གཉིས་པ་བདག་པོ་དང་འབྲེལ་བའི་ཐུན་མོང་།

གཉིས་པ་བདག་པོ་དང་འབྲེལ་བའི་ཐུན་མོང་ནི།

སྤང་བ་ལ་ནི། ཞེས་སོ། །འདིའི་དོན་ལ་ལྔ་སྟེ། ཡན་ལག་གི་ཁྱབ་པ་དང༌། ཡན་ལག་རང་གི་ངོ་བོ་དང༌། སེལ་བ་དང༌། ཅིར་འགྱུར་དང༌། རྒྱུ་མཚན་ནོ། །དང་པོ་ནི་སྤང་ལྟུང་བཅོ་བརྒྱད་ལ་སྦྱར་ཏེ། འཆང་འཇོག་འཁྲུར་འཇུག་བཅུ་ཚན་བར་པ་དང༌། །སྣོད་འཆང་འཐག་འཇུག་རས་ཆེན་བརྟད་དང་མཐའོ། །ཞེས་དབྱེའོ། །འདིར་ཁ་ཅིག་ན་རེ་འབྲལ་བའི་སྤང་ལྟུང་ལ་ཡང་རང་གི་ཡིན་པ་དགོས་ཏེ། གཞན་གྱི་ཡིན་ན་སྤང་མི་དགོས་པའི་ཕྱིར་སྤང་ལྟུང་མ་ཡིན་ནོ་ཞེསཟེར་རོ། །དེ་ནི་མ་ཡིན་ཏེ་འདི་ཉིད་ལས་དགེ་འདུན་གྱི་ཡང་ངོ་དེ་ལས་འབྲལ་བར་འགྱུར་རོ། །ཞེས་གསུངས་པ་དང་ཊཱི་ཀ་ལས་འབྲལ་བའི་རྒྱུ་ནི་བྱིན་གྱིས་བརླབས་པ་ཡིན་གྱི་རང་གི་ཉིད་ནི་མ་ཡིན་པའི་ཕྱིར་རོ་ཞེས་བཤད་པ་དང་འགལ་ལོ། །གལ་ཏེ་དགེ་འདུན་གྱི་ཆོས་གོས་དང་འབྲལ་བའི་ཉེས་པ་དེ་ནི་འབྲལ་བའི་ལྟུང་བྱེད་ཡིན་གྱི་འབྲལ་བའི་སྤང་ལྟུང་ནི་མ་ཡིན་ཏེ། དངོས་པོ་དེ་སྤང་མི་དགོས་པའི་ཕྱིར་རོ། །དེའང་ལུང་ཞུ་བ་དང་རྒྱ་ཆེར་འགྲེལ་བ་ལས། དགེ་འདུན་གྱི་ཆོས་གོས་གང་ཟག་གིས་བྱིན་གྱིས་བརླབས་ནས་འབྲལ་བར་བྱེད་ན་ཆོས་གོས་དེ་སྤང་བར་མི་བྱ་སྟེ་ལྟུང་བྱེད་འབའ་ཞིག་བཤགས་པར་བྱའོ་ཞེས་བཤད་ཅིང༌། འདུལ་བ་ཀུན་ལས་བཏུས་པ་ལས། དགེ་སློང་གི་དགེ་འདུན་མངའ་བའི་ཆོས་གོས་གང་ཟག་གི་བདག་ཉིད་དུ་རིས་སུ་མ་བཅད་པ་རང་གིས། བྱིན་གྱིས་བརླབས་པ་དང་བྲལ་ན་འབྲལ་བའི་སྤང་བར་ནི་མི་བྱ་ལ། ལྟུང་བྱེད་དུ་ནི་འགྱུར་རོ་ཞེས་བཤད་པས་གྲུབ་བོ་ཞེ་ན། དངོས་པོ་སྤང་མི་དགོས་པ་ཙམ་གྱིས་སྤང་ལྟུང་མ་ཡིན་པས་ཁྱབ་པ་མེད་དེ། གཞན་དུ་ན་སྙིམ་པ་བཅིང་ཏེ་འགྲོལ་དུ་འཇུག་པའི་སྤང་ལྟུང་ཆོས་ཅན། སྤང་ལྟུང་མ་ཡིན་པར་ཐལ། དངོས་པོ་དེ་སྤང་མི་དགོས་པའི་ཕྱིར་རོ། །གཞན་ཡང་དངོས་པོ་སྤང་དགོས་པ་ཉིད་ཀྱིས་སྤང་ལྟུང་དུ་རྣམ་པར་འཇོག་ན། གང་ཟག་ཁྱད་པར་ཅན་ལ་སྤང་ལྟུང་མེད་པར་ཐལ། དངོས་པོ་སྤང་མི་དགོས་པའི་ཕྱིར་ཏེ།འདུལ་བ་ཀུན་ལས་བཏུས་ལས། ངོ་ཚ་དང་ལྡན་པ་དང༌། མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་དང༌། ཤེས་པས་ནི་གཅིག་གི་མདུན་དུ་བཤགས་པས་སྤང་བའི་ལྟུང་བྱེད་ལས་ལྡང་སྟེ། དངོས་པོ་སྤང་བ་དང་བྲལ་བར་བྱ་མི་དགོས་སོ་ཞེས་སྤང་མི་དགོས་ཀྱང་སྤང་བའི་ལྟུང་བྱེད་དུ་བཤད་དོ། །དེས་ན་གཞན་གྱི་ཆོས་གོས་དང་འབྲལ་ལྟུང་དངོས་གཞི་རྫོགས་པ་བྱུང་ན་དངོས་པོ་དེ་ཡང་སྤང་མི་དགོས་ཀྱང༌། སྤང་བའི་ལྟུང་བྱེད་ཡིན་ཏེ། སྡེ་ཚན་སྤང་བའི་ལྟུང་བྱེད་དུ་གཏོགས་པའི་ལྟུང་བ་དངོས་གཞི་རྫོགས་པ་ཡིན་པའི་ཕྱིར་རོ། །གཉིས་པ་ཡན་ལག་གི་ངོ་བོ་ནི།དངོས་པོ་རང་ཉིད་དབང་ཞིང་དབང་བར་ཤེས་པ་སྟེ། རང་གི་ཉིད་དོ། །ཞེས་དང༌། འདུ་ཤེས་ལས་གཙོ་ཆེར། ཞེས་གསུངས་སོ། །དེ་ཡང་ངེས་པར་མ་ཟད་ཡིད་གཉིས་ཀྱིས་ཀྱང་འགྱུར་ཏེ། ཡིད་གཉིས་ནི་འདུ་ཤེས་དང་འདྲའོ། །ཞེས་གསུངས་པས་སོ། །བདག་པོ་དང་འབྲེལ་བའི་སྤང་བའི་ལྟུང་བྱེད་བཅོ་བརྒྱད་པོ་ལ་ནི་རང་གི་ཡིན་པའི་འདུ༷་ཤེ༷ས་ལ༷ས་གཙོ༷་ཆེ༷ར་གྱུར་པ་དང་ར༷ང་གི༷་ཡིན་པ་ཡན་ལག་ཉི༷ད་དོ༷། །གསུམ་པ་སེལ་བ་ནི་གསུམ་སྟེ། གཞན་གྱི་ལ་གཞན་གྱིར་ཤེས་པ་དང༌། རང་གི་ལ་གཞན་གྱིར་འཁྲུལ་བ་དང༌། གཞན་གྱི་ལ་རང་གིར་འཁྲུལ་བའོ། །བཞི་པ་ཅིར་འགྱུར་ལ་གསུམ་ལས། དང་པོ་གཞན་གྱི་ལ་གཞན་གྱིར་ཤེས་པ་ལ་ཅིར་འགྱུར་ནི་ཚན་པ་གསུམ་སྟེ། ལྟུང་བ་མེད་པར་འགྱུར་བ་ལྔ་དང༌། ལྟུང་བ་གཞན་དུ་འགྱུར་བ་གཅིག་དང༌། ལྟུང་བ་ན་སྨད་དུ་འགྱུར་བ་བཅུ་གཉིས་སོ། །དང་པོ་ནི་ཆོས་གོས་ལ་སོགས་པའི་དངོས་པོ་དེ་གཞན་འབའ་ཞིག་དབང་བ་ཡིན་ན། འཆང་བ་གཉིས་དང་ཟླ་འཇོག་དང་རས་ཆེན་བཞག་ཕྱིས་དང༌། བརྟད་བྱུང་བགོ་ཕྱིས་དང་ལྔ་ལ་ལྟུང་མེད་དུ་འགྱུར་ཏེ། ཞུ་བ་ལས། གཞན་གྱི་ལྷུང་བཟེད་ཡུན་རིང་པོར་བཅངས་ཀྱང་ཉེས་པ་མེད་དོ། །ཞེས་དང༌། རྣམ་འབྱེད་ལས། གོས་དང་ལྷུང་བཟེད་ཞག་བཅུའི་ནང་རོལ་ཏུ་གཞན་ལ་བཏང་བར་བྱ། གོས་དེ་ཟླ་བའི་ནང་རོལ་ཏུ་གཞན་ལ་གཏང་བར་བྱ། ཞེས་དང༌། རས་ཆེན་བཞག་ཕྱིས་ཀྱང་ལྟུང་བ་མེད་པ་ནི་རས་ཆེན་སྦེད་བ་ལ་གཏད་ན་ལྟུང་མེད་དུ་གསུངས་པས་ཤེས་པ་དང༌། །བརྟད་བྱུང་བགོ་འཕྱིས་ཀྱི་ལྟུང་བ་མེད་པ་ནི་དགག་བྱ་མེད་པའི་ཕྱིར་ཏེ། འདིའི་དགག་བྱ་ནི་རང་གི་ཡོ་བྱད་ཆུད་ཟོས་པ་ཡིན་པ་ལ་གཞན་གྱི་ཡིན་ན་དགག་བྱ་དེ་མེད་པའི་ཕྱིར་དང༌། ཐམས་ཅད་དུ་གཞན་གྱི་ཡོ་བྱད་ཆུད་ཟོས་པ་སྤོང་དགོས་ན་སྒྲུབ་པར་མི་ནུས་པའི་ཕྱིར་རོ། །