དཔལ་འཇིག་རྟེན་དབང་ཕྱུག་སྤྱན་རས་གཟིགས་བཅུ་གཅིག་ཞལ་གྱི་ཆོ་གའི་སྒོ་ནས་ཚེ་འདས་ཀྱི་རུས་ཆོག་སྡུག་བསྔལ་ཚ་གདུང་ཞི་བའི་བདུད་རྩིའི་ཆུ་གཏེར།

དཔལ་འཇིག་རྟེན་དབང་ཕྱུག་སྤྱན་རས་གཟིགས་བཅུ་གཅིག་ཞལ་གྱི་ཆོ་གའི་སྒོ་ནས་ཚེ་འདས་ཀྱི་རུས་ཆོག་སྡུག་བསྔལ་ཚ་གདུང་ཞི་བའི་བདུད་རྩིའི་ཆུ་གཏེར་ཞེས་བྱ་བ་བཞུགས་སོ། །

ན་མོ་གུ་རུ་ལོ་ཀ་ནཱ་ཐ་ཡེ། རྒྱལ་བ་ཀུན་གྱི་ཐུགས་རྗེའི་ཡེ་ཤེས་ཀྱི། །རང་གཟུགས་སྒྱུ་འཕྲུལ་མི་ཟད་བརྩེ་བའི་བདག །བླ་མ་དབྱེར་མེད་རྗེ་བཙུན་སྤྱན་རས་གཟིགས། །འགྲོ་ཀུན་སྡིག་སྒྲིབ་སྦྱང་ཕྱིར་སྐྱབས་ཕྱག་འཚལ། །གང་ལ་བསྟེན་ན་སྲིད་ཞིའི་འཇིགས་ཆེན་ལས། །སྒྲོལ་བའི་གངས་ཅན་ལྷག་པའི་ལྷ་མཆོག་གི །སྒོ་ནས་རུས་ཆོག་ཅུང་ཟད་མདོར་བསྡུས་པ། །གོང་མའི་གསུང་ལས་བསྡུས་ཏེ་འབྲི་བར་བྱ། །དེ་ལ་འདིར་སྒྲུབ་ཐབས་རིན་འབྱུང་ལས་འཇིག་རྟེན་དབང་ཕྱུག་བཅུ་གཅིག་ཞལ་གྱི་ཆོ་ག་བྱང་ཆུབ་ལམ་གྱི་སྙིང་པོ་ཡེ་ཤེས་སྣང་བྱེད་ཀྱི་ཆ་ལག་ཏུ་དམིགས་ནས་རུས་ཆོག་འབྲི་བ་ལ། །རུས་པའི་ཆོ་ག་ལ་བརྟེན་ནས་སྡིག་པ་སྦྱོང་བ་ལ། ངན་སོང་སྦྱོང་རྒྱུད་ལས། །དེ་ནས་ཐལ་བར་གྱུར་བ་དང༌། །རྡོ་རྗེ་བསྡུ་བའི་སྔགས་ཀྱིས་ནི། །ཆོ་ག་བཞིན་ཏུ་བསྡུ་བར་བྱ། །ཐལ་བ་དེ་ཡང་རུས་པའི་རྡུལ། །སྔགས་ཀྱི་བཏབ་པའི་དྲི་ཆུ་དང༌། །བ་སྐྱེས་འོ་མ་ལ་སོགས་ལྔས། །སྦྱོང་བའི་སྔགས་ཀྱིས་བློ་ལྡན་གྱིས། །འབུམ་དུ་བཟླས་པ་རྫོགས་ནས་ནི། །ག་བུར་དྲི་ཡིས་བསྒོས་པ་ཡིས། །འཇིམས་པ་དང་ནི་བསྲེས་ནས་ཀྱང༌། །གཟུགས་སུ་བྱའོ་ཡང་ན་ནི། །མཆོད་རྟེན་གྱི་ནི་ལྷར་བྱས་ལ། །གཅིག་གམ་གཉིས་སམ་གསུམ་མམ་ལྔ། །ཡང་ན་བརྒྱ་རྩ་བརྒྱད་དུ་བྱ། །སྔགས་དང་ཕྱག་རྒྱས་བཏབ་ནས་ཀྱང༌། །འབུམ་ཕྲག་གཉིས་ཀྱི་བར་ཏུ་བཟླས། །དེ་ནས་མཆོད་རྟེན་འབར་འགྱུར་རོ། །ཡང་ན་གཟུགས་ཀྱི་ཞལ་འཛུམ་མམ། །དྲི་དང་བདུག་པ་འོད་ཀྱང་རུང༌། །སྣང་ངམ་ཡང་ན་ངད་ལྡང་ངོ༌། །ལྷ་ལ་སོགས་པའི་རྣམ་པ་ནི། །སྣ་ཚོགས་པར་ནི་སྣང་འགྱུར་རམ། །རྫུ་འཕྲུལ་རྣམ་པར་འཕྲུལ་བ་དང༌། །མེ་ཏོག་ལ་སོགས་འབར་བ་དང༌། །དུང་དང་རྔ་ལ་སོགས་པའི་སྒྲ །རིལ་བུ་པི་ཝཾ་ལ་སོགས་རྣམས། །ཅི་སྟེ་མཚན་མ་དེ་དག་ནི། །སྡིག་ཅན་བློས་ནི་མི་མཐོང་ན། །འབུམ་གྱི་ཕྲག་ནི་བརྒྱ་སྟོང་ངམ། །ཇི་སྲིད་མཚན་མ་བྱུང་བར་དུ། །དེ་བཞིན་གཤེགས་རྣམས་མཆོད་ནས་ནི། །མཉམ་པར་བཞག་པས་བཟླས་པར་བྱ། །དེ་ཡི་མཐར་ནི་མཁས་པས་ཀྱང༌། །མཚན་གཅིག་མི་ཉལ་ཐོག་ཐག་བཟླས། །དེ་ནས་དེ་ཡི་སྡིག་པ་ནི། །དག་པ་ཉིད་དུ་ངེས་པར་མཐོང༌། །ཞེས་གསུངས་པ་ལྟར་རུས་པ་བཀྲུ་བའི་ཆོ་གས་སྡིག་པ་སྦྱོང་ཚུལ་དང༌། །རུས་པ་ལས་སྐུའམ་མཆོད་རྟེན་བཏབ་པས་སྡིག་པ་སྦྱང་ཚུལ་དང༌། མཆོད་རྟེན་ལ་བསྐྱེད་ཅིང་བཟླས་པས་སྡིག་པ་སྦྱོང་བའོ། །དང་པོ་ནི། ཚེ་འདས་ཀྱི་རུས་པ་རས་དཀར་པོ་གཙང་མའི་ནང་དུ་བསྡུས་ལ། རུས་པ་ལ་ག་པུར་ལ་སོགས་པའི་དྲི་བཟང་གི་ཆུ་དང༌། བའི་འོ་མ་སོགས་བ་བྱུང་རྣམ་ལྔ་དང་བསྲེས་ལ་མེ་ཏོག་དཀར་པོ་བཀྲམ་པའི་ཁར་འཁོར་ལོ་དཀར་པོ་རྩིབ་བརྒྱད་འོད་ཕྲེང་དང་བཅས་པ་བྲིས་པའི་སྟེང་དུ་བཞག་ནས་སྒྲུབ་ཐབས་རིན་ཆེན་འབྱུང་གནས་ལས་དཔལ་འཇིག་རྟེན་དབང་ཕྱུག་སྤྱན་རས་གཟིགས་བཅུ་གཅིག་ཞལ་གྱི་བདག་སྐྱེད་དང༌།རྣམ་རྒྱལ་བུམ་པ་བསྐྱེད་པ་བཟླས་པ་དང་བཅས་པ་སྔོན་དུ་འགྲོ་བའི་སྒོ་ནས། གཙུག་དགུའི་རྒྱུད་ལས། རུས་པའམ་གོས་སམ་མིང་ལ་ནི། །རྡོ་རྗེ་ཆུ་ཡིས་བཀྲུ་བར་བྱ། །སྡིག་པ་བཀྲུ་བའི་སྔགས་ཀྱིས་ནི། །སྲིད་གསུམ་དྲི་མ་བཀྲུ་བར་བྱེད། །ཅེས་པའི་དགོངས་པ་ལྟར་སྤྱན་རས་གཟིགས་ཀྱི་སྒོ་ནས་ཚེ་འདས་སྒྲིབ་སྦྱོང་གི་ཆོ་ག་ཐར་ལམ་སྣང་བྱེད་སྒྲོན་མེའི་ཆོ་ག་བཞིན་བྲབ་པ་བྱ། དེ་ནས།རུས་བུའི་སྟེང་དུ་པཾ་ལས་པདྨ་འདབ་མ་བརྒྱད་ཀྱི་ལྟེ་བར་ཨ་ལས་ཟླ་བ་དཀར་པོའི་དཀྱིལ་འཁོར་གྱི་སྟེང་དུ་འཕགས་པ་སྤྱན་རས་གཟིགས་བཅུ་གཅིག་ཞལ་གྱི་ཐུགས་ཡེ་ཤེས་ལས་གྲུབ་པའི་ཧྲཱིཿཡིག་དཀར་པོ་འོད་ཟེར་སྣ་ལྔ་འཕྲོ་བ་གནས་པར་གྱུར། དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་དཔག་ཏུ་མེད་པ་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཀྱི་ཡོན་ཏན་རྣམས་སྡིག་སྒྲིབ་དག་བྱེད་ཡེ་ཤེས་ཀྱི་བདུད་རྩིའི་རྣམ་པར་བྱུང་བ་ཧྲཱི་ཡིག་ལ་ཐིམ། ཧྲཱི་ལས་སངས་རྒྱས་ཀྱི་ཐུགས་ཕྱིན་དྲུག་གི་ཡེ་ཤེས་ལས་གྲུབ་པའི་བདུད་རྩི་དཀར་པོ་རྒྱུན་མི་འཆད་པར་བབ་པ་རུས་བུ་ལ་ཐིམ་པས་ཚེ་འདས་ཀྱི་ཚེ་རབས་ཐོག་མེད་ནས་བསགས་པའི་སྡིག་པ་ཐམས་ཅད་དང་སྒྲིབ་གཉིས་བག་ཆགས་དང་བཅས་པ་བྱང་ཞིང་དག་པར་གྱུར། བར་བསམ་བཞིན་དུ་བུམ་ཆུས་རུས་བུ་བཀྲུ་ཞིང༌། ཐར་ལམ་སྣང་བྱེད་སྒྲོན་མེ་ལྟར།ཚེ་ལས་འདས་པ་རིགས་ཀྱི་བུ། །ཞེ་སྟང་རྒྱུ་ལས་ལོག་པའི་གནས། །འདི་ནས་འོག་གི་འཇིག་རྟེན་ན། །དམྱལ་བ་ཞེས་བྱ་འཇིགས་རུང་བའི། །སྡུག་བསྔལ་རྣམ་པ་སྣ་ཚོགས་པ། །མི་བཟད་ཁྱོད་ཀྱིས་མྱོང་འགྱུར་ཏེ། །དེ་ལས་བསྒྲལ་བར་བྱ་བའི་ཕྱིར། །བཟོད་པའི་ཆུ་བོ་འདིས་བཀྲུའོ། །གཟུངས་རིང་ཚར་གཅིག་གིས་སྣ་དྲངས་ཏེ། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པ་གཙོ་བོར་བཟླ་བར་བྱ། དེ་ནས་གཟུངས་སྔགས་དུ་མ་བརྗོད་ནས། ཚེ་ལས་འདས་པ་ཆེ་གེ་མོའི་ཚེ་རབས་ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་དུ་ཉོན་མོངས་པ་ཁོང་ཁྲོའི་དྲི་མ་ཐམས་ཅད་བྱང་ཞིང་དག་ནས་བཟོད་པའི་ཕ་རོལ་དུ་ཕྱིན་པ་ཡོངས་སུ་རྫོགས་ཏེ་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །དེ་བཞིན་དུ་ཐར་ལམ་སྣང་བྱེད་སྒྲོན་མེ་ལྟར་གཞན་ལྔ་ལ་ཁ་བསྒྱུར་ནས་གཟུངས་སྔགས་དང་བཅས་བརྗོད་པར་བྱའོ། །ཡང་ན་སྤྱི་འགྲོའི་ལྟར་འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང༌། །ཞེས་སོགས་བྱ་ན་རུང་ལ། གང་རུང་ལས་མི་དགོས་སོ། །གང་ལྟར་ཡང་དེ་ནས། འདོད་ཆགས་ཞེ་སྡང་གཏི་མུག་གསུམ། །ཞེས་སོགས་དང༌། དེ་ནས་ས་ནི་དུག་གི་ཕ་ཡིན་ཏེ། །ཞེས་སོགས་དང༌། གང་ལ་སེར་སྣའི་ཚིགས་བཅད་རེ་རེའི་མཚམས་སུ། ཡོན་ཏན་ཕུན་སུམ་ཚོགས་པ་དང་ལྡན་པའི་སངས་རྒྱས་ཀྱིས་ཚེ་འདས་ཀྱི་སྡིག་སྒྲིབ་བག་ཆགས་དང་བཅས་པ་སོགས་བཀྲ་མི་ཤིས་པ་ཐམས་ཅད་ཞི་ནས་ཆོས་སྒྲུབ་པའི་འགལ་རྐྱེན་མཐའ་དག་དང་བྲལ་ཏེ་བཀྲ་ཤིས་པ་ཐམས་ཆད་སྟེར་ཞིང་འགྲུབ་པར་གྱུར་ཅིག །དེ་ནས་པད་ཟླ་ཧྲཱི་ཡིག་དང་བཅས་པ་རུས་བུ་ལ་ཐིམ་པས་ཚེ་ལས་འདས་པ་ཆེ་གེ་མོའི་འཁོར་བའི་སྡུག་བསྔལ་སྒྲིབ་གཉིས་བག་ཆགས་དང་བཅས་པ་དག་པར་གྱུར་ཅིག །ཞེས་བཀྲ་ཤིས་དང་སྨོན་ལམ་བྱ། །དེ་ནས་ཉེ་དུ་མ་ཡིན་པས་རུས་པ་ཞིབ་པར་བཏགས་ལ་དྲི་བཟང་སྣ་ཚོགས་དང་བ་བྱུང་ལྔ་དང་བསྲེས་ཏེ་སྔར་གྱི་གདན་ལ་བཞག་ནས། བསངས་སྦྱངས།སྟོང་པའི་ངང་ལས་རུས་བུའི་སྟེང་དུ་པདྨ་འདབ་མ་བརྒྱད་པ་དང་ཟླ་བའི་གདན་ལ་འཕགས་པ་སྤྱན་རས་གཟིགས་དབང་ཕྱུག་སྟོན་ཀའི་ཟླ་བ་ལྟར་དཀར་བ། ཞེས་སོགས་ནས། སྐུ་ཅན་དུ་གྱུར། ཞེས་པའི་བར་བདག་བསྐྱེད་ལྟར་དང༌། དེའི་སྤྱི་གཙུག་ཏུ་སངས་རྒྱས་འོད་དཔག་མེད་དམར་པོ་མཉམ་བཞག་གི ཞེས་པ་ནས། སངས་རྒྱས་རབ་ཏུ་བྱུང་བའི་ཆ་ལུགས་ཅན་ནོ། །ཞེས་པའི་བར་བུམ་བསྐྱེད་ལྟར་བྱའོ། །དེ་ནས། རང་གི་སྙིང་ཁ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་འཕགས་པ་སྤྱན་རས་གཟིགས་བཅུ་གཅིག་ཞལ་གྱི་ལྷ་ཚོགས་ཀྱི་རྣམ་པར་ཨོཾ་བཛྲ་ས་མ་ཛཿ ཛཿཞེས་པས་ཡེ་ཤེས་སེམས་དཔའ་རྣམས་དམ་ཚིག་སེམས་དཔའ་སོ་སོའི་སྤྱི་བོར་བྱོན། ཧཱུཾ་ཞེས་པས་སོ་སོར་ཐིམ། བཾ་ཞེས་པས་ཡེ་ཤེས་པ་རྣམས་དམ་ཚིག་པ་སོ་སོའི་ཐུགས་ཀར་རྣམ་པ་ཐ་དད་དུ་སྣང་ཡང་ངོ་བོ་དབྱེར་མེད་དུ་བཞུགས། ཧོཿ་ཞེས་པས་ཚེ་འདས་ཀྱི་སྡིག་སྒྲིབ་སྦྱོང་བ་སོགས་སྒྲུབ་པ་པོའི་རེ་འདོད་སྐོང་བ་སོགས་ལ་ཐུགས་དགེས་བཞིན་བཞུགས་པར་གྱུར། ཛཿ་ཧཱུཾ་བཾ་ཧོཿ སྤྱན་དྲངས་པའི་ཡེ་ཤེས་སེམས་དཔའ་རྣམས་ལྷ་རང་རང་གི་ཐུགས་ཀར་བཞུགས་པར་གྱུར།༈ གཙོ་བོའི་ཐུགས་ཀའི་འཕགས་པ་སྤྱན་རས་གཟིགས་ཀྱི་ཐུགས་ཀར་པད་ཟླའི་སྟེང་དུ་ཧྲཱི་ཡིག་དཀར་པོའི་མཐར་སྔགས་ཕྲེང་ཁ་དོག་དཀར་པོ་གཡས་བསྐོར་སྦྲུལ་འཁྱིལ་བ་ལྟ་བུ་མི་གཡོ་བར་གནས་པ། དེ་ལས་ཡེ་ཤེས་ཀྱི་འོད་ཟེར་རྒྱུན་མི་ཆད་པར་བྱུང་ནས་རུས་བུ་ལ་ཐིམ་པས་ཚེ་ལས་འདས་པ་ཆེ་གེ་མོ་འཁོར་བའི་སྡུག་བསྔལ་ཐམས་ཅད་དང་སྡིག་སྒྲིབ་མ་ལུས་པ་དག་པར་གྱུར། ཞེས་བསམ་བཞིན་གཟུངས་རིང་ཚར་གཅིག་གིས་སྣ་དྲངས་ཏེ། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པ་གཙོ་བོར་ཅི་ནུས་བཟླ། དེ་ནས་མཆོད་པ་བྱིན་རླབས་བྱ་སྟེ། འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །འཁོར་ལོའི་བསྒྱུར་བའི་རིག་པས་བྱིན་རླབས་པའི། །ཞེས་སོགས་ཀྱིས་མཆོད། གང་སྐུ་ནམ་མཁའི་རང་བཞིན་མི་འདོར་ལ། །ཞེས་སོགས་ཀྱིས་བསྟོད། དེ་ནས། བཅོམ་ལྡན་འདས་འཕགས་པ་སྤྱན་རས་གཟིགས་ལྷ་ཚོགས་དང་བཅས་པ་འོད་དུ་ཞུ་ནས་རུས་བུ་ལ་ཐིམ་པས་རུས་བུ་ཡེ་ཤེས་ལྔའི་རང་བཞིན་ལས་གྲུབ་པའི་རིན་པོ་ཆེའི་ཕུང་པོར་གྱུར་བར་བསམ་མོ། །འདི་ནི་སློབ་དཔོན་སྐལ་བཟང་དགའ་བའི་སྦྱིན་སྲེག་ལས། དྲི་ཆུ་དང༌། བའི་རྣམ་ལྔ་དང་རུས་པ་བསྲེས་ཏེ་ངན་སོང་བའི་སྔགས་བཞི་ལས་གང་ཡང་རུང་བའི་སྔགས་འབུམ་མན་ཆད་བཟླས་ལ་འཇིམ་པ་དང་བསྲེས་ལ། ཞེས་གསུངས་པའི་ཁུང་གི་སྦྱོང་རྒྱུད་ཀྱི་ཐལ་བ་དེ་ཡང་རུས་པའི་རྡུལ། །སྔགས་ཀྱིས་བཏབ་པའི་དྲི་ཆུ་དང༌། །ཞེས་སོགས་ཀྱི་དགོངས་པའོ། །འཛོམ་ན་གོང་གི་བསྐྱེད་པ་དང་སྤྲོ་བསྡུས་ཀྱི་སྒོ་ནས་རུས་བུ་ལ་བཅུ་གཅིག་ཞལ་གྱི་སྙིང་པོ་དང༌། ཡིག་དྲུག་འབུམ་སོགས་བཟླས་སྟེ། ཀུན་སྙིང་གི་ཤི་བའི་སྦྱིན་སྲེག་ལས། ག་བུར་ལ་སོགས་པའི་ཆུ་དང༌། བའི་མར་དང༌། ཞོ་དང༌། ལྕི་བ་དང༌། གཅིན་དང༌། རུས་པ་བསྲེས་ཏེ་ངན་སོང་སྦྱོང་བའི་སྔགས་འབུམ་མན་ཆད་བཟླས་ལ། དཀྱིལ་འཁོར་གྱི་ལྷ་གང་ཡང་རུང་བའི་གཟུགས་སུ་བྱ་བའམ། ཡང་ན་མཆོད་རྟེན་བྱས་ཏེ། ཞེས་གསུངས་པའི་ཕྱིར་རོ། །གཉིས་པ་རུས་པ་ལས་སྐུའམ་མཆོད་རྟེན་བཏབ་པས་སྡིག་པ་སྦྱོང་བ་ལ། ས་བླང་བའི་ཆོ་ག་མ་བྱས་ནའང་ཆོག་པས་འདིར་མ་སྤྲོས་ལ། དེ་བྱ་འདོད་ན་ཟླ་འོད་དཀར་པོའི་སྣང་བ་ལས་གསུངས་པ་འདིར་བླངས་ནས་བྱའོ། །རུས་པའི་ཕྱེ་དང་ས་གཉིས་བསྲེས་ནས་སྤོས་ཆུ་བྱིན་གྱིས་རླབས་པ་ནི། ཙན་དན་དཀར་དམར་ལ་སོགས་པའི་སྤོས་དྲི་སྣ་ཚོགས་བསྒོས་པའི་ཆུ་བཤམས་ཏེ། སྤོས་ཆུའི་དབུས་སུ་ཨ་ཡིག་དཀར་པོ་ལས་བྱུང་བའི་ཟླ་བའི་དཀྱིལ་འཁོར་དྭངས་ཤིང་གསལ་བ། དེ་ལས་འོད་ཟེར་འཕྲོས་པས་སྤོས་ཆུའི་རང་བཞིན་ལ་ཁྱབ་སྟེ་ཡེ་ཤེས་ལས་གྲུབ་པའི་བདུད་རྩིར་གྱུར། བར་བསམ་བཞིན་དུ། ཨོཾ་ཨ་མྲྀ་ཏེ་ཧཱུཾ་ཕཊ། ཞེས་ལན་བདུན་བཟླས་པས་བྱིན་གྱིས་རླབས། དེ་ནས་གཟུངས་རིང་དང་ཡིག་དྲུག་དང༌། ཨོཾ་པྲ་མརྟ་ཡ་པྲ་མརྟ་ཡ་ཧཱུཾ་ཕཊ། ཞེས་བཟླ་བཞིན་སྤོས་ཆུས་ས་དང་རུས་པ་བསྲེས་ནས་སྦྲུས་ལ་འཇིམ་པ་མདུན་དུ་བཞག་སྟེ། འཇིམ་པ། བསངས་སྦྱངས། སྟོང་པའི་ངང་ལས་པདྨ་དང་ཟླ་བའི་གདན་གྱི་སྟེང་དུ་འཇིམ་པ་དེ་ཉིད་བྷྲུཾ་ལས་རྣམ་པར་སྣང་མཛད་ཀྱི་ཡེ་ཤེས་ལས་གྲུབ་པའི་རིན་པོ་ཆེའི་ཕུང་པོར་གྱུར། རང་གི་ཐུགས་ཀ་ནས་འོད་ཟེར་འཕྲོས། འོག་མིན་ནས་རྣམ་པར་སྣང་མཛད་ལ་སོགས་པ་སངས་རྒྱས་ཐམས་ཅད་ཀྱི་ཐུགས་རྒྱུད་བསྐུལ་ཏེ་ཐུགས་ཀ་ནས་ཡེ་ཤེས་ཀྱི་འོད་ཟེར་མཐའ་ཡས་པ་བྱུང༌། འཇིམ་པའི་ཕུང་པོ་དང་ཚེ་འདས་ཀྱི་གཙོར་བྱས་པའི་སེམས་ཅན་ཐམས་ཅད་ལ་ཐིམ་པས་སེམས་ཅན་གྱི་སྡིག་སྒྲིབ་སྦྱངས། འཇིམ་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལས་གྲུབ་པའི་རིན་པོ་ཆེའི་རང་བཞིན་དུ་གྱུར། བར་བསམ་བཞིན་དུ་བདུད་རྩི་ཐབས་སྦྱོར་གྱི་ཕྱག་རྒྱ་ལ་གཉིས་ཀའི་མཐེ་བོས་མཐེ་ཆུང་གི་སེན་མོ་མནན། སོར་མོ་བར་བ་གསུམ་ནས་ནས་ཙམ་རེ་ཕྱེས་ནས་བསྒྲེང་སྟེ་གཡོན་པ་གན་སྐྱལ་གྱི་གཡས་པ་ཁ་རྦུབ་ནས་སྦྱར་བས་འཇིམ་པ་ལ་རེག་སྟེ། ན་མོ་རརྣ་ཏྲ་ཡ་ཡ། བཻ་རོ་ཙ་ན་ཡ། པྲ་བྷ་ར་ཛ་ཡ། ཏ་ཐཱ་ག་ཏ་ཡ།ཨརྷ་ཏེ་སམྱཀྶཾབུདྡྷ་ཡ། ཏདྱ་ཐཱ། སུཀྵ་མེ་སུཀྵ་མེ། ས་མེ་ས་མེ་ཤནྟེ་ཤནྟེ། ཨ་པ་མ་རོ་སེ། ཨ་ན་ལམ་བྷེ། ཏ་ར་རམ་བྷེ། ཡ་ཤོ་ཝ་ཏི་མ་ཧཱ་དེ་ཛྭ་ནི་ར་ཀུ་ལེ། ནི་ར་ཝ་ཎེ། སརྦ་བུདྡྷ་ཨ་དྷི་ཥྛི་ཏེ་སྭཱ་ཧཱ། ཞེས་ཉེར་གཅིག་བཟླས་ནས་བྱིན་གྱིས་རླབས། དེ་ནས་འཇིམ་པ་དང་རང་གི་སྙིང་ཁ་ནས་འོད་ཟེར་དཔག་ཏུ་མེད་པ་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཏེ་འཕགས་པ་སྤྱན་རས་གཟིགས་ཀྱི་སྐུ་རེ་རེར་གྱུར། སངས་རྒྱས་སྲས་དང་བཅས་པ་མཆོད།དེ་ཐམས་ཅད་འོད་ཟེར་དང་བཅས་པ་ཚུར་འདུས་ཏེ་འཇིམ་པ་ལ་ཐིམ་པས་འཇིམ་པ་དེ་ཉིད་ཡེ་ཤེས་ལྔ་ལས་གྲུབ་པའི་རིན་པོ་ཆེ་སྣ་ལྔའི་ཕུང་པོར་གྱུར། བར་བསམ་ལ་སྟེགས་བུར་བཞག བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པ་དང༌། ན་མཿསརྦ་ས་མནྟ་བུདྡྷནཾ་ཨོཾབཛྲ་ཨ་ཡུ་ཥེ་སྭཱ་ཧཱ། ཞེས་པས་འཇིམ་པ་བཅད། འཇིམ་པའི་ཕུང་པོ་དེ་རྒྱུའི་རང་བཞིན་གྱི་སློབ་པའི་ལམ་དང་ས་བཅུའི་རང་བཞིན་དུ་གྱུར། བར་བསམ། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པ་དང༌། ཨོཾ་བཛྲ་ཨུད་བྷ་བ་ཡ་སྭཱ་ཧཱ། ཞེས་ལན་བདུན་སོགས་བརྗོད་བཞིན་འབི་འབི་བྱ་སྟེ། དེ་ཡང་རྒྱུ་ལམ་གྱི་ཆོས་སུ་བྱིན་གྱིས་རླབས་པའི་ཆེད་དུ་སྟེགས་བུར་བཞག་ནས་མཆོད་པས་མཐའ་བསྐོར། དེ་ནས། རང་གི་སྙིང་ཁ་དང་འབི་འབི་ལས་ཀྱང་ཡེ་ཤེས་ཀྱི་འོད་ཟེར་གྱི་སྤྲིན་ཆེན་པོ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པར་འཕྲོས་ཤིང་ཁྱབ་སྟེ་ཚེ་ལས་འདས་པ་ཆེ་གེ་མོའི་གཙོར་བྱས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཤིང་དག མི་བསྐྱོད་པའི་སྐུ་རེ་རེར་གྱུར།འཕགས་པ་རྣམས་མཆོད། འོད་ཟེར་གྱི་སྤྲིན་ཕུང་རྒྱལ་བ་སྲས་དང་བཅས་པ་ཐམས་ཅད་སླར་འདུས་ཏེ་འབི་འབི་ལ་ཐིམ་པས། འབི་འབི་དེ་ཉིད་ཡོངས་སུ་གྱུར་བ་ལས་གཞལ་མེད་ཁང་གྲུ་བཞི་སྒོ་བཞི་རྟ་བབས་སྣམ་བུ་བཞི་དང་ལྡན་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པཾ་ལྗང་གུ་ལས་སྣ་ཚོགས་པདྨ་འདབ་མ་བརྒྱད་པ་དེའི་ལྟེ་བ་ལ་ཨཱཿ་ལས་ཟླ་བའི་དཀྱིལ་འཁོར་སྟེང་དུ་ཧྲཱི་དཀར་པོ་ཡོངས་སུ་གྱུར་པ་ལས་བཅོམ་ལྡན་འདས་འཕགས་པ་སྤྱན་རས་གཟིགས་སྟོན་ཀའི་ཟླ་བ། ཞེས་པ་ནས། སངས་རྒྱས་རབ་ཏུ་བྱུང་བའི་ཆ་ལུགས་ཅན་ནོ། །ཞེས་པའི་བར་དང༌། མཚམས་ཀྱི་འདབ་མ་བཞིར་བུམ་པ་གྲུབ་པར་གྱུར། ཞེས་པ་ནས། རིགས་ལྔ་ཡེ་ཤེས་ལྔ་ཡི་དངོས་གྲུབ་སྩོལ། །ཞེས་པའི་བར་མདུན་བསྐྱེད་བཞིན་བྱ། དེ་ནས་རང་འཕགས་པ་སྤྱན་རས་གཟིགས་བཅུ་གཅིག་ཞལ་གསལ་བའི་སྙིང་ཀར་པད་ཟླའི་གདན་ལ་ཧྲཱིཿ་ལས་ཡེ་ཤེས་ཀྱི་འོད་ཟེར་དཔག་ཏུ་མེད་པ་བ་སྤུའི་བུ་ག་ཐམས་ཅད་ནས་འཕྲོས་ཏེ་འཇིག་རྟེན་གྱི་ཁམས་ཐམས་ཅད་ཁྱབ་འོད་ཟེར་གྱི་རྩེ་ལས་བྱུང་བའི་འཕགས་པ་སྤྱན་རས་གཟིགས་ལ་སོགས་པའི་མཁའ་དབྱིངས་ལ་ཁྱབ་པ་རྣམས་ཀྱིས་མཛད་པ་བཅུ་གཉིས་ཀྱི་སྒོ་ནས་སེམས་ཅན་གྱི་དོན་བྱས། སེམས་ཅན་ཐམས་ཅད་ཀྱི་སྡིག་སྒྲིབ་དག་ནས་ལུས་ངག་ཡིད་གསུམ་བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་སྐུུ་གསུང་ཐུགས་སུ་གྱུར། འོད་ཟེར་ལྷ་དང་བཅས་པ་སླར་འབི་འབིའི་ལྷ་ལ་ཐིམ་པར་གྱུར། བར་བསམ། མཆོད་པ་སྦྱིན་རླབས།རབ་འབྱམས་རྒྱ་མཚོ་དཔག་མེད་ན། །མཆོད་ཡོན། སོགས་ཚིགས་བཅད་སྔགས་བཅས་ཀྱིས་ཉེར་སྤྱོད་བདུན་དང༌། མཆོད་པའི་སྤྲིན་གྱི་གཟུངས་བརྗོད། འགྲོ་བ་རྒྱུད་ལྔ་འཁོར་བའི་དཀྱིལ་འཁོར་དུ། །ཞེས་སོགས་ཀྱིས་བསྟོད། ཚེ་ལས་འདས་པ་ཆེ་གེ་མོ་ངན་སོང་གསུམ་གྱི་འཇིགས་པ་ལས་སྐྱབས་དུ་གསོལ། ཞེས་གསོལ་བ་བཏབ། དེ་ནས་གུར་གུམ་གྱིས་བྲིས་པའི་ཨོཾ་ཧྲཱུཾ་དྲིཾ་ཧྲཱིཿཨཿདང༌། ཡིག་དྲུག་དང་རྟེན་སྙིང་གིས་ཟུང་འཇུག་བྱ། ཡང་ན་བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པའི་མཐར། ཚེ་ལས་འདས་པ་ཆེ་གེ་མོའི་ལས་ངན་སྡིག་སྒྲིབ་ཐམས་ཅད་ཤནྟིཾ་ཀུ་རུ་སྭཱ་ཧཱ། ཞེས་སྦྱར་ལ། གཟུངས་འཇུག་ཏུ། ཨོཾ་དྷརྨ་དྷཱ་ཏུ་གརྦྷེ་ཛྭ་ལ་སྭཱ་ཧཱ། ཞེས་པས་གཞུག་ཅིང༌། རང་གི་སྙིང་གའི་འོད་ཟེར་གྱིས་སངས་རྒྱས་དཔག་ཏུ་མེད་པ་རྡུལ་གྱི་གྲངས་དང་མཉམ་པ་སྤྱན་དྲངས་ཏེ་ཟུང་འཇུག་ལ་ཐིམ་པར་གྱུར། བར་བསམ། འབི་འབི་ལ་སྣུམ་བྱུགས་ཤིང། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པའི་མཐར། ཨོཾ་ཨ་ར་ཛེ་བི་ར་ཛེ་སྭཱ་ཧཱ། ཞེས་བརྗོད་ལ། བདག་གཞན་སེམས་ཅན་ཐམས་ཅད་དང་འབི་འབིའི་རང་བཞིན་དུ་བཞུགས་པའི་སློབ་པའི་ལམ་གྱི་ངོ་བོའི་ལྷ་དང་བཅས་པ་བྱང་ཆུབ་སེམས་ཀྱིས་ཁྱབ་པར་གྱུར། བར་བསམ། སྐོལ་ཕོར་དུ་གཞུགས་ཤིང། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པའི་མཐར། ཨོཾ་བཛྲ་དྷརྨ་དྷ་ཏུ་གརྦྷེ་ཧཱུཾ། ཞེས་བཟླ་ཞིང། འབི་བིའི་རང་བཞིན་གྱི་ལམ་གྱི་ངོ་བོའི་ལྷ་ཚོགས་རྣམས་དང་སེམས་ཅན་ཐམས་ཅད་རྒྱུན་མཐའི་ལམ་གྱི་ངོ་བོ་ཐབས་བདེ་བ་ཆེན་པོ་དང་ཤེས་རབ་སྟོང་ཉིད་རྟོགས་པའི་ཡེ་ཤེས་ཟུང་དུ་འཇུག་པའི་སྒོ་ནས་ཆོས་ཀྱི་དབྱིངས་སུ་སྙོམས་པར་ཞུགས་པར་གྱུར། བར་བསམ། དེ་ནས་སྐོལ་ཕོར་ཤེས་རབ་སྟོང་བ་ཉིད་དང༌། ལག་པ་ཐབས་བདེ་བ་ཆེན་པོའི་ཡེ་ཤེས་དང་བརྡུང་བ་ནི་ཐབས་ཤེས་དབྱེར་མེད་དུ་བསྲུབ་པ་སྟེ་ལམ་གྱི་འབྲས་བུ་ཡང་དག་པའི་མཐའ་ཆོས་སྐུ་མངོན་དུ་བྱས་པར་གྱུར། བར་བསམ་ཞིང༌། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པའི་མཐར། ཨོཾ་བཛྲ་མུད་ག་ར་ཨ་ཀོ་ཊ་ཡ་ཨ་ཀོ་ཡ་ཧཱུཾ་ཕཊ། ཞེས་བཟླ་བཞིན་བརྡུང༌། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པའི་མཐར། ཨོཾ་དྷརྨ་ར་ཏེ་སྭཱ་ཧཱ། ཞེས་བརྗོད་ཅིང༌། སློབ་ལམ་གྱི་རྒྱུ་ལས་ཡང་དག་པའི་མཐའ་ཆོས་སྐུ་མངོན་དུ་བྱས་པ་ནི་སྐུ་གསུམ་གྱི་རང་བཞིན་ཆོས་ཀྱི་སྐུའི་ངོ་བོ། དེའི་སྨད་དགེ་བ་བཅུ་དང༌། བང་རིམ་དང་པོ་ནས་ཁ་ཁྱེར་གྱི་བར་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན། སྲོག་ཤིང་ཤེས་པ་བཅུ་སྟེ་རྒྱུའི་ཆོས་བསོད་ནམས་ཀྱི་ཚོགས་སྤྲུལ་པའི་སྐུའི་ངོ་བོ། ཆོས་འཁོར་བཅུ་གསུམ་སྟོབས་བཅུ་མ་འདྲེས་པའི་དྲན་པ་ཉེ་བར་བཞག་པ་གསུམ་དང༌། ཆར་ཁེབ་ཐུགས་རྗེ་ཆེན་པོ། ཟླ་ཚེས་བྱང་ཆུབ་ཀྱི་སེམས། མེ་ལོང་ཡེ་ཤེས་བཞི། ཏོག་མངོན་ཤེས་དྲུག དར་གྱི་ཅོད་པཎ་དང་གདུགས་ཆོས་ཀྱི་རྒྱལ་པོར་གྱུར་པ། ཆུ་སྲིན་གྱི་རྒྱལ་མཚན་མཁའ་ལྡིང་གི་ཁ་ནས་བྱུང་བ་ཐོགས་པ་མེད་པའི་སྟོབས་དང་ཡེ་ཤེས་ཀྱི་ཤུགས་མངའ་བ། བ་དན་ཆོས་ཀྱི་གྲགས་པ་ཆེན་པོ། དྲིལ་བུ་སྙན་པ་ཕྱོགས་བཅུར་ཁྱབ་པ། རྡོ་རིང་མི་འཇིགས་པ་བཞི་བརྙེས་པ། ཐེམ་སྐས་སྲུང་བ་མེད་པ་གསུམ་དང་སོ་སོ་ཡང་དག་པ་རིག་པ་བཞི་དང༌། རྣམ་པར་ཐར་པའི་སྒོ་བཞི། དྲིལ་བུ་གསུང་དབྱངས་ཡན་ལག་དྲུག་ཅུ་དང་ལྡན་པའི་ངོ་བོ་སྟེ་འབྲས་བུ་ཡེ་ཤེས་ཀྱི་ཚོགས་ཆོས་ཀྱི་སྐུ་དང༌།མཛེས་ཤིང་ལྟ་བས་ཆོག་མི་ཤེས་པ་ནི་སེམས་ཅན་ཀུན་གྱི་དབང་པོ་ཚིམ་པར་བྱེད་པ་ལོངས་སྤྱོད་རྫོགས་པའི་སྐུའི་ངོ་བོ་དང༌། སྐུ་གསུམ་གྱི་བདག་ཉིད་རྒྱུ་དང་འབྲས་བུའི་ཆོས་ཐམས་ཅད་ཡོངས་སུ་རྫོགས་ནས་ཆོས་ཀྱི་སྐུ་ལས་མ་གཡོས་པར་གཟུགས་སྐུ་གཉིས་བྱུང་ནས་འཁོར་བ་མ་སྟོང་བར་ཏུ་འགྲོ་བའི་དོན་མཛད་པར་གྱུར། བར་བསམ་ཞིང༌། བསྐོལ་ཕོར་ནས་བྱུང་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་མ་ཧཱ་སུ་ཁ་བཛྲ་སུ་ར་ཏ་ས་མ་ཡ་སྟྭཾ།ཆོས་སྐུའི་སེམས་ཅན་གྱི་དོན་མཛད་པར་གྱུར། དེ་ནས། ཨོཾ་སརྦ་ཏ་ཐཱ་ག་ཏ་སམྦྷོ་ཀཱ་ཡ་ས་མ་ཡ་སྟྭཾ། ལོངས་སྐུའི་དག་པའི་སེམས་ཅན་རྣམས་ཀྱི་དོན་མཛད་པར་གྱུར། བར་བསམ། ཨོཾ་སརྦ་ཏ་ཐཱ་ག་ཏ་ནིརྨ་ཎ་ཀཱ་ཡ་ས་མ་ཡ་སྟྭཾ། སྤྲུལ་སྐུས་མ་དག་པའི་སེམས་ཅན་རྣམས་ཀྱི་དོན་མཛད་པར་གྱུར། བར་བསམ། རྗེས་མ་རྣམས་ལ་བསྡུས་ན། ཡིག་དྲུག་དང༌། ཨོཾ་བཛྲ་དྷརྨ་དྷ་ཏུ་གརྦྷེ་ཧཱུཾ། སྐོལ་ཕོར་དུ་གཞུགས་པར་བྱ། ཡིག་དྲུག་དང༌། ཨོཾ་བཛྲ་མུད་ག་ར་ཨ་ཀོ་ཊ་ཡ་ཨ་ཀོ་ཡ་ཧཱུཾ་ཕཊ། ཞེས་བཟླ་བཞིན་བརྡུང༌། སངས་རྒྱས་ཐམས་ཅད་ཀྱི་ཕྱག་རྒྱས་བཏབ་པར་བསམ།ཡིག་དྲུག་དང༌། ཨོཾ་དྷརྨ་ར་ཏེ་སྭཱ་ཧཱ། ཞེས་བརྗོད་ཅིང༌། བསྐོལ་ཕོར་ནས་བྱུང་བར་བྱའོ། །དེ་ནས་རབ་གནས་བྱ་སྟེ། འདི་ལ་ནི་གོང་དུ་ཚ་ཚ་དེ་སྐུ་གསུམ་གྱི་ངོ་བོ་རྒྱུ་འབྲས་ཀྱི་ཆོས་རྣམས་ཡོངས་སུ་རྫོགས་པར་སྒོམ་པས་དེ་དམ་ཚིག་སེམས་དཔར་བྱས་ནས་དེ་ལ་ཡེ་ཤེས་པ་བསྟིམ་པ་དབང་བསྐུར་བ་སོགས་བྱེད་པ་ཡིན་པར་གསུངས་པས་ཚ་ཚ་རྣམས་གདན་ལ་མཆོད་པ་དང་བཅས་པ་བཤམས་ནས། རང་གི་སྙིང་ག་ནས་འོད་ཟེར་འཕྲོས་རང་བཞིན་གྱི་གནས་ནས་འཕགས་པ་སྤྱན་རས་གཟིགས་གཙོ་བོར་གྱུར་པའི་ཕྱོགས་བཅུའི་སངས་རྒྱས་ཐམས་ཅད་ཀྱི་སྐུ་གསུམ་མཐའ་ཡས་པ་སྤྱན་དྲངས་ཨོཾ་བཛྲ་ས་མ་ཛཿམ་ལུས་སེམས་ཅན། སོགས་དང༌། བཅོམ་ལྡན་བསྐལ་བ། སོགས་ནས། འཁོར་དང་བཅས་ཏེ་གཤེགས་སུ་གསོལ། །ཨོཾ་དྷརྨ་ཀཱ་ཡ་སམྦྷ་ཀཱ་ཡ་ས་པ་རི་ཝ་ར་ཨེ་ཧྱ་ཧི། ཛཿ་ཡེ་ཤེས་པ་རྣམས་སྐུ་གསུམ་གྱི་ངོ་བོ་མཆོད་རྟེན་གྱི་སྟེང་དུ་བྱོན། ཧཱུཾ་མཆོད་རྟེན་ལ་ཐིམ་ནས་རྣམ་པ་སོ་སོར་གསལ་བར་གྱུར། བཾ་རྣམ་པ་སོ་སོར་མེད་པར་དམ་ཚིག་པ་དང་དབྱེར་མི་ཕྱེད་པར་གྱུར། ཧོཿཡེ་ཤེས་པ་རྣམས་མཆོད་རྟེན་གྱི་རྣམ་པར་ཐུགས་དགྱེས་བཞིན་འགྲོ་བའི་དོན་ལ་བཞུགས་པར་གྱུར།བར་མོས་བཞིན། ཛཿཧཱུཾ་བཾ་ཧོཿམང་དུ་བརྗོད། སུ་པྲ་ཏིཥྛ། མང་དུ་བརྗོད་ཅིང་མེ་ཏོག་འཐོར་བས། ཡེ་ཤེས་པ་རྣམས་རྟེན་ལ་བརྟན་པར་བཞུགས་པར་གྱུར། བར་མོས། དབང་བསྐུར་བཞུགས་སུ་གསོལ་བའི་མཐར་བྱུང་ཡང་འདིར་ལག་ལེན་བདེ་ཞིང་འགལ་བ་ཡང་མེད་པས། རང་གི་སྙིང་གའི་འོད་ཟེར་གྱིས་དབང་ལྷ་རྒྱལ་བ་རིགས་ལྔ་སྤྱན་དྲངས། ཇི་ལྟར་བལྟམ་པ།སོགས་དང༌། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པའི་མཐར། ཨོཾ་བཛྲ་དྷཱ་ཏུ་ཤྭ་རི་མ་ཏིཥྛ་ཧཱུཾ་ཨ་བྷི་ཥིཉྩ་མཾ། ཞེས་གསུངས་ཞིང་དབང་བསྐུར། སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་འོད་དཔག་མེད་སོགས་རིགས་ལྔས་དབུ་རྒྱན། དབང་གི་ལྷ་རྣམས་ཀྱང་རྟེན་ལ་ཐིམ་པར་གྱུར། བར་བསམ་ལ། སུ་པྲ་ཏིཥྛས། རྟེན་ལ་དབང་བསྐུར་བ་དེ་བརྟན་པར་གྱུར། བར་མོས། དེ་ནས་མཆོད་པ་བྱིན་གྱིས་རླབས་ཏེ། འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །སོགས་ཀྱིས་ཉེར་སྤྱོད་ཕུལ། དེ་ནས། ཨོཾ་བཛྲ་ཨུ་ཥེ་སྭཱ་ཧཱ། ཞེས་པས་སྲོག་ཤིང་འབུལ་ཏེ་ཚྭ་ཚྭ་ལ་ལ་ཡང་མཚོན་བྱེད་ཙམ་ཕུལ་ནས།སེམས་ཅན་ཤེས་བཅུ་ལྡན་གྱུར་ཅིག །བསྟན་པ་ཡུན་རིང་གནས་པར་ཤོག །སེམས་ཅན་ལྷག་བསམ་དག་པ་ཡིས། །ཀུན་བཟང་སྨོན་ལམ་འཇུག་པར་ཤོག །འཁོར་ལོ་གསུམ་བསྐོན་ལ། ཨོཾ་སྲ་མ་ད་ན་ཡེ་སྭཱ་ཧཱ། ཁམས་གསུམ་སེམས་ཅན་མ་ལུས་པ། །སྟོབས་དང་མ་འདྲེས་ཆོས་དང་ནི། །དྲན་པ་ཉེར་བཞག་རྣམ་ཐར་བརྒྱད། །ཡེ་ཤེས་བཞི་སོགས་ལྡན་གྱུར་ཤོག །དར་གྱི་ཅོད་པན་ཕུལ་ལ།ཨོཾ་སད་ཀ་ལཾ་པ་སྭཱ་ཧཱ། སེམས་ཅན་རྣམས་ནི་མ་ལུས་པའི། །བདེ་བར་གཤེགས་པའི་སྐུ་གཟུགས་ལ། །དར་དང་ལྷབ་ལྷུབ་ལ་སོགས་པའི། །བྱང་ཆུབ་བར་ཏུ་མཆོད་པར་ཤོག །བ་དན་ཕུལ་ལ། པ་ད་ཀ་སྭཱ་ཧཱ། སེམས་ཅན་རྣམས་ནི་མ་ལུས་ལ། །ཕྱོགས་བཅུར་བསྟན་པའི་བ་དན་གྱིས། །འཚེ་བ་མེད་ཅིང་ཆོས་ལྡན་པས། །གྲགས་པས་རྒྱས་པར་འགེངས་པར་ཤོག །ཆུ་སྲིན་གྱི་རྒྱལ་མཚན་ཕུལ་ལ། ཀུམྦྷི་ར་དྷྭ་ཛ་སྭཱ་ཧཱ། འཁོར་བ་མ་སྟོང་བར་དུ་ནི། །བདུད་བཞི་དག་ལས་ལེགས་རྒྱལ་ནས། །སྟོན་པའི་བསྟན་པ་ཟབ་མོ་དག །མི་ནུབ་རྒྱལ་མཚན་ཐོབ་པར་ཤོག །གདུག་ཕུལ་ལ། ཨོཾ་པྲ་ན་ཡེ་སྭཱ་ཧཱ། ཁམས་གསུམ་སེམས་ཅན་མ་ལུས་པས། །ཉོན་མོངས་ཚད་པས་གདུང་བ་ལ། །ཐུགས་རྗེ་བྱང་ཆུབ་སེམས་ཀྱི་གདུགས། །ཕུབ་པས་བདེ་བས་ཚིམ་གྱུར་ཅིག །མེ་ཏོག་ཕུལ་ལ། ཨོཾ་རརྣ་མ་ལེ་དྲཾ། འཁོར་བའི་སེམས་ཅན་མ་ལུས་ཀུན། །མཚན་དང་དཔེ་བྱད་རྫོགས་ཐོབ་ནས། །བལྟ་བས་མི་ངོམས་གཟུགས་ཀྱིས་ནི། །སེམས་ཅན་དོན་རྣམས་རྫོགས་བྱེད་ཤོག །གདན་ཕུལ་ལ། ཨོཾ་སུ་ན་དྷ་རེ་ཛ་ཡེ་སྭཱ་ཧཱ། །སེམས་ཅན་མ་ལུས་སངས་རྒྱས་ཏེ། །སྟོབས་བཅུ་ལྡན་པ་གླང་པོའི་གདན། །མི་འཇིགས་སེང་གེའི་གདན་དང་ལྡན། །རྫུ་འཕྲུལ་རྐང་བ་རྟ་ཡི་གདན། །དབང་བཅུ་ཐོབ་པ་རྨ་བྱའི་གདན། །ཐོགས་མེད་ཤུགས་ལྡན་མཁའ་ལྡིང་གདན། །སྐྱོན་གྱི་མ་གོས་པདྨའི་གདན། །རང་བཞིན་འོད་གསལ་ཉི་ཟླ་ཡི། །གདན་རྣམས་མྱུར་ཏུ་ཐོབ་པར་ཤོག །ཅེས་བྱའོ། །དེ་ནས། ཨོཾ་དྷཱ་ར་དྷ་ར་མི་ལི་ཛ་ལེ་སྭཱ་ཧཱ། ཞེས་ཞལ་ཡས་ཁང་དུ་གཤེགས་སུ་གསོལ་ལོ། །ཇི་ལྟར་ཆོས་དབྱིངས་དག་པ་ཡི། །གནས་སུ་བསམ་ཤེས་བཞུད་པ་ལྟར། །བདག་སོགས་སེམས་ཅན་ཐམས་ཅད་ཀྱང༌། །དག་པའི་གནས་སུ་གཤེགས་གྱུར་ཅིག །དེ་ནས། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་གཞུགས་སུ་གསོལ་ཏེ། རིན་ཆེན་གཞལ་ཡས་ཆོས་དབྱིངས་སུ། །སེམས་ཅན་དོན་དུ་བརྩེར་དགོངས་ལ། །ཇི་སྲིད་སེམས་ཅན་བྱང་ཆུབ་པར། །དེ་སྲིད་དུ་ནི་བཞུགས་པར་མཛོད། །དེ་ནས་ཚ་ཆོག་ཙམ་ལས་མི་བྱེད་ན་བུམ་བསྟོད་བཞིན། འགྲོ་བ་རྒྱུད་ལྔ། སོགས་ཀྱིས་བསྟོད། ཕྱོགས་བཅུ་ན་བཞུགས་པའི་ཞེས་སོགས་ཀྱིས་བརྟན་བཞུགས། །ཚེ་འདས་ལ་སྨོན་ལམ་གདབ་པ་དང༌། བཀྲ་ཤིས་རྣམས་བྱས་ཏེ་དཀྱིལ་འཁོར་དང་འབྲེལ་ན་རྗེས་ཀྱི་ཆོ་ག་བྱའོ། །

གསུམ་པ་མཆོད་རྟེན་ལ་བསྐྱེད་ཅིང་བཟླས་པའི་སྡིག་པ་སྦྱོང་བ།

གསུམ་པ་མཆོད་རྟེན་ལ་བསྐྱེད་ཅིང་བཟླས་པའི་སྡིག་པ་སྦྱོང་བ་ལ།

མཆོད་རྟེན་ལ་བསྐྱེད་བཟླས་ཀྱི་སྡིག་སྦྱོང་དངོས་ནི། ཡང་རྒྱུད་ལས། གཟུགས་སུ་བྱའམ་ཡང་ན་ནི། །མཆོད་རྟེན་གྱི་ནི་ལྟར་བྱས་ལ། །ཞེས་སོགས་དང༌། ཡང་ན་བརྒྱ་རྩ་བརྒྱད་དུ་བྱ། །སྔགས་དང་ཕྱག་རྒྱས་བཏབ་ནས་ཀྱང༌། །འབུམ་ཕྲག་གཉིས་ཀྱི་བར་ཏུ་བྱ། །དེ་ནས་མཆོད་རྟེན་འབར་གྱུར་རོ། །ཞེས་སོགས་ཀྱི་དགོངས་པ་ལ་བརྟེན་ནས་མཆོད་རྟེན་ལ་བརྟེན་པའི་སྡིག་སྦྱོང་བྱེད་པ་ནི། ཐོག་མར་བརྒྱུད་འདེབས་ཀྱི་མཐར། ཆོས་ཐམས་ཅད་རང་བཞིན་གྱིས་རྣམ་པར་དག་པའོ། །ཞེས་མི་གནས་པའི་འདུ་ཤེས་བསྐྱེད། ཚེ་ལས་འདས་པ་ཆེ་གེ་མོའི་གཙོ་བྱས་པའི་སེམས་ཅན་ཐམས་ཅད་བདེ་བ་དང་ལྡན་པར་བྱའོ། །སྡུག་བསྔལ་དང་བྲལ་བར་བྱའོ། །སྙམ་པའི་ངང་ནས། ངོ་མཚར་ཆེན་པོ་གྲངས་མེད་པའི་བརྩོན་འགྲུས་དང་ལྡན་པའི་སངས་རྒྱས་བཅོམ་ལྡན་འདས་ཐམས་ཅད་བདག་ལ་དགོངས་སུ་གསོལ། །བདག་གིས་སེམས་ཅན་ཐམས་ཅད་དབུགས་དབྱུང་ངོ༌། །བདུད་ལ་སོགས་པའི་ཕས་ཀྱི་རྒོལ་བ་བགེགས་དང་ལོག་འདྲེན་ཐམས་ཅད་ཕམ་པར་བགྱིའོ། །སེམས་ཅན་རྣམས་ཉིང་མཚམས་སྦྱོར་བའི་ཉོན་མོངས་པའི་རྙོག་པ་བསལ་བར་བགྱིའོ། །ང་རྒྱལ་གྱི་རི་བོ་བརྙིལ་བར་བགྱིའོ། །སྐྱེ་བའི་ལྗོན་ཤིང་རྩད་ནས་གཅོད་དོ། །འཆི་བདག་གི་ཉི་མ་ཕྱེ་མར་བརླག་གོ །མ་རིག་པའི་མུན་པ་བསལ་བར་བགྱིའོ། །མ་དད་པ་དང་ཕྱི་རོལ་བ་དག་དང་ལྟ་བ་ཕྱིན་ཅི་ལོག་པ་དག་ཡང་དག་པའི་ལྟ་བ་ལ་གཟུད་ཅིང་དད་པར་བགྱིའོ། །ལས་ཀྱི་ཆུ་བོ་བཟློག་པར་བགྱིའོ། །སྲིད་པའི་རྒྱ་མཚོ་བསྐམ་པར་བགྱིའོ། །ཆོས་ཀྱི་སྒྲོམ་མེ་རབ་ཏུ་སྦར་བར་བགྱིའོ། །བྱང་ཆུབ་ཀྱི་ལམ་ལ་བསྟེན་པར་བགྱིའོ། །བཟོད་པ་དང་ངེས་པ་ལ་གཟུད་པར་བགྱིའོ། །བསམ་གཏན་གྱི་བདེ་བ་ལ་ཆེར་བརྩལ་ཏོ། །འདོད་ཆགས་ཀྱི་མེ་དཔུང་ཞི་བར་བགྱིའོ། །ཞེ་སྡང་གི་མཚོན་རྣོན་བཅིལ་བར་བགྱིའོ། །བདེ་བ་ལ་གཟུད་དོ། །ཕྲག་དོག་གི་འཚུབ་མ་ཞི་བར་བགྱིའོ། །སེར་སྣའི་མདུད་པ་དགྲོལ་བར་བགྱིའོ། །སྡུག་བསྔལ་ཐམས་ཅད་ཞི་བར་བགྱིའོ། །འཇིགས་པ་མ་མཆིས་པར་བགྱིའོ། །བདེ་བ་ཆེན་པོའི་གྲོང་ཁྱེར་དུ་གནས་པར་བགྱིའོ། །དེ་བས་ན་བདག་ལ་ལས་ཀྱི་དངོས་གྲུབ་མཆོག་སྩོལ་ནས་གནང་བར་མཛད་དུ་གསོལ། ཞེས་བསམ་ཞིང་བརྗོད་ནས། བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་བདག་བུམ་བཟླས་པ་སྔོན་དུ་སོང་ནས་དཀྱིལ་འཁོར་གྱི་དབུས་སུ་ཚ་ཚ་བཞག་པའི་མཐའ་མཆོད་པས་བསྐོར་ནས།ཚ་ཚ་བསངས་སྦྱངས། སྟོང་པའི་ངང་ལས་མཆོད་རྟེན་གྱི་བུམ་པའི་ནང་དུ་རཾ་ལས་ཉི་མའི་སྟེང་དུ། ཞེས་པ་ནས། པདྨ་ཧྲཱིཿདང་བཅས་པ་ཡོངས་སུ་གྱུར་པ་ལས། ཚེ་ལས་འདས་པ་ཆེ་གེ་མོ་དེ་ཉིད་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་སྟོན་ཀའི་ཟླ་བ། ཞེས་པ་ནས། རིགས་ལྔ་ཡེ་ཤེས་ལྔ་ཡི་དངོས་གྲུབ་སྩོལ། །ཅེས་པའི་བར་མདུན་བསྐྱེད་ལྟར་བྱའོ། །དེ་ནས་བཟླས་པ་ནི། བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་ཐུགས་ཀར་པདྨ་དང་ཟླ་བའི་སྟེང་དུ། ཧྲཱིཿཡིག་དཀར་པོ་འོད་ཟེར་སྣ་ལྔ་འཕྲོ་བ་གནས་པར་གྱུར། དེའི་མཐར་ཡིག་དྲུག་དཀར་པོ་གཡས་སྐོར་སྦྲུལ་འཁྱིལ་བ་ལྟ་བུ་མི་གཡོ་བར་གནས་པ།དེ་ལས་ཡེ་ཤེས་ཀྱི་འོད་ཟེར་གྲངས་མེད་པ་འཕྲོས་ནས་འཕགས་པ་ཐུགས་རྗེ་ཆེན་པོའི་སྐུ་གྲངས་མེད་པའི་སྤྲིན་ཕུང་གིས་ནམ་མཁའི་མཐའ་ཀླས་ཤིང་ཆོས་ཀྱི་དབྱིངས་དང་མཉམ་པར་གྱུར་ནས་འཇིག་རྟེན་ཐམས་ཅད་བྱིན་གྱིས་རླབས་ནས་འགྲོ་བ་ཀུན་གྱི་དོན་མཛད་ཅིང་རེ་བ་བསྐངས་ནས་སླར་འདུས་ཚེ་ལས་འདས་པ་ཆེ་གེ་མོ་ལྷར་གསལ་བ་དེ་ཉིད་ཀྱི་དབུའི་སྤྱི་གཙུག་དང་ཐུགས་ཀར་ཐིམ་པས་ཚེ་རབས་ཐོག་མེད་ནས་བསགས་པའི་ལས་དང་ཉོན་མོངས་པ་ལ་སོགས་པའི་སྒྲིབ་པ་ཐམས་ཅད་རྣམ་པར་དག་སྟེ།ལུས་ངག་ཡིད་གསུམ་བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་སྐུ་གསུང་ཐུགས་སུ་གྱུར། བར་བསམ་བཞིན་གཟུངས་རིང་ཚར་གཅིག་གིས་སྣ་དྲངས་ཏེ། བཅུ་གཅིག་ཞལ་གྱི་སྙིང་པོ་དང༌། ཡི་གེ་དྲུག་པ་གཙོ་བོར་བཟླ་བར་བྱའོ། །སྤྲོ་བསྡུ་འདི་སྐབས་དང་སྐབས་སུ་ཡང་ཡང་བསྐྱར་བར་བྱ། དེ་ནས་མཆོད་པ་བྱིན་རླབས་བྱ། དེ་ནས་རབ་འབྱམས་རྒྱ་མཚོ་དཔག་མེད་ན། །ཞེས་སོགས་ཀྱི་ཉེར་སྤྱོད་དང༌། ཨོཾ་བཀྲ་ཤིས་ལྷ་མོ་སོགས་ཀྱིས་རྟགས་བརྒྱད་དང༌། གསེར་གྱི་འཁོར་ལོ་ནོར་བུ་རིན་པོ་ཆེ། །ཞེས་སོགས་ཀྱིས་སྣ་བདུན་དང༌། རྒྱལ་བའི་དཀྱིལ་འཁོར་མཆོད་ལ་མངོན་དགའ་བའི། །ཞེས་སོགས་ཀྱིས་རྣམ་ལྔ་དང༌། མེ་ལོང་ལི་ཁྲི་ཡུངས་དཀར་བིལྦ་དང༌།ཞེས་སོགས་ཀྱིས་རྫས་བརྒྱདཕུལ། དེ་ནས། འགྲོ་བ་རྒྱུད་ལྔ་འཁོར་བའི་དཀྱིལ་འཁོར་དུ། །ཞེས་སོགས་དང༌། དུས་གསུམ་བདེ་བར་གཤེགས་པ་ཆོས་ཀྱི་སྐུ། །ཞེས་པ་ནས།མཆོག་ཏུ་དད་པས་ཕྱག་འཚལ་ལོ། །ཞེས་པའི་བར་གྱིས་བསྟོད། བདག་གིས་ཚེ་ལས་འདས་པ་ཆེ་གེ་མོའི་གཙོ་བྱས་པའི་སེམས་ཅན་རྣམས་ཀྱི་དོན་དུ་ཆོས་སྐུའི་གཟུགས་བརྙན་བཞེངས་སུ་གསོལ་ཏེ། མཆོད་ཅིང་བསྟོད་དེ་བསྒྲུབ་པ་ལ་སོགས་པ་རྣམ་པར་དག་པའི་དགེ་བའི་རྩ་བ་འདིས་ཆེ་གེ་མོ་ལ་སོགས་པའི་སེམས་ཅན་ཐམས་ཅད་འཁོར་བ་དང༌། དེའི་རྒྱུ་ལས་ཉོན་བག་ཆགས་ཐམས་ཅད་རྩད་ནས་གཅོད་དེ་སྐུ་གསུམ་ཡོངས་སུ་རྫོགས་པར་གྱུར་ཅིག །མཆོད་རྟེན་གཅིག་བྱས་པའི་ཀྱང་ཆེ་གེ་མོ་ལ་སོགས་པ་སེམས་ཅན་ཐམས་ཅད་ཚེ་རབས་བྱེ་བར་བསགས་པའི་སྡིག་པ་ཐམས་ཅད་བྱང་བར་གྱུར་ཅིག །ཞེས་སོགས་སྨོན་ལམ་རྒྱ་ཆེར་གདབ་བར་བྱའོ། །ཆོ་ག་འདི་ལ་བརྩོན་པས་ཚེ་འདས་ངན་སོང་ལས་གྲོལ་བའི་རྟགས་རྒྱུད་ལས།དེ་ནས་མཆོད་རྟེན་འབར་གྱུར་རམ། ཞེས་སོགས་འབྱུང་བ་ན་མཚན་གཅིག་ཏུ་མི་ཉལ་བར་མཆོད་རྟེན་ལ་བརྟེན་པའི་ཆོ་གའི་བཟླས་པ་བྱ་བ་ཡིན་ནོ། །ཚ་ཚའི་ཆོ་ག་རྐྱང་པའམ། ཚ་ཆོག་དང་མཆོད་རྟེན་ལ་བརྟེན་པའི་སྡིག་སྦྱོང་གི་ཆོ་གས་བསྒྲུབ་པའི་ཚ་ཚ་རྣམས་ནི་ལམ་གྱི་བཞི་མདོར་ཁང་བུ་བརྩེགས་པའི་མཆོད་རྟེན་ལ་བཞག་པ་དང༌། ཚ་ཚ་ཆུར་གཤེགས་པའི་སྒོ་ནས་སྡིག་སྦྱང་གི་ཚུལ་ཚ་ཚ་ཆུ་བོར་གཤེགས་པའི་ཆོ་ག་འཕགས་པ་སྤྱན་རས་གཟིགས་བཅུ་གཅིག་ཞལ་གྱི་བདག་སྐྱེད་སྔོན་དུ་འགྲོ་བ་མ་གཏོགས་འཇམ་པའི་དབྱངས་ངོས་ཐུབ་བསྟན་དགེ་ལེགས་རྒྱ་མཚོའི་མཛད་པའི་ཟླ་འོད་དཀར་པོའི་སྣང་བ་ལས་གསུངས་པ་དང་ཁྱད་མེད་པས་འདིར་མ་སྤྲོས་ལ། དེར་གསུངས་པ་ལྟར་བྱའོ། །

སྨྲས་པ།རྒྱལ་ཀུན་བརྩེ་བ་ཆེན་པོས་ཉེར་དགོངས་ནས། །འགྲོ་ཀུན་སྡུག་བསྔལ་ཚ་གདུང་སེལ་བའི་སྨན། །ལེགས་པར་མཁྱེན་ནས་དུས་ལས་མི་ཡོལ་བར། །ཞི་བསིལ་ཆོས་སྒོ་མཐའ་ཡས་སྟོན་པར་མཛད། །གང་གི་བརྩེ་ཆེན་ཀློང་ནས་རྡོལ་བ་ཡི། །ངན་སོང་སྡུག་བསྔལ་སྦྱོང་བའི་ཆོ་ག་ཀུན། །ཚུལ་བཞིན་བྱས་ན་སྡིག་ཅན་སྡིག་ལས་གྲོལ། །དེ་སླད་ཡིད་གཉིས་སྒྲོག་གིས་མ་བཅིངས་བར། །རྒྱལ་གསུང་རུས་ཆོག་ཐབས་ཚུལ་ལེགས་བརྩོན་ན། །འགྲོ་ཀུན་སྡིག་དང་སྡུག་བསྔལ་ལས་གྲོལ་ཏེ། །བླ་མེད་བྱང་ཆུབ་མྱུར་ཏུ་ཐོབ་པར་འགྱུར། །འདི་བྲིས་དགེ་བས་མཁའ་མཉམ་སེམས་ཅན་ཀུན། །སྲིད་ཞིའི་སྡུག་བསྔལ་ཚ་གདུང་རབ་ཞི་ནས། །འཕགས་མཆོག་སྤྱན་རས་གཟིགས་ཀྱི་གོ་འཕང་མཉེས། །ཕན་དང་བདེ་བའི་གནས་སུ་གྱུར་བར་སྨོན། །ཞེས་དཔལ་འཇིག་རྟེན་དབང་ཕྱུག་སྤྱན་རས་གཟིགས་བཅུ་གཅིག་ཞལ་གྱི་ཆོ་གའི་སྒོ་ནས་ཚེ་འདས་ཀྱི་རུས་ཆོག་སྡུག་བསྔལ་ཚ་གདུང་ཞི་བའི་བདུད་རྩིའི་ཆུ་གཏེར་འདི་ནི་ཤུག་ནང་དགོན་གྱི་རྡོ་རྗེ་སློབ་དཔོན་དཀོན་གསལ་གྱིས་རྡོར་དྲིལ་དར་བཅས་གསུང་གིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པ་དགེའོ། །འདིས་ཀྱང་རྒྱལ་བསྟན་ཡུན་རིང་དུ་གནས་ནས་འགྲོ་བའི་སྡུག་བསྔལ་ཞི་བར་གྱུར་ཅིག ། །།སརྦ་མངྒ་ལཾ། །