འོག་ཏུ་སེངྒེ་རྐང་པ་བརྒྱད་པ་སྟེ་རྐང་པ་བརྒྱད།
འོག་ཏུ་སེངྒེ་རྐང་པ་བརྒྱད་པ་སྟེ་རྐང་པ་བརྒྱད་ནི།
སེངྒེ་ཤ་ར་བྷ་སྟེ་ཁ་དོག་ནག་པོའམ་སྔོན་པོ། དཔུང་པ་གཉིས་དང་དཔྱི་མགོ་གཉིས་སུ་གཤོག་པ་སེར་པོའམ་ཁྲ་བོ་ཆུང་ངུ་ཡོད་པ་དང་རྐང་ལག་བཞི་དང་བརྒྱད་ཡིན་ལ། དེ་བདུན་གྱིས་དྲངས་པའི་ཤིང་རྟ་སྔོན་པོ་ལ་གནོད་མཛེས་རྒྱལ་པོ་སྔོན་པོ་ཤིན་ཏུ་སྔོན་མོ་ལྟ་བུ་ཞལ་གཅིག་ཕྱག་བཞིའི་གཡས་གཉིས་ཀྱིས་གྲི་གུག་དང་རྡོ་རྗེ། གཡོན་གཉིས་ཀྱིས་ཐོད་པ་དང་དྲིལ་བུ་འཛིན་པ་ལ། དྲག་སྤྱན་མ་ལྗང་ཁུ་ཞལ་གཅིག་ཕྱག་བཞིའི་གཡས་གཉིས་ཀྱིས་དགྲ་སྟ་དང༌། རྩེ་གསུམ། གཡོན་གཉིས་ཀྱིས་སྦྲུལ་ཞགས་དང༌། ཁ་ཊྭཱཾ་ག་འཛིན་པས་འཁྱུད་པ་སྟེ། ཁྲོ་བོ་ཡབ་ཡུམ་ཐམས་ཅད་རབ་ཏུ་ཁྲོས་ཤིང་མཆེ་བ་གཙིགས་པ། སྐྲ་དམར་སེར་གྱེན་དུ་བརྫེས་པ་སྦྲུལ་གྱིས་བརྒྱན་པ་ཞལ་གཅིག་པ་ཕྱག་བཞི་དང་ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་བྱ་ཞིང་ཁྲོ་བོ་རྣམས་གཡས་བརྐྱང་དང་སྟག་ཤམ་ཕྱག་རྒྱ་དྲུག་དང༌། ཁྲོ་བོའི་ལྷ་མོ་རྣམས་གཡོན་བརྐྱང་དང་ཕྱག་རྒྱ་ལྔ་དང་ལྡན་པས་ཤིང་རྟ་ལ་གནས་པའོ། །གཡས་བརྐྱང་གི་སྟབས་དང་གཡོན་བརྐྱང་གི་སྟབས་ནི། ཇི་སྐད་དུ། གཡས་ཀྱི་བརླ་དང་པུས་མོ་བསྲང༌། །གཡོན་པ་བྱིན་པ་བརླར་ཕྱོགས་ཏེ། །ཐད་ཀར་འཇོག་པར་བྱེད་པ་དག །རྒྱ་རུ་མཐོ་ལྔར་བྱས་པ་ནི། །གཡས་བརྐྱངས་པར་ནི་རབ་ཏུ་གྲགས། །དེ་ཉིད་གོ་བཟློག་པ་ནི་གཡོན་བརྐྱང་སྟེ། །དེ་གཉིས་ལ་གཤོལ་གྱི་དབྱིབས་ལྟ་བུ་ཞེས་ཀྱང་གྲགས་སོ།།ཤིང་རྟ་དེ་རྣམས་གཙོ་བོར་ཁྲོ་མོ་རྣམས་ཀྱི་བཞུགས་གནས་ཀྱི་ཤིང་རྟ་ཡིན་པས་ཁྲོ་མོ་རྣམས་ཞལ་ཕྱིར་གཟིགས་པ་ཡིན་པ་ལྟར་ཤིང་རྟའི་གདོང་ཕྱིར་ཕྱོགས་པའམ་བསྟན་པ་ཡིན་ལ། འདྲེན་བྱེད་གྱི་སྲོག་ཆགས་རྣམས་ཀྱང་ཕྱི་ལ་འགྲོ་བའི་ཚུལ་ལྟ་བུར་གནས་པ་ཡིན་ཅིང༌། སྟེང་འོག་གི་ཤིང་རྟ་གཉིས་པོ་ཤར་དང་ནུབ་ཏུ་ཕྱོགས་པས་ཅུང་ཟད་གྱེན་དང་ཅུང་ཟད་ཐུར་དུ་ཕྱོགས་པའི་སྲོག་ཆགས་དང༌། ཤིང་རྟ་ཐད་ཀ་ན་གནས་པར་དངོས་གྲུབ་ཉེར་འཚོ་ལས་གསུངས་སོ། །དེས་ན་ཁྲོ་མོའི་ཞལ་དང་ཤིང་རྟའི་གདོང་གཉིས་ཕྱོགས་གཅིག་ལ་བསྟན་པའོ། །དེང་སྐབས་གཙོ་མོ་ཤིང་རྟའི་རྒྱབ་ཏུ་ཕྱོགས་པར་བྲིས་པ་སོགས་ནོར་བའི་ཕྲེང་བ་མང་དུ་མཆིས་སོ། །
༈ སྐུའི་སྟེགས་བུའི་ཕྱི་རོལ་མཆོད་པའི་ས་གཞི་རྟ་བབས་ཀྱི་ཀ་བའི་ནང་རོལ་དུ་ཀླུ་རྣམས་གནས་པ་ཡིན་ཏེ། དངོས་གྲུབ་ཉེར་འཚོ་ལས། ཞལ་ནང་དུ་ལྟ་བའི་དབང་དུ་བྱས་ནས་ཀ་བ་ལ་གཡས་གཡོན་གྱི་ལོགས་བསྟན་ཞིང༌། གདན་གྱི་མདུན་ཕྱོགས་སྟེགས་བུ་ལ་ཐུག་པའི་སྟེགས་བུའི་ཕྱི་རོལ་གྱི་ས་གཞི་ལ་གནས་པ་ཡིན་གྱི་ཀ་བའི་ཐད་ཀྱི་སྟེགས་བུའི་སྟེང་དུ་ཡོད་པ་མ་ཡིན་པའི་ཕྱིར་རོ། །ཞེས་གསུངས་སོ། །ཤར་དུ་རླུང་གི་དཀྱིལ་འཁོར་ནག་པོ་ཟླུམ་པོ་གཉིས་ཀྱི་གདན་ལ། གཡོན་དུ་སྟོབས་ཀྱི་རྒྱུ་ནག་པོ་དང་གཡས་སུ་པད་མ་ནག་པོ་གཉིས་གནས་ལ། རིམ་བཞིན་དུ་མཁའ་ལྡིང་གདོང་མ་སེར་མོ་དང་ལྕེ་སྤྱང་གདོང་མ་སེར་མོས་འཁྱུད་པའོ། །ལྷོར་མེའི་དཀྱིལ་འཁོར་དམར་པོ་གྲུ་གསུམ་ཟུར་རྩེ་ནང་དུ་བསྟན་པ་གཉིས་ཀྱི་གདན་ལ། གཡོན་དུ་ནོར་རྒྱས་དམར་པོ་དང་གཡས་སུ་དུང་སྐྱོང་དམར་པོ་གནས་པ་ལ། རིམ་བཞིན་དུ་འུག་གདོང་མ་དཀར་མོ་དང་སྟག་གདོང་མ་དཀར་མོས་འཁྱུད་པའོ། །བྱང་དུ་ཆུའི་དཀྱིལ་འཁོར་ཟླ་གམ་བཅད་ཁ་ནང་དུ་བསྟན་པ་གཉིས་གྱི་གདན་ལ། གཡོན་དུ་མཐའ་ཡས་དཀར་པོ་དང་གཡས་སུ་རིགས་ལྡན་དཀར་པོ་གནས་པ་ལ། རིམ་བཞིན་བྱ་རྒོད་གདོང་མ་དམར་མོ་དང་ཕག་གདོང་མ་དམར་མོས་འཁྱུད་པའོ། །ནུབ་ཏུ་སའི་དཀྱིལ་འཁོར་གྲུ་བཞི་གཉིས་ཀྱི་གདན་ལ། གཡོན་དུ་འཇོག་པོ་སེར་པོ་དང་གཡས་སུ་པད་མ་ཆེན་པོ་སེར་པོ་གཉིས་གནས་པ་ལ། གོ་རིམ་བཞིན་དུ་ཁྭ་གདོང་མ་ནག་མོ་དང་ཁྱི་གདོང་མ་ནག་མོས་འཁྱུད་པའོ། །སྟེང་དུ་ནམ་མཁའ་དཀྱིལ་འཁོར་ལྗང་ཁུ་དང་འོག་ཏུ་ཡེ་ཤེས་ཀྱི་དཀྱིལ་འཁོར་སྔོན་པོ་གཉིས་ཀྱི་གདན་ལ། རྒྱལ་བ་ལྗང་ཁུ་དང་རྣམ་པར་རྒྱལ་བ་སྔོན་པོ་གཉིས་གནས་ལ། གོ་རིམ་བཞིན་རྡོ་རྗེ་མིག་མ་སྔོན་མོ་དང་ཤིན་དུ་སྔོན་མོ་ལྗང་མོས་འཁྱུད་པའོ། །སྟེང་འོག་གི་ཀླུ་ཡང་ཁྲོ་བོའི་རྒྱབ་ཏུ་བཀོད་པའོ།།རྒྱལ་བ་རྣམ་རྒྱལ་གཉིས་གདེངས་ཀ་བདུན་པ་དང༌། གཞན་རྣམས་གདེངས་ཀ་ལྔ་བ་དང༌། ཐམས་ཅད་རིན་པོ་ཆེའི་རྒྱན་དང་ལྡན་པ། ཀླུ་ཡབ་ཡུམ་ཐམས་ཅད་ཞལ་གཅིག་པ། སྤྱན་གསུམ་པ། ཕྱག་བཞིའི་གཡས་གཉིས་ཀྱིས་བདུད་རྩིའི་བུམ་པ་དང༌། རྡོ་རྗེ། གཡོན་གཉིས་ཀྱིས་པདྨ་དང་རིན་པོ་ཆེ་འཛིན་པ། ཡབ་ཀླུ་རྣམས་རྡོ་རྗེ་དཀྱིལ་ཀྲུང་གིས། ཡུམ་རབ་གཏུམ་མ་རྣམས་འཁྱུད་པ་སྟེ་གཅེར་བུ་ཕྱག་རྒྱ་ལྔས་བརྒྱན་པ། མི་མགོའི་འཕྲེང་བ་མགུལ་དུ་འཕྱང་བའོ། །ཀླུ་ཡབ་ཡུམ་ཕྱག་གྲངས་མི་འདྲ་བ་དང་ཕྱག་མཚན་མི་འདྲ་བར་བྱེད་པ་ནི་རྣམ་པར་མ་བརྟག་པའི་བཤད་པ་ནོར་བའོ། །ཀླུ་ཡབ་ཡུམ་མམ་ཡབ་ཀླུ་དང་དེའི་ཡུམ་རབ་གཏུམ་མ་ཐམས་ཅད་ཞལ་གཅིག་ཕྱག་བཞི། ཕྱག་གཡས་པ་གཉིས་ན་བདུད་རྩིའི་བུམ་པ་དང༌། རྡོ་རྗེ། གཡོན་པ་གཉིས་ཀྱིས་པདྨ་དང་རིན་པོ་ཆེ་འཛིན་པ་ཡིན་ཏེ། སྒྲུབ་ཐབས་དཔག་བསམ་ལྗོན་ཤིང་ལས། དེ་ལ་ཀླུ་རྣམས་རྡོ་རྗེའི་གདན་གྱིས་གནས་ཤིང་རིན་པོ་ཆེས་བརྒྱན་པ། ཞལ་གཅིག་པ་ཕྱག་བཞི་པ་སྟེ། བདུད་རྩིའི་བུམ་པ་དང༌། རྡོ་རྗེ་དང༌། པད་མ་དང༌། རིན་པོ་ཆེ་འཛིན་པའོ། །ཞེས་དང༌། ཀླུ་ཡབ་ཡུམ་གྱི་སྐབས་སུ་རྗེ་བཙུན་གྱི་དུས་འཁོར་སྒྲུབ་ཐབས་དཔག་བསམ་ལྗོན་ཤིང་ལ་འཇུག་པ་ལས། ཐམས་ཅད་ཀྱང་རྡོ་རྗེའི་གདན་གྱིས་གནས་ཤིང༌། རིན་པོ་ཆེས་བརྒྱན་པ། ཞལ་གཅིག་པ། སྤྱན་གསུམ་པ། ཕྱག་བཞིའི་གཡས་གཉིས་ཀྱིས་བདུད་རྩིའི་བུམ་པ་དང་རྡོ་རྗེ། གཡོན་གཉིས་ཀྱིས་པད་མ་དང་རིན་པོ་ཆེ་འཛིན་པའོ། །ཞེས་དང༌། དུས་འཁོར་བསྐྱེད་རིམ་བདུད་རྩིའི་བུམ་བཟང་ལས། ཡབ་ཡུམ་ཐམས་ཅད་ཕྱག་མཚན་དང་རྒྱན་ཆས་འདྲ་བ་རྣམས་ཤེས་པའི་སྒོ་ནས། ཞེས་གསུངས་སོ། །འདི་ལ་སྒྲུབ་ཐབས་དཔག་བསམ་ལྗོན་ཤིང་དུ་ཀླུ་རྣམས་ཞེས་གསུངས་པ་ལ་བརྟེན་ནས་རབ་གཏུམ་མའི་སྐབས་ཀྱི་ཀླུ་རྣམས་ཕྱག་བཞི་བྱེད་པ་ནོར་ཏེ། ཀླུ་རྣམས་ཞེས་གསུངས་པས་རབ་གཏུམ་མའི་སྐབས་ཀྱི་ཀླུ་རྣམས་བཟུང་མི་དགོས་པར་དཔེར་ན་ཀླུའི་སྐབས་སུ་ཀླུ་རྣམས་སྤྲོ་བར་བྱ་སྟེ། ཞེས་གསུངས་པ་ཀླུ་ཁོ་ན་བཟུང་མི་དགོས་པར་ཀླུ་ཡབ་ཡུམ་ཐམས་ཅད་ལ་གོ་བ་དང༌། རབ་གཏུམ་མའི་སྐབས་སུ་རབ་གཏུམ་མ་རྣམས་སྤྲོ་བར་བྱ་སྟེ། ཞེས་གསུངས་པ་རབ་གཏུམ་མ་ཁོ་ན་བཟུང་བ་མ་ཡིན་པར་ཡུམ་རབ་གཏུམ་མ་དང་ཡབ་ཀླུ་དང་བཅས་པ་ལ་གོ་བ་བཞིན་ཡིན་པར་ཤེས་དགོས་པའི་ཕྱིར་རོ། །