དགུ་བ་བག་ཙམ་གྱིས་སྐུར་པ་འདེབས་པའི་དགེ་འདུན་ལྷག་མ།

དགུ་བ་བག་ཙམ་གྱིས་སྐུར་པ་འདེབས་པའི་དགེ་འདུན་ལྷག་མ་ནི།

རྩ་བར། བརྗེད་པར་བྱ་བ་གཞན་ལ་གནས་པའི་ཚིག་གིས་རྫུན་ནའོ། །ཞེས་སོ། །འདིའི་དོན་བཤད་པ་ལ་བཞི་ལས། གླེང་གཞི་ནི་ཡུལ་རྒྱལ་པོའི་ཁབ་ཏུ་གང་ཟག་མཛའ་བོ་དང་ས་ལས་སྐྱེས་གཉིས་ཀྱིས་ཉོན་མོངས་པ་མི་བཟོད་པས་ཉེས་པ་གྱད་བུ་ནོར་ལ་བྱེད་པ་པོ་དང་བྱ་བ་མ་སྦྱར་བར་དགེ་སློང་གྱད་བུ་ནོར་དང་དགེ་སློང་མ་ཨུཏྤ་ལའི་མདོག་ཀྱང་མཐོང༌། མི་ཚངས་པར་སྤྱོད་པ་ཡང་མཐོང་ཞེས་ཕམ་པས་སྐུར་པ་བཏབ་པ་ལས་དགེ་འདུན་ལྷག་མར་བཅས་སོ། །གཉིས་པ་དགག་བྱ་ནི་སྔ་མ་བཞིན་ནོ། །གསུམ་པ་ངོ་བོ་ནི། བཅས་ལྡན་དགེ་སློང་གིས་ལྟ་བ་རང་ཕྱོགས་ཡིན་ན་མཚན་མཐུན་རུང་མི་མཐུན་རུང་སྟེ་བསྙེན་རྫོགས་ཀྱི་སྡོམ་པ་གསོར་རུང་ཡན་ཆད་དང་ལྡན་པའམ། ལྟ་བ་གཞན་ཕྱོགས་བསྙེན་རྫོགས་ཀྱི་སྡོམ་པ་ཕམ་པས་མ་གོས་པ་དང་ལྡན་པ་ལ་བསམ་པ་ཉམས་འདུན་གྱིས་བྱེད་པ་པོ་དང་བྱ་བ་མ་སྦྱར་བས་ཕམ་པས་སྐུར་བ་བཏབ་པ་ལས་གྱུར་པའི་ལྟུང་བ་དངོས་གཞིའོ། །བཞི་པ་ཡན་ལག་ནི་བྱེད་པ་པོ་དང་བྱ་བ་མ་སྦྱར་བ་དགོས་པ་ལས་གཞན་སྔར་གཞི་མེད་ཀྱི་ཡན་ལག་ལྟར་ཡིན་ནོ། །བག་ཙམ་ཞེས་པ་ནི་རྒྱུ་མཚན་ཅི། གླེང་གཞིའི་སྐབས་སུ་རི་དྭགས་ཕོ་མོ་མི་ཚངས་པར་སྤྱོད་པ་མཐོང་བས། གདགས་གཞི་བག་ཙམ་ཞིག་ཡོད་པ་ཡིན་པས་ན། བག་ཙམ་ཞེས་བྱ་སྟེ། རྣམ་འབྱེད་འགྲེལ་བ་ལས། འདི་ནི་བག་ཙམ་གྱི་གཞི་ཡོད་པ་ལས་སྐུར་པ་འདེབས་པ་ཡིན་ནོ། །ཞེས་སོ། །སྦོམ་པོས་སྐུར་པ་བཏབ་ན་ཉེས་བྱས་སུ་གསུངས་པ་དེ་དག་ནི་སྤྱིར་བཏང་ཡིན་ལ་དགེ་སློང་ལ་མི་ཚངས་སྤྱོད་ཀྱིས་སྐུར་པ་འདེབས་པ་འཚང་ཆེ་བ་ལ་ལྟོས་ནས། མི་བསྟེན་པས་སྐུར་པ་འདེབས་ན་སྦོམ་པོ་ཞེས་གསུངས་པ་ནི་དམིགས་བསལ་ཡིན་ནོ། །ཕམ་པའི་དངོས་གཞི་ཡོངས་རྫོགས་ཀྱིས་སྐུར་པ་བཏབ་ན་ལྷག་མའི་དངོས་གཞི་ཡོངས་རྫོགས་བསྐྱེད་པ་ལྟར། ཕམ་པའི་སྡེའི་སྦོམ་པོར་སྐུར་པ་བཏབ་ན་ཡང་ལྷག་མའི་སྡེའི་སྦོམ་པོ་བསྐྱེད་པ་ལ་འགལ་བ་ཅི་ཞིག་ཡོད་དེ། དེས་ན་ལུང་དང་མདོ་རྩ་འགྲེལ་ལས་སྦོམ་པོར་གསུངས་པ་འདི་ཉེས་བྱས་མ་ཡིན་གྱི། སྦོམ་པོ་ཉིད་ཡིན་པར་ཤེས་པར་བྱའོ། །དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་དགེ་འདུན་གྱི་དབྱེན་བྱས་པའི་སྡིག་པ་ནི་མཚམས་མེད་པ་སྟེ། ལྟུང་བ་ནི་སྦོམ་པོའོ། །དེ་ཡང་མི་གསོད་པའི་སྦྱོར་བའི་སྦོམ་པོ་དང༌། དབྱེན་འབྱེད་པའི་ལྷག་མའི་ཕྱོགས་དང་མཐུན་པའི་སྦོམ་པོ་སྟེ་གོ་རིམ་བཞིན་ནོ། །འོ་ན་མཚམས་མེད་པ་དེ་གཉིས་ཀྱིས་སྐུར་པ་བཏབ་ན་ཅིར་འགྱུར་ཞེ་ན། བསྡུས་པ་ལས། དགེ་སློང་གིས་མཚམས་མེད་པ་ལྔས་སྐུར་པ་བཏབ་ན་དེ་དག་ཐམས་ཅད་དགེ་སློང་མ་ཡིན་པར་འགྱུར་བས་དངོས་གཞིའོ། །དེ་བཞིན་དུ་སྦོམ་པོའི་ལྟུང་བས་གླེང་ན་ཡང་དགེ་སློང་མ་ཡིན་པས་གླེང་བ་ན་དགེ་འདུན་ལྷག་མའོ། །ཞེས་གསུངས་སཽ། །འགྲེལ་ཆུང་ལས།ཡང་དག་པར་གཤེགས་པ་ངན་སེམས་ཀྱིས་ཁྲག་ཕྱུང་ངོ་ཞེས་སྐུར་པ་དང༌། དགེ་འདུན་གྱི་དབྱེན་བྱས་སོ་ཞེས་སྐུར་པ་ནི་རྩ་བ་མེད་པའི་དགེ་འདུན་ལྷག་མའི་སྦོམ་པོའོ་ཞེས་སོ། །མཚམས་མེད་དེ་གཉིས་ཀྱིས་སྐུར་པ་བཏབ་ན་ཉེས་བྱས་སུ་ལུང་དང་རང་གི་རྣམ་བཤད་དང་ཊཱི་ཀ་དང་གསུམ་ལས་བཤད་དོ། །འོ་ན་ལྟུང་བ་ཆེ་ཆུང་གསུམ་བཤད་པ་དེ་དག་གང་གི་རྗེས་སུ་འབྲང་ཞེ་ན། དང་པོ་ལྷག་མར་བཤད་པ་དེ་མི་རིགས་ཏེ། ལུང་ཞུ་བ་ལས། དགེ་འདུན་གྱི་དབྱེན་དང༌། ངན་སེམས་ཀྱིས་ཁྲག་ཕྱུང་བས་སྐུར་པ་བཏབ་ན་ཉེས་བྱས་སུ་འགྱུར་རོ། །ཞེས་གསུངས་པ་དང་འགལ་ལོ། །དེ་དག་ཐམས་ཅད་དགེ་སློང་མ་ཡིན་པར་གྱུར་བས་ཞེས་བརྗོད་པ་དེའང་མི་རིགས་ཏེ། ལུང་ཞུ་བ་ལས། དགེ་འདུན་གྱི་དབྱེན་དང་ངན་སེམས་ཀྱིས་ཁྲག་ཕྱུང་བས་སྐུར་པ་དེ་ནི་ཉེས་པ་སྦོམ་པོས་སྐུར་པ་སྟེ། ཉེས་པ་སྦོམ་པོས་ནི་དགེ་སློང་མ་ཡིན་པར་མི་འགྱུར་གྱི། དེ་ནི་བཤགས་པར་འོས་སོ། །ཞེས་གསུངས་པ་དང་འགལ་ལོ། །གཉིས་པ་སྦོམ་པོར་བཤད་པ་དེ་སྦོམ་པོ་བཏགས་པ་བ་ཡིན་ནོ་ཞེས་རིགས་སོ། །གསུམ་པ་ཉེས་བྱས་སུ་གསུངས་པ་དེ་རྣམས་ལེགས་པར་བཤད་པ་ཡིན་ཏེ། ལུང་ཞུ་བ་ལས། ཉེས་བྱས་སུ་གསུངས་པ་དེ་དང་མཐུན་པར་རང་གི་རྣམ་བཤད་ལས།དེ་གཉིས་ཀྱིས་སྐུར་བ་འདེབས་ན་ཉེས་བྱས་སུ་རྣམ་པར་གནས་པ་ཡིན་ནོ། །ཞེས་གསུངས་སོ། །