་ཕམ་པས་སྐུར་པ་འདེབས་པར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་གང་ལ་བསམས་པ་དེ་ཉིད་ལ་ངག་གི་རིག་བྱེད་ཀྱིས་ཕམ་པས་སྐུར་པ་འདེབས་པར་ཞུགས་པའོ། །བཞི་བ་མཐར་ཐུག་ནི་ཕ་རོལ་པོས་དོན་གོ་བ་སྟེ། རྩ་བར། གང་ཡང་རུང་བ་ལ་གོ་བར་བྱས་ནའོ། །ཞེས་སོ། །འདི་ལ་བམ་ལྔ་ལས། འདི་ལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། ཉམས་པར་འདུན་པ་དང༌། གཞི་མེད་པར་སྐུར་བ་དང༌། བསྙེན་པར་རྫོགས་པ་དང༌། ཕམ་པར་འགྱུར་བའི་ཆོས་དང༌། དོན་གོ་བའོ། །ཞེས་གསུངས་པའི་ཕྱིར་རོ། །སྐུར་འདེབས་འདི་ལ་ཡུལ་སྨྲ་ཤེས་དོན་གོ་དགོས་པར་འདོད་མཁན་ནི།སློབ་དཔོན་ཡོན་ཏན་འོད་དང་ཆོས་ཀྱི་བཤེས་གཉེན་ནི། གང་ལ་སྐུར་པ་གདབ་པའི་ཡུལ་དེ་སྨྲ་ཤེས་དོན་གོ་ཡན་ལག་ཏུ་དགོས་པར་བཞེད་དེ། སྨྲ་བ་པོ་ཉིད་ལ་ཡོད་པ་སྟེ། ཞེས་དང༌། རྣམ་པར་རིག་བྱེད་ལ་ནི་དོན་གོ་བའོ། །ཞེས་པའི་རང་གི་རྣམ་བཤད་དང་རྒྱ་ཆེར་འགྲེལ་ལས་ལྐུགས་པ་ལ་གཞི་མེད་པ་དང་བག་ཙམ་དག་གིས་སྐུར་པ་འདེབས་པ་ལ་སྦོམ་པོའོ། །གླེན་པ་དང་འོན་པ་དག་ལ་གཞི་མེད་པ་དང་བག་ཙམ་གྱིས་སྐུར་པ་འདེབས་པ་ལ་ཡང་སྦོམ་པོའོ། །ཞེས་གསུངས་སོ། །དེ་ཡང་ལུང་ཞུ་བ་ལས། ལྐུགས་པ་དང་གླེན་པ་དང་འོན་པ་ལ་སྐུར་པ་བཏབ་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ལ་བརྟེན་ནས་སོ། །འོན་ཀྱང་དེ་དང་ཅུང་མི་འདྲ་བ་དགེ་ལེགས་བཤེས་གཉེན་གྱིས་མཛད་པའི་ཞུ་འགྲེལ་ལས། གལ་ཏེ་ལྐུགས་པ་ལ་སྐུར་བ་གདབ་པ་སྦོམ་པོར་འདོད་ན་ལོང་བ་དང༌། འཐེང་བོ་ལ་སོགས་པ་ལ་ཡང་དེ་དང་འདྲ་བར་ཐལ་བར་འགྱུར་བས་དེ་ལྟ་བས་འདི་ནི་གདོན་པར་མི་བྱའོ། །དེ་ལྟ་བས་ན་འདི་ལ་སྐུར་བ་བཏབ་ན་ཁ་ན་མ་ཐོ་བ་ཡོངས་སུ་རྫོགས་པར་ཤེས་པར་བྱའོ། །ཞེས་གསུངས་པའི་དགོངས་དོན་འཚོལ་དགོས་སོ། །གང་ཐོས་པ་དེ་ནི་ཐོས་པ་ལས་གཞི་གཞན་མཐོང་བ་མ་ཡིན་པས། ཐོས་པ་ལ་མཐོང་ངོ་ཞེས་སྨྲ་ན་གཞི་མེད་པར་སྐུར་འདེབས་ཀྱི་ལྷག་མར་འགྱུར་རོ། །དོགས་པ་ལ་མཐོང་ངོ་ཞེས་སྨྲ་བ་ལ་སོགས་པ་ལ་ཡང་དེ་བཞིན་ནོ། །འདིའི་ཁུངས་ནི་ལུང་རྣམ་འབྱེད་ལས། ཐོས་པ་ལས་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང་དོགས་པ་ལ་བདག་གིས་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །ཞེས་གསུངས་སོ། །