གཉིས་པ་བསྒོ་གྱུར་བཞི་སོ་སོར་བསྟན་པ་ལ་བཞི་ལས། དང་པོ་དགེ་འདུན་གྱི་དབྱེན་བྱེད་པའི་ལྷག་མ།
གཉིས་པ་བསྒོ་གྱུར་བཞི་སོ་སོར་བསྟན་པ་ལ་བཞི་ལས། དང་པོ་དགེ་འདུན་གྱི་དབྱེན་བྱེད་པའི་ལྷག་མ་ནི།
རྩ་བར། བརྟུལ་བར་བྱེད་པ་ཉིད་དོ། །དབྱེན་ལའོ། །དགེ་འདུན་གྱིའོ། །ཞེས་བྱུང༌། །འདིའི་དོན་བཤད་པ་ལ་བཞི་ལས། དང་པོ་གླེང་གཞི་ནི་ཡུལ་རྒྱལ་པོའི་ཁབ་ཏུ་གང་ཟག་ལྷས་བྱིན་གྱིས་ཉོན་མོངས་པ་རྙེད་པ་དང་བཀུར་སྟི་འདོད་པས་ཉེས་པ་དགེ་འདུན་འབྱེད་པ་ལས་དགེ་འདུན་ལྷག་མར་བཅས་སོ། །གཉིས་པ་དགག་བྱ་ནི་རང་རིགས་ཀྱི་དགེ་འདུན་ལ་གནོད་པ་སྟེ། ཆོས་མ་ཡིན་པ་ལ་སྦྱོར་བ་དང༌། དགེ་འདུན་གྱིས་བཟློག་ཀྱང་མི་གཏོང་བ་ཡན་ལག་ཏུ་དགོས་པས་ཤེས་སོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་དགེ་འདུན་ཆོས་ལས་ཆོས་མ་ཡིན་པའི་ཕྱོགས་སུ་འབྱེད་པར་བྱེད་པ་ལ་བཞམས་བསྒོ་དང་གསོལ་བཞིའི་ལས་ཀྱིས་བཟློག་ཀྱང་མི་གཏོང་བ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་གཉིས་ཏེ། ཡན་ལག་བརྩི་བ་དངོས་དང༌། སྐབས་ཀྱི་དོན་བྱེ་བྲག་ཏུ་གཏན་ལ་དབབ་པའོ། །དང་པོ་ལ་བཞི་ལས། གཞིའི་ཡན་ལག་ལ་གཉིས་ཏེ། སྦྱོར་བ་བརྩམ་པར་བྱ་བའི་གཞི་དང༌། རྫོགས་པར་བྱེད་པའི་རྐྱེན་ནོ། །དང་པོ་ལ་ལྔ་ལས། གང་དུ་དབྱེ་བའི་གནས་དང༌། གང་དག་དབྱེ་བའི་ཡུལ་དང༌། གང་གི་ཚེ་འབྱེད་པའི་དུས་དང༌། གང་ལ་དབྱེ་བའི་དོན་དང༌། དམིགས་བསལ་གང་གིས་འབྱེད་པའི་རྟེན་དང་ལྔ་ལས། དང་པོ་གང་དུ་དབྱེ་བའི་གནས་ནི། ཛམྦུའི་གླིང་ཡིན་པ་དང༌། མཚམས་གཅིག་གི་ནང་ཡིན་པ་དང༌། སྟོན་པ་མངོན་སུམ་དུ་བཞུགས་པ་ལས་གཞན་ཡིན་པ་སྟེ། མཛོད་ལས། ཛམྦུའི་གླིང་ནའོ། །ཞེས་དང༌། །མཚམས་མ་བཅད་པ་དག་ཏུ་ཡང༌། །འཁོར་ལོའི་དབྱེན་ནི་མི་འབྱུང་ངོ། །ཞེས་དང༌། གཞན་དུ་ཞེས་སོ། ། རིགས་པས་ཀྱང་གླིང་གཞན་ན་འགྲན་ཟླ་སྟོན་པ་མེད་པའི་ཕྱིར་དང༌། མཚམས་ཐ་དད་ཡིན་ན་མཚམས་ཀྱི་སྒོ་ནས་རྟག་ཏུ་ཕྱེ་ཟིན་པའི་ཕྱིར་དང༌།སྟོན་པ་མངོན་སུམ་དུ་བཞུགས་པ་ཉིད་དུ་ནི་སྟོན་པའི་གཟི་བརྗིད་ཀྱིས་དགེ་འདུན་ཕྱེ་བ་མི་སྲིད་པའི་ཕྱིར་རོ། ། གཉིས་པ་གང་དག་དབྱེ་བའི་ཡུལ་ནི། སོ་སོའི་སྐྱེ་བོའི་དགེ་འདུན་ཡིན་པ་དང༌། ཕར་བཞི་ཚུར་བཞི་སྟེ་བརྒྱད་ཡན་ཆད་ཀྱི་གྲངས་ཚང་བ་དང༌། ལས་ཀྱི་ཁ་སྐོང་བར་འོས་པ་སྟེ། མཛོད་ལས། བྱིས་པ་རྣམས། ཞེས་དང༌། ཛམྦུའི་གླིང་ནའོ་དགུ་སོགས་ཀྱི། །ཞེས་དབྱེན་བྱེད་པ་པོ་དང་དགུར་གསུངས་པས། དབྱེན་བྱ་བའི་ཡུལ་བརྒྱད་ཡིན་པར་བསྟན་པ་དང༌། དབྱེན་རྗེས་སུ་སྒྲུབ་པ་ནི་གསོལ་བ་དང་འདྲའོ། །ཞེས་གསུངས་སོ། །རིགས་པས་ཀྱང་འཕགས་པ་ཡིན་ན་ཆོས་མ་ཡིན་པ་ལ་ཆོས་ཡིན་སྙམ་དུ་ལྟ་བ་ཕྱིན་ཅི་ལོག་མི་སྐྱེ་བའི་ཕྱིར་དང༌། བརྒྱད་མ་ཚང་ན་ཕན་ཚུན་གཉིས་ཀ་དགེ་འདུན་དུ་ལོངས་པ་མི་ཚང་བའི་ཕྱིར་དང༌། ལས་ཀྱི་ཁ་སྐོང་བར་མི་འོས་ན་ལས་མི་འཆགས་པ་བཞིན་དུ་དགེ་འདུན་གྱི་དབྱེན་མི་འཆགས་པའི་ཕྱིར་རོ། །