མ་ཎི་ཡིག་དྲུག་གི་མོ།
ཕྱིས་ཀྱི་མོ་ཡིག་ལ། ཡི་གེ་དྲུག་མའི་མོ་ཡིག་བླང་དོར་གསལ་མེ། མ་ཎི་ཡིག་དྲུག་གི་མོ་ཡིག་མངོན་མཐོང་མེ་ལོང་། མ་ཎི་ཡིག་དྲུག་གི་མོ་ཡིག་བླང་དོར་འབྱེད་པའི་ལྡེ་མིག དཔལ་ལྡན་དམག་ཟོར་མའི་སྒོ་ནས་རྣོ་མཐོང་སྒྲུབ་ཚུལ། དཔལ་ལྡན་དམག་ཟོར་མའི་ཕྲེང་མོ་གསལ་སྒྲོན། ཐོད་ཕྲེང་སྡེ་ལྔའི་མོ་ཡིག རྟ་མགྲིན་གསང་སྒྲུབ་ཀྱི་ཕྲེང་མོ། ཇོ་བོའི་རྨི་ལམ་དུ་ཤར་བའི་མོ། དམ་ཅན་ཤོ་མོ། ཡུལ་ལྷའི་མེ་ལོང་སོགས་མང་བོ་ཡོད་ཀྱང་། དེ་དག་གི་སྔ་ཤོས་ནི་ཐུགས་རྗེ་ཆེན་པོའི་ཤོ་མོ་འདི་ཡིན། དེ་ནི་ལྷ་ཐུགས་རྗེ་ཆེན་པོས། རྒྱལ་བོ་སྲོང་བཙན་ལ་བསྟན་པ་ཡིན་པས། ལོ་ངོ་ཆིག་སྟོང་སུམ་བརྒྱ་ལྷག་གི་སྔོན་ནས་དར་བ་ཡིན།
དེ་ཡང་མོ་ཡིག་ན་གསལ་བ་ལྟར། དུང་ཤོ་གྲུ་བཞིའི་སྟེང་འོག་ཕྱོགས་བཞི་ལ། ཨོཾ་ཡིག་ལ་སོགས་པའི་ཡིག་དྲུག་བཀོད་པའམ་རྡེའུ་སྔོན་ལྔ་དང་དཀར་བོ་གཅིག ཕྲེང་བ་སོགས་མདུད་བྱས་ལ། རས་དཀར་དྲི་མེད་ཀྱི་སྟེང་དུ་དེ་དག་བཞག་ནས། ལྷ་ཐུགས་རྗེ་ཆེན་པོ་ལ་དམིགས་ཏེ་གསོལ་བ་རྩེ་གཅིག་ཏུ་བཏབ་ནས། ཕྱོགས་བཅུའི་རྒྱལ་བ་སྲས་བཅས་ཀྱིས་རང་གི་ཐུགས་རྒྱུད་བསྐུལ་ནས། མངོན་ཤེས་གསལ་ཅན་ཐམས་ཅད་འོད་དང་བདུད་རྩིའི་རྣམ་པར་བསྡུས་ནས། དམིགས་རྟེན་རྡེའུ་འམ་ཕྲེང་བ་ལ་སིབ་སིབ་ཐིམ་པར་བསམ་སྟེ། ཐུགས་རྗེ་ཆེན་པོ་དཔང་དུ་བཞག་སྟེ། དེའི་བྱིན་རླབས་ལ་བརྟེན་ནས་ཤོ་རྡེའུ་ལ་ཕུ་བཏབ་ནས། བདེན་པ་བདར་ཞིང་། དཔྲལ་པར་འཁྱེར་ཏེ་འཕངས་པས། དོན་དྲུག་གང་ཁེལ་བར་བལྟ་བ་སྟེ། ཨོཾ་བབས་དུང་གི་རི་བོ་ལ། །གཡོ་འགུལ་མེད་ཅིང་ཤིན་ཏུ་བརྟན། །ལྷ་ངོ་དགུང་ལས་མཐོ་བའི་མོ། །ལྷ་ཆེན་ཚངས་པའི་མོ་ལྷ་ཡིན། །མ་བབས་ཉི་མའི་དཀྱིལ་འཁོར་ཡིན། །འོད་ཀྱིས་མུན་པ་སེལ་ནའང་། །དགྲ་གཅན་གདོང་དང་སྤྲིན་ནག་གིས། །གློ་བུར་གོས་ན་དགེ་བ་ཆུང་། །གནམ་བསྐོས་རྒྱལ་བོའི་མོ་ལྷ་ཡིན། །འོན་ཀྱང་ལྷ་ངོ་ཅུང་ཟད་དམའ། །བསང་དང་གསོལ་ཁ་བྱས་ན་ལེགས། །ཎི་བབས་གཡུ་ཡི་ལྗོན་ཤིང་ཡིན། །དྲི་བཟང་འབྲས་བུ་ཁྱབ་པ་མང་། །འཁོར་ལོས་སྒྱུར་རྒྱལ་མོ་ལྷ་ཡིན། །ལྷ་ངོ་ཅུང་ཟད་མཐོ་ན་འང་། །ལྷ་ལ་གསོལ་ཁ་ཆག་པའི་མོ། །སྲུང་མ་མཆོད་དང་གསོལ་ཁ་བྱ། །སྡེ་བརྒྱད་བརྔན་དང་རླུང་རྟ་ཚུགས། །པད་བབས་རྒྱ་མཚོ་ཆེན་པོ་ཡིན། །རྦ་རླབས་ཀུན་ནས་གཡོ་བར་འགྱུར། །སྲིན་པོའི་རྒྱལ་བོའི་མོ་ལྷ་ཡིན། །ཁྱོད་ཀྱི་ལྷ་ངོ་ཤིན་ཏུ་དམའ། །ལྷ་སྲུང་མནོལ་བཙོག་ཤོར་བ་ཡིན། །མྱུར་དུ་ལྷ་སྲུང་འཁྲུགས་པ་ཡིན། །ལྷ་སྲུང་འཁྲུགས་པའི་གཡང་ལྷ་ཉམས། །གཡང་སྒྲུབ་དང་ནི་ལྷ་སྲུང་མཆོད། །མནོལ་བསང་ལྷ་ཆབ་སྔོན་མོ་ཐོན། །དགྲ་སྒྲུབ་དགྲ་མནན་དགྲ་འཆིང་བྱ། །སེང་གདོང་ལ་སོགས་ཚུལ་ལྡན་དགོས། །མེ་བབས་མེ་རི་འཁྲུགས་པ་ཡིན། །ཆེར་འབར་ཐམས་ཅད་སྲེག་པར་འགྱུར། །ཀླུ་བཙན་རྒྱལ་བོའི་མོ་ལྷ་ཡིན། །ལྷ་ངོ་ཅུད་ཟད་དམའ་བས་ན། །ཁ་ལས་རླུང་རྟ་ཉམས་པའི་མོ། །སྔོན་ལ་ལྷ་སྲུང་བཙན་པོ་མཆོད། །དེང་འདིར་རེ་ཆགས་ཕྲག་དོག་གིས། །མ་བོར་དེ་ལ་མཆོད་བསྟོད་དང་། །བསྐང་བཤགས་འཁྲུགས་བསྐང་ཅི་མང་དགོས། །ཡང་ན་མགྲོན་པོ་ངན་པ་ཞིག། འོང་བས་ཁྱོད་ཀྱི་ལྷ་ཕུག་འཁྲུགས། །མོ་འདྲེ་དགར་དང་དགུ་མདོས་བྱ། །ཧཱུཾ་བབས་སྲ་བརྟན་རྡོ་རྗེ་བྲག། རྡོ་རྗེ་བྲག་ལ་འཕོ་འགྱུར་མེད། །ཁྲི་སྲོང་ལྡེའུ་བཙན་མོ་ལྷ་ཡིན། །ལྷ་ངོ་ལྷུན་པོ་ལས་ཀྱང་མཐོ། །ཞེས་སོགས་སྤྱི་ཁྱབ་ལ་བརྟག་ཚུལ་དང་། དེ་ལྟར་སྤྱི་བཤད་བྱས་ནས་མོ་གསུམ་འདེབས། མོ་གསུམ་བཏབ་པ་ལས། གསུམ་བཟང་མོའི་ཡང་རྩེ། གཉིས་བཟང་འབྲིང་གི་རབ། གསུམ་ངན་ཐ་ཆད། གཉིས་ངན་འབྲིང་གི་ཐ་མ་སོགས་རྣམ་གྲངས་མི་འདྲ་བ་དུ་མ་ཡོད།
དེ་ལྟར་ཤོ་རྡེའི་བབས་པ་ལ་བརྟག་ནས། དེ་རེ་རེ་ལ་ཡང་ཆོས་ཕྭ། གཞི་ཕྭ། ནོར་ཕྭ། དོན་ཕྭ། ནད་ཕྭ། གདོན་ཕྭ་སོགས་ཀྱི་བདེན་རྫུན་གྱི་ཤན་འབྱེད་པ་དང། ལེགས་ཉེས་སྐྱིད་སྡུག གནོད་པའི་བགེགས། གདོན་པའི་རྫས། མིའི་ན་ཚ། ཕྱུགས་ཀྱི་གོད་ཁ་དང་དེའི་བཟློག་ཐབས་སོགས་ཀྱི་དཔྱད་འབྲས་ཡིག་དྲུག་གི་མོ་ཡིག་བླང་དོར་གསལ་མེར་གསལ་ལོ། །