རྟེན་གསུམ་ལ་མེ་ཏོག་དང་མར་མེ་དང་ན་བཟའ་ཕུལ་བའི་ཕན་ཡོན་བསྟན་པ།

༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་དུ་བཞུགས་ཏེ། ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་འཁོར་དང་བཅས་ལ་ཚལ་དེ་ཉིད་ཕུལ་ནས་མཐར་གྱིས་གསེར་སྲང་བྱེ་བ་ཕྲག་བརྒྱ་ཕུལ་བ་དེའི་ཚེ་བདག་གཅིག་པུས་བསོད་ནམས་བྱེད་པ་ལ་དེ་ཙམ་ངོ་མཚར་མི་ཆེ་ཡིས། བདག་གིས་སྐྱེ་བོ་མང་པོ་ལ་ཕན་གདགས་པ་དང་། བསོད་ནམས་ཀྱང་མང་པོ་བསྐྱེད་པའི་ཕྱིར་མཉན་ཡོད་ན་གནས་པའི་སྐྱེ་བོ་རྣམས་དད་པ་བསྡུས་ཏེ། སངས་རྒྱས་འཁོར་དང་བཅས་པ་ལ་བསྙེན་བཀུར་བྱའོ་སྙམ་ནས་མཉན་ཡོད་ཀྱི་རྒྱལ་པོ་ལ་གསོལ་ཞིང་། དེས་ཀྱང་དྲིལ་བསྒྲགས་ཏེ། ད་སྟེ་ཞག་བདུན་ན་ཁྱིམ་བདག་མགོན་མེད་ཟས་སྦྱིན་གྱིས་དེ་བཞིན་གཤེགས་པའི་ཉན་ཐོས་རྣམས་ཀྱི་ཕྱིར་གླང་པོ་ཆེ་ལ་ཞོན་ནས། དད་པ་སྡུད་པར་འདོད་ཀྱིས་ཁྱེད་རྣམས་ཀྱིས་ཇི་ཙམ་ཡོངས་སུ་གཏང་བར་བྱ་བ་དེ་ཡོངས་སུ་གཏོང་བར་གྱིས་ཤིག་ཅེས་བསྒོའོ། །དེ་ནས་ཞག་བདུན་ལོན་པ་དང་ཁྱིམ་བདག་གླང་པོ་ཆེ་ལ་ཞོན་ནས་དད་འབུལ་སྡུད་པར་བྱེད་པ་ན། སྐྱེ་བོ་རྣམས་ཀྱིས་རང་རང་གི་འབྱོར་པ་དང་བསྟུན་ནས། གོས་དང་རྒྱན་དང་གསེར་དངུལ་ལ་སོགས་པའི་དངོས་པོ་རྣམས་སྦྱིན་པར་བྱེད་ཅིང་དེས་ཀྱང་གཞན་ལ་ཕན་གདགས་པའི་ཕྱིར་ལེན་པར་བྱེད་དེ། དེའི་ཚེ་བུད་མེད་ཤིན་ཏུ་དབུལ་མོ་ཞིག་གིས་ཟླ་བ་གསུམ་གྱིས་བར་དུ་འབད་པ་ཆེན་པོས་བཙལ་བས་རས་ཡུག་གཅིག་རྙེད་པ་དེ་ལུས་ལ་གྱོན་ནས་ལམ་སྲང་དུ་ཕྱིན་པ་ན་དེས་ཁྱིམ་བདག་མགོན་མེད་ཟས་སྦྱིན་དེ་ལྟར་འོང་བ་མཐོང་ནས། དགེ་བསྙེན་ཞིག་ལ་དྲིས་ཏེ། ཁྱིམ་བདག་འདི་ཕྱུག་ཅིང་ནོར་མང་ལ་ལོངས་སྤྱོད་ཆེ་སྟེ། གཏེར་ས་འོག་ཏུ་སྦས་པ་རྣམས་ཀྱང་མཐོང་ན་ཅིའི་ཕྱིར་འདི་གཞན་གྱིས་ཁྱིམ་ནས་སློང་ཞིང་སྐོར་བར་བྱེད། དགེ་བསྙེན་དེས། གཞན་ལ་ཕན་གདགས་པའི་ཕྱིར་ཏེ་གང་དག་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་བཤོས་གསོལ་མི་ནུས་པ་དེ་དག་གི་དོན་དུ་ཕན་པར་བྱེད་དེ། ཅི་ནས་མང་པོ་བསྡོངས་ཏེ་བཅོམ་ལྡན་འདས་ལ་དབུལ་དུ་འཇུག་གོ་ཞེས་ཟེར་རོ། །དེ་ནས་བུ་མོ་དེས། བདག་སྔོན་བསོད་ནམས་མ་བསགས་པས། བདག་གཅིག་པུས་སངས་རྒྱས་འཁོར་དང་བཅས་པ་ལ་བ ཤོས་འདྲེན་པར་མ་ནུས་པས་བདག་གི་འདི་ལ་ཅུང་ཟད་འབུལ་བར་བགྱིའོ་སྙམ་སྟེ་རང་ལ་ཅི་བདོག་བལྟས་པས་རས་དེ་ལས་དངོས་པོ་ཅིའང་མ་མཐོང་ནས། འདི་ད་ལྟར་གནས་འདི་ནས་ཕུལ་ན་བདག་གཅེར་བུར་གྱུར་པས་མི་ནུས་ཀྱི་ཁང་ཐོག་ཏུ་སོང་ནས་དོར་རོ་སྙམ་སྟེ་དེ་ཁང་སྟེང་དུ་ཕྱིན་ནས་རས་དེ་ཕུད་ནས། ཁྱིམ་བདག་མགོན་མེད་ཟས་སྦྱིན་གྱི་ཐོག་ཏུ་འཕང་བ་དང་། ཁྱིམ་བདག་དེའང་འཕྲིག་{མཁྲིགས} ཟོས་ནས་གཡོག་རྣམས་བལྟར་བཏང་བས་བུ་མོ་དེ་ཙོག་ཙོག་པོར་འདུག་པ་མཐོང་ནས་གཏམ་དྲིས་པས། དེས་ལོ་རྒྱུས་དྲང་པོར་བསྙད་པས་ཁྱིམ་བདག་མགོན་མེད་ཟས་སྦྱིན་གྱིས་ཐོས་ནས་མཆོག་ཏུ་ངོ་མཚར་ཏེ་བུ་མོ་དེ་ལ་གོས་དང་རྒྱན་སྣ་ཚོགས་པ་བསྐོན་ནོ། །དེ་ནས་དེ་རིང་པོོར་མ་ལོན་པར་ཚེ་ཡི་དུས་བྱས་ཏེ་སུམ་ཅུ་རྩ་གསུམ་གྱི་ལྷའི་གནས་སུ་སྐྱེས་ཤིང་། དེ་སྐྱེས་མ་ཐག་ཏུ་ལྷའི་བུ་མོ་གཞན་སུ་ལ་ཡང་མེད་པའི་གོས་ཀྱི་མཆོག་དག་ཀྱང་དེ་ལས་བྱུང་ངོ་། །དེ་ནས་དེ་ཞག་མ་ལོན་པར་བཅོམ་ལྡན་འདས་ཀྱི་སྤྱན་སྔར་འོངས་ཏེ་དེའི་འོད་ཀྱིས་རྒྱལ་བྱེད་ཚལ་ཐམས་ཅད་སྣང་བར་བྱས་ཤིང་། བཅོམ་ལྡན་འདས་ཀྱིས་དེ་ལ་མཐུན་པའི་ཆོས་བསྟན་པས་ལྷའི་བུ་མོ་དེ་རྒྱུན་དུ་ཞུགས་པའི་འབྲས་བུ་མངོན་དུ་བྱས་ནས་དགའ་བའི་ཚིག་བརྗོད་དེ་རང་གི་གནས་སུ་སོང་ངོ་། །ཕྱིར་ནངས་བཅོམ་ལྡན་འདས་ཀྱིས་འཁོར་རྣམས་ལ་བཀའ་སྩལ་པ། རས་ཕུལ་བའི་བུད་མེད་དེ་ཁྱིམ་བདག་མགོན་མེད་ཟས་སྦྱིན་དད་པ་སྡུད་པར་བྱེད་པ་ལ་རས་ཕུལ་ནས་ཤི་སྟེ། ལྷའི་ཡུལ་དུ་སྐྱེས་ནས། དེ་མདང་སུམ་ངའི་ཐད་དུ་འོངས་ཏེ་ངས་དེ་ལ་ཆོས་བསྟན་ནས། བདེན་པ་མཐོང་བར་གྱུར་ཏོ། །དགེ་སློང་དག་དེ་བས་ན་འདི་ལྟར་བསླབ་པར་བྱ་སྟེ། སངས་རྒྱས་དང་ཆོས་དང་དགེ་འདུན་རྣམས་ལ་བཀུར་སྟི་བྱའི་བཀུར་སྟི་མེད་པར་མི་བྱའོ། །ཞེས་ཁྱེད་ཀྱིས་དེ་ལྟར་བསླབ་པར་བྱའོ་གསུངས། འདི་གསུམ་གྱིས་ནི་རྟེན་གསུམ་ལ་མེ་ཏོག་དང་མར་མེ་དང་ན་བཟའ་ཕུལ་བའི་ཕན་ཡོན་བསྟན་པ་ཡིན་ནོ། །སྟོན་པ་མཉན་ཡོད་ན་བཞུགས་པའི་ཚེ། རྒྱལ་པོའི་ཁབ་ཀྱི་གྲོང་ཁྱེར་ནས་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་མ་མཐོང་ནས་ཡུན་རིང་ཞིག་ལོན་པས་མྱ་ངན་གྱིས་ནོན་ནས་བློན་པོ་རྣམས་ལ་དེའི་གཏམ་སྨྲ་བ་སངས་རྒྱས་ཀྱི་ལྷའི་སྙན་རྣམ་པར་དག་པ་མི་ལས་འདས་པས་གསན་ནས། གནས་དེར་དབྱར་ཟླ་གསུམ་འདས་པའི་འོག་ཏུ་ལྗོངས་རྒྱུ་ཞིང་མཐར་གྱིས་གཤེགས་པ་ལས་ནགས་ཁྲོད་ཅིག་ཏུ་བྱོན་པ་ན། དེར་ནེ་ཙོ་མི་སྐད་ཤེས་པ་ཞིག་ཡོད་པ་དེས། བཅོམ་ལྡན་འདས་གཤེགས་པ་མཐོང་ནས་ཤིན་ཏུ་རིངས་པར་སོང་སྟེ། བཅོམ་ལྡན་འདས་ཚུར་གཤེགས། གཤེགས་པ་ལེགས་སོ། །བདག་ལ་ཕན་གདགས་སུ་གསོལ། ནགས་ཁྲོད་འདི་ཁོ་ནར་དོ་ནུབ་བཞུགས་སུ་གསོལ། །ཅེས་གསོལ་པས། བཅོམ་ལྡན་འདས་ཀྱང་དེ་ལ་ཕན་གདགས་པའི་ཕྱིར་དེ་གནས་པའི་ཤིང་དྲུང་དུ་རྩྭ་བཏིང་ནས་བཞུགས་ཤིང་། དགེ་སློང་གཞན་རྣམས་ཀྱང་ཤིང་གཞན་གྱི་དྲུང་དུ་འཁོད་དོ། །དེ་ནས་ནེ་ཙོ་དེས། སངས་རྒྱས་འཁོར་དང་བཅས་པ་ལ་མི་དང་མི་མ་ཡིན་གྱི་རིགས་ཀྱིས་གནོད་པ་བྱེད་པར་དོགས་ཏེ། མཚན་ཐོག་ཐག་ཏུ་ནགས་ཁྲོད་དེ་ནས་ཕན་ཚུན་སྐོར་བར་བྱེད་དོ། །དེ་ནས་ནམ་ལངས་པ་དང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བདག་ནི་དུད་འགྲོའི་སྐྱེ་གནས་སུ་སྐྱེས་པ་ལགས་པས། བདག་ལ་བཅོམ་ལྡན་འདས་མཆོད་པའི་རྒྱུ་ཅི་ཡང་མ་མཆིས་ན་བཟོད་པར་མཛད་དུ་གསོལ། བདག་སྔོན་དུ་མཆིས་ཏེ་རྒྱལ་པོ་གཟུགས་ཅན་སྙིང་པོ་ལ་སྦྲན་པར་འཚལ་ལོ། །ཞེས་གསོལ་ཏེ། དེ་སྔོན་དུ་ཕྱིན་ནས་རྒྱལ་པོ་གཟུགས་ཅན་སྙིང་པོ་ཁང་བཟང་གི་སྟེང་ན་རྩེ་ཞིང་འདུག་པ་ལ། ཀྱེ་རྒྱལ་པོ་མཁྱེན་པར་མཛོད་ཅིག སངས་རྒྱས་འཁོར་དང་བཅས་པ་ཁྱེད་ཀྱི་ཡུལ་དུ་གཤེགས་ཀྱིས། ལྷ་ཁྱོད་ཀྱིས་བཤོས་སྟ་གོན་མཛད་པར་རིགས་སོ། །དེ་ཐོས་པ་དང་རྒྱལ་པོས་རིངས་པར་བློན་པོ་དང་འཁོར་གྱི་ཚོགས་ལ་བསྒོ་ཞིང་བཀུར་སྟི་ཆེན་པོས་སངས་རྒྱས་འཁོར་དང་བཅས་པ་སྤྱན་དྲངས་ནས་ཞལ་ཟས་བཟང་པོས་ཚིམས་པར་བྱས་སོ། །དེ་མཐོང་བ་དང་ནེ་ཙོ་དེ་ཤིན་ཏུ་དགའ་ནས་རྒྱལ་པོའི་མདུན་ལོགས་སུ་ཕན་ཚུན་དུ་འཕུར་ཞིང་ལྡིང་བ་ལས་ཁྲས་ཁྱེར་ཏེ་བསད་དོ། །དེ་སངས་རྒྱས་ལ་སེམས་དགའ་བཞིན་དུ་ཤི་ནས་སུམ་ཅུ་རྩ་གསུམ་གྱི་གནས་སུ་ལྷའི་བུ་མོར་སྐྱེས་ཏེ་དེ་ཞག་མ་ལོན་པར་བཅོམ་ལྡན་འདས་ཀྱི་སྤྱན་སྔར་འོངས་ནས་ཆོས་ཉན་པས་རྒྱུན་དུ་ཞུགས་པ་ཐོབ་ནས་དགའ་བའི་ཚིག་བརྗོད་དེ་ལྷ་ཡུལ་དུ་སོང་ངོ་། །ཕྱིར་ནངས་བཅོམ་ལྡན་འདས་ཀྱིས་འཁོར་རྣམས་ལ་ནེ་ཙོ་གང་གིས་ནགས་ཁྲོད་དེར་ནུབ་མོ་དགོང་མལ་ལ་སྤྱན་དྲངས་པ་དེ་ཁྱོད་ཀྱིས་མཐོང་ངམ། གསོལ་པ་བཅོམ་ལྡན་འདས་མཐོང་ལགས་སོ། །བཀའ་སྩལ་པ་དགེ་སློང་དག་ནེ་ཙོ་དེ་ཉིད་ཤི་ནས་སུམ་ཅུ་རྩ་གསུམ་གྱི་ལྷར་སྐྱེས་ཏེ་མདང་སུམ་འདིར་འོངས་ཏེ་བདེན་པ་མཐོང་ནས་ཕྱིར་སོང་ངོ་། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། བཅོམ་ལྡན་འདས་ཀྱིས། སྔོན་སངས་རྒྱས་འོད་སྲུང་གི་དུས་སུ། དེ་དགེ་བསྙེན་དུ་གྱུར་པ་བསླབ་པ་ལྷོད་པར་བྱས་ཏེ་དེའི་རྣམ་པར་སྨིན་པས་ནེ་ཙོར་སྐྱེས་སོ། །ང་ལ་སེམས་དགའ་བར་བྱས་པ་དེས་ལྷར་སྐྱེས་སོ། །དེས་བསླབ་པའི་གཞི་ལྷག་མ་རྣམས་བསྲུང་བ་དེས་ནི་བདེན་པ་མཐོང་བར་གྱུར་ཏོ། །དགེ་སློང་དག་དེ་བས་ན་ལས་གཅིག་ཏུ་ངེས་པར་གནག་པ་དང་ལས་འདྲེས་མ་རྣམས་སྤངས་ལ་གཅིག་ཏུ་ངེས་པར་དཀར་བ་རྣམས་འབའ་ཞིག་ལ་གཏད་པར་བྱ་སྟེ་དེ་ལྟར་བསླབ་པར་བྱའོ། །ཞེས་བཀའ་སྩལ་ཏོ། །