མེ་རླུང་གི་དཀྱིལ་འཁོར་གྱི་མཚམས་སུ་དུར་ཁྲོད་གྱི་འཁོར་ལོ་ལ་རབ་གཏུམ་མ་རྣམས་གནས་པ།
མེ་རླུང་གི་དཀྱིལ་འཁོར་གྱི་མཚམས་སུ་དུར་ཁྲོད་གྱི་འཁོར་ལོ་ལ་རབ་གཏུམ་མ་རྣམས་གནས་པ་ལ།
ཤར་གྱི་དུར་ཁྲོད་རྩེ་མོས་འབིགས་པ་ལ་བསེ་ནི་རི་དྭགས་ལུས་གླང་བོ་ཆེ་དང༌། མགོ་མ་ཧེ་དང་འདྲ་བ། མགྲིན་པ་རིང་བ། དཔྲལ་བ་ན་བསེ་རུ་ཡོད་པ། ལུས་ཐམས་ཅད་འབུར་བོས་གང་བ། ཁབ་ལྟ་བུའི་སྤུ་ཐོར་བུ་ཡོད་པ་དེའི་སྟེང་དུ་འཁོར་ལོའི་གདན་ལ། ཁྱི་གདོང་མ་ནག་མོ་ལ། པད་མ་ཆེན་པོས་འཁྱུད་པའོ། །ཤར་ལྷོའི་དུར་ཁྲོད་ལྷག་མ་ཅན་དུ་བྷེ་རུཎ་ཌ་སྟེ་བྱ་སེར་པོའི་གདན་དེའི་སྟེང་དུ་འཁོར་ལོའི་གདན་ལ། ཁྭ་གདོང་མ་ནག་མོ་ལ། འཇོག་པོ་སེར་པོས་འཁྱུད་པའོ། །ལྷོའི་དུར་ཁྲོད་རོ་བསྲེགས་པར་དོམ་སྔོན་པོའི་སྟེང་དུ་འཁོར་ལོའི་གདན་ལ། ཕག་གདོང་མ་དམར་མོ་ལ། རིགས་ལྡན་དཀར་པོས་འཁྱུད་པའོ། །བདེན་བྲལ་གྱི་དུར་ཁྲོད་དྲག་པོའི་གཡུལ་དུ་ཁྲུང་ཁྲུང་སྔོན་པོའི་སྟེང་དུ་འཁོར་ལོའི་གདན་ལ། བྱ་རྒོད་གདོང་མ་དམར་མོ་ལ། མཐའ་ཡས་དཀར་པོས་འཁྱུད་པའོ། །བྱང་གི་དུར་ཁྲོད་དུ་གཡག་གམ་རུལ་པར་འབྲིའི་སྟེང་དུ་འཁོར་ལོའི་གདན་ལ། སྟག་གདོང་མ་དཀར་མོ་ལ། དུང་སྐྱོང་དམར་པོས་འཁྱུད་པའོ། །དབང་ལྡན་གྱི་དུར་ཁྲོད་བྱིས་པ་ཤི་བ་ལ། བྱ་མ་བྱི་སྔོན་པོ་ནི་ཕ་ཝང་སྟེ་དེ་ལ་གཡུང་རྒོད་གཉིས་ཡོད་པར་དངོས་གྲུབ་ཉེར་འཚོ་ལས་གསུངས་ལ། དེའི་སྟེང་དུ་འཁོར་ལོའི་གདན་ལ། འུག་གདོང་མ་དཀར་མོ་ལ། ནོར་རྒྱས་དམར་པོས་འཁྱུད་པའོ། །ནུབ་ཀྱི་དུར་ཁྲོད་རྣག་གི་དྲིར་སེང་གེ་སྔོན་པོའི་སྟེང་དུ་འཁོར་ལོའི་གདན་ལ་ལྕེ་སྤྱང་གདོང་མ་སེར་མོ་ལ། པད་མ་ནག་པོས་འཁྱུད་པའོ། །རླུང་གི་དུར་ཁྲོད་སྦྲུལ་གྱིས་ཟོས་པ་ལ། མིག་སྔོན་སྟེ་ཕུག་རོན་ཆེ་ཤོས་ཙམ་ཡོད་པ་གཡུའི་མདོག་ཅན། ཤིན་ཏུ་ལེགས་པ་མཇུག་སྒྲོ་རིང་བ་ཞིག་གི་སྟེང་དུ་འཁོར་ལོའི་གདན་ལ། མཁའ་ལྡིང་གདོང་མ་སེར་མོ་ལ། སྟོབས་ཀྱི་རྒྱུ་ནག་པོས་འཁྱུད་པའོ། །སྒྲུབ་ཐབས་དཔག་བསམ་ལྗོན་ཤིང་ལས། དེ་ལྟར་གདན་བརྒྱད་ནི་འཁོར་ལོ་རྣམས་ཀྱི་འོག་ཏུ་རིག་པར་བྱའོ། །ཞེས་གསུངས་པ་ལྟར་རྗེ་བཙུན་གྱིས་གསུངས་སོ། །འདིར་འཁོར་ལོ་བརྒྱད་ནི་ཕྱོགས་བཞིར་དམར་པོ་དང༌། མཚམས་བཞིར་དཀར་པོའོ། །སྟེང་དུ་ཤིང་རྟ་ལྗང་ཁུའི་སྟེང་དུ། སྔོན་མོ་ལྗང་མོ་ལ། རྣམ་པར་རྒྱལ་བ་སྔོན་པོས་འཁྱུད་པའོ། །འོག་ཏུ་ཤིང་རྟ་སྔོན་པོའི་གདན་ལ། རྡོ་རྗེ་མིག་མ་སྔོན་མོ་ལ། རྒྱལ་བ་ལྗང་ཁུས་འཁྱུད་པའོ། །དངོས་གྲུབ་ཉེར་འཚོ་༡༨༤ལས། སྟེང་འོག་གི་རབ་གཏུམ་མའི་ཤིང་རྟ་སྟེང་འོག་ནི། ཁྲོ་བོའི་ཤིང་རྟ་དང་རྣམ་པ་ཤིན་ཏུ་འདྲ་བ་ཡིན་པ་ལ། ཆེ་ཆུང་གི་ཁྱད་པར་ཡོད་པས་སྟེང་འོག་གི་ཁྲོ་བོའི་ཤིང་རྟ་དངོས་ལ་རབ་གཏུམ་མ་འགོད་པ་ནི་མི་ལེགས་སོ། །ཞེས་དང༌། ༢༦༩སྟེང་འོག་གི་རབ་གཏུམ་མ་གཉིས་ཀྱི་ཤིང་རྟ་ནི་ཁྲོ་བོ་ཡབ་ཡུམ་གྱི་ཤིང་རྟ་དང་འདྲའོ།། ཞེས་དང༌། འབའ་མདའི་དུས་འཁོར་བསྐྱེད་རིམ་བདུད་རྩིའི་བུམ་བཟང་ལས། སྟེང་གི་ཀླུའི་གདན་གྱི་འོག་ཏུ་གསུང་གི་གར་བུ་ཁོང་སྟོང་ལ་ཤིང་རྟ་ལྗང་གུ་གདོང་ཤར་དུ་ཕྱོགས་པ་དང༌། འོག་གི་ཀླུའི་ཤིང་རྟའི་འོག་ཏུ་རྡོ་རྗེའི་ས་གཞིའི་ཁོང་སྟོང་ལ་ཤིང་རྟ་སྔོན་པོ་གདོང་ནུབ་ཏུ་ཕྱོགས་པ་སྟེ། ཤིང་རྟ་དེ་གཉིས་འདྲེན་བྱེད་ཀྱང་ཁྲོ་བོའི་ཤིང་རྟ་ལས་ཅུང་ཟད་ཆུང་བ་སྟེ། ཞེས་གསུངས་པ་དག་ལ་དཔྱད་པར་བྱ་བ་འདི་ཡོད་དེ། རབ་གཏུམ་མའི་ཤིང་རྟ་ཁྲོ་བོའི་ཤིང་རྟ་ལས་ཆུང་ན་དེ་གཉིས་འདྲ་གསུངས་པའི་འདྲ་ཚུལ་དང༌། རབ་གཏུམ་མའི་སྟེང་འོག་གི་ཤིང་རྟ་ལ་འདྲེན་བྱེད་གསལ་ཁ་མེད་པས་འདྲེན་བྱེད་ཁྲོ་བོའི་ཤིང་རྟ་ལས་ཆུང་གསུངས་པའི་དགོངས་པ་གང་ཡིན་འཚོལ་དགོས་སོ། །འོན་ཀྱང་ཤིང་རྟ་ལས་འདྲེན་བྱེད་མི་འབྲི་བའི་ཕྱག་ལེན་བྱེད་མཁན་ཡོད་དེ། འབའ་མདའི་དུས་འཁོར་བློས་བསླངས་བཞེངས་ཚུལ་རིན་པོ་ཆེའི་ཆུན་འཕྱངས་ལས། སྟེང་གི་རབ་གཏུམ་ཤིང་རྟ་ལྗང༌། །འོག་གི་རབ་གཏུམ་མའི་གདན་ནི། །ཤིང་རྟ་སྔོན་མོའོ་ཤིང་རྟ་ཡི། །རྒྱ་ཚད་ཁྲོ་བོའི་གདན་དང་འདྲ། །འདི་ལ་ཤིང་རྟ་འདྲེན་མཁན་མེད། །ཅེས་གསུངས་པའི་ཕྱིར་རོ། །ཡབ་ཡུམ་ཐམས་ཅད་ཟླུམ་པོའི་སྟབས་ཀྱིས་གནས་པ་ཡིན་ལ། ཟླུམ་པོའི་སྟབས་གོང་དུ་བཤད་ཟིན་ཏོ། །སྲིབ་ལོང་རི་ཁྲོད་ཀྱི་གྱང་རིས་སུ་ཁྱི་གདོང་མ་སོགས་ཁྱིའི་གདོང་བ་ཅན་ནམ་མགོ་བརྙན་ཅན་དུ་ཡོད་དོ། །རབ་གཏུམ་མ་ཡབ་ཡུམ་ཐམས་ཅད་ཞལ་གཅིག་ཕྱག་གཉིས་ན་གྲི་གུག་དང་ཐོད་པ་འཛིན་པ་ཡིན་ཏེ། སྒྲུབ་ཐབས་དཔག་བསམ་ལྗོན་ཤིང་ལས། གཏུམ་མོ་རྣམས་ཟླུམ་པོའི་སྟབས་ཀྱིས་གནས་ཤིང་གཅེར་བུ་ཕྱག་རྒྱ་ལྔས་བརྒྱན་པ་མི་མགོའི་ཕྲེང་བ་མགུལ་དུ་འཕྱང་བ་ཞལ་གཅིག་མ་སྤྱན་གསུམ་མ། ཕྱག་གཉིས་མ་སྟེ་གྲི་གུག་དང་ཐོད་པ་འཛིན་པའོ། །ཞེས་དང༌། ཐམས་ཅད་ཟླུམ་པོའི་སྟབས་གྱིས་གནས་ཤིང༌། གཅེར་བུ་ཕྱག་རྒྱ་ལྔས་བརྒྱན་པ། མི་མགོའི་འཕྲེང་བ་མགུལ་དུ་འཕྱང་བ། ཞལ་གཅིག་པ། སྤྱན་གསུམ་མ། ཕྱག་གཉིས་ཀྱིས་གཡས་གྲི་གུག་དང༌། གཡོན་ཐོད་པ་འཛིན་པའོ། །ཞེས་གསུངས་སོ། །གོང་དུ་བསྟན་པ་ལྟར་ལྷ་ཡབ་ཡུམ་ཞལ་སྦྱོར་རྣམས་ཞབས་རྐང་གིས་ཡབ་ཡུམ་གང་གཙོ་བོར་གྱུར་བ་མ་ཡིན་པ་དེ་ལ་འཁྱུད་དེ། སྒྲུབ་ཐབས་དཔག་བསམ་ལྗོན་ཤིང་ལས། དེ་ལྟར་བསྟན་པ་རྣམས་སུ་གཡས་བརྐྱང་གི་གནས་པ་ལ་གཡོན་བརྐྱང་གིས་འཁྱུད་པ་དང༌། རྡོ་རྗེའི་གདན་ལ་རྡོ་རྗེའི་གདན་གྱིས་འཁྱུད་པ་དང༌། པད་མ་ལ་པད་མའི་གདན་གྱིས་འཁྱུད་པ་དང༌། ས་ག་ལ་ས་གས་འཁྱུད་པ་དང༌། ཟླུམ་པོ་ལ་ཟླུམ་པོས་འཁྱུད་པ་སྟེ། ཐམས་ཅད་དུ་ངེས་པའོ། །ཞེས་གསུངས་པ་ལྟར་ཡིན་པས་ཤེས་པར་བྱའོ། །
༈ སྒྲུབ་ཐབས་དཔག་བསམ་ལྗོན་ཤིང་ལས། པགས་པའི་མཐར་སྤུ་རྣམས་སོ། ། ཞེས་པས་རླུང་གི་དཀྱིལ་འཁོར་འདི་ཉིད་ལ་ས་བོན་དང་མཚན་མ་སྣ་ཚོགས་པ་ལས་བྱུང་བའི་འབྱུང་པོ་བྱེ་བ་ཕྲག་ཕྱེད་དང་བཞི་དང་གྲུབ་པ་རྣམས་སྤྲོ་བར་བྱའོ། །ཞེས་གསུངས་པ་ལྟར་མཚོན་བྱེད་ཙམ་རེ་བྲིས་ན་འགྲིག་སྙམ་མོ།