གཉིས་པ་ཕྱི་མ་བཞི་འཆད་པ།

གཉིས་པ་ཕྱི་མ་བཞི་འཆད་པ་ལ།

སྐབས་འདིའི་ཆོས་སྤྱིར་བསྟན་པ་དང༌། བསྒོ་གྱུར་བཞི་སོ་སོར་བསྟན་པ་དང་གཉིས། དང་པོ་ལ་སྐབས་འདིའི་སྦོམ་པོ་དང༌། བསྒོ་བ་ལས་གྱུར་བའི་ཐུན་མོང་བ་འཆད་པ་དང་གཉིས། དང་པོ་སྐབས་ཀྱི་སྦོམ་པོ་བསྟན་པ་ནི། རྩ་བར། གཞན་གྱི་འཁོར་ཁ་འདྲེན་ན་སྦོམ་པོའོ། །ཞེས་སོ། །འོ་ན་མ་བྱིན་པར་ལེན་པའི་སྐབས་ནས་གཞན་དབང་བར་གྱུར་པའི་ལྷན་ཅིག་གནས་པ་དེ་དང་ཉེ་གནས་རང་གི་སར་ཁ་འདྲེན་ཅིང་འབྲོས་སུ་བཅུག་ན་ཕམ་པར་གསུངས་པ་དང༌། གཞིའི་སྐབས་ནས་ཕ་མས་མ་གནང་བའི་བུ་རབ་ཏུ་འབྱིན་ན་ཉེས་བྱས་སུ་གསུངས་པ་དང༌། མའི་རྣམ་འབྱེད་ནས་ཁྱིམ་ཐབས་ཀྱིས་མ་གནང་བའི་བུད་མེད་རབ་ཏུ་འབྱིན་ན་ལྟུང་བྱེད་དུ་གསུངས་པ་དང༌། སྐབས་འདིར་འཁོར་ཁ་འདྲེན་ན་སྦོམ་པོར་གསུངས་པ་སྟེ། བཞི་པོ་དེ་རྣམས་གཞན་དབང་བའི་མི་རང་ཕྱོགས་སུ་འཇོག་པར་མཚུངས་པ་ལ། ལྟུང་བ་ཆེ་ཆུང་ཐ་དད་དུ་སྐྱེད་པར་མི་རིགས་སོ་སྙམ་ན། འདི་རྣམས་གཞན་གསུམ་ལ་མ་བྱིན་ལེན་གྱི་ཕམ་པར་མི་འགྱུར་ཏེ། རྐུ་སེམས་མེད་པའི་ཕྱིར་རོ། །རབ་ཏུ་འབྱིན་པ་གཉིས་ལ་དབྱེན་དུ་གཏོགས་པའི་སྦོམ་པོར་མི་འགྱུར་རོ། །ཁྱིམ་འཁོར་བའི་རྒྱ་མཚོ་ལས་བསྒྲལ་སྙམ་པའི་བསམ་པས་ཞུགས་ཀྱིས། བྱ་བ་དང་སྤྱོད་པ་ཐ་དད་ཀྱི་སྒོ་ནས་འབྱེད་པར་ཞུགས་པ་མ་ཡིན་པའི་ཕྱིར་རོ། །རབ་ཏུ་འབྱིན་པ་གཉིས་ལ་ལྟུང་བ་ཆེ་ཆུང་དུ་འགྱུར་བ་ནི་གཏན་འབྲལ་དུ་འགྱུར་བ་དང་མི་འགྱུར་བས་ཡུལ་ལ་གནོད་པ་ཆེ་ཆུང་གི་བྱེ་བྲག་གིས་ཡིན་པར་གསུངས་སོ། །གཉིས་པ་བསྒོ་གྱུར་རྣམས་ཀྱི་ཐུན་མོང་ནི། རྩ་བར། བཟློག་པའི་ཚུལ་གྱིས་མི་གཏོང་བར་རྗེས་སུ་སྒྲུབ་པའི་རང་བཞིན་ནི་རྗེས་སུ་མཐུན་ནོ། །གསོལ་བ་ནི་བཟློག་པ་དང་འདྲ་བ་ཉིད་དོ། །ཞེས་སོགས་བྱུང༌། འདིའི་དོན་ལ་གསུམ་ལས།དང་པོ་བསྒོ་གྱུར་ཐུན་མོང་བའི་དགོས་པའི་དོན་ནི། ཚིག་ཚོགས་བསྐྱུང་སྟེ། ལུང་ལས་བཞམས་བསྒོ་ལ་སོགས་པ་ཐུན་མོང་ནི་ཆོས་འདི་རྣམས་བསྒོ་གྱུར་གྱི་ལྟུང་བ་རེ་རེ་ལ་རེ་རེ་གསུངས་པས་ཚིག་ཚོགས་ཆེ་བ་ལས། མདོ་རྩ་བར་ཐུན་མོང་དུ་བསྡུས་པས་ཚིག་ཚོགས་ཆུང་བའོ། །གཉིས་པ་བསྒོ་བ་ལས་གྱུར་པ་རྣམས་ཀྱི་དབྱེ་བ་རྟེན་ཕ་མའི་དབང་དུ་བྱས་ནས་དངོས་སུ་གསུངས་པའི་བསྒོ་གྱུར་གྱི་ལྟུང་བ་བཅུ་སྟེ། དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བ་སྟེ་དེ་དག་གི་དགེ་འདུན་ལྷག་མ་བཞི་དང༌། སྡིག་ལྟ་མི་གཏོང་བའི་ལྟུང་བྱེད་དེ་ལྔ་དང༌། དགེ་སློང་མའི་བཟློག་པའི་ཕམ་པ་དང༌། དཀོན་མཆོག་གཏོང་བའི་ལྷག་མ་དང༌། འཐབ་དཀྲོལ་བྱེད་པའི་ལྷག་མ་དང༌། སྡེ་ཞིང་གནས་པའི་ལྷག་མ་དང༌། སྡེ་ཞིང་གནས་སུ་འཇུག་བའི་ལྷག་མ་དང་ལྔ་སྟེ། དང་པོ་ལྔ་ནི་དགེ་སློང་ཕ་མ་གཉིས་ཀའི་ཐུན་མོང་བ་ཡིན་ལ། ཕྱི་མ་ལྔ་ནི་དགེ་སློང་མའི་བསྒོ་གྱུར་ཐུན་མོང་མ་ཡིན་པའོ། །གསུམ་པ་བསྒོ་གྱུར་ཐུན་མོང་གི་ཆོས་རྣམས་གཏན་ལ་དབབ་པ་ལ། བསྒོ་གྱུར་ཐུན་མོང་གི་ཡན་ལག་བསྟན་པ་དང༌།བསྒོ་གྱུར་ལྟུང་བའི་གྲངས་བསྟན་པ་དང༌། བསྒོ་གྱུར་སྦྱོར་ལྟུང་གི་དང་པོ་ངོས་གཟུང་བ་དང༌། བསྒོ་གྱུར་དངོས་གཞི་སྐྱེ་དུས་ངོས་གཟུང་བ་དང་་བཞི། དང་པོ་ནི། དབྱེན་བྱེད་པའི་དགེ་འདུན་ལྷག་མ་ཆོས་ཅན། བཟློག་པའི་ཡན་ལག་ལྔ་ལ་རག་ལས་ཏེ་བྱུང་བ་ཡིན་ཏེ། བསྒོ་བ་ལས་གྱུརཔའི་ལྟུང་བ་དངོས་གཞི་རྫོགས་པ་ཉིད་ཡིན་པའི་ཕྱིར་རོ། །དཔེར་ན་རྗེས་སུ་ཕྱོགས་པ་ལ་སོགས་པ་གཞན་དགུ་པོ་བཞིན་ནོ། །བསྒོ་གྱུར་གྱི་ལྟུང་བ་བཅུ་པོ་འདི་དག་བསྐྱེད་པ་ལ་བཟློག་པ་ལྔ་ཡན་ལག་ཏུ་དགོས་པ་ནི་ཐུན་མོང་གི་ཆོས་ཡིན་ནོ། །བཟློག་པ་ལྔ་ནི། བཞམས་བསྒོ་དང་གསོལ་བ་དང༌། ལས་བརྗོད་པ་གསུམ་མོ། །བཞམས་ཏེ་བསྒོ་བ་ནི་ཚིག་འཇམ་པོའི་སྒོ་ནས་གྲོས་གདབ་པ་སྟེ། ཁྱོད་ཀྱིས་བྱ་བ་མ་ཡིན་པ་འདི་མ་བྱེད་ཅིག་ཅེས་དངོས་སུ་བཟློག་པ་ཡིན་ནོ། །འོ་ན་བཞམས་བསྒོ་འདི་དགེ་འདུན་གྱིས་བྱེད་དམ། གང་ཟག་གིས་བྱེད་སྙམ་ན། ཊཱི་ཀ་ལས། དགེ་འདུན་མས་བཞམས་ཏེ་བསྒོ་ཞེས་དགེ་སློང་མའི་སྐབས་ནས་གསུངས་ཤིང༌། སྐབས་འདི་ཉིད་ཀྱི་ཊཱི་ཀ་ལས། བཞམས་ཏེ་བསྒོ་བ་ཞེས་བྱ་བ་ནི་འདིར་དགེ་འདུན་དུ་མ་གྱུར་པའི་དགེ་སློང་ཚངས་པ་མཚུངས་པར་སྤྱོད་པ་གཅུགས་པས་ཕན་ཚུན་བཟློག་པ་བྱེད་པ་ཡིན་པར་རིག་པར་བྱའོ། །ཞེས་གསུངས་སོ། །དགེ་འདུན་གྱིས་བསྐོས་ནས་གང་ཟག་གིས་དངོས་སུ་བཟློག་པ་སྟེ། བསྡུས་པ་ལས། བཞམས་ཏེ་བསྒོ་བར་བྱ་སྟེ། དགེ་འདུན་ནམ་དགེ་འདུན་གྱིས་བསྐོས་པའི་དགེ་སློང་གཅིག་གིས་གཅིག་བཏང་བའི་ཚིག་གིས་བཟློག་པར་བྱའོ། །ཞེས་སོ། །གསོལ་བ་ནི་ཊཱི་ཀ་ལས་དངོས་སུ་བཟློག་པ་བྱེད་པ་ཉིད་མ་ཡིན་གྱི་བཟློག་པའི་ཐབས་ཡིན་པས་ཞེས་བཤད་དེ། ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ་ཞེས་དགེ་འདུན་རྣམས་ལ་ཞུ་བ་ནི་གསོལ་བ་ཞེས་བྱའོ། །ལས་བརྗོད་པ་གསུམ་ནི་ལས་ཀྱི་ཆོ་ག་ལན་གསུམ་བརྗོད་པའི་སྒོ་ནས་དགེ་འདུན་གྱིས་དངོས་སུ་བཟློག་པ་ཡིན་ནོ། །དེ་ལྟར་ན་དངོས་སུ་བཟློག་པ་བཞི་ལས་མེད་ཀྱང་གསོལ་བ་ནི་བཟློག་པ་དང་འདྲ་བ་ཡང་བགྲངས་ཏེ་བཟློག་པ་ལྔ་ཞེས་ཐ་སྙད་བཏགས་སོ། །