གསུམ་པ་ལྟུང་བྱེད་ཀྱི་སྡེ་བཤད་པ།

གསུམ་པ་ལྟུང་བྱེད་ཀྱི་སྡེ་བཤད་པ་ལ།

སྤང་ལྟུང་བཤད་པ་དང༌། ལྟུང་བྱེད་འབའ་ཞིག་པ་བཤད་པ་དང་གཉིས། དང་པོ་ལ། སྤང་ལྟུང་ཐུན་མོང་བ་དང་ཐུན་མོང་མ་ཡིན་པ་གཉིས། དང་པོ་སྤང་ལྟུང་ཐུན་མོང་བ་འཆད་པ་ལ། རྩ་བར། ཉིན་མཚན་གྱི་དང་པོ་མ་ཡིན་པ་ལ་ཐ་མ་མ་ཡིན་པ་ཉིད་དོ། །གནས་པ་ལ་ནི་སྦྱོར་བའི་སྣོད་ཉིད་དོ། །དེའི་དང་པོ་ནི་སྐྱ་རེངས་དང་པོ་དེའོ། །ལས་ལ་ནི་འདས་ན་ཉི་མ་ཤར་བའིའོ། །སྤང་བ་ལ་ནི་འདུ་ཤེས་ལས་གཙོ་ཆེར་རང་གི་ཉིད་དོ། །ཞེས་སོགས་སོ། །འདིའི་དོན་བཤད་པ་ལ། སྤྱིའི་དོན་དང༌། སོ་སོའི་དོན་བཤད་པ་དང་གཉིས། དང་པོ་ལ། ཐུན་མོང་བ་ལུང་གང་ལས་བསྡུས་པ་དང༌། ཐུན་མོང་དུ་བསྡུས་པའི་དགོས་པའི་དོན་དང༌། ཐུན་མོང་བ་ལྔའི་དོན་བསྡུས་པའི་དོན་དང་གསུམ། དང་པོ་ནི། སྤང་ལྟུང་ཐུན་མོང་བ་འདི་ལ་མདོ་བཅུ་བདུན་ཡོད་པ་ལས་ལུང་ཀོ་ལྤགས་ཀྱི་གཞི་ལས་གཙོ་ཆེར་བསྡུས་པའི་མདོ་གཉིས་ཡོད་དེ། རྩ་བར། སྤང་བ་ལ་ནི་འདུ་ཤེས་གཙོ་ཆེར་རང་གི་ཉིད་དོ། །དེ་ནི་སྔོས་པ་ཉིད་ན་བྲལ་བའོ། །ཞེས་པ་དེ་གཉིས་སོ། །ལུང་ཞུ་བ་ལས། བསྡུས་པའི་མདོ་ལྔ་ཡོད་དེ། ལས་ལ་ནི་འདས་ན་ཉི་མ་ཤར་བའིའོ། །ཞེས་དང༌། རང་བཞིན་ལས་ཉམས་ན་ཡང་ངོ། །ཞེས་དང༌། ཕྱིར་བཅོས་དང་འབྲེལ་བའི་མདོ་གསུམ་ནི། ཆུང་བ་ཉིད་ཀྱི་དུམ་བུ་དེ་ནི་མི་འགྱུར་རོ། །དགེ་འདུན་གྱི་ཡང་ངོ༌། །འདི་ལ་མེད་པ་དེ་ཉིད་གཙོ་བོའོ། །ཞེས་པ་དང་ལྔའོ། །ལུང་རྣམ་འབྱེད་ལས་བསྡུས་པ་ནི། དེ་དག་ལས་གཞན་པའི་མདོ་བཅུ་པོ་རྣམས་ཡིན་ལ། དེ་རྣམས་ལ་མདོར་བསྡུས་རྟོགས་པར་བྱེད་པའི་ཆ་ནས་ལུང་ཕྲན་ཚེགས་ལས་བསྡུས་པའི་ཆ་ཡང་ཡོད་དེ། མདོར་བསྡུས་ནི་ལུང་ཕྲན་ཚེགས་ལས་གསུངས་པའི་ཕྱིར་རོ། །