གསུམ་པ་བསྒོ་གྱུར་སྦྱོར་ལྟུང་གི་དང་པོ་ངོས་བཟུང་བ།

གསུམ་པ་བསྒོ་གྱུར་སྦྱོར་ལྟུང་གི་དང་པོ་ངོས་བཟུང་བ་ནི།

བཞམས་ཏེ་བསྒོ་བ་ལ་མི་གཏོང་ན་སྦྱོར་ལྟུང་དང་པོ་བསྐྱེད་དེ། ལུང་རྩ་འགྲེལ་དང་མདོ་རྩ་འགྲེལ་ལ་སོགས་པ་གཞུང་དྲུག་གིས་གྲུབ་པ་ཡིན་ཏེ། ལུང་རྣམ་འབྱེད་ལས། བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །ཞེས་དང༌། ལུང་དེའི་འགྲེལ་བ་ལས། གང་ཟག་གི་ཚིག་གིས་བཞམས་ཏེ་ཕྱིར་བཟློག་པ་མི་གཏོང་ན་ཡང་ཉེས་པ་སྦོམ་པོར་འགྱུར་བ་སྟེ། གང་ཟག་གིས་བསྒོ་བ་དེ་དགེ་འདུན་གྱིས་བསྒོ་བ་ལ་འཇུག་པ་ཉིད་ཡིན་པས་སྦྱོར་བ་ཡིན་པའི་ཕྱིར་རོ། །ཞེས་དང༌། འཇུག་པ་ནི་སྦྱོར་བ་ཉིད་དོ། །ཞེས་དང༌། ཊཱི་ཀ་ལས། དགེ་འདུན་གྱི་དབྱེན་བྱ་བ་ལ་རྩོལ་བ་ལ་སོགས་པའི་འཇུག་པ་ནི་སྦྱོར་བ་ཉིད་དེ་སྦོམ་པོ་ཡིན་ནོ། །འཇུག་པ་ཞེས་བྱ་བའི་གནས་སྐབས་ཀྱི་བྱེ་བྲག་མ་བསྟན་པས་ན། བཞམས་ཏེ་བསྒོ་བ་དང༌། ཞེས་དང༌། ཊཱི་ཀ་ལས།ཐ་མ་མ་གཏོགས་པའི་མི་གཏོང་བ་ནི་སྦྱོར་བ་ཉིད་དོ། །ཞེས་དང༌། བམ་པོ་ལྔ་བཅུ་པ་དང་གཞུང་འགྲེལ་ལས། བཞམས་ཏེ་བསྒོ་བ་ན་མི་གཏོང་ན་སྦོམ་པོ། ཞེས་དང༌། འདུལ་པ་བདུད་རྩིའི་སྙིང་ཁུ་༢༣ལས། བརྗོད་པ་དང་པོ་གཉིས་པ་གསུམ་པ་མ་རྫོགས་ཙམ་གྱི་བར་རྣམ་ལ་སྦོམ་པོ་རེའོ། །ཞེས་གསུངས་སོ། །གཞུང་དེ་དག་གིས་བཞམས་ཏེ་བསྒོ་བ་ན་མི་གཏོང་ན་སྦོམ་པོ་གསུངས་པ་མི་འཐད་པར་ཐལ། མེ་ཏོག་ཕྲེང་རྒྱུད་ལས། བཞམས་ཏེ་སྒོ་བར་མི་གཏོང་ན། ། ཉེས་བྱས་ཉིད་དུ་རྣམས་པར་བཞག །ཞེས་དང༌། སོ་ཐར་ཊཱི་ཀ་ལས། བཞམས་ཏེ་བསྒོས་ཀྱང་མི་གཏོང་ན་ཉེས་བྱས་ཉིད་དུ་རྣམ་པར་བཞག ། ཞེས་དང༌། འདུལ་པ་བསྡུས་པ་ལས། བཞམས་ཏེ་བསྒོ་ན་ཉེས་བྱས་སོ། །ཞེས་གསུངས་པའི་ཕྱིར་ཟེར་བ་དང༌། དེ་འདྲ་བ་དེ་སྦོམ་པོ་མ་ཡིན་པར་ཐལ། དེ་འདྲའི་ལྟུང་བ་ལ་དངོས་གཞིའི་བརྗོད་པ་དང་པོ་སོགས་ཡན་ལག་དུ་མ་མ་ཚང་བ་ཡིན་པའི་ཕྱིར།ཁྱབ་སྟེ། རྩ་བར། དུ་མ་མ་ཚང་བ་ནི་དེ་བས་ཀྱང་ངོ། །ཞེས་གསུངས་པའི་ཕྱིར་ཟེར་ན་དཔྱད་པར་ཞུའོ། །བཞི་པ་བསྒོ་གྱུར་དངོས་གཞི་སྐྱེ་དུས་ངོས་གཟུང་བ་ནི། དེའི་མཐའ་ལ་མི་གཏོང་ནའོ། །ཞེས་བྱུང༌། འདིའི་དོན་ནི། གང་གི་ཚེ་ན་དབྱེན་བྱེད་པ་ལ་སོགས་པའི་ལྟུང་བ་དངོས་གཞི་རྫོགས་པར་འགྱུར་ཞེ་ན། བསྒོ་བའི་ལས་བརྗོད་པ་གསུམ་པ་དངོས་ཉིད་རྫོགས་པ་དེའི་མཐའ་ལ་མི་གཏོང་ན་དགེ་འདུན་ལྷག་མར་འགྱུར་བའོ། །སྐབས་འདིར་གཞུང་རྣམས་ཀྱི་བཤད་ལུགས་གསུམ་ལས་དང་པོ་ནི། ཊཱི་ཀ་ལས། སྐད་ཅིག་མ་གང་ལ་ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་དངོས་པོ་འདི་ལྟ་བུ་ཐོང་ཞིག་ཅེས་བྱ་བ་ལ་སོགས་པ་བརྗོད་པ་ནི་ཚིག་ཕལ་ཆེར་བྱས་པ་ཉིད་ཡིན་པས་དེ་ནི་འདིར་དངོས་གཞིའི་དུས་ཡིན། ཞེས་གསུངས་སོ། །རང་གི་རྣམ་བཤད་ལས་ཀྱང༌། སྐད་ཅིག་མ་གང་ལ་ཕལ་ཆེར་བྱས་པ་ཉིད་གང་ཡིན་པ་དེ་ནི་འདིར་དངོས་གཞིའི་དུས་ཤེས་པར་བྱའོ། །ཞེས་གསུངས་ཏེ་ཕལ་ཆེར་བྱས་པ་ཉིད་ནི་བྱས་པ་ཉིད་དོ་ཞེས་པ་དང་མཐུན་པའོ། །དེ་ལྟར་ན་ལས་བརྗོད་པ་གསུམ་པ་ཕལ་ཆེར་བྱས་པ་དེའི་མཐའ་ལ་མི་གཏོང་ནའོ། ཞེས་བརྗོད་དོ། །བཤད་ལུགས་གཉིས་པ་ནི། ལུང་རྣམ་འབྱེད་ལས། བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ། །རྫོགས་པར་བརྗོད་ན་དགེ་འདུན་ལྷག་མར་འགྱུར་རོ། །ཞེས་གསུངས་ལ། ཊཱི་ཀ་ལས་ཀྱང་ལས་བརྗོད་པ་གསུམ་པ་རྫོགས་པར་བརྗོད་པ་ན་དགེ་འདུན་ལྷག་མར་འགྱུར་རོ་ཞེས་གསུངས་པ་ཡིན་ནོ་ཞེས་ལུང་དྲངས་སོ། །དེ་ལྟར་ན་ལས་བརྗོད་པ་གསུམ་པ་དངོས་ཉིད་རྫོགས་པ་དེའི་མཐའ་ལ་མི་གཏོང་ནའོ་ཞེས་ལུང་གི་རྗེས་སུ་འབྲངས་ཏེ་བརྗོད་ཅེས་མཚོ་ཊཱིཀ་ལས་གསུངས་སོ། །བཤད་ལུགས་གསུམ་པ་ནི། བམ་པོ་ལྔ་བཅུ་པ་ལས་ནི་ལས་བརྗོད་པ་གསུམ་པ་མཇུག་སྡུད་དང་བཅས་པ་རྫོགས་པའི་མཐར་དགེ་འདུན་ལྷག་མ་ཞེས་བཤད་དེ། མཇུག་སྡུད་པ་ནི་མ་ཡིན་ནོ་ཞེས་བཤད་པ་དང༌། ཊཱི་ཀ་ལས། དེ་ཡང་བཟླས་པ་ཐ་མའི་ནང་དུ་གཏོགས་པར་རིགས་སོ། །ཞེས་བཤད་པས། མཇུག་སྡུད་བརྗོད་པའི་མཐའ་ནི་བརྗོད་པ་གསུམ་པའི་མཐའ་ཡིན་པའི་ཕྱིར་ན། ལས་བརྗོད་པ་གསུམ་པའི་མཇུག་སྡུད་བརྗོད་པ་རྫོགས་པ་དེའི་མཐར་མི་གཏོང་ནའོ་ཞེས་ཀྱང་འཆད་དོ། །དེ་ལྟར་བཤད་ལུགས་གསུམ་ལས། ལུང་གི་རྗེས་སུ་འབྲངས་ཤིང་བསྟན་བཅོས་དེ་དག་གི་དགོངས་པ་བཙལ། ཞེས་དང༌། ཡང་ན་མཛོད་འགྲེལ་ལས། བསྟན་བཅོས་དང་འགལ་བ་ནི་སླའི། མདོ་དང་འགལ་བ་ནི་དེ་ལྟ་མ་ཡིན་ནོ། །ཞེས་གསུངས་པ་བཞིན་ནོ། །ཞེས་གོང་དུ་བཤད་པ་དུ་མ་མཚོ་ཊཱིཀ་གི་གསུངས་པའི་ཚིག་ཟིན་ལྟར་བཀོད་པ་ཡིན་པར་ཤེས་དགོས་སོ། །བསྒོ་གྱུར་རྣམས་ཀྱི་ཐུན་མོང་གི་ཆོས་བཤད་ཟིན་ཏོ། །