གཉིས་པ་ལྟུང་བ་གཞན་དུ་འགྱུར་བ།

གཉིས་པ་ལྟུང་བ་གཞན་དུ་འགྱུར་བ་ནི།

རིན་པོ་ཆེ་ལ་རེག་པ་ནི་ལྟུང་བྱེད་འབའ་ཞིག་པར་འགྱུར་ཏེ། མདོ་ཉིད་ལས། རིན་པོ་ཆེ་རང་གི་མ་ཡིན་པ་དང་དེར་སྨོས་པ་ལ་རེག་གམ་རེག་ཏུ་བཅུག་ན་བྱེད་པ་པོ་ཡིན་ནོ། ། ཞེས་གསུངས་སོ། །གསུམ་པ་ལྟུང་བ་ན་སྨད་དུ་འགྱུར་བ་ནི། དེ་དག་ལ་འཁྲུར་འཇུག་ལ་སོགས་བཅུ་གཉིས་ལ་ནི་རང་རང་གི་ན་སྨད་དུ་འགྱུར་ཏེ། ཞུ་བ་ལས། གཞན་དབང་བའི་ཆོས་གོས་འཁྲུར་སྩོལ་ན་ཅིར་འགྱུར་ཉེས་བྱས་སོ། ། ཞེས་སོགས་གསུངས་སོ། །གལ་ཏེ་དེ་ལྟར་བཅུ་གཉིས་ལ་ན་སྨད་དུ་འགྱུར་ན་འདུལ་བ་ཀུན་ལས་བཏུས་པའི་མཐོ་གང་གི་སྤང་བའི་སྐབས་ལས། གཞན་གྱིས་བྱས་པ་ལ་ལོངས་སྤྱོད་པ་ལ་ལྟུང་བ་མེད་དོ། །ཞེས་གསུངས་པ་དང་འགལ་ལོ་ཞེ་ན། དེ་ནི་དངོས་གཞིའི་ལྟུང་བ་མེད་པ་ལ་དགོངས་ཏེ། གལ་ཏེ་ལྟུང་བ་གཏན་མེད་ཡིན་ན། མཐོ་གང་གི་སྤང་བའི་ཞུ་བ་ལས། གདིང་བ་གཞན་དབང་བ་ལ་ལོངས་སྤྱོད་པའི་དབང་དུ་བྱས་ནས། གཞན་ལ་གདིང་བ་གསར་པ་བགྱིད་དུ་སྩོལ་ཞིང་སྤྱོད་ན་ཅིར་འགྱུར། ཉེས་བྱས་སོ། །ཞེས་གསུངས་པ་དང་འགལ་ལོ། །འཁྲུར་འཇུག་ལ་སོགས་བཅུ་གཉིས་ལ་གཞན་གྱི་ཡིན་པ་ལ་གཞན་གྱི་ཡིན་པར་འདུ་ཤེས་ན་ན་སྨད་ཡིན་པ་མི་འཐད་པར་ཐལ། ཆེས་ན་སྨད་ཡིན་པའི་ཕྱིར། དེར་ཐལ། གཞིའི་ཡན་ལག་རང་དབང་བ་ཡིན་པ་དང༌། རང་གི་འདུ་ཤེས་པའི་ཡན་ལག་གཉིས་མ་ཚང་བའི་ཕྱིར། ཁྱབ་པར་ཐལ། རྩ་བར། དུ་མ་མ་ཚང་བ་ལ་ནི་དེ་བས་ཀྱང་ངོ། །ཞེས་གསུངས་པའི་ཕྱིར་ཟེར་ན་དཔྱད་དོ། །གདིང་བ་གསར་པ་རང་གི་ཡིན་པའི་དབང་དུ་བྱས་ན་ནི་སྤང་ལྟུང་ཡིན་ཏེ། ཞུ་བ་ལས། དགེ་སློང་གི་གདིང་བ་གསར་པ་བགྱིད་དུ་སྩོལ་ཞིང་སྤྱོད་ན་ཅིར་འགྱུར་སྤང་བའི་ལྟུང་བྱེད་དུ་འགྱུར་རོ། །ཞེས་གསུངས་སོ། །གསོག་འཇོག་གི་སྐབས་སུ་རང་དང་འདྲ་བའི་དགེ་སློང་གཞན་གྱི་སྨན་ལ་རང་གིས་གསོག་འཇོག་བྱེད་ན་ཉེས་བྱས་སུ་འགྱུར་གྱི་ལྟུང་མེད་ནི་མ་ཡིན་ཏེ། རང་རིགས་ཀྱིས་ལོངས་སྤྱད་དུ་རུང་བ་ལས་མི་རུང་བར་བྱས་པའི་དགག་བྱ་ཡོད་པའི་ཕྱིར་ཏེ། དཔེར་ན་གཞན་གྱི་སྨན་ལག་ཉར་བླངས་བ་བཞིན་ནོ། །བསྙེན་པར་མ་རྫོགས་པའི་སྨན་ལ་དེར་འདུ་ཤེས་ཏེ་དགེ་སློང་གིས་འཇོག་པར་བྱེད་ཀྱང༌། གསོག་འཇོག་གི་ཉེས་པ་མི་འབྱུང་སྟེ། དགེ་ཚུལ་གྱི་སྨན་ལ་དགེ་སློང་གིས་རེག་ཀྱང་ལག་ཉའི་ཉེས་བྱས་སུ་མི་འགྱུར་བའི་གནད་ཀྱིས་ཤེས་སོ། །འོ་ན་ཆོས་གོས་ལ་སོགས་པ་དངོས་པོ་དེ་རང་གཞན་གཉིས་ཀ་ཐུན་མོང་དུ་དབང་བ་ཡིན་ན་ཅིར་འགྱུར་ཞེ་ན། རང་གཞན་གཉིས་ཀ་སྤྱིར་དབང་ན་ཊཱི་ཀ་ལས་བགོ་རིགས་སུ་འཆད་པའི་དགེ་འདུན་དབང་བའི་ཆོས་གོས་འཆང་འཇོག་བྱེད་ན་སྤང་ལྟུང་བསྐྱེད་པར་གསུངས་པས། ལྷུང་བཟེད་འཆང་བ་ཡང་དེ་དང་རྒྱུ་མཚན་མཚུངས་པར་སྦྱར་རོ། །རང་གཞན་ཐུན་མོང་དུ་དབང་བའི་གསེར་དངུལ་ལ་རེག་ན་ཡང་སྤང་ལྟུང་སྐྱེད་པར་རིགས་ཏེ། སྤང་ལྟུང་འདི་ལ་ནི་རང་གི་ཡིན་པ་ཡན་ལག་ཏུ་གསུངས་པ་ལས་རང་གཞན་གཉིས་ཀ་ཐུན་མོང་དུ་དབང་བ་དེ་ལ་རང་གི་ཡིན་པའི་ཡན་ལག་ཚང་བའི་ཕྱིར་རོ། །སྤང་ལྟུང་བཞི་པོ་དེ་དག་མ་གཏོགས་པ་བདག་པོ་དང་འབྲེལ་བ་གཞན་རྣམས་ལ་ཅིར་འགྱུར་ནི། ལུང་ཞུ་བ་ལས། རང་གཞན་ཐུན་མོང་དུ་དབང་ན། འཁྲུར་འཇུག་ལ་སོགས་པ་ལྔ་ལ་ན་སྨད་དུ་དངོས་སུ་གསུངས་པས། དེ་དག་དང་རྒྱུ་མཚན་མཚུངས་པ་གཞན་རྣམས་ལ་ཡང་ན་སྨད་དུ་ཤེས་པར་བྱའོ། །གཉིས་པ་གོས་ལྷུང་སོགས་རང་གི་ལ་གཞན་གྱིར་འཁྲུལ་བ་ལ་ཅིར་འགྱུར་ནི། འཆང་བ་ལ་སོགས་པ་ལྔ་ལ་ལྟུང་མེད་དུ་འགྱུར་ཏེ་དངོས་པོ་དེ་གཞན་འབའ་ཞིག་དབང་བར་འདུ་ཤེས་འཁྲུལ་ན་ལྟུང་མེད་ཀྱི་ཡུལ་དུ་གཟུང་བས་ལྟུང་མེད་ཀྱི་ཀུན་སློང་དྲངས་པའི་ཕྱིར་ཏེ་དཔེར་ན་མེ་ལ་ཤིང་སྐམ་དུ་འདུ་ཤེས་འཁྲུལ་ནས་བཅད་པ་བཞིན་ནོ། །རིན་པོ་ཆེ་ལ་རེག་པ་ནི་ལོངས་པ་གཞིར་གཏོགས་ཀྱི་ན་སྨད་དུ་འགྱུར་ཏེ། ལོངས་པ་གཞིར་གཏོགས་ཀྱི་ཀུན་སློང་དྲངས་པའི་ཕྱིར་ལོངས་པ་གཞིར་གཏོགས་ཀྱི་ལྟུང་བར་འགྱུར་ལ་འདིའི་ལྟུང་བ་དངོས་གཞི་རྫོགས་པར་མི་བསྐྱེད་དེ་བསམ་པའི་དོན་དང་ཕྲད་པ་མེད་པའི་ཕྱིར་རོ། །འཁྲུར་འཇུག་ལ་སོགས་བཅུ་གཉིས་ནི་རང་རང་གི་ཆེས་ན་སྨད་དུ་འགྱུར་ཏེ། ན་སྨད་ཀྱི་ཀུན་སློང་དྲངས་པའི་ཕྱིར་དང༌། ན་སྨད་ཀྱང་རྫོགས་པར་མི་བསྐྱེད་དེ། ན་སྨད་ཀྱི་དོན་དང་ཕྲད་པ་མེད་པའི་ཕྱིར་རོ། །གསུམ་པ་གཞན་གྱི་ལ་རང་གིར་འཁྲུལ་བ་ལ་ཅིར་འགྱུར་ནི། བཅོ་བརྒྱད་པོ་ཀུན་ལ་ན་སྨད་པར་འགྱུར་ཏེ། ཊཱི་ཀ་ལས།རང་གི་མ་ཡིན་པ་ལ་རང་གིར་འདུ་ཤེས་པ་ནི་ཉེས་བྱས་སོ། ། ཞེས་སོ། །དེ་དག་ལ་དངོས་གཞིར་མི་འགྱུར་བ་ནི་བསམ་པའི་དོན་དང་ཕྲད་པ་མེད་པའི་ཕྱིར་རོ། །ལྔ་པ་རྒྱུ་མཚན་ནི་ཅིར་འགྱུར་གྱི་ཞར་ལ་ཅི་རིགས་པར་བཤད་ཟིན་ཏོ། །