གཉིས་པ་བསྒོ་གྱུར་ལྟུང་བའི་གྲངས་ཚད་བསྟན་པ།

གཉིས་པ་བསྒོ་གྱུར་ལྟུང་བའི་གྲངས་ཚད་བསྟན་པ་ནི།

མཚོ་ཊཱིཀ་ལས། དགེ་འདུན་གྱི་དབྱེན་བྱེད་པ་ལྟ་བུ་ལ་བསྒོ་གྱུར་གྱི་ལྟུང་བ་དུ་བསྐྱེད་ཅེ་ན། འདི་ལ་གསུམ་ལས། དང་པོ་གཞན་ལུགས་དགག་པ་ནི། ཁ་ཅིག་ན་རེ་དགེ་འདུན་གྱི་དབྱེན་བྱེད་པ་ལ་བསྒོ་གྱུར་གྱི་ལྟུང་བ་ལྔ་བསྐྱེད་དེ།བཞམས་བསྒོ་དང་གསོལ་བ་དང་ལས་བརྗོད་པ་དང་པོ་དང་བརྗོད་པ་གཉིས་པ་སྟེ་དེ་རྣམས་རེ་རེའི་མཐར་སྦོམ་པོ་རེ་རེ་སྟེ་སྦོམ་པོ་བཞི་དང་ལས་བརྗོད་པ་གསུམ་པའི་མཐར་དགེ་འདུན་ལྷག་མ་གཅིག་དང་ལྟུང་བ་ལྔ་བསྐྱེད་པ་སྟེ། ཊཱི་ཀ་ལས། བཟློག་པ་དང་འབྲེལ་བ་ཡིན་པ་དེའི་ཕྱིར་བཟློག་པ་ཇི་སྙེད་པ་ལྟུང་བ་ཡང་དེ་སྙེད་དུ་འགྱུར་རོ་ཞེས་བཤད་པས་ཤེས་སོ་ཞེས་ཟེར་རོ། །འོ་ན་ལས་བརྗོད་པ་གསུམ་པ་ལ་ལྟོས་པའི་ལྟུང་བ་གཅིག་ལས་མི་བསྐྱེད་ན། ལུང་རྣམ་འབྱེད་ལས། ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །རྫོགས་པར་བརྗོད་ན་དགེ་འདུན་ལྷག་མར་འགྱུར་རོ། །ཞེས་གསུངས་པ་དང་འགལ་ལོ། །གཉིས་པ་རང་ལུགས་བཞག་པ་ནི། དགེ་འདུན་གྱི་དབྱེན་བྱེད་པ་ལྟ་བུ་ལ་སྦྱོར་ལྟུང་ལྔ་དང་དངོས་གཞི་གཅིག་སྟེ་བསྒོ་གྱུར་གྱི་ལྟུང་བ་དྲུག་བསྐྱེད་དོ། །དེ་ལུང་རྣམ་འབྱེད་ལས། དགེ་འདུན་གྱི་དབྱེན་བྱེད་པ་ལ་བཞམས་བསྒོ་དང་གསོལ་བ་དང་ལས་བརྗོད་པ་དང་པོ་དང་བརྗོད་པ་གཉིས་པ་ལ་མི་གཏོང་ན་སྦོམ་པོ་རེ་རེ་སྟེ་སྦོམ་པོ་བཞི་དང༌། ལས་བརྗོད་པ་གསུམ་པ་མ་རྫོགས་པ་ན་སྦོམ་པོ་སྐྱེད་ཅིང་རྫོགས་པར་བརྗོད་པ་ན་དགེ་འདུན་ལྷག་མར་འགྱུར་ཞེས་གསུངས་པས་གྲུབ་བོ། །བཟླས་པ་ནི་ཐ་དད་པ་ཉིད་དོ་ཞེས་དེ་དག་གི་སྦོམ་པོ་ཐ་དད་དུ་བཤད་པས་དགེ་འདུན་ལྷག་མ་དང་ཐ་དད་པ་ལ་ལྟ་ཅི་སྨོས་སོ། །གསུམ་པ་རྩོད་པ་སྤང་བ་ལ་གཉིས་ལས། དང་པོ་གྲངས་ཉུང་བར་རྩོད་པ་སྤང་བ་ནི། གལ་ཏེ་དགེ་འདུན་གྱི་དབྱེན་བྱེད་པ་ལྟ་བུ་ལ་བསྒོ་གྱུར་གྱི་ལྟུང་བ་དྲུག་བསྐྱེད་ཅིང་ཁྱད་པར་དུ་ཡང་ལས་བརྗོད་པ་གསུམ་པ་ལ་ལྟུང་བ་གཉིས་བསྐྱེད་ན། འགལ་བ་གསུམ་སྟེ། ཚིག་གི་སྐད་ཅིག་མ་ནི་གཅིག་ཉིད་དོ་ཞེས་བཤད་པ་དང་འགལ་ཞིང༌། བམ་པོ་ལྔ་བཅུ་པ་ལས། བརྗོད་པ་གསུམ་པ་ལ་ནི་མཐའ་ལ་མི་གཏོང་བའི་དངོས་གཞི་ཁོ་ན་གསུངས་ཀྱི། བརྗོད་པ་གསུམ་པ་མ་རྫོགས་པའི་སྦོམ་པོ་མ་གསུངས་པ་དང་འགལ་ལ། བཟློག་པ་ལྔ་ལ་མི་གཏོང་ན། ལྟུང་བ་དྲུག་བསྐྱེད་ན་ཊཱི་ཀ་ལས་བཟློག་པ་ཇི་སྙེད་བྱེད་པ་ལྟུང་བ་ཡང་དེ་སྙེད་དུ་འགྱུར་རོ་ཞེས་བཤད་པ་དང་འགལ་ལོ་ཞེ་ན། ཚིག་གི་སྐད་ཅིག་མ་ནི་གཅིག་ཉིད་དོ། །ཞེས་པ་དེ་སྦྱོར་ལྟུང་གི་ཆ་ནས་བསྟན་པ་སྟེ་གསོལ་བ་དང་ལས་བརྗོད་པ་དང་པོ་དང་གཉིས་པ་ལ་རང་རང་གི་སྐབས་སུ་སྦྱོར་ལྟུང་གཅིག་བསྐྱེད་ཅིང༌། བརྗོད་པ་གསུམ་ལ་ཡང་སྦྱོར་བའི་གནས་སྐབས་སུ་སྦྱོར་ལྟུང་གཅིག་བསྐྱེད་པ་ཉིད་དོ་ཞེས་བརྗོད་དོ། །ལས་བརྗོད་པ་གསུམ་པ་མ་རྫོགས་པའི་སྦོམ་པོ་དེ་བམ་པོ་ལྔ་བཅུ་པ་ལས་མ་བཤད་ཀྱང༌། བཅོམ་ལྡན་འདས་ཀྱི་ལུང་ལས་གསུངས་པ་དེ་གཙོ་བོར་གཟུང་ངོ༌། །ཊཱི་ཀ་ལས། བཟློག་པ་ཇི་སྙེད་བྱེད་པ་ལྟུང་བ་ཡང་དེ་སྙེད་དུ་འགྱུར་རོ་ཞེས་པ་དེ་ནི། སྦྱོར་ལྟུང་གི་ཆ་ནས་བསྟན་པ་སྟེ་བཟློག་པ་ཇི་སྙེད་བྱེད་པ་སྦྱོར་བའི་ལྟུང་བ་ཡང་དེ་སྙེད་དུ་འགྱུར་ཞེས་དགོངས་སོ་ཞེས་བརྗོད་དོ། ། གཉིས་པ་གྲངས་མང་བར་སྒྲོ་འདོགས་ལ་རྩོད་པ་སྤང་བ་ནི། ཁ་ཅིག་ན་རེ་དགེ་འདུན་གྱི་དབྱེན་བྱེད་པ་ལྟ་བུ་ལ་བསྒོ་གྱུར་གྱི་ལྟུང་བ་བདུན་བསྐྱེད་དེ། ལུང་རྣམ་འབྱེད་ལས། དགེ་འདུན་མཐུན་པ་དབྱེ་བའི་ཕྱིར་བརྟུལ་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ། །ཞེས་གསུངས་ནས། དེའི་རྗེས་སུ་བཞམས་བསྒོ་ལ་སོགས་པ་ལ་མི་གཏོང་བའི་ལྟུང་བ་དྲུག་གསུངས་པས་གྲུབ་བོ་ཞེས་ཟེར་རོ། །འོན་ཀྱང་བཞམས་བསྒོའི་སྔ་རོལ་གྱི་ཉེས་བྱས་དེ་ནི་བསྒོ་བ་ལས་གྱུར་པ་མ་ཡིན་ཏེ། བསྒོ་བ་གཏན་ནས་མ་བྱས་པའི་ཕྱིར་རོ། །ལུང་ལས་དགེ་འདུན་གྱི་དབྱེན་བྱེད་པའི་ལྟུང་བ་བདུན་གསུངས་ཀྱང་བསྒོ་བ་ལས་གྱུར་པ་དྲུག་ཉིད་དོ། །ཞེས་མཚོ་ཊཱིཀ་དེར་བཤད་པའི་གཞན་གྱི་ལུགས་དེ་འཐད་པ་འདྲ་སྟེ། ཊཱི་ཀ་ལས། བཟློག་པ་ཇི་སྙེད་བྱེད་པ་ལྟུང་བ་ཡང་དེ་སྙེད་དུ་འགྱུར་རོ། ཞེས་གསུངས་པ་དང༌། རིགས་པ་ནི། བརྗོད་པ་གསུམ་པ་ལ་ལྟུང་བ་སྔ་ཕྱི་གཉིས་བཞག་ན་བརྗོད་པ་དང་པོ་གཉིས་ལ་ལྟུང་བ་གཉིས་གཉིས་འགྱུར་བས་སོ། །རིན་ཕྲེང་ལྟར་ན་ཀུན་མཁྱེན་འཇམ་བཞད་ཀྱིས། བསྒོ་གྱུར་གྱི་ལྟུང་བའི་མཐར་ཐུག་གྱི་སྐབས་སུ་ཊཱི་ཀ་ལས། དངོས་པོ་འདི་ལྟ་བུ་ཐོང་ཞིག ཅེས་བྱ་བ་ལ་སོགས་པ་བརྗོད་པར་ཚིག་ཕལ་ཆེར་བྱས་པ་ཉིད་ཡིན་པས་དེ་ནི་འདིར་དངོས་གཞིའི་དུས་ཡིན་ནོ། །ཞེས་དང༌། རང་འགྲེལ་ལས། སྐད་ཅིག་མ་གང་ལ་བྱས་པ་ཉིད་གང་ཡིན་པ་དེ་ནི་འདིར་དངོས་གཞིའི་དུས་སུ་ཤེས་པར་བྱའོ། །ཞེས་པ་ལྟར་བརྗོད་པ་གསུམ་པའི་ཚིག་ཕལ་ཆེར་བྱས་པ་ན་འབྱུང་བར་གསུངས་པ་ནི། རྩ་བར། ཚིག་ཕལ་ཆེར་བྱས་པ་ཉིད་ན་བྱས་པ་ཉིད་དོ། །ཞེས་པ་དང་བསྟུན་ནས་གསུངས་སོ། །འོན་ཀྱང་འདུལ་བ་བདུད་རྩིའི་ཉིང་ཁུ་ཡང་མཚོ་ཊཱིཀ་དང་མཐུན་པས་དཔྱད་པར་བྱའོ། །གསོལ་བ་འགོ་བརྩམས་ནས་གསོལ་བ་མ་རྫོགས་ཀྱི་བར་དུ་ཚིག་གི་བྱ་བ་རྫོགས་པའི་སྐད་ཅིག་མ་ནི་ཚིག་གཅིག་པ་ཉིད་དེ་སྦྱོར་ལྟུང་གཅིག་བསྐྱེད་པ་ཉིད་ཡིན་གྱི། གསོལ་བའི་སྟོད་སྨད་བར་གསུམ་ལ་སྦྱོར་ལྟུང་ཐ་དད་གསུམ་བསྐྱེད་པ་ནི་མ་ཡིན་ནོ། །ཊཱི་ཀ་ལས་ཆ་ཤས་རེ་རེ་ལ་མ་ཡིན་རྩ་བ་རེ་རེ་ལ་ཡང་མིན་ནོ་ཞེས་པ་ནི་དོན་གྱི་ཆ་ཤས་རེ་རེ་ལ་ལྟོས་པའི་ལྟུང་བ་ཐ་དད་རེ་རེ་བསྐྱེད་པ་མ་ཡིན་ལ། ཚིག་གི་རྩ་བ་རེ་རེ་སྟེ་ཚིག་གི་རྐང་པ་རེ་རེ་ལ་ལྟོས་པའི་ལྟུང་བ་ཐ་དད་རེ་རེ་བསྐྱེད་པ་མ་ཡིན་ཞེས་པའོ། །དེ་བཞིན་དུ་ལས་བརྗོད་པ་དང་པོ་དང་གཉིས་པ་ལ་ཡང་རང་རང་གི་ཚིག་གི་སྐད་ཅིག་མ་ནི་གཅིག་ཉིད་དོ་ཞེས་ཀྱང་མདོ་འདིས་བསྟན་ཏོ། ། མཇུག་སྡུད་བརྗོད་པ་ལས་ལྟུང་བ་ཐ་དད་བསྐྱེད་དམ་ཞེ་ན། མཇུག་སྡུད་བརྗོད་པ་ནི་ལས་བརྗོད་པ་གསུམ་པ་ལས་ཐ་དད་པ་མ་ཡིན་ནོ། །ཊཱི་ཀ་ལས།དེ་ཡང་བཟླས་པ་ཐ་མའི་ནང་དུ་གཏོགས་པར་རིགས་སོ། །ཞེས་སོ། །འཇུག་པ་ནི་གཉིས་ཏེ། རྩོམ་པ་ལ་འཇུག་པ་དང༌། མི་གཏོང་བའི་བདག་ཉིད་ཀྱི་འཇུག་པའོ། །དང་པོ་ནི་སྦྱོར་བའི་སྦྱོར་བ་སྟེ་ཉེས་བྱས་སུ་འགྱུར་བའོ། ། གཉིས་པ་ནི་སྦྱོར་བ་ཉིད་ཡིན་ཏེ། མི་གཏོང་བའི་བདག་ཉིད་ཀྱི་འཇུག་པ་ནི་སྦྱོར་བ་ཉིད་དོ། །ཞེས་གསུངས་སོ། །དེ་ཡང་བཞམས་བསྒོ་ལ་སོགས་པས་བཟློག་ཀྱང་མི་གཏོང་བའི་བདག་ཉིད་ཀྱི་འཇུག་པ་སྟེ། དགེ་འདུན་གྱི་དབྱེན་བྱེད་པ་ལྟ་བུ་ལ་བཟློག་ཀྱང་མི་གཏོང་བར་ལུས་ངག་གིས་འཇུག་པའམ། བསམ་པས་མི་གཏོང་བར་འཇུག་པ་ནི་དགེ་འདུན་ལྷག་མའི་སྦྱོར་བ་ཉིད་ཡིན་པས། སྦྱོར་བའི་སྦོམ་པོ་བསྐྱེད་པ་ཉིད་དོ། །