གསུམ་པ་ཉིན་ཞག་གི་འཕོ་མཚམས་གཏན་ལ་དབབ་པ།

གསུམ་པ་ཉིན་ཞག་གི་འཕོ་མཚམས་གཏན་ལ་དབབ་པ་ལ་གཉིས་ལས།

སྤྱིར་བཏང་ནི་སྐྱ་རེངས་དང་པོ་ཤར་བ་ན་ཉིན་ཞག་འཕོས་ཤིང་ཞག་ཕྱི་མའི་ཉིན་མོར་བཏགས་པ་ཡིན་ཏེ། དེའི་དང་པོ་ནི་སྐྱ་རེངས་དང་པོ་དེའོ་ཞེས་བཤད་ཅིང༌། འོད་ལྡན་ལས་ཀྱང་ཉི་མ་མ་ཤར་ཡང་སྐྱ་རེངས་ཤར་ན་ནི་ཉིན་མོར་ཐ་སྙད་བཏགས་ཏེ་སྣང་བ་ཡོད་པའི་ཕྱིར་རོ། །སྐྱ་རེངས་ཤར་བ་དེ་ནི་བསྟན་བཅོས་ལ་གྲགས་པའི་ཉིན་མོའོ། །འཇིག་རྟེན་གྱི་ཐ་སྙད་འགའ་ཞིག་དང་ཡང་མཐུན་ཏེ། ཐོ་རངས་སྐྱ་རེངས་ཤར་ནས་འོངས་པ་ལ་སྔ་མོ་ཞིག་ན་འོངས་སོ་ཟེར་བ་ལྟ་བུའོ། །དམིགས་བསལ་ནི་གསུམ་ཏེ། གསོ་སྦྱོང་ལ་སོགས་པའི་ལས་ལས་འདས་པ་དང༌། ཆུ་བརྟགས་པའི་ཉིན་ཞག་གིས་རུང་བ་དང༌། རྒྱལ་པོའི་ཕོ་བྲང་དུ་ནུབ་མོ་འགྲོ་བའོ། །དེ་གསུམ་ལ་ནི་སྐྱ་རེངས་དང་པོ་གཉིས་ཤར་ཡང་ཞག་སྔ་མའི་མཚན་མོར་གཏོགས་པར་བཅས་པ་སྟེ། མདོ་ཉིད་ལས། ལས་ལ་ནི་འདས་ན་ཉི་མ་ཤར་བའི་འོ། །ཉི་མ་འཆར་ཁ་ཚུན་ཆད་བརྟགས་པ་ཉིད་ཀྱི་རྗེས་སུ་འཇུག་པའོ། །འདིར་ནི་སྐྱ་རེངས་ཐ་མ་ཤར་བ་ཉིད་དེ་ཡིན་ནོ། །ཞེས་གསུངས་སོ། །འཇིག་རྟེན་པ་ཕལ་ཆེ་བ་དག་སྐྱ་རེངས་དང་པོ་གཉིས་ཤར་ཡང་མཚན་མོའི་ཐ་སྙད་དུ་བརྗོད་པ་དང་ཡང་མཐུན་ཏེ། རྣམ་འབྱེད་འགྲེལ་བ་ལས། སྐྱ་རེངས་ཐ་མ་ཤར་ན་འཇིག་རྟེན་ཕལ་ཆེར་མཚན་མོའི་ཐ་སྙད་མི་འཆད་པའི་ཕྱིར་རོ། །ཞེས་གསུངས་སོ། ། རང་གི་རྣམ་བཤད་དང་ཊཱི་ཀ་ལས། ཉིན་མཚན་དེའི་དང་པོ་ནི་སྐྱ་རེངས་དང་པོའི་སྐད་ཅིག་དང་པོ་དེའོ། །ཞེས་སོ། །དེ་ནི་ཉིན་མོ་དང་མཚན་མོ་ཞག་གཅིག་ཏུ་བསྡུས་པའི་དབང་དུ་བྱས་པ་སྟེ། འཆང་འབྲལ་ལྟ་བུའི་སྐབས་སུ་ཞག་དེའི་དང་པོ་སྐྱ་རེངས་དང་པོའི་སྐད་ཅིག་དང་པོ་དེའོ་ཞེས་པའོ། །ཉིན་མཚན་སོ་སོར་དབྱེ་བའི་དབང་དུ་བྱས་ན་ནི། ཉིན་མོའི་དང་པོ་ནི་སྐྱ་རེངས་དང་པོ་ཡིན་ཏེ། ཊཱི་ཀ་ལས། ཉིན་མོའི་དང་པོ་ནི། སྐྱ་རེངས་ཤར་བ་ཡིན་པར་གསུངས། ཞེས་བཤད་ཅིང༌། མཚན་མོའི་དང་པོ་ནི། ཊཱི་ཀ་ལས། ཉི་མ་ནུབ་པའི་འོག་ཏུ་འོད་དམར་པོ་ཆགས་པ་གང་ཡིན་པ་དེ་འདས་པར་གྱུར་པ་ནི་མཚན་མོའི་དང་པོ་ཡིན། ཞེས་གསུངས་སོ། ། ཡང་མཚན་མོའིམཐའ་ནི་སྐྱ་རེངས་ཤར་བ་ནས་བཞག་དགོས་པར་ཐལ། མདོ་རྩ་བ་ལས། ཉིན་མཚན་གྱི་དང་པོ་མ་ཡིན་པ། ཞེས་སོ། ། དེ་མ་ཡིན་པར་ཐལ། ལུང་རྣམ་འབྱེད་ལས། ཞག་བཅུ་གཅིག་པའི་སྐྱ་རེངས་ཤར་བ་ན་སྤང་བའི་ལྟུང་བྱེད་དོ། །ཞེས་དང༌། ཊཱི་ཀ་ལས། ཉིན་མོ་དང་པོ་ནི་སྐྱ་རེངས་དང་བོ་ཤར་བ་ཡིན་པར་གསུངས་བ་ལ། དེའི་མདུན་རོལ་ནི་མཚན་མོའི་མཐའ་ཡིན་པར་རྣམ་པར་བཞག ཅེས་དང༌། མཚོ་ཊཱིཀ་༤༣༥ལས། ཉིན་མོ་དང་བོ་ནི་སྐྱ་རེངས་དང་པོ་ཡིན་ཏེ། ཞེས་པས་སོ་ཟེར་ན་ཞིབ་ཆ་བསྟན་བཅོས་དང་འཇིག་རྟེན་གྲགས་པའི་སྒོ་ནས་གོང་དུ་བཤད་པ་ལྟར་ཤེས་དགོས་པར་འདྲའོ། །སྔ་མ་ལ་དམིགས་བསལ་གསུམ་སྟེ་རྒྱལ་པོའི་ཕོ་བྲང་དུ་འགྲོ་བའི་ཊཱི་ཀ་ལས། འདིར་ཉིན་མོའི་དང་པོ་ནི་སྐྱ་རེངས་ཐ་མ་ཞེས་བྱ་བ་དམར་རེངས་ཤར་བ་ཡིན། ཞེས་གསུངས་ལ། དེའི་དང་པོ་ནི་སྐྱ་རེངས་དང་པོ་དེའོ་ཞེས་སྨོས་ན་ཐམས་ཅད་དུ་འམ་ཞེ་ན། ལས་ལ་ནི་འདས་ན་ཞེས་སོགས་གསུངས་ལ། ལུང་ཞུ་བ་ལས། གསོ་སྦྱོང་དང་དགག་དབྱེ་ལ་སོགས་པ་ཚེས་གྲངས་ངེས་པ་དང་འབྲེལ་བའི་ལས་ལ་ནི་བརྗེད་པ་ཡན་ཆད་ཀྱི་རྐྱེན་བྱུང་བས་དུས་འདས་ཤིང་ཡོལ་བར་གྱུར་ན་ཉི་མ་ཤར་བའི་སྐད་ཅིག་ཉིན་ཞག་དེའི་དང་པོའོ། །འདིས་ནི་སྐྱ་རེངས་དང་པོ་གཉིས་ཤར་ཡང་ཉི་མ་མ་ཤར་ན་དེའི་ཚེ་གསོ་སྦྱོང་ལ་སོགས་པ་བྱས་ན་རང་རང་གི་དགོས་པ་འགྲུབ་པར་བསྟན་ཏོ། །གལ་ཏེ་ཚེས་བཅོ་ལྔའི་ཐོ་རངས་སྐྱ་རེངས་དང་པོ་ཤར་བ་ན་གསོ་སྦྱོང་བྱས་པ་དེ་ཆོས་ཅན། གསོ་སྦྱོང་མ་བྱས་པའི་ཉེས་པ་མི་ཁེགས་པར་ཐལ། གསོ་སྦྱོང་མ་བྱས་པའི་ཉེས་པ་བྱུང་ཟིན་པའི་ཕྱིར་ཞེ་ན། རྐྱེན་མ་བྱུང་ན་དེའི་ཚེ་ན་ཉེས་པ་བྱུང་ཟིན་ཡང་རྐྱེན་བྱུང་ན་ནི་དེའི་ཚེ་ན་ཉེས་པ་བྱུང་ཟིན་པ་རྟགས་མ་གྲུབ་སྟེ། ཟླ་ཕྱེད་གདམས་ངག་ནོད་པའི་ཊཱི་ཀ་ལས། རྐྱེན་མ་བྱུང་བར་གསོ་སྦྱོང་གི་ཉི་མ་ལས་འདས་ན་སྐྱ་རེངས་ཤར་བའི་དུས་ན་ཁ་ན་མ་ཐོ་བ་འདིར་འགྱུར་རོ། །རྐྱེན་བྱུང་ན་ནི་ཉི་མ་འཆར་ཁའི་དུས་སུ་ཁ་ན་མ་ཐོ་བ་འདིར་འགྱུར་རོ། །ཞེས་གསུངས་ཤིང༌། འདི་ནི་བརྗེད་པ་སོགས་རྐྱེན་བྱུང་བའི་དབང་དུ་བྱས་པ་ཡིན་པས་སོ། །གལ་ཏེ་སྐྱ་རེངས་ཤར་ནས་གསོ་སྦྱོང་བྱས་པས་དེ་མ་བྱས་པའི་ཉེས་པ་ཁེགས་ན། ཞུ་བ་ལས།དགེ་སློང་གིས་སྐྱ་རེངས་ཤར་བ་ན་གསོ་སྦྱོང་མ་བྱས་སོ་སྙམ་དུ་དྲན་ནས་གསོ་སྦྱོང་བྱས་ན་དགེ་སློང་དེ་དག་གིས་གསོ་སྦྱོང་བྱས་མོད་ཀྱི་འདས་པ་དང་བཅས་པར་འགྱུར་རོ་ཞེས་གསུངས་པ་དང་འགལ་ལོ་ཞེ་ན། དེ་ནི་སྦྱོར་བ་ལྷོད་པའི་བསླབ་བྱའི་ཉེས་བྱས་ལ་དགོངས་པ་ཡིན་གྱི། གསོ་སྦྱོང་མ་བྱས་པའི་ཉེས་བྱས་ནི་མ་ཡིན་པས་འགལ་བ་མེད་དོ། །